ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ – ᓱᓯ ᐊᒻᒪᓗ ᑕᐃᕕᑎ ᕿᑎᖅᖠᖅ

60 ᐅᑭᐅᑦ ᖄᖏᖅᓯᒪᑐᐃᓐᓇᖅᑐᑦ ᐃᓄᐃᑦ ᓄᓇᑖᖅᐸᓪᓕᐊᓕᓚᐅᖅᑎᓪᓗᒋᑦ ᑎᑭᕋᕐᔪᐊᓂ − ᒫᓐᓇᓵᖑᓂᖓᓄᑦ ᐃᓚᖏᑦ ᑎᑭᕋᕐᔪᐊᕐᒥᐅᑕᐅᔪᑦ ᑎᑭᕋᕐᔪᐊᕐᒥᐅᑕᐅᖅᑳᓚᐅᖅᓯᒪᔪᑦ ᐃᓅᔪᑦ ᓱᓕ ᐅᖃᐅᓯᖃᕈᓐᓇᖅᖢᑎᒃ ᖃᓄᖅ ᑎᑭᕋᕐᔪᐊᖅ ᐱᒋᐊᖅᑳᓚᐅᕐᓂᖓᓄᑦ. ᓄᓇᓕᐅᔪᖅ ᐃᓚᐅᖃᑕᐅᔪᖅ ᖃᑉᓯᑲᓪᓚᖕᓂᒃ ᓄᓇᓕᖕᓂᒃ ᒐᕙᒪᑐᖃᒃᑯᑦ ᓄᓇᙳᖅᑎᓚᐅᖅᑕᖏᓐᓂᒃ ᐃᓄᐃᑦ ᓅᑎᑕᐅᑉᓗᑎᒃ ᐱᒋᐊᖅᖢᒍ 1920-ᖏᓐᓂᒃ.

ᐱᒋᐊᕈᑎᖓ ᐊᒃᓱᕈᕐᓇᓚᐅᕋᓗᐊᖅᑎᓪᓗᒍ, ᐅᑉᓗᒥᐅᔪᖅ ᑎᑭᕋᕐᔪᐊᕐᒥᐅᑦ ᐃᓅᖃᑎᒌᑦᑎᐊᖅᑐᑦ ᖃᐅᔨᒪᔭᐅᑦᑎᐊᖅᑐᓪᓗ Hᐊᑭᒃᑲᐅᓂᖏᓐᓄᑦ ᐅᖓᓯᒃᑐᓄᑦ ᓄᓇᓕᖕᓄᑦ ᓯᑭᑑᒃᑯᑦ ᐃᖏᕐᕋᓲᑦ Hᐊᑭᒋᐊᖅᑐᖅᖢᑎᒃ. ᖃᑉᓰᓐᓇᐅᓂᖅᐹᖑᔪᓪᓗ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᓂᒃ ᓄᓇᕗᒥ.

ᕕᕗᐊᕆ 2019-ᒥ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᑎᑎᕋᖅᑎᖓ ᑯᑎ ᐸᓐᑐᕐ ᐊᒻᒪᓗ ᓱᓯ ᓇᐸᔪᖅ−ᓱᐊᑦ ᑎᑭᕋᕐᔪᐊᓕᐊᓚᐅᖅᑑᒃ ᑎᑎᕋᕆᐊᖅᑐᖅᖢᑎᒃ ᐅᓂᑉᑳᖅᑐᐊᓂᒃ ᐊᕐᕕᓂᓕᖕᓂᒃ ᓄᓇᖅᑲᑎᒌᒃᑐᓂᙶᖅᑐᓂᒃ. ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᓴᖅᑭᑎᑦᑎᓂᐊᖅᑐᒍᑦ ᑎᑎᕋᐅᓯᕆᓚᐅᖅᑕᑉᑎᓐᓂᒃ, ᐃᓚᐅᖃᑕᐅᑉᓗᒋᑦ ᒪᕐᕈᒃ ᓄᓇᖃᖅᑳᓚᐅᖅᑑᒃ ᐅᓂᑉᑳᖅᑐᐊᖏᑦ, ᐱᖃᑎᖓ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᖅ ᐊᕐᕌᓂ.

ᐅᑯᐊ ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ

ᑐᓴᒐᒃᓴᓕᕆᔨᐅᑉ ᐅᖃᐅᓯᖓ: ᑖᑉᓱᒪ ᐅᓂᑉᑳᖅᑐᐊᑉ ᐊᔾᔨᖓ ᓴᖅᑭᓚᐅᖅᑐᖅ ᐊᐅᔭᒃᑯᑦ 2019-ᒥ ᐅᖃᓕᒫᒐᒃᑯᑦ Walrus-ᑯᑦ. ᑕᑯᓂᐊᖅᐸᐃᑦ ᐱᓇᓱᐊᕈᓯᐅᓕᕐᒥᒃᐸᑦ ᑐᓴᒐᒃᓴᖅ ᐱᖓᔪᖓ ᐅᓂᑉᑳᖅᑐᐊᑉ ᐃᓚᖓ.

ᓱᓯ ᐊᒻᒪᓗ ᑕᐃᕕᑎ ᕿᑎᖅᖠᖅ

ᓱᓯ: ᐱᕈᖅᓴᓚᐅᖅᑐᖓ ᖃᐅᔨᒪᑉᓗᖓ ᐊᑎᕋ ᐊᐅᐱᓚᑦᑐᙳᐊᖑᖕᒪᑦ - ᑭᓯᐊᓂ ᓇᐃᓪᓕᒋᐊᖅᓯᒪᑉᓗᒍ ᐊᐅᐸᐅᑉᓗᖓ. ᑐᑭᖓ ᐊᐅᐸᓗᒃᑐᖅ ᐱᕈᖅᓯᐊᖅ. ᐊᑎᕋ ᐊᓈᓇᒪ ᐊᕐᓇᖃᑎᖓᑕ ᐊᓂᖓ, ᐊᐅᐱᓚᑦᑐᙳᐊᖅ.

