7-ᓂ ᑭᕙᓪᓕᕐᒥᐅᓂ ᒪᒃᑯᒃᑐᓂ ᐃᓚᒋᔭᐅᓚᐅᖅᐳᑦ 130−ᖑᔪᓂ ᖁᑦᑎᒃᑐᒥ ᐃᓕᓐᓂᐊᕐᕕᓂᑦ ᐊᒻᒪ ᓯᓚᑦᑐᖅᓴᕐᕕᒡᔪᐊᓂ ᐃᓕᓐᓂᐊᖅᑎᐅᔪᓂᑦ ᐃᓚᐅᖃᑕᐅᓚᐅᖅᑐᓂ ᐃᓕᓴᐃᔨᐅᔪᓂᑦ ᓄᓇᕐᔪᐊᓕᒫᓂᙶᖅᑐᓂᑦ 2018−ᒥ ᐃᓕᓐᓂᐊᖅᑎᑦ ᓯᑯᒦᑦᑐᑦ ᐃᖏᕐᕋᓂᕆᔭᖓᓂ ᐱᓇᖕᓇᒥ ᑲᓛᖦᖠᐅᑉ ᓄᓈᓐᓂ ᐊᒻᒪᓗ ᓄᓇᕘᑉ ᖁᑦᑎᒃᑐᒥ ᐅᑭᐅᖅᑕᖅᑐᖓᓐᓂ ᔪᓚᐃ 23−ᒥ ᐋᒍᔅᑎ 7−ᖑᕋᓱᐊᕐᓂᖓᓄᑦ.
ᑭᒡᒐᖅᑐᐃᓚᐅᖅᑐᑦ ᑭᕙᓪᓕᕐᒥ ᐃᖏᕐᕋᓂᐅᔪᒥ ᐅᑯᐊᖑᓚᐅᖅᐳᑦ ᐅᐊᐃᓐ ᒪᒃᐸ ᐊᒻᒪ ᑕᐱᓴ ᑕᑦᑐᐃᓂ ᐊᕐᕕᐊᕐᒥᐅᑕᑦ, ᒫᑎᓴᓐ (ᐳᕉᔅ) ᐳᓪᓚᑦ, ᓵᓐᑎ ᐳᕉᔅ ᐊᒻᒪ ᑯᐃᓐᑎᓐ ᓇᑦᓱᕐ ᓴᓪᓕᕐᒥᐅᑕᑦ ᐊᒻᒪ ᑏᒐᓐ ᑐᒃᑐ ᐊᒻᒪ ᒐᐃᔪᓪ ᐅᐊᓕ1ᔅ ᑲᖏᖅᖠᓂᕐᒥᐅᑕᑦ.
Tapisa Tattuinee of Arviat, third from left, joins a group of fellow students for a learning session sponsored by Parks Canada during the Srudents on Ice expedition to Greenland and the High Arctic from July 23 to Aug. 7, 2018. photo courtesy Parks Canada
ᑲᑎᙵᓂᐅᔪᑦ ᖃᖓᑕᓚᐅᖅᐳᑦ ᐋᑐᕚᒥ ᑲᖏᕐᓗᔅᓱᐊᕐᒧᑦ, ᑲᓛᖦᖠᐅᑉ ᓄᓈᓐᓂ, ᐃᑭᓚᐅᖅᖢᑎᒃOcean Endeavour−ᒧᑦ ᐊᒻᒪ ᐃᖏᕐᕋᓯᓚᐅᖅᐳᑦ ᓇᓂᓯᓂᕐᓄᑦ ᓄᓇᓕᐅᔪᓄᑦ, ᑲᖏᖅᓱᓂᑦ, ᐃᒪᖃᕐᕕᓄᑦ ᐊᒻᒪ ᕿᑭᖅᑕᓂᑦ ᑕᐅᕘᓇ ᓄᓇᐅᑉ ᐱᓇᖕᓇᒥ ᓯᒡᔭᖅᐸᓯᖓᒍᑦ ᐃᑳᓚᐅᖅᑳᕋᑎᒃ ᕿᑭᖅᑖᓘᑉ ᐃᑭᖓᒍᑦ.
