Skip to content

ᐃᓚᖏᑦ ᓄᓇᕗᒻᒥᐅᑕᓂ ᐃᓕᓐᓂᐊᖅᑎᓂᑦ ᐊᖏᕐᕋᓵᕋᓱᐊᖅᐳᑦ ᖃᓪᓗᓈᑦ ᓄᓇᖓᓐᓂ, ᐃᒻᒥᖕᓂᒃ-ᐃᓄᑑᑎᑦᑎᓯᕗᑦ

ᓄᕙᒡᔪᐊᕐᓇᖅ-19 ᓴᖅᑭᑎᑦᑎᓚᐅᖅᐳᖅ ᐱᕈᖅᐸᓪᓕᐊᔪᒥ ᑲᑉᐱᐊᓱᖕᓂᐅᔪᒥ ᑲᓇᑕᓕᒫᒥ ᖄᖏᖅᓯᒪᓕᖅᑐᒥ ᐱᓇᓱᐊᕈᓯᐅᓚᐅᖅᑐᒥ, ᓄᓇᕗᒻᒥᐅᑕᓂ ᐃᓕᓐᓂᐊᖅᑎᓂᑦ ᐃᓕᓐᓂᐊᖅᑐᓂ ᖃᓪᓗᓈᑦ ᓄᓇᖓᓐᓂ ᓵᙵᓚᐅᖅᐳᑦ ᓂᕈᐊᕐᓂᐅᔪᒥ ᐊᓂᑦᑕᐃᓕᒪᓂᕐᒧᑦ ᐅᕝᕙᓘᓐᓃᑦ ᐊᖏᕐᕋᓵᕐᓂᕐᒧᑦ.

ᐊᓛᓱᐊ ᕼᐋᓐᓯᓐ

ᐊᓛᓱᐊ ᕼᐋᓐᓯᓐ, ᐃᓕᓐᓂᐊᖃᑕᐅᔪᒥ ᓄᓇᕗᑦ ᓯᕗᓂᒃᓴᕗᑦ ᓯᓚᑦᑐᖅᓴᕐᕕᖕᒥ ᐱᓕᕆᐊᖑᔪᒥ ᐋᑐᕚᒥ, ᐅᑎᓚᐅᖅᐳᖅ ᐃᖃᓗᖕᓄᑦ ᖃᖓᑕᓲᒃᑯᑦ ᕿᑎᖅᑰᖑᓚᐅᖅᑐᒥ.

ᐅᖃᓚᐅᖅᐳᖅ ᑲᑉᐱᐊᓇᓚᐅᖅᐳᖅ ᑐᓴᑲᑕᖕᓂᕐᒧᑦ ᐅᓄᖅᓯᕙᓪᓕᐊᔪᓂ ᐃᓄᖕᓂ ᐋᑐᕚᒥ ᐊᐃᑦᑐᖅᑕᐅᓚᐅᖅᑐᓂ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ —27–ᓂ ᐃᓄᖕᓂ ᓇᓗᓇᐃᖅᑕᐅᓯᒪᓂᖃᖅᐳᖅ ᑲᓇᑕᐅᑉ ᐊᖓᔪᖅᑳᖃᕐᕕᖓᓂ ᐊᐃᑉᐹᓂ ᐅᓐᓄᒃᓴᖓᓂ. ᐊᑦᑕᕐᓇᖅᑐᒦᔮᓚᐅᙱᒃᑲᓗᐊᖅᑎᓪᓗᒍ ᐃᓯᖅᓯᒪᐃᓐᓇᕈᓂ, ᐃᓇᖏᖅᓯᒪᓂᖃᙱᓚᖅ ᐃᓗᐊᕐᓂᐅᔪᒥ ᓇᒡᓕᒋᔭᒥᓃᓐᓂᕐᒧᑦ ᕿᑎᐊᓃᑎᓪᓗᒋᑦ ᓄᓇᕐᔪᐊᒥ ᐋᓐᓂᐊᕐᓇᐅᔪᒥ.

