ᐃᓕᓐᓂᐊᖅᑎᑦ ᖃᐅᔨᒪᓂᖅᓴᐅᓕᖅᐳᖅ ᐊᑭᑐᑎᒋᓂᖓᓄᑦ ᐱᓕᕆᓗᓂ ᑭᕙᓪᓕᕐᒥ ᐃᓚᐅᓚᐅᖅᖢᑎᒃ ᐱᔅᓂᔅᓕᕆᓂᕐᒥᒃ ᐃᓕᓐᓂᐊᕈᑎᖃᖅᖢᑎᒃ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᑕᖅᑭᐅᓚᐅᖅᑐᒥ.
ᑕᒪᒃᑯᐊ ᐃᓕᓐᓂᐊᕈᑎᒃᓴᐃᑦ ᐃᓕᓐᓂᐊᖅᑎᑎᒍᑕᐅᖁᔭᐅᓚᐅᖅᐳᑦ ᒍᕇᑦ 9-ᒥ ᐃᓕᓐᓂᐊᖅᑎᓄᑦ ᓈᓴᐅᑎᓕᕆᓂᕐᒧᑦ ᐃᓕᓐᓂᐊᖅᑎᑕᐅᒍᑕᐅᑉᓗᑎᒃ ᐊᒻᒪ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ. ᐃᓕᓐᓂᐊᖅᑎᑎᔨᖓᑦ ᓗᐃ ᕗᕋᐃᓐᓯᔅ ᐅᖃᓚᐅᖅᐳᖅ ᐃᓕᓐᓂᐊᖅᑎᑦ ᐃᓕᓐᓂᐊᖅᑎᑕᐅᓚᐅᕐᒪᑕ ᑮᓇᐅᔭᓂᒃ ᐊᑐᑦᓯᐊᕆᐊᖃᕐᓂᕐᒥᒃ, ᓂᐅᕕᖃᑦᑕᕐᓂᕐᒥᒃ ᐊᒻᒪ ᖃᓄᖅ ᑖᒃᓰᔭᐃᔭᕈᑎᑦ ᐱᓕᕆᐊᕆᔭᐅᕙᖕᓂᖏᓐᓄᑦ.
ᐃᓕᓐᓂᐊᖅᑎᑦ ᕿᓂᖅᑎᑕᐅᓚᐅᖅᐳᑦ ᐊᑭᖏᓐᓂᒃ ᐊᔾᔨᒌᖏᓐᓂᖏᓐᓂᒃ ᓂᐅᕕᕐᕕᖕᒥ ᐊᒻᒪ ᓇᐅᔮᑦ ᑯᐊᐸᒃᑯᖏᓐᓂ ᓄᓇᖓᓐᓂ. ᑖᒃᑯᐊ ᑲᑎᑕᐅᓚᐅᖅᑐᑦ ᐊᑭᖏᑦ 90, ᐃᓕᓐᓂᐊᖅᑎᑦ ᖃᐅᔨᓚᐅᖅᐳᑦ 37 ᓂᐅᕕᐊᒃᓴᐃᑦ ᐊᑭᑭᓐᓂᖅᓴᐅᓚᐅᕐᒪᑕ ᓂᐅᕕᕐᕕᖕᒥ, 32 ᐊᑭᑭᓐᓂᖅᓴᐅᑉᓗᑎᒃ ᑯᐊᐸᒃᑯᓐᓂ, ᐊᒻᒪ 21 ᐊᔾᔨᒌᒃᑐᓂᒃ ᐊᑭᖃᖅᖢᑎᒃ ᑕᒪᒃᑭᖕᓂ ᓂᐅᕕᕐᕕᖕᓂ.
ᕗᕋᐃᓐᓯᔅ ᐅᖃᓚᐅᖅᐳᖅ ᐃᓕᓐᓂᐊᖅᑎᑦ ᐃᓕᓐᓂᐊᕈᒪᓚᐅᕐᒪᑕ ᓱᖕᒪᑦ ᓂᕿᑦ ᐊᑭᑐᓗᐊᕐᒪᖔᑕ ᓄᓇᖓᓐᓂ.
“ᐃᓕᓐᓂᐊᖅᑎᑦ 18 ᐃᓚᐅᓚᐅᖅᐳᑦ ᖃᐅᔨᓴᖅᖢᑎᒃ ᐊᑭᖏᓐᓂᒃ, ᐊᒻᒪ ᑲᒪᓇᕆᔭᐅᓚᐅᖅᖢᓂᓗ,” ᐅᖃᓚᐅᖅᐳᖅ.
“ᐊᕕᒃᓯᒪᓚᐅᖅᖢᑎᒃ 9ᖑᑎᑕᐅᑉᓗᑎᒃ ᐃᓕᓐᓂᐊᖅᑎᑦ ᒪᕐᕉᑉᓗᑎᒃ, ᐊᑐᓂ ᖁᓕᓂᒃ ᖃᐅᔨᓴᖅᑎᑕᐅᑉᓗᑎᒃ ᐊᑭᖕᓂᒃ, ᑕᒪᐃᑎᒍᑦ ᓂᐅᕕᕐᕕᑦ ᖃᐅᔨᓴᖅᑕᐅᓚᐅᖅᐳᑦ.”
