ᐱᙳᐊᕐᕕᑦ ᐃᓗᓕᖃᐅᖅᐳᖅ ᑲᒫᓗᓂᑦ, ᐊᓕᖅᓯᓂᑦ, ᐳᐊᓗᓂᑦ, ᖁᖓᓯᕈᕐᓂ, ᓇᓴᕐᓂᑦ
ᐃᓕᓐᓂᐊᕐᕕᐊᕈᓰᑦ ᑕᑖᖅᐳᑦ ᐴᖅᑲᖅᓯᒪᔪᓂ ᖁᕕᐊᓲᓯᐊᒃᓴᓂ.
ᖁᖓᔮᖅᑐᓂ ᐃᓕᓐᓂᐊᖅᑎᓂᑦ ᑎᒍᒥᐊᖅᑐᑦ ᑎᑎᖅᑲᐅᓯᐊᕕᖕᓂ ᑕᑖᖅᑐᓂ ᐃᓕᓐᓂᐊᕐᕕᖕᒧᑦ ᓱᓇᒃᑯᑖᒃᓴᓂ.
ᐅᑯᐊ ᐃᓚᖏᑦ ᒫᓐᓇᓕᓴᐅᔪᒥ ᑕᑯᒃᓴᐅᓂᐅᔪᓂ ᐊᔾᔨᒌᙱᑦᑐᓂ ᓄᓇᕗᒻᒥ ᓄᓇᓕᐅᔪᓂ ᖁᔭᓐᓇᒦᒃ ᐊᒥᓱᒻᒪᕆᐊᓗᖕᓂ ᑐᓐᓂᖅᑯᓯᐊᖑᔪᓂ ᖃᓪᓗᓈᑦ ᓄᓇᖏᓐᓂ ᑲᓇᑕᒥ ᓇᒃᓯᐅᔾᔨᕗᑦ ᐃᑲᔪᕈᑎᒃᓴᓂ ᐅᕘᓇ ᑲᑎᙵᓂᐅᔪᒥ ᖃᐃᔨᒪᔭᐅᔪᓂ ᐅᐊᖕᓇᒥ ᑲᓇᑕᒥ ᐱᓕᕆᐊᒃᓴᕋᓛᓂᑦ.
"ᑕᐅᑐᒃᑕᑐᐊᖃᑲᐃᓐᓇᓲᖑᕗᒍᑦ ᐊᒃᓱᕈᕐᓂᑦᑎᓐᓂ ᐃᑲᔪᕐᓂᕐᒧᑦ ᐅᑭᐅᖅᑕᖅᑐᒥ ᐃᓕᓐᓂᐊᕐᕕᓄᑦ, ᐊᔪᖅᓴᖅᑐᓄᑦ ᓂᕿᑖᕐᕕᖕᓄᑦ, ᖃᔪᖅᑐᕐᕕᖕᓂ, ᐃᓄᑐᖃᕐᓄᑦ ᑲᑎᙵᓂᐅᔪᓂ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᒋᐊᕈᑕᐅᔪᓄᑦ ᐊᒻᒪ ᐊᓯᖏᓐᓄᑦ ᐳᐃᒍᖅᑕᐅᔮᖅᑐᓄᑦ, ᑮᓇᐅᔭᖃᖅᑎᑕᐅᙱᑦᑐᓄᑦ ᐅᕝᕙᓘᓐᓃᑦ ᑮᓇᐅᔭᖃᖅᑎᑕᐅᙱᓗᐊᕐᓂᐅᔪᓄᑦ," ᐅᖃᓚᐅᖅᐳᖅ ᓯᓐᑎ ᑎᓕᓐ, ᐃᓱᒪᑐᓂᐅᔪᒥ ᑲᑐᔾᔨᖃᑎᒌᖑᔪᓄᑦ, ᐋᖅᑭᒃᑕᐅᓚᐅᖅᑐᒥ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᑎᓴᒪᓄᑦ.
ᑕᐃᒪᙵᓂ, ᐅᐊᖕᓇᒥ ᑲᓇᑕᒥ ᐱᓕᕆᐊᒃᓴᕋᓛᑦ ᓇᒃᓯᐅᔾᔨᓯᒪᕗᑦ ᖁᕕᐊᓲᓯᐊᒃᓴᓂ ᐊᑐᓂ ᓄᓇᓕᐅᔪᓄᑦ ᓄᓇᕗᒻᒥ, ᐃᓚᖏᑦ ᖃᔅᓰᖅᓱᖅᑕᐅᒐᓚᒃᖢᑎᒃ. ᑕᐃᒪᙵᓂ ᑲᑐᔾᔨᖃᑎᒌᖑᔪᑦ ᐱᒋᐊᕐᓂᖓᓂ, 17,542–ᖑᔪᓂ ᖁᕕᐊᓱᒡᕕᖕᒥ ᖁᕕᐊᓲᓯᐊᒃᓴᓂ ᐊᐅᓪᓚᖅᑎᑕᐅᓯᒪᕗᑦ ᐅᑭᐅᖅᑕᖅᑐᒥ ᐃᓕᓐᓂᐊᖅᑎᓄᑦ, 1,352–ᓂ ᓂᕿᓂᑦ ᐴᖅᑲᖅᓯᒪᔪᓂ ᐊᐅᓪᓚᖅᑎᑕᐅᓯᒪᕗᑦ ᐃᓄᑐᖃᕐᓄᑦ ᐊᒻᒪᓗ ᑮᓇᐅᔭᓂ ᐱᕈᖅᓴᐃᓯᒪᓪᓗᑎᒃ ᑎᑭᐅᑎᓯᒪᔪᒧᑦ ᐅᓄᕐᓂᖅᓴᐅᔪᒥ $68,000–ᓂ, ᐅᖃᐅᓯᐅᓪᓗᓂ ᑎᓕᓐᒧᑦ, ᓄᓇᖃᖅᑐᒥ ᑳᒻᓘᑉᔅ, ᐳᕆᑎᔅ ᑲᓚᒻᐱᐊᒥ.
ᑕᒪᓐᓇ ᑕᒪᒃᑭᐅᒪᔪᒥ ᑎᑎᕋᖅᓯᒪᓂᐅᙱᓚᖅ ᑲᑐᔾᔨᖃᑎᒌᖑᔪᑦ ᐱᓕᕆᓯᒪᔭᖏᓐᓂ, ᐆᒃᑑᑎᑐᐃᓐᓇᖅ.
ᐅᐊᖕᓇᒥ ᑲᓇᑕᒥ ᐱᓕᕆᐊᒃᓴᕋᓛᑦ ᐱᒋᐊᓚᐅᖅᐳᑦ ᓇᒃᓯᐅᔾᔨᓪᓗᑎᒃ ᐃᑲᔪᖅᓱᐃᓂᕐᒥ ᐅᕘᓇ 'ᐃᔨᕋᖅᑐᖅᑕᐅᔪᒥ ᓵᓐᑕᒥ' ᐱᓕᕆᐊᕆᔭᐅᓂᐅᔪᒥ.
"ᑐᕌᖓᓇᓱᐊᓚᐅᖅᐳᖅ ᐃᑲᑦᑐᕆᒃᑐᒥ ᐃᓅᔪᓂ ᓂᕈᒥᐊᒐᖓᓂ ᑲᓇᑕᒧᑐᐃᓐᓇᖅ ᐅᑭᐅᖅᑕᖅᑐᒥ ᓱᕈᓯᕐᓄᑦ, ᐊᒻᒪᓗ ᓇᓗᓇᐃᕋᒃᑯ ᐱᓕᕆᐊᒃᓴᐅᔪᒥ ᐊᒻᒪᓗ ᐅᓂᒃᑳᕆᓪᓗᒍ ᖃᓄᖅ ᐱᐅᔪᒻᒪᕆᐊᓗᖕᓂ ᑭᓱᑐᐃᓐᓇᓂ ᑎᑭᑉᐸᖕᓂᖏᓐᓂ ᒥᑭᑦᑐᓂ ᐴᖅᑲᖅᓯᒪᓂᐅᔪᒥ, ᐊᒥᓱᒃᑲᓐᓂᕐᓂ ᐃᓄᖕᓂ ᐃᓚᐅᖃᑕᐅᔪᒪᓕᖅᑎᑕᐅᓚᐅᖅᐳᑦ ᐊᒻᒪᓗ ᖁᖓᑎᑦᑎᓗᑎᒃ ᓱᕈᓯᕐᒥ ᐃᓄᑐᖃᕐᒥᓪᓘᓐᓃᑦ ᑮᓇᖓᓄᑦ," ᑎᓕᓐ ᐃᖅᑲᐃᓚᐅᖅᐳᖅ. "ᐅᔾᔨᕈᓱᒃᐳᒍᑦ ᐃᓚᖏᓐᓂ ᐊᒃᖢᓛᖑᔪᓂ ᓱᕈᓯᕐᓂ ᑲᓇᑕᒥ ᓄᓇᖃᕐᓂᖏᓐᓂ ᐅᑭᐅᖅᑕᖅᑐᒥ ᑲᓇᑕᒥ ᐊᒻᒪᓗ ᐃᓱᒪᕗᒍᑦ ᖃᐅᔨᒪᓪᓗᐊᕐᓂᖏᓐᓂ ᓵᓐᑕ ᓱᓕ ᐃᓱᒪᒋᕙᒃᐸᖏᑦ ᐃᓱᒪᒋᓇᒍ ᓇᒥ ᓄᓇᖃᕐᓂᖏᓐᓂ ᐊᒻᒪᓗ ᐃᓅᓰᑦ ᒪᑭᒪᐅᑏᓪᓗ ᐅᓂᒃᑳᕆᓯᒪᓂᐅᔪᓂ ᐊᖏᕐᕋᕆᔭᐅᔪᓄᑦ."
