ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓄᑦ (AWG) ᐱᙳᐊᖅᑎᐅᔪᑦ ᓄᓇᕗᒻᒥ ᒥᔾᔨᑦ−ᖑᔪᑦ ᓵᓚᖃᓚᐅᖅᐳᑦ ᐃᖃᓗᐃᑦ 5-3−ᒥ ᖁᕕᐊᓇᑦᑎᐊᖅᑐᒥ ᑭᖑᓪᓕᖅᐹᖑᔪᒥ ᐱᓂᕐᒧᑦ 2018−ᒥ ᓇᓄᕐᒧᑦ ᐊᓪᓕᕋᕐᒧᑦ ᒥᔾᔨᑦ/ᔫᕕᓇᐃᔪᓪ ᓵᓚᖃᕋᓱᐊᕐᓂᐅᔪᒥ ᑕᑖᑦᑎᐊᖅᑐᒥ ᐊᓐᓂᑭᑕᕐᕕᖕᒥ ᑲᖏᖅᖠᓂᕐᒥ ᕕᕈᐊᕆ 18−ᖑᑎᓪᓗᒍ.
ᐊᕐᕕᐊᑦ ᖄᖅᑯᑦᑎᓚᐅᖅᐳᑦ ᐱᙳᐊᖅᑎᑦ ᑲᖏᖅᖠᓂᕐᒥ ᐱᓂᕐᒧᑦ ᑲᓐᓄᔭᐅᔭᕐᒥ ᐱᙳᐊᕐᓂᐅᔪᒥᑦ, ᑕᑯᒃᓴᐅᑎᑦᑎᓚᐅᕐᒥᔪᓂ ᑲᒪᒋᔭᓕᖕᓂ ᑲᖏᖅᖠᓂᕐᒥ ᐅᔭᕋᑦ ᒥᔾᔨᑦ ᐱᙳᐊᖅᑎᓂᑦ, ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ, ᓴᓪᓕᑦ, ᓇᐅᔮᑦ ᐊᒻᒪ ᑎᑭᕋᕐᔪᐊᕐᒥᐅᓂ.
ᑕᒪᕐᒥᒐᓚᐃᑦ ᐱᙳᐊᖅᑕᐅᔪᓂ ᐅᓪᓗᓄᑦ−ᑎᓴᒪᓄᑦ ᓵᓚᖃᕈᓱᐊᕐᓂᐅᔪᒥ (ᕕᕈᐊᕆ 15-18) ᐃᒃᓯᕙᐅᑕᖏᑦ ᓂᐅᕕᖅᑕᐅᔪᐃᓐᓇᐸᓘᓚᐅᖅᐳᑦ, ᐅᓄᓛᖓᓂ ᐃᓯᕈᑎᓂᑦ ᓂᐅᕕᐊᒃᓴᐅᕙᒃᖢᑎᒃ ᖃᐅᑕᒫᑦ.
ᐱᙳᐊᖅᑎᓄᑦ ᓄᓇᕗᒻᒥ ᑲᒪᔨᓪᓚᕆᖓ ᑕᓂᔅ ᓛᒻ ᐅᖃᓚᐅᖅᐳᖅ ᖁᕕᐊᖏᓐᓇᐅᔭᖅᑐᖅ ᑲᒪᒋᔭᖃᕐᓂᕐᒧᑦ ᑲᖏᖅᖠᓂᕐᒥ ᐊᒻᒪᓗ ᑕᒪᑐᒪᓂ ᐊᕐᕌᒎᔪᒥ ᑕᐃᒪᐃᓚᐅᕆᕗᖅ.
