Skip to content

ᐃᔅᓴᒃᑎᑦᑎᓂᖅ ᑳᐱᒥᑦ ᕿᑎᕐᒥᐅᓄᑦ

ᓇᖕᒥᓂᕆᔭᐅᔪᒥ ᐱᒋᐊᕐᓂᐅᔪᒥ ᐱᓕᕆᐊᕆᔭᐅᓇᓱᐊᖅᓯᒪᔪᒥ ᐊᕐᕌᒎᑉ ᐅᖓᑖᓄᑦ ᑎᑭᐅᑎᔪᓐᓇᕐᓂᐊᖅᐳᖅ ᓄᓇᕗᒻᒥᐅᓄᑦ ᒪᒪᑕᒍᑎᖏᓐᓄᑦ ᕕᕈᐊᕆᒥ ᒫᔾᔨᒥᓪᓘᓐᓃᑦ.

ᐆᓯ ᕚᔅᑯᐃᔅ-ᒥᐊᕆᑦ Cafe Vasquez−ᒥ, ᐱᕉᕕᐊᒥ ᑲᒻᐸᓂᐅᔪᖅ ᑐᓂᓯᖃᑦᑕᕐᓂᐊᖅᑐᒥ ᑳᐱᒃᓴᓂᒃ ᐃᓗᐃᑦᑐᓂᒃ ᑳᐱᑦᑎᐊᕐᒧᑦ, ᐊᒻᒪ ᐹᒥᓚ ᒍᕉᔅ, ᓇᖕᒥᓂᖃᕐᓂᕐᒧᑦ ᐊᐅᓚᑦᑎᔨᐅᔪᖅ ᐃᓄᖕᓄ−ᓇᖕᒥᓂᕆᔭᐅᔪᒧᑦ, ᐃᖃᓗᒃᑑᑦᑎᐊᒥ−ᑐᙵᕕᓕᖕᒥ ᑳᐱᑐᕐᕕᒃᓴᒧᑦ, ᑲᑎᖃᑎᒌᒃᐳᑦ ᐱᐊᕆ, ᐋᓐᑎᐊᕆᐅᒥ.

ᑳᐱᑦᑎᐊᖅ ᓯᕗᓪᓕᖅᐸᐅᓪᓗᓂ ᐃᓄᖕᓂ−ᓇᖕᒥᓂᕆᔭᐅᔪᒧᑦ ᑳᐱᒥᒃ ᓂᐅᕕᐊᒃᓴᖃᖅᑎᐅᓂᐊᖅᐳᑦ.

ᐋᔩᖃᑎᒌᒃᐸᓪᓕᐊᕗᑦ ᓂᐅᕕᐊᒃᓴᖃᕐᓂᕐᒧᑦ ᓴᙱᓗᐊᙱᑦᑐᓂᑦ, ᕿᑎᖅᐸᓯᐊᓂ ᐊᒻᒪ ᓴᙱᔪᓂ ᑳᐱᒃᓴᒧᑦ ᐆᑦᑎᔭᐅᓯᒪᔪᓂᒃ ᑯᐊᐸᒃᑯᑎᒍᑦ ᐃᓂᐅᔪᓂ ᑲᓇᑕᓕᒫᒥ, ᐅᖃᐅᓯᐅᓪᓗᓂ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᔨᐅᔪᖅ ᐹᒥᓚ ᒍᕉᔅ. ᓯᕗᓪᓕᖅᐸᐅᔪᖅ ᑎᑭᓴᖅᑕᐅᔪᑦ ᑳᐱᒃᓴᒥᒃ ᐃᓗᐃᑦᑐᓂᒃ, ᐅᓯᑲᑦᑕᖅᑕᐅᓂᐊᖅᑐᓄᑦ ᓴᖅᑭᑦᑎᔨᐅᔪᒥ ᐱᕉᒥ, ᐅᖁᒪᐃᓐᓂᖃᖅᑐᒥ 4,500 ᑭᓕᒍᕌᒻᓂ. Beaver Rock Roastery ᐱᐊᕆ, ᐋᓐᑎᐊᕆᐅᒥ, ᑲᒪᒋᔭᖃᕐᓂᐊᖅᐳᖅ ᐃᒐᐅᑉ ᐃᓗᐊᓄᑦ ᐆᑦᑎᓂᖓᓐᓂ ᐊᒻᒪ ᐴᖅᑲᐃᓂᐅᔪᒥ ᑳᐱᒥᑦ.