ᓇᐅᔮᓂ ᑯᐊᐸᑯᓐᓄᑦ ᐊᐅᓚᑦᓯᔨ ᑐᕈᐃ ᓚᐸᓛᒃ ᐃᓕᓐᓂᐊᕐᕕᓕᐊᓚᐅᖅᐳᖅ ᐅᖃᓪᓚᒋᐊᖅᑐᖅᖢᓂ ᐃᓕᓐᓂᐊᖅᑎᓄᑦ ᓱᖕᒪᑦ ᓂᕿᑦ ᐊᑭᑐᓗᐊᕐᒪᖔᑕ, ᖃᑉᓯᓂᒡᓗ ᑮᓇᐅᔭᓂᒃ ᐊᑐᖃᑦᑕᕐᓂᖏᓐᓄᑦ ᐊᑭᓕᖅᑐᐃᓂᕐᒧᑦ ᐱᓕᕆᔨᓂᒃ 43−ᓄᑦ ᑯᐊᐸᒃᑯᓐᓂ ᐊᒻᒪ ᐊᔾᔨᒌᖏᓐᓂᖏᑦ ᐊᒡᔭᖅᑕᐅᖃᑦᑕᕐᓂᖏᓐᓄᑦ ᐅᓯᔭᐅᖃᑦᑕᕐᓂᖏᓐᓄᓪᓗ ᐊᑭᒋᔭᐅᔪᑦ ᐅᒥᐊᕐᔪᐊᒃᑯᑦ ᑎᖕᒥᓲᒃᑯᓪᓗ.
ᓚᐸᓛᒃ ᐃᓕᓐᓂᐊᖅᑎᑎᓚᐅᖅᐳᖅ ᖃᐅᔨᑎᑦᖢᓂᒋᑦ ᑎᑎᕋᖅᓯᒪᔪᒃᑯᑦ ᐃᓕᓐᓂᐊᖅᑎᑦ, ᐊᒻᒪ ᐊᒥᓱᑦ ᐃᓕᓐᓂᐊᖅᑎᑦ ᖃᐅᔨᓚᐅᖅᐳᑦ ᐊᑭᖏᑦ ᐊᔾᔨᐅᖏᓐᓂᖏᓐᓄᑦ ᐅᒥᐊᕐᔪᐊᒃᑯᑦ ᑎᑭᑦᑐᑦ ᑎᖕᒥᓲᒃᑯᓪᓗ ᑎᑭᑦᑐᑦ ᑕᒪᓐᓇ ᑲᒪᓇᒻᒪᕆᓚᐅᖅᖢᓂ, ᐊᒻᒪ ᖃᑉᓯᑐᖃᑦᑕᕐᓂᖓᓄᑦ ᖃᐅᒻᒪᖁᑎᓄᑦ ᐊᑭᓕᐅᑎᒃ ᐅᖅᓱᐊᓗᖕᒧᓪᓗ ᐅᖁᖅᓴᐅᑎᓄᑦ ᓂᐅᕕᕐᕕᖕᓂ.
ᑭᓐᑐᕋ ᑭᖓᔭᒃ ᖁᕕᐊᒋᔭᖃᓚᐅᖅᐳᖅ ᐃᓕᓐᓂᐊᖅᑕᒥᓂᒃ ᐊᒻᒪ ᐅᖃᓚᐅᖅᖢᓂ ᖁᐊᖅᓵᕈᑎᒋᓚᐅᕐᒪᒋᑦ ᐃᓚᖏᑦ ᐃᓕᑉᐹᓪᓕᕈᑎᒋᔭᓂ.
“ᖁᐊᖅᓵᓚᐅᖅᐳᖓ ᖃᐅᔨᒐᒪ ᐊᔾᔨᒌᖏᓐᓂᖏᓐᓂᒃ ᐊᑭᖏᑦ ᐅᓯᔭᐅᔪᑦ ᐅᒥᐊᕐᔪᐊᒃᑯᑦ ᑎᖕᒥᓲᒃᑯᓪᓗ,” ᐅᖃᓚᐅᖅᐳᖅ ᑭᖓᔭᒃ.
“ᖃᐅᔨᒪᓚᐅᖏᓐᓇᒪ ᑎᖕᒥᓲᒃᑯᑦ ᐊᑭᑐᓂᖅᓴᒻᒪᕆᐊᓘᓂᖓᓄᑦ,” ᐅᖃᓚᐅᖅᐳᖅ ᑭᖓᔭᒃ.
