Skip to content

ᐅᑭᐅᖅᑕᖅᑐᒥ ᓯᑯᖓ ᓱᕋᑦᑎᒃᑲᓐᓂᖅᐳᖅ

ᑭᖑᓪᓕᖅᐹᖑᔪᖅ ᐊᒃᑐᐃᓂᐅᔪᖅ ᓄᖑᑉᐸᓪᓕᐊᔪᒥ ᓯᑯᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑎᑭᓚᐅᖅᐳᖅ ᐋᖅᑭᒃᓯᒪᓂᐅᔪᒥ 80-ᑭᓛᒥᑐᒥ ᓯᑯᒥ ᐲᖅᑐᒥ ᑭᖑᓪᓕᖅᐹᖑᔪᒥ ᐋᖅᑭᐅᒪᑦᑎᐊᖅᑐᒥ ᐊᐅᔪᐃᑦᑐᕐᒥ ᐅᐊᖕᓇᒥ ᐃᓱᐊᓂ ᐊᐅᓱᐃᑦᑐᕐᒥᐅᑦ ᕿᑭᖅᑕᖓᓂ ᔪᓚᐃ ᓄᙳᐊᓂ ᐊᒻᒪ ᐋᒍᔅᑎᐅᑉ ᐱᒋᐊᕐᓂᖓᓂ.

“ᓄᒫᓱᕐᔪᐊᖅᐳᖓ. ᐆᒻᒪᑎᒃᑯᑦ ᕿᐊᕗᖓ ᑐᓴᕌᖓᒪ ᑮᓇᐅᔭᓕᐅᕐᓂᖅ ᐱᒻᒪᕆᐅᓂᖅᓴᐅᓂᖓᓂ (ᐊᕙᑎᐅᔪᒥ). ᐱᒻᒪᕆᐅᕗᖅ ᑮᓇᐅᔭᓕᐅᕐᓂᕐᒥ ᑭᓯᐊᓂ ᑐᖁᙱᓪᓗᒍ ᓄᓇᕐᔪᐊᓕᒫᕗᑦ ᐱᓕᕆᕐᔪᐊᕐᓂᖃᕋᓱᖕᓂᕐᒧᑦ,” ᐅᖃᖅᐳᖅ ᐊᐅᓱᐃᑦᑐᕐᒥᐅᑕᖅ ᓕᐊᕆ ᐊᐅᓪᓚᓗᒃ.

ᕿᑭᖅᑕᐅᔪᖅ ᓯᑯᒥ ᓯᖃᓪᓕᓚᐅᖅᐳᖅ ᐊᒻᒪ ᑎᒃᑕᐅᓪᓗᓂ ᑭᒡᒐᖅᑐᐃᓚᐅᖅᐳᖅ ᐊᓯᐅᔨᓂᐅᔪᒥ 43 ᐳᓴᓐᑎᒥ ᐊᐅᔪᐃᑦᑑᑉ ᐃᓂᒋᔭᖓᓂ, ᐅᖃᐅᓯᐅᓪᓗᓂ ᑲᓇᑕᒥ ᓯᑯᒧᑦ ᐱᔨᑦᑎᕋᖅᑎᒃᑯᓐᓂ.

ᖃᔅᓯᐊᕐᔪᖕᓂ ᕼᐊᓐᓇᓚᓂ ᑭᓛᒥᑐᓄᑦ ᓂᒋᕐᒧᑦ, ᐊᐅᓱᐃᑦᑐᕐᒥ, ᓕᐊᕆ ᐊᐅᓪᓚᓗᒃ ᑐᓴᓚᐅᖅᐳᖅ ᑐᓴᒐᒃᓴᒥ ᐅᓪᓗᓂᑦ ᖃᔅᓯᐊᕐᔪᖕᓂ ᐊᓂᒍᖅᑎᓪᓗᒍ. ᑭᓯᐊᓂ ᖁᙱᐊᖅᓯᒪᕗᖅ ᐊᒃᑐᐃᓂᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᓯᕗᓪᓕᖅᐹᖑᔪᒥ ᑕᒪᕐᒥᒐᓚᒃ ᐃᓅᓯᖓᓐᓂ.

ᐅᔭᖅᑲᓂ ᑕᑯᕙᓪᓕᐊᑐᐃᓐᓇᖅᐳᖅ, ᓇᓗᓇᐃᒐᒃᓴᐅᔪᒥ ᕿᕐᓂᙱᓐᓂᖅᓴᐅᓂᖏᓐᓂ, ᓴᖅᑭᑎᑕᐅᓯᒪᔪᓄᑦ ᐊᐅᒃᐸᓪᓕᐊᔪᓄᑦ ᓯᕐᒥᓂᒃ ᓯᑯᖓᓐᓂ.

