ᕼᐊᐅᒥᒃ ᔪᐃ ᐊᖓᔪᖅᑳᖏᑦ ᑐᖁᓐᓂᕐᒪᑕ ᐊᕐᕌᒍᖃᖅᑎᓪᓗᒍ 6-ᓂᒃ, ᑭᓯᐊᓂᓕ ᑕᐃᒪᖓᓂᑦ ᑲᒪᒋᔭᐅᑦᑎᐊᖏᓐᓇᕋᒥ ᖃᑕᖑᑎᒥᓄᑦ ᐃᓄᕗᖅ ᓱᓕ. ᑕᐃᒪᖓᓂᑦ ᑕᕝᕙ ᐃᑲᔪᖅᑎᐅᖏᓐᓇᓕᖅᐳᖅ ᐊᓯᒥᓂᒃ ᑐᓐᓂᐊᓱᖁᖏᓱᓂᒋᑦ ᐃᓅᓯᕐᒥᓂ.
ᐃᑲᔪᖃᖅᑕᖅᓯᒪᔪᖅ ᐊᒥᓱᓂ ᑎᒥᖁᑎᒋᔭᐅᔪᓂ ᐊᒥᓱᓂᓗ ᐱᕙᓪᓕᐊᑎᑕᐅᔪᓂ ᓄᓇᓕᖓᓂ ᐊᖏᕐᕋᖓᓂ ᐃᖃᓗᒃᑑᑦᑎᐊᒥ, ᔪᐃ ᑕᐃᒪᖓᓂᑦ ᐃᑲᔪᐃᓐᓇᐅᔭᕐᒪᑦ ᓄᓇᓕᖕᒥᓂ ᖃᐅᔨᒪᔭᐅᓯᒪᓕᖅᑐᖅ ᐊᒥᓱᓄᑦ ᐊᓱᐃᓛᒃ ᑲᓇᑕᒥ 150 “ᓂᓪᓕᕋᔪᐃᑦᑐᑦ ᐊᔪᖏᑦᑐᑦ” ᐃᓕᑕᕆᔭᐅᔪᑎᖓᓂᒃ ᐅᔭᒥᒃᑖᕐᓂᐊᓕᖅᐳᖅ ᓯᓂᑐ ᑎᓂᔅ ᐹᑐᓯᓐᒥᑦ ᑕᒪᑐᒪᓂ ᕿᑎᕐᒥᐅᑦ ᓂᐅᕕᐊᒃᓴᖃᖃᑦᑕᖅᑐᑦ ᑕᑯᒃᓴᐅᑎᑦᑎᓕᖅᐸᑕ ᕖᕗᐊᕆ 12-ᒥᑦ 14-ᒧᑦ.
ᔪᐃ, ᓄᓇᓕᖓᓂ ᖃᐅᔨᒪᔭᐅᔪᖅ ᑕᐃᔭᐅᕙᒃᖢᓂ ᐱᓯᒥᒃ, ᐅᖃᓚᐅᖅᑐᖅ ᐱᑎᑕᐅᒋᐊᖃᖏᑦᑐᕉᖅ ᐅᔭᒥᖕᒥᒃ ᑖᓱᒥᖓ, ᐅᖃᕆᓪᓗᓂ ᐊᐃᑉᐸᖔᕋ ᑕᕝᕙ ᐃᓕᑕᕆᔭᐅᔪᒃᓴᐅᔪᖅ ᐊᔪᖏᓐᓂᖓᓄᑦ ᔩ.ᐊᕐ. ᐃᖕᔅᒥᒃ ᐊᑎᓕᒃ ᐃᑲᔪᖅᑎᒌᓐᓇᐅᔭᖅᑕᖓ ᓇᒥᑐᐃᓐᓇᖅ ᐱᓇᓱᐊᓕᕌᖓᑦ.
“ᐅᕙᒍᑦ ᐊᑕᐅᑦᑎᒃᑯᑦ ᐱᓕᕆᓲᖑᒐᓐᓄᒃ ᓄᓇᓗᑦᑎᓐᓂ. ᑕᐃᒪᓐᓇ ᐊᐃᑉᐸᕋ ᐃᓚᐅᑎᑕᐅᖁᔭᕋ,” ᐅᖃᕆᓪᓗᓂ ᑕᒪᑐᒪᓂ ᐅᐱᒋᔭᐅᔪᑎᒥᓂᒃ ᐅᖃᐅᓯᖃᖅᖢᓂ.
