Skip to content

ᐊᒃᓱᕈᖅᑐᖅ ᐃᑲᔪᖅᖢᓂ ᓇᖕᒥᓂᖅ ᐱᓇᓱᐊᒐᖃᖅᑐᓂᒃ

ᓇᖕᒥᓂᖃᖅᑐᑦ ᑕᒪᑐᒪᓂ ᐃᓕᓴᖅᑕᐅᔪᓐᓇᕐᒪᑕ ᖃᓄᖅ ᐱᓇᓱᐊᒐᕐᒥᓂᒃ ᐊᐅᓚᑦᑎᔪᓯᕐᓂᒃ ᒥᑭᔫᑕᐅᓂᖅᓴᓂ ᓴᓇᕕᖃᖅᑐᓂ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᓇᑎᒃ ᐱᓇᓱᐊᒐᖃᖅᑐᓂ ᐃᖃᓗᖕᓂ ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖓᓄᑦ ᐊᒃᓱᕉᑕᐅᓚᐅᕐᒪᑕ ᓯᕗᓪᓕᖅᐹᒥ ᐅᓪᓗᒥ ᒥᑭᔪᓂᒃ ᓴᓇᕝᕕᖃᑦᑐᑦ ᐱᓇᓱᐊᕈᓯᐊ ᐱᒋᐊᓕᖅᑎᓪᓗᒍ. ᐱᓇᓱᐊᕈᓯᓕᒫᒥᒃ ᐊᒃᓱᕉᑕᐅᓚᐅᕐᒪᑕ ᐅᒃᑐᐱᕆᒥ 16-ᒥᑦ 21-ᒧᑦ, ᑲᓇᑕᓕᒫᒥ ᑖᓐᓇ ᐱᖃᑦᑕᖅᑐᖅ.

ᐃᖃᓗᖕᓂ ᓇᖕᒥᓂᖅ ᐱᓇᓱᐊᒐᖃᖅᑐᑦ ᑲᑐᔾᔨᖃᑎᒌᖓᓂᒥᐅᖅ ᕗᕌᓐᓱᐊ ᕗᐊᑏᓐ ᓯᕗᓕᖅᑎᐅᓚᐅᕐᒪᑦ ᑕᒪᑐᒪᓂ ᓇᖕᒥᓂᖅ ᒥᑭᔪᒥᒃ ᐱᓇᓱᐊᒐᖃᖅᑐᑦ ᐱᓇᓱᐊᕈᓯᖃᖅᑎᓪᓗᒋᑦ, ᑕᒪᑐᒪᓂ ᐅᒃᑐᐱᕆᒥ 15-ᒥᑦ 21-ᒧᑦ ᓄᓇᕗᒥᐅᑦ ᓄᓇᓕᐸᐅᔭᖓᓂ ᓇᖕᒥᓂᖃᖅᑐᑦ ᐃᑲᔪᖅᑕᐅᓇᓱᐊᖃᑦᑕᕐᒪᑕ ᐊᒻᒪᓗ ᐊᑭᓕᖅᓱᖅᑕᐅᖏᓱᑎᒃ ᐃᑲᔪᖅᑎᐅᔪᑦ ᓄᓇᓕᖓᓂ.