"ᑕᐃᒪᙵᓂ ᓄᑲᑉᐱᐊᖑᑎᓪᓗᖓ ᐊᐅᓱᐃᑦᑐᕐᒥ, ᐃᓂᐅᔪᒥ, ᖁᙱᐊᖅᓯᒪᕗᖓ ᓯᕐᒥᓂᑦ ᓄᖑᑉᐸᓪᓕᐊᓂᖏᓐᓂ ᐊᕐᕌᒍᒐᓴᓄᑦ," ᐅᖃᓚᐅᖅᐳᖅ. "ᓱᒃᑲᒃᑎᒋᐊᖅᑑᔮᖅᓯᒪᓕᖅᐳᖅ ... 1985 ᑭᖑᓂᐊᒍᑦ ᐊᐅᒃᐸᓪᓕᐊᓯᒪᕗᖅ ᓱᒃᑲᔪᒻᒪᕆᐊᓗᖕᒥ."

ᐃᖅᑲᐅᒪᒋᕗᖅ ᐊᖑᓇᓱᒍᓐᓇᕐᓂᕐᒥ ᑕᕆᐅᑉ ᓯᑯᖓᓂ ᓯᑎᐱᕆᐅᑉ ᓄᙳᐊᓂ ᒪᒃᑯᒃᑑᑎᓪᓗᒍ 1970–ᖏᓐᓂ. ᒫᓐᓇᐅᔪᒥ, ᐃᒻᒥᓂᒃ ᐊᓯᖏᓪᓗ ᐊᐅᓱᐃᑦᑐᕐᒥ ᐅᑕᖅᑭᔭᕆᐊᖃᖅᐳᑦ ᐅᒃᑐᐱᕆᐅᑉ ᓄᙳᐊᓄᑦ ᐅᕝᕙᓘᓐᓃᑦ ᓄᕕᐱᕆᐅᑉ ᐱᒋᐊᕐᓂᐸᓗᐊᓂ ᓯᑯᓕᐊᕋᓱᐊᕐᓂᕐᒧᑦ, ᑭᓯᐊᓂ ᓄᕕᐱᕆ ᓇᒃᓴᓲᖑᕗᖅ ᐱᒋᐊᕐᓂᖓᓂ ᑖᕐᓂᐅᔪᒥ ᓯᕿᓂᖅ ᓴᖅᑭᑉᐸᒍᓐᓃᕐᓂᖓᓂ ᑭᓯᐊᓂ ᕕᕈᐊᕆᒥ.

ᐃᓚᖏᓐᓂ ᖃᐅᔨᓴᕈᑎᓄᑦ ᖃᐅᔨᓴᕐᓂᐅᔪᓄᑦ ᓇᓚᐅᑦᑖᕆᕗᑦ ᓯᑯᖃᙲᓐᓂᔪᒥ ᐅᑭᐅᖅᑕᖅᑐᒥ ᐊᐅᔭᐅᑉ ᓄᙳᐊᓂ ᒥᑭᑎᒋᔪᒥ ᐊᕐᕌᒍᓄᑦ 15–ᓂ 30–ᓄᑦ.

ᐊᐅᓪᓚᓗᒃ, ᐃᓕᔭᐅᓚᐅᖅᑐᒥ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᖓᓄᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᑭᒡᒐᖅᑐᖅᑎᒻᒪᕆᐅᓂᖓᓄᑦ 2008–ᒥ, ᐅᔾᔨᕈᓱᒃᐳᖅ ᐃᓚᖏᑦ ᓄᓇᐅᔪᑦ ᕿᓚᒻᒥᐅᔪᒥ ᐊᑐᕐᓂᕐᓘᑎᖃᕋᔭᕐᓂᖏᓐᓂ ᐊᓯᐅᓂᖓᓂ ᐅᑭᐅᖅᑕᖅᑐᒥ ᓯᑯᖓᓐᓂ ᑐᑭᖃᕋᔭᕐᒪᑦ ᕿᓚᒻᒥᐅᓂᖅᓴᒥ ᐅᓯᑲᑦᑕᕐᓂᕐᒧᑦ ᐊᖅᑯᑕᐅᔪᓄᑦ.

