Skip to content

ᐃᓕᓴᖅᑎᓄᑦ ᐃᒡᓗᒋᔭᐅᓂᐊᖅᑐᒥᒃ ᓇᓂᓯᔪᑦ

ᓄᓇᕗᑦ ᓯᕗᓂᒃᓴᕗᑦ (NS) ᑕᒪᑐᒪᓂ ᐊᒃᓱᑲᓪᓚᒃ ᖁᕕᐊᓱᒍᓐᓇᖅᓯᔪᑦ ᐃᒻᒥᓄᑐᐊᖅ ᐊᒃᓱᕉᑎᖃᖅᑐᓂᒃ ᐊᔪᖅᓴᖏᑦᑐᓄᑦ ᐃᑲᔪᖅᓴᖅᑕᐅᖕᒪᑕ, ᑐᖓᓕᖓᓂ ᐃᓕᓴᕆᐊᕈᒪᔪᓄᑦ ᒪᓐᓇ ᐃᒡᓗᑭᒃᓴᕈᓃᖅᑐᑦ ᐃᓕᓴᖅᑎᖁᑎᖏᓐᓄᑦ ᐅᑭᐅᖑᓂᐊᖅᑐᒥ.

“ᐊᒃᓱᐊᓗᒃ ᐊᖏᔪᖅ,” ᐅᖃᓚᐅᖅᑐᖅ ᓄᓇᕗᒥ ᓯᕗᓂᒃᓴᕗᒃᑯᓐᓂ ᐊᐅᓚᑦᑎᔨᐅᖃᑕᐅᔪᖅ ᒧᐊᓕ ᕼᐊᓐᓴᓐ ᐅᖃᐅᓯᕆᓚᐅᖅᑕᖓᓂᒃ ᕖᕗᐊᕆ 2−ᒥ.

ᓄᓇᕗᑦ ᓯᕗᓂᒃᓴᕗᒃᑯᓐᓂ ᐃᖅᑲᓇᐃᔭᖅᑏᑦ ᖁᕕᐊᓲᑎᖃᓚᐅᕐᒪᑕ ᓄᑖᒥᒃ ᐊᖏᕐᕋᖅᑖᕐᒪᑕ ᐃᒡᓗᒥᒃ ᐃᓄᖃᕈᓐᓇᖅᑐᒥᒃ 65-ᓄᑦ ᑎᑭᓪᓗᒍ ᓯᕗᓪᓕᕐᒥ ᐅᑭᐅᒥ - ᑐᖓᓕᖓᓂᓗ ᐃᓕᓴᖅᑎᓄᑦ ᐋᑐᕚᒥ ᐊᑐᖅᑕᐅᓂᐊᖅᑐᓂᒃ ᐱᒋᐊᓕᕐᒥᒃᐸᑕ ᓯᑎᐱᕆ 2018-ᒥ. ᓴᐅᒥᐊᓂᑦ ᐱᒋᐊᕐᓗᒍ: ᓚᕆᓴ ᒪᒃᑖᓄᓪ, ᑖᓐ ᒍᐃ, ᒫᑕ ᖃᔮᖅ, ᕌᐱᓐ ᒨ-ᓖᐊᓐ, ᒧᐊᓕ ᕼᐊᓐᓴᓐ, ᒨᕆ ᐋᓐᖓᔅ, ᒪᓕᓴ ᐆᕗᐃᓐ, ᐊᕕᐊᖅ ᔮᓐᔅᑕᓐ, ᔪᐊᒐ ᖃᐅᓐᓇᖅ ᐊᒻᒪᓗ ᓴᒫᓐᑕ ᒥᑦᓱᓪ.

“ᐱᒋᐊᓚᐅᖅᑐᒍᑦ ᐅᑭᐊᒃᓵᖅ ᑲᑎᖅᓱᐃᓯᒋᐊᖅᖢᑕ ᐃᒡᓗᒥᒃ ᐱᒃᑯᒥᓇᖅᑐᒥᒃ ᓇᓂᓯᒐᑦᑕ … ᐱᐅᔪᑦ ᐃᒡᓗᐃᑦ ᓈᒻᒪᑦᑎᐊᖅᖢᑎᒃᓗ. ᑭᓯᐊᓂᓕ ᐊᑭᖏᑦ ᑕᑯᒐᑦᑎᒍ ᑕᐸᓇᐃᓪᓗᑐᓚᐅᕋᑦᑕ, ᐊᑯᓂᐊᓗᒃ ᐊᑭᓕᖅᓱᕆᐊᖃᕐᓂᐊᕋᓱᒋᓪᓗᒍ.

