ᓯᓚᑦᓯᐊᖑᖃᑦᑕᖏᑎᓪᓗᒍ ᐊᒻᒪ ᑲᑎᒪᔭᖅᑐᖃᑕᐅᓂᖅ ᐃᖢᐊᖏᑎᓪᓗᒍ ᐊᕐᕌᒍᒥ ᑕᒡᕙᓂ ᐊᑐᖅᑐᒥ ᑭᕙᓪᓕᕐᒥ ᒪᐃᔭᐃᑦ ᑲᑎᒪᓂᖓᓂ, ᐊᕐᕕᐊᓂ ᒪᐃᔭ ᐹᑉ ᓕᓄᑦ ᖁᕕᐊᓱᑦᓯᐊᖅᐳᖅ ᓄᓇᖓᑕ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ.
ᓕᓄᑦ ᐅᖃᓚᐅᖅᐳᖅ ᐃᓚᐅᔪᖃᓚᐅᖏᒻᒪᑦ ᓂᕈᐊᖅᑕᐅᓯᒪᔪᓂᑦ ᒪᓕᒐᓕᐅᖅᑎᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ ᑲᑎᒪᑎᓪᓗᒋᑦ ᑲᑎᒪᒋᐊᖃᕐᓂᖏᑦ ᐊᑕᐅᑦᓯᒃᑰᖅᑎᑕᐅᓚᐅᕐᒪᑕ ᑭᖑᓪᓕᖅᐹᖅᓯᐅᓕᓚᐅᕐᒪᑕ ᒪᓕᒐᓕᐅᖅᑎᑦ ᑲᑎᒪᓂᖏᑦ ᓂᕈᐊᕐᔪᐊᖅᑐᖃᓚᐅᖏᓐᓂᐊᓂ ᒪᓕᒐᓕᐅᖅᑎᒃᓴᐅᓂᐊᖅᑐᓂᒃ.
ᐅᖃᓚᐅᖅᖢᓂᓗ ᓯᓚᑦᓯᐊᖑᓚᐅᖏᓐᓂᖓᓂᒃ ᐱᔾᔪᑎᖃᖅᖢᑎᒃ ᐊᒥᓱᑦ ᐃᓄᐃᑦ ᑲᑎᒪᖃᑕᐅᓂᐊᓚᐅᖅᑐᑦ ᑲᖏᖅᖠᓂᕐᒧᐊᕈᓐᓇᓚᐅᖏᒻᒪᑕ.
“ᑲᑎᒪᖃᑎᒋᓚᐅᖅᐸᕗᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᑦᑕ ᐊᖓᔪᖄᖓᓐᓂᒃ ᑏᕕᑦ ᓂᖏᐅᖓᓐ ᐅᖃᓪᓚᒃᖢᓂᓗ ᐸᕐᓇᒃᓯᒪᓂᖏᓐᓄᑦ ᑭᕙᓪᓕᕐᒥ ᑲᑎᒪᕐᔪᐊᖅᑎᑦᓯᓂᕐᒧᑦ, ᑕᐃᒪᓐᓇ ᑕᓯᐅᔭᕐᔪᐊᒥᐅᑕᐃᑦ ᓄᓇᓕᖕᓂᒥᐅᑦ ᑲᑎᒪᑎᑕᐅᒋᐊᖃᓕᕐᓂᖏᓐᓄᑦ ᑕᖃᐃᖅᓯᕐᓂᐊᕐᓗᑎᒃ ᐊᕐᕌᒎᓄᑦ,” ᐅᖃᓚᐅᖅᐳᖅ ᓕᓄᑦ.
“ᑕᒪᒃᑯᓂᖓ ᐅᖃᐅᓯᖃᓚᐅᖅᐳᒍᑦ ᐱᓪᓚᕆᐅᔪᓂᒃ. ᓄᓇᕗᑦ ᒐᕙᒪᒃᑯᖏᑦ ᒥᓂᔅᑕᖏᑦ ᐃᓚᐅᑎᑕᐅᖏᑦᖢᑎᒃ.
