ᑲᓇᑕᐅᑉ ᒐᕙᒪᒃᑯᖏᑦ ᐊᒃᓱᕈᕐᓂᖃᖅᐳᑦ ᐱᔅᓂᔅᖃᖅᑐᑦ ᑮᓇᐅᔭᓕᐅᖏᑦᖢᑎᒡᓗ ᐱᓕᕆᕕᑦ ᐊᒃᓱᕈᖅᑎᑕᐅᑎᓪᓗᒋᑦ COVID 19 ᓄᕙᒡᔪᐊᕐᓇᒧᑦ ᓄᓇᕗᒥ ᓇᖕᒥᓂᖅ ᐱᓕᕆᕕᓖᑦ ᑲᑐᔾᔨᖃᑎᒌᒃᑯᖏᓐᓄᑦ ᐃᑲᔪᖅᑐᖅᑕᐅᓇᓱᐊᖃᑕᐅᕗᑦ ᑭᓯᐊᓂ ᐊᐱᖅᑯᑎᒃᓴᖃᖅᐳᑦ ᐃᓱᒫᓗᒍᑎᖃᖅᖢᑎᒡᓗ.
ᑲᓇᑕᐅᑉ ᒐᕙᒪᒃᑯᖏᑦ ᐅᓄᖅᓯᒋᐊᖅᓯᓚᐅᖅᐳᑦ ᐃᑲᔪᕈᑎᒃᓴᓂᒃ ᐱᔅᓂᔅᖃᖅᑐᓄᑦ ᑮᓇᐅᔭᓕᐅᖏᑦᖢᑎᒡᓗ ᑎᒥᐅᔪᓄᑦ ᒫᑦᓯ 27–ᒥ, 75% ᐃᖅᑲᓇᐃᔭᖅᑎᑦ ᑮᓇᐅᔾᔭᒃᓴᐅᑎᖏᓐᓂᒃ ᑕᒪᒃᑯᓄᖓ ᐃᑲᔪᖅᑕᐅᒋᐊᖃᖅᑐᓄᑦ. ᐱᔅᓂᔅᒋᔭᐅᔪᑦ ᖃᐅᔨᒃᑲᐃᒋᐊᖃᖅᐳᑦ ᐱᓕᕆᖏᓚᐅᕐᓂᕐᒥᖕᓄᑦ 30–ᐳᓴᓐ ᑮᓇᐅᔭᓕᐅᖏᓐᓂᖅᓴᐅᓕᕐᓂᖏᓐᓄᑦ ᓄᕙᒡᔪᐊᕐᓇᖅ ᐱᔾᔪᑎᒋᔭᐅᓪᓗᓂ ᑕᐃᒪᓐᓇ ᐃᑲᔪᖅᑕᐅᒍᓯᐊᕐᓂᐊᕐᓗᑎᒃ, ᓯᕗᓪᓕᖅ $58,700 ᐃᖅᑲᓇᐃᔭᖅᑎᑦ ᑮᓇᐅᔭᒃᓴᐅᑎᖏᑦ, ᐅᕙᓘᓐᓃᑦ $847 ᐱᓇᓱᐊᕈᓯᑕᒫᑦ ᐱᖓᓱᓄᑦ ᑕᖅᑭᓄᑦ.
ᐊᑐᕚ ᐊᑭᓕᖅᑐᐃᓂᐊᓚᐅᕋᓗᐊᖅᐳᑦ ᓯᕗᓪᓕᕐᒥ 10% ᑮᓇᐅᔭᒃᓴᐅᑎᖏᓐᓂᒃ. ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᒃᓴᖅᑖᖅᑎᑎᔪᓐᓇᕐᒃᓂᐊᕆᓪᓗᑎᒡᓗ ᕿᑐᖏᐅᕈᑎᖃᖏᑎᑕᐅᔪᓂᒃ ᑎᑭᓪᓗᒍ $40,000-ᓄᑦ – $10,000 ᐅᑎᖅᑎᑕᐅᒋᐊᖃᖏᑦᖢᓂ ᐊᑭᓕᒃᓴᒥᖕᓂᒃ ᐊᑭᓖᕌᓂᓚᐅᖅᑐᓄᑦ ᑎᓴᐱᕆ 31, 2022–ᖑᓕᖅᐸᑦ. ᐊᒻᒪ, ᒐᕙᒪᒃᑯᑦ ᐊᑭᓖᑎᑦᓯᓂᐊᖏᑦᖢᑎᒃ GST–ᓂᒃ ᐊᑭᓕᐅᑕᐅᒋᐊᖃᖅᐸᒃᑐᓂᒃ ᔫᓐ 30-ᒥ.
