ᐃᖅᑲᓇᐃᔭᕐᕕᒃᐳᑦ ᑕᑯᓐᓇᕐᓗᒍ, ᓇᓗᓇᖏᑉᐳᖅ ᖃᕆᑕᐅᔭᓕᕆᔨᓪᓚᕆᐅᓕᕐᓂᑦᑎᓐᓄᑦ ᑕᐃᒪᓐᓇᓗ ᐃᓕᓐᓂᐊᕐᓗᓂ ᐃᖅᑲᓇᐃᔭᒐᒃᓴᖅᑖᕐᓇᖅᐳᖅ ᑕᒪᒃᑯᓂᖓ.
ᑕᒪᒃᑯᐊ ᐃᓚᐅᑎᑕᐅᓗᑎᒃ ᓱᕈᓯᑦ, ᐊᖓᔪᖄᑦ, ᐃᓕᓐᓂᐊᕐᕕᓪᓗ. ᐊᑯᓂ ᑕᖅᑭᓂ, ᐊᕐᕌᒍᓂᐅᔪᒃᓴᐅᔪᕐᓗ, ᐃᒡᓗᑖᕈᒪᕙᒃᐳᒍᑦ ᐊᑭᖅᑐᕈᓐᓇᑦᑕᖅᑎᓐᓂᒃ ᐱᕈᖅᐸᓪᓕᐊᑐᐃᓐᓇᖅᑎᓪᓗᒋᓪᓗ ᓄᓇᕗᒥ. ᑕᒪᓐᓇ ᐅᖃᐅᓯᕆᓂᑦᑎᓐᓂ, ᐃᒡᓗᖃᕐᓂᖅ ᑕᐃᒪᓐᓇ ᐊᒃᑐᖅᑕᐅᔪᓐᓇᖅᑐᒥᒃ ᐃᒡᓗᒥᒃ ᐅᖃᐅᓯᖃᑐᐃᓐᓇᖏᑉᐳᖅ ᐊᒃᑐᐊᓂᖃᕐᒪᑦ ᐊᕙᑎᒥᐅᑕᑦᑎᓐᓄᑦ. ᐊᖏᕐᕋᖃᕐᓂᖅ, ᐅᓗᕆᐊᓇᖏᑦᑐᒦᓐᓂᖅ, ᐃᓂᒃᓴᖃᑦᓯᐊᖅᑎᑕᐅᓂᖅ ᑐᓐᖓᓇᖅᑐᒥᒃ. ᑕᒡᕙᖓᑦ ᐊᒥᖅᑳᕆᐅᓚᐅᖅᐳᒍᑦ ᑲᒪᑦᓯᐊᕐᓂᕐᒧᓪᓗ ᐅᔾᔨᕈᓱᓕᖅᖢᑕ ᐃᓅᖃᑎᑦᑎᓐᓂᒃ.
ᑕᒪᓐᓇ ᐃᓱᒪᒃᓴᒃᓯᐊᖑᕗᖅ ᑕᐃᒪᓐᓇᐃᓕᐅᖏᓐᓇᕆᐊᖃᖅᐳᒍᓪᓗ ᓱᓕᓂᖏᓐᓄᑦ ᐊᑐᖅᑕᐅᓕᕐᓂᖏᓐᓄᓪᓗ.
ᐃᓕᓐᓂᐊᕐᓂᖅ ᐊᔾᔨᒋᐸᓗᒃᐸᖓ; ᐃᓂᒃᓴᓕᐅᖅᐸᒃᐳᒍᑦ ᐃᒡᓗᑕᖃᖅᑐᓂᒃ ᓇᓗᓇᐃᓯᒪᓪᓗᑎᒃ ᐃᓕᓐᓂᐊᕐᕕᐅᓂᐊᕐᓂᖏᓐᓄᑦ ᐃᖃᐃᓕᓴᕐᕕᖃᖅᖢᑎᒡᓗ ᑲᔪᖏᖅᓴᐃᒍᑎᒃᓴᐃᑦ ᑎᒥᒧᑦ ᐋᖅᑭᐅᒪᑦᓯᐊᕆᐊᖃᕐᓂᕐᒥᒃ, ᑲᑐᔾᔨᖃᑎᒌᖕᓂᖅ ᐱᓕᕆᖃᑎᒌᒡᓂᕐᓗ.
