ᐃᖢᐊᖅᓴᐃᔨᑦ ᐆᒪᔪᓄᑦ ᕙᓂᐹᖕᒥᐅᑕᐃᑦ Tuxedo Animal Hospital ᖃᐅᔨᓴᓚᐅᖅᐳᑦ 80 ᑲᓴᓂᒃ ᐆᒪᔪᓂᒃ ᑎᒍᐊᓂᒃ ᐊᒻᒪ ᐱᓚᒃᑐᐃᓚᐅᖅᖢᑎᒃ 30−ᓂᒃ ᐊᕐᕌᒍᑕᒫᖅᓯᐅᑎᒥᒃ ᑎᑭᓯᒪᑎᑕᐅᓚᐅᖅᑎᓪᓗᒋᑦ ᑲᖏᖅᖠᓂᕐᒧᑦ ᐱᓇᓱᐊᕈᓯᐅᓚᐅᖅᑐᒥ.
ᑖᒃᑯᐊ ᐅᑯᐊᖑᓚᐅᖅᖢᑎᒃ Dr. Jonas Watson ᐃᖢᐊᖅᓴᐃᔨ ᐃᑲᔪᖅᑎᖏᓪᓗ ᔨᓂᕗ ᑕᑭᓐ ᐊᒻᒪ ᐃᐅᕆᓐ ᑖᒃ.
ᐃᖢᐊᖅᓴᐃᔨ Dr. Watson ᓯᑕᒪᖓᓂ ᐊᕐᕌᒍᒥ ᑕᐃᒪᓐᓇ ᑲᖏᖅᖠᓂᕐᒧᐊᖅᓯᒪᓕᖅᐳᖅ ᐃᓚᒋᔭᐅᓪᓗᓂ ᑖᒃᑯᓄᖓ ᐱᓕᕆᔨᓄᑦ Tuxedoᑯᓐᓄᑦ ᐊᑯᓂ ᐱᓕᕆᔭᖅᑐᖃᑦᑕᖅᓯᒪᓕᖅᖢᑎᒃ ᑲᖏᖅᖠᓂᕐᒧᑦ ᐆᒪᔪᓂᒃ ᖃᐅᔨᓴᕆᐊᖅᓯᒪᑉᓗᑎᒃ ᐊᒻᒪ ᑐᖏᓕᐊᓂ ᐊᕐᕌᒍᒥ ᖁᓕᓂ ᑕᐃᑯᖓᐅᖃᑦᑕᖅᓯᒪᓕᖅᖢᑎᒃ.
ᐊᒻᒪ, ᑕᐃᑲᓃᓐᓂᕐᒥᖕᓂ ᐆᒪᔪᐃᑦ ᖃᐅᔨᓴᖅᑕᐅᓚᐅᖅᖢᑎᒃ ᐃᖢᐊᖅᓴᖅᑕᐅᖃᑦᑕᖅᐳᑦ, ᓲᕐᓗ ᑕᒪᒃᑯᐊ ᐅᒃᐱᒡᔪᐊᑦ ᑐᒃᑐᐃᓪᓗ, ᐃᓚᒌᓪᓗ ᑎᒍᐊᖏᑦ.
Watson ᐅᖃᓚᐅᖅᐳᖅ, ᑕᐃᑲᓂ, ᐊᑐᖃᑦᑕᖅᖢᑎᒃ ᖃᕆᑕᐅᔭᒥᒃ ᐱᓕᕆᖃᑎᖃᖅᖢᑎᒃ ᐱᔾ ᐴᒃᒥᒃ ᐃᖢᐊᖅᓯᕚᓪᓕᖅᓯᒪᓕᖅᐳᑦ ᐱᓕᕆᒍᓯᖏᑦ Tuxedo ᑯᑦ.
ᐅᖃᓚᐅᖅᖢᓂᓗ ᐴᑦ ᐊᔾᔨᓕᐅᖅᑕᒥᓂᒃ ᓇᒃᓯᐅᔾᔨᖃᑦᑕᖅᐳᖅ ᑕᕐᕆᔭᐅᑎᓕᐅᖅᑕᒥᓂᒡᓗ ᐆᒪᔪᓂᒃ ᐃᖢᐊᖅᓴᖅᑕᐅᒋᐊᖃᖅᑐᓂᒃ, ᓲᕐᓗ ᐆᒃᑑᑎᒋᓗᒍ, ᐊᒻᒪ ᐱᓕᕆᐊᕆᔭᐅᑦᓯᐊᖅᓯᒪᖃᑦᑕᓕᖅᐳᖅ ᐊᕐᕌᒍᒐᓴᐅᓕᖅᑐᓂ.
