ᐅᐃᓂᐹᒃᒧᙵᐅᓕᒑᔪᑦ
ᑭᕙᓪᓕᕐᒥᑦ
ᐅᑯᐊ ᓂᕈᐊᖅᑕᐅᓯᒪᔪᑦ ᑭᕙᓪᓕᕐᒥ ᑲᓇᒃᔅ ᓄᑲᖅᖡᑦ ᕼᐋᑭᖅᑎᖏᑦ ᓄᓇᖃᖅᑳᖅᓯᒪᔪᑦ ᓄᑲᖅᖡᑦ ᕼᐋᑭᖅᑎᑕᐅᓂᐊᖅᑎᓪᓗᒋᑦ ᑕᖅᑭᐅᓂᐊᖅᑐᒥ ᐅᐃᓂᐹᒃ, ᒫᓂᑕᐅᐸᒥ.
ᐃᓯᖅᑎᑦᑎᑦᑕᐃᓕᒪᔨ:
ᓯᐅᓪᓗᒃ ᒪᓚ
ᐅᖃᐅᓯᐅᓛᖅᑐᖅ
ᕼᐋᑭᖅᑏᑦ:
ᕋᐃᓕ ᑯᒪᒡᔪᐊᖅ
ᑳᒻ ᖃᓗᔾᔭᖅ
ᑕᐃᕕ ᐅᑯᑕᖅ
ᐲᑕ ᓈᓇᐅᖅ
ᓅᓚᓐ ᓇᑯᓛᖅ
ᐳᕋᔅᑕᓐ ᒪᑲᔭᖅ
ᓕᐊᒻ ᑕᑦᑐᐃᓂ
ᐱᓚᐃᒃ ᑯᓱᒐᖅ
ᑲᐃᓚᓐ ᓴᕕᐊᕐᔪᒃ
ᑎᐅᕋᓐ ᐃᑲᒃᕼᐃᒃ ᓄᑲᖅᖠᖅ
ᕆᑦᓱᑦ ᐸᒥᐅᓕᒃ
ᐋᔅᑕᓐ ᑲᓪᓚᒃ
ᑎᐅᕆᒃ ᓵᓐᑎ
ᐊᐃᓴᐃᔭ ᕼᐃᐅᕆᓐ
ᑲᒪᔨᖏᑦ:
ᑕᐃᕕᑎ ᑲᓛᒃ
ᑲᐃᔪ ᑕᑦᑐᐃᓂ
ᓯᑦᓂ ᓂᑰᓪ
ᐊᐅᓚᑦᑎᔨ:
ᒋᓖᓴᓐ ᐅᑉᐸᕼᐅᐋᒃ
ᐃᓕᓐᓂᐊᕐᓂᒃᑯᑦ ᐊᑭᓕᖅᑕᐅᓂᖅ
ᑭᕙᓪᓕᕐᒥᑦ
ᐃᖅᑲᐃᓯᔭᐅᕗᑦ ᑭᕙᓪᓕᕐᒥᑦ ᐃᓕᓐᓂᐊᖅᑏᑦ ᒫᔾᔨ 31-ᖑᕋᓱᐊᕐᓂᖓᓂ 40-ᖑᔪᓂᒃ ᒪᒃᑯᒃᑐᓂ ᐅᑭᐅᖅᑕᖅᑐᒥᐅᑕᓂᒃ ᐃᓕᓐᓂᐊᖅᑏᑦ ᓯᑯᒦᓐᓂᕋᖅᑕᐅᔪ (SOI) 2018-ᒥ ᐅᑭᐅᖅᑕᖅᑐᒥ ᓇᒧᙵᐅᕈᓘᔭᖅᑐᓃᖃᑕᐅᓇᓱᒍᓐᓇᕐᓂᖏᓐᓂᒃ ᔪᓚᐃ 21-ᒥ ᐋᒡᒌᓯ 7-ᖑᕋᓱᐊᕐᓂᖓᓄᑦ.
ᑖᓐᓇ ᐊᐅᓚᑕᐅᒃᑲᐅᓛᖑᖃᑕᐅᔪᖅ ᖁᑦᑎᖕᓂᖅᐹᒥ ᐃᓕᓐᓂᐊᖅᑎᓄᑦ ᓯᓚᑦᑐᖅᓴᕐᕕᒡᔪᐊᓄᓪᓗ ᐃᓕᓐᓂᐊᖅᑐᓄᑦ ᓄᓇᕐᔪᐊᓕᒫᒥ ᐃᓕᓐᓂᐊᕈᑕᐅᓲᖅ ᐅᒥᐊᕐᔪᐊᒃᑯᑦ ᐅᑭᐊᖅᑕᖅᑐᒥ ᑲᓛᖦᖠᑦ ᓄᓈᓐᓄᓪᓗ.
