ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᑕ ᖁᙱᐊᖅᑎᐅᔪᓄᑦ ᐊᕐᕕᐊᓂᒪᑐᓯᓂᐊᖅᐳᑦ ᐃᓕᓐᓂᐊᕐᕕᐅᑉ ᐊᕐᕌᒍᖓᓂ ᐱᙳᐊᕐᓗᑎᒃ ᑲᒪᓇᖅᑐᒥ ᐃᓐᓇᕈᖅᐸᓪᓕᐊᓂᖓᓂ ᐅᓂᒃᑳᖅᑐᐊᒥ ᐃᓄᖕᒥ ᐊᒻᒪ ᓯᕿᓂᕐᒥ ᔫᓂᒥ.
ᐱᙳᐊᖅᑕᐅᓂᕐᒧᑦ ᑐᑭᒧᐊᒃᑎᑦᑎᔨᖓ ᐊᒻᒪ ᖁᙱᐊᖅᑎᐅᔪᓄᑦ ᐃᓕᓴᐃᔨ ᒍᐊᑦ ᐱᓛᑦ ᐅᖃᓚᐅᖅᐳᖅ ᐊᖏᔪᒻᒪᕆᐊᓘᓗᓂ ᓴᖅᑭᑎᑦᑎᓂᐅᓂᐊᖅᐳᖅ.
“ᑕᐃᒪᑐᖅ, ᐊᖏᓛᖑᓂᐊᖅᐳᖅ ᐊᒻᒪᓗ ᐱᓕᕆᑦᑎᐊᕐᓂᖅᐸᐅᓗᓂ ᑕᑯᒃᓴᐅᑎᑦᑎᓂᐅᔪᒥ,” ᐅᖃᓚᐅᖅᐳᖅ. “ᓇᓗᓇᒐᓚᒃᖢᓂ ᖁᙱᐊᖅᑕᐅᓂᐅᔪᒥ ᐋᖅᑭᒃᓱᕆᐊᒃᓴᖅ, ᐊᒻᒪ ᐅᖃᕈᓐᓇᖅᐳᖓ ᖁᓱᕈᔪᒃᐳᖓ.”
ᑎᑎᕋᖅᑕᐅᓂᑰᓪᓗᓂ ᔫᒪᓂᒥᐅᑕᒥ ᐱᙳᐊᖅᑕᐅᓂᕐᓄᑦ ᑎᑎᕋᖅᑎᒧᑦ ᕼᐊᓄᕆ ᐸᐃᓯᐅᓪᒧᑦ, ᐅᓂᒃᑳᖑᔪᖅ ᑐᙵᕕᖃᖅᐳᖅ ᐃᓅᔪᓂ ᐃᓄᐃᑦ ᐅᓂᒃᑲᐅᓯᖏᓐᓂ ᐊᒻᒪ ᒪᓕᖕᓂᖃᖅᐳᖅ ᓄᑲᑉᐱᐊᕐᒥ ᐊᑎᓕᖕᒥ ᐃᓄᖕᒥ ᐱᓕᕆᕙᓪᓕᐊᓇᓱᐊᖅᑎᓪᓗᒍ ᓴᐳᔾᔨᓂᕐᒧᑦ ᐃᓄᖏᓐᓂᑦ ᐊᒻᒪ ᐃᓐᓇᙳᕐᓂᖓᓄᑦ. ᐅᓂᒃᑳᖓ ᒪᓕᒃᐳᖅ ᓄᓇᕐᔪᐊᒥ ᐊᑐᖅᑕᐅᓂᑯᓂ ᐱᕈᖅᓴᕙᓪᓕᐊᓂᕐᒧᑦ ᐊᒻᒪ ᐊᖏᖃᑎᖃᕐᓂᖓᓂ ᐃᓅᓯᕐᒥ ᐊᒻᒪ ᑐᖁᓂᐅᔪᒥ ᐃᓄᒃ ᐊᑖᑕᖓᓗ ᐊᖑᓇᓱᒋᐊᖅᑎᓪᓗᒋᑦ ᓂᒡᓚᓱᒃᑐᒥ ᐅᑭᐅᒃᑯᑦ ᓯᓚᐅᔪᒥ.
