Skip to content

ᐅᐱᒋᔭᐅᔪᓂᒃ ᐅᖃᐅᓯᖃᕐᓂᖅ ᒪᒃᑯᒃᑐᓄᑦ ᐊᑐᖅᑕᐅᔪᒃᓴᓂᒃ

ᐅᒃᐱᕈᓱᑦᓯᐊᖅᖢᓂ ᐱᓕᕆᐊᕆᔭᐅᔪᒧᑦ ᒪᒃᑯᒃᑐᑦ ᐱᔾᔪᑎᒋᑉᓗᒋᑦ, ᑯᐊᐳᕈ ᑐᕆᕗ ᒐᐅᑦᓯ ᓇᐅᔮᓂ ᐳᑭᖅᑕᓕᒃ ᖁᕕᐊᓱᑦᓯᐊᓚᐅᖅᐳᖅ ᒪᒃᑯᒃᑐᑦ ᓇᐅᔮᒥᐅᑕᖅ ᒪᑲᓚᐅᑦ ᐊᕐᓇᑦᓯᐊᑉ ᑐᒃᓯᕋᐅᑎᖓ ᑕᒡᕗᖓ Travis Hamonic Community−ᒧᑦ ᐊᑐᖅᑕᐅᖁᑉᓗᓂᐅᒃ.

ᐸᑲᒃ ᐊᕐᓇᑦᓯᐊᖅ ᓇᐅᔮᒥᖑᑲᑦ ᐅᕕᓂᕈᖅᑖᖅᑐᖅ ᐊᑎᓕᐅᖅᓯᒪᔪᒥᒃ ᑭᐊᒍᕆ ᕕᓖᒻᔅᑯᑦ ᓴᐳᔾᔨᔨᖓᓐᓂᑦ
Travis Hamonic NHL−ᑯᑦ ᕼᐋᑭᕐᔪᐊᖅᑐᓂ ᑕᐅᑐᒋᐊᖅᓯᒪᑉᓗᑎᒃ ᑭᐊᒍᕆᒥ ᑎᓴᐱᕆ 16-ᖑᑎᓪᓗᒍ.

ᒪᑲᓚᐅᑦ ᓂᕈᐊᖅᑕᐅᓚᐅᖅᐳᖅ, ᑲᑎᑦᓯᔪᓐᓇᓚᐅᖅᖢᓂᓗ ᕼᐋᑭᕐᔪᐊᖅᑎᓄᑦ ᓴᐳᔾᔨᔨᒥᒃ ᑭᐊᒍᕆᒥᐅᑕᒥᒃ Hamonic ᐊᒻᒪ ᑕᐅᑐᒋᐊᖅᑐᕈᓐᓇᓚᐅᖅᖢᓂ NHL−ᑯᓐᓄᑦ ᐱᓐᖑᐊᖅᑎᓂᒃ ᕼᐋᑭᖅᑎᓂᒃ ᑭᐊᒍᕆᒥ ᓄᑲᐊᓗ ᐸᑲᒃ, ᐊᑖᑕᖓᓗ ᐃᒪᓂᐅ ᐅᑕᒃ, ᑎᓴᐱᕆ 16-ᖑᑎᓪᓗᒍ.

ᒐᐅᑦᓯ ᐅᖃᓚᐅᖅᐳᖅ ᑑᒑᓕᒃ ᐃᓕᓐᓂᐊᕐᕕᒡᔪᐊᒥ ᐊᖓᔪᖄᑉ ᑐᖏᓕᖓᓗ ᔪᓕᐊ ᒪᒃᐴᓴᓐ ᐃᓚᐅᓇᓱᐊᖃᑦᑕᖅᐳᑦ ᓄᓇᓕᖕᓂ ᐱᔪᓐᓇᖅᓯᑐᐊᕌᖓᒥᒃ.