Garry Lake-ᒥᙶᖅᓯᒪᔪᒍᑦ, ᖃᒪᓂ’ᑐᐊᑉ ᐅᐊᖕᓇᖓᓂᒃ, Back River ᖃᓂᒋᔭᖓᓂᒃ. ᑕᐃᑉᓱᒪᓂ 1957-ᒥ, 1958-ᒥ, ᐃᓄᐃᑦ ᐱᕐᓕᕋᓚᐅᕐᒪᑕ ᑕᐅᕙᓂ. ᐊᓈᓇᒐ ᐅᖃᓚᐅᖅᓯᒪᔪᖅ ᒪᕐᕈᒃ ᐅᑭᐅᑦ ᑐᖔᓂ ᑐᒃᑐᖃᕈᓐᓃᓚᐅᕐᒪᓪᓘᓐᓃᑦ. ᐃᖃᓗᒐᓱᖕᓂᕐᓘᓐᓃᑦ ᐊᔪᕐᓇᖅᓯᓚᐅᖅᑐᖅ ᐅᕙᑉᑎᓐᓄᑦ. ᐊᖓᔪᖅᑳᒃᑲ ᖃᐅᔨᒪᓚᐅᖅᑐᑦ ᐃᓄᐃᑦ ᑐᖁᕋᕐᓂᖏᓐᓄᑦ, ᐊᒻᒪᓗ ᐱᒻᒪᕆᐊᓘᓚᐅᖅᑐᖅ ᐊᑖᑕᒻᓄᑦ ᐊᖓᔪᒥᓂᒃ ᕿᓂᕆᐊᕆᐊᖃᕐᓂᕐᒥᓄᑦ ᖃᐅᔨᔪᒪᑉᓗᓂ ᐃᓅᒐᓗᐊᕐᒪᖔᑦ ᓱᓕ. ᑕᐃᒪᐃᒻᒪᑦ ᐅᕙᑉᑎᓐᓂᒃ ᕿᒪᐃᔭᕆᐊᖃᓚᐅᖅᑐᖅ, ᐅᕙᖓ ᐊᓈᓇᒐ ᐊᒻᒪᓗ ᓄᑲᕋ, ᓄᑲᑯᓗᒐ ᐊᑕᐅᓯᕐᒥᒡᓘᓐᓃᑦ ᐅᑭᐅᖃᕐᓇᓂ. ᐊᖓᔫᒃᑲᒃ ᒪᕐᕈᒃ ᐃᓕᓐᓂᐊᕆᐊᖅᑎᑕᐅᓯᒪᖕᒪᑎᒃ ᐅᕙᑉᑎᓐᓃᓚᐅᙱᑦᑑᒃ.

ᐊᓈᓇᒐ ᐃᖃᓗᒐᓱᖃᑦᑕᓚᐅᖅᑑᒐᓗᐊᖅ ᐃᖃᓗᒍᓐᓇᕐᓇᓂ. ᓂᕆᔪᓐᓇᐃᓪᓕᓯᒪᑉᓗᑕ ᒪᕐᖕᓂᒃ ᐱᖓᓱᓂᒡᓘᓐᓃᑦ ᐅᑉᓗᓂᒃ. ᓄᑕᕋᐅᑉᓗᖓ, ᐃᓅᔪᒪᓪᓚᕆᓚᐅᖅᑐᖓ. ᑕᐃᒪᐃᒻᒪᑦ ᐊᓈᓇᒐ ᐊᔭᐅᖅᑐᐃᓐᓇᓚᐅᖅᑕᕋ, “ᐃᖃᓗᒐᓱᒋᑦ, ᐃᖃᓗᒐᓱᒋᑦ, ᐃᖃᓗᒐᓱᒋᑦ.” ᑭᐅᑉᓗᓂᖓ “ᐋᒃᑲ ᐃᖃᓗᖃᙱᑦᑐᖅ.” ᑭᓯᐊᓂ ᐊᔭᐅᖅᑐᐃᓐᓇᖅᖢᒍ ᐃᖃᓗᒐᓱᒃᑲᓐᓂᓕᓚᐅᖅᑐᖅ ᐱᓇᓱᐃᓐᓇᓕᕋᒥ ᐃᖃᓗᓕᑕᐃᓐᓇᓚᐅᖅᑐᖅ. ᓂᕆᐊᕐᔪᓕᓚᐅᖅᑐᒍᒃ ᐊᓈᓇᒐᓗ.

ᑕᒡᕙᓂ ᐅᑉᓗᕐᒥ - ᓂᕆᓯᒪᓕᕋᒪ ᖃᓄᐃᙱᓕᖅᖢᖓ, ᐊᓃᙳᐊᓕᖅᖢᖓ, ᐃᖅᑲᐅᒪᔪᖓ ᑕᐅᕗᙵ ᓄᓇᒥᐊᕐᒧᑦ ᑕᐅᑑᔭᕋᒪ. ᖃᐅᔨᒪᑉᓗᖓ ᑕᐃᒪ ᐊᖓᔪᒃᑲ ᓇᓃᑦᑐᒃᑭᐊᖅ, ᐊᒻᒪᓗ ᐃᒻᒪᖄ ᖃᐅᔨᒪᒐᒪ ᑎᖕᒥᓲᕐᒧᑦ ᐊᐃᔭᐅᓚᐅᕐᒪᑎᒃ ᐃᓕᓐᓂᐊᕆᐊᖅᑎᑕᐅᑉᓗᑎᒃ, ᐃᓱᒪᓕᖅᖢᖓ, “ᑕᒡᕙᑐᖅ ᑎᖕᒥᓲᕐᒧᑦ ᐊᐃᔭᐅᑕ.”