“ᑕᐃᒪ, ᐊᕐᕌᒍᒥ ᐱᓕᕆᖏᓕᕌᖓᒥᒃ ᐳᓚᕋᓚᐅᖅᖢᑎᒃ, ᑎᑎᖃᑎᒍᑦ ᐊᓯᐊᒍᓪᓗ ᑐᓴᐅᒪᒍᑎᑎᒍᑦ ᐱᓕᕆᒍᓐᓇᖅᐳᒍᑦ,” ᐅᖃᓚᐅᖅᐳᖅ ᕚᑦᓴᓐ.
“ᐊᒻᒪ ᑕᐃᑲᓃᓐᓂᑉᑎᓐᓂ ᐃᖢᐊᖅᓯᕚᓪᓕᖅᓯᒪᓕᖅᐳᖅ ᑕᒪᐃᑎᒍᑦ ᐋᓐᓂᐊᖃᑦᑕᖏᓂᖅᓴᐅᓕᕐᓂᖏᑦ ᐆᒪᔪᐃᑦ ᑲᖏᖅᖠᓂᕐᒥ, ᐱᑕᖃᕋᓗᐊᕆᑉᓗᓂ ᐊᓯᖏᓐᓂ − ᓄᓇᓕᖕᓂ ᐅᖓᓯᖕᓂᖅᓴᐅᔪᓂ ᑲᖏᖅᖠᓂᕐᒥᑐᐃᓐᓇᐅᖏᑦᑐᖅ − ᐊᔾᔨᒌᖏᑦᑐᓂᒃ ᐱᔾᔪᑎᖃᖅᖢᑎᒃ, ᑕᐃᒪᓐᓇ ᐃᖢᐊᖅᓴᖅᑕᐅᖃᑦᑕᖏᑉᐳᑦ ᓄᓇᓕᖕᓂᒥᐅᑕᐃᑦ ᑎᒍᐊᖏᑦ.
“ᑕᐃᒪᓐᓇᐃᖏᓐᓇᕐᓂᐊᖅᐸᑕ, ᕿᒻᒥᑦ ᐋᓐᓂᐊᖅᑖᖏᓐᓇᖃᑦᑕᕐᓂᐊᖅᐳᑦ ᑲᐴᑎᓄᑦ ᐋᖅᑭᒃᑕᐅᔪᓐᓇᖅᑐᓂᒃ ᑮᓇᐅᔭᖅᑕᖃᖏᓐᓂᖓᓄᑦ ᑕᐃᒪᓐᓇ ᐆᒪᔪᓂᒃ 'ᐃᖢᐊᖅᓴᖅᑕᐅᒍᑎᒃᓴᓄᑦ'.
“ᑲᖏᖅᖠᓂᕐᒥ ᐃᖢᐊᕐᓂᖅᓴᐅᕗᖅ ᐱᑦᔾ (ᐴᑦ) ᑮᓇᐅᔭᖅᑕᖃᕐᒪᑦ ᐃᑲᔪᕈᑕᐅᔪᓐᓇᖅᑐᓂᒃ ᐃᓚᒌᓄᑦ ᐆᒪᔪᖁᑎᖏᑦ ᐃᖢᐊᖅᓴᖅᑕᐅᔪᓐᓇᖁᑉᓗᒋᑦ ᑕᒡᕙᖓᑦ ᐊᑭᓕᖅᑕᐅᓗᑎᒃ ᐱᑎᑕᐅᖃᑦᑕᖅᐳᑦ.”
ᕚᑦᓴᓐ ᐅᖃᓚᐅᖅᐳᖅ ᐆᒪᔪᕐᓄᑦ ᐃᖢᐊᖅᓴᐃᔨᑕᖃᖃᑦᑕᖏᒻᒪᑕ ᐅᖓᓯᒃᑐᒥᐅᑕᐃᑦ ᓄᓇᓕᑦ ᓇᓂᑐᐃᓐᓇᖅ ᑲᓇᑕᒥ − ᐊᒻᒪ ᑕᐃᒪᓐᓇ ᑎᒍᐊᑦ ᐊᒥᓱᖑᓗᐊᖅᓯᒪᓕᖅᐳᑦ ᐋᓐᓂᐊᖃᖃᑦᑕᓕᖅᖢᑎᒡᓗ − ᑕᐃᒪᓐᓇ ᐃᖢᐊᕆᖏᑦᓯᐊᖅᖢᓂᐅᒃ ᐊᒥᓲᓗᐊᓕᕐᒪᑕ ᕿᒻᒥᑦ ᐋᓐᓂᐊᖅᑖᕋᔪᒃᖢᑎᒡᓗ.
