ᓄᓇᕗᒥᐅᑦ ᐃᓅᓇᓱᓕᖅᑐᑦ “ᓇᔪᖅᑕᐅᔭᕆᐊᖃᙱᒻᒪᕆᒃᑐᓂᒃ ᐃᒡᓗᓂᒃ” ᐊᒻᒪᓗ ᑎᒥᖏᑦ ᐅᓗᕆᐊᓇᖅᑐᒥᑦᑐᑦ ᐃᒡᓗᖃᖅᑎᑕᐅᑎᓪᓗᒋᑦ ᐃᒡᓗᓂᒃ ᐃᓄᒋᐊᓗᐊᖅᑐᓂᒃ, ᐅᖁᖃᖅᑐᓂᒃ, ᐃᒪᒃᑯᑦ ᓱᕈᖅᓯᒪᔪᓂᒃ, ᓱᐱᔪᓂᒃ ᐊᒻᒪᓗ ᐊᓄᕆᑑᑎᖃᑦᑎᐊᙱᑦᑐᓂᒃ, ᑕᐃᒪᓐᓇ ᐅᖃᖅᖢᓂ ᐊᑐᕚᒥ ᓄᓇᕗᒥᐅᑦ ᑭᒡᒐᖅᑐᐃᔨᖓ ᒧᒥᓛᖅ ᖃᖅᑲᖅ, ᓴᖅᑭᑎᑦᑎᓚᐅᖅᑐᖅ ᐅᓂᒃᑳᓕᐊᕐᒥᒃ ᓯᑕᒻᒥᕐᒥ ᐱᒻᒪᕆᐊᓗᒃᑯᑦ ᐊᒃᓱᕈᕐᓇᖅᑐᒃᑰᕈᑕᐅᔪᒃᑯᑦ.
ᖃᖅᑲᖅ ᐊᔭᐅᖅᑐᐃᓕᕐᒥᔪᖅ ᒐᕙᒪᑐᖃᒃᑯᑦ ᖃᓄᖅᑑᕈᑎᖃᒃᑲᓐᓂᖁᑉᓗᒋᑦ ᑲᒪᕙᓪᓕᐊᔭᕆᐊᖃᕐᓂᕐᒧᑦ ᓄᓇᓄᒥ ᐃᒡᓗᓕᕆᓂᒃᑯᑦ ᐃᖢᐊᖏᓕᐅᕈᑕᐅᔪᓂᒃ “ᐊᒥᓱᓂᒃ ᐅᑭᐅᓂᒃ ᑮᓇᐅᔭᓕᖅᑐᖅᑕᐅᑦᑎᐊᖅᓯᒪᖃᑦᑕᙱᑎᓪᓗᒋᑦ.” ᐅᖃᒃᑲᓐᓂᖅᖢᓂ ᐃᒪᓐᓇ “ᐃᓱᒪᒋᔭᐅᑦᑎᐊᖅᓯᒪᙱᓐᓂᖏᑦ ᖁᔭᓈᖅᑕᐅᓯᒪᓂᖏᓪᓗ ᒐᕙᒪᖁᑎᒋᔭᐅᔪᓄᑦ ᒐᕙᒪᖁᑎᒋᔭᐅᓚᐅᖅᑐᓄᓪᓗ ᐊᒃᓱᕈᕐᓇᖅᑐᒃᑰᖅᓯᒪᔪᑦ, ᓯᕗᓕᕆᔭᐅᓚᐅᖅᑐᑦ ᐅᑉᓗᒥᐅᔪᕐᓗ ᐃᓄᖁᑎᒋᔭᐅᔪᑦ ᐊᒻᒪᓗ ᐱᑦᑎᐊᖅᑕᐅᓯᒪᙱᑦᑐᑦ.”
ᐅᖃᖅᖢᓂ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᐸᓯᔭᒃᓴᐅᙱᑦᑐᑦ ᐊᒥᒐᖅᓯᓂᒃᑯᑦ ᑮᓇᐅᔭᖃᑦᑎᐊᙱᓐᓂᕐᒧᑦ.