ᐅᖃᓚᐅᖅᖢᓂᓗ ᒪᒃᑯᒃᑐᓕᕆᑐᐊᕈᓂ ᓯᕗᓪᓕᖅᐸᐅᓂᖓᓄᑦ ᐳᑭᖅᑕᓕᖕᓄᑦ ᑕᒪᓐᓇ ᓇᐅᔮᓂ.

"ᑕᐃᒪᓐᓇ ᐊᐅᓪᓚᖅᑎᑕᐅᓂᐊᖅᑐᓂᒃ ᐃᓚᐅᒍᒪᑦᓯᐊᖅᐳᒍᑦ ᑕᐃᒪᓐᓇᑎᑐᑦ ᐊᑐᖅᑕᐅᓂᐊᖅᑐᑎᑐᑦ," ᐅᖃᓚᐅᖅᐳᖅ ᒐᐅᑦᓯ.

"ᐅᖃᓪᓚᖃᑎᒋᓚᐅᖅᖢᒋᑦ ᐃᓚᒌᑦ ᐱᖓᓱᑦ ᐊᐅᓪᓚᓚᐅᖅᑐᑦ, ᑕᒪᓐᓇ ᐱᓕᕆᐊᖅ ᐃᒃᐱᖕᓇᑦᓯᐊᓚᐅᖅᐳᖅ ᑖᒃᑯᓄᖓ, ᐃᓚᐅᑎᑕᐅᔪᓐᓇᓚᐅᕐᒪᑕ ᐃᓚᐅᕕᒋᓂᐊᓚᐅᖏᑕᒥᓂ.

"ᓄᓇᕗᒥᑦ ᐊᐅᓪᓚᓚᐅᖅᓯᒪᖏᒻᒪᑕ ᑭᓯᐊᓂ ᕙᓂᐹᖕᒧᑦ ᐊᐅᓪᓚᖃᑦᑕᕋᓗᐊᖅᖢᑎᒃ, ᑭᓯᐊᓂᓗ ᐋᓐᓂᐊᕐᕕᓕᐊᖅᖢᑎᒃ ᐃᓛᓐᓂᒃᑯᑦ.

"ᐊᒻᒪ, ᑖᒃᑯᐊ ᒪᕐᕉᒃ ᐊᐅᓪᓚᖃᑕᐅᔪᓐᓇᓚᐅᖅᐳᒃ ᐃᐊᐴᑕᒧᑦ NHL−ᑯᓐᓂᓗ ᕼᐋᑭᖅᑎᓂᒃ ᑕᐅᑐᒋᐊᖅᑐᖅᑎᑕᐅᑉᓗᑎᒃ, ᖁᕕᐊᓱᑦᓯᐊᓚᐅᖅᖢᑎᒡᓗ."

ᒐᐅᑦᓯ ᐅᖃᓚᐅᖅᖢᓂᓗ ᑕᒪᒃᑯᐊ ᐱᕙᓪᓕᐊᔪᓕᕆᔨᒃᑯᑦ ᐅᖃᐅᓯᖃᓗᐊᖃᑦᑕᖏᒻᑕ ᑐᓴᕐᓂᖅᑐᓂᒃ ᐃᖃᐃᓕᓴᐅᑎᓂᒃ ᐱᓐᖑᐊᖃᖃᑦᑕᖅᑐᑦ ᖃᓄᐃᓕᐅᕈᑎᒋᕙᒃᑕᖏᓐᓂᒃ ᐃᑲᔪᕐᓂᕐᒧᑦ.

ᐅᖃᓚᐅᖅᖢᓂᓗ ᕼᐋᑭᖅᑎᕐᔪᐊᖑᖃᑕᐅᔪᖅ Hamonic−ᑐᑦ ᓲᕐᓗ ᑕᐃᒪᓐᓇ ᐱᒋᐊᖅᑎᑦᓯᓯᒪᖕᒪᑕ ᓄᓇᖃᖅᑳᓯᒪᔪᑦ ᒪᒃᑯᒃᑐᑦ ᐃᓚᐅᓂᖃᖁᑉᓗᒋᑦ ᓄᑕᖃᑦ, ᐱᕙᓪᓕᐊᔪᑎᒍᓪᓗ ᑕᒪᓐᓇ ᑐᓴᖅᑕᐅᑎᑕᐅᖃᑦᑕᕆᐊᖃᖅᐳᖅ.