“ᐃᓱᒪᓕᐅᕐᓂᐅᓚᐅᖅᐳᖅ ᐅᕙᓐᓄᑦ ᐊᒻᒪ ᐃᓚᓐᓄᑦ,” ᕼᐋᓐᓯᓐ ᐅᖃᓚᐅᖅᐳᖅ ᐊᖏᕐᕋᐅᓂᕐᒧᑦ.
ᑕᓪᓕᒪᖓᓂ ᐅᓪᓗᖓᓄᐊᓚᐅᖅᐳᖅ ᐃᒻᒥᖕᓂᒃ-ᐃᓯᖅᓯᒪᐃᓐᓇᕐᓂᕐᒧᑦ ᐊᐃᑉᐹᓂ ᓇᓗᓇᐃᖅᓯᓂᕐᒧᑦ ᐊᐃᑦᑐᐃᖏᓐᓂᖓᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ, ᓴᖅᑭᔮᕐᕕᐅᓚᐅᕈᓂ.

“ᓱᖏᐅᓐᓇᙱᓚᖅ ᐃᓯᖅᓯᒪᐃᓐᓇᕐᓂᕐᒧᑦ ᑭᓯᐊᓂ ᖃᐅᔨᒪᕗᖓ ᐊᑦᑕᓇᔾᔭᐃᖅᓯᓯᒪᓂᐅᕗᖅ ᓄᓇᓕᖕᓄᑦ,” ᐅᖃᓚᐅᖅᐳᖅ. “ᑕᐃᒪᑐᖅ ᐊᓯᖏᑦ ᐃᓄᐃᑦ ᓄᓇᕗᓕᐊᖅᑐᓂ ᒪᓕᖕᓂᐊᖅᐳᑦ ᐆᒪᙵᑦ ᐃᒻᒥᖕᓂᒃ-ᐃᓯᖅᓯᒪᐃᓐᓇᕐᓂᕐᒧᑦ.”

ᕼᐋᓐᓯᓐ ᐱᓕᕇᓐᓇᖅᐳᖅ ᐃᓕᓐᓂᐊᕌᓂᒃᑐᓄᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓴᖅᑐᓄᑦ ᐃᓕᓐᓂᐊᕐᓂᐅᔪᒥ ᖃᕋᓴᐅᔭᒃᑯᑦ. ᐱᔭᕇᕐᓂᐊᖅᐳᖅ ᐃᓕᓐᓂᐊᕐᕕᐊᕈᓯᖓᓐᓂ ᐊᐃᑉᕆᓕᐅᑉ–ᕿᑎᖅᐸᓯᐊᓂ, ᑭᓯᐊᓂ ᐸᕐᓇᒃᑕᐅᓯᒪᓚᐅᖅᑐᑦ ᑕᐅᖅᓰᓂᕐᒧᑦ ᐊᐅᓪᓛᕐᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑳᔅᑕ ᕇᑲᒧᑦ ᐊᒻᒪ ᕼᐊᕙᐃᔨᒧᑦ ᐃᒃᓯᓐᓇᖅᑕᐅᓯᒪᓕᖅᐳᑦ.

ᐃᓱᒫᓗᕈᔪᒃᐳᖅ ᖃᓄᑎᒋ ᖃᕋᓴᐅᔭᒃᑰᕈᑎᖓ ᐱᓕᕆᑦᑎᐊᕈᓐᓇᕐᓂᐊᕐᓂᖓᓂ ᑎᑭᑉᐸᓪᓕᐊᔪᓄᑦ ᐱᓇᓱᐊᕈᓯᕐᓂᑦ ᐱᔭᕇᖅᓯᓇᓱᐊᕐᓂᖓᓂ ᐃᓕᓐᓂᐊᕈᑎᖏᓐᓂ ᑭᓯᐊᓂ “ᒫᓐᓇᒧᑦ ᑎᑭᖦᖢᒍ, ᖃᓄᐃᙱᑦᑐᖅ,” ᕼᐋᓐᓯᓐ ᐅᖃᓚᐅᖅᐳᖅ ᓇᒡᒐᔾᔭᐅᒥ.

