Skip to content

ᐃᖃᓗᒃᑑᑦᑎᐊᕐᒥᐅᑕᖅ ᓱᐴᖅᑐᖃᑦᑕᕈᓐᓃᖅᐳᖅ

ᑲᐃᑕᒃ ᐊᓪᓗᒃᐱᒃ ᑕᐃᑲᓃᓯᒪᕗᖅ.

ᓯᒡᒐᓕᐊᓂ ᐃᒃᓯᓐᓇᐃᓚᐅᖅᐳᖅ ᔭᓄᐊᕆ 8–ᒥ. ᖃᔅᓰᖅᓱᒐᓚᒃᖢᓂ ᐱᓇᓱᐊᖅᓯᒪᕙᖓ ᖃᖓᒃᑲᓐᓂᐅᓚᐅᖅᑐᒥ, ᖃᔅᓯᐊᕐᔪᖕᓂ ᐱᓇᓱᐊᕈᓯᑐᐃᓐᓇᓂ ᐊᑯᓂᐅᑎᒋᕙᒃᖢᓂ ᐅᑎᓚᐅᙱᓐᓂᖓᓂ ᐊᐃᑦᑖᖑᔪᒥ ᐅᐃᕆᓯᒪᓂᐅᔪᒥ. ᑭᓯᐊᓂ ᐋᖅᑭᐅᒪᐃᓐᓇᖅᐳᖅ ᐃᒃᐱᒍᓱᖕᓂᖓᓂ ᐅᒃᐱᕈᓱᖕᓂᐅᔪᒥ ᐊᒻᒪ ᐅᖃᖅᐳᖅ ᐃᖃᐃᓕᓴᕐᔪᐊᕐᓂᐊᕈᒪᓂᖓᓂ ᐱᔪᒪᒥᓂᖃᓕᑐᐊᕈᓂ ᐃᓴᖕᓂᕐᒧᑦ ᓯᒡᒐᓕᐊᒥ.

ᑲᐃᑕᒃ ᐊᓪᓗᒃᐱᒃ ᐃᖏᕐᕋᓯᒋᐊᓚᐅᖅᐳᖅ ᓱᐴᖅᑐᕐᓂᕐᒥ ᓄᖅᑲᕐᓂᕐᒧᑦ ᔭᓄᐊᕆ 8–ᒥ. ᑕᐃᔅᓱᒪᓂᒃᑲᓐᓂᖅ ᐱᒋᐊᕋᓱᐊᕐᓂᖓᓂ ᐅᖓᑖᓅᕈᔾᔨᓯᒪᙱᒃᑲᓗᐊᖅᑎᓪᓗᒍ ᖃᔅᓯᐊᕐᔪᖕᓂ ᐱᓇᓱᐊᕈᓯᕐᓂ, ᐅᒃᐱᕈᓱᒃᐳᖅ ᓄᖅᑲᑦᑎᐊᒻᒪᕆᒍᓐᓇᕐᓂᐊᕐᓂᖓᓂ ᒫᓐᓇᐅᔪᒥ.

ᐊᓪᓗᒃᐱᒃ, 22, ᓱᐴᖅᑐᖃᑦᑕᓕᓚᐅᖅᐳᖅ 2015–ᒥ. ᐃᖅᑲᐅᒪᙱᓚᖅ ᖃᖓᓪᓚᕆᐅᓂᖓᓂ ᓯᕗᓪᓕᖅᐹᒥ ᐊᐅᒪᓕᑦᑎᓂᖓᓂ, ᑭᓯᐊᓂ ᓱᐴᖅᑐᖃᑦᑕᓕᓚᐅᖅᐳᖅ ᐴᖑᔪᒥ ᓯᒡᒐᓕᐊᓂ ᓇᑉᐸᓪᓗᐊᖓᓂ ᐅᓪᓗᑕᒫᒥ ᐃᑲᔪᓚᐅᕐᒪᑦ ᖃᓱᒋᐊᖅᑎᑦᑎᓂᕐᒧᑦ ᐊᒃᓱᕉᓴᓕᕌᖓᒥ. ᑭᓯᐊᓂ ᐴᖑᔪᒥ ᓯᒡᒐᓕᐊᓂ ᐃᖃᓗᒃᑑᑦᑎᐊᕐᒥ ᐊᑭᖃᖅᐳᖅ $26–ᒥ, ᐅᖃᓚᐅᖅᐳᖅ, ᑕᐃᒫᒃ ᓄᖅᑲᕐᓂᖓᓂ ᐅᐃᕆᓯᒪᓂᐅᔪᒥ ᐱᑎᑦᑎᓂᖃᕐᓂᐊᖅᐳᖅ ᑮᓇᐅᔭᖃᕐᔪᐊᕐᓂᖓᓂ ᐊᒥᐊᒃᑯᔪᓂ ᐃᒃᐱᐊᕐᔪᖓᓂ.

"ᐊᑭᑐᔪᒻᒪᕆᐊᓘᕗᖅ,"ᐅᖃᓚᐅᖅᐳᖅ. "ᑕᐃᒫᒃ ᑮᓇᐅᔭᓂ ᓄᐊᑦᑎᕙᓪᓕᐊᓂᐊᖅᐳᖓ, ᑕᕝᕚᑭᒥ ᓂᐅᕕᖅᐸᒍᓐᓃᕐᓗᖓ. ᑕᒪᓐᓇ ᐅᕙᓐᓄᑦ ᐱᕐᔪᐊᖑᕗᖅ."

ᐱᒻᒪᕆᐅᓂᖅᓴᒥ, ᓱᐴᖅᑐᕐᓂᕐᒥ ᓄᖅᑲᕐᓂᖅ ᓱᔪᐃᑎᑦᑎᒃᑲᓐᓂᖃᕈᓐᓃᕐᓂᐊᖅᐳᖅ ᐳᕙᖏᓐᓄᑦ. ᓄᕙᖕᒥ ᐅᕆᐊᖃᑦᑕᖅᐳᖅ ᕿᕐᓂᕐᓂᖅᓴᖃᖅᖢᑎᒃ ᐃᓗᐊᓂ, ᐃᓱᒫᓘᑎᒋᓯᒪᓪᓗᓂᐅᒃ ᑕᒪᓐᓇ.

"ᐅᕙᓐᓂ ᖃᓄᐃᙱᑎᑦᑎᒃᑲᓐᓂᕐᓂᐅᕗᖅ," ᐅᖃᓚᐅᖅᐳᖅ ᐊᓪᓗᒃᐱᒃ, ᐊᖓᔪᖅᑳᖏᑦ ᑕᒪᒃᑭᑦ ᓱᐴᖅᑐᓲᖑᕗᑦ ᑕᐃᒫᒃ ᐱᕈᖅᓴᓂᕆᕙᖓ ᓱᐴᖅᑐᕐᓂᐅᔪᒥ. "ᐅᐃᕆᓐᓇᕐᔪᐊᖅᐳᖅ ᑭᓯᐊᓂ ᓇᖁᔭᕐᓇᕆᒐᓚᓕᖅᑕᕋ ᐳᕙᓐᓂ ᕿᕐᓂᖅᓯᑎᑦᑎᕙᓪᓕᐊᓕᕐᒪᑦ."

ᓱᐴᖅᑐᕐᓂᖅ ᐃᓚᒋᔭᖃᖅᐳᖅ ᖁᑦᑎᖕᓂᖅᓴᐅᔪᓂ ᐅᓄᕐᓂᐅᔪᓂ ᐳᕙᖕᒥ ᐊᒻᒪ ᖃᓂᕐᒧᑦ ᑳᓐᓱᓂᑦ, ᓄᕕᖅᑐᖏᑦ ᓄᕙᖕᒥᑦ ᓯᒥᒃᓯᒪᓂᐅᔪᒥ ᐊᒻᒪ ᒪᒥᔪᐃᑦᑐᕐᒥ ᐳᕝᕕᕆᓂᕐᒥ. ᐳᕙᒡᓗᖕᓂᖅ ᐊᒻᒪ ᐳᕙᖕᒥᒍᑦ ᐃᒻᒪᒃᓯᒪᓂᐅᔪᒥ ᐱᐅᙱᒋᐊᓪᓚᒃᑎᑕᐅᔪᓐᓇᖅᐳᖅ ᓯᒡᒐᓕᐊᓂ ᐊᑐᖃᑦᑕᕐᓂᕐᒧᑦ.

ᑕᕝᕚᑭᒥ ᐊᑐᕐᓂᖅ ᐱᒻᒪᕆᐅᓪᓗᓂ ᐊᑲᐅᙱᓕᐅᕈᑕᐅᕗᖅ ᓄᓇᕗᒻᒥ. ᓇᓚᐅᑦᑖᕆᔭᐅᓯᒪᔪᒥ 74 ᐳᓴᓐᑎᒥ ᓄᓇᕗᒻᒥᐅᓂ ᐊᑐᖅᐸᒃᐳᑦ ᖃᓄᐃᑦᑐᑐᐃᓐᓇᒥᒃ ᐅᐃᕆᓐᓇᖅᑐᒥ, ᐅᖃᐅᓯᐅᓪᓗᓂ ᓄᓇᕗᒻᒥ ᒐᕙᒪᒃᑯᓐᓂ. ᖁᑦᑎᖕᓂᖅᓴᒻᒪᕆᐅᕗᖅ ᑲᓇᑕᒥ ᑕᐃᒪᐃᒐᔪᖕᓂᐅᔪᒥ 15.8 ᐳᓴᓐᑎᒥ. ᒪᓕᒃᑐᖅ ᖁᑦᑎᓛᖑᔪᒥ ᐱᔪᓐᓇᕐᓂᖃᕐᕕᐅᔪᖅ ᓄᓇᑦᓯᐊᖑᕗᖅ 34 ᐳᓴᓐᑎᐅᕗᖅ, ᓇᑉᐸᓪᓗᐊᖓᑕ ᒥᑭᓐᓂᖅᓴᐅᔪᒥ ᓄᓇᕘᑉ ᐅᓄᕐᓂᖏᓐᓂ.