ᐊᑭᖏᑦ ᑖᒃᑯᐊ ᐱᖓᓱᒃ ᐃᒡᓗᐃᑦ ᑲᑎᓱᒋᑦ $8.8-ᒥᓕᐊᓐᑖᓚᐅᖕᒪᑕ.

“ᒫᓂ ᐃᓕᓴᕐᕕᒃᔪᐊᖃᖅᑐᒥ ᐃᒡᓗᓕᐅᖅᑏᑦ ᐃᒡᓗᓕᐅᖃᑦᑕᕐᒪᑕ ᐃᓕᓴᖅᑎᓄᑦ ᐱᒃᑯᒥᒋᔭᐅᔪᓂᒃ ᐊᑐᖅᑐᐊᒐᓂᒃ ᐃᒡᓗᓂᒃ. ᐃᓛᒃᓕ ᐅᕙᒍᑦ ᖃᓂᒃᓴᕋᑦᑕ ᐋᑐᕚᒥᐅᑉ ᓯᓚᑦᑐᒃᓴᕐᕕᒃᔪᐊᖓᓂᒃ ᒫᓂ, ᐃᒡᓗᓕᐊᕆᔭᐅᔪᑦ ᐃᒡᓗᓕᐅᖅᑎᓄᑦ, ᐊᑐᖅᑐᐊᒐᑐᐃᓐᓇᐅᖏᒻᒪᑕ ᐃᓕᓴᖅᑎᓄᑦ ᐃᒡᓗᖑᓂᐊᕐᒪᑕ ᑕᐃᒪᓐᓇ ᐋᕿᒃᓱᖅᓯᒪᔪᑦ,” ᐅᓂᒃᑳᕆᓪᓗᓂ ᕼᐊᓐᓴᓐ.

ᖁᔭᓐᓇᒦᒃ ᐊᒥᓱᓂᑦ ᑎᒥᖁᑎᒋᔭᐅᔪᓂᑦ ᐃᑲᔪᖅᑕᐅᓚᐅᕋᑦᑕ ᓇᖕᒥᓂᕐᓗ ᐱᓇᓱᐊᒐᕆᔭᐅᔪᓂᑦ, ᕿᓚᓈᕆᓪᓗᑎᒍ ᑕᐅᑐᖑᐊᓚᐅᖅᑕᕗᑦ ᓱᓕᔪᒥᒃ ᓴᓇᔭᐅᓂᐊᓕᖅᐳᖅ ᓱᒃᑲᓕᔪᒥᒃ ᓴᓇᔪᓐᓇᕐᒪᑕᓕ ᑕᒫᓂ. ᑐᓂᐅᓯᐊᓚᐅᕐᒪᑕ ᓄᓇᕗᑦ ᑐᓐᖓᕕᒃᑯᓐᓂᑦ ($4 ᒥᓕᐊᓂᒃ), ᓄᓇᓯ ᑯᐊᐳᕇᓴᒃᑯᓐᓂᑦ ($1 ᒥᓕᐊᓂᒃ), ᐊᒻᒪᓗ NCC Investment Group Inc. ᑲᑎᓱᒋᑦ ᑖᒃᑯᓇᖓᑦ ᐱᔭᕗᑦ ᑭᖑᓪᓕᖅᑎᒋᔪᓐᓇᓕᓚᐅᕋᑦᑎᒍ ᑮᓇᐅᔭᒃᑯᕕᖕᓂᑦ ᐊᑐᖅᑐᐊᖅᖢᑕ ᐊᒥᐊᒃᑯᐊᓂᒃ ᐊᑐᖅᑐᐊᕕᒃ ᑯᐊᐳᕇᓴᒃᑯᓐᓂᑦ ᐊᔪᕐᓇᕈᓐᓃᓚᐅᖅᑐᖅ.

“QC-ᑯᑦ (ᕿᑭᖅᑖᓗᒃ ᑯᐊᐳᕇᓴᒃᑯᑦ) ᐱᒋᐊᖓᖅᑎᑦᑎᓚᐅᖅᑐᑦ ᑐᓂᓯᓪᓗᑎᒃ ᓂᐱᖃᖏᓱᑎᒃ ᐊᑭᑦᑐᕆᐊᒃᓴᑦᑎᑦᑎᔪᓂᑦ ᑮᓇᐅᔭᓂᒃ ᐱᔭᕕᓂᕐᒥᓂᒃ ᐊᕐᕌᓂᐅᓚᐅᖅᑐᖅ,” ᐅᖃᕆᓪᓗᓂ ᕼᐊᓐᓴᓐ.

