ᓴᖅᑭᑎᑕᐅᓂᖓᓂ CBC–ᑯᑦ ᖁᑦᑎᒃᑐᒥ ᐅᑭᐅᑦᑕᖅᑐᒥ ᐅᓯᑲᑦᑕᖅᑎᐅᔪᓂ, ᑲᓇᑕᒥ ᓯᒡᔭᖅᐸᓯᖕᓂ ᓯᒡᔭᖅᐸᓯᖕᓄᑦ ᐱᕕᒃᓴᖃᕐᓂᐊᖅᐳᑦ ᑕᑯᓂᕐᒥ ᖃᓄᐃᓕᐅᕆᐊᖃᕐᓂᖏᓐᓂ ᐅᓯᑲᑦᑕᕐᓂᕐᒥ ᐱᖁᑎᓂᑦ ᓄᓇᕗᒻᒧ ᓄᓇᓕᐅᔪᓄᑦ.
ᐅᓇ ᓄᑖᖑᓛᖑᔪᖅ ᑕᐃᒪᐃᖏᓐᓇᐅᔭᖅᑐᒥ ᐱᓕᕆᔾᔪᓯᐅᔪᒥ ᐅᑭᐅᖅᑕᖅᑐᒥ–ᑐᙵᕕᓕᖕᒥ ᑕᓚᕖᓴᒧᑦ ᐱᓕᕆᐊᖑᓕᐊᖑᔪᒥ ᑕᑯᒃᓴᐅᑎᑦᑎᕗᖅ ᐊᓯᒃᑲᓐᓂᐊᓂ ᐃᓱᒪᒋᔭᐅᓂᐅᔪᒥ ᐊᒃᓱᕈᕐᓂᐅᔪᓂ ᐅᑭᐅᖅᑕᖅᑐᒥ ᐃᓅᓯᐅᔪᒥᑦ, ᑭᓯᐊᓂ ᑕᐃᒪᐃᒐᔪᒃᑐᒥ ᐱᙳᐊᕐᓂᐅᔪᒥ ᐊᒻᒪ ᐱᓗᐊᙱᓐᓂᖅᓴᐅᓪᓗᓂ ᖃᐱᓚᓇᕐᓂᐅᔪᒥ.
ᖃᔅᓯᒐᓚᖕᓂ ᑕᑯᒃᓴᐅᑎᑦᑎᓂᖃᖅᓯᒪᕗᖅ ᖄᖏᖅᓯᒪᓕᖅᑐᓂ ᐊᕐᕌᒍᓂ ᖁᓕᓂᑦ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐅᑭᐅᖅᑕᖅᑐᒥ – ᑕᒪᕐᒥᒃ ᓂᐅᕕᐊᒃᓴᖃᕋᓱᐊᕐᓂᐅᔪᓂ ᑲᒪᓇᖅᑎᑦᑎᓇᓱᐊᖅᑐᓂ ᖃᓪᓗᓈᓄᑦ ᖁᙱᐊᖅᑎᐅᔪᓄᑦ ᑲᒪᑐᐃᓐᓇᕈᓐᓇᖅᑐᓂ ᐊᔪᕐᓇᕈᑕᐅᕙᒃᑐᓂ ᓵᙵᔭᐅᔪᓂ ᐅᑭᐅᖅᑕᖅᑐᕐᒥᐅᓄᑦ ᑎᑭᓴᖅᑕᒥᓂᑦ ᓂᕿᓂᑦ ᐱᓇᓱᐊᖅᑐᓂ ᐅᕝᕙᓘᓐᓃᑦ ᑑᖅᑐᓂ ᓯᑯᒃᑯᑦ ᒪᑦᑎᑦᑕᐅᓯᓕᖅᓯᓂᕐᒧᑦ ᐃᖃᓗᖕᓄᑦ.