"ᒪᒃᑯᒃᑐᓄᑦ ᑐᕌᖅᑐᑦ ᐱᓕᕆᐊᑦ ᑕᐃᒪᓐᓇᑎᑐᑦ Travis Hamonic Communityᑎᑐᑦ ᐃᖅᑲᐅᒪᔭᒃᓴᖃᐅᑕᐅᓕᕈᓐᓇᕐᒪᑕ ᑕᐃᒪᖓᓗᒃᑖᖅ ᐃᓅᓯᓗᒃᑖᒧᑦ ᖃᐅᔨᒪᔭᐅᓂᐊᖅᑐᓂᒃ.

"ᐃᓱᒪᒋᔭᕋ ᒪᓕᒃᖢᒍ, ᐳᑭᖅᑕᓕᐅᑉᓗᖓᓗ, ᑕᐃᒪᓐᓇᐃᑦᑐᑦ ᐱᓕᕆᐊᑦ ᐃᒃᐱᒋᔭᐅᑦᓯᐊᕐᒪᑕ ᓄᑕᖃᓄᑦ ᐱᕋᔭᖕᓂᐅᖏᑦᑐᒧᑦ ᐊᑐᕈᓐᓇᖁᑉᓗᒋᑦ.

"ᑕᒪᓐᓇ ᓱᓕᑦᓯᐊᖅᐳᖅ ᐱᐅᖏᑦᑐᓂᒃ ᐊᑐᒐᒃᓴᖃᕐᓂᖅᓴᐅᑎᓪᓗᒍ ᓄᓇᓕᖕᓂ, ᑕᐃᒪᓐᓇ ᐱᔪᓐᓇᕐᓂᖃᖅᑎᑕᐅᒋᐊᖃᕐᒪᑕ.

"ᑕᒪᒃᑯᐊ ᐊᑐᖅᑕᐅᕙᒃᑐᑦ ᐊᑐᕐᓂᖃᑦᓯᐊᕐᒪᑕ ᒪᒃᑯᒃᑐᓂᒃ ᐊᑐᓚᐅᖅᓯᒪᖏᑕᖏᓐᓂᒃ ᐊᑐᖅᑎᑦᓯᔪᓐᓇᖅᖢᑎᒃ, ᓄᓇᒥᖕᓂᓪᓗ ᐊᐅᓪᓚᖅᑎᑕᐅᔪᓐᓇᖅᖢᑎᒃ ᓄᓇᖓᑕ ᐊᓯᐊᓂᑦ ᐊᑐᕈᓐᓇᖅᖢᑎᒃ ᖃᓄᑐᐃᓐᓇᖅ."

ᐊᕐᕌᒍᓂ 6−ᓂ ᓄᓇᕗᒥᐅᑕᐅᓯᒪᓕᖅᖢᓂ, ᒐᐅᑦᓯ ᐅᖃᓚᐅᖅᐳᖅ ᓄᓇᕗᒧᐊᓚᐅᖏᑦᖢᓂ ᓱᓕ ᖃᐅᔨᒪᓚᐅᖏᑉᐳᖅ ᖃᓄᐃᑦᑑᓂᖓᓄᑦ ᓄᓇᖓᑦ.

