ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕘᑉ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᖓᔪᖅᑳᖓ, ᐅᖃᐅᔾᔨᖅᓯᒪᕐᔪᐊᖅᐳᖅ ᓄᓇᕗᒻᒥᐅᓂ ᖁᕕᐊᓱᒡᕕᖕᒥ ᑲᑎᖃᑎᒌᖕᓂᐅᔪᓂ ᐃᓄᑭᑦᑑᖁᕙᖏᑦ.
“ᖁᕕᐊᓱᒡᕕᖕᒥ ᑎᑭᐅᔾᔭᐅᓯᒪᑎᓪᓗᑕ, ᖃᐅᔨᒪᕗᖓ ᐊᒥᓱᑎᒍᑦ ᖁᕕᐊᓱᖃᑎᖃᕈᒪᕗᒍᑦ ᐃᓚᑦᑎᓐᓂ ᐊᒻᒪ ᐱᖃᓐᓇᕆᔭᑦᑎᓐᓂ,” ᐹᑐᓴᓐ ᐅᖃᓚᐅᖅᐳᖅ. “ᑕᒪᑐᒪᓂ ᐊᕐᕌᒎᔪᒥ ᑭᓯᐊᓂ, ᐸᕐᓇᐃᓂᖅ ᖁᕕᐊᓱᒍᑎᒋᔭᑦᑎᓐᓂ ᐃᓚᖃᕆᐊᖃᖅᐳᖅ ᑕᒪᒃᑭᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᐃᓕᓯᒪᓂᖏᓐᓂ. ᑐᕌᒐᒃᓴᓪᓗᐊᑕᕗᑦ ᖁᕕᐊᓱᒡᕕᓕᒫᒥ ᓇᓗᓇᐃᖅᓯᓪᓗᐊᖅᐳᖅ ᐃᖏᕐᕋᐃᓐᓇᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᕐᒧᑦ ᐃᓚᑦᑎᓐᓂ, ᐱᖃᓐᓇᕆᔭᑦᑎᓐᓂ ᐊᒻᒪᓗ ᐃᓄᑐᖃᑦᑎᓐᓂ. ᑲᑎᓐᓂᐅᔪᓂ ᐃᓄᑭᑎᑦᑎᓗᑎᑦ, ᓄᓇᓕᑦᑎᓐᓂ ᐊᑦᑕᓇᔾᔭᐃᖅᓯᓯᒪᓂᕐᒧᑦ.”
ᐅᓄᕐᓂᐅᔪᓂ ᖃᓄᐃᓐᓂᖃᖅᑐᓂ ᓄᕙᒡᔪᐊᕐᓇᖅ-19–ᒥ ᐊᕐᕕᐊᓂ ᑲᑕᒃᓯᒪᕗᖅ 34–ᓄᑦ ᐅᓄᕐᓂᖅᓴᓂ ᐃᓄᖕᓂ ᖃᓄᐃᑦᑐᓐᓃᖅᓯᒪᓕᕐᒪᑕ ᐊᒻᒪᓗ ᓄᑖᓂ ᐊᐃᑦᑐᐃᓂᐅᔪᓂ ᖃᐅᔨᓯᒪᙱᓚᑦ ᑎᓯᐱᕆ 18–ᖑᓕᖅᑎᓪᓗᒍ, ᐅᖃᐅᓯᐅᓪᓗᓂ ᓄᓇᕗᒻᒥ ᒐᕙᒪᒃᑯᓐᓂ.
ᑲᑎᓪᓗᒍ, 225–ᖑᔪᑦ ᓄᓇᕗᒻᒥᐅᑦ ᖃᓄᐃᑦᑐᓐᓃᖅᓯᒪᕗᑦ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ.