ᑖᒃᑯᐊ ᑎᒥᖁᑎᖓᑦ ᑕᐃᒪᖓᓂᑦ ᐃᑲᔪᖅᓴᐃᓐᓇᖅᑐᑦ ᑮᓇᐅᔭᓂᒃ ᑲᑎᖅᓱᐃᔪᔾᔨᕙᒃᖢᑎᒃ.

“ᐊᒃᓱᐊᓗᒃ ᐊᒥᓱᓂᑦ ᐱᒃᑯᒥᒋᔭᐅᓪᓗᑕ ᐃᑲᔪᖅᓴᖅᑕᐅᒐᑦᑕ ᑎᒥᖁᑎᒋᔭᐅᔪᓂᑦ ᐃᑲᔪᖅᑕᐅᓪᓗᑕ .. ᐃᓱᒪᒋᓪᓗᒋᑦ ᖁᔭᓕᓗᐊᒧᑦ ᓂᐸᐃᕐᓇᖅᑐᖅ ᐅᕙᑦᑎᓐᓄᑦ.”

ᐃᒃᓯᕙᐅᑕᕆᔭᐅᔪᖅ ᐃᓕᓴᕐᕕᒃᔪᐊᑕ ᑲᑎᒪᔨᖏᓐᓄᑦ ᔨᓯ ᒪᐃᑦ ᐅᓂᒃᑳᓚᐅᖅᑐᖅ ᑐᓴᕐᓇᖅᑐᑎᒎᖅᑎᑦᑎᓪᓗᓂ, “ᖁᔭᓕᔪᒻᒪᕆᐊᓘᔪᒍᑦ ᑕᒪᐃᓐᓂᒃ ᐃᑲᔪᖅᓴᖅᑐᓂᒃ ᐊᒻᒪᓗ ᑮᓇᐅᔭᑎᒍᑦ ᓇᓗᓇᖏᑦᑐᖅ ᐃᑲᔪᖅᓴᕐᓂᖏᑦ ᑐᓂᓯᖃᑦᑕᕐᒪᑕ ᓄᓇᕗᑦ ᓯᕗᓂᒃᓴᕗᒃᑯᑦ ᐱᓇᓱᐊᖏᓐᓄᑦ, ᓇᑯᕐᒦᒃ.

ᑕᐃᓱᒪᓂ ᑐᓴᕐᓇᖅᑐᑎᒎᖅᑎᑦᑎᑎᓪᓗᒋᑦ ᓯᓚᑦᑐᒃᓴᕐᕕᒃᔪᐊᒥ, ᐃᓕᓴᖅᑏᑦ ᐃᖅᑲᓇᐃᔭᖅᑏᓪᓗ ᑕᑯᔭᖅᑐᕈᓐᓇᓚᐅᖅᑐᑦ ᐃᑲᔪᖅᑎᒋᔭᒥᓂᒃ ᐃᓄᖏᓐᓂᒃ ᑕᒪᑐᒥᖓ ᕿᓚᓈᕆᔭᖓᓂᒃ ᑕᑯᒃᓴᕈᖅᑎᑦᑎᔪᓂᒃ.

“ᐊᒃᓱᐊᓗᒃ ᐱᒻᒪᕆᐅᓚᐅᖅᑐᖅ ᑕᒪᑐᒪᓂ ᐱᖃᑎᒋᓪᓗᒋᑦ. ᐊᒃᓱᐊᓗᒃ ᐃᑲᔪᖅᓴᖅᑕᐅᔪᒍᑦ ᓇᓗᓇᖏᑦᑐᖅ ᐃᓕᓴᖅᑏᑦ ᐊᐅᓪᓚᖅᓯᒪᓪᓗᑎᒃ ᐊᖏᕐᕋᒥᓂᑦ ᐃᓕᓴᕆᐊᖅᓯᒪᔪᑦ, ᐊᒥᓱᓄᑦ ᐱᒃᑯᒥᒋᔭᐅᓪᓗᑕ ᐃᑲᔪᖅᑕᐅᔪᒪᔪᒍᑦ.” ᐅᖃᕆᓪᓗᓂ ᕼᐊᓐᓴᓐ.