"ᑭᒃᑯᓕᒫᑦ ᑳᐱᑐᓲᖑᕗᑦ," ᒍᕉᔅ ᐅᖃᓚᐅᖅᐳᖅ ᐱᓕᕆᐊᖑᓂᐅᔪᒥ, ᑐᓂᓯᓂᐊᖅᑐᒥ ᑮᓇᐅᔭᖃᖅᑎᑕᐅᓂᖓᓂ ᖁᕝᕙᕆᐊᖅᑎᑦᑎᓂᐅᔪᒥ ᑮᓇᐅᔭᓕᐅᕋᓱᐊᙱᑦᑐᒥ ᕿᑎᕐᒥᐅᓂ ᐱᐅᓯᑐᖃᕐᒧᑦ ᑲᑐᔾᔨᖃᑎᒌᖑᔪᓄᑦ, ᐅᕝᕙᓘᓐᓃᑦ ᐱᑦᖁᕼᐃᕐᓂᒃᑯᑦ ᐃᓕᕼᐊᐅᑎᓂᒃ, ᖃᐅᔨᒪᔭᐅᓂᖓᓂ ᐃᓄᐃᓐᓇᖅᑐᓐ.

"ᐅᖃᐅᓯᖃᓚᐅᖅᐳᒍᑦ ᐱᕕᒃᓴᖃᕐᓂᐅᔪᓂ ᐱᓕᕆᔪᓐᓇᖅᑕᑦᑎᓐᓂ ᑲᑐᔾᔨᖃᑎᒌᖑᓪᓗᑕ ᓴᖅᑭᑎᑦᑎᒃᑲᓐᓂᕐᓂᕐᒧᑦ ᑮᓇᐅᔭᓂ ᑎᑭᑉᐸᓪᓕᐊᓂᐅᔪᓄᑦ ᐅᕙᑦᑎᓐᓄᑦ ᐃᓚᒋᐊᖅᓯᓂᐊᖅᑐᒥ ᑕᐃᒃᑯᓄᖓ ᐱᓕᕆᓂᐅᔪᓂ ᖁᔭᒋᔭᐅᕐᔪᐊᖅᑐᓄᑦ ᑮᓇᐅᔭᖃᖅᑎᑕᐅᓂᐅᔪᓂ ᐱᕙᒃᑕᑦᑎᓐᓂ ᑎᑭᓐᓂᐊᕐᓂᖏᓐᓂ," ᒍᕉᔅ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᓄᑐᖃᐃᑦ ᐃᓚᐅᖃᑕᐅᔪᓂ ᐱᖅᑯᓯᑐᖃᖅᑎᒍᑦ ᑲᑐᔾᔨᖃᑎᒌᖑᔪᓂ "ᖁᕕᐊᕐᔪᐊᖅᐳᑦ."

"ᖁᕕᐊᑦᑎᐊᖅᐳᑦ ᐆᒃᑐᐃᓂᕐᒥ ᑳᐱᑦᑎᐊᕐᒥ ᐊᒻᒪ ᐱᖃᕐᓂᖏᓐᓂ ᐊᒻᒪ ᑳᐱᑐᕐᓂᕐᒥ ᖃᐅᑕᒫᒥ," ᐅᖃᓚᐅᖅᐳᖅ ᒍᕉᔅ, ᐃᓱᒻᒥᖅᑐᐃᔨᐅᖕᒥᔪᖅ ᕿᑎᕐᒥᐅᓂ ᐱᑦᖁᕼᐃᕐᓂᒃᑯᑦ ᐃᓕᕼᐊᐅᑎᓂᒃ.

ᐱᑦᖁᕼᐃᕐᓂᒃᑯᑦ ᐃᓕᕼᐊᐅᑎᓂᒃ ᑲᒪᒋᔭᖃᖅᐳᑦ ᒪᐃ ᕼᐅᑲᖓᖅ ᓄᓇᓕᖕᓂ ᐅᖃᓕᒫᒐᖃᕐᕕᖕᒥ ᐊᒻᒪ ᐃᓕᖅᑯᓯᓕᕆᕝᕕᖕᒥ, ᑕᑯᒃᓴᐅᑎᑦᑎᔪᒥ ᑕᑯᓐᓇᒐᖃᕐᕕᖕᒥ ᐊᒻᒪ ᐃᑦᑕᕐᓂᓕᕆᕝᕕᐅᔪᒥᑦ. ᑲᑐᔾᔨᖃᑎᒌᖑᔪᑦ ᐃᓚᐅᖃᑕᐅᒋᕗᑦ ᖃᐅᔨᓴᖅᑕᐅᓂᕐᓄᑦ ᐱᒋᐊᕈᑕᐅᔪᓂ, ᓄᓇᓕᖕᓂ ᐊᒻᒪ ᓄᓇᕐᔪᐊᓕᒫᒥ, ᐊᒻᒪ ᐃᓚᐅᑎᑦᑎᓲᖑᕗᑦ ᐃᑦᑕᕐᓂᓴᓕᕆᓂᕐᒥ ᐊᒻᒪ ᒥᖅᓱᕐᓂᕐᓄᑦ ᐱᓕᕆᐊᒃᓴᐅᔪᓂᑦ.