ᐅᖃᓚᐅᖅᐳᖅ ᑲᖏᖅᖠᓂᕐᒥ ᐱᙳᐊᖅᑐᓕᕆᔨᖓ ᑕᐃᕕᑦ ᑲᓛᒃ ᐊᐅᓚᑦᑎᒃᑲᓐᓂᓚᐅᖅᐳᖅ ᐋᖅᑭᑦᑎᐊᖅᓯᒪᔪᒥ ᖃᓄᐃᓕᐅᕐᓂᐅᔪᒥ ᑕᒪᑐᒪᓂ ᐊᕐᕌᒎᔪᒥ, ᐋᖅᑭᑦᑎᐊᖅᓯᒪᔪᓂ ᐱᓕᕆᔨᖃᑦᑎᐊᖅᖢᑎᒃ, ᐱᙳᐊᖅᑐᓄᑦ ᐱᙳᐊᖅᑎᑦᑎᐊᕙᐅᓛᖑᔪᓄᑦ ᑐᓂᓯᓂᐅᔪᓂ, ᐋᓐᓂᖅᑐᓄᑦ ᑲᒪᕙᒃᑐᓂ ᐱᓕᕆᓪᓗᑎᒃ ᐊᒻᒪᓗ ᓈᒻᒪᒃᓯᒪᓕᖅᓯᒪᑦᑎᐊᖅᑐᒥ ᐊᑐᖅᑕᐅᔪᒃᓴᓂᑦ 10−ᓄᑦ ᑲᑎᙵᓂᐅᔪᓄᑦ ᐃᓚᐅᖃᑕᐅᓪᓗᑎᒃ ᐊᒃᓱᕈᕐᔪᐊᖅᑐᓄᑦ ᓵᓚᒃᓴᕋᓱᐊᕐᓂᐅᔪᒥ.
"ᖃᐅᔨᒪᓚᐅᖅᐳᖓ, ᒥᔾᔨᑦᓂ ᓄᓇᕗᒻᒥ ᐱᙳᐊᖅᑎᓪᓗᒋᑦ ᐊᕐᕕᐊᓂ ᐊᕐᕌᒎᓚᐅᖅᑐᒥ, ᓇᒃᓯᐅᔾᔨᓂᐊᕐᓂᑦᑎᓐᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓄᑦ ᐱᙳᐊᖅᑎᓂᑦ ᐊᓪᓕᕋᐅᓂᐅᔪᒧᑦ ᑕᒪᑐᒪᓂ ᐊᕐᕌᒍᒥ," ᐅᖃᓚᐅᖅᐳᖅ ᓛᒻ.
"ᑕᑯᒐᒪ ᖃᓄᐃᑦᑑᓂᖏᓐᓂ ᐱᙳᐊᖅᑎᐅᔪᓂᑦ ᐱᒋᔭᑦᑎᓐᓂ – ᓱᒃᑲᓂᖏᓐᓂ ᐊᒻᒪ ᓱᒃᑲᔪᓐᓇᕐᓂᖏᓐᓂ – ᖃᐅᔨᒪᓚᐅᖅᐳᖓ ᓵᓚᖃᕈᓐᓇᑐᐃᓐᓇᕆᐊᖃᕐᓂᑦᑎᓐᓂ ᐊᓪᓕᕋᕐᒥ ᒫᓐᓇᐅᔪᒥ.
"ᐊᖏᔫᓚᐅᕐᒥᔪᖅ ᐅᑯᓇᓂ ᐱᙳᐊᖅᑎᐅᔪᓄᑦ, ᑭᕙᓪᓕᕐᒥᐅᑕᐅᒐᓗᐊᕈᑎᒃ ᕿᑭᖅᑖᓗᖕᒥᓪᓘᓐᓃᑦ, ᐱᖃᓐᓇᕇᖏᓐᓇᐅᔫᔮᓚᐅᖅᑐᑦ.
"ᐱᙳᐊᖅᑏᑦ ᐅᖃᐅᑎᓚᐅᖅᑕᒃᑲ ᓵᓚᒃᓴᕐᓂᐊᓐᓂᑦᑎᓐᓂ ᐆᒥᖓ ᓵᓚᖃᕋᓱᐊᕐᓂᐅᔪᒥ ᐊᒻᒪᓗ, ᐃᓚᐅᖃᑕᐅᓕᕐᒪᑕ ᑕᐃᒪᓐᓇ ᐃᓱᒪᓂᐅᔪᒥ ᐊᐅᓚᑦᑎᓚᐅᖅᐳᖓ ᐊᒻᒪ ᐱᙳᐊᖅᑎᕐᔪᐊᑲᑕᒃᖢᒋᑦ, ᑐᓄᒻᒧᑦ ᕿᕕᐊᕈᓐᓇᐃᓪᓕᓚᐅᖅᐳᒍᑦ ᐊᒻᒪᓗ ᑕᐃᒫᒃ ᐊᓂᓚᐅᖅᐳᒍᑦ ᐊᓪᓕᕋᓕᔭᖅᖢᑕ."