ᐱᒋᐊᕈᑕᐅᔪᖅ ᐱᕈᖅᐸᓪᓕᐊᖏᓐᓇᓚᐅᖅᐳᖅ. ᖄᖏᖅᓯᒪᓕᖅᑐᓂ ᖃᔅᓯᒐᓚᖕᓄᑦ ᑕᖅᑭᓄᑐᐃᓐᓇᖅ, ᐊᒥᓱᓂ ᐴᖅᑲᖅᓯᒪᔪᓂ ᓇᒃᓯᐅᔾᔭᐅᓚᐅᖅᐳᑦ ᐃᖃᓗᒃᑑᑦᑎᐊᕐᒧᑦ, ᖁᕐᓗᖅᑐᖅ, ᐃᒡᓗᓕᒑᕐᔪᒃ, ᐃᒃᐱᐊᕐᔪᒃ, ᑕᓗᕐᔪᐊᖅ, ᕿᑭᖅᑕᕐᔪᐊᖅ, ᒥᑦᑎᒪᑕᓕᒃ, ᐊᕐᕕᐊᒃ ᐊᒻᒪᓗ ᓴᓂᑭᓗᐊᕐᒧᑦ.
ᐃᑲᔪᖅᑕᐅᒃᑲᓐᓂᕐᓂᐅᔪᒥ ᐊᐅᓪᓚᖅᑎᑕᐅᓵᓕᓂᐊᓕᖅᐳᖅ ᓴᓂᑭᓗᐊᕐᒧᑦ. ᑎᓕᓐ ᖃᐅᔨᒐᒥ ᒫᓐᓇᓕᓴᐅᔪᒥ ᐃᓅᔪᓐᓃᕐᓂᐅᔪᒥ ᓯᓚᑎᒃ ᖃᕝᕕᖕᒥ, ᓴᖅᑭᑎᑦᑎᓚᐅᖅᐳᖅ ᐱᓕᕆᐊᒃᓴᐅᔪᒥ ᐊᑦᑎᖅᑕᐅᓯᒪᔪᒥ "ᓕᓯ ᓇᒡᓕᖕᓂᕐᒥ." ᐃᓗᓕᖃᕐᓂᐊᖅᐳᖅ ᕿᐱᓕᐊᒥ ᒥᖅᓱᖅᑕᐅᓯᒪᔪᒥ ᖃᓪᓗᓈᖅᑕᓂ ᑐᓂᔭᐅᔪᓂ ᖃᔅᓯᒐᓚᖕᓂ ᐃᓚᒋᔭᐅᔪᓂ ᐅᐊᖕᓇᒥ ᑲᓇᑕᒥ ᐱᓕᕆᐊᒃᓴᕋᓛᓄᑦ. ᓕᓯ ᐊᑎᕆᔭᐅᕗᖅ ᖃᕝᕕᐅᑉ ᐃᓅᕋᑖᓚᐅᖅᑐᒥ ᐸᓂᖓᓂ, ᐃᕐᓂᓚᐅᖅᑕᖓᓂ ᑕᖅᑭᐸᓗᖕᒥ ᓯᕗᓂᐊᓂ ᐃᓅᔪᓐᓃᓚᐅᕐᓂᖓᓂ.
