ᑕᖅᑭᑕᒫᑦ ᖃᓄᐃᓕᐅᖅᑎᑕᐅᖃᑦᑕᖅᐳᑦ ᐃᓕᓐᓂᐊᖅᑎᑦ ᐱᕙᓪᓕᐊᑎᑕᐅᑉᓗᑎᒃ ᖃᓄᐃᓕᐅᖅᑎᑕᐅᑉᓗᑎᒡᓗ ᐅᑭᐅᖁᖅᑐᓂᖅᓴᐃᑦ ᒪᒃᑯᖕᓂᖅᓴᐃᓪᓗ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ.
ᐃᓕᓐᓂᐊᕐᕕᖕᒥ ᐊᖓᔪᖄᖓᑦ ᔪᓕᐊ ᒪᒃᐴᓴᓐ ᐅᖃᓚᐅᖅᐳᖅ ᑕᖅᑭᑕᒫᑦ ᖃᓄᐃᓕᐅᕈᑕᐅᓂᐊᖅᑐᓂᒃ ᐋᖅᑭᒃᓱᐃᓚᐅᕋᒥ ᐊᕐᕌᒎᓯᒪᓕᖅᑐᓂ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᖃᓄᐃᓕᐅᕈᑕᐅᖃᑦᑕᖅᑐᒃᓴᓂᒃ ᐊᕐᕌᒍᓗᒃᑖᖅ.
ᐅᖃᓚᐅᖅᐳᖅ ᖃᓄᐃᓕᐅᕈᑎᒃᓴᖓ ᑕᐅᒍᖅᑕᐅᒍᓯᖃᖃᑦᑕᖏᑦᑐᖅ, ᑭᓯᐊᓂ ᐱᓕᕆᔨᑦ ᐃᓕᓐᓂᐊᕐᕕᖕᒥ ᖃᓄᐃᓕᐅᕈᑎᒃᓴᓂᒃ ᐱᓕᕆᐊᖃᖃᑦᑕᖅᐳᑦ, ᐃᓛᓐᓂᒃᑯᓪᓗ ᒪᕐᕉᖕᓂᒃ ᐱᓕᕆᖃᑎᒌᒋᐅᖅᓴᕐᓂᕐᒧᑦ ᐱᔾᔪᑎᖃᖅᖢᑎᒃ,” ᐅᖃᓚᐅᖅᐳᖅ ᒪᒃᐴᓴᓐ.
“ᑕᒪᒃᑯᓂᖓ ᐱᓕᕆᐊᖃᖅᑎᓚᐅᖅᐸᒃᑲ ᓱᓇᑐᐃᓐᓇᕐᓂᒃ ᖃᐅᔨᓴᕈᑎᓂᒃ, ᓴᓇᒪᔪᓕᕆᓂᖅ ᐊᒻᒪ ᖃᕆᑕᐅᔭᓕᕆᓂᖅ (ᐊᑎᖃᖅᖢᓂ ᖃᑉᓗᓈᑎᑐᑦ SET Challenge) ᐊᒻᒪ ᐃᓵᒃᓯᒪᓂᖅ ᐃᓅᓯᕐᒧᑦ, ᐊᓐᓄᕌᕐᓗᒃᓯᒪᔪᓄᑦ ᖃᓄᐃᓕᐅᕈᑎᖃᕐᓂᖅ, ᐅᑉᓛᕈᒥᑕᓕᐅᕐᓂᖅ, ᑎᐅᕆ ᕚᒃᔅ ᐃᖅᑲᐅᒪᑉᓗᒍ ᐅᓪᓚᒃᑎᑎᓂᖅ, ᓄᓇᒥ ᐊᐅᓪᓚᖅᓯᒪᓂᖅ, ᐃᓐᓇᑐᖃᓂᒃ ᐳᓚᕋᕐᓂᖅ ᖁᕕᐊᓱᒍᑎᖃᕐᓂᖅ ᐃᓕᓐᓂᐊᕐᓂᕐᒥᒃ ᐱᓇᓱᐊᕈᓯᒥ ᓄᓇᕗᒥ.
“ᐋᖅᑭᒃᓱᐃᒐᓱᐊᖃᑦᑕᖅᐳᒍᑦ ᖃᓄᐃᓕᐅᕈᑕᐅᓂᐊᖅᑐᓂᒃ ᖁᕕᐊᓱᒃᑎᑕᐅᔪᓐᓇᖁᑉᓗᒋᑦ ᐃᓕᓐᓂᐊᖅᑎᑦ ᐃᓕᓐᓂᐊᕈᑎᖃᕈᓐᓇᖁᑉᓗᒋᓪᓗ.”
ᒪᒃᐴᓴᓐ ᐅᖃᓚᐅᖅᐳᖅ ᑕᐃᒪ ᖃᓄᐃᓕᐅᕈᑎᖃᖅᑎᑦᓯᖃᑦᑕᖅᖢᑎᒃ ᐃᓕᓐᓂᐊᖅᑎᑦ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᐆᒻᒪᕆᖕᓂᖅᓴᐅᓕᖃᑦᑕᖅᐳᑦ.
