Skip to content

'ᐅᒃᐱᕈᓱᙱᓚᖓ ᓄᑕᕋᓛᕋ ᐃᓅᔪᓐᓃᕐᓂᖓᓂ'

ᐆᒻᒪᑎᖓ ᓯᖁᒥᓯᒪᓪᓗᓂ ᐊᑖᑕᐅᔪᖅ ᖁᕐᓗᖅᑑᕐᒥᐅᑕᖅ ᓄᓇᕗᒻᒥ ᒐᕙᒪᒃᑯᓐᓂ ᐃᓯᒪᒃᑲᓐᓂᖁᔨᕗᖅ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᕐᒦᓐᓂᐅᔪᒥ ᑎᓕᐅᕈᑕᐅᔪᓂ ᓄᑕᕋᓛᖓ ᐃᕐᓂᖓ ᑐᖅᑯᐊᓪᓚᓚᐅᖅᑎᓪᓗᒍ ᒪᕐᕉᒃ ᐅᐸᒃᑕᐅᑦᑕᐃᓕᑎᓪᓗᒋᑦ ᔭᓗᓇᐃᕝᒥ ᑐᔪᕐᒥᕕᖕᒥ.

ᔭᐃᓯᓐ ᐊᒡᓕᒍᐃᑦᑑᑉ ᐃᕐᓂᖓ ᔮᒃᓯᓐ ᐃᓅᓕᓴᖅᑕᐅᓕᓚᐅᖅᐳᖅ ᔅᑖᓐᑎᓐ ᓄᓇᑦᓯᐊᕐᒧᑦ ᐋᓐᓂᐊᕕᖓᓂ ᐃᓅᓕᓴᖅᑕᐅᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᒫᔾᔨ ᐱᒋᐊᓕᓵᖅᑎᓪᓗᒍ. ᑕᖅᑭᓕᒫᒥ ᐋᓐᓂᐊᕕᖕᒦᓚᐅᖅᐳᖅ ᑭᖑᓂᐊᒍᑦ.

ᐊᔾᔨᓕᐅᖅᑕᐅᔪᖅ ᔭᐃᓴᓐ ᐊᒡᓕᒍᐃᑦᑐᖅ ᐊᒻᒪ ᐃᕐᓂᖓ ᔮᒃᓯᓐ ᐅᓪᓗᓕᖅᓯᒪᙱᑦᑐᒥ ᕙᐃᔅᐳᒃᑯᑦ ᐊᔾᔨᖁᑎᒥᒃ. ᔮᒃᓯᓐ ᐃᓅᔪᓐᓃᑳᓪᓚᓚᐅᖅᐳᖅ ᒪᕐᕉᔪᒃ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᕐᒦᑎᓪᓗᒋᑦ ᔭᓗᓇᐃᕝᒥ Explorer ᑐᔪᕐᒥᕕᖓᓂ. ᐊᐊᒡᓕᒍᐃᑦᑐᖅ ᓄᓇᕗᒻᒥ ᒐᕙᒪᒃᑯᓐᓂ ᖃᓱᒋᐊᖅᑎᑦᑎᖁᔨᕗᖅ ᕿᒡᓕᖃᖅᑎᑦᑎᔪᒥ ᐊᐅᓪᓛᕐᓂᐅᔪᒥ ᐊᑐᐊᒐᖓᓐᓂ ᓄᕙᒡᔪᐊᕐᓇᖅ−19−ᖃᖅᑎᓪᓗᒍ..

ᐊᒡᓕᒍᐃᑦᑐᖅ ᐊᒻᒪ ᐃᕐᓂᖓ ᑐᕌᖅᑎᑕᐅᓚᐅᖅᐳᑦ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᕐᒦᑦᑕᕆᐊᖃᓚᐅᖅᐳᑦ ᐱᓇᓱᐊᕈᓰᖕᓂ ᒪᕐᕉᖕᓂ ᔭᓗᓇᐃᕝᒥ Explorer ᑐᔪᕐᒥᕕᐊᓂ ᔮᒃᓯᓐ ᐊᓂᑎᑕᐅᒐᒥ ᐋᓐᓂᐊᕕᖕᒥ, ᐅᖃᓚᐅᖅᐳᖅ ᐱᖓᔪᐊᓐᓂ.