ᐅᖃᓚᐅᖅᖢᓂᓗ ᐊᑐᖅᓯᒪᔭᖏᑦ ᒪᓕᒃᖢᒋᑦ, ᐃᓱᒪᑐᐃᓐᓇᖅᐸᓚᐅᕋᒥ ᑲᓇᑕᒥᐅᑦ ᐊᒥᓲᓂᖅᓴᐃᑦ, ᓄᓇᕗᒥᐅᑕᓂᒃ ᖃᐅᔨᒪᖏᑦᑐᑦ, ᖃᐅᔨᒪᖏᒻᒪᑕ ᐃᓱᒪᒋᔭᐅᔪᔮᕐᓇᖏᓐᓂᖓᓄᑦ ᐅᑭᐅᖅᑕᖅᑐᒥ ᓄᓇᖃᖅᖢᓂ ᓴᓂᐊᒍᑦ ᖃᓪᓗᓈᑦ ᓄᓇᖓᓐᓂᒥᐅᑦ.

"ᐅᓂᒃᑳᕈᓐᓇᕐᓇᑦᓯᐊᖏᑦᖢᓂᓗ ᑭᓇᒥᐊᒧᑦ ᑕᒫᓂᒥᐅᑕᐅᖏᑦᑐᒧᑦ ᑭᓯᐊᓂ ᑕᒫᓂᒥᐅᑕᐅᓚᐅᖅᓯᒪᒃᐸᑕ ᓄᓇᖃᖅᖢᑎᒃ.
"ᐊᔾᔨᒌᖏᑦᑐᓂ ᓄᓇᓕᖕᓂ ᐱᓕᕆᕕᒋᓯᒪᔭᒻᓂ ᐊᔾᔨᒌᖏᑦᑐᓂᒃ ᒪᒃᑯᒃᑐᓄᑦ ᐊᑐᖅᑕᐅᕙᒃᑐᓂᒃ ᐱᓕᕆᕕᖃᕐᒪᑕ ᐱᓕᕆᐊᖃᖅᖢᑎᒡᓗ, ᑭᓯᐊᓂ ᑖᓐᓇ ᓄᓇᓕᒃ ᓚᑭᐅᑦᓯᐊᕐᒪᑕ ᑕᐃᒪᓐᓇᐃᑦᑐᖃᕐᓂᕐᒧᑦ.

"ᓇᐅᔮᓂ ᓄᑖᖑᓂᖅᓴᐅᔪᒥᒃ ᐱᓐᖑᐊᕐᕕᖃᕐᒪᑕ ᓄᓇᓕᖕᓂ, ᒪᒃᑯᒃᑐᓪᓗ ᐊᑐᕈᓐᓇᖅᖢᑎᒃ ᐃᓕᓐᓂᐊᕐᕕᖓᓂ ᐃᖃᐃᓕᓴᕐᕕᖕᒥᒃ ᐅᑉᓗᓂ 7−ᓂ ᐱᓇᓱᐊᕈᓯᓗᒃᑖᖅ.

"ᕼᐊᒻᓚᒃᑯᑦ ᑎᑎᕋᖅᑎᖓᑦ (ᕌᑉ ᕼᐃᑦᓕ) ᓄᓇᓕᖕᓂ ᖃᐅᔨᒪᑦᓯᐊᖅᖢᓂ ᕿᓂᖏᓐᓇᖅᐸᒃᖢᓂᓗ ᐱᓕᕆᐊᒃᓴᒥᒃ ᑮᓇᐅᔭᓂᒡᓗ ᒪᒃᑯᒃᑐᓄᑦ ᐊᑐᖅᑕᐅᔪᓐᓇᖅᑐᓂᒃ, ᑕᐃᒪ ᓇᐅᔮᑦ ᑕᐃᒪᓐᓇ ᐊᐅᓪᓛᑦᓯᐊᖃᑦᑕᖅᐳᑦ."

ᒐᐅᑦᓯ ᐅᖃᓚᐅᖅᐳᖅ ᑲᔪᖏᖅᓴᐃᑦᓯᐊᕋᒥ ᑕᒪᐃᓐᓂᒃ ᓄᓇᓕᖕᓂᒃ ᐊᑎᕐᓂᒃ ᐃᓕᓯᖁᑉᓗᒋᑦ ᖃᐅᔨᒪᓕᕌᖓᒥᒃ ᑕᐃᒪᓐᓇ ᒪᒃᑯᒃᑐᓄᑦ ᐊᑐᖅᑕᐅᔪᓐᓇᖅᑐᓂᒃ, ᒪᕐᕉᐃᓐᓇᐅᒃᐸᑕᓘᓐᓃᑦ ᐱᖓᓲᒃᐸᑕᓘᓐᓃᑦ.