ᒥᓚᓂ ᑲᐅᓇᒃ ᐅᖃᓚᐅᖅᐳᖅ ᖁᐊᖅᓵᓚᐅᕋᒥ ᖃᐅᔨᒐᒥ ᐊᑭᓕᐅᑕᐅᒋᐊᖃᖅᐸᒃᑐᑦ ᑯᐊᐸᒃᑯᓐᓄᑦ ᓂᐅᕕᖅᑎᒃᑯᓐᓄᓪᓗ, ᐊᓯᖏᓐᓄᓪᓗ ᓂᐅᕕᕐᕕᖕᓄᑦ ᐊᑭᓕᐅᒋᐊᖃᖅᐸᒃᑐᓂᒃ.
“ᑕᒪᒃᑯᐊ ᐃᓕᓐᓂᐊᕈᑎᒋᑉᓗᒋᑦ ᐊᑭᓕᐅᑕᐅᒋᐊᓖᑦ − ᐅᖅᓱᐊᓗᒃ, ᐊᒃᑕᖅᑕᐅᓂᖅ, ᖃᐅᒻᒪᖁᑎᑦ, ᐱᓕᕆᔨᓄᑦ ᑮᓇᐅᔭᒃᓴᐃᑦ − ᓂᕿᑉᑕ ᐊᑭᖏᓐᓄᑦ ᐃᓕᔭᐅᖃᑦᑕᖅᐳᑦ,” ᐅᖃᓚᐅᖅᐳᖅ ᑲᐅᓇᒃ.
ᐳᕆᔾᔭᑦ ᒪᓕᑭ ᐅᖃᓚᐅᖅᐳᖅ ᑐᑭᓯᐅᒪᑉᓗᓂᒋᑦ ᐊᑭᓕᐅᑕᐅᒃᑲᓐᓂᕆᐊᖃᖅᐸᒃᑐᑦ, ᓱᓕ ᑭᓯᐊᓂ ᐊᑭᑐᓗᐊᖅᐳᑦ.
“ᐊᑭᑐᔪᒻᒪᕆᐊᓘᕗᑦ ᓱᓕ ᓂᕿᑦ ᐊᑭᖏᑦ ᓇᐅᔮᓂ,” ᐅᖃᓚᐅᖅᐳᖅ ᒪᓕᑭ.
“ᓂᕿᑦᓯᐊᕙᐃᑦ, ᐃᓗᐊᖅᑐᒥᒃ, ᐊᑭᑭᓐᓂᖅᓴᐅᒋᐊᖃᕋᓗᐊᖅᐳᑦ.”
ᑎᐅᕈ ᐊᖑᑎᖑᐊ ᑕᐅᑐᒃᖢᓂᒋᑦ ᐃᒪᖅ ᐊᕙᓗᐊᖓᓂ ᑕᑕᓯᒪᓂᖓᓄᑦ, ᐃᓕᓐᓂᐊᖃᑎᖓᓕ ᑎᒍᒥᐊᖅ ᕼᐊᖅᐱ, ᑕᐅᑐᒃᖢᓂᐅᒃ ᐃᒥᖅ ᐊᕝᕙᓗᐊᖓ ᐃᒥᖅᑕᐅᓯᒪᓂᖓᓄᑦ.
“ᐊᑭᓗᒃᓯᕙᓪᓕᐊᓂᐊᖅᐳᑦ ᖃᖓᐅᒐᓗᐊᑭᐊᒃ,” ᐅᖃᓚᐅᖅᐳᖅ ᐊᖑᑎᖑᐊ.
“ᓯᑯᖃᖏᓐᓂᖅᓴᐅᓗᓂ ᑐᑭᖃᖅᐳᖅ ᐅᒥᐊᕐᔪᐊᖃᒃᑲᓐᓂᕐᓂᐊᕐᓂᖓᓄᑦ ᑕᒡᕗᖓ, ᐊᒻᒪ ᐃᒻᒪᖄ ᖃᖓᑭᐊᖅ, ᐊᖅᑯᑎᖃᕈᒫᖅᐳᒍᑦ ᖃᑉᓗᓈᑦ ᓄᓇᖓᓐᓄᑦ ᑲᓇᑕᒥ.”
ᕼᐊᖅᐱ ᐅᖃᓚᐅᖅᐳᖅ ᐃᒡᓗᐊᒍᖔᖅ ᑕᒪᓐᓇ ᑕᐅᑐᒃᖢᓂᐅᒃ.
“ᐊᑭᑦᑐᖅᐸᓪᓕᐊᑐᐃᓐᓇᕐᓂᐊᖅᐳᑦ ᓂᕿᑦ, ᖃᑉᓗᓈᑦ ᓄᓇᖓᓐᓂᓘᓐᓃᑦ, ᐊᑭᑦᑐᖅᐸᓪᓕᐊᖕᒪᑕ, ᐊᑭᑦᑐᖅᐸᓪᓕᐊᑐᐃᓐᓇᕐᓂᐊᖅᐳᑦ ᑕᒫᓂ,” ᐅᖃᓚᐅᖅᐳᖅ ᕼᐊᖅᐱ.