ᐃᓕᓴᐃᔨᕗᑦ ᐃᓕᓐᓂᐊᖅᑎᑎᔨᕗᓪᓗ ᐃᓕᓐᓂᐊᖅᓯᒪᑦᓯᐊᖅᐳᑦ ᐊᑯᓂ ᐅᑭᐅᓂ ᐃᓕᓐᓂᐊᖅᑎᑦᓯᔨᐅᖁᓪᓗᒋᑦ ᐃᓕᓐᓂᐊᖅᓯᒪᔭᒥᖕᓂᒃ ᐊᔪᖏᑕᒥᖕᓂᒡᓗ ᐃᓕᓐᓂᐊᖅᑎᓄᑦ ᖃᓄᑐᐃᓐᓇᖅ ᐱᕙᓪᓕᐊᓂᖃᖁᓪᓗᒋᑦ ᓂᕈᐊᖅᓯᒪᓗᑎᒃ ᐱᒍᒪᔭᒥᖕᓂᒃ.
ᑲᔪᖏᖅᓴᐃᒋᐊᖃᖅᐳᑦ ᐊᖓᔪᖄᕆᔭᐅᔪᒃ ᑕᒪᕐᒥᒃ ᐊᖏᕐᕋᖃᑦᓯᐊᖅᑎᑦᓯᓗᑎᒃ ᐊᖏᕋᒥᖕᓂ ᐃᓕᓐᓂᐊᕈᑎᒥᖕᓂᒃ ᑲᒪᒋᔭᖃᖃᑦᑕᖁᓪᓗᒋᑦ ᓂᐱᖃᖏᑦᑐᒥ. ᐊᒥᓱᑦ ᐅᑭᐅᑦ ᖄᖏᖅᓯᒪᓕᖅᐳᑦ ᐃᓕᓐᓂᐊᖅᑎᑦᓯᕙᓚᐅᕋᒪ, ᐊᖏᕐᕋᕆᔭᐅᔪᓄᑦ ᐅᐸᖃᑦᑕᖅᖢᖓ ᐃᓚᖏᓪᓗ ᐊᖓᔪᖄᕆᔭᐅᔪᑦ ᐃᓚᐅᑎᑉᐸᓚᐅᖅᐸᒃᑲ ᐃᓕᓐᓂᐊᕐᕕᖕᒧᐊᖃᑦᑕᖁᓪᓗᒋᓪᓗ ᓄᑕᕋᖏᑦ ᖃᓄᐃᓕᐅᓕᕐᓂᖏᓐᓄᑦ ᖃᐅᔨᒋᐊᖃᑦᑕᕐᓗᑎᒃ ᐃᓕᓐᓂᐊᕈᑕᐅᔪᓂᒃ.
ᑕᐃᒪᓐᓇ ᖃᐅᔨᑎᑦᓯᒐᑦᑕ ᓱᕈᓯᓂᒃ ᐃᓕᓐᓂᐊᕈᑎᖏᑦ ᐱᒻᒪᕆᐅᓂᖏᓐᓄᑦ ᐃᑲᔪᖃᑦᑕᖁᓪᓗᒋᓪᓗ ᐊᒃᓱᕈᓕᕌᖓᑕ ᐊᒃᓱᕈᕆᐊᒃᑲᓐᓂᖃᑦᑕᖁᓪᓗᒋᑦ.