ᑐᐱᕐᒧᑦ ᐃᑎᖅᖢᖓ - ᑐᐱᖅᐳᑦ ᒥᑭᔫᖕᒪᑦ. ᑕᐃᒪᑐᐊᖅ ᕿᔪᒃ ᐱᒋᔭᑐᐊᖅᐳᑦ. ᐊᓈᓇᒐ ᐸᓪᓗᖓᑉᓗᓂ. ᕿᕕᐊᕋᑉᑯ ᐃᓱᒪᓚᐅᖅᑐᖓ, “ᐅᓇ ᓂᕆᐅᒋᔭᖃᕈᓐᓃᖅᑐᖅ,” ᐊᒻᒪᓗ ᐱᖏᒐᓕᖅᖢᖓ. ᐊᓈᓇᒐ ᐅᖃᐅᑎᑉᓗᒍ, “ᑕᒡᕙᑐᖅ ᑎᖕᒥᓲᕐᒧᑦ ᐊᐃᔭᐅᑕ.” ᐳᐃᒍᕈᓐᓇᙱᑕᕋ ᐅᖃᓚᐅᖅᓯᒪᖕᒪᑦ ᐃᒪᓐᓇ “ᑕᐃᒪᓐᓇ ᐅᖃᓪᓚᖃᑦᑕᙱᓪᓗᑎᑦ ᑕᐃᒪᐃᑕᐅᓚᐅᖅᓯᒪᔾᔮᙱᑦᑐᒍᑦ. ᖃᐅᔨᒪᔪᑎᑦ ᑕᐅᕙᓂᕐᒥᐅᑦ ᐅᕙᑉᑎᓐᓂᒃ ᖃᐅᔨᒪᙱᒻᒪᑕᓘᓐᓃᑦ ᓇᓃᓐᓂᑉᑎᓐᓄᑦ.”

ᐃᒻᒪᖄ ᖃᐅᖕᒪᑦ ᐅᕝᕙᓘᓐᓃᑦ ᑕᐃᑲᓂᑦᑕᐃᓐᓇᖅ ᐅᑉᓗᕐᒥ, ᑐᓵᓕᓚᐅᖅᑐᒍᑦ ᑎᖕᒥᓲᕐᒥᒃ ᑲᐃᕙᔪᒥᒃ ᖁᓛᑉᑎᓐᓂ. ᐱᖓᓲᓚᐅᖅᑐᑦ ᑎᖕᒥᓲᕐᒦᑦᑐᑦ: ᑎᖕᒥᓲᓕᕆᔨ, ᓴᐃᒪᓐ ᑎᓈᖅ - ᐊᓂᐊᓯ ᑎᓈᑉ ᐅᐃᖓ - ᒐᕙᒪᒃᑯᓐᓄᓪᓗ ᓴᓇᔨ ᐅᕝᕙᓘᓐᓃᑦ ᑭᓇᑭᐊᖅ. ᕿᓂᖅᑐᕕᓃᑦ ᐃᓄᖕᓂᒃ ᐱᕐᓕᓕᖅᑐᓂᒃ. ᑎᓈᖅ ᓇᓗᓇᐃᔭᐃᑉᓗᓂ ᓇᐅᒃᑰᕆᐊᖃᕐᓂᖏᓐᓄᑦ ᓄᓇᒥᒃ ᖃᐅᔨᒪᖕᒪᑦ ᖃᐅᔨᒪᖕᒪᓪᓗ ᐃᓚᒌᑦ ᓇᓃᓐᓇᔭᕐᓂᖏᓐᓄᑦ.

ᐊᔾᔭᖅᑕᐅᓚᐅᖅᓯᒪᔪᒍᑦ ᖃᒪᓂ’ᑐᐊᕐᒧᑦ ᐃᓅᔪᓐᓃᖅᓯᒪᔪᑦ ᐃᓄᐃᑦ ᑎᖕᒥᓲᕐᒦᖃᑕᐅᑉᓗᑎᒃ, ᐃᓄᐃᑦ ᐱᕐᓕᕐᓂᑰᔪᑦ ᓇᓂᔭᐅᔪᑦ. ᐃᖅᑲᐅᒪᑦᑎᐊᖅᑐᖓ ᑕᑯᑉᓗᖓ ᑐᖁᖓᔪᓂᒃ ᖃᓕᕇᓕᖅᓯᒪᔪᑦ. ᐃᒃᓯᕙᐅᑕᖅᑕᖃᙱᒻᒪᑦ ᑕᐃᑲᓂ ᑎᖕᒥᓲᕐᔪᐊᕐᒥ.

ᖃᒪᓂ’ᑐᐊᕐᒥᐅᑕᐅᓚᐅᖅᓯᒪᔪᒍᑦ ᐃᒻᒪᖄ ᑕᓪᓕᒪᓂᒃ ᐅᑭᐅᓂᒃ. ᐊᐅᓪᓚᖅᑎᑕᐅᓚᐅᖅᓯᒪᔪᖓ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕆᐊᖅᑎᑕᐅᑉᓗᖓ ᐱᖃᑎᒋᑉᓗᒋᒃ ᒪᕐᕈᒃ ᐊᖓᔫᒃᑲᒃ.