ᐅᖃᓚᐅᖅᖢᓂᓗ ᓄᓇᓕᑦ ᐊᒥᓱᑦ ᐱᓕᕆᐊᖃᕆᐊᖃᓕᕐᒪᑕ, ᐃᑲᔪᖅᑐᖅᑕᐅᓗᑎᒃ ᒐᕙᒪᒃᑯᑦ ᑎᒥᖁᑎᖏᓐᓄᑦ ᓄᓇᓕᖕᓂᓗ ᐱᓕᕆᐊᕆᔭᐅᓗᑎᒃ, ᑕᒪᒃᑯᐊ ᑎᒍᐊᖃᖅᑐᑦ ᑲᒪᑦᓯᐊᕈᓐᓇᕆᐊᖃᖅᖢᑎᒃ ᑎᒍᐊᖏᑦᑕ ᐆᒪᔪᑦ ᐊᑐᕆᐊᖃᖅᑕᖏᓐᓂᒃ.
“ᓄᓇᖃᕈᕕᑦ ᐅᑭᐅᖅᑕᖅᑐᒥ ᑲᓇᑕᒥ ᐅᖓᓯᒃᑐᒥᐅᖑᓗᑎᑦ, ᑎᒍᐊᑦ ᐆᒪᔪᖁᑎᑦ ᐃᖢᐊᖅᓴᐃᔨᒧᑦ ᑕᑯᔭᐅᒋᐊᖃᖅᐸᑦ ᐋᓐᓂᐊᓕᖅᐸᑦ, ᑎᖕᒥᓲᒃᑰᕈᑎᒃᓴᖅᑖᕆᐊᖃᖅᐳᑎᑦ ᐊᒡᔭᕐᓗᒍ ᐃᖢᐊᖅᓴᐃᔨᒧᑦ ᑕᒪᓐᓇᓗ ᖁᕕᐊᓇᖏᑦᖢᓂ ᑕᐃᒪᓐᓇᐃᖃᑦᑕᕆᐊᖃᕐᓂᖏᑦ ᐃᖢᐊᖅᓴᖅᑕᐅᓯᒪᑦᓯᐊᕆᐊᖃᕋᓗᐊᖅᑎᓪᓗᒋᑦ.
“ᐅᖓᓯᒃᑐᒥᐅᑦ ᐱᔨᑦᓯᕋᕋᓱᖃᑦᑕᖅᐸᒃᑲ ᓄᓇᓕᖕᓂᒥᐅᑦ ᓄᓇᕗᒥ ᐊᒻᒪ ᒫᓂᑑᐸᒥ ᐱᔪᓐᓇᕐᓂᓗᒃᑖᕋ ᐊᑐᖅᖢᒍ, ᑭᓯᐊᓂ ᒫᓂᑑᐸᒥᓘᓐᓃᑦ, 65−ᖑᖕᒪᑕ ᐃᖅᑭᓕᑦ ᓄᓇᖃᐅᖅᑐᑦ ᐊᔾᔨᒌᖏᑦᑐᓂ ᓄᓇᓕᖕᓂ.
“ᐆᒪᔪᓄᑦ ᐃᖢᐊᖅᓴᐃᔨᑦ ᑕᒪᒃᑯᓄᖓ ᓄᓇᓕᖕᓄᑦ ᑎᑭᒍᓐᓇᖃᑦᑕᖏᒻᒪᑕ ᐊᒻᒪ, ᑎᑭᒍᓐᓇᕌᖓᒥᒃ, ᐃᓄᐃᑦ ᑕᐃᑲᓂᒥᐅᑦ ᑮᓇᐅᔭᖃᖏᒻᒪᑕ ᐊᑭᓕᐅᑎᒃᓴᓂᒃ ᐆᒪᔪᖁᑎᖏᑦ ᑲᒪᒋᔭᐅᔪᓐᓇᖁᑉᓗᒋᑦ.