ᒪᓄ ᑯᓄᒃ

ᒪᓄ ᑯᓄᒃ ᐅᖃᓚᐅᖅᐳᖅ ᐃᒻᒥᓂᒃ ᖃᖓᑦᑕᐅᑎᒥᓂᒃ ᐊᑭᓖᓚᐅᖅᐳᖅ ᐋᓐᑎᐊᕆᐅᒥ ᐅᔾᔨᕆᒐᒥ ᑮᓇᐅᔭᓄᑦ ᐃᑲᔪᖅᓯᖅᑕᐅᓂᕐᒧᑦ ᓄᓇᕗᒻᒥᐅᓄᑦ ᐃᓕᓐᓂᐊᖅᑎᓄᑦ (FANS) ᐊᑭᓖᔾᔮᙱᓐᓂᖏᓐᓂ ᖃᖓᑦᑕᐅᑎᓂᑦ ᑕᐃᒃᑯᓄᖓ ᐊᖏᕐᕋᐅᑲᐅᑎᒋᔪᓄᑦ.
“ᑕᐃᔅᓱᒪᓂ ᐱᖃᓐᓇᕆᔭᒃᑲ ᐃᓚᒃᑲᓗ ᐅᐸᒃᓯᒪᔪᒪᓚᐅᖅᐸᒃᑲ… ᐃᓛᒃ, ᑲᑉᐱᐊᓇᒐᓚᓚᐅᖅᐳᖅ ᓄᕙᒡᔪᐊᕐᓇᖅ-19–ᖃᖅᑐᖃᕐᓂᙶᕐᓂᓐᓂ,” ᐅᖃᓚᐅᖅᐳᖅ ᐃᓱᒪᓕᐊᖓᓂ ᖃᖓᑕᓂᕐᒧᑦ ᐊᕐᕕᐊᓄᑦ, ᐃᒻᒥᖕᓂᒃ-ᐃᓯᖅᓯᒪᐃᓐᓇᖅᓯᒪᓪᓗᓂ ᐱᖃᓐᓈᖓᑕ ᐊᖏᕐᕋᖓᓂ ᐱᓇᓱᐊᕈᓯᐅᑉ ᐅᖓᑎᑦᑎᐊᖓᓄᑦ.

ᐅᑎᓚᐅᖅᐳᖅ ᐱᖓᔪᐊᓐᓂ, ᑎᓕᐅᕈᑕᐅᔪᒥ ᓄᓇᕘᑉ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ, ᐃᓕᓐᓂᐊᕌᓂᒃᑐᓄᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓴᖅᑐᓄᑦ ᐃᓕᓐᓂᐊᖅᑎᓂᑦ ᐅᑎᖅᑐᓄᑦ ᓄᓇᕗᒻᒧᑦ ᐃᒻᒥᖕᓂᑦ–ᐃᓯᖅᓯᒪᐃᓐᓇᖅᑎᑦᑎᔭᕆᐊᖃᖅᐳᑦ ᐋᑐᕚᒥ ᐅᐃᓂᐸᐃᒡᒥ ᐅᓪᓗᓄᑦ 14–ᓄᑦ ᐊᒻᒪ ᐊᓱᐃᓛᒃ ᓵᑕᒃᑯᑦ ᖃᖓᑕᓗᑎᒃ ᑐᕌᑲᐅᑎᒋᔪᒥ ᐊᖏᕐᕋᖓᓄᑦ ᓄᓇᓕᖓᓐᓄᑦ.

ᑯᓄᒃ ᓇᓗᓇᐃᖅᓯᓚᐅᖅᐳᖅ ᐃᓱᒫᓗᖕᓂᖓᓂ ᐱᓂᖓᓂ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕐᕕᐊᕈᓯᖏᓐᓂ ᐱᔭᕇᕐᓂᖓᓂ ᖃᕋᓴᐅᔭᒃᑯᑦ.

“ᐃᓛᓐᓂᒃᑯᑦ ᖃᕋᓴᐅᔭᒃᑰᕈᑎᖓ ᕿᕿᑉᐸᖕᓂᖓᓂ,” ᐅᖃᓚᐅᖅᐳᖅ ᓄᓇᓕᖕᓂ ᖃᕋᓴᐅᔭᒃᑰᕈᑎᖓᓂ.

