ᐃᓕᓐᓂᐊᕐᓂᓖᑦ 7-ᒥ ᐊᒻᒪᓗ 8-ᒥ ᐃᓚᐅᖃᑕᐅᓚᐅᖅᑐᑦ Four Directions-ᑯᑦ ᖃᓄᐃᓕᐅᖅᑎᑦᑎᑎᓪᓗᒋᑦ ᑲᒪᔨᖃᖅᖢᑎᒃ Darkspark-ᑯᓐᓂᒃ – ᑮᓇᐅᔾᔭᒃᓴᖅᑎᐅᙱᑦᑐᑦ ᑎᒥᖁᑎᒋᔭᐅᔪᑦ ᐃᒻᖏᖅᑎᑦᑎᓂᒃᑯᑦ ᐊᑐᖅᐸᒃᑐᑦ ᐃᒻᖏᐅᓯᐅᕐᓂᕐᒥᒃ ᐊᒻᒪᓗ ᓂᐱᓕᐅᕆᓂᕐᒥᒃ ᐱᓕᕆᖃᑎᒌᒍᓐᓇᖁᑉᓗᒋᑦ ᒪᒃᑯᒃᑐᑦ ᐊᒻᒪᓗ ᖁᕝᕙᖅᑎᕆᓂᕐᒧᑦ – ᐃᓕᖅᑯᓯᕆᔭᐅᔪᓂᒃ ᑐᑭᓯᐅᒪᔪᓐᓇᖅᓯᓂᕐᒥᒃ – ᒫᓂ ᐅᓗᔪᒃ ᐃᓕᓐᓂᐊᕐᕕᖕᒥ ᑲᖏᖅᖠᓂᕐᒥ ᑖᒻᓇ ᑕᖅᑭᖅ ᐱᒋᐊᓕᓵᖅᑎᓪᓗᒍ.
ᑕᒪᓐᓇ ᐃᓕᓐᓂᐊᕈᑎ ᐃᑲᔫᑕᐅᔪᖅ ᐃᓚᐅᖃᑕᐅᔪᓄᑦ ᒪᒃᑯᒃᑐᓄᑦ ᖃᐅᔨᒪᓕᕈᓐᓇᖁᑉᓗᒋᑦ ᖃᓄᖅ ᓄᓇᑖᖅᑎᑕᐅᓯᒪᔪᑦ ᐃᓚᐃᓐᓈᕈᑕᐅᖃᑦᑕᖅᓯᒪᖕᒪᖔᑕ ᐊᒻᒪᓗ ᐃᒪᓐᓇᐃᑦᑑᓚᔭᐅᓯᒪᕙᒃᑐᑦ ᖃᓄᖅ ᑕᐃᒪᐃᑕᐅᓕᓚᐅᖅᓯᒪᖕᒪᖔᑕ, ᑕᐃᒪᐃᑎᑕᐅᑐᐃᓐᓇᓕᖅᖢᑎᒃ ᐊᒻᒪᓗ ᓯᖁᑉᑎᕈᑕᐅᓯᒪᔪᓐᓇᕐᓂᖏᑦ.
ᑕᒪᓐᓇ ᑲᒪᒋᔭᐅᔪᖅ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᓄᓪᓗ ᐃᒻᖏᖅᑎᓄᑦ ᐊᒻᒪᓗ ᓴᓇᙳᐊᕐᓂᒃᑯᑦ ᐃᓕᓐᓂᐊᖅᑎᑦᑎᔨᓄᑦ, ᐃᓕᓐᓂᐊᖅᑐᑦ ᐃᒻᖏᐅᑎᓂᒃ ᓴᓇᕙᒃᑐᑦ ᓂᐱᓕᐅᕆᕙᒃᖢᑎᒡᓗ ᐊᒻᒪᓗ ᑕᒪᓐᓇ ᐃᑲᔫᑕᐅᕙᒃᑐᖅ ᐃᓅᖃᑎᒥᓂᒃ ᐃᒃᐱᒍᓱᒍᓐᓇᖅᓯᓂᕐᒧᑦ, ᐃᓕᖅᑯᓯᑐᖃᖃᑎᒌᙱᑦᑐᓂᒃ ᑐᑭᓯᐅᒪᔪᓐᓇᖅᓯᓂᕐᒧᑦ ᐊᒻᒪᓗ ᐃᓅᖃᑎᒥᓂᒃ ᐃᒃᐱᒍᓱᑦᑎᐊᕈᓐᓇᖅᓯᓂᕐᒧᑦ.