ᐊᒃᓱᐊᓗᒎᖅ ᖁᕕᐊᒋᒐᒥᐅᒃ ᐃᑲᔪᕆᐊᒃᓴᖅ ᐊᓯᒥᓂᒃ ᐋᕿᒃᓱᐃᔨᐅᓪᓗᓂ ᑐᓂᐅᖅᑲᐃᔨᐅᓪᓗᓂᓗ ᓂᕿᓂᒃ ᓄᓇᓕᖓᓂ, ᓄᔭᓂᒃᓗ ᑭᐱᓯᕙᒃᖢᓂ ᐃᑲᔪᖅᑕᐅᔪᒪᔪᓄᑦ ᐊᖑᑎᓄᑦ ᐅᒥᖓᐃᔨᐅᓪᓗᓂᓗ.
“ᐊᒃᓱᐊᓗᒃ ᖁᕕᐊᓱᒃᑐᑦ ᖁᔭᓕᖃᑦᑕᖅᑐᑦ, ᐃᓐᓇᐃᑦ ᓇᖕᒥᓂᖅ ᐱᒡᒐᓕᖅᑐᑦ ᖁᕕᐊᓱᒃᑐᑦ ᑕᑯᓪᓗᒋᑦ ᖁᕕᐊᒋᒐᒃᑯ,” ᐅᖃᕆᓪᓗᓂ. “ᖁᐊᓇᖅᐳᓯ ᑕᒪᑉᓯ ᐊᒻᒪᓗ ᐃᕿᑉᐸᓯ ᑕᒪᑉᓯ - ᐃᓯᑐᐊᕌᖓᕕᑦ ᐃᓅᖃᑎᑎᑦ ᖁᕕᐊᓱᖃᑦᑕᖅᑐᑦ. ᑕᑯᓪᓗᒍ ᖁᕕᐊᓇᖅᑐᖅ.”
ᐃᓅᓯᓂ ᐃᖅᑲᐅᒪᓪᓗᓂᐅᒃ, ᐊᒃᓱᐊᓗᒃ ᖁᕝᕕᐅᓕᓚᐅᖅᑐᖅ ᐅᓂᒃᑳᖅᖢᓂ ᐊᑦᑕᒃᑯᒥᓂᒃ ᐊᒃᑲᒃᑯᒥᓂᒃᓗ - ᑏᕕᑦ ᐅᕼᐅᒃᑲᓐᓄᐊᒃᑯᓐᓂᒃ ᐊᒻᒪᓗ ᒧᐊᓕ ᕼᐃᒍᓗᒃᑯᓐᓂᒃ ᐊᒻᒪᓗ ᐊᒃᑲᒃᑯᖏᓐᓂᒃ ᕗᕌᖕᒃ ᐊᓇᓗᒃᑯᓐᓂᒃ ᐊᒻᒪᓗ ᔩᓂ ᐊᑳᓇᒃᑯᓐᓂᒃ - ᑖᒃᑯᓄᖓ ᑲᒪᒋᔭᐅᓪᓗᖓ ᑭᓯᐊᓂ ᐃᓅᓯᒪᔪᖓ ᐊᖓᔪᖅᑳᒃᑲ ᑐᖁᓚᐅᖅᓯᒪᖕᒪᑕ ᓄᑕᕋᐅᑎᓪᓗᖓ.
“ᐊᒃᓱᐊᓗᒎᖅ ᐊᖓᔪᖅᑳᑲ ᑭᖑᓂᖃᖅᑐᑦ. ᐃᓅᔪᓐᓃᑐᑦ ᒫᓐᓇ,” ᐅᖃᕆᓪᓗᓂ ᐊᑦᑕᖏᒎᖅ ᐊᒃᑲᒃᑯᖏᓪᓗ, ᕿᐊᓱᖑᓕᖅᐸᒃᖢᓂ ᐅᓂᒃᑳᓚᐅᖅᑐᖅ. “ᐳᐃᒍᔮᖏᑕᒃᑲ ᐅᕙᓐᓂᒃ ᐃᓕᓴᐃᓯᒪᖕᒪᑕ ᐊᓯᓐᓂᒃ ᑲᒪᑦᑎᐊᖃᑦᑕᖁᔨᓪᓗᑎᒃ, ᐅᔾᔨᖅᓱᑦᑎᐊᖃᑦᑕᖁᔨᓪᓗᑎᒃ ᐊᓯᓐᓂᒃ ᑕᐃᒪᐃᑉᐳᖓ ᑕᕝᕙ ᐅᓪᓗᒥ.”