ᐊᓈᓇᒪ ᐅᖃᐅᑎᓚᐅᖅᓯᒪᔮᖓ ᑳᒃᑐᐊᓘᑎᓪᓗᒋᒡᒎᖅ, ᐃᖕᒥᓂᒃ ᐃᓅᖄᑎᒋᔭᖏᓪᓗ ᑐᒃᓯᐊᕐᕕᓕᐊᓚᐅᖅᓯᒪᔪᑦ ᐊᒻᒪᓗ ᑕᐃᑲᓃᓕᖅᖢᑎᒃ ᓂᕿᑖᖅᑎᑕᐅᔪᒪᓂᕐᒧᑦ ᐃᒃᓯᕋᕐᔪᐊᓄᑦ. ᐊᑕᐅᓯᕐᒧᑦ ᐃᒃᓯᕋᕐᔪᐊᕐᒧᑦ ᐅᖃᐅᑎᔭᐅᑉᓗᓂ “ᓂᕿᓂᒃ ᑐᓂᔪᓐᓇᙱᑕᒋᑦ ᐃᒃᓯᕋᕐᔪᐊᓅᙱᓐᓇᕕᑦ.” ᑭᐅᑉᓗᓂ “ᐊᑏ, ᐃᒃᓯᕋᕐᔪᐊᓄᑦ ᓅᓐᓂᐊᖅᐳᖓ ᓄᑕᕋᒃᑲ ᓂᕆᔪᓐᓇᖁᒐᑉᑭᑦ.” ᑕᐃᒪᓐᓇ ᐃᒃᓯᕋᕐᔪᐊᓄᙵᐅᖃᑦᑕᓕᓚᐅᖅᑐᒍᑦ.

ᑕᐃᕕᑎ: ᐃᓅᓚᐅᖅᓯᒪᔪᖅ ᐊᕐᕕᐊᓂ. ᐊᓈᓇᒐ ᐃᓅᔪᓐᓃᖅᖢᓂ ᐊᑕᐅᓯᕐᒥᒃ ᒪᕐᕈᖕᓂᒡᓘᓐᓃᑦ ᐅᑭᐅᖃᖅᑎᓪᓗᖓ. ᐊᑖᑕᒐ ᐋᓐᓂᐊᕐᕕᓕᐊᖅᑎᑕᐅᑉᓗᓂ - ᐳᕙᒡᓗᒡᕕᖕᒧᑦ - ᐊᕐᕕᐊᓄᑦ ᐅᑎᓚᐅᖅᓯᒪᙱᑦᑐᖅ. ᑎᒍᐊᖑᓕᓚᐅᖅᑐᖓ ᒥᐊᓕ ᐃᓕᑐᒐᕐᒧᑦ. ᐅᐃᑖᖅᖢᓂ ᑕᒥ ᒥᓯᕌᓛᕐᒥᒃ ᑲᖏᖅᖠᓂᕐᒥ. ᐱᕈᖅᓴᓚᐅᖅᑐᖓ ᐊᕐᕕᐊᓂ ᐊᕐᕕᓂᓕᖕᓂᒃ ᐅᑭᐅᖃᓕᖅᖢᖓ ᑲᖏᖅᖠᓂᕐᒧᑦ ᓅᓚᐅᖅᑐᒍᑦ ᒪᕐᕈᖕᓄᑦ ᐱᖓᓱᓄᓪᓘᓐᓃᑦ ᐅᑭᐅᓄᑦ, ᑕᐃᑲᙵᑦ ᓅᓕᓚᐅᖅᑐᒍᑦ ᑕᒡᕗᙵ, ᑎᑭᕋᕐᔪᐊᖅ ᐱᒋᐊᓕᓵᖅᑎᓪᓗᒍ.

ᐃᓚᒃᑲ ᓯᕗᓪᓕᖅᐸᐅᖃᑕᐅᓚᐅᖅᑐᑦ ᓄᓇᑖᖅᑐᓂᒃ ᑎᑭᕋᕐᔪᐊᕐᒥ. ᖃᓄᐃᓗᐊᓚᐅᙱᑦᑐᖅ ᐅᕙᑉᑎᓐᓄᑦ, ᐊᑖᑕᒐ ᑎᒍᐊᖅᓯᒐ ᕿᒧᒃᓯᖃᓕᐊᓂᓚᐅᕐᒪᑦ ᐊᒻᒪᓗ ᐃᓚᕗᑦ ᐃᓚᖏᑦ ᑲᖏᖅᖠᓂᕐᒥᐅᑕᐅᑉᓗᑎᒃ, ᐃᓚᒌᒃᑎᒍᑦ ᖃᓄᐃᓚᐅᙱᑦᑐᒍᑦ.

ᐊᓯᖏᑦ ᐃᓚᒌᑦ ᑎᑭᑎᑕᐅᓯᒪᔪᑦ ᐊᓯᖏᓐᓂᒃ ᓄᓇᒥᙶᖅᖢᑎᒃ, ᑕᐃᑉᑯᐊᓕ ᐊᒃᓱᕈᕐᓇᖅᑐᒃᑰᓚᐅᖅᑐᑦ ᓱᖏᐅᑎᓇᓱᒃᖢᑎᒃ ᓯᒡᔭᒥᐅᑕᐅᓂᐊᕐᓂᕐᒧᑦ. ᖃᐅᔨᒪᓚᐅᙱᑦᑐᑦ ᓇᑦᑎᕋᓱᖕᓂᐅᑉ ᒥᒃᓵᓄᑦ ᐅᕝᕙᓘᓐᓃᑦ ᕿᓇᓗᒐᕋᓱᖕᓂᐅᑉ ᒥᒃᓵᓄᑦ ᐅᕝᕙᓘᓐᓃᑦ ᑕᐃᒪᓐᓇᐃᑦᑐᓕᕆᔨᐅᓂᕐᒧᑦ ᐊᓯᖏᓐᓂᒃ. ᑐᒃᑐᒐᓱᖕᓂᕐᒥᒃ ᐃᖃᓗᒐᓱᖕᓂᕐᒥᒃ ᖃᐅᔨᒪᑐᐃᓐᓇᖅᑐᑦ, ᑕᐃᑉᑯᓄᙵ ᐊᒃᓱᕈᕐᓇᖅᑑᓚᐅᖅᑐᑦ. ᑕᐃᑉᑯᐊ ᐱᖁᑎᖃᑦᑎᐊᕐᓂᖅᓴᐅᔪᑦ ᐃᑲᔪᖃᑦᑕᓚᐅᖅᑐᑦ ᑎᑭᑉᐸᓕᐊᔪᓂᒃ. ᑕᐃᒪᐃᓐᓇᕐᒪᑦ ᐃᓅᑉᓗᓂ ᐃᓕᖅᑯᓯᕆᒐᑉᑎᒍᑦ: ᐃᑲᔪᖅᑕᐅᔪᖃᕆᐊᖃᖅᐸᑦ, ᐃᑲᔪᕐᓗᒋᑦ.