“ᐃᖃᓗᖕᓂ ᓇᖕᒥᓂᖅ ᐱᓇᓱᐊᒐᖃᖅᑐᑦ ᑲᑐᔾᔨᖃᑎᒌᖓᓂ ᐊᐅᓚᑦᑎᔨᒥᒃ ᓯᕗᓕᖅᑎᖃᖅᖢᑎᒃ ᕗᕌᓐᓱᐊ ᕘᐊᑏᓐᒥᒃ, ᐊᒃᓱᕉᑎᖃᓚᐅᕐᒪᑦ ᑕᑯᒃᓴᐅᑎᑦᑎᓪᓗᓂ ᓇᖕᒥᓂᖃᖅᑐᓂᒃ ᓄᓇᓕᖓᓂ ᑕᒪᑐᒪᓂ ᐱᓇᓱᐊᕈᓯᓕᒫᒥ ᑲᑎᒪᒻᒪᕐᒥ ᐃᓕᓴᐃᕕᖃᖅᖢᓂ ᐊᒃᓱᕉᑎᖃᖅᑎᓪᓗᒋᑦ ᒥᑭᔫᑕᐅᓂᖅᓴᓂᒃ ᓇᖕᒥᓂᖅ ᐱᓇᓱᐊᒐᖃᖅᑐᓂᒃ ᐃᖃᓗᖕᓂ,” ᐅᖃᕆᓪᓗᓂ ᐊᖓᔪᖅᑳᖓᑦ ᒫᑎᐅ ᒃᓛᒃ.

ᕗᐊᑏᓐ, ᓇᖕᒥᓂᖅ ᐱᓇᓱᐊᒐᖃᕐᒪᑦ ᓄᓇᓕᖓᓂ ᔮᓐᓄᐊᕆᒥᓂᑦ, ᐊᒥᓱᓂᒃ ᑲᑎᒪᕕᓂᒃ ᐋᕿᒃᓱᐃᓯᒪᖕᒪᑦ ᐊᑐᓂ ᑲᑎᒪᔪᑎᖃᖅᑐᓂᒃ.

ᐅᖃᓚᐅᕐᒪᑦ ᑲᑐᔾᔨᖃᑎᒌᖓᒎᖅ ᐊᒃᓱᕉᑎᖃᕐᒪᑕ ᓄᓇᓕᖓᓂ ᒥᑭᓐᓂᖅᓴᓂᒃ ᐱᓕᕆᕝᕕᖃᖅᑐᓂᒃ, ᒥᑭᓐᓂᖅᓴᓂᒃ ᐱᓇᓱᐊᒐᖃᖅᑐᓂᒃ ᐱᒋᐊᓕᖅᑐᓂᒃᓗ, ᓄᓇᓕᖓᓂᓗ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᓂᒃ, ᐃᓛᒃ ᑖᒃᑯᐊ ᐊᐅᓚᑦᑎᔨᖏᑦ ᐃᓕᓴᕆᐊᖃᕐᓂᖅᐹᖑᖕᒪᑕ.

“ᐊᒻᒪᓗ ᐅᓄᕐᓂᖅᐹᖑᖅᑰᖅᖢᑎᒃ ᓄᓇᓕᖕᓂ ᐱᓇᓱᐊᒐᖃᕐᕕᐅᔪᓂ,” ᐅᖃᕆᓪᓗᓂ. “ᑖᒃᑯᐊ ᑐᕌᕆᓗᒋᑦ ᐊᔪᕐᓇᖏᓐᓂᖅᐹᖑᖕᒪᑕ, ᐊᒃᓱᕉᑎᒋᓗᒋᑦ, ᐱᕈᖅᐸᓪᓕᐊᔪᓐᓇᕐᓂᐊᕐᒪᑕ ᓄᓇᓕᐸᐅᔭᑦᑎᓐᓂ, ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔪᓐᓇᕐᒪᑕ.”

ᑲᓇᑕᓕᒫᒥ, ᓇᖕᒥᓂᖃᖅᑐᑦ ᒥᑭᔫᑕᐅᓂᖅᓴᐃᑦ ᐃᖅᑲᓇᐃᔭᖅᑎᖃᓲᑦ 100 ᐊᑖᓂ ᐃᒻᒪᖄ, ᑕᐃᒪᓐᓇ ᓄᓇᓕᖕᓂ ᐱᖃᑦᑕᕐᒪᑕ ᓄᓇᕗᒥ ᓇᖕᒥᓂᖃᖅᑐᓂᒃ ᐃᑲᔪᖅᖢᑎᒃ. ᓄᓇᕗᒥ, ᐃᖅᑲᓇᐃᔭᖅᑎᖃᖅᑐᓄᑦ ᓇᓪᓕᐅᑯᒫᓕᕆᔩᑦ ᓴᓇᔨᓄᓪᓗ ᐊᑦᑕᕐᓇᔭᐃᒃᑯᑎᓂᒃ ᑲᒪᔩᑦ ᑲᑎᒪᔨᖏᑦ, ᒪᓕᒃᖢᒋᑦ ᒫᓐᓇᕋᑖᖅ ᒪᓕᒐᓕᐅᕈᑕᐅᓚᐅᕐᒪᑕ, ᓇᓗᓇᐃᔭᐃᓪᓗᑎᒃ ᒥᑭᔫᑕᐅᓂᖅᓴᓂᒃ ᓄᓇᓕᖕᓂ ᐱᓇᓱᐊᒐᖃᕐᕕᐅᔪᓂᒃ ᐊᑖᓂ ᐊᕙᑏᑦ ᐃᖅᑲᓇᐃᔭᖅᑎᖃᖅᖢᑎᒃ, ᐃᓚᐅᑎᓪᓗᒍ ᑖᓐᓇ ᐱᖁᑎᖃᖅᑐᖅ ᓴᓇᕕᖕᒥᓂᒃ.

ᕗᐊᑏᓐ ᐅᖃᕆᓪᓗᓂ ᓴᓇᕕᓂ ᑐᓐᖓᕕᒋᔭᐅᔪᓄᓪᓘᓐᓃᑦ ᐃᑲᔪᖅᑕᐅᒋᐊᖃᖃᑦᑕᕐᒪᑕ ᐱᒋᐊᓕᖅᑎᓪᓗᒋᑦ ᒥᑭᔫᑎᓂᒃ ᓴᓇᕕᓖᑦ, ᑕᐃᒪᓐᓇ ᐃᓕᓴᕐᕕᖃᖅᖢᑎᒃ ᐱᐅᖕᒪᑦ.

“ᐃᒫᖓᐃ, ᐊᑕᐅᓯᖅ ᐅᓇ ᒫᒍᕆᑦ ᕼᐅᓕᔅ, ᐅᓂᒃᑳᓚᐅᕐᒪᑦ, ᐃᓕᓴᐃᑎᑦᑎᓚᐅᕋᒥᒎᖅ ᐅᑭᐅᖅ ᑕᒪᓐᓇ ᐱᒋᐊᓕᖅᑎᓪᓗᒍ ᒪᓕᒐᓐᓂᐊᖅᑎᒃᑯᓐᓄᑦ ᓴᓇᕕᐊᓂ - ᑐᓐᖓᕕᒋᔭᐅᔪᓂᒃ ᑳᓐᑐᕌᒃᑎᑦᑎᔪᑎᓄᑦ ᐊᑭᒪᓇᓱᐊᕈᑏᓪᓗ ᐱᓕᕆᐊᒃᓴᓂᒃ ᑎᒍᓯᓇᓱᐊᖅᑐᓄᑦ ᒐᕙᒪᑎᒃᑯᓐᓂᑦ ᑳᓐᑐᕌᒃᑎᑖᕋᓱᐊᖅᑐᓄᑦ − ᐊᒻᒪᓗ ᑕᐃᓱᒪᓂ ᖃᐃᔪᖃᓗᐊᓚᐅᕋᓂ - ᑐᓴᐅᒪᑎᑦᑎᖏᓗᐊᓚᐅᕐᒪᑕ ᑕᐃᒪᓐᓇ ᐊᒥᓲᖏᑦᑐᑦ ᖃᐃᓚᐅᕐᒪᑕ,” ᐅᖃᕆᓪᓗᓂ.