"ᓄᓇᕐᔪᐊᖅ ᐊᒥᓱᐊᓗᖕᓂ ᐅᓗᕆᐊᓇᖅᑐᒦᓕᖅᐳᑦ ... ᑕᐃᒃᑯᐊᓕᒫᑦ (ᐅᓯᑲᑦᑕᕐᓂᕐᒧᑦ) ᐃᖏᕐᕋᓂᐅᔪᓂ, ᐃᓱᒪᒋᔭᐅᔾᔮᙱᓚᒍᑦ ᐊᒻᒪ ᓴᓂᖅᑯᑕᐅᓗᑕ ᑮᓇᐅᔾᔭᒃᓴᔨᐅᔪᑦ ᓄᓇᕐᔪᐊᒥ ᓈᒻᒪᒃᓴᓕᕐᓂᐊᕐᒪᑕ? ᐊᖏᓂᖅᓴᒻᒪᕆᐊᓗᖕᒥ ᐱᓂᕐᓗᒡᔪᐊᕐᓂᖃᕐᓂᖅᐸᑦ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᒍᑦ? ᖃᓄᐃᑦᑐᒥᒃ ᐅᑎᕐᕕᐅᔭᕆᐊᖃᕐᓂᕐᒧᑦ ᐸᕐᓇᐅᑎᖃᖅᐸᑦ?" ᐊᐱᕆᓚᐅᖅᐳᖅ. "ᐃᓅᕗᒍᑦ ᑕᑉᐹᓂ, ᓲᖃᐃᒻᒪ. ᐱᔭᕆᐊᖃᖅᑕᖃᕆᕗᒍᑦᑕᐅᖅ."

ᐃᓱᒪᓂᖅ ᐃᓕᓯᓂᕐᒥ ᑮᓇᐅᔾᔭᒃᓴᓂᕐᒧᑦ ᐱᕈᖅᐸᓪᓕᐊᓂᖓᓂ ᓯᕗᓂᐊᓂ ᐊᕙᑎᐅᔪᒥ ᕿᒪᐃᕗᖅ ᐊᐅᓪᓚᓗᖕᒥ ᓴᐱᓕᖅᓯᒪᓂᖓᓂ.

"ᐃᓄᐃᑦ ᐱᓐᓇᕆᒍᓱᓪᓚᕆᒃᑯᑎᒃ ᓄᓇᕐᔪᐊᖓᓐᓂ, ᐅᓇ (ᐊᕙᒋᔭᕗᑦ) ᓯᕗᓪᓕᐅᔾᔭᐅᑎᑕᐅᓪᓗᐊᖅᐳᖅ. "ᓄᒫᓱᕐᔪᐊᖅᐳᖓ. ᐆᒻᒪᑎᒃᑯᑦ ᕿᐊᕗᖓ ᑐᓴᕌᖓᒪ ᑮᓇᐅᔭᓕᐅᕐᓂᖅ ᐱᒻᒪᕆᐅᓂᖅᓴᐅᓂᖓᓂ," ᐅᖃᓚᐅᖅᐳᖅ. "ᐱᒻᒪᕆᐅᕗᖅ ᑮᓇᐅᔭᓕᐅᕐᓂᕐᒥ ᑭᓯᐊᓂ ᑐᖁᙱᓪᓗᒍ ᓄᓇᕐᔪᐊᓕᒫᕗᑦ ᐱᓕᕆᕐᔪᐊᕐᓂᖃᕋᓱᖕᓂᕐᒧᑦ."

ᓴᕕᑲᑖᖅ, ᖃᖅᑲᖅ ᖃᓄᐃᓕᐅᕐᓂᖃᕈᒪᕗᑦ

ᓄᓇᕗᒻᒥ ᐊᕙᑎᓕᕆᔨᒃᑯᓐᓂ ᒥᓂᔅᑕᖓ ᔫ ᓴᕕᑲᑖᖅ ᐅᖃᓚᐅᖅᐳᖅ ᓄᓇᕘᑉ ᓯᓚᒧᑦ ᐊᓯᔾᔨᖅᐸᓪᓕᐊᓂᐅᔪᒥ ᐱᓕᕆᕝᕕᖓ ᐱᓕᕆᖃᑎᖃᖅᐳᑦ ᖃᐅᔨᓴᖅᑎᐅᔪᓄᑦ ᓄᓇᓕᖕᓂ ᑐᑭᓯᑦᑎᐊᒃᑲᓐᓂᕋᓱᖕᓂᕐᒥ ᐊᒃᑐᐃᓂᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᒻᒪ ᐅᓗᕆᐊᓇᕈᑕᐅᔪᓄᑦ ᓄᓇᕗᒻᒥᐅᓄᑦ.