“ᐃᓄᐃᑦ ᑕᒪᕐᒥᒃ ᐊᖏᕐᕋᖃᑦᑎᐊᕆᐊᖃᕐᒪᑕ,” ᑕᐃᒪᓐᓇ ᐅᖃᖅᖢᓂ. “ᑖᒻᓇ ᐅᓂᒃᑳᓕᐊᖅ ᓇᓗᓇᐃᔭᐃᓇᓱᒃᑐᖅ ᑲᔪᓰᓐᓇᕐᒪᑕ ᐃᒡᓗᓕᕆᓂᒃᑯᑦ ᐱᔭᐅᔭᕆᐊᓖᑦ ᓄᓇᕗᒥ ᐊᒻᒪᓗ ᓂᐱᖃᒃᑲᓐᓂᕈᓐᓇᖁᑉᓗᒋᑦ ᐃᓄᐃᑦ ᐊᒻᒪᓗ ᓄᓇᕗᒥᐅᑦ ᑐᒃᓯᕋᖃᑦᑕᖅᓯᒪᑎᓪᓗᒋᑦ ᐅᓗᕆᐊᓇᖅᑐᖃᙱᑦᑐᓂᒃ ᓴᓗᒪᔪᓂᒃ ᐃᒡᓗᑖᕈᒪᓂᕐᒧᑦ ᑐᓴᖅᑕᐅᖃᑦᑕᖅᓯᒪᙱᒻᒪᑕ ᐊᑯᓂᐅᓗᐊᖅᑐᖅ. ᐃᓱᒪᒋᔭᐅᙱᓗᐊᕐᓂᖏᓐᓄᑦ ᓱᕈᖅᓯᒪᓕᖅᑐᑦ ᓇᓗᓇᐃᖅᑕᐅᔪᓐᓇᐃᓪᓕᓯᒪᔪᓪᓘᓐᓃᑦ ᖃᓄᖅ ᐱᔭᕆᐊᑐᑎᒋᓂᖏᑦ ᐅᐊᓗᐊᖑᓯᒪᖕᒪᑦ... ᐃᓄᐃᑦ ᐊᒻᒪᓗ ᓄᓇᕗᒥᐅᑦ ᐃᓅᓯᖏᑦ ᐅᓗᕆᐊᓇᖅᑐᒦᑦᑐᑦ.”
21-ᓂᒃ ᒪᒃᐱᒐᓕᒃ ᐅᓂᒃᑳᓕᐊᖅ, ᐃᒪᓐᓇ ᑕᐃᒎᓯᓕᒃ ᐅᑕᖅᑭᙳᖅᑐᑦ, ᐱᔾᔪᑎᖃᓗᐊᖅᑐᑦ ᓴᓪᓕᓂ, ᓇᐅᔮᓂ, ᐅᖅᓱᖅᑑᕐᒥ, ᑰᒑᕐᔪᖕᒥ ᐊᒻᒪᓗ ᑕᓗᕐᔪᐊᓂᒃ, ᖃᖅᑲᖅ ᐃᒡᓗᓕᕆᓂᒃᑯᑦ ᐳᓚᕋᕐᓂᖃᓚᐅᖅᑎᓪᓗᒍ 2020-ᒥ.
ᐅᓂᒃᑳᓕᐊᖓ ᐃᓗᓕᖃᖅᑐᖅ ᑕᑯᖃᑦᑕᖅᓯᒪᔭᖏᓐᓂᒃ ᐊᒻᒪᓗ ᐊᔾᔨᓂᒃ ᐊᔾᔨᓕᐅᖅᓯᒪᔭᖏᓐᓂᒃ ᐊᖏᕐᕋᕆᔭᐅᔪᓄᑦ ᐳᓚᕋᖃᑦᑕᓚᐅᖅᑎᓪᓗᒍ ᐊᒻᒪᓗ ᐅᖃᐅᓯᐅᓯᒪᔪᑦ ᐃᒡᓗᓂᒃ ᐊᑐᖅᑐᓄᑦ. ᐃᓱᒪᓕᐅᓚᐅᖅᑐᖅ ᐊᑎᖏᑦ ᐃᓚᐅᖃᑕᐅᑎᑦᑐᒪᙱᖦᖢᓂᒋᑦ ᑐᓴᐅᒪᔭᐅᔪᒪᓇᔭᙱᓐᓂᖏᑦ ᐃᓱᒪᒋᑉᓗᒋᑦ.
ᓴᓪᓕᓂ, 130 ᐃᓄᐃᑦ ᓄᓇᓕᖕᒥ 900-ᓂᒃ ᐃᓄᒋᐊᒃᑎᒋᔪᒥᒃ ᐅᑕᖅᑭᔪᑦ ᐃᒡᓗᑖᕐᓂᐊᕐᓂᕐᒧᑦ, ᐊᒻᒪᓗ 43-ᖑᔪᑦ ᒫᓐᓇᐅᔪᖅ ᐊᖏᕐᕋᖃᙱᑦᑐᑦ, ᒪᓕᒃᖢᒍ ᖃᖅᑲᐅᑉ ᐅᖃᐅᓯᕆᓯᒪᔭᖓ ᐅᖃᒃᑲᓐᓂᖅᖢᓂ 2014-2015-ᒥ ᑭᖑᓪᓕᖅᐹᒃᑯᑦ ᓄᑖᒥᒃ ᐃᒡᓗᓕᐅᕐᕕᐅᓚᐅᖅᑐᖅ ᓄᓇᓕᒃ.