ᓱᓯ: 1964-ᒥ, ᓅᑕᐅᓚᐅᖅᑐᒍᑦ ᑎᑭᕋᕐᔪᐊᕐᒧᑦ ᖃᒪᓂ’ᑐᐊᕐᒥᙶᖅᖢᑕ. ᐊᖓᔪᖅᑳᒃᑲ ᐃᓱᒪᖅᓱᙱᖦᖢᑎᒃ. ᑭᓇᑐᐃᓐᓇᕐᒥᒃ ᖃᐅᔨᒪᔭᖃᕐᓇᑕ, ᑭᓯᐊᓂ ᐊᓈᓇᒐ ᐃᓐᓄᕆᒃᑑᓚᐅᕐᒪᑦ. ᑭᓇᑐᐃᓐᓇᕐᒥᒃ ᐅᖃᖃᑎᖃᖅᐸᒃᖢᓂ. ᐃᓄᐃᑦ ᑲᑎᑉᐸᓪᓕᐊᔭᖅᐳᑦ ᐊHᐃᐊᕐᒥᐅᑕᐅᓚᐅᖅᑐᑦ, ᐊᕐᕕᐊᕐᒥᐅᑕᑦ, ᐅᕙᑉᑎᓐᓂᒃ ᐃᑲᔪᖃᑦᑕᓕᓚᐅᖅᑐᑦ.

ᐊᓈᓇᒐ ᐋᓐᓂᐊᒃᑲᐅᓚᐅᕐᒪᑦ. ᐃᓕᓐᓂᐊᕈᓐᓃᓚᐅᖅᑐᖓ 15-ᓂᒃ ᐅᑭᐅᖃᖅᖢᖓ. ᒐᕙᒪᒃᑯᑦ ᐃᓄᖕᓂᒃ ᓴᓇᑎᑦᑎᕙᓪᓕᐊᓕᕐᒪᑕ ᐃᓕᓐᓂᐊᕐᕕᖕᓂᒃ. ᖁᑦᑎᖕᓂᖅᐹᒥ ᐃᓕᓐᓂᐊᕐᓂᖃᕋᒪ ᑕᒫᓂ ᑎᑭᕋᕐᔪᐊᕐᒥ, ᐅᖃᓪᓚᒍᓐᓇᕋᒪᓗ ᐃᓄᒃᑎᑐᑦ ᖃᑉᓗᓈᑎᑐᓪᓗ ᐊᒻᒪᓗ ᑎᑎᕋᕈᓐᓇᕋᒪ ᖃᑉᓗᓈᑎᑐᑦ ᐃᓄᒃᑎᑐᓪᓗ, ᓴᓇᑎᑕᐅᓕᓚᐅᖅᑐᖓ ᐅᑉᓘᑉ ᐃᓚᖓᓂᒃ ᐃᓕᓐᓂᐊᖅᑎᑦᑎᔨᒥᒃ ᐃᑲᔪᖅᑎᐅᑉᓗᖓ.

ᖃᐅᔨᒪᓕᓚᐅᖅᑐᕋ ᑕᐃᕕᑎ 16-ᓂᒃ ᐅᑭᐅᖃᖅᖢᖓ. ᐊᓈᓇᒐ ᐃᑲᔪᕈᒪᓗᐊᒧᑦ, ᐃᓚᒃᑲᓗ, ᑳᓚᐅᖅᑐᓪᓗ ᐃᖅᑲᐅᒪᑉᓗᒋᑦ, ᐊᓯᖏᓐᓂᒃ ᐸᕐᓇᐅᑎᖃᓚᐅᕋᒪ. ᐅᐃᑖᕈᒪᙱᖦᖢᖓ ᐃᓚᒃᑲᓗ ᐃᑲᔪᕈᒪᑉᓗᒋᑦ, ᐊᖓᔪᖅᑳᒃᑲᓗ ᐃᓅᓯᓗᒃᑖᒻᓂᒃ. ᑕᐃᒪᓐᓇ ᐃᓅᓂᐊᓚᐅᖅᑐᖓ - ᑕᐃᕕᑎ ᑭᓯᐊᓂ ᑲᑎᓕᓚᐅᖅᑕᕋ.

ᐃᓚᓐᓈᕆᑐᐃᓐᓇᐅᓚᐅᖅᑐᒍᒃ ᐊᑯᓂᐅᙱᑦᑐᖅ. ᑭᓯᐊᓂ ᑲᑎᒪᐃᓐᓇᕈᒪᓕᓚᐅᖅᑐᒍᒃ. ᑕᐃᑉᓱᒪᓂ, ᐊᖓᔪᖅᑳᖅᐳᑦ ᐊᖏᖃᑎᒌᓚᐅᙱᑦᑐᑦ ᑲᑎᓐᓇᔭᕐᓂᑉᑎᓐᓄᑦ Garry Lake-ᒥᙶᓚᐅᕋᒪ, ᐃᓕᖅᑯᓯᑐᖃᖅᐳᑦ ᐊᔾᔨᐅᙱᖦᖢᓂ ᐅᖃᐅᓯᖅᐳᓪᓗ ᐊᔾᔨᐅᙱᖦᖢᓂ. ᐃᒃᓯᕋᕐᔪᐊᓂᕐᒥᐅᑕᐅᑉᓗᖓ ᐊᒻᒪᓗ ᐊᔪᕿᖅᑐᐃᔨᕐᒥᐅᑕᐅᑉᓗᓂ.