ᐅᖃᓚᐅᖅᖢᓂᓗ ᐊᑲᐅᓇᔭᖏᒃᑲᓗᐊᖅᖢᓂ ᑐᒃᓯᕋᐅᑕᐅᔪᑦ ᑕᒪᕐᒥᒃ ᐊᖏᖅᑕᐅᖏᓐᓂᖅᐸᑕ, ᐊᒻᒪ ᓄᓇᓕᖕᓂ ᒪᒃᑯᒃᑐᑦ ᑕᐃᒪᓐᓇ ᐊᑐᖅᑎᑕᐅᔪᑦ ᖁᕕᐊᓇᖅᑐᓂᒃ ᐃᓱᒪᓕᕈᓐᓇᕐᒪᑕ ᐃᑲᔪᖅᑕᐅᖃᑦᑕᖅᖢᑎᒃ ᑕᐃᒪᓐᓇ ᐊᑲᐅᓈᖅᓯᓂᐊᕐᓂᖏᓐᓄᑦ.

"ᑖᒃᑯᐊ ᐊᖓᔪᒌᒃ (ᒪᑲᓚᐅᑦ ᐊᒻᒪ ᐸᑲᒃ) ᐅᖃᐅᓯᖃᖃᑦᑕᓕᖅᐳᒃ ᐊᐅᓪᓛᕐᓂᕆᓚᐅᖅᑕᒥᖕᓂᒃ ᐅᖃᐅᓯᖃᕋᔪᒃᖢᑎᒡᓗ, ᓄᖅᑲᕆᐊᖃᓕᖅᑐᒃᓴᐅᕗᑦ," ᐃᒡᓚᖅᖢᓂ ᐅᖃᓚᐅᖅᐳᖅ ᒐᐅᑦᓱ.

"ᑕᐃᒪ, ᐅᖃᐅᓯᕆᔭᐅᖃᑦᑕᕐᒪᑕ ᐊᑐᖅᑕᐅᓚᐅᖅᑐᑦ ᑕᐃᒪᓐᓇ ᐊᒻᒪ, ᑕᐃᒪᑐᖅ ᑐᓴᓚᐅᕐᓗᑎᒃ ᐊᑐᓚᐅᖅᑕᒥᓂᒃ ᖁᕕᐊᒋᔭᖃᓚᐅᕐᓂᕐᒥᖕᓄᑦ, ᐃᓄᐃᑦ ᑐᒃᓯᕋᐅᑎᖃᕐᓂᖅᓴᐅᔪᓐᓇᖅᐳᑦ ᓯᕗᓂᒃᓴᒥ ᐱᓕᕆᐊᕆᐅᓂᐊᖅᑐᓄᑦ.

"ᓄᑕᖃᑦ ᐱᑦᓯᐊᕌᖓᑕ ᑐᓂᔭᐅᕙᖕᒪᑕ ᐱᐅᔪᓂᒃ ᖁᕕᐊᓇᖅᑐᓂᒃ ᓂᕈᐊᖅᑕᐅᑉᓗᑎᒃ ᖃᓄᐃᓕᐅᕈᑕᐅᓂᐊᖅᑐᓄᑦ, ᐃᓚᐅᑉᓗᑎᒡᓗ ᓄᓇᓕᖕᓂ ᐊᑐᕆᐊᖃᖅᐳᑦ ᓂᕈᐊᖅᑕᐅᒍᒪᒃᐸᑕ ᖃᓄᐃᓕᐅᕈᑕᐅᓂᐊᖅᑐᓄᑦ ᓇᓂᑐᐃᓐᓇᖅ ᖃᓄᑐᐃᓐᓇᖅ."