Darkspark-ᑯᑦ ᐱᓕᕆᖃᑎᒌᒃᑏᑦ ᑲᖏᖅᖠᓂᕐᒦᓚᐅᖅᑐᑦ ᓄᕕᐱᕆ 25-ᒥ ᑎᓯᐱᕆ 3-ᒧᑦ. ᒫᓂ ᐅᓗᔪᒃ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᑦᑎᔨ ᐃᒪᓕ ᒌ ᓯᕗᓕᖅᑎᐅᓚᐅᖅᑐᖅ ᑲᖏᖅᖠᓂᕐᒥ ᐃᓕᓐᓂᐊᖅᑎᑦᑎᔨᐅᑉᓗᓂ ᑕᒪᑐᒥᙵ ᐱᓕᕆᐊᓕᒃ ᑲᖏᖅᖠᓂᕐᒥᓗ ᒪᒃᑯᒃᑐᑦ ᐊᒻᒪᓗ Darkspark-ᑯᑦ ᐃᓚᒋᔭᖏᑦ.
ᒌ ᐅᖃᓚᐅᖅᑐᖅ ᐱᓕᕆᖃᑎᖃᓚᐅᕋᒥᒎᖅ ᐃᓕᓐᓂᐊᕐᓂᓖᑦ 7-ᒥᒃ ᐊᒻᒪᓗ 8-ᒥᒃ ᐃᓕᓐᓂᐊᖅᑎᑦᑎᔨᓂᒃ ᓂᕈᐊᖅᖠᕋᓱᒃᖢᓂ 27-ᓂᒃ ᐃᓕᓐᓂᐊᖅᑐᓂᒃ ᓯᑕᒪᐅᔪᓂᒃ ᐃᓕᓐᓂᐊᖃᑎᒌᒃᑐᓂᒃ ᑕᒡᕘᓇ ᐃᓚᐅᖃᑕᐅᔪᓐᓇᖁᑉᓗᒋᑦ.
ᐅᖃᖅᖢᓂᓗ ᐃᓕᓐᓂᐊᖅᑐᒡᒎᖅ ᑐᑭᓯᐅᒪᑦᑎᐊᓚᐅᖅᑐᑦ ᓱᓇᐅᖕᒪᖔᑦ ᑕᒪᓐᓇ ᐃᓕᓐᓂᐊᕈᑎ, ᐊᒻᒪᓗ ᖃᐅᔨᒪᑉᓗᑎᒃ ᐃᒻᖏᖃᑦᑕᕐᓂᐊᕐᓂᕐᒥᓂᒃ ᓂᐱᓕᐅᕆᖃᑦᑕᕐᓂᐊᕐᓂᕐᒥᓂᒡᓗ ᑐᓴᕐᓈᒐᒃᓴᓂᒃ ᐊᒻᒪᓗ ᐅᖃᐅᓯᖃᕐᓗᑎᒃ ᓄᓇᒥᓂᒃ ᐃᓅᓯᕐᒥᓂᒡᓗ.
"ᑕᒪᕐᒥᒃ ᐃᓕᓐᓂᐊᖅᑐᑦ ᐱᔫᒥᒍᓱᑦᑎᐊᓚᐅᖅᑐᑦ, ᐊᒻᒪᓗ ᑕᓪᓕᒪᐅᔪᑦ Darkspark-ᑯᑦ ᐱᓕᕆᖃᑎᒌᒃᑎᖏᑦ ᖃᐅᔨᒪᓕᑲᐅᑎᒋᓚᐅᖅᑐᑦ ᐃᓕᓐᓂᐊᖅᑐᓂᒃ ᐊᒻᒪᓗ ᓴᙱᓂᕆᔭᖏᓐᓂᒃ, ᐊᒻᒪᓗ ᐃᓕᓐᓂᐊᖅᑐᑦ ᓴᓚᐅᓱᒍᓐᓇᖅᓯᑉᓗᑎᒃ ᐃᓅᖃᑎᒌᖕᓂᒃᑯᑦ," ᑕᐃᒪᓐᓇ ᐅᖃᖅᖢᓂ ᒌ.
"ᐅᖃᖃᑎᖃᓚᐅᖅᑐᑦ ᐃᓕᓐᓂᐊᖅᑐᓂᒃ ᐅᖃᐅᓯᖃᖅᖢᑎᒃ ᐃᓄᐃᑦ ᓄᓇᖅᑲᑎᒌᓕᓚᐅᕐᓂᖏᓐᓄᑦ ᐊᒻᒪᓗ ᑐᑭᓯᐅᒪᖁᑉᓗᒋᑦ ᖃᓄᖅ ᓯᕗᓪᓕᕕᓂᖏᑦ ᐊᒃᑐᖅᓯᓂᖃᖅᓯᒪᖕᒪᖔᑕ ᐅᑉᓗᒥᒧᑦ.