ᑲᓇᑕᒧᑦ ᐅᑎᕋᒥᒃ, ᑲᑎᙵᓂᐅᔪᑦ ᐳᓚᕋᓚᐅᖅᐳᑦ ᓯᕐᒥᓕᒃ ᑲᓇᑕᒥ ᒥᕐᙳᐃᖅᓯᕐᕕᖓᓐᓂ ᐊᒻᒪ ᕿᒥᕐᕈᓇᒃᖢᑎᒃ ᐱᑭᐊᓚᓱᕐᓱᐊᕐᒥ (ᐅᐊᖕᓇᒥ ᐃᒪᖓᓂ ᐊᐅᒃᑲᕐᓂᕐᒥᑦ), ᐃᒪᓕᕆᓂᕐᒧᑦ ᑕᑯᒃᓴᐅᓂᐅᔪᖅ ᐊᖏᓛᖑᓪᓗᓂ ᐊᒻᒪᓗ ᐆᒪᔪᐃᑦ ᐃᓕᖅᑯᓯᖏᓐᓂ ᓴᖅᑭᑎᑦᑎᓛᖑᓂᐅᔪᒥ ᑕᐃᒪᐃᑦᑑᔪᓂᑦ ᓇᓂᔭᐅᓲᓂ ᐅᐊᖕᓇᒥ ᐅᑭᐅᖅᑕᖅᑑᑉ ᑭᒡᓕᙳᐊᖓᓂ.
ᐃᖏᕐᕋᓂᐅᔪᖅ ᑲᑎᙵᔪᓂ ᑲᓇᖕᓇᕐᒧᑦ ᐃᓯᕐᕕᖓᒎᖅᑎᑦᑎᓚᐅᖅᐳᑦ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᒍᑦ ᐊᒻᒪ ᑕᓪᓗᕈᑎᐅᑉ ᐃᒪᖓᒍᑦ (Lancaster Sound), ᑲᓇᑕᐅᑉ ᐊᖏᓛᖑᔪᒥ ᑕᕆᐅᕐᒥ ᐸᐸᑦᑎᑦᑎᐊᕐᓂᐅᔪᒥ ᐃᓂᐅᔪᒥ ᐃᓱᓕᓚᐅᖅᑳᕋᑎᒃ ᖃᐅᓱᐃᑦᑐᒥ.
ᐊᐅᓪᓛᕐᓂᐅᔪᖅ ᑕᑕᓚᐅᖅᐳᖅ ᐃᓕᓐᓂᐊᕐᓂᐅᔪᓂ, ᑲᑎᙵᓂᐅᔪᓂ ᐅᖃᖃᑎᖃᕐᓂᐅᔪᓂ, ᓯᒡᔭᓕᐊᕐᓂᕐᒧᑦ, ᐅᒥᐊᕋᓛᒃᑯᑦ ᐃᖏᕐᕋᓂᐅᔪᓂ ᐊᒻᒪ ᐆᒪᔪᕐᓂᑦ ᑕᑯᓂᐅᔪᓂᑦ. ᐃᓕᓐᓂᐊᖅᑏᑦ ᐃᓕᑦᑎᓚᐅᖅᐳᖅ ᕿᙳᒻᒥᒐᕐᓂᐅᔪᓂ ᖃᐅᔨᓴᕐᓂᕐᒥ, ᑎᑎᕋᐅᔭᒐᕐᓄᑦ, ᑕᐃᔅᓱᒪᓂᐅᓚᐅᖅᑐᓂ, ᐊᑐᐊᒐᑎᒍᑦ ᐊᒻᒪ ᐃᓕᖅᑯᓯᖓᑎᒍᑦ, ᑐᙵᕕᖃᖅᖢᑎᒃ ᑐᑭᓯᐅᒪᓂᐅᔪᒥ ᐊᒻᒪ ᐅᐱᒋᓂᖃᕐᓂᐅᔪᒥ ᐃᓄᖕᓄᑦ ᑕᐃᓯᔪᓄᑦ ᐅᑭᐅᖅᑕᖅᑐᒥ ᐊᖏᕐᕋᕆᔭᒥᓄᑦ.