“ᑕᐃᒪ, ᑕᐃᒪᓐᓇᐃᓐᓂᖓᓄᑦ, ᑕᒪᒃᑯᐊ ᐊᑐᐊᒐᓕᐅᖅᑎᐅᔪᑦ ᐱᓕᕆᒋᐊᖃᖃᑕᐅᓕᕐᒪᑕ ᐃᑲᔪᖅᑐᐃᒍᑎᖃᕐᓗᑎᒡᓗ ᐱᓕᕆᐊᒥᒃ ᐃᓄᐃᑦ ᐆᒪᔪᖁᑎᖏᑦ ᑲᒪᒋᔭᐅᖃᑦᑕᕈᓐᓇᖁᑉᓗᒋᑦ ᐅᖓᓯᒃᑐᒥᐅᑕᐅᒃᐸᑕᓗ ᐆᒪᔪᓄᑦ ᐃᖢᐊᖅᓴᐃᔨᑕᖃᖏᑦᑐᒥᐅᑕᐅᒃᐸᑕᓗ.”
ᕚᑦᓴᓐ ᐅᖃᓚᐅᖅᐳᖅ ᐃᓄᐃᑦ ᐱᓗᐊᖅᑐᒥᒃ ᑕᒪᒃᑯᐊ ᒪᒃᑯᒃᑐᑦ ᑲᒪᑦᓯᐊᕈᓐᓇᖅᐸᑕ ᐊᑐᖅᑕᐅᒋᐊᖃᖅᑐᓂᒃ, ᑕᐃᒪᓐᓇ ᑎᒍᐊᖃᖅᖢᑎᒃ ᐱᐅᕗᖅ.
ᐅᖃᓚᐅᖅᖢᓂᓗ ᐆᒪᔪᐃᑦ ᐃᓄᖃᕆᐊᖃᕐᒪᑕ ᒪᒃᑯᒃᑐᓄᓪᓗ ᑕᒪᓐᓇ ᐱᐅᑉᓗᓂ ᐱᕈᖅᓴᖅᑎᓪᓗᒋᑦ, ᑕᐃᒪᓐᓇ ᐃᓐᓇᕈᖅᐸᑕ ᐃᖢᕐᕆᔮᕐᓂᖅᓴᐅᖁᑉᓗᒋᑦ.
“ᐃᓄᐃᑦ ᓵᑕᐅᔭᒃᓴᐅᒋᐊᖃᖏᒻᒪᑕ ᓄᓇᖃᕐᓂᖏᓐᓄᑦ ᐆᒪᔪᓄᑦ ᐃᖢᐊᖅᓴᐃᔨᖃᖏᑦᑐᒥᐅᑕᓂ.
“ᑲᖏᖅᖠᓂᕐᒥᐅᑦ ᐃᖢᐊᖅᓴᕐᓂᖅᓴᐅᕗᑦ ᑎᑭᖃᑦᑕᕋᑉᑕ ᐊᕐᕌᒍᑕᒫᑦ ᑕᐃᒪᓐᓇ ᐃᑲᔪᕐᓂᖃᓪᓚᕆᒃᖢᓂᓗ.
“ᑭᓯᐊᓂ ᑲᖏᖅᖠᓂᖅ ᑕᐃᒪᓐᓇᐃᑦᑐᑑᕗᖅ ᓄᓇᕗᒥᐅᓂ, ᖃᐅᔨᒪᓂᕋ ᒪᓕᒃᖢᒍ, ᐆᒪᔪᓄᑦ ᐃᖢᐊᖅᓴᐃᔨᖃᖅᑐᑐᐊᖑᖕᒪᑕ ᐃᖃᓗᖕᓂ.”
“ᐊᒥᓱᑦ ᓄᓇᓕᖕᓂᒥᐅᑕᐃᑦ ᐅᖓᓯᖕᓂᖅᓴᐃᑦ ᑕᐃᒪᓐᓇ ᐱᑕᖃᖏᒻᒪᑕ ᑕᐃᒪᓐᓇ ᐆᒪᔪᖁᑎᖏᑦ ᐃᖢᐊᖏᑦᑐᒦᑎᑕᐅᕗᑦ.”