ᑳᓯᑎ ᑯᐊᕼᐊ–ᓚᐅᑉ

ᑳᓯᑎ ᑯᐊᕼᐊ–ᓚᐅᑉ ᒥᓚᐅᖅᐳᖅ ᐃᖃᓗᒃᑑᑦᑎᐊᕐᒧᑦ ᓇᒡᒐᔾᔭᐅᒥ ᐊᒃᓱᕉᓴᓚᐅᖅᑎᓪᓗᒍ ᖃᓄᐃᓕᐅᕐᓂᐊᕐᓂᖓᓂ ᓄᓇᕐᔪᐊᒥ ᐋᓐᓂᐊᕐᓇᐅᔪᒥ ᐊᒃᑐᐃᕙᓪᓕᐊᑐᐃᓐᓇᖅᑎᓪᓗᒍ ᐊᒥᓱᒃᑲᓐᓂᕐᓂ ᐃᓄᖕᓂ ᑲᓇᑕᓕᒫᒥ.

“ᐊᒃᓱᕈᕐᓇᖅᑐᕐᔪᐊᖑᕗᖅ ᐊᒻᒪᓗ ᓱᓕᓪᓗᖓ, ᐃᓱᒪᒃᑯᑦ ᐊᒃᓱᕈᖅᓯᒪᕗᖓ ᖄᖏᖅᓯᒪᔪᓄᑦ ᖃᔅᓯᒐᓚᖕᓄᑦ ᐅᓪᓗᓄᑦ ᐃᒻᒥᖕᓂ–ᐃᓯᖅᓯᒪᐃᓐᓇᕐᓂᕐᒧᑦ ᐊᖏᕐᕋᒥ, ᐃᓄᑑᓪᓗᖓ,” ᑯᐊᕼᐊ–ᓚᐅᑉ ᑎᑎᕋᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ ᐃᐊᑦᒪᓐᑕᓐᒥ, ᐱᓕᕆᓪᓗᓂ ᓇᖕᒥᓂᖅ ᐊᓪᓚᕝᕕᓕᕆᓂᕐᒧᑦ ᑮᓇᐅᔭᓕᕆᓂᕐᒧᑦ ᐃᓕᓴᕆᔭᐅᓂᐅᔪᒥ ᐱᓕᕆᐊᖑᔪᒥ ᐅᐊᖕᓇᒥ ᐋᓪᐴᑕᒥ ᐃᓕᓐᓂᐊᕐᕕᐅᔪᒥ ᓄᑖᙳᖅᐸᓪᓕᐊᓂᐅᔪᓄᑦ. “ᐊᒃᓱᕉᓴᒃᑭᕗᖓ ᑭᐅᔭᐅᓯᒪᙱᑦᑐᓂ ᐊᐱᖅᑯᑎᓂ ᖃᓄᑎᒋ ᐊᑯᓂᐅᓂᐊᕐᓂᖓᓂ, ᖃᓄᖅ ᐊᑯᓂᐅᑎᒋᓂᐊᖅᐸ ᐊᖏᕐᕋᐅᔪᓐᓇᖅᓯᓂᐊᕐᓂᓐᓂ, ᖃᖓ ᐃᓚᓐᓃᑦᑐᓐᓇᓛᖅᐳᖓ ᐱᒋᐊᓚᐅᖅᑳᕐᓂᓐᓂ ᐱᔭᕆᐅᖅᓴᓂᓐᓂ ᐃᖃᓗᖕᓂ ᒪᐃᒥ.”

ᐃᓱᐊᓂ ᓂᕈᐊᓚᐅᖅᐳᖅ ᐴᖅᑲᐃᓂᕐᒧᑦ ᐊᒻᒪ ᐅᑎᕐᓗᓂ ᓄᓇᕗᒻᒧᑦ. ᐊᓱᐃᓛᒃ ᐃᒻᒥᖕᓂᒃ-ᐃᓯᖅᓯᒪᐃᓐᓇᖅᑎᑦᑎᓪᓗᓂ, ᐅᖃᓚᐅᖅᐳᖅ.