ᒪᓕᒃᖢᒍ ᓄᓇᕘᑉ ᓄᕙᒡᔪᐊᕐᓇᖅ–19–ᒧᑦ ᑎᓕᐅᕈᑎᖏᓐᓂ, ᐊᐅᓪᓛᖅᑏᑦ ᐅᑎᖅᐸᓪᓕᐊᔪᓄᑦ ᓄᓇᑦᓯᐊᕐᒧᑦ ᓯᕗᓪᓕᖅᐹᒥ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᕐᒦᑦᑕᕆᐊᖃᖅᐳᑦ ᐱᓇᓱᐊᕈᓰᖕᓂ ᒪᕐᕉᖕᓂ ᐊᑕᐅᓯᐅᔪᒥ ᑎᓴᒪᓂ ᓇᓗᓇᐃᖅᑕᐅᓯᒪᔪᓄᑦ ᓄᓇᓕᖅᐸᐅᔭᖃᕐᕕᖕᓂ – ᔭᓗᓇᐃᕝ, ᐃᐊᑦᒪᓐᑕᓐ, ᐅᐃᓂᐸᐃᒡ ᐅᕝᕙᓘᓐᓃᑦ ᐋᑐᕚᒥ – ᐊᖏᕐᕋᓚᐅᖅᑳᕋᑎᒃ.

ᓇᑉᐸᐸᓗᐊᓂ ᒪᓕᒋᐊᓕᖕᒥ ᐅᐸᒃᑕᐅᑦᑕᐃᓕᒪᓂᐅᔪᒥ ᓄᓇᓕᐅᑉ ᐃᓗᐊᓂ ᑐᔪᕐᒥᕕᖕᒥ, ᐊᒡᓕᒍᐃᑦᑐᖅ ᐅᖃᓚᐅᖅᐳᖅ ᐃᕐᓂᖓᓂ ᐃᓐᓇᖅᑎᑦᑎᓚᐅᖅᐳᖅ. ᐊᒡᓕᒍᐃᑦᑐᖅ ᐃᖅᑯᒻᒪᕋᒥ, ᐃᕐᓂᖓ ᖃᐅᔨᒪᓚᐅᙱᓚᖅ.

ᓰᕖᓰ ᐅᐊᖕᓇᒥ ᓯᕗᓪᓕᕐᒥ ᐅᓂᒃᑳᓚᐅᖅᐳᖅ ᑐᖁᓂᐅᔪᒥ ᐱᓇᓱᐊᕈᓯᐅᑉ ᐱᒋᐊᕐᓂᐸᓗᐊᓂ, ᐅᖃᖅᑎ ᐅᓂᒃᑳᓚᐅᖅᐳᖅ ᐊᒡᓕᒍᐃᑦᑐᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐃᒻᒥᓂᒃ ᐊᒻᒪ ᐃᕐᓂᖓᓂ ᐃᕐᙲᓐᓇᑲᐅᑎᒋ ᐊᓂᑎᑕᐅᓚᐅᖅᑎᓪᓗᒍ ᐋᓐᓂᐊᕕᖕᒥ, ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᑎᑕᐅᙱᓪᓗᑎᒃ ᐊᖓᔪᖅᑳᖃᕐᕕᖕᒥ.

ᐃᓚᒋᐊᖅᓯᒃᑲᓐᓂᓚᐅᖅᐳᖅ ᐅᖃᐅᓯᒃᓴᒥᓂ Yellowknifer–ᒧᑦ.

"ᐊᑲᐅᓇᔭᙱᓚᖅ ᐅᐸᒃᑕᐅᑦᑕᐃᓕᒪᓂᒃᑰᕐᓂᖓᓂ ᐊᖏᕐᕋᓚᐅᖅᑳᕋᑕ," ᐅᖃᓚᐅᖅᐳᖅ ᐊᒡᓕᒍᐃᑦᑐᖅ.
ᑕᒪᐃᑎᒍᑦ, ᐊᒡᓕᒍᐃᑦᑐᖅ ᐅᖃᓚᐅᖅᐳᖅ ᐃᑲᔪᖅᓯᖅᑕᐅᔫᔮᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐅᐸᒃᑕᐅᑦᑕᐃᓕᒪᓂᐅᔪᒥ ᔭᓗᓇᐃᕝᒥ.

ᑭᓯᐊᓂ ᐊᓯᔾᔨᕐᓂᖃᖁᔨᔪᖅ.