“ᓯᑕᒻᒥᕐᒥ ᑕᐃᒪᓐᓇᐃᓕᐅᖅᑎᑦᓯᖃᑦᑕᖅᐳᒍᑦ ᑕᓪᓕᒥᕐᒥᓘᓐᓃᑦ ᐅᓐᓄᓴᒃᑯᑦ, ᓄᑕᖃᑦ ᑕᖃᐃᖅᓯᖅᑎᑕᐅᓚᐅᐱᓪᓚᖁᑉᓗᒋᑦ ᐱᓕᕆᓗᐊᓚᐅᖅᖢᑎᒃ ᖃᓄᑐᐃᓐᓇᖅ ᐃᓕᓐᓂᐊᕐᕕᖕᒥ,” ᐅᖃᓚᐅᖅᐳᖅ.
“ᑕᐃᒪᓐᓇᐃᓕᐅᖅᑎᑦᖢᒋᓪᓗ ᐃᓕᓐᓂᐊᖅᑎᑕᐅᕗᑦ ᐱᓕᕆᖃᑎᖃᕆᐊᒃᓴᖅ ᐃᓕᓐᓂᐊᖃᑎᒥᓂᒃ ᑕᐃᒪᓐᓇ ᒪᑭᓪᓗᑎᒃ ᐃᖃᐃᓕᓴᕐᓗᑎᒡᓗ ᐱᓕᕆᖃᑎᒌᒡᓗᑎᒃ.
“ᑕᐃᒪᓐᓇ ᐆᒻᒪᕆᒃᓯᕚᓪᓕᖃᑦᑕᖅᐳᑦ ᖃᓄᐃᓕᐅᕈᒪᓕᖅᖢᑎᒡᓗ, ᐱᓗᐊᖅᑐᒥᒃ ᐊᑐᖃᑦᑕᖅᑕᑉᑎᓐᓂᒃ ᐊᕐᕌᒍᑕᒫᑦ, ᓂᕆᐅᒋᐅᕙᒃᖢᑎᒡᓗ ᓄᑕᖃᓄᑦ.”
ᒪᒃᐴᓴᓐ ᐅᖃᓚᐅᖅᐳᖅ ᖃᓄᐃᓕᐅᕈᑕᐅᕙᒃᑐᑦ ᐅᑭᐅᖁᖅᑐᓂᖅᓴᓄᑦ ᒪᒃᑯᖕᓂᖅᓴᓄᓪᓗ ᑲᑎᑦᓯᒍᑕᐅᖃᑦᑕᖅᐳᖅ ᐃᓕᓐᓂᐊᕐᕕᖕᒥ.
“ᑕᐃᒪᓐᓇ ᐅᑭᐅᖁᖅᑐᓂᖅᓴᐃᑦ ᓯᕗᓕᖅᑎᐅᓂᕐᒧᑦ ᐱᓕᕆᑎᑕᐅᖃᑦᑕᖅᖢᑎᒡᓗ,” ᐅᖃᓚᐅᖅᐳᖅ “ᐊᒻᒪ ᒪᒃᑯᖕᓂᖅᓴᐃᑦ ᐱᑦᓯᐊᕐᓂᖅᓴᐅᓕᖅᐸᒃᖢᑎᒃ, ᑕᐅᑐᒃᖢᑎᒃ ᐅᑭᐅᖁᖅᑐᓂᖅᓴᓂᒃ ᐆᒃᑑᑎᖃᖅᖢᑎᒃ ᐃᓚᖏᓪᓗ ᓂᕆᐅᖃᑦᑕᖅᖢᑎᒃ ᐊᕐᕌᒍᒥ ᓇᓪᓕᐊᓂᑭᐊᖅ ᓂᕈᐊᖅᑕᐅᓂᕐᒧᑦ ᓯᕗᓕᖅᑎᒋᔭᐅᓂᐊᕐᓗᓂ.”
“ᖁᕕᐊᓇᑦᓯᐊᖅᐳᖅ ᐃᓕᓐᓂᐊᖅᑎᑦ ᐃᓕᓐᓂᐊᕐᕕᑉᑎᓐᓂ ᐃᑲᔪᒃᑕᐅᖕᒪᑕ ᐃᑲᔪᕈᒪᒃᑲᐅᑉᓗᑎᒡᓗ ᖃᓄᑐᐃᓐᓇᖅ, ᐊᒡᔭᖅᑐᐃᓗᑎᒡᓘᓐᓃᑦ ᐱᖁᑎᓂᒃ ᓅᑕᐅᒋᐊᓕᖕᓂᒃ, ᒪᒃᑯᖕᓂᖅᓴᓂᒃ ᒥᐊᓂᖅᓯᓂᖅ, ᐃᑲᔪᕐᓂᖅ ᐃᓕᓐᓂᐊᖃᑎᒥᖕᓂᒃ ᐅᑭᐅᖃᑎᒥᖕᓂᒃ ᐱᓕᕆᐊᖏᓐᓂᒃ ᐊᒃᓱᕈᕈᑎᖃᖅᑎᓪᓗᒋᑦ ᐃᓕᓐᓂᐊᕈᑎᓂᒃ.”