“ᐅᖃᓪᓗᕆᒃᓴᖃᑎᒌᒍᓐᓇᓚᐅᕋᓗᐊᕋᑉᑕᒪ, ᐃᒻᒪᖄ ᐅᖃᐅᓯᖃᕐᓗᑕᓗ ᑲᑐᔾᔨᓗᑕ ᐃᖕᒥᒃᑯᑦ, ᑕᐃᒪᓐᓇᐃᓚᐅᖏᒻᒪᑦ.”
ᐃᒪᓐᓇᐃᓕᐅᓚᐅᖅᐳᒍᑦ, ᑭᓯᐊᓂ, ᐊᕐᕕᐊᒥᐅᑦ ᑐᓴᖅᑎᑎᒍᑎᖃᓚᐅᕐᒪᑕ ᐱᓕᕆᖃᑎᖃᕐᓂᐊᕐᓂᕐᒥᖕᓄᑦ NRStor Remote Communities ᓴᓗᒪᔪᒥᒃ ᐅᖅᓱᐊᓗᖕᒥᒃ ᐊᑐᖏᑦᖢᑎᒃ ᐅᒃᑳᓕᐅᕐᓂᕐᒧᑦ ᐱᓕᕆᔨᓂᒃ ᐊᑐᖏᓐᓂᖅᓴᐅᖁᑉᓗᒋᑦ ᐃᑯᒪᓕᒡᔪᐊᖃᖅᑐᓄᑦ ᐅᖅᓱᐊᓗᖕᓂᒃ ᓄᓇᓕᖕᓂ ᐅᒃᑳᓕᐅᕈᑎᖃᕐᓂᐊᖅᖢᑎᒃ.
ᕼᐊᒻᓚᒃᑯᑦ ᑲᑉᐸᓂᒃᑯᓪᓗ ᐱᓕᕆᖃᑎᒌᒃᐳᑦ ᐃᒪᓐᓇᐃᓕᐅᕐᓂᐊᖅᖢᑎᒃ: ᖃᐅᔨᓴᕐᓂᐊᖅᖢᑎᒃ ᖃᓄᑎᒋ ᑕᐃᒪᓐᓇ ᐅᒃᑳᓕᐅᕈᑎᒃᓴᖃᕆᐊᖃᕐᒪᖔᑕ ᐅᖅᓱᐊᓗᒃᑰᖏᑦᑐᓂᒃ ᓄᓇᓕᖕᒥ, ᐃᓚᐅᑉᓗᓂ ᓇᑉᐸᖅᑎᕆᓂᖅ ᓇᐸᔪᒃᓴᒥᒃ ᐊᓄᕆᒥᒃ ᖃᐅᔨᓴᕈᑎᒃᓴᒥᒃ; ᖃᐅᔨᓴᕐᓂᖅ ᖃᓄᖅᑑᕈᑎᒃᓴᓂᒃ ᓄᓇᓕᒃ ᐃᖕᒥᓂᒃ ᐅᖅᓱᐊᓗᖕᓂᒃ ᐊᑐᖃᑦᑕᖅᑐᓂᒃ ᐅᖁᖅᓴᐅᑎᖃᕐᓂᖏᓐᓄᑦ; ᐋᖅᑭᒃᓱᐃᓂ ᓇᓗᓇᐃᔭᑦᓯᐊᖅᓯᒪᔪᒃᑯᑦ ᓴᓗᒪᔪᒥᒃ−ᐅᒃᑳᓕᐅᕈᑎᖃᕐᓂᖅ ᐊᑐᕐᓗᓂ ᓯᕿᓂᕐᒥᑦ, ᐊᓄᕆᒥᑦ ᐊᒻᒪ ᖃᓄᖅ ᐱᕙᓪᓕᐊᖃᑕᕐᓂᖃᕐᓂᕐᒧᑦ ᑐᖅᑯᐃᖃᑦᑕᕐᓂᐊᕐᓂᕐᒧᓪᓗ ᓯᕿᓂᕐᒥᖔᖅᑐᓂᒃ; ᐊᒻᒪ ᓴᓗᒪᔪᒥᒃ ᐅᒃᑳᓕᐅᕈᑎᖃᕐᓂᖅ ᒫᓐᓇᑲᐅᑎᒋ ᐋᖅᑭᒃᓯᒪᖏᓚᐅᐱᓪᓚᒃᑑᒐᓗᐊᓂᒃ.