ᐃᖏᕐᕋᓂᐅᔪᖅ ᑲᔪᖏᖅᓴᐃᓚᐅᖅᐳᖅ ᐃᓕᓐᓂᐊᖅᑎᓂᑦ ᐅᖃᐅᓯᖃᕐᓂᕐᒧᑦ ᐊᒻᒪ ᑲᑎᖃᑎᖃᕐᓂᕐᒧᑦ ᐃᓕᓐᓂᐊᖃᑎᒥᓄᑦ, ᐃᖏᕐᕋᓂᐅᔪᒥ ᐃᓕᓴᐃᔨᐅᔪᓄᑦ, ᐊᒻᒪ ᓄᓇᒧᑦ ᐊᒻᒪ ᐃᒪᕐᓂ ᐊᕙᓗᓯᒪᔭᖓᓐᓂ.
ᒫᑎᓴᓐ, 15, ᐃᓕᓐᓂᐊᓲᖑᕗᖅ ᖁᑦᑎᖕᓂᓕᖕᒥ 11−ᒥ ᓴᒃᑯ ᐃᓕᓐᓂᐊᕐᕕᖕᒥ ᓴᓪᓕᓂᑦ, ᐊᒻᒪ ᑕᐃᓚᐅᖅᐸᖓ ᐃᖏᕐᕋᓂᐅᔪᖅ ᐊᑕᐅᓯᐊᑦᑎᐊᕐᓗᓂ−ᐃᓅᓯᕐᒥ ᐊᑐᕐᓂᑰᓂᐅᔪᒥ ᐊᒻᒪ ᐊᑐᖁᕐᔪᐊᕋᔭᖅᐸᖓ ᖁᑦᑎᒃᑐᒥ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᖃᑎᒥᓄᑦ ᓄᓇᕗᓕᒫᒥ.
ᐅᖃᓚᐅᖅᐳᖅ ᓯᕗᓪᓕᕐᒥ ᐃᓚᐅᖃᑕᐅᔪᒪᓚᐅᖅᐳᖅ ᐃᖏᕐᕋᓂᐅᔪᒥ ᐃᓕᑦᑎᒃᑲᓐᓂᕐᓂᕐᒧᑦ ᐃᓄᖕᓂ ᐊᒻᒪ ᑲᓛᖦᖠᐅᑉ ᓄᓈᓐᓂ ᐃᓕᖅᑯᓯᖓᓐᓂ.
"ᐃᓕᑦᑎᕐᔪᐊᓚᐅᖅᐳᖓ ᐃᖏᕐᕋᓂᐅᔪᒥ, ᑲᑕᔾᔭᕐᓂᕐᒥᓪᓘᓐᓃᑦ, ᑭᓯᐊᓂ ᐱᔪᓐᓇᑦᑎᐊᕐᓇᖓ," ᐅᖃᓚᐅᖅᐳᖅ ᒫᑎᓴᓐ ᐃᒡᓚᖅᖢᓂ.
"ᐃᓕᑦᑎᕐᔪᐊᓚᐅᕆᕗᖓ ᑎᖕᒥᐊᓂᑦ ᐊᒻᒪ ᐆᒪᔪᓂᑦ ᑕᑯᓚᐅᖅᑕᑦᑎᓐᓂ ᐊᐅᓪᓛᕐᓂᐅᔪᒥ, ᐊᒻᒪ ᖁᕕᐊᒋᑦᑎᐊᓚᐅᖅᑕᕋ.
"ᐃᓕᓴᐃᔨᐅᔪᑦ ᑐᙵᓇᑦᑎᐊᓚᐅᖅᐳᑦ ᐊᒻᒪ ᐃᑲᔪᒃᑲᐅᓪᓗᑎᒃ, ᐱᓗᐊᖅᑐᒥ ᐱᖓᓱᑦ ᐃᓅᓯᓕᕆᔨᐅᔪᑦ ᐊᐅᓪᓛᕐᓂᕐᒥ ᐃᓚᐅᖃᑕᐅᓚᐅᖅᑐᓂ.
"ᓄᓇᖓ ᑕᒪᒃᑭᓂ ᓄᓇᕗᒻᒥ ᐊᒻᒪ ᑲᓛᖦᖠᐅᑉ ᓄᓈᓐᓂ, ᐊᒻᒪᓗᑦᑕᐅᖅ ᓈᓚᑐᐃᓐᓇᕐᓂᕐᒥ ᓴᐃᓕᓂᕐᔪᐊᕐᓂᖓᓂ."