ᐅᒥᐊᕐᔪᐊᒃᑯᑦ ᐃᓕᓐᓂᐊᕐᓂᐅᕙᒃᑐᑦ ᐃᑲᔪᖅᑎᖏᓐᓂᒡᓗ, ᐱᖃᑕᐅᑎᑕᐅᕙᒃᑐᑦ ᐊᑭᓕᖅᑕᐅᕙᒃᐳᑦ ᐅᑭᐅᖅᑕᖅᑐᒥ ᓇᒧᙵᕈᓘᔭᖅᑎᑕᐅᑎᓪᓗᒋᑦ.
40 ᐳᓴᓐᑎᖏᓐᓃᓗᐊᖅᑐᖅ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑏᓪᓗ ᖁᑦᑎᒃᑐᒥᙶᓲᖑᕗᑦ ᑲᓇᑕᐅᓪᓗ ᐅᑭᐅᖅᑕᖅᑐᖏᓐᓂ.
ᑕᐃᒪᙵᑦ ᐱᒋᐊᖅᑎᑕᐅᓚᐅᕐᓂᖓᓂᒃ ᐊᕐᕌᒍᑦ 18-ᖑᓕᖅᑐᓂᒃ, 2,700-ᖑᕗᑦ ᐃᓕᓐᓂᐊᖅᑎᑕᐅᓯᒪᔪᑦ 52-ᓗ ᐃᓕᓐᓂᐊᖅᑎᑦᑎᔩᑦ 52-ᓂ ᓄᓇᓕᖕᓂᙶᖅᑐᓂ ᓄᓇᕐᔪᐊᒥ.
ᐃᓕᓐᓂᐊᖅᓯᒪᔪᑦ ᑐᓴᐅᒪᖃᑦᑕᐅᑎᔪᓐᓇᖅᑐᑦ ᐊᑐᖅᓯᒪᔭᖏᑦ ᐱᔾᔪᑎᒋᓪᓗᒍ, ᐃᑲᔪᖅᑎᒌᒍᓐᓇᕈᑎᒋᓪᓗᓂᐅᒃ ᑕᐃᒪᙵᓕᒫᖅ ᐃᓕᑉᐸᓪᓕᐊᖃᑎᒌᒍᓐᓇᖅᖢᑎᒃ ᐱᖃᓐᓇᕇᖏᓐᓇᕈᓐᓇᖅᖢᑎᒡᓗ ᐃᓅᓯᓕᒫᖏᓐᓂ.
ᐃᓕᓐᓂᐊᖅᑏᑦ ᑭᕙᓪᓕᕐᒥᐅᑕᑦ ᑕᑕᑎᕆᔪᓐᓇᖅᐳᑦ ᐃᑭᐊᖅᖠᐅᑎᒃᑯᑦ studentsonice.com-ᒥ.
ᑭᕕᐅᖅ ᐅᑎᖅᐳᖅ
ᐊᕐᕕᐊᓂᑦ ᑲᖏᖅᖠᓂᕐᒥᓪᓗ
ᖃᒡᒋᐊᕗᑦ ᐊᕐᕕᐊᓅᕆᐊᖃᖅᓯᒪᕗᑦ ᑲᖏᖅᖠᓂᕐᒧᓪᓗ ᑭᕙᓪᓕᕐᒧᐊᕐᓂᐊᕐᕕᒃᓴᖓᓂ ᕿᑎᕐᒥᐅᓂᓪᓗ ᒪᒃᑯᒃᑐᓂ ᐃᓕᓐᓂᐊᖅᑎᑦᑎᓂᐊᖅᑎᓪᓗᒋᑦ ᖁᙱᐊᖅᑕᐅᓂᐊᖅᑐᓪᓗ ᐅᓂᒃᑳᖅᑐᐊᒥ, ᑭᕕᐅᖅ ᐅᑎᕐᓂᕋᖅᑕᐅᔪᒥ, ᐃᙱᖃᑦᑕᖅᖢᑎᒃ, ᐅᓂᒃᑳᖅᑐᐊᖅᑎᓪᓗᒋᑦ, ᐊᓐᓄᕌᕆᔭᐅᕙᒃᑐᑦ ᖃᕋᓴᐅᔭᒃᑯᓪᓗ ᐋᖅᑭᒃᓱᖅᑕᐅᓂᖏᓐᓂᒃ.
ᖁᙱᐊᖅᑕᐅᓲᑦ ᐊᕐᕕᐊᓃᓐᓂᐊᓚᐅᖅᐳᑦ ᕖᕗᐊᕆ 8-ᒥ 10-ᒧ, ᑲᖏᖅᖠᓂᕐᒥᓪᓗ ᒫᔾᔨ 1-ᒥ.
ᖁᕐᓗᖅᑐᕐᒨᕐᕕᒃᓴᖃᕆᓪᓗᑎᒃ, ᐃᖃᓗᑦᑑᑦᑎᐊᕐᒧᑦ ᑰᒑᕐᔪᖕᒧᓪᓗ.