ᐃᖅᑲᐃᑎᑦᑎᔪᒪᕗᖓ ᓄᓇᕗᒻᒥᐅᓂ ᑭᓯᐊᓂ ᐊᐃᑦᑐᐃᖃᑦᑕᐅᑎᓯᒪᓂᖅ ᐋᓐᓂᐊᒥᒃ ᐅᖃᐅᓯᐅᒍᓂ ᖄᖏᕐᓂᖓᓂ, ᐅᓄᕐᓂᐅᔪᓂ ᖃᓄᐃᓐᓂᐅᔪᓄᑦ ᐊᓯᔾᔨᖃᑦᑕᕐᓂᐊᖅᐳᖅ ᑕᐃᒪᐃᒐᔪᒡᓗᓂ,” ᐅᖃᓚᐅᖅᐳᖅ ᐹᑐᓴᓐ. “ᑭᒃᑯᓕᒫᓂᒃ ᐊᔭᐅᕆᔪᒪᕗᖓ ᐊᒃᓱᕈᐃᓐᓇᖁᓪᓗᒋᑦ, ᐃᑲᔫᑎᖃᖅᐸᓪᓕᐊᖕᒪᑕ. ᐊᔪᕐᓇᕋᓗᐊᖅᑎᓪᓗᒍ ᐊᒻᒪ ᑕᖃᓇᖅᖢᓂ, ᐊᑐᕆᐊᖃᖅᐳᖅ ᐊᒻᒪᓗ ᐃᖏᕐᕋᐃᓐᓇᕆᐊᖃᖅᐳᖅ ᐱᓇᓱᐊᕈᓯᐅᓂᐊᖅᑐᓄᑦ ᑎᑭᑉᐸᓪᓕᐊᔪᓄᑦ. ᖁᔭᓐᓇᒦᒃ ᓄᓇᓕᖕᒥᐅᑕᓕᒫᓄᑦ ᐱᓕᕆᖃᑕᐅᓂᖏᓐᓂ ᐱᓕᕆᐊᒃᓴᐅᔪᓂ.”
ᐅᐸᒃᓯᒪᓂᐅᓚᐅᖅᑐᓂ ᖃᐅᔨᓴᖅᑕᐅᓂᑦ ᑕᒪᒃᑭᓂ ᐊᒃᑐᖅᑕᐅᓯᒪᔪᓄᑦ ᓄᓇᓕᐅᔪᓄᑦ ᐃᖏᕐᕋᐃᓐᓇᖅᐳᖅ ᐊᒻᒪᓗ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᐅᔪᑦ ᓇᐅᑦᑎᖅᓱᖅᐳᑦ ᑭᒃᑯᓕᒫᓂᒃ ᐅᐸᒃᑕᐅᑦᑕᐃᓕᒪᔪᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᖅᐳᑦ.
ᑎᓯᐱᕆ 18–ᖑᓕᖅᑐᒥ, ᐊᕐᕕᐊᓂ ᖃᐅᔨᓴᖅᑕᐅᓂᐅᔪᑦ ᓴᖅᑭᑎᑦᑎᓯᒪᕗᑦ 992–ᓂ ᐱᖃᙱᑦᑐᓄᑦ ᖃᐅᔨᓴᖅᑕᐅᓂᑯᓂ.
ᓇᐅᑦᑎᖅᓱᖅᑕᐅᓂᐅᔪᒥ ᓴᓂᑭᓗᐊᕐᒥ, ᑲᖏᖅᖠᓂᖅ ᐊᒻᒪᓗ ᑎᑭᕋᕐᔪᐊᒥ ᐃᖏᕐᕋᐃᓐᓇᖅᐳᖅ.
ᑭᓇᑐᐃᓐᓇᖅ ᐱᔾᔪᑎᒃᓴᖃᕈᓂ ᐅᒃᐱᕈᓱᖕᓂᕐᒧᑦ ᓴᖅᑭᔮᕐᕕᐅᔪᕕᓂᐅᓂᕐᒧᑦ ᓄᕙᒡᔪᐊᕐᓇᖅ-19–ᒧᑦ ᐅᖃᐅᔾᔪᖅᑕᐅᔪᑦ ᐅᖃᓗᖁᔭᐅᓪᓗᑎᒃ ᓄᕙᒡᔪᐊᕐᓇᖅ-ᑐᐊᕕᕐᓇᖅᑐᒧᑦ ᐅᖃᓗᒡᕕᒃᓴᐅᔪᒧᑦ ᐅᕗᖓ 1-888-975-8601 ᐊᑯᓐᓂᖓᓂ 10 ᐅᓪᓛᒃᑯᑦ ᐊᒻᒪ 6 ᐅᓐᓄᒃᑯᑦ ᑲᓇᖕᓇᒥ ᓯᕿᙳᔭᖓᓄᑦ, ᐅᕝᕙᓘᓐᓃᑦ ᐅᖃᐅᔾᔨᓗᑎᒃ ᓄᓇᓕᖕᓂ ᐋᓐᓂᐊᕕᖓᓂ ᐃᕐᙲᓐᓇᑲᐅᑎᒋ, ᐊᒻᒪᓗ ᐅᐸᒃᑕᐅᑦᑕᐃᓕᓯᑲᐅᑎᒋᓗᑎᒃ ᐅᓪᓗᓄᑦ 14–ᓄᑦ. ᐋᓐᓂᐊᕕᓕᐊᙱᓪᓗᑎᑦ ᓇᖕᒥᓂᖅ.