ᓯᕗᓪᓕᖅᐹᒥ, ᐃᔨᕋᖅᑐᖅᖢᓄᒃ ᑲᑎᒪᓚᐅᖅᑐᒍᒃ ᑲᑎᒪᖁᔭᐅᙱᓐᓇᒻᓄᒃ. ᖃᓄᑭᐅᖅ ᐱᓚᐅᖅᑐᒍᒃ, ᑭᓯᐊᓂ ᐊᖏᖃᑎᒌᓕᓚᐅᖅᑐᑦ ᐊᖓᔪᖅᑳᖅᐳᑦ. ᐅᖃᖃᑎᒌᖃᑦᑕᓕᕋᒥᖃᐃ: “ᐊᕕᑎᑦᑐᓐᓇᙱᒃᑯᑉᑎᒍᑦ, ᑲᑎᒪᒥᐊᓕᕐᓕᒃ.”

ᑕᐃᒪᓐᓇ ᐃᓅᖃᑎᒌᓕᓚᐅᖅᑐᒍᑦ - ᐊᒃᓱᕈᕐᓇᖅᑑᓚᐅᖅᑐᖅ. ᐅᖃᐃᓐᓇᖃᑦᑕᓚᐅᖅᑐᖓ ᖁᕕᐊᓱᒃᑲᒪ ᓴᓇᓂᒻᓄᑦ. ᐅᑉᓘᑉ ᐃᓚᖓᓂᒃ ᓴᓇᖃᑦᑕᕋᒪ ᐊᒃᓱᓪᓘᓐᓃᑦ. ᐊᑕᐅᓯᖅ ᐅᑭᐅᖅ ᐱᐊᓂᖕᒪᑦ ᓄᑕᕋᖅᑖᖅᖢᓄᒃ.

ᐊᖓᔪᒃᖠᖅᐹᖅ ᐸᓂᒃᐳᑦ 7-ᓂᒃ ᐅᑭᐅᖅᑖᕐᒪᑦ, ᑐᒡᓕᖓ ᑎᒍᐊᕆᓚᐅᖅᑕᖅᐳᑦ. ᐃᓄᐃᑦ ᐃᓕᖅᑯᓯᑐᖃᖓᑦᑎᒍᑦ, ᐊᖓᔪᖅᑳᖅᐳᑦ ᐅᒃᐱᕈᓱᓪᓚᕆᓚᐅᕐᒪᑕ ᓄᑕᕋᑦ ᑕᒪᐃᓐᓂᒃ ᐊᖓᔪᖅᑳᒥᓂᒃ ᐱᕈᖅᓴᕆᐊᖃᕐᓂᖏᓐᓄᑦ. ᑎᒍᐊᑯᓗᒃᐳᑦ ᓄᑲᕋᓂᙶᓚᐅᖅᑐᖅ, ᐅᐃᖃᙱᒻᒪᑦ ᑕᐃᑉᓱᒪᓂ. ᐊᐃᑉᐸᖃᕋᓗᐊᖅᖢᓂ, ᑲᑎᑎᑕᐅᓯᒪᙱᒻᒪᑎᒃ. ᑕᐃᒪᐃᒻᒪᑦ ᐅᕙᑉᑎᓐᓂᒃ ᐊᐱᕆᓕᓚᐅᖅᑑᒃ ᓄᑕᕋᓛᖅ ᑎᒍᐊᕈᓐᓇᕐᒪᖔᑉᑎᒍᑦ.

ᐸᕐᓇᒃᓯᒪᙱᒃᑲᓗᐊᖅᖢᓄᒃ, ᓇᒡᓕᖕᓂᖅ ᓯᕗᓪᓕᖅᐸᐅᖕᒪᑦ. ᑕᐃᒪᓐᓇ ᑎᒍᐊᓕᓚᐅᖅᑐᒍᑦ ᑐᒡᓕᐊᓂ ᓄᑕᕋᑉᑎᓐᓂᒃ, ᑕᐃᒪᓐᓇᐃᓚᐅᖅᑐᑦᑕᐅᖅ ᐱᖓᓱᒃᑲᓐᓃᑦ ᑎᒍᐊᑯᓗᒃᐳᑦ. ᓄᑕᕋᓛᑯᓗᐃᑦ ᑎᒍᓚᐅᖅᑕᖅᐳᑦ ᓇᖕᒥᓂᕆᓕᖅᖢᑎᒍᑦ ᓄᑕᕋᖃᕈᒪᒐᑉᑕ. ᓄᑲᖅᖠᖅᐹᕆᔭᖅᐳᑦ ᓇᖕᒥᓂᖅ ᐃᕐᓂᕆᔭᖅᐳᑦ.