ᓕᓄᑦ, ᐊᕐᕕᐊᓂ ᒪᐃᔭᐅᓯᒪᓕᖅᖢᓂ ᐅᑭᐅᓄᑦ 9-ᓄᑦ ᐱᐊᓂᒃᐸᓪᓕᐊᓕᖅᖢᓂᓗ ᓯᕗᓪᓕᕐᒥᒃ ᐅᑭᐅᒥᒃ ᐱᖓᓱᓂ ᒪᐃᔭᖑᒍᑎᒋᓂᐊᖅᑕᒥᓂᒃ ᐅᑭᐅᓂᒃ, ᐅᖃᓚᐅᖅᐳᖅ ᓴᓗᒪᔪᒥᒃ−ᐅᒃᑳᓕᐅᕈᑎᖃᕐᓂᖅ ᐊᖏᓗᓂ ᑕᐃᒪᓐᓇ ᐱᓕᕆᐊᕆᔭᐅᓂᐊᖅᐳᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ.
ᐅᖃᓚᐅᖅᖢᓂᓗ ᐊᕙᑎᒥᐅᑕᓂᒃ ᓱᕈᖅᑎᑦᓯᕙᓪᓕᐊᖏᓪᓗᓂᓗ, ᐊᕐᕕᐊᑦ ᓇᖕᒥᓂᖅ ᐅᒃᑳᖃᐅᑎᖃᕈᓐᓇᕐᓂᐊᖅᐳᖅ ᐊᑯᓂᓗ ᑮᓇᐅᔭᓕᐅᕈᑎᖃᕐᓗᓂ ᓄᓇᓕᖕᒥ.
“ᑕᐃᒪ, ᑕᐃᒪᓐᓇ ᐊᑯᓂ ᐊᖏᕈᑎᒋᓚᐅᖏᒃᑲᓗᐊᖅᐸᕋ, ᐃᓱᒪᒋᖏᓐᓇᓚᐅᕋᑉᑯ ᐃᒪᒃᑯᑦ ᐊᐅᓚᔪᓂᒃ ᐅᒃᑳᓕᐅᕈᑎᖃᕋᔭᕐᓂᕐᒧᑦ ᒫᓂᑑᐸᒥᑦ ᑕᒡᕙᓂ, ᑭᓯᐊᓂ ᐱᓕᕆᐊᕆᖃᑦᑕᓕᖅᖢᒍ −− ᐊᒻᒪ ᐱᓕᕆᖃᑎᒋᑉᓗᒋᓪᓗ ᑕᒪᒃᑯᐊ ᐱᓕᕆᖃᑎᖃᕈᒪᔪᑦ ᐅᕙᑉᑎᓐᓂᒃ −−ᐱᓕᕆᐊᕆᒍᒪᑦᓯᐊᓕᖅᐸᕋ ᖁᕕᐊᒋᑉᓗᒍᓗ,” ᐅᖃᓚᐅᖅᐳᖅ.
“ᐱᐅᓂᖅᓴᐅᕗᖅ ᓇᖕᒥᓂᖅᓱᕐᒪᑕ ᑲᑉᐸᓂ ᓇᖕᒥᓂᕐᓗ ᑮᓇᐅᔭᒥᖕᓂᒃ ᐊᑐᕐᓂᐊᖅᖢᑎᒃ.
“ᑕᐃᒪᓐᓇᐃᓕᐅᕐᒪᑕ ᖃᐅᔨᒪᑉᓗᑎᒃ ᐊᑐᕈᓐᓇᕐᓂᐊᖅᑕᕗᑦ ᑲᔪᓯᒍᓐᓇᕐᓂᐊᕐᓂᖏᓐᓄᑦ, ᑕᐃᒪᓐᓇᐃᑉᐳᑦ. ᐅᒃᐱᕆᓕᖅᐸᕋᑉᑕᐅᖅ ᐊᒃᓱᒻᒪᕆᐅᑉᓗᓂᓗ.”