“ᐅᕙᖓ ᐃᓄᑑᓪᓗᖓ ᖃᐃᓚᐅᕋᒪ ᐃᓚᖏᓐᓄᑦ ᐊᒻᒪᓗ ᑕᑯᓪᓗᒋᑦ ᐊᒃᓱᐊᓗᒃ ᐊᑐᕐᓂᖃᖅᑐᓂᒃ ᐃᓕᓴᐃᓚᐅᕐᒪᑕ. ᑭᒃᑯᑐᐃᓐᓇᐃᑦ ᓄᓇᕗᒥ ᓇᖕᒥᓂᖃᖅᑐᑦ ᓇᖕᒥᓂᖅ ᐃᓕᑉᐸᓪᓕᐊᖃᑦᑕᕐᒪᑕ ᑳᓐᑐᕌᒃᑎᑖᕈᓯᕐᓂᒃ ᒐᕙᒪᑎᒃᑯᓐᓂᑦ ᐊᒻᒪᓗ ᓇᖕᒥᓂᖅ ᐱᓕᕆᔨᒃᓴᒥᓂᒃ ᕿᓂᓕᕌᖓᒥᒃ ᖃᓄᖅ ᑳᓐᑐᕌᒃᑎᓕᐅᕆᐊᒃᓴᒥᒃ, ᑭᓯᐊᓂ ᓇᖕᒥᓂᖅ ᕿᓂᖅᖢᑎᒃ ᐃᓕᓴᕋᓱᐊᓲᖑᖕᒪᑕ ᑕᒪᒃᑯᓄᖓ ᐅᐸᖃᑦᑕᖅᖢᑎᒃ ᑕᐃᑯᐊ ᑖᕗᖓᓗ.”

ᑭᓯᐊᓂᓕ ᒪᓕᒐᓕᐅᖅᑎᓪᓚᑖᒥᑦ ᑐᓴᖅᖢᓂ ᑕᒪᒃᑯᓂᖓ ᐋᕿᒃᓱᐃᓲᓂᑦ ᓂᐅᕕᐊᒃᓴᓄᑦ ᑳᓐᑐᕌᒃᑎᓕᐅᓲᓂᑦ ᓇᖕᒥᓂᖃᖅᑐᓄᑦ ᐊᒃᓱᐊᓗᒃ ᑐᓴᕐᓇᕐᒪᑕ ᐱᒋᐊᓕᖏᓐᓂᒃ ᖃᐅᔨᒪᖕᒪᑕ ᖃᓄᐃᑦᑐᓂᒃ ᑳᓐᑐᕌᒃᑎᓕᐅᕈᓐᓇᕐᓂᖏᑦ ᐃᒻᒥᓄᑦ ᐋᕿᒃᓱᖅᓯᒪᔪᓂᒃ.

“ᖃᐅᔨᒪᓕᖅᖢᓂ ᑕᒪᒃᑯᓂᖓ ᓲᖑᓂᖅᓴᐅᓕᕐᓇᖅᑐᖅ ᓇᓗᔪᓂᑦ ᑲᒪᔪᓐᓇᖅᓯᓐᓇᖅᑐᖅ ᐊᓯᖏᓐᓄᑦ ᐊᔪᖅᑕᐅᔪᓂᒃ. ᑕᐃᒫᓴᐃᓐᓇᖅ ᑎᒍᓯᓇᓱᐊᖅᑐᑦ ᖃᓄᖅ ᐊᑭᒪᖃᑦᑕᐅᑎᔪᓐᓇᕐᒪᖔᑕ ᒐᕙᒪᑎᒃᑯᓐᓂ ᑳᓐᑐᕌᒃᑎᑕᐅᓇᓱᐊᖅᑐᓂ ᐃᓚᐅᓪᓗᑎᒃ. ᑐᓐᖓᕕᒋᔭᐅᖕᒪᑕ ᓴᓇᐅᒐᒥᓂᒃ ᓂᐅᕕᐊᒃᓴᖃᓲᓄᑦ ᑳᓐᑐᕌᒃᑎᓕᐅᕈᑏᑦ ᐊᑯᓂ ᐅᑭᐅᓂᒃ ᖁᓕᓂᒃ ᑕᒪᑐᒥᖓ ᐱᓇᓱᐊᒐᖃᓕᕋᒪ ᖃᐅᔨᒪᓂᖅᓴᐅᓪᓗᐊᓕᖅᑐᖓ ᐊᒻᒪᓗ ᑎᑎᕋᖅᓯᒪᓕᕌᖓᑕ ᑳᓐᑐᕌᒃᑎᖏᓐᓂ ᒪᓕᒃᑕᐅᒋᐊᖃᓕᓲᖑᖕᒪᑕ ᒐᕙᒪᑎᒃᑯᓐᓄᑦ, ᐊᑐᕐᓂᖃᓪᓗᑐᖅᑐᖅ ᑕᒪᓐᓇ ᖃᐅᔨᒪᑦᑎᐊᓕᖅᖢᒍ,” ᐅᖃᕆᓪᓗᓂ.