“ᐃᒡᓗᑦ ᐊᓄᕆᑑᑎᖃᙱᓗᐊᖅᑐᑦ, ᓄᑕᕋᒃᑲ ᐊᖓᔪᖅᑳᒃᑲᓗ ᐋᓐᓂᐊᖏᓐᓇᓲᑦ. ᐃᓱᒪᔪᒍᑦ ᓇᑎᖅᐳᑦ ᓱᕈᖅᓯᒪᓇᓱᒋᑉᓗᒋᑦ ᐃᒪᕐᒧᑦ. ᐊᓇᕐᕕᖕᒥ, ᓇᑎᖅ ᑐᑎᑐᐃᓐᓇᖅᖢᒍ ᐃᒪᕐᒥᒃ ᓴᖅᑭᑦᑐᖃᓲᖅ,” ᐊᖑᑎ 1960-ᖏᓐᓂᙶᖅᓯᒪᔪᖅ ᓴᓪᓕᕐᒥᐅᑕᖅ ᑕᐃᒪᓐᓇ ᐅᖃᖅᖢᓂ ᖃᖅᑲᕐᒧᑦ.
ᓇᐅᔮᓂ − ᐃᓄᖃᖅᑐᖅ 1,100-ᓂᒃ − ᐃᒡᓗᓂᒃ ᐊᑕᖅᑭᔪᑦ 130 ᐃᓄᐃᑦ. ᑲᓇᑕᒥ ᓈᓴᐃᔩᑦ ᓇᓗᓇᐃᔭᐃᓯᒪᔪᑦ 115 ᓇᐅᔮᕐᒥᐅᑦ ᐃᒡᓗᖁᑎᖏᑦ ᐃᒪᓐᓇᐃᑦᑑᓂᖏᓐᓄᑦ “ᓇᒻᒪᙱᑦᑐᑦ” ᐊᒻᒪᓗ 60 ᐋᖅᑭᒋᐊᖅᑕᐅᔭᕆᐊᓖᑦ.
ᖃᖅᑲᖅ ᐅᖃᖅᖢᓂ ᑕᒪᕐᒥᒎᖅ ᖁᓖᑦ ᐃᒡᓗᑦ ᐅᕐᓂᓚᐅᖅᑕᖏᑦ ᓇᐅᔮᓂ ᐅᖁᖃᓚᐅᖅᑐᑦ ᐊᒻᒪᓗ ᐃᓄᒋᐊᓗᐊᓚᐅᖅᑐᑦ − ᐊᑕᐅᓯᖅ ᓯᑕᒪᓂᒃ ᐃᒡᓗᑕᓕᒃ 14-ᓂᒃ ᐃᓄᖃᖅᖢᓂ.
ᐊᓈᓇᐅᔪᖅ ᐅᐃᓕᔭᙱᑦᑐᖅ ᖃᖅᑲᕐᒧᑦ ᐅᖃᓚᐅᖅᑐᖅ, “ᐃᒡᓗ ᓇᓕᒧᒌᓕᖅᓯᒪᔮᙱᒻᒪᑦ.”
ᐱᖃᑎᖓᑦᑕᐅᖅ ᐊᕐᓇᖅ ᐊᖏᕐᕋᓕᒃ 7-ᓂᒃ ᐃᓄᖃᖅᑐᒥᒃ ᐅᖃᓚᐅᖅᑐᖅ ᐃᒪᓐᓇ, “ᐃᒐᓛᑦ ᐃᕐᖓᓲᑦ ᐊᒻᒪᓗ ᐃᒡᓗᑕᕐᒥ ᐅᖁᖃᖅᑐᑦ.”