ᑕᒪᐃᑎᒍᑦ ᓱᒃᑲᓂᐅᔪᒥ ᐱᙳᐊᖅᑎᓄᑦ ᓄᓇᕗᒻᒥ ᐊᒻᒪ ᑎᒥᒥᒍᑦ ᐋᖅᑭᒃᓱᐃᓂᐅᔪᒥ ᐱᙳᐊᖅᑎᖏᓐᓂ ᐊᑭᓖᓂᖃᕐᔪᐊᓚᐅᖅᐳᑦ ᓵᓚᖃᕋᓱᐊᕐᓂᖃᖅᑎᓪᓗᒋᑦ.
ᓛᒻ ᐅᖃᓚᐅᖅᐳᖅ ᖃᐅᔨᒪᓂᕐᓂ ᐃᖃᓗᐃᑦ ᓇᐃᑦᑐᒥ ᐃᒃᓯᕚᕐᕕᖃᓚᐅᖅᐳᑦ, ᐊᒻᒪᓗ ᓴᓇᓚᐅᖅᐳᖅ ᐱᙳᐊᕐᓂᕐᒧᑦ ᐸᕐᓇᐅᑎᒥᒃ ᐊᑐᕐᓂᐊᖅᑕᒥᓂᑦ ᒥᔾᔨᑦ−ᖑᔪᑦ ᐱᕚᓪᓕᕈᑎᒋᔪᓐᓇᖅᑕᖏᓐᓄᑦ.
ᐅᖃᓚᐅᖅᐳᖅ ᐅᖃᐅᑎᓚᐅᖅᑕᖏᑦ ᐱᙳᐊᖅᑎᖏᑦ ᐊᔭᐅᕇᓐᓇᕈᑎᒃ ᐃᖏᕐᕋᓂᖏᓐᓂ ᑭᖑᓪᓕᖅᐹᖓᓂ, ᐃᖃᓗᖕᒥᐅᑕᐃᑦ ᓂᐅᖏᑦ ᓄᖑᕈᑎᓴᕋᐃᓐᓂᖅᓴᐅᓂᐊᕐᓂᖏᓐᓂ ᐊᑯᓂᐅᓂᖅᓴᒥᐅᙱᑦᑐᖅ.
"ᑕᐅᖅᓰᓚᐅᖅᐳᒍᑦ ᑐᑭᓕᐊᕐᓂᐅᔪᓂ ᐊᒻᒪᓗ ᐸᒃ ᐅᑎᖅᑏᓐᓇᖅᖢᑎᒍᑦ ᐃᖃᓗᐃᑦ ᐃᓱᖓᓐᓄᑦ ᓯᐊᕐᕆᔮᖅᑎᑦᑎᓇᓱᐊᖅᖢᑕ, ᐊᒻᒪᓗ ᐊᑐᕈᓐᓇᖅᖢᑕ ᓄᑕᐅᙱᑦᑐᒥ ᑖᓐ ᓯᐊᕆᐅᑉ ᐅᖃᐅᓯᖓᓂ ("ᐸᒃ ᑲᑕᒡᓗᒍ ᐊᒻᒪ ᑎᑭᐅᑎᓗᑎᑦ ᓯᒃᑲᖓᓴᑦᑎᐊᙱᓐᓂᐅᔪᒧᑦ") ᐅᓂᒃᑳᕆᓂᕐᒧᑦ ᖃᓄᖅ ᐱᓚᐅᕐᓂᑦᑎᓐᓂ.