ᐊᓯᖏᑦᑕᐅᖅ ᑲᑎᒪᒻᒫᕐᒥ ᐃᓕᓴᐃᔪᑕᐅᓚᐅᕐᒥᔪᑦ ᐊᑐᓂ: ᑐᓐᖓᕕᒋᔭᐅᔪᑦ ᑮᓇᐅᔭᓕᕆᔪᑎᓄᑦ, ᑐᓐᖓᕕᒋᔭᐅᔪᑦ ᓇᖕᒥᓂᖅ ᐱᓇᓱᐊᒐᖃᖅᑐᑦ ᑮᓇᐅᔭᓕᕆᔪᑎᖏᓐᓄᑦ, ᑐᓐᖓᕕᒋᔭᐅᔪᑦ ᓴᓇᕕᖏᑕ ᓴᓇᒪᓂᖏᓐᓄᑦ, ᐊᒻᒪᓗ ᓴᓇᐅᒐᕐᓂᒃ ᐊᔾᔨᓕᐅᕆᕙᒃᖢᑎᒃ ᖃᕆᑕᐅᔭᑎᒍᑦ ᓂᐅᕕᐊᒃᓴᓖᑦ− ᑖᓐᓇ ᐃᓚᓕᐅᑎᓯᒪᔪᖅ ᓄᓇᕗᒥ ᓴᓇᐅᒐᖅᑏᑦ ᒥᖅᓱᖅᑏᓪᓗ ᑲᑐᔾᔨᖃᑎᒌᖓᓐᓂᑦ.

ᓯᕗᓪᓕᖅᐸᒥ ᐅᓐᓄᒥ ᐃᓚᐅᖃᑕᐅᔪᑦ ᑎᒎᑎᖃᑦᑕᐅᑎᓚᐅᖅᑐᖅ 16-ᒥ, ᐊᐃᐹᓂ ᑲᑎᒪᒻᒫᕐᒥ ᐃᓕᓴᐃᓪᓗᑎᒃ, ᐱᖓᔪᐊᓂᓗ ᓯᑕᒻᒥᕐᒥᓗ ᐅᓐᓄᒃᑯᑦ, ᓴᓇᖑᐊᖅᑎᓄᑦ ᐋᕿᒃᓱᖅᓯᒪᓪᓗᑎᒃ ᐱᖓᔪᐊᓐᓂ ᐅᓐᓄᒃᓴᒃᑯᑦ ᑲᑎᒪᑎᑦᑎᓚᐅᕆᓪᓗᑎᒃ.

ᐅᒃᑑᐸ 10-ᖑᓕᖅᑎᓪᓗᒍ ᓇᑉᐸᖏᑦ ᐃᓕᓴᒻᒫᕐᒥ ᑲᑎᒪᕕᐅᔪᑦ ᑕᑕᖃᖅᑕᓕᓚᐅᖅᑐᑦ.