ᐊᑖᑕᐅᔪᖅ ᐊᓇᓇᐅᔪᕐᓘᓐᓃᑦ ᕿᒪᒃᑕᐅᓐᓂᕈᑎᒃ ᐊᖓᔪᖅᑳᖃᕐᕕᖕᒥ ᕿᑐᕐᙵᖏᓪᓗ ᐊᔾᔨᐸᓗᐊᓂ ᖃᓄᐃᓐᓂᐅᔪᒥ, ᐊᒡᓕᒍᐃᑦᑐᖅ ᐅᖃᓚᐅᖅᐳᖅ ᒐᕙᒪᒃᑯᑦ ᐊᖏᕐᕋᕈᓐᓇᖅᑎᑦᑎᓪᓗᐊᖅᐳᑦ ᐃᕐᙲᓐᓇᑲᐅᑎᒋ – ᐊᓱᐃᓛᒃ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓕᕐᓗᑎᒃ ᐊᖏᕐᕋᒥ.

ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᐅᔾᔨᓚᐅᖅᐳᖅ ᓰᕖᓰ ᐅᐊᖕᓇᒥ ᔮᒃᓯᓐ ᑐᖁᓂᖓ ᑐᖁᓂᐅᓂᕋᙱᓚᖓ ᒐᕙᒪᒃᑯᓐᓄᑦ ᐸᖅᑭᔭᐅᑎᓪᓗᒍ ᑕᐃᒪᐃᓚᐅᕐᒪᑦ ᔪᓗᓇᐃᕝ ᑐᔪᕐᒥᕕᖓᓂ ᐊᐅᓚᑕᐅᙱᑦᑐᒥ ᒐᕙᒪᒃᑯᓐᓄᑦ.
ᓄᓇᑦᓯᐊᕐᒥ ᑐᖁᖓᔪᓕᕆᔨᒻᒪᕆᖓ ᑳᑎ ᒥᓈᑦ ᓇᓗᓇᐃᖅᓯᓚᐅᖅᐳᖅ ᖃᐅᔨᓴᕐᓂᐅᔪᒥ ᑐᖁᓂᐅᔪᒧᑦ ᐱᓕᕆᐊᖑᕙᓪᓕᐊᓂᖓᓂ, ᑭᓯᐊᓂ ᓄᕙᒡᔪᐊᕐᓇᖅ–19–ᒧᑦ ᐱᔾᔪᑎᖃᙱᓐᓂᖓᓂ.

"ᒪᓕᒃᐳᒍᑦ ᑕᐃᔅᓱᒥᖓᑦᑕᐃᓐᓇᖅ ᐱᓕᕆᓂᐅᔪᒥ ᒪᓕᒃᑕᐅᔪᒥ ᑕᒪᒃᑭᓄᑦ ᑐᖁᓂᐅᔪᓄᑦ ᐃᓄᖕᒥ ᓯᓚᑖᓃᑎᓪᓗᒍ ᓇᖕᒥᓂᖅ ᐊᕕᒃᑐᖅᑕᐅᓯᒪᓂᖓᓐᓂ, ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᓄᓇᒋᔭᐅᔪᒥᓪᓘᓐᓃᑦ," ᐅᖃᓚᐅᖅᐳᖅ ᒥᓈᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᖓᔪᐊᓐᓂ.

"ᑕᐅᑐᒃᖢᒍ ᖃᐅᔨᓴᖅᑕᐅᓂᖓ ᓱᓕ ᐱᓕᕆᐊᖑᓂᖓᓂ, ᐊᒻᒪᓗᑦᑕᐅᖅ ᓇᓗᓇᐃᖅᓯᓂᕐᒧᑦ ᐃᓄᐃᑦ ᑲᐸᙱᓐᓂᖏᓐᓂ ᐱᔾᔪᑎᖃᑦᑎᐊᓗᐊᙱᑦᑐᒧᑦ, ᐊᔭᐅᕆᕗᖓ ᓇᓚᐅᑦᑖᕆᖁᓇᓯ ᑐᖁᓂᐅᔪᒥ ᖃᐅᔨᓴᖅᑕᐅᓂᖓ ᐱᑎᑦᑎᓂᐅᓂᖓᓂ ᒫᓐᓇᐅᔪᒥ ᐋᓐᓂᐊᖃᕐᓇᐅᔪᒥ ᐊᒥᓱᓄᑦ ᐊᐃᑦᑐᐃᓂᐅᔪᒧᑦ."