ᐃᓕᓐᓂᐊᓕᓵᕐᓂᑦᑎᓐᓂᑦ ᐃᓕᓐᓂᐊᕐᕕᒡᔪᐊᒧᐊᕐᓂᖏᓐᓂ, ᓂᕈᐊᕋᒃᓴᖃᖅᐳᑦ ᖃᓄᐃᑦᑐᓂᒃ ᐃᖅᑲᓇᐃᔭᒐᒃᓴᖅᑖᕈᒪᓂᕐᒧᑦ. ᑕᒪᒃᑯᐊ ᓂᕈᐊᖅᑕᐅᔪᑦ ᑕᒪᕐᒥᒃ ᐊᔪᖏᓐᓂᖃᕆᐊᖃᕈᑎᖃᖅᖢᑎᒃ, ᖃᐅᔨᒪᒋᐊᖃᖅᖢᑎᒡᓗ, ᑐᑭᓯᐅᒪᒋᐊᖃᖅᖢᑎᒡᓗ, ᓱᓇᑐᐃᓐᓇᓕᕆᓂᕐᒧᑦ ᐃᓕᓐᓂᐊᕈᑎᓂᒃ, ᓈᓴᐅᑎᓕᕆᐅᑎᓂᒃ, ᖃᓪᓗᓇᐅᔭᕐᓂᕐᒥᒃ ᐊᓯᖏᓐᓂᒡᓗ. ᑕᐃᒪᓐᓇᓗ ᐃᓅᓯᖃᑎᒌᖕᓂᕐᒥᒃ ᖃᐅᔨᒪᒋᐊᖃᖅᖢᑕᓗ ᐊᖓᔪᖃᐅᑎᑕᖃᕐᒪᑦ ᓈᓚᖃᑦᑕᕐᓗᒋᑦ ᖃᓄᐃᓕᐅᕈᑎᒋᔭᐅᖁᔭᐅᔪᓪᓗ ᒪᓕᖃᑦᑕᕐᓗᒋᑦ.
ᐃᓕᓐᓂᐊᕌᓂᒃᐸᓪᓕᐊᓪᓗᓂ ᒍᕇᑦ 12-ᒥᒃ, ᑕᑯᓐᓇᕆᐊᖃᖅᐳᒍᑦ ᐸᕐᓇᐅᑎᖃᕐᓗᑕᓗ ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᕆᐊᕈᒪᓂᕐᒧᑦ ᐃᒻᒪᖄᓗ ᓯᓚᑦᑐᖅᓴᕐᕕᒡᔪᐊᒧᑦ ᐊᔪᖏᓴᕈᑎᖃᒃᑲᓐᓂᖃᖁᓪᓗᑕ ᐃᖅᑲᓇᐃᔭᒐᒃᓴᕆᓂᐊᖅᑕᑦᑎᓐᓄᑦ. ᐃᓕᓐᓂᐊᕈᓐᓇᖅᐳᒍᑦ ᑭᒃᑯᑐᐃᓐᓇᐃᑦ ᖃᓄᐃᓕᐅᕈᓯᖃᕐᓂᖏᓐᓄᑦ, ᓱᓇᓂᒃ ᐃᑉᓕᕈᓱᖕᓂᖏᓐᓄᑦ, ᐃᓄᐃᑦ ᖃᐅᔨᒪᔭᑐᖃᖏᑦᑕ ᒪᓕᒐᖏᑦ, ᒐᕙᒪᒃᑯᑦ ᐋᖅᑭᐅᒪᓂᖏᑦ ᑲᒪᓇᖅᖢᓂᓗ ᑕᒪᓐᓇ ᐊᖏᔫᓪᓗᓂᓗ.
ᐃᓅᓯᕐᒧᑦ ᐸᕐᓇᒃᐸᓪᓕᐊᓂᑦᑎᓐᓂ, ᐊᑲᐅᓂᖅᓴᐅᕗᖅ ᐊᖓᔪᖄᕗᑦ, ᐃᓕᓐᓂᐊᖅᑎᑎᔨᕗᑦ, ᐃᓕᓐᓂᐊᖃᑎᕗᓪᓗ ᐅᕙᒍᓪᓗ ᒪᑭᑕᑦᓯᐊᕆᐊᖃᖅᐳᒍᑦ ᖃᐅᔨᒪᑦᓯᐊᕐᓗᑕᓗ ᑲᔪᓯᕙᓪᓕᐊᓂᑦᑎᓐᓄᑦ ᓯᕗᒻᒧᑦ.