ᒫᑎᓴᓐ ᐅᖃᓚᐅᖅᐳᖅ ᖁᑦᑎᒃᑐᒥ ᐅᑭᐅᖅᑕᖅᑐᒧᐊᓚᐅᖅᓯᒪᙱᓚᖅ, ᑕᐃᒪᓐᓇ ᐊᑐᓂ ᓄᓇᓕᐅᔪᑦ ᐃᖏᕐᕋᓂᐅᔪᒥ ᓄᑖᖑᓪᓗᓂ ᐊᑐᕐᓂᐅᓚᐅᖅᐳᖅ ᐃᒻᒥᓄᑦ.
ᐅᖃᓚᐅᖅᐳᖅ ᐊᑕᐅᓯᖅ ᑲᒪᒋᕐᔪᐊᓚᐅᖅᑕᖓ ᐅᔾᔨᕆᓂᕐᒥ ᖃᓄᑎᒋ ᐊᔾᔨᒌᖕᓂᐅᓂᖏᓐᓂ ᑖᒃᑯᓇᓂ ᒪᕐᕉᔪᓂᑦ ᐃᓕᖅᑯᓯᐅᓂᐅᔪᓂᑦ.
"ᐃᒡᓗᒥᐅᖃᑎᖃᓚᐅᖅᐳᖓ ᑲᓛᖦᖠᐅᑉ ᓄᓈᓐᓂ ᐊᒻᒪ ᐃᓕᓴᐃᖃᑦᑕᐅᑎᓚᐅᖅᐳᒍᑦ ᐃᓕᖅᑯᓯᑦᑎᓐᓂ, ᑕᐃᒪᓐᓇ ᐅᔾᔨᕈᓱᓕᓚᐅᖅᐳᖓ ᐊᔾᔨᒌᖕᓂᐅᓂᐅᔪᓂᑦ.
"ᓂᕆᐅᓚᐅᖅᐳᖓ ᐅᓄᕐᓂᖅᓴᓂ ᐊᔾᔨᒌᙱᓐᓂᖃᐅᕐᓂᐊᕐᓂᑦᑎᓐᓂ ᐊᔾᔨᒌᖕᓂᐅᙱᑦᑐᓂᑦ, ᑭᓯᐊᓂ ᐊᐅᑉᐸᖔᖓᓅᓚᐅᖅᐳᖅ."
ᒫᑎᓴᓐ ᐅᖃᓚᐅᖅᐳᖅ ᐸᕐᓇᖕᓂᖃᖅᐳᖅ ᑕᒪᒃᑭᐅᒪᔪᒥ ᐊᕐᕌᒍᓄᑦ ᐱᖓᓱᓂ ᐃᓕᓐᓂᐊᕐᓂᖃᕈᒪᕗᖅ ᓄᓇᕗᒻᒥ ᓯᕗᓂᒃᓴᒧᑦ (NS) ᐱᓕᕆᐊᖑᔪᒥ ᐃᓱᓕᑦᑎᒍᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᒪᓕᐅᕆᓪᓚᐅᙱᓐᓂᖓᓂ ᐃᖅᑲᓇᐃᔮᕆᔪᒪᓇᔭᖅᑕᒥᓂᑦ ᓂᕈᐊᒐᒃᓴᓂᑦ.
ᐅᖃᓚᐅᖅᐳᖅ ᐊᑯᓂᐅᒐᓚᒃᑐᒥ ᓱᖏᐅᑎᓇᓱᐊᕐᓂᕐᒧᑦ ᐃᓕᓐᓂᐊᖅᑎᐅᖃᑎᒥᓂᑦ ᐊᐅᓪᓛᕐᓂᐅᔪᒥ, ᑭᓯᐊᓂ, ᓱᖏᐅᑎᒐᒥᑦ, ᑕᒪᕐᒥᑦᑎᐊᑦ ᒪᑐᐃᑦᑎᐊᓚᐅᖅᐳᑦ.