“ᑲᑎᒪᒻᒫᕐᒥ ᐃᓕᓴᐃᖃᑦᑕᕐᓂᐊᕋᑦᑕ 12-ᒧᑦ ᑎᑭᖢᒍ ᐃᓚᐅᕕᐅᓂᐊᕌᖓᑕ. ᓄᖅᑲᖅᑎᑦᑎᓚᐅᕋᑦᑕ ᑕᐃᒃᑯᓂᖓ ᑕᒧᓗᖕᓂᒃ ᓂᕆᒋᐊᖅᑐᑐᐃᓐᓇᖅᑐᓂᒃ ᑲᑎᒪᔪᑕᐅᔪᓂᑦ ᐱᒃᑯᒥᒍᓱᒃᑐᓂᒃ ᑭᓯᐊᓂ ᐱᓇᓱᐊᖅᖢᑕ. ᑕᐃᒪᓐᓇ ᓇᖕᒥᓂᖅ ᐱᓇᓱᐊᒐᖃᖅᑐᑦ ᑕᐅᖅᓰᖃᑦᑕᐅᑎᔪᓐᓇᕐᒪᑕ ᖃᐅᔨᒪᓂᕆᓕᖅᑕᒥᓂᒃ ᐊᒻᒪᓗ ᐊᒥᖅᑳᕈᓐᓇᕐᒪᑕ ᓇᖕᒥᓂᖅ ᐊᑐᕐᓂᑯᒥᓂᒃ ᐅᓂᒃᑳᖃᑦᑕᐅᑎᕙᒃᖢᑎᒃ, ᐃᓕᑉᐸᓪᓕᕈᑕᐅᔪᓐᓇᕐᒪᑦ ᑕᒪᓐᓇ,” ᐅᖃᕆᓪᓗᓂ, ᐃᓚᓪᓗᒍ ᑲᑎᒪᒻᒫᕐᒥ ᐃᓕᓴᐃᖃᑦᑕᓚᐅᖅᑐᒍᑦ ᐊᑐᓂ ᐱᓇᓱᐊᒐᓄᑦ ᑕᐃᒪᓐᓇ ᐱᒃᑯᒥᒍᓱᓚᐅᕐᒪᑕ ᐅᓄᕐᓂᖅᓴᓂᒃ ᖃᐃᔪᖃᖃᑦᑕᓕᓚᐅᖅᑐᖅ.

ᑕᒪᑐᒪᓂ ᐱᓇᓱᐊᕈᓯᑦᑎᓐᓂ ᑲᑎᒪᑎᑦᑎᖃᑦᑕᖅᖢᑕ ᐅᓪᓛᕈᒻᒥᑕᖅᑎᓪᓗᒋᑦ ᐅᓂᒃᑳᖅᑎᖃᖅᖢᑎᒃ ᐱᒋᐊᓪᓚᒃᑲᓐᓂᓚᐅᖅᑐᖅ ᐊᐅᔭᖅ ᓄᖅᑲᖓᓚᐅᖅᖢᓂ.

‘ᐅᓪᓛᕈᒻᒥᑕᕐᓗᑎᒃ ᐅᓂᒃᑳᖅᑎᖃᖅᑐᑦ ᐃᓄᖃᓚᐅᖅᑐᖅ ᓄᓇᓕᖕᓂ ᒥᑭᓐᓂᖅᓴᓂᒃ ᓇᖕᒥᓂᖅ ᐱᓇᓱᐊᒐᖃᖅᑐᓂᒃ, ᖃᐃᖁᔨᓯᒪᓚᐅᖅᑐᒍᑦ ᐱᖓᓱᓂᒃ ᐅᓂᒃᑳᕈᓐᓇᖅᑐᓂᒃ ᐃᓅᖃᑎᒥᓄᑦ, ᐃᓚᐅᑎᓪᓗᒍ ᒋᓕᓐ ᑲᓯᓐᔅ, ᐊᐅᓚᑦᑎᔨᒋᔭᐅᔪᖅ ᑲᑭᕙᒃᑯᑦ ᑲᑐᔾᔨᖃᑎᒌᖓᓐᓄᑦ, ᑲᑖᕇᓐ ᒎᒻᔅ, ᐊᐅᓚᑦᑎᔨᒋᔭᐅᔪᖅ ᑐᑭᒧᐊᖅᑎᑦᑎᔨᐅᓪᓗᓂᓗ FNBC-ᑯᓐᓂ (ᓄᓇᖃᖅᑳᖅᑐᑦ ᑲᓇᑕᒥ ᑮᓇᐅᔭᒃᑯᕕᐊᓂ), ᐊᒻᒪᓗ ᒫᒍᕆᑦ ᕼᐅᓕᔅ, ᕼᐅᓕᔅ ᒪᓕᒐᓐᓂᐊᖅᑎᖏᓐᓂᑦ ᐱᔪᖅ ᑳᓐᑐᕌᒃᑎᕈᑎᓂᒃ ᐅᓂᒃᑳᓚᐅᖅᑐᖅ,” ᐅᖃᕆᓪᓗᓂ ᒃᓛᒃ.