ᑕᒪᕐᒥᓚᑦ ᖄᖏᓐᓇᑯᓗᐊᓂ ᓴᖅᑭᔮᖅᑎᑦᑎᓂᐅᕗᖅ, ᐅᓇᐅᒐᓗᐊᕈᓂ ᓯᑯᒥᒃ ᐊᖅᑯᒻᒥ ᐊᖁᑎᐅᔪᑦ, ᑕᑯᒃᓴᐅᑎᑦᑎᓚᐅᖅᑐᒥ ᑕᐃᒪᓐᒧᑦ ᐅᔭᕋᖕᓂᐊᕐᕕᖕᒥ ᐅᑭᐅᒃᑯᑦ ᐊᖅᑯᑎᖓᓂ ᐅᓯᑲᑦᑕᕐᓂᐅᔪᒥ ᐱᓕᕆᔾᔪᓯᖓᓂ ᓄᓇᑦᓯᐊᕐᒥ; ᐅᕝᕙᓘᓐᓃᑦ ᓯᑯᒃᑯᑦ ᒥᓲᑦ ᖃᖓᑕᓲᖅᑎᓂᑦ, ᑕᑯᒃᓴᐅᑎᑦᑎᔪᒥ ᒪᕐᕈᖓᓂ ᓄᓇᕐᔪᐊᒥ ᐅᓇᑕᕐᔪᐊᕐᓂᐅᓚᐅᖅᑐᒥ ᖃᖓᑕᓲᖑᕙᓚᐅᖅᑐᓂ ᓄᓇᑦᓯᐊᕐᒥ Buffalo Airways–ᖓᓐᓂ; ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᖃᖓᑕᓲᖅ, ᐱᓪᓚᕆᐅᙱᑦᑐᒥ ᐱᙳᐊᕐᓂᐅᔪᒥ ᒪᓕᒃᑐᒥ ᐊᒃᓱᕈᕐᓂᐅᔪᓂ ᐊᒻᒪᓗ ᐊᒃᓱᕈᕈᑕᐅᔪᓂ ᐱᓪᓚᕆᙳᐊᒥ ᖃᖓᑕᓲᖅᑎᐅᔪᓄᑦ, ᐱᐅᙱᑦᑐᒻᒪᕆᐅᓪᓗᓂ ᑕᓚᕖᓴᐅᓚᐅᖅᑐᒥ ᐊᒻᒪ ᐊᒥᓱᓂ ᐃᓱᒪᖅᓲᑎᖃᕐᔪᐊᓚᐅᖅᑐᓂ ᐅᑭᐅᖅᑕᖅᑐᒦᓐᓂᖓᓂ.
ᑕᐃᒪᑐᖅ ᐅᓯᑲᑦᑕᖅᑏᑦ, ᓴᖅᑭᑎᑕᐅᔪᒥ ᑭᐅᓪᕕᓐ ᕆᑦᕗᕐᔅᒧᑦ ᕼᐃ ᕆᕗᕐ, ᓄᓇᑦᓯᐊᕐᒥᐅᑕᖅ, ᐊᒥᐊᕆᓂᐊᖅᐳᖅ ᓱᓕᓂᖅᓴᐅᔪᒥ ᐱᓕᕆᓂᐅᔪᒥ. ᐅᓂᒃᑳᒃᓴᖃᓪᓚᕆᖕᒪᑦ ᐅᖃᐅᓯᖃᕐᓂᕐᒧᑦ ᐅᓯᑲᑦᑕᕐᓂᐅᔪᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ, ᒪᑐᐃᖅᓯᓪᓗᐊᖅᑐᒥ ᐃᔨᖏᓐᓂ ᖃᓪᓗᓈᑦ ᓄᓇᖓᓐᓂᕐᒥᐅᑕᐅᔪᓄᑦ ᐊᑭᑐᕐᔪᐊᕐᓂᖓᓂ ᐊᒻᒪ ᐊᔪᕐᓇᕐᓂᖓᓂ ᑖᔅᓱᒧᖓ ᐱᓕᕆᐊᖑᓇᓱᐊᕐᔪᐊᖅᑐᒥ. ᐅᑯᐊ ᑕᑯᒃᓴᐅᑎᑕᐅᕙᓚᐅᖅᑐᑦ ᐱᐅᒋᔭᐅᓂᐅᓚᐅᖅᑐᓂ ᓇᓗᓇᐃᒃᑯᑕᐅᓂᐊᖅᐸᑦ, ᑲᓇᑕᒥᐅᑕᑦ ᐊᓕᐊᓇᐃᒋᔭᖃᑦᑎᐊᕐᓂᐊᖅᐳᑦ ᐆᒥᖓ ᓄᑖᖑᓛᖑᔪᒥ ᐅᑭᐅᖅᑕᖅᑐᒥ ᓯᑯᒥ–ᐱᔾᔪᑎᓕᖕᒥ ᑕᑯᓐᓇᒐᒃᓴᐅᔪᒥ ᐊᒻᒪ ᓯᕗᓪᓕᐅᖃᑕᐅᓂᐊᖅᐳᖅ ᐊᖏᓛᖑᔪᒥ ᓄᓇᐅᔪᒥ.
ᕿᒻᒪᑯᓂ ᐱᕚᓪᓕᕈᑎᖃᑐᐃᓐᓇᕆᐊᖃᖅᐳᖅ ᒪᓕᒐᒃᓴᐅᓂᐊᖅᑐᓂ, ᓲᕐᓗ ᐱᓕᕆᖃᑕᐅᔪᒪᓂᕐᒧᑦ ᐅᑭᐅᖅᑕᖅᑐᒥ ᐅᓯᑲᑦᑕᕐᓂᐅᔪᒥ ᐱᓕᕆᐊᖑᔪᓄᑦ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᐳᓚᕋᖅᑐᓕᕆᓂᕐᒥ ᖁᙱᐊᖅᑎᐅᔪᑦ ᐃᓕᑦᑎᕙᓪᓕᐊᓂᖏᓐᓂ ᑲᔾᔮᕐᓇᖅᑐᓂ ᓄᓇᓕᐅᔪᓂ ᐊᒻᒪ ᐃᓕᖅᑯᓯᖓᓐᓂ.
ᖁᑦᑎᒃᑐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑎᐅᔪᑦ ᓇᓗᓇᐃᖅᓯᓂᖓᓂ ᐊᓯᓕᒫᖓᓐᓂ ᖃᓄᑎᒋ ᐊᔪᕐᓇᕐᓂᖓᓂ ᐅᓯᑲᑦᑕᕐᓂᕐᒧᑦ ᐱᖁᑎᓂᑦ ᓄᓇᕗᒻᒥᐅᓄᑦ.
ᓄᓇᖃᖅᑎᐅᔪᓄᑦ ᐸᖕᓂᖅᑑᒥ, ᖃᐅᓱᐃᑦᑐᖅ ᒥᑦᑎᒪᑕᓕᖕᒥᓪᓘᓐᓃᑦ, ᐊᑦᑎᖅᓯᓗᓂ ᖃᔅᓯᐊᕐᔪᖕᓂ, ᐅᒥᐊᕐᔪᐊᒃᑰᖅᑎᑦᑎᔭᕆᐊᖃᖅᐸᖕᓂᖏᓐᓂ ᑭᓱᓕᒫᓂᑦ ᑎᑭᐅᔾᔨᓂᕐᒧᑦ ᓄᓇᓯᐅᑎᓂᑦ ᐃᒡᓗᒃᓴᓄᑦ ᓱᓇᒃᑯᑖᖏᓐᓂ ᓂᕿᓄᑦ ᐊᕐᕌᒍᑕᒫᒥ ᓱᓕᓂᐅᕗᖅ.
ᑕᐃᒃᑯᐊ ᐅᑕᖅᑭᔪᓂ ᐱᒻᒪᕆᐅᔪᓄᑦ ᐅᓯᔭᐅᔪᓄᑦ ᓂᕆᐅᖕᓂᖃᓲᖑᒋᕗᑦ ᓯᓚ ᐱᙳᐊᑦᑎᐊᕐᓂᖓᓂ ᓯᑯᕐᓘᑕᐅᔪᓂ ᖃᓄᐃᓐᓂᐅᔪᓄᑦ ᓱᒃᑲᐃᒃᑎᒋᐊᕐᔪᐊᖅᓯᔪᓐᓇᕐᒪᑦ ᐊᒻᒪ ᐊᓯᔾᔩᓗᓂ ᐊᑐᖅᑕᐅᔪᒃᓴᓂ.
2018–ᒥ, ᓲᕐᓗ, ᐱᐅᙱᑦᑐᒥ ᓯᑯᕐᓘᑎᖃᕐᓂᕐᓄᑦ ᖃᓄᐃᓐᓂᐅᔪᓂ ᑐᕌᖅᑎᑦᑎᓂᖃᓚᐅᖅᐳᖅ ᑭᖑᕙᕆᐊᕐᔪᐊᕐᓂᐅᔪᓂ ᑕᑯᓚᐅᖅᑐᒥ ᓄᓇᑦᓯᐊᕐᒥ ᑐᙵᕕᖃᖅᑐᒥ ᑕᕆᐅᕐᒥ ᐅᓯᑲᑦᑕᕐᓂᕐᒧᑦ ᐱᔨᑦᑎᕋᖅᑎᐅᔪᓂ (MTS), ᐱᓕᕆᔾᔪᔾᔨᕙᒃᑐᓂ ᕿᑎᕐᒥᐅᓂ, ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᓐᓃᑦᑐᒥ ᐱᖓᓱᓄᑦ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒧᑦ.
ᖃᖓᑕᓲᒃᑯᑦ ᐅᓯᓂᐅᕙᒃᑐᑦ ᑎᑭᑎᑦᑎᕙᒃᑐᓂ ᐊᖏᔪᓂ ᓂᕿᓂᑦᑕᐅᖅ, ᓱᓕᓂᐅᔪᑦ ᐅᓯᑲᑦᑕᕐᓂᕐᒥ ᐱᖁᑎᓂᑦ ᐅᑭᐅᖅᑕᖅᑐᒥ ᑐᑭᖃᖅᐳᖅ ᖁᑦᑎᒃᑐᒥ ᐊᑭᐅᔪᒥ ᐆᒪᓇᓱᐊᕐᓂᕐᒧᑦ ᑭᒃᑯᓕᒫᓄᑦ ᓄᓇᖃᖅᑐᒥ ᐅᑭᐅᖅᑕᖅᑐᒥ.