"ᐃᓚᐅᖃᑕᐅᑎᑦᑎᓚᐅᖅᑐᑦ ᑲᖏᖅᖠᓂᕐᒥᐅᑕᕐᒥᒃ ᐃᒻᖏᖅᑎᒥᒃ ᑎᐅᕆ ᑯᓱᒐᕐᒥᒃ ᐊᒻᒪᓗ ᐅᖃᓪᓚᑦᑎᐊᖅᑐᐊᓘᓚᐅᖅᑐᖅ ᓄᓇᖅᑲᑎᒌᓕᓚᐅᖅᓯᒪᔪᑦ ᒥᒃᓵᓄᑦ ᐊᒻᒪᓗ ᐅᖃᐅᓯᖃᖅᖢᓂ ᓇᖕᒥᓂᖅ ᐃᓚᒋᔭᖏᑦ ᖃᓄᐃᑦᑐᒃᑰᖃᑦᑕᖅᓯᒪᓂᑰᖕᒪᖔᑕ. ᐃᒻᖏᓚᐅᕐᒥᔪᖅ ᐃᓕᓐᓂᐊᖅᑐᑦ ᓯᕗᓂᐊᓂ.
"ᐃᓕᓐᓂᐊᖅᑐᑦ ᐊᕕᒃᑐᖅᓯᒪᓚᐅᖅᑐᑦ ᑎᓯᐱᕆ 28-ᒥ ᐱᒋᐊᖅᖢᒍ ᐊᒻᒪᓗ ᐃᓕᑦᑎᕙᓪᓕᐊᓕᖅᖢᑎᒃ ᐃᒻᖏᕐᓂᐅᑉ ᒥᒃᓵᓄᑦ, ᓴᙱᔪᓂᒃ ᖃᓄᐃᓕᐅᕈᑎᓂᒃ ᐊᑐᖅᖢᑎᒃ, ᐊᒻᒪᓗ ᑐᑭᓯᕙᓪᓕᐊᓂᕐᒧᑦ ᐃᒻᖏᐅᑏᑦ ᐊᕕᒃᑐᖅᓯᒪᕙᖕᓂᖏᓐᓂᒃ, ᐱᓯᓕᐊᖑᕙᒃᑐᓂᒃ, ᐊᒻᒪᓗ ᐊᒃᑐᐅᔾᔪᑎᔪᓂᒃ – ᑕᒪᕐᒥᒡᓗ ᐊᔾᔨᒌᙱᑦᑑᑕᐅᔪᑦ ᐃᒻᖏᐅᑎᒃᑯᑦ ᐃᓚᐅᖃᑕᐅᓂᖃᖃᑦᑕᖅᑐᑦ – ᐊᒻᒪᓗ ᐆᒃᑑᑎᑦᑎᐊᕙᖕᓂᒃ ᐃᒻᖏᐅᑎᓂᒃ ᐅᖃᐅᓯᖃᖅᖢᑎᒃ ᑎᑎᕋᖅᑕᐅᖃᑦᑕᖅᓯᒪᓂᑰᔪᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ."
ᒌ ᐅᖃᖅᖢᓂ ᐃᓕᓐᓂᐊᖅᑐᒡᒎᖅ ᐃᓱᒪᒃᓴᖅᓯᐅᑦᑎᐊᓕᓚᐅᖅᑐᑦ ᖃᓄᐃᓕᐅᕈᑎᒋᓇᔭᖅᑕᒥᓂᒃ ᖃᓄᕐᓗ ᐃᒻᖏᐅᑎᓕᐅᕈᒪᓇᔭᕐᒪᖔᕐᒥᒃ ᑐᓴᖅᑕᐅᓂᐊᖅᑐᓂᒃ ᓄᓇᕐᔪᐊᕐᒥᐅᓄᑦ, ᓱᓇᓂᒡᓗ ᐃᓚᐅᖃᑕᐅᑎᑦᑎᔪᒪᖕᒪᖔᕐᒥᒃ ᐃᒻᖏᐅᑎᒥᓂᒃ, ᐊᒻᒪᓗ ᖃᓄᖅ ᑐᓴᖅᑎᑦᑎᔪᒪᖕᒪᖔᕐᒥᒃ. ᐅᖃᖅᖢᓂᓗ Darkspark-ᑯᒡᒎᖅ ᐱᓕᕆᖃᑎᖃᑦᑎᐊᓚᐅᖅᑐᑦ ᑕᒪᐃᓐᓂᒃ ᐊᕕᒃᑐᖅᓯᒪᔪᓂᒃ ᐃᓱᒪᒃᓴᖅᓯᐅᖃᑎᒋᑉᓗᒋᑦ ᖃᓄᖅ ᐃᒻᖏᐅᑎᑦ ᐋᖅᑭᒃᓱᖅᓯᒪᓂᐊᕐᒪᖔᑕ ᓂᐱᓕᐊᓕᕆᓂᐊᖅᑕᒥᓂᒃ.