ᑎᑎᖅᑲᓂ ᒪᒥᐊᓐᓂᐅᔪᓂ ᓇᒡᓕᒍᓱᖕᓂᕐᒥ ᓇᒃᓯᐅᔾᔭᐅᓂᐊᕆᕗᑦ ᖃᕝᕕᐅᑉ ᐃᓚᖏᓐᓄᑦ.
ᒥᑦᑎᒪᑕᓕᖕᒥ, ᓂᓴ ᓱᒥᐅᕐ ᐃᑲᔪᓚᐅᖅᐳᖅ ᑐᓐᓂᖅᓴᐃᓂᕐᒥ ᖁᕕᐊᓲᓯᐊᓂ 300–ᐸᓗᖕᓄᑦ ᐃᓄᖕᓄᑦ ᑎᓯᐱᕆᒥ ᐊᒻᒪᓗ ᐅᔾᔨᕈᓱᒃᐳᖅ ᖁᕕᐊᓐᓂᐅᔪᒥ ᑐᓐᓂᕆᔭᐅᓂᐅᔪᓂ ᓇᒃᓴᖅᑕᖓᓂ ᓄᓇᓕᖕᓄᑦ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᓄᑦ ᐃᓕᓐᓂᐊᖅᑎᓄᑦ.
"ᐃᓄᐃᑦ ᐅᕙᓂ ᒥᑦᑎᒪᑕᓕᖕᒥ ᖁᔭᓕᕐᔪᐊᖅᐳᑦ ᖃᓄᐃᓕᐅᕐᓂᑦᑎᓐᓂ ᐃᓄᖕᓄᑦ ᐊᒻᒪᓗ ᓱᕈᓯᖏᓐᓄᑦ," ᐅᖃᓚᐅᖅᐳᖅ ᓱᒥᐅᕐ, ᐱᓕᕆᖃᑕᐅᓲᒥᒃ ᐊᖏᔪᒥ ᐱᓕᕆᓂᐅᔪᒥ ᓄᓇᓕᐅᔪᒥ ᐊᔪᖅᓴᖅᑐᓄᑦ ᓂᕿᑖᕐᕕᖓᓂ, ᐃᓚᖃᖅᑐᒥ ᐅᐃᖓᓂ. ᑎᓕᓐ ᐅᑭᐅᖅᑕᖅᑐᒥ ᑲᓇᑕᒥᐅᑕᐅᓚᐅᖅᓯᒪᙱᓚᖅ, ᐊᒻᒪᓗᑦᑕᐅᖅ ᑐᓂᓯᖃᑎᒋᕙᒃᑕᖏᓐᓂ. ᑭᓯᐊᓂ ᐅᖃᐅᓯᖃᓲᖑᕗᑦ ᐅᑭᐅᖅᑕᖅᑐᕐᒥᐅᓂ ᐃᑲᔪᖅᐸᒃᑕᖏᓐᓂ "ᐃᓚᒋᓂᖏᓐᓂ."
"ᖃᐅᔨᒑᖓᑦᑕ ᑭᓱᑐᐃᓐᓇᓂ ᐅᑭᐅᖅᑕᖅᑐᕐᒥᐅᑦ ᐊᒃᓱᕈᕈᑎᒋᕙᒃᑕᖏᓐᓂ ᐊᒻᒪᓗ ᖃᓄᖅ ᐃᑲᔪᕈᓐᓇᕐᓂᑦᑎᓐᓂ, ᐊᔪᕐᓇᑦᑎᐊᖅᐳᖅ ᑕᑯᙱᑦᑕᕆᐊᒃᓴᖅ," ᐅᖃᓚᐅᖅᐳᖅ ᑎᓕᓐ. "ᓄᓇᒥ ᓇᒦᓐᓂᖓᓂ, ᓇᒦᕈᓘᔭᖅᐳᒍᑦ, ᑭᓯᐊᓂ ᐆᒻᒪᑎᕗᑦ ᐅᑯᓇᓃᑉᐳᑦ ᑲᓇᑕᒥ ᐅᑭᐅᖅᑕᖅᑐᕐᒥᐅᑕᓄᑦ ᐊᒻᒪᓗ ᖁᕕᐊᓱᒃᐳᒍᑦ ᐃᑲᔪᕈᓐᓇᕐᓂᕐᒧᑦ ᒥᑭᑦᑑᑕᐅᒐᓗᐊᖅᐸᑦ ᐱᔪᓐᓇᖅᑕᑦᑎᓐᓂ."