"ᐱᙳᐊᖅᑎᕗᑦ ᒪᓕᑦᑎᐊᓚᐅᖅᐳᑦ ᐱᙳᐊᕐᓂᕐᒧᑦ ᐸᕐᓇᐅᑎᖓᓐᓂ ᒪᓕᑦᑎᐊᖅᖢᑎᒃ ᐊᒻᒪᓗ ᐃᖃᓗᖕᒥᐊᑕᓂ ᐱᙳᐊᖅᑎᓂᑦ ᑕᖃᑎᑉᐸᓪᓕᐊᖏᓐᓇᖅᖢᑎᒍᑦ ᐱᙳᐊᖅᐸᓪᓕᐊᑎᓪᓗᒋᑦ.
"ᐊᑕᐅᓯᖅ ᓴᙲᓐᓂᐅᓚᐅᖅᑐᖅ ᐱᙳᐊᖅᑎᕗᑦ ᐱᖃᓚᐅᖅᑐᓂ ᐱᙳᐊᖅᑎᒥᑦ ᐱᙳᐊᖅᑎᙱᑎᑕᐅᓚᐅᑲᖕᓂᖏᓐᓂ ᐊᑲᐅᙱᓕᐅᕈᑕᐅᔪᓄᑦ, ᐊᒻᒪᓗ ᑕᒪᓐᓇ ᑐᕌᖅᑎᑦᑎᓚᐅᖅᐳᖅ 8−ᓂ 5-ᓂ-3−ᖑᔪᓄᑦ ᖃᓄᐃᓐᓂᐅᔪᓄᑦ ᐅᕙᑦᑎᓐᓄᑦ ᒪᕐᕉᖕᓂ ᐱᙳᐊᕐᓂᐅᔪᓄᑦ.
"ᐅᕙᑦᑎᓐᓂ ᐃᑲᔪᕐᓂᖃᓚᐅᖅᑐᑦ ᑖᔅᓱᒧᖓ ᐊᑲᐅᙱᓕᐅᕈᑕᐅᔪᒥ ᐋᖅᑭᒃᓯᒪᒐᓗᐊᖅᑎᓪᓗᑕ ᐊᔪᙱᓐᓂᖅᓴᐅᔪᒧᑦ ᐱᙳᐊᕐᓂᐅᔪᒥ, ᑖᒃᑯᓂᖓᑦᑕᐃᓐᓇᖅ ᐱᙳᐊᖅᑎᓂᑦ ᐊᑐᖅᐸᙱᓐᓇᑦᑕ ᓄᖅᑲᖓᑎᑕᐅᓚᐅᑲᒃᑐᓄᑦ.
"ᐃᓗᓪᓕᖅᓯᓚᐅᖅᐳᒍᑦ ᐊᑐᕐᓂᖃᐅᑎᓂᑦ ᓂᕈᐊᖅᑎᓪᓗᑕ ᐱᙳᐊᖅᑎᓂᑦ ᐊᒻᒪᓗ, ᑕᒪᓐᓇ ᐅᖃᐅᓯᐅᒐᔪᒃᑲᓗᐊᖅᑎᓪᓗᒍ, ᓂᕈᐊᑦᑎᐊᙱᑐᒃᓴᐅᓐᓂᕋᓗᐊᖅᐳᒍᑦ ᐱᙳᐊᖅᑎᑦᑎᐊᕙᐅᓛᓂᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒧᑦ ᑲᑎᙵᓂᐅᔪᓂ, ᑭᓯᐊᓂ ᓂᕈᐊᖅᓯᓚᐅᖅᐳᒍᑦ ᓈᒻᒪᒃᑐᓂ ᐱᙳᐊᖅᑎᓂᑦ."
ᓛᒻ ᐅᖃᓚᐅᖅᐳᖅ ᐱᒻᒪᕆᐅᓚᐅᖅᐳᖅ ᐱᙳᐊᖅᑎᓄᑦ ᓄᓇᕗᒻᒧᑦ ᐊᑐᕈᓐᓇᕐᓂᕐᒧᑦ ᐊᓪᓕᕋᐅᔪᒥ ᐱᐅᓯᒋᐊᖅᑎᑦᑎᓂᕐᒧᑦ ᓵᓚᖃᕋᓱᐊᕐᓂᐅᔪᒧᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒧᑦ.
ᐅᖃᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂ ᐱᔭᕆᐅᖅᓴᓂᕐᒧᑦ ᐱᙳᐊᖅᑎᑦᑎᐊᕙᐅᒃᑕᖃᐅᖅᑐᖅ ᑕᖅᑳᓂ ᕼᐋᑭᒨᖅᑎᓪᓗᒍ, ᑭᓯᐊᓂ, ᐱᙳᐊᕐᓂᕐᒧᐊᖅᑎᓪᓗᒋᑦ ᐊᒻᒪᓗ ᓵᙵᑎᓪᓗᒋᑦ ᐊᔾᔨᐅᙱᓐᓂᐅᒐᓚᒃᑐᒥ, ᖃᐅᔨᒪᙱᓚᑎᑦ ᖃᓄᐃᓐᓂᐊᕐᒪᖔᑕ ᐱᙳᐊᕐᓂᐅᔪᒥ ᐱᔭᕆᐊᖃᓪᓚᕆᓕᕈᑎᒃ.
"ᐊᑕᐅᓯᕐᒥ ᐅᖃᕈᓐᓇᖅᐳᖓ ᓱᓕᓪᓗᖓ: ᓄᖅᑲᕐᓂᖃᙱᑦᑐᑦ ᐅᑯᓇᓂ ᐱᙳᐊᖅᑎᐅᔪᓂᑦ.
"ᓵᓚᖃᕋᓱᐊᕐᔪᐊᕐᓂᐅᔪᒥ, ᐱᓐᓇᕆᔭᐅᔪᓂ ᐊᒻᒪ ᐋᖅᑭᑦᑎᐊᖅᓯᒪᓂᐅᔪᒥ ᓵᓚᖃᕋᓱᐊᕐᓂᐅᔪᒥ ᓲᕐᓗ ᐊᓪᓕᕋᐅᔪᒥ ᓯᕗᓂᐊᑦᑎᐊᖓᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒧᑦ ᑐᓂᓯᓲᖑᕗᖅ ᐱᙳᐊᖅᑎᑦᑎᓐᓂ ᑕᐃᒪᓐᓇᑎᒋ ᐱᔪᓐᓇᕋᓱᒋᓐᓈᓂᕐᒥ ᑐᕌᖅᑎᓪᓗᒋᑦ ᕼᐊᐃ ᕆᕗᒧᑦ ᐱᙳᐊᕆᐊᖅᑐᖅᑎᓪᓗᒋᑦ ᓄᑕᖅᑲᓄᑦ ᐅᑭᐅᖃᑎᒥᓂᑦ.
"ᓵᓚᖃᖅᑎᓪᓗᒋᑦ ᐊᓪᓕᕋᕐᒥ, ᑕᒪᕐᒥᒃ ᐱᔪᓐᓇᕋᓱᒋᔪᐃᓐᓇᐅᓕᖅᐳᑦ ᐊᒻᒪ ᐃᒻᒥᖕᓂᒃ ᐅᒃᐱᕈᓱᒃᑐᐃᓐᓇᐅᓕᖅᐳᑦ.
"ᐊᒻᒪᓗ ᐱᙳᐊᖅᑎᑕᖃᓚᐅᙱᓚᖅ ᐃᑲᔪᖅᑎᒥᓪᓗ ᖄᓕᖅᑭᓂᖃᓚᐅᙱᑦᑐᒥ ᑐᕌᖅᐸᓪᓕᐊᑎᓪᓗᒋᑦ ᒎᓗᒧᑦ ᐅᔭᒥᖕᒧᑦ ᐱᙳᐊᕐᓂᐅᔪᒥ ᑲᖏᖅᖠᓂᕐᒥ ᐊᓐᓂᑭᑕᕐᕕᖕᒥ – ᓂᐱᖅᑯᖅᑐᕐᔪᐊᓚᐅᖅᑐᖅ ᐊᒻᒪ ᖁᕕᐊᓇᕐᔪᐊᖅᖢᓂ – ᑕᐃᒫᒃ ᐸᕐᓇᒃᓯᒪᓂᖃᖅᐳᒍᑦ ᕼᐊᐃ ᕆᕗᕐᒧᑦ ᐸᕐᓇᒃᓯᒪᔪᓐᓇᕐᓂᓕᒫᑦᑎᓐᓂ."