ᐃᓚᖏᑦ ᓄᓇᕗᒥᐅᑦ ᖁᒃᓴᓱᓚᐅᖅᑐᑦ ᐃᒡᓗᒋᔭᖏᑦ ᑕᑯᔭᐅᑎᓐᓇᓱᒐᔭᕐᓂᕐᒧᑦ ᖃᖅᑲᕐᒧᑦ. “ᐅᖃᐅᑎᔭᐅᒐᔪᓚᐅᖅᑐᖓ ᐃᒪᓐᓇ ᐊᐃᑦᑖᖑᒐᓗᐊᖅ ᐅᕝᕙᓘᓐᓃᑦ ᑲᙳᓇᐅᒐᓗᐊᖅ, ᑭᓯᐊᓂ ᖁᔭᓕᓯᒪᔪᖓ ᐃᓄᐃᑦ ᒪᑐᐃᖓᑎᑦᑎᓚᐅᕐᒪᑕ ᐊᖏᕐᕋᒥᓂᒃ ᐆᒻᒪᑎᒥᓂᒡᓗ ᐅᕙᒻᓄᑦ. ᑕᑯᓚᐅᖅᑐᖓ ᐃᓄᖕᓂᒃ ᓴᓗᒪᑎᑦᑎᓇᓱᑦᑎᐊᖅᑐᓂᒃ ᐊᒻᒪᓗ ᐊᑦᑕᓇᖅᑐᖃᖅᑎᑦᑎᑦᑕᐃᓕᒪᓇᓱᒃᑐᓂᒃ, ᑐᓗᖅᑕᕐᕕᖃᕋᔪᒃᖢᑎᒃ,” ᑕᐃᒪᓐᓇ ᐅᖃᖅᖢᓂ ᖃᖅᑲᖅ.
“ᖁᒃᓴᓪᓚᒃᓯᒪᓚᐅᖅᑐᖓ ᖃᓄᐃᑦᑐᓂᒃ ᐃᒡᓗᖃᖅᑎᑕᐅᓂᖏᓐᓄᑦ ᓄᓇᕗᒥᐅᑦ. ᓈᒻᒪᙱᓐᓂᖅᓴᒻᒪᕆᐊᓗᒃ, ᑐᓴᒃᑲᓐᓂᖃᑦᑕᓚᐅᖅᑐᖓ ᐊᒥᓱᐃᖅᖢᖓ ᑕᐃᒪᐃᑦᑐᓂᒃ ᐃᒡᓗᖃᖃᑦᑕᖅᓯᒪᓕᕐᒪᑕ ᓇᒻᒪᙱᑦᑐᓂᒃ ᐊᒥᓱᓂᒃ ᐅᑭᐅᓂᒃ. ᓄᑕᖅᑲᑦ ᐃᓅᕙᓪᓕᐊᔪᑦ ᐃᓅᖃᑦᑕᖅᓯᒪᔪᑦ ᐅᖁᓕᐊᓗᖕᓂᒃ ᐊᖏᕐᕋᓂᒃ, ᐊᒻᒪᓗ ᒪᒃᑯᒃᑐᕐᔪᐊᖑᓕᖅᑐᑦ ᐅᕝᕙᓘᓐᓃᑦ ᐃᓐᓇᖁᓕᖅᑐᑦ. ᐊᒥᓱᑦ ᑕᐃᒪᐃᑦᑐᓂᒃ ᑭᓯᒥ ᐃᓅᖃᑦᑕᖅᓯᒪᔪᑦ ᐊᖏᕐᕋᖃᖃᑦᑕᖅᓯᒪᔪᑦ.
“ᐃᓄᐃᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᐊᑦᑕᓇᖅᑐᒥᑦᑕᕆᐊᖃᙱᓐᓂᖏᓪᓗ ᐱᓕᕆᐊᒃᓴᕆᔭᐅᔪᑦ ᓴᙱᓂᖃᖅᑐᓄᑦ ᐊᔭᐅᖅᑐᐃᔪᓐᓇᖅᑐᓄᓪᓗ. ᐊᔭᐅᖅᑐᐃᖏᓐᓇᕐᓂᐊᖅᑐᖓ ᒐᕙᒪᑐᖃᒃᑯᑦ ᐱᓕᕆᑦᑎᐊᖁᓗᒋᑦ. ᐱᓇᓱᐊᖏᓐᓇᕐᓂᐊᖅᑐᖓ ᐃᓄᐃᑦ ᓄᓇᕗᒥᐅᓪᓗ ᐱᔾᔪᑎᒋᓗᒋᑦ.”