"ᑕᒪᐃᑎᒍᑦ ᐃᓄᐃᓐᓇᐃᑦ ᐃᓕᖅᑯᓯᖓᓐᓂᐅᕗᖅ," ᐅᖃᓚᐅᖅᐳᖅ ᒍᕉᔅ.

ᐊᑎᖏᑦ ᐱᖓᓲᔪᓂ ᑳᐱᒃᓴᓂᑦ, ᓱᓕ ᓴᖅᑭᑕᐅᓯᒪᙱᓚᖅ ᐆᒥᖓ ᑎᑎᕋᐃᑎᓪᓗᒋᑦ ᑎᑎᕋᖅᑕᐅᓂᐅᔪᒥ, ᓇᓗᓇᐃᒃᑯᑕᖃᕐᓂᐊᖅᐳᖅ ᓇᓗᓇᙱᑦᑎᐊᖅᑐᒥ "ᐃᓄᖕᓄᑦ ᑐᕌᖓᓂᖃᕐᓂᐅᔪᒥ," ᐅᖃᓚᐅᖅᐳᖅ ᒍᕉᔅ. ᑳᐱᑦᑎᐊᖅ ᐃᓄᐃᓐᓇᖅᑑᕗᖅ "good coffee−ᒧᑦ."

ᐊᕋᐱᑲ ᑳᐱᒃᓴᐃᑦ ᐃᓗᐃᑦᑐᑦ ᐱᔭᐅᓂᐊᖅᐳᑦ ᓄᓇᖃᖅᑳᖅᓯᒪᔪᓄᑦ ᐱᕈᖅᑐᕕᓂᓕᐅᓲᓂ ᐱᕈᖅᓴᐃᓲᓂ ᖁᑦᑎᖕᓂᐅᔪᒥ ᓇᑎᕐᓇᒥ ᐅᐊᖕᓇᒥ ᐱᕉᒥ, ᐅᖃᐅᓯᐅᓪᓗᓂ ᑳᐱᑦᑎᐊᖅ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓᓐᓂ.
"
ᐆᔭᐅᔭᑦ ᑳᐱᒃᓴᐃᑦ ᐃᓗᐃᑦᑐᑦ ᐱᕈᖅᓴᔭᐅᓲᖑᕗᑦ ᓄᓇᐃᓐᓇᕐᒥ−ᓇᐹᖅᑐᓕᖕᒥ ᐊᒻᒪ ᑎᖕᒥᐊᓄᑦ−ᑐᙵᓇᖅᑐᓄᑦ ᐊᕙᑎᐅᔪᓄᑦ, ᐊᒻᒪ ᐊᕝᕗᖅᑕᐅᓲᖑᕗᑦ ᐃᓚᒌᖑᔪᓂᑦ ᓄᑕᐅᙱᑦᑐᓂ ᐱᖅᑯᓯᑐᖃᒻᒪᕆᐊᓗᖕᓂᑦ, ᑐᑭᓯᒋᐊᖅᑕᕐᕕᒃ ᐅᖃᖅᓯᒪᕗᖅ.

ᓇᖕᒥᓂᕆᔭᐅᔪᖅ ᐱᕈᖅᐸᓪᓕᐊᑎᓪᓗᒍ, ᐅᖃᓚᐅᖅᐳᖅ ᓂᕆᐅᒋᔭᐅᕗᖅ ᓄᓇᓕᖕᓂ ᐅᓪᓗᓕᒫᒧᑦ ᐃᖅᑲᓇᐃᔮᙳᕐᓂᐊᕐᓂᖓᓂ ᐃᒐᐅᑉ ᐃᓗᐊᓂ ᐆᑦᑎᓂᒃᑯᑦ, ᐴᖅᑲᐃᓂᒃᑯᑦ ᐊᒻᒪ ᐊᓯᖏᓐᓂ ᐱᔭᒃᓴᕆᔭᐅᔪᓄᑦ, ᒍᕉᔅ ᐃᓚᒋᐊᖅᓯᓚᐅᖅᐳᖅ.