ᖃᓪᓗᓈᓂ ᓄᓇᖃᖅᑎᐅᔪᑦ ᐱᕙᓪᓕᐊᑎᑦᑎᓪᓗᑎᒃ ᐊᖏᓂᖅᓴᒥ ᑐᑭᓯᐅᒪᓂᖓᓐᓂ ᐃᓅᓯᐅᔪᒥ ᓄᓇᕗᒻᒥ ᐃᑲᔪᑐᐃᓐᓇᓪᓗᐊᖅᐳᑦ ᐃᑲᔪᖅᓱᐃᓂᕐᒥ ᖃᐃᖁᔨᓂᐅᔪᓂ ᒥᒃᖠᒋᐊᖅᑎᑦᑎᒋᐊᕐᓂᕐᒧᑦ ᐱᔭᕆᐊᖃᕐᓂᐅᔪᓂ ᐃᓄᖕᓄᑦ ᓄᓇᕗᒻᒥ, ᐱᒋᐊᕐᓗᑎᒃ ᐱᔭᕆᐊᖃᕐᓂᐅᔪᒥ ᐱᐅᓯᒋᐊᖅᑐᒥ ᐅᓯᑲᑦᑕᕐᓂᐅᔪᒥ, ᑭᓯᐊᓂᑦᑕᐅᖅ ᐊᑭᖓᓂ ᐆᒪᓇᓱᐊᕐᓂᕐᒧᑦ, ᐱᔭᕆᐊᖃᕐᓂᕐᒥ ᓈᒻᒪᒃᑐᒥ ᐃᓅᓕᓴᖅᑕᐅᓂᕐᒧᑦ ᐱᔨᑦᑎᕋᕐᓂᕐᒥ, ᓈᒻᒪᒃᑐᒥ ᑮᓇᐅᔾᔭᒃᓴᕈᑕᐅᔪᓂ ᐱᒋᐊᖅᕈᑕᐅᔪᓂ ᐊᒻᒪ ᐃᒡᓗᒃᓴᖃᒃᑲᓐᓂᕐᓂᕐᒧᑦ.
ᐅᕘᓇ ᖃᐅᒻᒪᒃᑎᑦᑎᓂᖃᕐᓂᐊᖅᐳᖅ ᓈᑦᑎᖑᔭᒥ ᐅᓐᓄᖓᓂ ᑭᐱᙳᐃᔭᐃᓂᐅᔪᒥ ᑕᒪᒃᑭᒐᓚᖕᓄᑦ, ᐃᒻᒪᖄ ᐅᔾᔨᕆᓂᐊᖅᐳᑦ ᑲᓇᑕᒥᐅᑕᓪᓚᕆᖕᓂ ᐃᓅᓂᖃᖅᑐᒥ ᐆᒥᖓ ᓱᓕᓂᐅᔪᒥ.
ᑕᐃᒫᒃ ᖃᓪᓗᓈᓂ ᓄᓇᖃᖅᑐᓂ ᑲᑎᒪᔨᕐᔪᐊᖑᔪᓂ ᐊᒻᒪᓗ ᐃᓄᖁᑎᒋᔭᐅᔪᑦ ᐃᒃᓯᕚᖅᑎᓪᓗᒋᑦ ᑮᓇᐅᔭᓄᑦ ᐊᑐᒐᒃᓴᓄᑦ ᐱᓕᕆᓂᐅᔪᒥ ᐊᕐᕌᒍᑕᒫᒥ ᐊᒻᒪ ᐃᓱᒪᑎᓪᓗᒋᑦ ᖃᓄᐃᒻᒪ ᐊᒥᓱᓂ ᑖᒃᓯᓂᑦ ᐊᑭᓖᔨᐅᔪᓄᑦ ᑮᓇᐅᔭᖏᓐᓂ ᐊᑐᖅᑕᐅᕙᖕᓂᖓᓂ ᐅᑭᐅᖅᑕᖅᑐᒥ, ᑕᐃᒪᑐᖅ ᖁᑦᑎᒃᑐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑎᐅᔪᑦ ᑕᑯᑎᑦᑎᓂᐊᖅᐳᑦ ᐊᒃᓱᕈᕐᓇᖅᑐᒥ ᐊᖅᑯᑎᒋᔭᖓᓐᓂ ᐱᓇᓱᐊᕐᓂᕐᒧᑦ ᐱᔭᕆᐊᖃᕐᓂᐅᔪᓂ ᐊᓯᖏᓐᓂ ᑲᓇᑕᒥᐅᑕᓂ ᐃᓱᒪᖅᓲᑎᒋᕙᒃᑕᖏᓐᓂ.