ᑭᕕᐅᖅ ᐅᑎᕐᓂᖓ ᐅᓂᒃᑳᖅᑐᐊᕐᒥᖔᖅᐳᖅ ᑎᑎᕋᖅᑕᐅᓯᒪᓪᓗᓂᓗ ᒥᐊᕆᐊᒻ ᐊᒡᓘᒃᑲᕐᒧᑦ, ᓲᓴᓐ ᐊᕕᙵᕐᒧᑦ, ᖃᐅᓐᓇᖅ ᒥᑭᒐᕐᒧᑦ, ᒪᑎᓚᐃ ᐃᕙᓗᒧᓪᓗ. ᐃᓐᓇᕆᔭᐅᔪᑦ ᑖᒃᑯᐊ ᐃᓄᓕᕆᒐᔪᒃᑐᑦ ᖁᙱᐊᖅᑕᐅᑎᓪᓗᒋᑦ.
ᑖᒃᑯᐊ ᓄᓇᕗᒻᒥᐅᑕᑦ ᖁᙱᐊᖅᑕᐅᓲᑦ ᑕᓪᓕᒪᓄᑦ ᓄᓇᓕᖕᓅᓛᖅᑐᑦ ᐱᓇᓱᐊᕈᓯᓂᒃ ᑎᓴᒪᓂᒃ ᒪᒃᑯᒃᑐᓂᒃ ᐱᓕᒻᒪᒃᓴᖅᑎᑦᑎᓇᓱᒡᓗᑎᒃ ᖁᙱᐊᖅᑕᐅᓗᑎᒡᓗ ᑭᕕᐅᖅ ᐅᑎᕐᓂᖓᓄᑦ.
ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔮᖑᔪᑦ
ᐊᕐᕕᐊᓂ
ᐃᓕᓐᓂᐊᖅᑏᑦ ᓇᐅᔮᓂ ᐊᕐᕕᐊᓂᓪᓗ ᐃᓕᓐᓂᐊᖃᑕᐅᕗᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᐃᖅᑲᓇᐃᔮᖑᔪᓂᑦ 20-ᖑᓪᓗᑎᒃ ᓄᓇᓕᖕᓂᒃ 6-ᓂᙶᖅᑐᓂᒃ ᐃᖃᓗᖕᓂ ᑕᒫᓂ ᐱᓇᓱᐊᕈᓯᕐᒥ, ᕖᕗᐊᕆ 12-ᒥ 16-ᒧ.
ᐃᓕᓐᓂᐊᕐᕕᐅᕙᒃᑐᖅ ᓄᓇᕗᑦ ᓯᓚᑦᑐᖅᓴᕐᕕᖓᓂ ᓄᓇᓕᐸᐅᔭᒦᑦᑐᖅ ᑐᑦᑕᕐᕕᐅᓲᒥᑦ, ᐅᐸᑲᑦᑕᖅᑕᐅᓪᓗᓂ ᕿᑭᖅᑕᓂ ᐋᓐᓂᐊᕕᐋᓗᒃ ᓯᓚᑦᑐᖅᓴᕐᕕᐅᓪᓗ ᐱᓕᒻᒪᒃᓴᕐᕕᖓᓂ ᐃᓕᓐᓂᐊᕐᕕᕈᓯᖏᓐᓂᒡᓗ,
ᐃᓕᓐᓂᐊᖅᑎᑕᐅᑎᓪᓗᒋᑦ, ᐅᖃᐅᓯᐅᓂᐊᖅᐳᑦ ᐋᓐᓂᐊᕐᓇᖏᑦᑐᓕᕆᔪᓂᒃ ᐃᖅᑲᓇᐃᔮᕆᔭᐅᕙᒃᑐᓂᒃ ᐱᓇᓱᒍᓐᓇᖅᑕᖏᓐᓂ.
ᐱᓕᒻᒪᒃᓴᖅᑎᑕᐅᓂᐊᕆᓪᓗᑎᒃ ᐋᓐᓂᐊᕕᖕᒥᑦ ᐊᑐᖅᑕᐅᓲᓂᒃ ᓲᕐᓗ ᕿᑯᖅᓯᓂᕐᒥᒃ ᒥᖅᓱᖅᑕᐅᓂᕐᒥᒃ, ᐊᓯᖏᓐᓂᒡᓗ.
ᑖᓐᓇ ᐃᖅᑲᓇᐃᔮᒃᓴᓂᒃ ᐋᓐᓂᐊᖃᕐᓇᖏᑦᑐᓕᕆᔪᓂᒃ ᓄᓇᕗᒻᒥᐅᓅᖓᓪᓗᓂ ᐊᔾᔨᒋᓪᓗᓂᐅᒃ ᒪᒃᑯᒃᑐᓄᑦ ᐃᓕᓐᓂᐊᕈᑕᐅᓲᕐᒥ ᐋᓐᑎᐅᕆᔭᐅᒥ ᐃᓅᓕᓴᐃᓂᐅᔪᓂ..