"ᖃᓄᑐᐃᓐᓇᖅ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᕈᑎᖃᕐᓂᐊᖅᐸᑕ ᑐᓐᖓᓱᑦᓯᐊᖅᑎᓐᓂᐊᖅᐸᕗᑦ ᐱᔅᓂᔅᓄᑦ ᑐᓂᔭᐅᓂᐊᖅᑐᑦ ᐃᑲᔪᕈᑎᒃᓴᐃᑦ," ᐅᖃᓚᐅᖅᐳᖅ ᕕᒃᑐ ᑐᑐ, ᐊᖓᔪᖄᕆᔭᐅᔪᖅ ᕿᑭᖅᑖᓗᖕᒥ ᓇᖕᒥᓂᖅ ᐱᓕᕆᕕᓖᑦ ᑲᑐᔾᔨᖃᑎᒌᒃᑯᖏᑦ.
ᕿᑎᕐᒥᐅᑦ ᓇᖕᒥᓂᖅ ᐱᓕᕆᕕᓖᑦ ᑲᑐᔾᔨᖃᑎᒌᒃᑯᖏᑦᑕ, ᑐᑭᒧᐊᒃᑎᑎᔨᖓᑦ ᕙᑐ ᐳᑎᕼᐅ–ᕆᓯᓐᑎᔅ ᐊᐱᕆᓚᐅᖅᐳᖅ ᕿᑎᕐᒥᐅᓂ ᓄᓇᓕᖕᓂᒥᐅᑕᐃᑦ ᐅᖃᖁᓪᓗᒋᑦ ᖃᓄᖅ ᐃᓱᒪᓂᖏᓐᓄᑦ ᑕᒪᒃᑯᓂᖓ ᑮᓇᐅᔭᖅᑖᕈᑕᐅᓂᐊᖅᑐᓂᒃ ᒐᕙᒪᑐᖃᒃᑯᓐᓂᑦ.
ᐅᖃᐅᓯᖃᓚᐅᖅᐳᑦ ᐅᖃᐅᓯᕆᔭᐅᓚᐅᖅᑐᓂᒃ ᓄᓇᓕᖕᓂᒥᐅᓄᑦ – ᓇᑭᖔᕐᓂᖏᑦ ᐅᖃᐅᓯᕆᖏᒃᑲᓗᐊᖅᖢᓂᒋᑦ – ᐃᓚᐅᑎᑦᓱᓂᐅᒃ ᐃᖅᑲᓇᐃᔭᖅᑎᒥᖕᓂᒃ ᓄᖅᑲᖅᑎᑦᓯᓯᒪᓕᖅᑐᓂᒃ.
ᑮᓇᐅᔭᒃᓴᐅᑎᖏᓐᓄᑦ ᐃᑲᔪᕈᑎᒃᓴᐃᑦ ᐃᑲᔪᕈᓐᓇᕐᓂᐊᖅᐳᑦ ᐃᖅᑲᓇᐃᔭᖅᑎᒋᔭᐅᓕᖅᑐᑐᐊᑦ ᐃᖅᑲᓇᐃᔭᐃᓐᓇᖁᓪᓗᒋᑦ ᐊᐅᓚᑦᓯᓗᑎᒃ ᐱᓕᕆᐊᒥᖕᓂᒃ ᑭᓯᐊᓂ ᐊᓯᖏᓐᓂᒃ ᐅᖃᐅᓯᖃᓚᐅᖏᑦᖢᓂ ᐊᑲᐅᖏᓕᐅᕈᑕᐅᔪᓂᒃ.
"ᐊᑭᖃᕐᒪᑕ ᑕᒪᒃᑯᐊ ᐃᒡᓗᕐᔪᐊᖅ ᓴᓇᔭᐅᓪᓗᑎᒃ ᐋᖅᑭᐅᒪᑎᑕᐅᓪᓗᑎᒡᓗ ᓄᓇᕗᒥ, ᐱᓗᐊᖅᑐᒥᒃ ᑮᓇᐅᔭᓕᐅᕈᑎᖃᕈᓐᓃᖅᐸᑕ," ᐱᔅᓂᔅᓂᒃ ᓇᖕᒥᓂᖃᖅᑐᖅ ᐅᖃᓚᐅᖅᐳᖅ, ᐅᖃᐅᓯᖃᖅᖢᓂᓗ ᐊᑭᓕᖅᑐᖅᑕᐅᖏᓐᓇᕆᐊᖃᕐᒪᑕ ᐅᖅᓱᐊᓗᐃᓗᑦ ᐊᓯᖏᓪᓗ, ᓇᓪᓕᐅᒃᑯᒫᑦ ᐊᑭᓕᐅᑕᐅᒋᐊᖃᖅᖢᑎᒃ ᐊᒻᒪ ᐊᑐᖅᑐᐊᖅᑕᐅᔪᑦ ᐊᑭᓕᖅᑕᐅᒋᐊᖃᖅᖢᑎᒃ ᑕᖅᑭᑕᒫᑦ ᑕᐃᒪᓐᓇ ᑮᓇᐅᔭᓕᐅᕈᓐᓃᖅᑐᖃᕋᓗᐊᖅᑎᓪᓗᒍ.