ᓄᑕᕋᑯᓗᒃᐳᑦ ᐊᒃᓱᕈᕐᓇᖅᑐᒃᑰᖁᓚᐅᙱᓐᓇᑉᑎᒍᑦ ᑭᓯᐊᓂ ᐊᒃᓱᕈᕐᓇᖅᑐᒃᑰᖅᓯᒪᔪᑦᑕᐅᖅ ᐃᓅᓇᓱᐊᕐᓂᒃᑯᑦ ᓱᖏᐅᑎᓇᓱᖃᑦᑕᕐᓂᒃᑯᓪᓗ. ᑭᓯᐊᓂ ᖃᐅᔨᒪᔭᖃᓗᐊᙱᑦᑐᑦ ᐃᓕᖅᑯᓯᑐᖃᑉᑎᓐᓂᒃ. ᐊᒻᒪᓗ ᐊᒥᓲᓂᖅᓴᑦ ᐃᓄᒃᑎᑑᕈᓐᓇᙱᑦᑐᑦ. ᑎᑭᕋᕐᔪᐊᕐᒥ, ᐊᒥᓱᓂᒃ ᐅᖃᐅᓯᓖᑦ, ᑕᐃᒪᐃᒻᒪᑦ ᓄᑕᕋᕆᔭᖅᐳᑦᑕᐅᖅ ᓇᖕᒥᓂᖅ ᐅᖃᐅᓯᕐᒥᓂᒃ ᐋᖅᑭᒃᓯᓯᒪᔪᑦ. ᑐᑭᓯᐅᒪᔾᔪᑎᔪᑦ. ᐅᖃᐅᓯᕐᓂᒃ ᓴᖅᑭᑦᑎᓲᑦ, ᐅᖃᐅᓯᓕᐅᒥᐊᖅᖢᑎᒃ. ᑕᐃᒪᐃᒻᒪᑦ ᑎᑭᕋᕐᔪᐊᕐᒥᐅᑦ ᓇᖕᒥᓂᖅ ᐅᖃᐅᓯᒃᑯᑦ ᐋᖅᑭᒃᓱᐃᓯᒪᔪᑦᑕᐅᖅ.

ᑕᐃᕕᑎ: ᖁᓕᓂᒃ ᐅᑭᐅᓂᒃ ᖄᖏᓵᖅᑐᓂᒃ, ᖃᑉᓯᑲᓪᓚᑦ ᓄᑖᑦ ᐅᔭᕋᖕᓂᐊᕐᕕᑦ ᐊᐅᓪᓛᓕᖅᑐᑦ ᑭᕙᓪᓕᕐᒥ. ᐃᓄᖕᓂᒃ ᓴᓇᔨᑖᖅᐸᓪᓕᐊᓕᓵᕐᒪᑕ, ᐃᓄᐃᓪᓗ ᓴᓇᑎᑕᐅᔪᑦ ᓄᖅᑲᖃᑦᑕᓕᕐᒪᑕ ᐊᖏᕐᕋᐅᒪᒥᐊᓕᖅᖢᑎᒃ, ᒐᕙᒪᒋᔭᑉᑕ ᐅᖃᐅᓯᕆᓯᒪᔭᖏᑦ ᐅᕝᕙᓘᓐᓃᑦ ᐅᔭᕋᒃᑕᕆᐊᕐᒥᐅᑕᑦ ᐅᖃᐅᓯᕆᓯᒪᔭᖏᑦ ᒪᓕᒃᖢᒋᑦ ᐅᖃᖃᑦᑕᓕᓚᐅᖅᑐᑦ ᐃᓄᐃᑦ ᓴᓇᔪᒪᙱᓐᓂᖏᓐᓄᑦ. “ᓴᓇᔪᒪᙱᑦᑐᑦ. ᖁᕕᐊᒋᔭᖃᙱᑦᑐᑦ ᐊᒃᓱᕈᕐᓂᕐᒥᒃ ᓴᓇᓂᕐᒥᒃ.” ᑕᐃᒪᐃᙱᑦᑐᑦ. ᐃᓄᐃᑦ ᐊᖏᕐᕋᖅᓯᒪᔪᒪᔪᑦ ᐃᓚᒥᓃᑦᑐᒪᔪᑦ. ᖃᑕᙳᑎᒌᖕᓂᖅ ᓯᕗᓪᓕᖅᐸᐅᑎᑕᐅᕙᖕᒪᑦ. ᑕᐃᒪᐃᒻᒪᑦ ᐃᖢᐊᖏᓕᐅᕈᑕᐅᔪᖅ ᒪᒃᑯᒃᑐᑦ ᓴᓇᓇᔭᕋᓗᐊᖅᑎᓪᓗᒋᑦ ᐅᔭᕋᖕᓂᐊᕐᕕᖕᒥ - ᑕᐃᒪᐃᑦᑐᖅ ᓱᓕ, ᖃᑕᙳᑎᒌᑦ ᓯᕗᓪᓕᖅᐸᐅᑎᑕᐅᕙᖕᒪᑕ ᐃᓄᖕᓄᑦ.

ᖃᐅᔨᒪᔭᑐᐊᕋ ᑎᑭᕋᕐᔪᐊᕐᒥᐅᑕᐅᑉᓗᖓ ᓇᓂᑐᐃᓐᓇᖅ ᓄᓇᖃᓕᖅᖢᓂ ᐊᓯᐊᓄᑦ ᓅᑦᑐᒪᔪᓐᓃᕐᓇᖅᑐᖅ. ᐃᓐᓇᑐᖃᐃᑦ ᐊᓯᐊᓄᑦ ᓄᓇᓕᖕᒧᑦ ᓅᑦᑕᕌᖓᒥᒃ ᕿᒪᐃᑉᓗᑎᒃ ᑎᑭᕋᕐᔪᐊᕐᒥ, ᐃᓚᖏᑦ ᐅᑎᓲᑦ ᑕᒪᐅᙵ ᐅᕙᑉᑎᑐᑦ ᖃᑉᓰᑲᓪᓚᒃᖢᖓ ᐊᓯᖏᓐᓄᑦ ᓄᓇᓕᖕᓄᑦ ᓅᓯᒪᔪᖓ. ᐅᑏᓐᓇᖃᑦᑕᖅᑐᒍᑦ. ᓄᓇ ᖃᐅᔨᒪᒐᑉᑎᒍᑦ, ᐃᓄᐃᑦ ᖃᐅᔨᒪᒐᑉᑎᒍᑦ. ᐃᓚᒌᑦᑎᐊᕐᓂᖅ ᐊᔪᕐᓇᖅᑐᖅ ᓄᓇᒋᖅᑳᓚᐅᖅᓯᒪᔭᐅᑉ ᐊᓯᐊᓂᒃ. ᓄᓇ ᖃᐅᔨᒪᒐᑉᑎᒍᑦ, ᖃᐅᔨᒪᒐᑉᑕ ᓇᓂ ᐃᖃᓗᖃᕐᒪᖔᑦ ᓇᓂᓗ ᐊᖑᓇᓱᒍᓐᓇᕐᒪᖔᑉᑕ.