“ᑕᒪᑐᒪᓂ ᐃᓅᓯᑦᑎᓐᓂ ᐱᒻᒪᕆᐅᖕᒪᑦ ᐱᕈᖅᓴᑎᓪᓗᑕ ᐃᑲᔪᖅᓴᖅᑕᐅᓂᖅᐳᑦ ᐃᒃᐱᖕᓇᕐᓂᖃᕐᓂᐊᖅᑐᖅ ᐊᑯᓂ ᐃᓅᓯᑦᑎᓐᓄᑦ - ᐊᒻᒪᓗ ᑕᒪᑐᒪᓂ ᑲᑎᒪᖃᑎᒋᓪᓗᒋᑦ ᐃᑲᔪᖅᑎᕗᑦ ᐃᒻᒥᒃᑰᖅᖢᓂ ᐱᒃᑯᒥᓇᓚᐅᕐᒥᔪᖅ.”

ᓄᓇᕗᑦ ᓯᕗᓂᒃᓴᕗᒥᐅᑦ ᐊᒥᓱᓂᒃ ᐃᓕᓴᖅᑎᓂᒃ ᐃᑲᔪᖅᓯᒪᓕᑉᒪᑕ ᐃᓄᖕᓂᒃ ᒪᒃᑯᒃᑐᓂᒃ ᐊᖏᕐᕋᒥᓂᑦ ᐊᐅᓪᓚᕋᑖᖅᑐᓂᒃ ᑕᒪᑐᒪᓂ 33-ᓂ ᐅᑭᐅᓂ, ᕼᐊᓐᓴᓐ ᐅᖃᕆᓪᓗᓂ ᐅᓂᒃᑳᒥᓂ. ᐱᒋᐊᖓᖅᑎᑕᐅᓚᐅᖅᑐᖅ 1985-ᒥ ᖁᓕᓄᑦ ᐃᓕᓴᖅᑎᓄᑦ, ᐊᒻᒪᓗ ᒫᓐᓇ ᐃᓯᕐᕕᐅᖃᑦᑕᓕᖅᑐᖅ 55-ᓄᑦ ᐃᓕᓴᖅᑎᓄᑦ ᐊᕐᕌᒍᑕᒫᑦ, ᑕᒪᐃᓐᓄᑦ ᐃᓕᓴᖅᑎᓄᑦ ᓄᓇᕗᒥ ᕿᓚᓈᕆᔭᐅᓪᓗᓂ ᐅᐸᒃᑕᐅᖃᑦᑕᕐᒪᑦ ᑐᖓᓕᖓᓂ ᐃᓕᓵᓂᒃᑐᓄᑦ ᑭᖑᓪᓕᖓᓂ ᐃᓕᓴᕆᐊᓪᓚᒃᑲᓐᓂᕈᒪᔪᓄᑦ.

ᑕᒪᐅᖓ ᓄᒃᑎᖅᖢᑎᒃ ᐊᖏᕐᕋᒃᓴᒥᓂᒃ ᕿᓂᓕᖃᑦᑕᕐᒪᑕ ᐱᔭᕆᑐᔫᖕᒪᑦ ᑕᒪᓐᓇ ᐃᖅᑲᓇᐃᔭᖅᑎᓄᑦ - ᑐᖓᓕᖓᓂᓗ ᐃᓕᓴᖅᑎᓄᑦ ᓇᖕᒥᓂᖅ ᐊᖏᕐᕋᖃᓕᖃᑦᑕᕐᒪᑕ - ᐋᑐᕚᒥᐅᑦ ᓯᓚᑦᑐᒃᓴᕐᕕᒃᔪᐊᖃᐅᕐᒪᑦ ᐊᒥᓱᓂᒃ.

“ᐃᓕᓴᖅᑏᑦ ᓇᖕᒥᓂᖅ ᑕᒫᓃᓐᓂᕐᒥᓂ ᐊᖏᕐᕋᒃᓴᒥᓂᒃ ᕿᓂᕆᐊᖃᕈᑎᒃ ᐊᒃᓱᐊᓗᒃ ᐃᓕᓴᕈᑎᖏᓐᓄᑦ ᐸᒡᕕᐊᕐᓇᕋᔭᕐᒪᑦ ᑕᒪᑐᒪᓂᓴᐃᓐᓇᖅ ᑎᑭᓴᐅᑎᒋᓪᓗᑎᒃ.” ᐅᖃᕆᓪᓗᓂ ᕼᐊᓐᓴᓐ.