"ᓯᕗᓪᓕᕐᓂ ᖃᔅᓯᐊᕐᔪᖕᓂ ᐅᓪᓗᓂᑦ ᑕᒪᕐᒥᑦ ᑲᙳᓱᓚᐅᖅᐳᑦ ᐊᒻᒪ ᐃᓄᖕᓂ ᖃᐅᔨᒪᔭᕐᒥᓂ ᐅᐸᒃᓯᒪᑲᑕᒃᖢᑎᒃ, ᑭᓯᐊᓂ ᓄᓇᕗᒻᒥ ᓯᕗᓂᒃᓴᒃᑯᑦ ᐃᓕᓐᓂᐊᕐᓂᐅᓚᐅᖅᑐᒥ ᑕᒪᒃᑭᑦ ᖃᐅᔨᒪᕙᓪᓕᐊᓕᓚᐅᖅᐳᑦ ᐊᓯᖏᓐᓂᑦ.
"ᖃᐅᔨᒪᖃᑦᑕᐅᑎᓕᕋᑦᑕ ᐊᔪᕐᓇᙱᕕᒡᔪᐊᓕᓚᐅᖅᐳᖅ ᐃᓕᓴᐃᓂᕐᒥ ᐃᓕᖅᑯᓯᑦᑎᓐᓂ ᐃᓕᓐᓂᐊᖅᑎᑕᐅᓯᒪᓚᐅᕋᑦᑕ ᑭᐅᑦᑎᐊᕐᓂᕐᒥ ᐊᐱᖅᑯᑕᐅᔪᓂ ᓯᕗᓪᓕᐅᔪᓂ ᐅᓪᓗᓂ ᒪᕐᕉᖕᓂ ᐊᐅᓪᓛᕐᓂᐅᔪᒥ.
"ᐊᔪᕐᓇᕐᔪᐊᖅᐳᖅ ᐊᑕᐅᓯᑐᐊᒥᑦ ᑕᐃᓯᓂᕐᒧᑦ, ᑭᓯᐊᓂ ᑕᐃᓯᔭᕆᐊᖃᕈᒪ ᐊᓕᐊᓇᐃᒋᓂᖅᐹᕆᓚᐅᖅᑕᓐᓂ ᐊᑐᓚᐅᖅᑕᑦᑎᓐᓂ ᐅᖃᕋᔭᖅᐳᖓ ᐃᓕᓐᓂᐊᕐᓂᐅᔪᑦ, ᐱᓗᐊᖅᑐᒥ ᓱᓕᓂᕐᒧᑦ ᐊᒻᒪ ᒪᒥᓴᖃᑎᒌᖕᓂᐅᔪᒥ ᑎᓕᔭᐅᓯᒪᓂᐅᔪᓄᑦ ᐃᓕᑦᑎᕐᔪᐊᓚᐅᕋᒪ ᑕᐃᔅᓱᒪᙵᑦ.
"ᑲᒪᓇᕐᔪᐊᖅᖢᓂ ᐊᑐᕐᓂᐅᓚᐅᖅᐳᖅ. ᑕᒪᕐᒥᓗᒃᑖᖅ ᐊᓕᐊᓇᐃᒋᑦᑎᐊᓚᐅᖅᑕᕋ, ᐃᑲᕐᕋᐸᓗᖕᒥᓪᓘᓐᓃᑦ ᐅᒥᐊᕐᔪᐊᕐᒦᓕᓵᕐᓂᓐᓄᑦ ᒥᕆᐊᙳᓚᐅᖅᑎᓪᓗᖓ."
ᑕᑦᑐᐃᓂ, 20, ᐃᓱᓕᑦᑎᓚᐅᖅᑐᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐊᕐᕕᐊᓂᑦ ᐃᓚᒋᔭᐅᓪᓗᓂ ᐃᓕᓐᓂᐊᕐᕕᐊᕈᓯᕐᒥ 2015−ᒥ, ᐅᖃᓚᐅᖅᐳᖅ ᐊᓕᐊᓇᐃᒋᔭᖃᕐᓂᐊᕋᓱᒋᓪᓗᓂ ᐃᓕᓐᓂᐊᖅᑎᑦ ᓯᑯᒦᑦᑐᓄᑦ ᐃᖏᕐᕋᓂᐅᔪᒥ ᐊᑐᐃᓐᓇᖃᖅᑎᑦᑎᓚᐅᕐᒪᑦ ᐱᕕᒃᓴᖃᕐᓂᖓᓂ ᐳᓚᕋᕐᓂᕐᒧᑦ ᓄᓇᓕᖕᓂ ᖁᑦᑎᒃᑐᒥ ᐅᑭᐅᖅᑕᖅᑐᒥ, ᑲᑎᖃᑎᖃᕐᓗᓂ ᐃᓄᖕᓂ ᓄᓇᕐᔪᐊᓕᒫᒥ ᐊᒻᒪ ᐃᓕᑦᑎᒃᑲᓐᓂᕐᓗᓂ ᐅᑭᐅᖅᑕᖅᑑᑉ ᐊᕙᑎᖓᓐᓂ.