ᔪᐃ ᐅᓂᒃᑲᐅᓯᖃᓚᐅᖅᑐᖅ ᐊᒃᑲᒥᓂᒃ ᐊᒃᓱᕉᑎᖃᐃᓐᓇᐅᔭᕐᒪᑦ ᐃᓕᓵᓂᒐᓱᐊᖃᑦᑕᖁᔨᓪᓗᓂ. ᑕᒪᑐᒪᓂ ᔪᐃ ᐊᖏᕐᕋᖏᓐᓂ ᐱᕈᖅᓴᓚᐅᕐᒪᑦ ᐊᖓᔪᒃᑯᒥᓂ, ᕗᕌᖕᒃ ᐅᔾᔨᖅᓱᐃᓐᓇᐅᔭᕐᒪᑦ ᐃᓕᓴᕆᐊᖃᑦᑕᖁᔨᓪᓗᓂ, ᐅᖃᕆᓪᓗᓂ. ᐃᓕᓴᕆᐊᖅᑐᕕᓂᖅ ᐃᓅᕕᖕᒧᑦ ᐊᐅᓪᓚᖃᑦᑕᓱᖓᖅᑎᓪᓗᒋᑦ ᐃᓕᓴᕆᐊᖅᖢᑎᒃ ᐊᒻᒪᓗ ᔭᓗᓇᐃᕝᒥ ᑐᖓᓕᖓᓂ ᐃᓕᓴᕐᓂᖅᖢᓂ Sir John Franklin High School-ᒥ 1977-ᒥ.
ᑕᒫᓂᓕᖅᑐᕕᓂᖅ ᓄᓇᓯᐊᒥᐅᑦ ᓄᓇᓕᐸᐅᔭᖓᓂ, ᐃᓕᓴᓂᒃᑲᒥ ᐊᖏᕐᕋᖃᓕᓚᐅᖅᓯᒪᖕᒪᑦ ᐱᖓᓱᓂᒃ ᕿᑐᖏᓪᓗᓂ ᐊᒻᒪᓗ ᐃᖅᑲᓇᐃᔭᖃᑦᑕᖅᖢᓂ ᐃᓄᐃᑦ ᓴᓇᐅᒐᖏᓐᓂᒃ ᑕᑯᒃᓴᐅᑎᑦᑎᕕᖕᒥ. ᑭᖑᓂᖓᒍᑦ ᓄᒃᑎᓕᖅᑐᕕᓃᑦ ᐃᐊᓪᐴᑕᒧᑦ ᐊᒻᒪᓗ ᐲ.ᓰ.ᒧᑦ, ᔪᐃ ᐅᑎᓕᖅᑐᕕᓂᖅ ᐃᖃᓗᒃᑑᑦᑎᐊᒧᑦ 1996-ᒥ ᑕᐃᒪᖓᓂᑦ ᐊᐅᓪᓚᒃᑲᓐᓂᓚᐅᕈᓐᓃᑦᖢᓂ.
“ᕿᑐᖓᒃᑲ ᐅᖃᐅᑏᓐᓇᐅᔭᖅᑕᒃᑲ ᐃᓅᓯᖃᖅᓯᒪᔪᖓ ᐊᔾᔨᒋᖏᑦᑐᓂᒃ ᒪᕐᕉᖕᓂᒃ ᑕᒪᐃᑕ ᐅᕙᓐᓄᑦ ᐱᐅᔪᑦ ᐅᖃᐅᓯᓐᓂᒃ ᓱᓕ ᐅᖃᓪᓚᒍᓐᓇᖅᑐᖓ ᐊᒻᒪᓗ ᐱᖅᑯᓯᑐᖃᕗᑦ ᖃᐅᔨᒪᑦᑎᐊᖅᖢᒋᑦ.” ᐅᖃᕆᓪᓗᓂ.
ᔪᐃ ᓄᓇᓕᖓᓂ ᐃᓕᓴᕐᕕᓂ ᐅᖃᐅᔾᔪᐃᔨᐅᓯᒪᔪᖅ/ᓄᓇᓕᖕᒥᐅᓂᒃᓗ ᐃᑲᔪᖅᑎᐅᓯᒪᓪᓗᓂ ᑭᓪᓕᓂᖅ ᐃᓕᓴᕐᕕᒃᔪᐊᖓᓂ ᐅᑭᐅᖕᓂᒃ ᒪᕐᕉᖕᓂᒃ. ᑕᐃᒪᓐᓇ ᐃᑲᔪᖃᖅᑕᖅᖢᓂ, ᐊᓯᒥ ᐃᒃᐱᒋᔭᖏᓐᓂᒃ ᖃᐅᔨᒪᖃᑦᑕᕋᒪ ᑕᐃᒪᓐᓇ ᐃᑲᔪᖅᑎᐅᕗᖓ.
“ᐅᕙᓐᓂᒃ ᐃᖅᑲᐅᒪᓪᓗᖓ ᐃᓕᓴᖅᑎᓂᒃ ᐃᑲᔪᖃᑦᑕᖅᐳᖓ (ᐊᑐᕐᒪᑕ ᐊᑐᓚᐅᖅᓯᒪᔭᓐᓂᒃ) ᑕᐃᒪᓐᓇ ᐃᑲᔪᕈᓐᓇᖃᑦᑕᖅᑕᒃᑲ ᐃᒃᐱᒋᓂᖏᑦ ᖃᐅᔨᒪᓪᓗᒋᑦ. “ᐅᕙᓐᓂᒃᑕᐅᖅ ᐃᑲᔪᕐᒥᒐᒪ ᑕᐃᒪᓐᓇ, ᑭᐱᖑᓇᖅᑐᒥᒃ ᐃᓅᓯᖃᕐᒪᑕ ᐅᖃᓪᓚᖃᑎᒃᓴᖅᓯᐅᕐᒪᑕ.”