ᐱᓇᓱᐊᕈᓯᐸᓗᖕᓂ ᑎᓴᒪᓂ ᑭᖑᓪᓕᖅᐹᖑᔪᓄᑦ ᖃᐅᔨᓴᖅᑕᐅᓂᕐᓃᑉᐳᖅ, ᐊᒻᒪ ᐱᒋᐊᓕᖅᖢᓂ ᖃᕋᓴᐅᔭᑎᒍᑦ ᐃᓕᓐᓂᐊᕐᕕᐊᕈᓯᕐᓂ ᐅᕙᓂ ᑭᖑᕙᖅᑐᒥ ᖃᓄᐃᓐᓂᐅᔪᒥᑦ “ᐊᔪᕐᓇᙱᑦᑐᐃᓐᓇᐅᙱᓚᑦ,” ᐅᖃᐅᓯᐅᓪᓗᓂ ᑯᐊᕼᐊ–ᓚᐅᑉᒧᑦ.

ᐊᔾᔨᓕᐅᖅᑕᐅᔪᖅ ᓯᐅᓪᑎᓐ ᓂᐱᓴᖅ

ᐊᕐᕕᐊᕐᒥᐅᑕᖅ ᓯᐅᓪᑎᓐ ᓂᐱᓴᖅ ᐋᑐᕚᒦᖏᓐᓇᖅᐳᖅ, ᑕᐃᑲᓂ ᐅᖃᓚᐅᖅᐳᖅ ᓄᓇᕗᑦ ᓯᕗᓂᒃᓴᕗᑦ ᐃᖅᑲᓇᐃᔭᖅᑎᖏᑦ ᑐᓂᓯᓂᖏᓐᓂ ᐃᑲᔪᖅᓱᐃᓂᕐᒥ ᐃᓕᓐᓂᐊᖅᑎᓄᑦ ᓂᕿᓂᑦ, ᐅᐊᓴᐅᒻᒥ ᐊᒻᒪ ᐃᖂᑎᒃᓴᓂ ᐊᑐᐃᓐᓇᐅᑎᑦᑎᓪᓗᑎᒃ. ᑕᒪᓐᓇ ᐃᑲᔪᕐᓂᖃᖅᐳᖅ, ᑭᓯᐊᓂ ᓱᓕ ᐃᓗᐊᓗᐊᙱᓚᖅ, ᐅᖃᓚᐅᖅᐳᖅ.

“ᐃᓱᒫᓗᒃᐳᖓ ᑖᔅᓱᒥᖓ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ ᐃᓂᐅᔪᒥ ᐅᕙᓂᑎᑐᑦ ᑭᓯᐊᓂ ᐃᓱᒫᓗᖕᓂᖅᓴᐅᕗᖓ ᐊᒡᔭᖅᑐᖅᑎᐅᑐᐃᓐᓇᕆᐊᖃᕐᓂᓐᓂ ᖃᐅᔨᒪᙱᓪᓗᖓ ᐅᖓᓯᒃᑐᒧᑦ ᐃᓂᐅᔪᒧᑦ ᐊᖏᕐᕋᒧᑦ,” ᓂᐱᓴᖅ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐋᑐᕚ ᐊᖏᓂᖅᓴᒥ ᐊᔾᔨᒌᙱᑦᑐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᖃᖅᐳᑦ ᐊᑐᐃᓐᓇᐅᔪᓂ ᓄᓇᕘᑉ ᓴᓂᐊᓂ. “ᒪᓕᑦᑎᐊᑐᐊᕈᒪ ᐊᒻᒪ ᓈᓚᒃᐸᒡᓗᖓ ᐃᓚᖏᓐᓂ ᒪᓕᒐᒃᓴᐅᔪᓂ, ᐊᒃᓱᕈᕐᓇᙱᓐᓂᖅᓴᐅᓂᐊᖅᐳᖅ.”

ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ ᓯᓚᑦᑐᖅᓴᕐᕕᖕᒥ ᐃᒡᓗᕈᓯᕐᒥᐅᖃᑎᖓ ᐃᒡᓗᕈᓯᕐᒥᓂᒃ ᓴᓗᒻᒪᖅᓴᐃᖃᑦᑕᖅᐳᑦ ᐊᒻᒪ ᑭᒡᓕᖃᖅᑎᑦᑎᕙᒃᖢᑎᒃ ᐊᓃᕐᓂᕐᒧᑦ ᐊᒻᒪ ᐊᐃᒃᓯᕐᓂᕐᒧᑦ ᐱᔭᕆᐊᓕᖕᓂ ᑭᓱᑐᐃᓐᓇᓂᑦ, ᓲᕐᓗ ᓴᓗᒻᒪᖅᓴᐃᔾᔪᑎᒃᓴᓂᑦ.
“ᐅᖃᖃᑎᖃᖅᓯᒪᖃᑦᑕᕆᕗᖓ ᐱᖃᓐᓇᕆᔭᓐᓄᑦ ᐊᒻᒪ ᐃᓚᓐᓄᑦ ᐊᖏᕐᕋᓐᓂ ᐅᓚᕕᓴᕐᓂᕐᒧᑦ ᐅᕙᓐᓂ ᐆᒪᙵᑦ ᑐᐊᕕᕐᓇᖅᑑᔪᒥᑦ,” ᐅᖃᓚᐅᖅᐳᖅ ᓂᐱᓴᖅ.

ᑕᐃᒫᒃ ᐃᓕᓐᓂᐊᕐᕕᐊᕈᓯᐅᑉ ᐃᓗᐊᓂ ᐃᓕᓐᓂᐊᕐᓂᐅᔪᑦ ᓄᖅᑲᖅᑎᑕᐅᓯᒪᖕᒪᑕ, ᓱᖏᐅᔾᔨᓂᕐᒧᑦ ᖃᕋᓴᐅᔭᒃᑰᖅᑐᒥ ᐃᓕᓐᓂᐊᕐᓂᕐᒥ ᓯᕗᓪᓕᕐᒥ “ᐊᔪᕐᓇᓚᐅᖅᐳᖅ” ᐅᖃᓚᐅᖅᐳᖅ.

“ᑭᓯᐊᓂ ᐱᐅᓯᕙᓪᓕᐊᕗᖅ ᐅᓪᓗᒥ ᐅᓪᓗᒧᑦ. ᐅᓇ ᓄᑖᖑᓂᐅᕗᖅ ᐅᕙᓐᓄᑦ ᑭᓯᐊᓂ ᓱᒃᑲᐃᑦᑐᒥ ᓱᖏᐅᑎᕙᓪᓕᐊᕙᕋ,” ᐅᖃᓚᐅᖅᐳᖅ. “ᐱᓇᓱᐊᕈᓯᐅᓚᐅᖅᑐᒥ ᐊᔪᕐᓇᒐᓚᓚᐅᖅᐳᖅ… ᐃᒡᓕᓐᓂᑦ ᒪᑭᑦᑐᒪᖃᑦᑕᓚᐅᙱᓐᓇᒪ, ᐃᓛᓐᓂᒃᑯᑦ ᓱᓕ ᐊᔪᕐᓇᖅᐸᒃᐳᖅ ᒪᑭᓐᓇᓱᐊᕆᐊᒃᓴᖅ ᑭᓯᐊᓂ ᐋᖅᑭᒃᓱᐃᕙᒌᔭᕋᓱᐊᓲᖑᕗᖓ ᒪᑭᑦᑕᕆᐊᖃᕐᓂᕐᒧᑦ ᐃᒡᓗᕐᒥᑦ.”

ᓕᓕ ᐹ

ᐋᑐᕚᒦᖏᓐᓇᖅᐳᖅ ᐃᓕᓐᓂᐊᖅᑎ ᓕᓕ ᐹ ᐃᒻᒥᓂᒃ ᓂᕈᐊᖅᖢᓂᐅᒃ, ᐊᒻᒪ ᐊᓕᐊᓇᐃᒍᓱᒃᐳᖅ ᐱᐅᓕᔭᐅᓯᒪᓂᖏᓐᓂ ᐃᓱᒪᒋᓇᒍ ᓇᓗᓇᕐᓂᐅᔪᒥ ᓄᕙᒡᔪᐊᕐᓇᖅ-19 ᓇᒃᓴᕐᓂᖓᓂ.