ᐅᖃᓚᐅᖅᐳᖅ ᑕᒪᕐᒥᑦᑎᐊᑦ ᐱᖃᓐᓇᕇᑦᑎᐊᓚᐅᖅᐳᑦ ᐊᒻᒪ ᓴᖅᑭᑎᑦᑎᓚᐅᖅᐳᖅ ᐱᐅᔪᒥ ᐊᕙᑎᐅᔪᒥ ᐅᓄᖅᑐᓄᑦ ᑲᑎᙵᓂᐅᔪᒥ ᐃᓕᓐᓂᐊᖅᑎᓂᑦ ᖁᕕᐊᑦᑐᓂ ᐊᒻᒪ ᐃᓕᑦᑎᔪᒪᓂᖏᓐᓂ ᐅᑭᐅᖅᑕᖅᑐᒥ.
"ᐊᓕᐊᓇᐃᒋᑦᑎᐊᓚᐅᖅᐸᒃᑲ ᐃᓕᓐᓂᐊᕐᓂᐅᔪᑦ ᐃᖏᕐᕋᓂᐅᔪᒥ," ᐅᖃᓚᐅᖅᐳᖅ ᑕᑦᑐᐃᓂ.
"ᓂᕈᐊᕈᓐᓇᓚᐅᖅᐳᑎᑦ ᓇᓕᐊᖕᓂ ᐃᓕᓐᓂᐊᕐᓂᐅᔪᓂ ᐃᓚᐅᖃᑕᐅᔪᒪᓂᕐᓂᑦ, ᐊᒻᒪ ᑐᓴᕈᒪᓗᐊᓚᐅᖅᐳᖓ ᑕᐃᒃᑯᓄᖓ ᐱᓕᕆᓂᖃᖅᑐᓂ ᐊᕙᑎᒧᑦ, ᑲᓛᖦᖠᐅᑉ ᓄᓈᓐᓂ ᐃᓕᖅᑯᓯᖓᓐᓂ ᐊᒻᒪ ᑕᕆᐅᕐᒥᐅᑕᓂᑦ.
"ᐃᓕᑦᑎᕐᔪᐊᓚᐅᖅᐳᖓ ᐅᒥᐊᕐᔪᐊᕐᒦᑎᓪᓗᑕ ᓄᑖᖑᓪᓗᓂ ᐅᖃᐅᓯᒃᓴᐅᓚᐅᕐᒪᑕ ᐅᕙᓐᓄᑦ ᐊᒻᒪ ᐅᖃᐅᓯᖃᖅᑐᐃᓐᓇᐅᓪᓗᑎᒃ ᓄᓇᒋᔭᓐᓂᑦ.
"ᑲᒪᕐᔪᐊᓚᐅᖅᐳᖓ, ᐃᓕᑦᑎᓂᕐᒧᑦ ᐃᓚᖏᓐᓂ ᑲᓛᖦᖠᐅᑉ ᓄᓈᓐᓂ ᐃᓕᖅᑯᓯᖓᓐᓂ ᐊᒻᒪ ᐃᓚᖏᓐᓂ ᖃᓄᐃᑉᐸᓪᓕᐊᔪᓄᑦ ᐊᕙᑎᑦᑎᓐᓂ ᒫᓐᓇᐅᔪᒥ. ᖃᐅᑕᒫᑦᑎᐊᖅ ᐃᓕᑦᑎᕐᔪᐊᓚᐅᖅᐳᖓ."