ᓕᓄᑦ ᐅᖃᓚᐅᖅᖢᓂᓗ ᖃᐅᔨᒪᑉᓗᓂ ᓴᓇᓂᐊᕐᒪᑕ “12−ᓂᒃ, ᐅᖓᑖᓄᓪᓘᓐᓃᑦ,” ᑕᒪᒃᑯᐊ ᓴᓇᔭᐅᓂᐊᖅᑐᑦ ᑲᓇᑕᒥ ᐅᑭᐅᓂ ᖁᓕᓂ ᖃᐃᔪᓂ.
“ᖃᐅᔨᒪᒐᑉᑕᓗ ᐅᒃᑳᓕᐅᕐᓂᖅ ᒫᓐᓇ, ᐅᑭᐅᑦ ᖁᓕᑦ ᐊᓂᒍᖅᐸᑕ ᐱᑐᖃᐅᔮᕐᓂᐊᕐᒪᑕ,” ᐅᖃᓚᐅᖅᐳᖅ.
“ᑭᓯᐊᓂ ᐱᒋᐊᕈᑎᖃᕆᐊᖃᕋᑉᑕ ᑕᐃᒪᓐᓇ ᑖᒃᑯᐊ ᓴᓇᒍᒪᖕᒪᑕ ᐅᑉᓗᒥ ᐊᑐᖅᑕᐅᔪᑦ ᐊᑐᕐᓗᒋᑦ, ᑕᐃᒪ ᐱᒋᐊᕈᑎᖃᕆᐊᖃᖅᐳᒍᑦ ᐱᕙᓪᓕᐊᑎᑦᓯᔪᓐᓇᖅᖢᑕᓗ ᑕᒡᕙᖓᑦ.”
ᓕᓄᑦ ᐅᖃᓚᐅᖅᐳᖅ ᓴᓇᒋᐊᕐᓂᐊᖅᐳᑦ ᐊᕐᕌᒍᒥ ᐊᑐᖅᑐᒥ.
ᐅᖃᓚᐅᖅᖢᓂᓗ ᐊᕐᕕᐊᓂ ᐱᓕᕆᖃᑎᒋᔭᐅᓂᐊᖅᑐᖅ ᐊᖏᔪᒥᒃ ᐱᕙᓪᓕᐊᑎᑦᓯᔪᓐᓇᕐᒪᑕ ᑕᐃᒪᓐᓇ ᐊᖏᕈᑉᑕ ᐊᖏᖅᐸᑕ ᑕᐃᒪᓐᓇ ᓄᖅᑲᖅᑎᑕᐅᓂᐊᖏᑦᖢᑎᒃ ᐱᒋᐊᕈᑎᖃᑲᐅᑎᒋᓂᐊᕐᒪᑕ.
“ᐱᑦᓯᐊᕐᓂᐊᖅᐳᑦ ᐃᖢᐊᖏᔾᔪᑎᖃᕐᓂᐊᕋᓗᐊᖅᖢᑎᒃ, ᑭᓯᐊᓂ ᐃᓚᐅᒍᒪᑦᓯᐊᖅᐳᖓ ᓂᕆᐅᒍᑎᖃᑦᓯᐊᖅᖢᑕᓗ,” ᐅᖃᓚᐅᖅᐳᖅ.
“ᑕᐃᒪ ᐱᒋᐊᕈᑎᖃᕆᐊᖃᕋᑉᑕ ᑕᐃᒪᓐᓇ, ᓄᓇᓕᖕᓄᑦ ᐃᖢᐊᕐᓂᐊᖅᖢᓂᓗ ᑮᓇᐅᔭᓕᐅᕐᓗᑎᒃ ᐅᑕᕿᑐᐃᓐᓇᖏᓪᓗᑕ ᓄᓇᕗᑦ ᒐᕙᒪᒃᑯᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒡᓘᓐᓃᑦ.”