ᓯᕗᓂᒃᓴᖃᑦᓯᐊᖅᐳᒍᑦ ᐊᒃᓱᕈᕐᓇᖏᓐᓂᖅᓴᐅᓂᐊᖅᑐᒥᒃ ᑭᓯᐊᓂ ᐱᐅᓂᖅᓴᐅᓂᐊᖏᑦᑐᒃᓴᐅᕗᖅ. ᐃᓄᐃᑦ ᑳᖕᒪᑕ, ᐊᖏᕐᕋᖃᕆᐊᖃᖅᖢᑎᒡᓗ, ᑲᔪᖏᖅᓴᖅᑕᐅᒋᐊᖃᖅᖢᑎᒡᓗ ᐃᖅᑲᓇᐃᔭᖅᑖᕐᓂᕐᒧᑦ. ᐊᒥᓱᑦ ᒐᕙᒪᒃᑯᓐᓂ ᐃᖅᑲᓇᐃᔭᒐᒃᓴᐃᑦ ᖃᓪᓗᓈᓄᑦ ᑐᓂᔭᐅᕙᓪᓕᐊᑐᐃᓐᓇᕐᒪᑕ ᐃᓄᖕᓂᒃ ᑐᑭᓯᐊᖏᑦᑐᓄᑦ ᑐᓂᔭᐅᓪᓗᑎᒃ, ᐃᓕᖁᓯᑐᖃᖏᓐᓂᒃ ᖃᐅᔨᒪᖏᑦᑐᓄᑦ ᐱᖅᑯᓯᑐᖃᖏᓐᓂᒡᓗ.
ᑕᐃᒪ ᖃᐅᔨᒪᓇᓱᐊᓚᐅᕈᑦᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᒪᓕᒃᑕᐅᒋᐊᖃᖅᑐᓂᒃ, ᑕᐃᒪᓐᓇ ᐱᓕᕆᔨᖃᕋᔭᖅᐳᖅ ᑕᐃᒪᓐᓇ ᓴᐃᒪᓂᖃᖁᓪᓗᒋᑦ ᐱᑦᓯᐊᕈᓐᓇᖁᓪᓗᒋᓪᓗ. ᐃᓄᓕᕆᓂᕐᒧᑦ ᐱᔾᔪᑎᖃᖅᑐᑦ ᐊᐅᓪᓛᑦᓯᐊᕆᐊᖁᔨᒍᑎᑦ ᐅᖃᖅᓯᒪᖕᒪᑕ ᐱᑦᓯᐊᖅᑕᐅᔪᖃᖏᑉᐸᑦ, ᓴᐃᒪᓂᖃᖅᑐᖃᕐᓂᐊᖏᒻᒪᑦ, ᓴᐃᒪᓂᖅᑕᖃᖏᑉᐸᑦ ᑲᒪᒋᔭᐅᑦᓯᐊᖅᑐᖃᕋᔭᖏᑉᐳᖅ. ᐃᖕᒥᓂᒃ ᐃᓱᒪᒋᖏᓐᓂᖅᓴᐅᓪᓗᓂ ᐃᖕᒥᓃᓐᓇᖏᓐᓂᖅᓴᐅᓪᓗᓂᓗ ᑲᒪᑦᓯᐊᕆᐊᖃᕐᓇᖅᐳᖅ ᓴᓂᓕᒥᐅᑕᕐᓂᒃ; ᓱᕈᓯᑦ ᐊᖏᕐᕋᖅᓯᒪᒋᐊᖃᖅᖢᑎᒡᓗ 10-ᒧᐊᓚᐅᖏᓐᓂᐊᓂ ᐅᓐᓄᒃᑯᑦ ᓴᐃᒪᓂᖃᑦᓯᐊᕐᓗᑎᒃ ᓂᐱᖃᖏᑦᓯᐊᖅᑐᒥᓗ ᓯᓂᒍᓐᓇᖁᓪᓗᒋᑦ. ᑕᐃᒪ ᐅᐃᕆᓯᒪᔪᓂᒃ ᐊᖓᔮᕐᓇᖅᑐᓄᑦ ᐱᑕᖃᖅᐳᑦ, ᒪᑭᑦᑕᕐᓂᕐᒧᓪᓗ ᐊᖓᔮᖅᑐᓄᓪᓗ ᐅᐃᕆᓯᒪᔪᑦ ᖃᐅᔨᒪᕗᑦ ᐱᓕᕆᐊᖅᑕᖃᕐᒪᑦ ᐃᑲᔪᖅᑎᒃᓴᓂᒃ ᐱᔨᑦᓯᕋᖅᑎᒃᓴᖃᖅᖢᓂᓗ ᑕᐃᒪᓐᓇ ᐸᓂᖅᓯᖅᐸᓪᓕᐊᓂᐊᕐᓂᖏᓐᓄᑦ.