ᐃᓚᒌᑦ ᐊᒻᒪ ᓄᓇᖅᑲᑎᒌᑦ ᐱᕐᓕᓕᕐᒪᑕ ᐊᒻᒪ ᐃᓄᒃ ᐅᒃᐱᕈᓱᑦᑎᐊᖅᐳᖅ ᐱᔭᕆᐊᖃᕐᓂᖓᓂ ᓯᕿᓂᕐᒥ ᐊᒻᒪ ᐅᑎᖅᑎᓪᓗᓂᐅᒃ ᑕᒪᕐᒥᓕᒫᖅ ᐆᒪᔪᓐᓇᖁᓪᓗᒋᑦ. ᓵᙵᕗᖅ ᐅᓗᕆᐊᓇᖅᑐᕐᔪᐊᕌᓗᖕᓂ, ᐊᓯᐅᔨᓂᐅᔪᒥ ᐊᒻᒪ ᑭᓱᖃᙱᓐᓂᐅᔪᒥ ᑭᓯᐊᓂ ᐃᑲᔪᖅᑕᐅᕗᖅ ᐃᖏᕐᕋᓂᕆᔭᖓᓂ ᖃᔅᓯᒐᓚᖕᓂ ᑕᕐᓂᓂᑦ ᐃᓚᖃᖅᑐᒥ ᐊᓄᕆ, ᑕᖅᑭᖅ ᐊᒻᒪ ᑕᕆᐅᕐᒥ. ᐹᖅᓯᒋᕗᖅ ᖃᔅᓯᒐᓚᖕᓂ ᐆᒪᔪᓂᑦ ᐃᒻᒥᓄᑦ ᐅᖃᓪᓚᓲᓂᑦ ᓲᕐᓗ ᐅᒥᖕᒪᒃ, ᑐᒃᑐ ᐊᒻᒪ ᑎᕆᒐᓂᐊᖅ.
ᐃᓄᒃ ᓄᓱᒃᑕᐅᕗᖅ ᑕᕆᐅᑉ ᐊᑖᓄᑦ ᓇᑦᑎᕐᓄᑦ ᐃᖏᕐᕋᓂᕆᔭᖓᓂ. ᓇᑦᑏᑦ ᐅᐸᒃᑎᑦᑎᕗᑦ ᑕᕆᐅᕐᒥ ᑲᑉᐱᐊᓇᖅᑐᐊᓗᖕᒧᑦ ᒪᓪᓕᐅᑉ ᐊᑖᓂ, ᑕᐃᑲᓂ ᐹᖅᓯᒋᓪᓗᓂ ᓄᓕᐊᔪᒃ.
“(ᐸᐃᓱᓪ) ᐃᓅᙱᑦᑐᖅ ᐅᕝᕙᓘᓐᓃᑦ ᓄᓇᖃᖅᑳᖅᓯᒪᓇᓂ ᑎᑎᕋᖅᑎᐅᓪᓗᓂ – ᑭᓯᐊᓂ ᖃᐅᔨᓴᖅᓯᒪᔪᖅ ᐃᓄᐃᑦ ᖃᓄᐃᑉᐸᓚᐅᖅᓯᒪᓂᖏᓐᓂ ᐊᒻᒪ ᐅᓂᒃᑳᖅᑐᐊᓂ,” ᐅᖃᓚᐅᖅᐳᖅ ᐱᓛᑦ.
ᖁᙱᐊᖅᑕᐅᓂᖃᕐᓂᐊᖅᐳᖅ ᓯᕗᓪᓕᖅᐹᒥ ᐱᓇᓱᐊᕈᓯᐅᔪᒥ ᔫᓂᒥ, ᐃᒻᒪᖄ ᔫᓂ 5 ᐊᒻᒪ 6−ᒥ, ᑭᓯᐊᓂ ᐅᓪᓗᓪᓚᕆᖏᑦ ᐃᓕᓐᓂᐊᕐᕕᖕᒥ ᖁᙱᐊᖅᑕᐅᓂᐅᔪᓄᑦ ᐊᒻᒪ ᐃᓄᓕᒫᓄᑦ ᐅᖃᐅᓯᐅᓪᓚᕆᒃᓯᒪᙱᓚᑦ ᓱᓕ.
“ᑮᓇᑉᐸᓂᑦ ᐊᑐᕐᓂᐊᖅᐳᒍᑦ ᐊᒻᒪ ᑕᕐᕋᓄᑦ ᑕᑯᒃᓴᐅᑎᑦᑎᓂᐊᖅᐳᒍᑦ ᖁᙱᐊᖅᑕᐅᓂᐅᔪᒥ, ᑕᐃᒪᓐᓇ ᑎᑎᕋᐅᔭᕐᓂᕐᒧᑦ ᐃᓕᓐᓂᐊᕐᕕᐊᕈᓯᐅᔪᑦ ᐱᓕᕆᓯᒪᕐᔪᐊᖅᐳᑦ ᑮᓇᑉᐸᓕᐅᕐᓂᕐᒥᑦ ᖁᙱᐊᖅᑕᐅᓂᐅᓂᐊᖅᑐᒧᑦ,” ᐅᖃᓚᐅᖅᐳᖅ ᐱᓛᑦ. “ᑎᑕᒃᑎᓄᑦ ᑲᑎᙵᓂᐅᔪᑦ ᐱᓕᕆᓇᓱᖕᓂᐊᖅᐳᑦ ᑕᒪᒃᑭᓂ ᑐᓄᐊᓂ ᑐᓴᕐᓈᕐᓂᐅᔪᓂᑦ, ᐊᒻᒪᓗ ᐊᔾᔨᒌᙱᕈᓘᔭᖅᑐᓂ ᓂᐱᓂᑦ ᐋᖅᑭᒃᓱᖅᑕᐅᓯᒪᔪᓂ ᓲᕐᓗ ᐊᒪᕈᕐᓂ ᐊᒻᒪ ᕿᒻᒥᓂ ᒧᒡᒍᓛᖅᑐᓂᑦ, ᐊᓄᕆᕙᓗᒃᑐᒥ ᐊᒻᒪ ᑕᐃᒪᐃᑦᑐᕈᓘᔭᕐᓂᑦ.”