80 ᑭᑉᐹᕆᒃᑐᓂ ᑭᓛᒥᑐᐸᓗᖕᓂ ᓱᕋᑦᑎᕙᓪᓕᐊᓕᓚᐅᖅᐳᖅ ᕿᙳᐊᓂ ᐊᐅᔪᐃᑦᑐᖓᓂ ᔪᓚᐃ ᓄᙳᐊᓂ ᐊᒻᒪᓗ ᐋᒍᔅᑎᒧᑦ, ᑕᑯᒃᓴᐅᑎᑕᐅᓂᖓᓂ ᐅᕙᓂ ᖃᖓᑦᑕᖅᑎᑕᐅᓯᒪᔪᒥ ᐊᔾᔨᓕᐊᖑᔪᒥ. ᑭᖑᓪᓕᖅᐹᖑᓪᓗᓂ ᐋᖅᑭᐅᒪᑦᑎᐊᖅᑐᒥ ᐊᐅᔪᐃᑦᑑᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᐃᒪᐃᒐᔪᒃᑐᒥ ᓯᓚᐅᑉ ᐆᓇᕐᓂᖓᑕ ᖁᓛᓃᓐᓂᐅᔪᒥ, ᑕᕆᐅᕐᒥ ᐊᓄᕆᓂᐅᔪᓄᑦ ᐊᒻᒪ ᓯᑯᐃᖅᓯᒪᓂᐅᔪᒥ ᐊᒃᑐᐃᓂᖃᖅᐸᓪᓕᐊᕗᑦ ᐅᑭᐅᖅᑕᖅᑐᒥ ᓯᑯᖓᓐᓂ.

"ᖃᐅᔨᒪᕗᒍᑦ ᐅᑭᐅᖅᑕᖅᑐᖅ ᐅᖅᑰᓯᕙᓪᓕᐊᓂᖓᓂ ᐱᖓᓱᐃᖅᓱᓪᓗᐊᖅᑐᒥ ᓱᒃᑲᓂᖅᓴᐅᔪᒥ ᐊᒥᐊᒃᑯᖓᓂ ᓄᓇᕐᔪᐊᓕᒫᒥ, ᐱᑎᑦᑎᔪᒥᒃ ᐊᖏᔪᒻᒪᕆᐊᓗᖕᓂ ᐊᒃᑐᐃᓂᐅᔪᓄᑦ ᓄᓇᓕᑦᑎᓐᓄᑦ, ᐃᒪᑦᑎᓐᓄᑦ ᐊᒻᒪ ᓄᓇᑦᑎᓐᓄᑦ. ᓯᖃᓪᓕᕙᓪᓕᐊᓂᖓᓂ ᐃᓚᖓᓐᓂ ᕿᙳᐊᓂ ᐊᐅᔪᐃᑦᑐᕐᒥ ᑕᑯᒃᓴᐅᓂᐅᕗᖅ ᐅᖅᑰᓂᖅᓴᐅᔪᒥ ᓄᓇᕐᔪᐊᒥ ᐆᓇᕐᓂᖓᓂ ᓂᒡᓚᓱᖕᓂᕐᒥ ᒥᑭᒡᓕᕙᓪᓕᐊᔪᓂ ᓯᕐᒥᓂᑦ, ᑕᕆᐅᑉ ᓯᑯᖓᓐᓂ, ᐊᒻᒪ ᐊᐅᔪᐃᑦᑐᓄᑦ ᑲᑉᐱᐊᓇᖅᑐᓂ ᓱᒃᑲᓂᐅᔪᓂᑦ," ᓴᕕᑲᑖᖅ ᐅᖃᓚᐅᖅᐳᖅ. "ᐱᖏᓐᓂᕋᐃᔪᓐᓇᙱᑉᐳᒍᑦ ᖃᓄᐃᓐᓂᐅᔪᓂ ᑕᐃᒪᐃᑦᑐᓂ ᑕᐃᒪᐃᔾᔮᙱᓐᓂᖓᓂ, ᐊᒻᒪ ᓇᓗᓇᐃᖅᓯᔭᕆᐊᖃᖅᐳᒍᑦ ᑲᓇᑕᒥᐅᑕᓂ ᐊᒻᒪ ᐃᓄᖕᓂ ᓄᓇᕐᔪᐊᓕᒫᒥ ᑐᑭᓯᐅᒪᑦᑎᐊᕐᓂᖏᓐᓂ ᐊᒃᑐᐃᓂᐅᔪᓂ ᑕᑯᕙᒃᑕᑦᑎᓐᓂ ᖃᐅᑕᒫᑦᑎᐊᒥ ᐱᑎᑦᑎᓂᐅᔪᒥ ᐱᓕᕆᙱᓐᓂᐅᔪᒥ ᐅᓇᑕᕐᓂᐅᔪᒥ ᓄᓇᕐᔪᐊᒧᑦ ᓯᓚᒧᑦ ᐊᓯᔾᔨᖅᐸᓪᓕᐊᓂᖓᓄᑦ."