ᑭᓇᑐᐃᓐᓇᖅ ᕿᑭᖅᑕᐅᖏᒻᒪᑦ ᑐᑭᓯᕙᓪᓕᐊᕗᒍᓪᓗ ᑎᒥᐅᔪᑦ ᐃᓄᐃᓪᓗ ᐊᑐᓂ ᐃᑲᔪᖅᑎᒌᒋᐊᖃᕐᒪᑕ. ᓴᓐᖏᓂᖅᓴᒃᑯᑦ ᐊᒃᓱᕈᕈᑎᖃᕆᐊᖃᖅᐳᒍᑦ ᑐᓴᖅᑎᑕᐅᔾᔪᑎᒋᓗᒋᓪᓗ ᐱᔨᑦᓯᕋᐅᑎᑦ ᑭᒃᑯᓪᓗ ᐃᑲᔪᕈᓐᓇᕐᓂᖏᓐᓄᑦ ᑕᒪᒃᑯᐊ ᐅᐃᕆᓴᐅᑎᑦ ᒥᒃᓵᓄᑦ.
ᓄᓇᓕᖕᓂᒥᐅᑦ ᐃᖅᑲᓇᐃᔭᕐᓂᐊᖅᐸᑕ ᒐᕙᒪᒃᑯᓐᓄᑦ, ᒐᕙᒪᒃᑯᓪᓘᓐᓃᑦ ᓇᖕᒥᓂᕆᔭᐅᔪᓪᓗ ᐃᖅᑲᓇᐃᔭᖅᑎᑎᓂᐊᖅᐸᑕ, ᐋᖅᑭᐅᒪᑦᓯᐊᕆᐊᖃᖅᐳᒍᑦ ᐊᐅᓪᓛᑦᓯᐊᕐᓗᑕᓗ ᐊᑲᐅᔪᒃᑰᕐᓂᐊᖅᐸᑕ. ᑕᐃᒪᓐᓇ ᖃᓄᖅ ᑐᑭᖃᖅᐸ ᐋᖅᑭᐅᒪᑦᓯᐊᕆᐊᖃᕐᓂᖅ? ᐃᓱᒪᒃᑯᑦ, ᐋᖅᑭᐅᒪᑦᓯᐊᕐᓂᖅ ᑐᑭᖃᕐᒪᑦ ᑕᐃᒪᓐᓇ ᐱᐅᔪᓪᓗ ᐱᐅᖏᑦᑐᓪᓗ ᑕᒪᕐᒥᒃ ᐱᓕᕆᐊᕆᔭᐅᒋᐊᖃᕐᒪᑕ. ᐃᓛᓐᓂᒃᑯᑦ ᓂᖓᐅᒪᓐᓇᖅᑐᒃᓴᐅᔪᖅ, ᖁᕕᐊᓱᖏᓪᓗᓂᓗ ᓄᒫᓱᒡᓗᓂᓗ ᐱᓕᕆᐊᒃᓴᖃᓗᐊᕐᓂᕐᒧᓪᓗ ᐃᓱᒪᓇᕐᓗᓂ; ᑕᒪᒃᑯᐊ ᐃᓱᒪᒋᖏᓪᓗᒋᑦ ᐃᖅᑲᓇᐃᔭᕈᓐᓇᕈᑦᑕ ᑲᒪᑦᓯᐊᕈᓐᓇᖅᐳᒍᑦ, ᑕᐃᒪᓐᓇᓗ ᓯᓚᑦᑐᖅᓯᒪᓂᑦᑎᓐᓄᑦ ᖃᐅᔨᓐᓇᕈᑕᐅᖕᒪᑦ.
ᐊᑕᐅᓯᐊᑐᐃᓐᓇᕐᓗᒍ ᐱᓕᕆᐊᖑᓂᐊᖏᑉᐳᖅ. ᐅᓪᓗᑕᒫᑦ ᐱᓕᕆᐊᕆᔭᐅᓂᐊᖅᐳᖅ ᑐᑭᓯᕙᓪᓕᐊᓂᖅᓴᐅᓕᕈᑦᑕᓗ ᖃᓄᐃᓕᐅᕐᓂᑦᑎᓐᓄᑦ ᑕᐃᒪᓐᓇ ᐋᖅᑭᐅᒪᓂᖅᓴᐅᕙᓪᓕᐊᒐᔭᖅᐳᒍᑦ.
ᐱᓕᕆᖃᑎᒌᓚᐅᖅᑕ ᐊᑕᐅᓯᕐᒧᑦ, ᐊᓯᑦᑎᓐᓂᒃ ᐃᓱᒪᓗᑕ, ᐃᖕᒥᓂᓈᖏᓪᓗᑕᓗ ᐱᔨᑦᓯᕋᕐᓗᑕᓗ ᐃᓅᖃᑎᑦᑎᓐᓂᒃ. ᑕᐃᒪᓐᓇᐃᓕᐅᓕᕈᑦᑕ, ᐱᓯᒪᕙᒌᖅᑕᕗᑦ ᐃᓗᑦᑎᓐᓂ ᒪᑐᐃᖅᐸᓪᓕᐊᓂᐊᖅᐳᑦ ᑐᓐᖓᓇᓕᕐᓗᑕᓗ ᐃᓅᖃᑎᕗᓪᓗ ᐃᑲᔪᑦᓯᐊᕐᓗᒋᑦ.