ᐱᓛᑦ ᐅᖃᓚᐅᖅᐳᖅ ᓂᐱᖃᖅᑎᑦᑎᓂᐅᔪᒥ ᓇᑎᖓᓐᓂ ᓴᖅᑭᑎᑦᑎᓂᐅᔪᒥ ᐊᒃᓱᕈᕐᓇᕐᓂᐊᖅᐳᖅ ᑭᓯᐊᓂ ᐅᒃᐱᕈᓱᒃᐳᖅ ᑐᓴᕐᓈᕐᓂᕐᒧᑦ ᑲᑎᙵᓂᐅᔪᑦ ᐸᕐᓇᒃᓯᒪᓂᐊᕐᓂᖏᓐᓂ.
“ᑭᓱᕈᓘᔮᓗᖕᓂ ᑲᑎᑎᕈᓘᔭᕆᐊᖃᖅᐳᑦ ᐊᑕᐅᑦᑎᒃᑯᑦ,” ᐅᖃᓚᐅᖅᐳᖅ. “ᖃᐅᔨᒪᑦᑎᐊᖅᑐᖓ ᐃᓱᒪᓐᓂ ᐱᔭᕆᑐᔪᑦ ᑭᓱᑐᐃᓐᓇᐃᑦ ᐃᓕᓯᒪᑦᑎᐊᕐᓂᖏᓐᓂ ᐊᖏᓛᖑᔪᒥ ᐊᒃᓱᕈᕐᓇᕐᓂᐅᓂᐊᖅᐳᖅ ᐱᔪᓐᓇᖅᓯᑎᑦᑎᓂᕐᒧᑦ ᑭᒡᓕᐅᔪᒥ ᐅᐱᒋᑦᑎᐊᕐᓂᐊᖅᑕᑦᑎᓐᓂ.”
ᒪᔪᖅᐸᓪᓕᐊᔪᖅ ᑭᕙᓪᓕᕐᒥ ᐊᔪᙱᑦᑐᐊᓗᒃ ᓯᐊᕈᓪ ᓂᑉᒍᐊᕐᓯ ᐱᙳᐊᕐᓂᐊᖅᐳᖅ ᖁᑦᑎᓛᖓᓂ ᐱᙳᐊᖅᑎᐅᓂᕐᒧᑦ ᐃᓄᖕᒥ, ᐄᑕᑦ ᐃᓴᒃᑭᐊᖅ ᓄᓕᐊᔫᓂᐊᖅᖢᓂ, ᑕᕆᐅᕐᒥ ᐊᒻᒪ ᐃᒪᕐᒥᐅᑕᓄᑦ ᐳᐃᔨᓂᑦ ᒎᑎᒋᔭᖅ, ᐊᒻᒪ ᐋᓐᑎ ᐃᕙᓗᐊᕐᔪᒃ ᐱᙳᐊᕐᓂᐊᖅᐳᖅ ᐃᓅᑉ ᐊᑖᑕᖓᓂ.
ᐃᓐᓄᓴᕐ ᐃᓴᒃᑭᐊᖅ ᐅᑎᕐᓂᐊᖅᐳᖅ ᐊᕐᕕᐊᓄᑦ ᐱᓕᕆᐊᖑᔪᓂ ᐃᓕᓐᓂᐊᕐᕕᖕᒥ ᑲᖏᖅᖠᓂᕐᒥ ᐊᒻᒪ ᐱᙳᐊᕐᓂᐊᖅᖢᓂ ᑕᕐᓂᐅᔪᒥ ᓯᑯᒥᑦ, ᔭᔅᑕᓐ ᓱᓗᒃ ᐊᖏᕐᕋᐅᓂᐊᖅᖢᓂ ᓲ ᓴᐃᓐᑦ ᒧᕇ, ᐋᓐᑎᐊᕆᐅᒥ ᐱᙳᐊᕐᓂᐊᖅᖢᓂ ᑕᕆᐅᕐᒥ ᑲᑉᐱᐊᓇᖅᑐᐊᓗᖕᒥ.