ᑕᑦᑐᐃᓂ ᐅᖃᓚᐅᖅᐳᖅ ᐱᒋᐊᓚᐅᖅᐳᖅ ᐊᕙᑎᓕᕆᓂᕐᒥ ᓄᑖᙳᖅᐸᓪᓕᐅᓂᐅᔪᒥ ᐱᓕᕆᐊᖑᔪᒥ ᐊᕐᕌᒎᓚᐅᖅᑐᒥ, ᑭᓯᐊᓂ ᐸᕐᓇᒃᐳᖅ ᐃᓚᐅᖃᑕᐅᓂᖓᓂ ᓄᑖᖑᔪᒥ ᐊᕐᕌᒍᓄᑦ ᐱᖓᓱᓄᑦ (ᐃᓕᓐᓂᐊᕐᓂᕐᒥ ᐊᒻᒪ ᐃᖅᑲᓇᐃᔮᕆᔪᒪᔭᒧᑦ ᐱᕙᓪᓕᐊᑎᑦᑎᓂᐅᔪᒥ) ᓄᓇᕗᒻᒥ ᓯᕗᓂᒃᓴᕗᑦ ᐱᓕᕆᐊᖑᔪᒥ ᑕᒪᑐᒪᓂ ᐃᓕᓐᓂᐊᕐᓂᐅᓂᐊᖅᑐᒥ.
ᐅᖃᓚᐅᖅᐳᖅ ᐱᐅᓂᐊᖅᐳᖅ ᐃᓚᒋᔭᐅᖃᑕᐅᓂᕐᒧᑦ ᓯᕗᓪᓕᐅᔪᓂ ᑲᑎᙵᓂᐅᔪᓂ ᐃᓕᓐᓂᐊᖅᑎᓂᑦ ᐱᓕᕆᓂᕐᒧᑦ ᓄᑖᖑᔪᒥ ᐊᕐᕌᒍᓄᑦ−ᐱᖓᓱᓄᑦ ᐱᓕᕆᐊᖑᔪᒥ.
"ᐊᑐᖁᓇᔭᑦᑎᐊᖅᐸᕋ ᐃᓕᓐᓂᐊᖅᑎᑦ ᓯᑯᒦᑦᑐᓄᑦ ᐃᓕᖕᓂᑦ ᐃᓕᓯᓲᖑᖕᒪᑦ ᑕᕆᐅᕐᒥ ᐊᒻᒪ ᓴᖅᑭᑎᑦᑎᓪᓗᓂ ᐃᓗᐊᖅᑐᒥ ᐊᕙᑎᐅᔪᒥ ᐃᓕᑦᑎᓂᕐᒧᑦ ᐅᑭᐅᖅᑕᖅᑐᒥ, ᐊᔾᔨᒌᙱᑦᑐᓂ ᐃᓕᑦᑯᓯᐅᔪᓄᑦ, ᐊᕙᑎᒥᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ.
"ᐃᓕᑦᑎᔪᓐᓇᖅᐳᑎᑦ ᑲᒪᓇᖅᑐᓂᑦ ᐅᒥᐊᕐᔪᐊᒥ ᕿᓚᒥᒻᒪᕆᑯᓗᒃ.
ᐅᕙᓐᓄᑦ, ᓇᖕᒥᓂᖅ, ᐃᓚᒋᔭᐅᓪᓗᓂ ᐃᓕᓐᓂᐊᖅᑎᑦ ᓯᑯᒦᑦᑐᓄᑦ ᐅᕙᓐᓂ ᑕᑯᑎᑦᑎᓚᐅᖅᐳᖅ ᖃᓄᐃᓕᐅᓛᕈᒪᓂᓐᓂ ᐃᖅᑲᓇᐃᔮᕆᔪᒪᓇᔭᖅᑕᓐᓂ, ᐊᒻᒪ ᐃᓅᖃᑎᒌᖕᓂᕐᒧᑦ ᐱᓕᕆᓂᐅᔪᒥᑦ ᐃᑲᔪᕈᓐᓇᕐᓂᐊᕋᒪ ᐃᓄᖕᓂ ᓄᓇᕗᒻᒥ.
"ᓇᓂᓚᐅᖅᐸᕋ ᑲᔪᖏᖅᓴᐃᓂᓐᓂ ᑕᐃᑲᓂ ᐅᒥᐊᕐᔪᐊᕐᒥ!"