ᐊᓐᑐᐊᓐ ᑐᕆᒻᐱᓕ, ᑎᑎᕋᖅᑎᖓ ᐅᑭᐅᖅᑕᖅᑐᓕᕆᔨᐅᑉ ᒥᓂᔅᑕᖓᓄᑦ, ᐅᖃᖅᖢᓂ ᒐᕙᒪᑐᖃᒃᑯᑦ ᑕᒪᑐᒥᙵ ᐱᒻᒪᕆᐅᑎᑦᑎᖕᒪᑕ ᐊᒻᒪᓗ ᐱᓕᕆᖃᑎᖃᐃᓐᓇᕐᓂᐊᖅᑐᒡᒎᖅ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᑕᒪᐃᓐᓂᒃ ᓄᓇᕗᒥᐅᓂᒃ “ᐃᑲᔪᖅᑐᖅᑕᐅᔪᓐᓇᖁᑉᓗᒋᑦ ᐃᓚᒌᑦ ᐃᑲᔪᖅᑕᐅᔭᕆᐊᓖᑦ, ᐃᓕᑕᖅᓯᓂᒃᑯᑦ ᐱᔪᓐᓇᐅᑎᖏᓐᓂᒃ, ᐃᒃᐱᒋᔭᐅᑦᑎᐊᕆᐊᖃᕐᓂᖏᓐᓂᒃ, ᐱᓕᕆᖃᑎᒋᔭᐅᔭᕆᐊᖃᕐᓂᖏᓐᓄᑦ ᐊᒻᒪᓗ ᐱᓕᕆᖃᑎᒌᖕᓂᒃᑯᑦ.”
“ᑕᐃᒪᐃᒻᒪᑦ ᐱᕈᖅᑎᑦᑎᔪᒍᑦ $500 ᒥᓕᔭᓂᒃ ᑲᒪᒋᔭᐅᔪᓐᓇᖁᑉᓗᒋᑦ ᐃᒡᓗᓕᕆᓂᒃᑯᑦ ᐱᔭᐅᔭᕆᐊᓖᑦ ᓄᓇᕗᒥ. ᐃᓚᐅᖃᑕᐅᔪᖅ $303 ᒥᓕᔭᓐ ᐃᑲᔫᑕᐅᓯᒪᔪᖅ ᓇᑉᐸᖅᑎᕆᓂᕐᒧᑦ, ᐋᖅᑭᒃᓱᐃᓂᕐᒧᑦ ᐅᕝᕙᓘᓐᓃᑦ ᐃᑲᔫᓯᐊᖅᑖᖅᑎᑦᑎᓂᒃᑯᑦ 2,600 ᐅᖓᑖᓃᑦᑐᓂᒃ ᐃᒡᓗᓂᒃ, ᐊᒻᒪᓗ $248 ᒥᓕᔭᒃᑲᓐᓂᖅ ᑲᒪᒋᔭᐅᖁᑉᓗᒋᑦ ᐊᔾᔨᐅᙱᑦᑐᒃᑯᑦ ᐃᑲᔪᖅᑕᐅᔭᕆᐊᓖᑦ ᓄᓇᕗᒥ,” ᑕᐃᒪᓐᓇ ᑐᕆᒻᐱᓕ ᐅᖃᖅᖢᓂ. “ᑮᓇᐅᔭᖁᑎᒋᔭᐅᔪᖅ 2018-ᒧᑦ ᐱᕈᖅᑎᑦᑎᓚᐅᕐᒥᔪᖅ $400 ᒥᓕᔭᓂᒃ ᓇᓗᓇᐃᔭᐃᓂᕐᒧᑦ ᑮᓇᐅᔭᖅᑖᕈᑎᒃᓴᓄᑦ ᐃᓄᐃᑦ ᐃᒡᓗᓕᐅᕈᑎᖏᓐᓄᑦ ᐃᓄᐃᑦ ᓄᓇᖓᓂᒃ. ᐱᓕᕇᓐᓇᕐᓂᐊᕐᒥᔪᒍᑦ ᐃᓄᐃᑦ ᑕᒪᕐᒥᒃ ᐊᑦᑕᓇᖅᑐᖃᙱᑦᑐᒥᒃ ᑮᓇᐅᔭᐃᔭᕐᓇᓗᐊᙱᑦᑐᒥᒃ ᐊᖏᕐᕋᖃᕈᓐᓇᖁᑉᓗᒋᑦ, ᐊᒻᒪᓗ ᓄᖅᑲᔾᔮᙱᑦᑐᒍᑦ ᐱᐊᓂᒃᓯᖅᑳᕐᓇᑕ ᐱᓕᕆᖃᕆᓇᓱᒃᑕᑉᑎᓐᓂᒃ ᐃᓱᓕᑦᑎᔪᒪᒐᑉᑕ ᐊᖏᕐᕋᖃᙱᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᑲᓇᑕᓕᒫᒥᒃ.”