ᐃᖅᑲᓇᐃᔭᕐᕕᖃᖃᑕᐅᔪᖅ ᐅᖃᓚᐅᕆᓪᓗᓂ ᐊᑭᓕᖅᑕᐅᖏᓐᓇᐅᔭᕆᐊᖃᕆᓪᓗᑎᒃ ᐃᖅᑲᓇᐃᔭᕐᓗᓂ ᐅᓗᕆᐊᓇᖅᑐᒦᑦᑕᐃᓕᓂᕐᒧᑦ ᓇᓪᓕᐅᒃᑯᒫᓕᕆᓂᕐᒧᓪᓗ ᑎᒥᐅᔪᑦ ᐊᑭᓕᖅᑐᖅᑕᐅᖏᓐᓇᕆᐊᖃᕆᓪᓗᓂᓗ
ᒥᒃᖠᒋᐊᖅᑕᐅᒋᐊᖃᕋᓗᐊᖅᖢᑎᒃ, ᐃᒻᒪᖄ 50-ᐳᓴᓐ ᓄᕙᒡᔪᐊᕐᓇᐅᑎᓪᓗᒍ ᐊᑭᑭᒡᓕᒋᐊᖅᑕᐅᒋᐊᖃᖅᖢᑎᒃ ᐊᑭᓕᖅᑐᖅᑕᐅᒋᐊᖃᖅᐸᒃᑐᑦ.
ᕿᑎᕐᒥᐅᓂ ᐱᔅᓂᔅᖃᖅᑐᑦ, ᑮᓇᐅᔭᓂᒃ ᑐᒃᓯᕋᐅᑎᖃᕐᓂᖅ ᐃᑲᔫᓯᐊᖅᑖᕐᓂᕐᓗ ᐃᓛᓐᓂᒃᑯᑦ "ᐊᒃᓱᕈᕐᓇᐅᖃᑦᑕᕐᒪᑕ, ᓄᔮᖅᑐᕈᒪᓐᓇᑐᐃᓐᓇᓕᖅᐸᒃᖢᑎᒡᓗ."
"ᒫᓐᓇ ᐋᓐᓂᐊᕐᓇᐅᑎᓪᓗᒍ ᑮᓇᐅᔭᓂᒃ ᐊᒃᓱᕈᕈᑎᖃᕐᓇᓕᖅᐳᖅ, ᐃᓱᒫᓗᖕᓇᖅᖢᓂᓗ ᐃᓚᖏᓪᓗ ᖃᐅᔨᒪᖏᑐᐃᓐᓇᕆᐊᖃᖅᖢᑎᒃ ᑐᒃᓯᕋᐅᑎᖃᕐᓂᕐᒧᑦ ᑮᓇᐅᔭᓂᒃ ᒐᕙᒪᑐᖃᒃᑯᓐᓂᑦ, ᐱᓗᐊᖅᑐᒥᒃ ᐅᖄᓚᐅᑎᑦ ᐊᑐᖅᑕᐅᖏᓐᓇᖅᑎᓪᓗᒋᑦ ᐅᖃᓪᓚᒍᓐᓇᖏᓪᓗᑎᒡᓗ ᐃᓄᐃᑦ ᐅᖄᓚᐅᑎᑦ ᐊᑐᖅᑕᐅᓗᐊᕐᓂᖏᓐᓄᑦ. "ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᑦ, ᐊᖏᕐᕋᒥᖕᓂ ᑭᒃᑯᑐᐃᓐᓇᐃᑦ ᐃᖅᑲᓇᐃᔭᖅᑎᑕᐅᓕᖅᑎᓪᓗᒋᑦ. ᖃᖓ ᑕᒪᒃᑯᐊ ᑕᑕᑎᕈᑎᑦ ᕿᒥᕐᕈᔭᐅᓂᐊᖅᐸᑦ? ᖃᖓᓗ ᑮᓇᐅᔭᓄᑦ ᐃᑲᔪᖅᑕᐅᓂᐊᖅᐱᑕ? ᐅᖃᓪᓚᖃᑎᖃᕈᓐᓇᖅᐱᑕᓗ ᑭᒃᑯᓐᓂᒃ?"