"ᕿᒥᕐᕈᓂᐊᖅᐳᖓ ᑕᒪᒃᑭᓂ ᐃᓱᒪᒋᔭᐅᓂᐅᔪᓂ ᐊᒻᒪ ᐱᔾᔪᑕᐅᔪᓂ ᐱᓕᕆᐊᖑᔪᒥ ᐃᓚᖃᖅᑐᒥ ᐃᑲᔪᖅᓱᐃᓂᐅᔪᓂ ᐃᓚᖏᑦ ᐱᓚᐅᕐᓂᖏᓐᓂ ᑕᐃᑲᓂ ᒪᓕᒋᐊᓕᖕᒥ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᐅᔪᒥ ᐊᑯᓂᐅᔭᕆᐊᖃᕐᓂᖓᓂ," ᐃᓚᒋᐊᖅᓯᓚᐅᖅᐳᖅ.
ᒥᓈᑦ ᐅᖃᓚᐅᖅᐳᖅ ᖃᐅᔨᓴᖅᑕᐅᓂᖓᓂ ᑐᖁᖓᔪᒥ ᐱᓚᒃᑐᐃᓂᐅᔪᒥ ᑎᓕᐅᕈᑕᐅᓯᒪᕗᖅ.

ᐊᒡᓕᒍᐃᑦᑐᖅ ᐅᖃᓚᐅᖅᐳᖅ ᑖᓐᓇ ᐱᓕᕆᐊᖑᓂᐊᕐᓂᖓᓂ ᐃᐊᑦᒪᓐᑕᓐᒥ.

"ᐅᑕᖅᑭᔪᑦ ᕿᒥᕐᕈᓂᐅᔪᒥ ᐅᓂᒃᑳᓕᐊᖑᔪᒥ ᒫᓐᓇᐅᔪᒥ," ᐅᖃᓚᐅᖅᐳᖅ.

ᐆᒻᒪᑎᖓᓂ ᐋᓐᓂᐊᖅᑐᒧᑦ ᐊᑖᑕᐅᔪᖅ, ᐊᖏᕐᕋᕈᓐᓇᖅᑎᑕᐅᓚᐅᖅᑐᒥ ᕿᑎᐊᓂ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᕐᒦᑎᓪᓗᒋᑦ ᑎᓕᐅᕈᑕᐅᔪᒥ, ᐅᑎᖅᓯᒪᓕᖅᐳᖅ ᖁᕐᓗᖅᑑᒥ, ᒪᒥᐊᕝᕕᐅᕙᒃᖢᓂ ᐊᒻᒪ ᐅᖃᐅᓯᒃᓴᓂ ᐃᑲᔪᖅᓱᐃᓂᕐᒧᑦ ᐱᖃᓐᓇᕆᔭᖏᓐᓂ ᐊᒻᒪ ᐃᓚᖏᓐᓂ ᕙᐃᔅᐳᒃᑯᑎᒍᑦ.

ᐊᒡᓕᒍᐃᑦᑐᖅ ᐅᖃᓚᐅᖅᐳᖅ ᐱᔭᕇᕋᓱᐊᖅᐸᖓ ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᐅᔪᒥ ᐊᖏᕐᕋᖓᓂ. ᓄᓇᖃᖅᑎᐅᔪᓂ ᐊᐱᕆᓯᒪᕗᖅ ᐳᓚᕋᖁᔨᙱᑲᓚᐅᕐᓂᕐᒧᑦ, ᑐᒃᓯᕋᖅᐸᓵᖅᖢᓂ ᖃᕋᓴᐅᔭᑎᒍᑦ ᐅᑎᓚᐅᖅᑳᕋᓂ ᓄᓇᕗᒻᒧᑦ.
"ᒪᓕᒃᐳᖓ ᐱᓕᕆᔭᕆᐊᓕᖕᒥ; ᐳᓛᕆᐊᖅᑕᐅᑦᑕᐃᓕᒪᓂᕐᒧᑦ."

ᒫᓐᓇᐅᔪᒥ, ᐊᒡᓕᒍᐃᑦᑐᖅ ᕙᐃᔅᐳᒃᑰᑲᑕᒃᐳᖅ ᐊᔾᔨᙳᐊᓂ ᓴᖅᑭᔮᖅᑎᑦᑎᑲᑕᒃᖢᓂ ᓇᒡᓕᒋᔭᖓᓂ ᐃᕐᓂᖓᓂ ᔮᒃᓯᓐᒥ.
"ᐊᖏᕐᕋᖅᐳᖓ ᑭᓯᐊᓂ ᓱᓕ ᐅᒃᐱᕈᓱᙱᓚᖓ ᓄᑕᕋᓛᕋ ᐱᑕᖃᕈᓐᓃᕐᓂᖓᓂ," ᑎᑎᕋᓚᐅᖅᐳᖅ.