ᐊᒥᓲᓂᖅᓴᑦ ᓄᑕᕋᕆᔭᖅᐳᑦ ᓄᓇᖃᕈᒪᓯᒪᔪᑦ ᑎᑭᕋᕐᔪᐊᕐᒥ, ᐊᖓᔪᒃᖠᖅᐹᖅᐳᑦ ᐸᓂᒃᐳᑦ ᑲᖏᖅᖠᓂᕐᒥᐅᑕᐅᓕᖅᖢᓂ ᐅᐃᓂᓗ ᓄᑕᕋᖏᓪᓗ. ᓄᑲᖏᖅ ᐊᓂᖓᓗ ᑎᑭᕋᕐᔪᐊᕐᒥᐅᑕᐅᔪᒪᔪᑦ.

ᓱᓯ: ᑲᑎᒪᓕᖅᑐᒍᒃ 49-ᓂᒃ ᐅᑭᐅᓂᒃ. 50-ᓂᒃ ᐅᑭᐅᓂᒃ ᑲᑎᒪᓕᕐᓂᐊᖅᑐᒍᒃ ᓯᑎᐱᕆᒥ. ᐊᒥᓱᓂᒃ ᐅᑭᐅᓂᒃ ᑲᑎᒪᓕᖅᑎᓪᓗᓄᒃ ᕿᒪᐅᒪᒍᑎᔪᓐᓇᐃᓪᓕᔪᒍᒃ. ᓇᒡᓕᒌᒍᑎᓂᖅᓴᐅᓕᖅᑐᒍᒃ. ᓄᑕᕋᑯᓗᒃᐳᓪᓗ ᑕᐃᒪᓐᓇ ᑕᑯᖁᔭᒃᑲ ᓂᕆᐅᖕᓂᖃᑦᑎᐊᕐᓗᑎᒡᓗ ᑲᑎᑎᑕᐅᓯᒪᓂᒃᑯᑦ.

ᐊᕐᕌᓂ, ᑕᐃᕕᑎᐅᑉ ᐃᒪᓐᓇ ᐅᖃᐅᑎᓚᐅᖅᑖᖓ, “ᐅᓇ ᒥᑭᓕᕋᕈᑎ ᓂᐅᕕᓚᐅᖅᑕᕋ ᐃᓕᖕᓄᑦ ᑐᓂᔪᒪᑉᓗᒍ ᑐᓂᔪᓐᓇᓚᐅᙱᓐᓇᑉᑭᑦ ᑕᐃᒪᓐᓇᐃᑦᑐᒥᒃ ᑲᑎᑎᑕᐅᓕᕋᒻᓄᒃ. ᐃᖅᑲᐅᒪᕕᑦ ᐊᑐᖅᑐᐊᕆᐊᖃᓚᐅᕋᕕᑦ ᓴᑭᒋᔭᕐᒪ ᒥᑭᓕᕋᕈᑎᖏᓐᓂᒃ? ᑕᐃᒪᐃᒻᒪᑦ ᐅᑯᐊ ᐃᓕᖕᓄᑦ ᑐᓂᔭᒃᑲ ᓇᒡᓕᒋᒐᑉᑭᑦ, ᐅᕙᒻᓂᙶᖅᑐᑦ.”

ᓲᖃᐃᒻᒪ ᕿᐊᓕᓚᐅᖅᓯᒪᔪᖓ. ᓇᖕᒥᓂᖅ ᒥᑭᓕᕋᕈᑎᖃᓕᕋᒪ. 48 ᐅᑭᐅᑦ ᖄᖏᖅᓯᒪᓕᖅᑎᓪᓗᒋᑦ ᓴᕆᒪᓱᑦᑎᐊᓚᐅᖅᑐᖓ. ᑲᑎᑎᑕᐅᓯᒪᓂᖅᐳᑦ ᑲᔪᓯᑦᑎᐊᖅᓯᒪᔪᖅ ᑲᑎᒪᔪᒪᒐᒻᓄᒃ. ᐱᕈᖅᓴᖅᓯᒪᔪᖓ ᐊᒃᓱᕈᕐᓇᖅᑐᒃᑯᑦ, ᐊᖓᔪᒃᑲ, ᓄᑲᒃᑲ ᐊᒃᓱᕈᕐᓇᖅᑐᒃᑰᖅᖢᑎᒃ. ᐅᕙᖓᓗ ᐊᒃᓱᕈᕐᓇᖅᑐᒃᑰᖅᓯᒪᑉᓗᖓ. ᖃᐅᔨᒪᑉᓗᖓ ᐊᓅᕌᓂᒃᓯᒪᒐᒪ, ᖃᐅᔨᒪᔪᖓ ᐃᓅᕋᓂᒍᓐᓇᖅᓯᒪᒐᒪ. ᑕᒪᓐᓇ ᑕᒡᕙ ᓴᙱᓂᕆᔭᕋ.