ᐅᓂᒃᑳᕈᑎᖃᖅᖢᓂ ᑲᖏᖅᖠᓂᕐᒥᒃ ᓄᓇᓕᖃᑦᓯᐊᕐᓂᖓᓄᑦ ᐱᔨᑦᓯᕋᐅᑎᖃᑦᓯᐊᖅᖢᑎᒡᓗ ᐃᓄᐃᓪᓗ ᑲᒪᑦᓯᐊᖃᑦᑕᖅᖢᑎᒃ ᐆᒪᔪᖁᑎᒥᖕᓂ, ᕚᑦᓴᓐ ᐅᖃᓚᐅᖅᐳᖅ, ᐊᕐᕌᒍᑕᒫᑦ, ᑕᒪᒃᑯᐊ ᐃᖢᐊᖅᓴᖅᑕᐅᒋᐊᖃᖅᑐᑦ ᖃᐅᔨᓴᖅᑕᐅᓚᐅᖅᖢᑎᒃ ᑲᒪᒋᔭᐅᔪᓐᓇᕐᒪᑕ ᑎᑭᓯᒪᔪᓄᑦ ᐃᖢᐊᖅᓴᐃᔨᓄᑦ ᑕᐃᒪᓐᓇᑎᒋ ᐊᔾᔨᒋᕐᓚᒃᖢᒋᓪᓗ ᖃᑉᓗᓈᑦ ᓄᓇᖓᓐᓂᒥᐅᑕᑎᑐᑦ.
ᐅᖃᓚᐅᖅᖢᓂ ᑕᒪᒃᑯᐊ ᐃᖢᐊᖏᔾᔪᑎᒋᒐᔪᒃᑕᖏᑦ ᐆᒪᔪᐃᑦ ᑕᒫᓂ ᖁᐃᓂᓗᐊᖅᑐᑦ, ᓯᐅᑎᒡᓗᒃᑐᑦ, ᑭᒍᑎᒡᓗᒃᑐᑦ ᐊᒻᒪ ᓇᒡᒍᐊᕐᓗᒃᑐᑦ ᐃᓐᓇᐅᓂᖅᓴᓂ ᕿᒻᒥᓂ.
“ᐱᔨᑦᓯᕋᖅᑕᐅᓗᐊᖏᑦᑐᓂ ᐅᖓᓯᒃᑐᒥᐅᑕᓂᒡᓗ ᓄᓇᓕᖕᓂ, ᐃᖢᐊᖏᓐᓂᖅᓴᐅᔪᓂᒃ ᖃᐅᔨᖃᑦᑕᖅᐳᒍᑦ ᑕᒪᒃᑯᐊ ᐱᐅᖏᑦᑐᑦ ᖁᐱᕐᕈᖃᖅᑐᑦ ᐊᒥᓱᓂᒃ, ᐱᕐᓕᖅᑐᑦ ᐊᒻᒪ ᓄᓇᒃᑰᕈᑎᓄᑦ ᑐᓗᖅᑕᐅᓂᑰᑉᓗᑎᒃ ᐋᓐᓂᐊᖃᖃᑦᑖᓕᖅᑐᑦ.
“ᖃᓄᐃᓗᐊᓚᐅᖏᓐᓂᖏᓐᓂ ᑲᐱᔭᐅᖃᑦᑕᖅᐸᑕ ᖁᐱᕐᕈᐃᔭᕈᑎᓂᒃ ᐱᑎᑕᐅᖃᑦᑕᖅᐸᑕᓗ, ᕿᑐᖏᐅᕈᓐᓇᐃᓪᓕᑎᑕᐅᖃᑦᑕᖅᐸᑕᓗ, ᐊᒻᒪ, ᐃᓅᓯᓗᒃᑖᖏᓐᓂ ᑎᒍᐊᓯ, ᖁᐃᒃᑎᑦᑕᐃᓕᒋᐊᖃᖅᐳᑦ ᖁᐃᓂᓗᐊᖅᑎᑦᑕᐃᓕᖃᑦᑕᕐᓗᒋᑦ.
“ᑕᒪᒃᑯᐊᓗᒃᑖᑦ ᐃᑲᔪᕐᓂᖃᕈᓐᓇᕐᒪᑕ ᑎᒍᐊᑉᓯᖕᓂᒃ ᐊᑯᓂᐅᓂᖅᓴᖅ ᐃᓅᓯᖃᕈᓐᓇᖁᑉᓗᒋᑦ ᐋᓐᓂᐊᖏᓪᓗᑎᒃ.”