ᖃᓂᒋᔭᖓᓂ ᐊᑕᐅᓯᕐᒥ ᑕᓪᓕᒪᓄᑦ ᐃᓅᔪᓐᓃᕐᓂᐅᔪᓂ ᓄᓇᕗᒻᒥ ᐱᔾᔪᑕᐅᔪᓐᓇᖅᐳᑦ ᑕᕝᕚᑭᒥ ᐊᑐᕐᓂᕐᒧᑦ, ᐅᖃᐅᓯᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.

ᐃᓗᐊᖅᓴᐃᔩᑦ, ᓘᒃᑖᑦ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᐅᔪᑦ ᐊᒻᒪ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᐃᔨᐅᔪᑦ ᐅᖃᐅᔾᔨᔪᓐᓇᖅᐳᑦ ᐊᒻᒪ ᐊᔾᔨᒌᙱᑦᑐᓂ ᐃᑲᔪᕈᑎᒃᓴᓂ ᓄᓇᕗᒻᒥᐅᓄᑦ. ᐊᒻᒪᓗᑦᑕᐅᖅ, "ᓄᖅᑲᕐᓂᕐᒧᑦ ᐃᑲᔪᖅᓱᐃᔨᐅᔪᓂ" ᐊᑐᐃᓐᓇᐅᔪᓐᓇᖅᐳᑦ ᖃᖓᑐᐃᓐᓇᑦᑎᐊᖅ ᖃᐅᑕᒫᒥ ᐊᑭᖃᙱᑦᑐᒃᑯᑦ ᐅᖃᓗᒡᕕᒃᓴᒧᑦ: 1-866-368-7848 ᐅᕝᕙᓘᓐᓃᑦ ᖃᕋᓴᐅᔭᑎᒍᑦ ᐅᖃᓪᓚᖃᑎᖃᕐᓂᐅᔪᒥ ᓂᕈᐊᒐᒃᓴᐅᔪᒥ.

ᐊᓪᓗᒃᐱᒃ ᐅᖃᓚᐅᖅᐳᖅ ᐃᓱᒪᒃᓴᖅᓯᐅᕆᓂᐊᖅᐳᖅ ᐅᖃᓗᖕᓂᕐᒧᑦ ᐃᑲᔪᖅᑕᐅᕕᖕᒥ ᐅᖃᓗᒡᕕᒃᓴᐅᔪᒥ ᐱᔭᕆᐊᖃᖅᑑᔮᕈᓂ.

ᐃᓚᖏᑦ ᐃᓄᐃᑦ ᐊᑐᖅᓯᒪᕗᑦ ᓄᖅᑲᖅᓯᒪᐃᓐᓇᕐᓂᐅᔪᒥ ᐊᑐᖅᖢᑎᒃ ᐅᐃᕆᓐᓇᖅᑐᓕᖕᒥ ᐃᓚᖏᖅᓯᓂᐅᔪᒥ ᐃᓅᓕᓴᐅᑎᓂᑦ, ᐱᔭᐅᔪᓐᓇᖅᑐᓂ ᐅᕘᓇ ᓂᐱᑎᒐᕐᓂᑦ, ᑕᒧᐊᔭᒐᕐᓂᑦ, ᓂᐅᕈᑎᓂᑦ, ᖃᓂᕐᒧᑦ ᑎᖕᒥᑳᕆᐊᓕᖕᓂ ᐊᒻᒪ ᐅᖁᒻᒥᐊᒐᕐᓂ. ᐃᓅᓕᓴᐅᑎᑕᖃᕆᕗᖅ ᓘᒃᑖᒥ ᑐᓂᔭᐅᔪᓐᓇᖅᑐᓂ ᐱᐅᓯᒋᐊᖅᑎᑦᑎᓂᕐᒧᑦ ᐱᕕᖃᕈᓐᓇᕐᓂᖓᓂ ᓱᐴᖅᑐᒃᑲᓐᓂᓚᐅᖅᓯᒪᔪᓐᓃᕐᓂᖓᓂ.

ᑲᓇᑕᒥᐅᑕᓂ ᓱᐴᖅᑐᖅᑎᐅᓯᒪᔪᓄᑦ, 63.1 ᐳᓴᓐᑎᒥ ᓄᖅᑲᖅᓯᒪᓕᖅᐳᑦ ᒫᓐᓇ, ᐅᖃᐅᓯᐅᓪᓗᓂ ᓯᓚᑦᑐᖅᓴᕐᕕᒡᔪᐊᕐᒥ ᐅᐊᑐᓘᒥ, ᑭᓯᐊᓂ ᐃᓚᖏᑦ, ᓲᕐᓗ ᐊᓪᓗᒃᐱᒃ, ᐆᒃᑐᕆᐊᖃᖅᓯᒪᕗᑦ ᖃᔅᓰᖅᓱᒐᓚᒃᖢᑎᒃ.