ᓄᓇᕗᒻᒥ ᑲᓇᑕᒥ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᐅᖃᓚᐅᖅᐳᖅ ᕿᙳᐊᓂ ᐊᐅᔪᐃᑦᑐᕐᒥ ᖁᐱᕙᓪᓕᐊᓂᖓᓂ ᑐᓂᓯᓪᓗᐊᖅᐳᖅ "ᑐᐹᖅᓯᓂᐅᔪᒥ ᖃᐃᖁᔨᓂᐅᔪᒥ" ᓄᓇᕐᔪᐊᒧᑦ.

"ᓄᖑᑉᐸᓪᓕᐊᔪᒥ ᐊᐅᔪᐃᑦᑐᕐᔪᐊᕐᓂ ᐅᑭᐅᖅᑕᖅᑐᒥ ᐊᑕᐅᓯᐅᓪᓗᓂ ᑐᑭᓯᓇᓛᑦᑎᐊᒥ ᓇᓗᓇᐃᒃᑯᑕᐅᕗᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᕐᕌᒍᒐᓵᓗᖕᓄᑦ. ᐃᓄᐃᑦ ᐅᑭᐅᖅᑕᖅᑐᓕᒫᒥ ᓴᖅᑭᑎᑦᑎᓯᒪᕗᑦ ᖁᐊᖅᓵᕐᓇᖅᑐᓂ ᑐᓴᖅᑎᑦᑎᓂᐅᔪᓂ ᐊᕐᕌᒍᒐᓴᖕᓄᑦ, ᑭᓯᐊᓂ ᐃᓂᖅᑎᕆᓂᐅᔪᑦ ᑐᖃᑦᑕᖅᐳᑦ ᑐᓵᙱᑦᑐᓄᑦ," ᐅᖃᓚᐅᖅᐳᖅ ᖃᖅᑲᖅ.

"ᐃᓄᖕᓄᑦ ᐅᑭᐅᖅᑕᖅᑐᒥ, (ᐊᐅᒃᐸᓪᓕᐊᔪᒥ) ᓯᑯᒥᒃ ᐊᐅᓪᓛᕐᓂᐅᔪᒥ ᐅᓗᕆᐊᓇᕐᓂᖅᓴᐅᑎᑦᑎᕗᖅ ᐊᒻᒪ ᐃᓅᓯᕆᕙᒃᑕᑦᑎᓐᓂ ᓄᖑᓴᐃᕙᓪᓕᐊᕗᖅ. ᓄᓇᕐᔪᐊᓕᒫᒥ, ᐊᓯᐅᔨᓂᐅᔪᒥ ᐊᐅᔪᐃᑦᑐᕐᔪᐊᓂᑦ ᓱᒃᑲᒃᑎᒋᐊᖅᓯᓂᐊᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᓱᒃᑲᓂᖅᓴᒻᒪᕆᐅᔪᒥ. ᒫᓐᓇᓕᓴᐅᔪᒥ ᐊᓯᐅᔨᓂᐅᔪᒥ ᐊᐅᓱᐃᑦᑐᕐᔪᐊᓂ ᑲᓇᑕᒥ ᑐᐹᖅᓯᓂᐅᔪᒥ ᖃᐃᖁᔨᓂᐅᓪᓗᐊᖅᐳᖅ. ᑭᖑᕙᓗᐊᙱᓚᖅ ᐸᖅᑭᓇᓱᐊᕐᓂᕐᒧᑦ ᐊᕙᑎᑦᑎᓐᓂ, ᑭᓯᐊᓂ ᐱᓕᕆᔭᕆᐊᖃᖅᐳᒍᑦ ᒫᓐᓇᐅᔪᒥ."