ᐅᓄᕐᓂᖅᓴᐅᔪᓂ 500–ᓂ ᐃᖅᑲᓇᐃᔭᖅᑎᐅᔪᓂ ᐊᒡᓂᑯ ᐄᒍᓪ ᐃᖃᓗᒑᕐᔪᒃ ᒎᓗᒥ ᐅᔭᕋᖕᓂᐊᕐᕕᖓᓂ ᓴᖅᑭᑕᐅᓵᖅᑐᒥ ᓄᕙᒡᔪᐊᕐᓇᖅ–19 ᓱᒃᑲᔪᒥ ᖃᐅᔨᓴᖅᓯᓂᐅᔪᒥ ᐊᒻᒪ ᐊᑕᐅᓯᕐᒥᓪᓘᓐᓃᑦ ᐅᑎᖅᑐᖃᓚᐅᙱᓚᖅ ᐱᖃᕐᓂᖏᓐᓂ, ᑲᒻᐸᓂᐅᔪᖅ ᐅᖃᓚᐅᖅᐳᖅ.
ᐃᖃᓗᒑᕐᔪᖕᒥ ᐅᔭᕋᖕᓂᐊᕐᕕᖓ ᐃᓂᖃᖅᐳᖅ 25 ᑭᓛᒥᑐᒥ ᑲᖏᖅᖠᓂᕐᒥ.
ᓄᕙᒡᔪᐊᕐᓇᖅ–19–ᒥ ᖃᐅᔨᓴᖅᑕᐅᓂᖓᓂ ᖃᓄᐃᓕᖓᓂᐅᔪᒥ ᐱᔭᐅᔪᓐᓇᖅᐳᑦ ᐃᓂᒋᔭᐅᔪᒥ ᐃᑲᕐᕋᓂ 6–ᓂ ᓯᕗᓂᐊᓂᓪᓘᓐᓃᑦ.
ᖃᐅᔨᓴᒃᑲᓐᓂᕐᓂᐅᔪᓂ 350–ᓂ ᓴᓇᔨᐅᔪᑦ ᒥᐊᑐᐹᖕᒃ ᐱᓕᕆᕝᕕᖓᓂ, 110 ᑭᓛᒥᑐᒥ ᖃᒪᓂᑦᑐᐊᕐᒥ, ᐱᓕᕆᐊᖑᕙᓪᓕᐊᕗᑦ. ᐅᑯᐊ ᖃᓄᐃᓕᖓᓂᐅᔪᑦ ᐊᑯᓂᐅᓂᖅᓴᐅᓂᐊᖅᐳᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓯᒪᖕᒪᑕ ᐃᓅᓕᓴᖅᑕᐅᓂᕐᒧᑦ ᖃᐅᔨᓴᕐᕕᖓᓄᑦ ᓴᖅᑭᑎᑕᐅᓯᒪᔪᒥ ᐃᖃᓗᒑᕐᔪᖕᒥ ᖃᐅᔨᓴᖅᑕᐅᓂᕐᒧᑦ.
ᐃᖃᓗᒑᕐᔪᖕᒥ ᖃᐅᔨᓴᕐᕕᖓ ᐱᓯᒪᕗᖅ ᑲᓇᑕᐅᑉ ᐊᕕᒃᑐᖅᓯᒪᓂᐅᔪᒥ ᐸᐃᑉᐹᖃᕐᓂᐅᔪᓂ ᐋᓐᑎᐊᕆᐅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᑯᐸᐃᒃ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᐅᖃᐅᓯᐅᓪᓗᓂ ᐊᒡᓂᑯ ᐄᒍᓪᑯᓐᓂ. ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᖃᐅᔨᓴᖅᑕᐅᓂᖓᓄᑦ ᐱᓕᕆᓂᐅᔪᒥ ᑐᓂᔭᐅᓂᐊᖅᐳᑦ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᕌᒐᒃᓴᖃᖅᑐᒥ ᐱᓂᖏᓐᓂ ᐸᐃᑉᐹᖃᕐᓂᖏᓐᓂ.
ᓄᓇᕗᒻᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᖓ ᒪᐃᑯᓪ ᐹᑐᓴᓐ ᓯᕗᓂᐊᓂ ᐅᖃᓚᐅᖅᐳᖅ ᓱᒃᑲᔪᒥ ᖃᐅᔨᓴᕐᓂᐅᔪᒥ ᐱᓕᕆᔾᔪᓯᖓ ᐊᐱᖅᑯᑕᐅᔪᒥ ᑕᒻᒪᕐᓂᐅᔪᒥ ᑕᒻᒪᖅᓯᒪᓂᖃᓲᖑᔪᒥ 30 ᐳᓴᓐᑎᐸᓗᖕᒥ ᐃᓱᒪᓕᐅᕋᓱᐊᖅᑎᓪᓗᒋᑦ ᐃᓄᖕᒥ ᐋᓐᓂᐊᕈᑕᐅᖃᑦᑕᖅᑐᓄᑦ ᐱᑕᖃᙱᓐᓂᐅᔪᓂ ᐱᕙᓪᓕᐊᑐᐃᓐᓇᕆᐊᖃᕐᓂᖏᓐᓂ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ, ᖃᐅᔨᒪᔭᐅᔪᒥ ᐃᓱᒪᒋᔭᐅᓂᐅᔪᒥ ᖃᐅᔨᓴᖅᑕᐅᓂᖓᓂ. ᐊᐱᖅᓱᓚᐅᖅᐳᖅ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐸᐃᑉᐹᖃᖅᑎᑦᑎᓂᐅᔪᒥ ᑐᓂᔭᐅᓇᔭᕐᒪᖔᑦ ᑕᐃᔅᓱᒧᖓ ᑭᒡᓕᖃᖅᑎᑕᐅᓂᐅᔪᒥ, ᑭᓯᐊᓂ ᐅᐱᒍᓱᓚᐅᖅᐳᖅ ᐱᔪᓐᓇᕐᓂᕆᔭᐅᔪᓄᑦ ᐃᓅᓕᓴᖅᑕᐅᓂᕐᒧᑦ ᑲᑎᙵᓂᐅᔪᓄᑦ ᐊᒡᓂᑯ ᐄᒍᓪ ᐋᖅᑭᒃᓱᖅᓯᒪᔭᖓᓐᓂ. ᑲᑎᙵᓂᐅᔪᑦ ᐊᐅᓚᑕᐅᕗᑦ ᓘᒃᑖᖅ ᒋᐊᕆ ᑯᐱᖑᕐᒧᑦ, ᐱᕙᓪᓕᐊᑎᑦᑎᔨᐅᖃᑕᐅᔪᒥ ᐋᓐᓂᐊᓕᕇᒃᑯᑎᒥᒃ ᐱᑎᑦᑎᑦᑕᐃᓕᒪᓂᐅᔪᒧᑦ ᐃᐴᓚ ᖁᐱᕐᕈᐃᑦ ᐊᐃᑦᑐᕐᓇᖅᑐᓂ ᐊᒻᒪ ᑐᑭᒧᐊᒃᑎᑦᑎᔨᐅᔪᖅ ᖃᐅᔨᓴᕐᕕᖕᒥ ᐊᐃᑦᑐᐃᓐᓇᖅᑐᓄᑦ ᐋᓐᓂᐊᕐᓇᕐᓂ ᓚᕚᓪ ᓯᓚᑦᑐᖅᓴᕐᕕᒡᔪᐊᖓᓂ ᑯᐸᐃᒃ ᓯᑎᒥ.
ᖄᒃᑲᓐᓂᐊᒍᑦ ᓱᒃᑲᔪᒥ ᖃᐅᔨᓴᖅᓯᓂᐅᔪᒥ, ᐊᒡᓂᑯ ᐄᒍᓪ ᐊᑐᓕᖅᑎᑦᑎᓯᒪᕗᑦ ᖃᔅᓯᒐᓚᖕᓂ ᐅᔾᔨᕈᓱᒋᐊᖃᕐᓂᐅᔪᓂ ᐱᑎᑦᑎᑦᑕᐃᓕᒪᓂᕐᒧᑦ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓄᑦ ᑎᑭᐅᑎᓂᖓᓄᑦ ᐅᔭᕋᖕᓂᐊᕐᕕᓄᑦ ᐃᓂᐅᔪᓄᑦ ᐅᕝᕙᓘᓐᓃᑦ ᖃᓂᒋᔭᖓᓂ ᓄᓇᓕᐅᔪᓄᑦ. ᐅᑯᐊ ᐱᓕᕆᐊᖑᓂᐅᔪᑦ ᐃᓚᖃᖅᐳᑦ ᐲᖅᓯᓂᐅᔪᒥ ᐱᓪᓚᕆᐅᙱᑦᑐᒧᑦ ᐊᐅᓪᓛᕐᓂᐅᔪᓂ ᓄᓇᓕᖕᓄᑦ, ᐊᖏᒡᓕᒋᐊᖅᑐᒥ ᓴᓗᒻᒪᖅᓴᐃᒃᑲᓐᓂᕐᓂᐅᔪᒥ ᐅᔭᕋᖕᓂᐊᕐᕕᓂ ᐊᒻᒪ ᖃᖓᑕᓲᓂᑦ, ᐊᒻᒪᓗ ᐅᖓᕙᕆᐊᖃᖅᑕᐅᓂᖓᓂ ᐃᖅᑲᓇᐃᔭᕐᓂᐅᔪᓄᑦ ᐅᓪᓗᓄᑦ 28–ᓄᑦ ᒥᒃᖠᒋᐊᖅᑎᑦᑎᓂᕐᒧᑦ ᐱᓕᕆᔨᐅᔪᓄᑦ ᐊᓯᔾᔨᕆᐊᖃᕐᓂᐅᔪᓄᑦ.
ᓄᓇᕗᑦ ᓱᓕ ᓇᓗᓇᐃᖅᓯᓯᒪᙱᓚᑦ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓄᑦ ᒫᓐᓇᒧᑦ ᑎᑭᖦᖢᒍ.