“ᐃᓕᓴᖅᑏᑦ ᐊᖏᕐᕋᖃᓕᖅᖢᑎᒃ ᑕᒫᓂ ᐃᓕᓴᕐᕕᐊᑕ ᖃᓂᒋᔭᖓᓂ ᐱᐅᖕᒪᑦ ᐃᒡᓗᑭᒃᓴᖅᑎᓪᓗᒋᑦ ᐋᑐᕚᒥᐅᑦ ᓄᓇᓕᐸᐅᔭᖓᓂ ᖃᓂᑦᑐᓂ ᓇᓂᓯᒋᐊᒃᓴᖅ ᐊᕐᕌᓂ ᑭᓯᐊᓂ ᔫᓐᖑᓕᖅᐸᑦ ᐃᓄᖃᕈᓐᓇᖅᓯᓂᐊᖅᑐᑦ. ᐊᓱᐃᓛᒃᓕ ᑕᕝᕙ ᐅᑭᐅᖅᑕᖅᑐᒥᖔᖅᑐᑦ ᐃᓕᓴᖅᑏᑦ ᐊᖏᕐᕋᒃᓴᖃᐅᓕᖅᐳᑦ, ᐊᒃᓱᐊᓗᒃ ᐱᔭᕆᑐᑎᓪᓗᒍ.”

ᕼᐊᓐᓴᓐ ᐅᖃᕆᓪᓗᓂ ᑖᒃᑯᐊ ᐃᓕᓴᖅᑏᑦ ᐊᖏᕐᕋᖏᑦ ᐱᐅᔪᑦ, ᐊᑦᑕᕐᓇᖅᑐᖃᖏᑦᑐᑦ ᖃᓂᖢᑎᒃ ᐃᓕᓴᕐᕕᖏᓐᓄᑦ ᐱᓱᒐᒃᓴᐅᓪᓗᑎᒃ.

“ᐃᓱᒪᒐᑦᑕ ᓄᑖᒥᒃ ᐃᒡᓗᖃᕐᓂᐊᓕᕋᑦᑕ ᓄᓇᕗᑦ ᓯᕗᓂᒃᓴᕗᒥ ᐃᓕᓴᖅᑏᑦ ᐊᖏᕐᕋᖃᕐᓂᐊᓕᖅᑐᑦ ᑕᕝᕙᓂ ᐱᐅᔪᒥᒃ ᐅᐱᓐᓇᖅᑐᒥ ᐊᑦᑕᕐᓇᖏᑦᑐᒥᓗ ᐊᓯᖏᓐᓂᑦ ᐃᒡᓗᓂᑦ ᐊᒃᓱᕉᑎᖃᕐᓂᖏᓐᓂ ᐃᓕᓴᖅᑕᒥᓂᒃ ᑕᒪᒃᑯᓂᖓ ᐱᖏᖕᓇᔮᕈᓐᓃᖅᐳᑦ,” ᐅᖃᕆᓪᓗᓂ ᒪᐃᒃ.

ᑲᑎᖢᒋᑦ 13  ᐃᒻᒥᒃᑰᖅᑐᓂᒃ ᐃᒡᓗᕈᓯᖃᖅᑐᑦ ᐊᒻᒪᓗ 65-ᓂᒃ ᓯᓂᒃᕕᑐᐃᓐᓇᓕᖕᓂᒃ. ᑕᒪᑐᒪᓂ ᐅᑭᐅᑦᑎᓐᓂ, 55 ᐃᓕᓴᖅᑏᑦ ᐃᓯᓚᐅᕐᒪᑕ 2017−18-ᒥ ᐱᒋᐊᖅᖢᑎᒃ ᐅᑭᐅᖓᓂ, ᑐᑭᖃᖅᑐᖅ ᓱᓕᒃᑲᓐᓂᖅ ᐃᓂᖃᒃᑲᓐᓂᕈᓐᓇᖅᓯᕗᑦ ᐃᓯᕈᒪᔪᓄᑦ.

ᓄᑖᑦ ᐃᓕᓴᖅᑏᑦ ᐅᑎᓕᖅᑐᓪᓗ ᐊᕐᕌᓂᓂᑦ ᓄᒃᑎᕐᓂᐊᓕᖅᑐᑦ ᓄᑖᒧᑦ ᐃᒡᓗᒧᑦ ᓯᑎᐱᕆ 2018-ᒥ.