ᒫᓐᓇᑦᑎᐊᖅ, ᓄᖅᑲᕐᓂᐊᓕᖅᑐᖅ - ᑕᒪᑐᒪᓂ ᐅᑭᐅᑦᑎᓐᓂ ᑭᖑᓪᓕᖅᐹᖑᓕᖅᑐᖅ ᐃᓕᓴᕐᕕᖕᒥ ᐅᖃᐅᔾᔪᐃᔨᐅᓂᖓ. ᐊᖏᕐᕋᓐᓂ ᐃᑲᔪᖔᕐᓂᐊᓕᕋᒪ ᒥᖅᓱᖃᑦᑕᕐᓗᖓ ᐊᒻᒪᓗ, ᓇᓗᓇᖏᑦᑐᖅ, ᐃᑲᔪᖃᑦᑕᕐᓗᓂ ᑭᓯᐊᓂ, ᐅᖃᕆᓪᓗᓂ.
ᓄᓇᓕᖓᓂ ᐊᒥᓱᓂᒃ ᐱᒋᐊᖅᑎᑕᐅᔪᓂᒃ ᐃᑲᔪᖅᓯᒪᔪᖅ ᐱᒋᐊᖓᕐᕕᖏᓐᓂᑦ ᐅᑭᐅᓂᒃ ᐊᒥᓱᓂᒃ ᐊᕐᕌᒍᑕᒫᑦ: ᐅᒥᖕᒪᒃ ᕗᕌᓕᒃᔅᓕᕋᖓᑕ ᐅᐱᕐᖔᒃᑯᑦ ᖁᕕᐊᓱᕕᒃᔪᐊᖅᑎᓪᓗᒋᑦ, ᐅᑭᐅᒃᑯᓪᓗ ᖁᕕᐊᓱᒃᕕᖕᒥ ᓄᑕᖅᑲᓄᑦ ᖁᕕᐊᓲᑕᐅᓂᐊᖅᑐᓂᒃ ᐴᖅᑲᐃᕙᒃᖢᑕ, ᐊᖏᕐᕋᖏᓐᓄᖓᐅᔾᔨᓪᓗᑕ, ᐃᑲᔪᖃᑦᑕᕆᓪᓗᓂ ᐱᖑᐊᓕᕌᖓᑕ ᖁᕕᐊᓱᒃᕕᖕᒥ, ᐃᒃᓯᕙᐅᑕᐅᓚᐅᕆᓪᓗᓂ ᐃᓕᓴᖅᑎᓕᕆᔨᒃᑯᑦ ᑲᑎᒪᔨᖏᓐᓂ, ᐃᓚᐅᖃᑦᑕᕆᓪᓗᓂ ᓄᓇᓕᖓᓂ ᐃᒪᕐᒥ ᐸᖅᓴᐃᔨᓂ ᒥᐊᓂᖅᓯᔨᓂ ᐃᓚᐅᖃᑦᑕᖅᑐᖅ ᐊᒻᒪᓗ ᐅᔾᔨᖅᓱᖅᑎᐅᕙᒃᖢᓂ ᑮᓇᐅᔭᓂᒃ ᑲᑎᖅᓱᐃᓕᕌᖓᑕ ᐱᓐᖒᖅᑎᓪᓗᒋᑦ ᐃᒪᕐᒥᐅᑕᓕᕆᔨᒃᑯᑦ ᒥᐊᓂᖅᓯᔨᖏ ᐊᒻᒪᓗ ᐃᐊᓪᒃᑯᓐᓂ.
“ᐊᒃᓱᐊᓗᒃ ᐅᕙᓐᓄᑦ ᖁᕕᐊᓇᕐᒪᑦ. ᑕᐃᒪᖓᓂᑦ ᖁᔭᓕᔭᐅᖏᓐᓇᕐᓇᕐᒪᑦ, ᖁᖓᑕᐅᕙᒃᖢᖓᓗ,” ᑕᒪᔾᔭ ᖁᕕᐊᓱᓕᕈᑎᒋᖃᑦᑕᖅᑕᒃᑲ ᐱᑦᑎᐊᖅᑕᐅᓪᓗᖓ ᐱᑦᑎᐊᖏᓐᓇᖅᖢᖓᓗ ᐊᓯᓐᓂᒃ ᖁᕕᐊᓱᓕᖅᑎᑦᑎᓪᓗᖓ. ᖁᔭᓕᖃᑦᑕᕐᒪᑕ.”