“ᑕᒫᓃᖏᓐᓇᕈᒪᕗᖓ ᐃᓂᒋᔭᓐᓂ ᒫᓐᓇᐅᔪᒥ. ᖁᔭᓕᕗᖓ ᐊᒻᒪ ᖁᕕᐊᑉᐳᖓ ᐃᒡᓗᖃᕐᓂᓐᓂ, ᓇᖕᒥᓂᖅ ᐃᓂᒋᔭᓐᓂ, ᓴᓗᒪᔪᒥ ᐃᒪᕐᒥ ᐊᒻᒪ ᓂᕆᔭᒃᓴᖃᕐᓂᓐᓂ,” ᐅᖃᓚᐅᖅᐳᖅ. “ᐊᒥᓱᐊᓗᖕᓂ ᐃᓄᖕᓂ ᓄᓇᕐᔪᐊᓕᒫᒥ ᐱᖃᔾᔮᙱᓚᑦ ᐅᑯᓂᖓ ᐱᔭᕆᐊᖃᓪᓚᕆᖕᓂᐅᔪᓂ, ᐱᓗᐊᖅᑐᒥ ᒫᓐᓇᐅᔪᒥ ᓄᓇᕐᔪᐊᒥ ᐋᓐᓂᐊᕐᓇᐅᔪᒥ.”

ᐅᖃᓚᐅᖅᐳᖅ ᐃᓱᒫᓗᓗᐊᙱᓐᓂᖅᓴᐅᓕᖅᐳᖅ ᓯᕗᓂᐊᓂᐅᓚᐅᖅᑐᒥ ᒪᓕᑦᑎᐊᕐᓂᐊᕋᒥ ᐅᖃᐅᔾᔨᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᖃᐅᔨᒪᔨᕐᔪᐊᖑᔪᓂ ᐊᒻᒪ ᒐᕙᒪᓕᕆᔨᐅᔪᓂᑦ.

ᐃᓱᒪᓕᐅᕆᓯᒪᐃᓐᓇᖅᐳᖅ ᐃᓱᓕᑦᑎᓛᕐᓂᖓᓂ ᒪᕐᕈᖓᓂ ᐊᕐᕌᒍᖓᓂ ᓄᓇᕗᑦ ᓯᕗᓂᒃᓴᕗᑦ ᐱᓕᕆᐊᖑᔪᒥ ᐃᓱᒪᒋᓇᒍ ᓇᒨᕈᓘᔭᖅᑐᒥ ᐊᑲᐅᙱᓕᐅᕈᑎᕐᔪᐊᖑᔪᒥ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ.

“ᓄᑖᖑᓪᓗᓂ ᓄᓇᕐᔪᐊᖑᕗᖅ ᑭᓇᓕᒫᒧᑦ, ᐊᔪᕐᓇᙱᑦᑑᓪᓗᓂ ᖃᓄᐃᓐᓂᐅᙱᓚᖅ ᐃᓗᐊᓃᕐᓂᕐᒧᑦ, ᐱᓗᐊᖅᑐᒥ ᐊᐅᓪᓚᖅᓯᒪᓂᕐᒥ ᐊᖏᕐᕋᒥ, ᐃᓚᖕᓂᑦ ᐊᒻᒪ ᐱᖃᓐᓇᕆᔭᕐᓂᑦ,” ᐅᖃᓚᐅᖅᐳᖅ ᐹ. “ᑭᓯᐊᓂ, ᖁᔭᓕᓂᖃᖅᐳᖓ ᐃᑲᔪᖅᓱᐃᓂᐅᔪᒥ ᐊᕙᑎᒦᓐᓂᓐᓂ ᐃᓕᓐᓂᐊᕐᓂᓐᓂ ᐱᓕᕇᓐᓇᕐᓗᖓ ᐊᒻᒪ ᐱᔭᕇᕐᓗᒍ ᐊᕐᕌᒎᔪᒥ.”