ᑖᒃᑯᐊ ᐅᓂᒃᑳᖅᑎᐅᓂᐊᖅᑐᑦ ᐱᓇᓱᐊᒐᕐᒥᓂᒃ ᖃᐅᔨᒪᔭᒥᓂᒃ, ᐅᖃᓪᓛᓂᖅᐸᑕ ᖃᐃᓯᒪᔪᓄᑦ ᓇᑎᕐᒥᑦ ᐊᐱᖅᓱᖅᑕᐅᔪᓐᓇᕐᓂᐊᖅᖢᑎᒃ.”

ᑕᐃᒪᓐᓇ ᐱᑕᖃᖅᑎᑦᑎᓂᐊᖅᑐᑦ ᐅᒃᑑᐸ 18-ᒥ ᖃᔪᖅᑐᖅᕕᒃᑯᑦ ᑲᑐᔾᔨᖃᑎᒌᖓᑕ ᓂᕿᑖᕐᕕᐊᓂ, ᐅᓪᓛᒃᑯᑦ ᐱᒋᐊᕐᓗᑎᒃ 7−ᒧᐊᖅᐸᑦ.

“ᐊᑭᖃᖏᑦᑐᒥᒃ ᓂᕆᑎᑕᐅᓂᐊᖅᑐᑦ ᐅᓪᓛᕈᒻᒥᑕᓂᒃ,” ᐅᖃᕆᓪᓗᓂ ᒃᓛᒃ, ᐃᓚᓪᓗᓂᐅᒃ ᓄᓇᕗᑦ ᒐᕙᒪᖓᓄᑦ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᒃᑯᓐᓄᑦ ᐃᖏᕐᕋᔪᑎᓕᕆᔨᒃᑯᓐᓄᓪᓗ ᑕᒪᓐᓇ ᐅᓪᓚᕈᒻᒥᑕᖅ ᐊᑭᓕᖅᑕᐅᓂᐊᕐᒪᑦ.

ᑭᖑᓪᓕᖅᐸᒥ, ᓂᑭᑦᑖᕐᓗᑎᒃ ᖃᐃᓯᒪᔪᑦ ᐅᖃᓪᓚᖃᑎᖃᕈᓐᓇᕐᓂᐊᖅᑐᑦ ᑖᒃᑯᓂᖓ ᖃᐃᖁᔭᐅᓯᒪᔪᓂᒃ ᐅᓪᓗᓕᒫᒥ ᑕᒫᓃᓐᓂᐊᕐᒪᑕ ᓈᑦᑏᖑᔭᓛᕐᓂᐊᒥ.

ᓯᕗᓂᖓᓂ ᐊᐱᖅᓱᕈᒪᔪᑦ ᐊᑎᓕᐅᕆᐊᖅᑐᓯᒪᕙᒌᕈᓐᓇᖅᑐᑦ ᐅᖃᓗᒃᕕᒋᓗᒋᑦ ᓇᖕᒥᓂᖃᖅᑐᑦ ᑲᑐᔾᔨᖃᑎᒋᖓᑦ ᖃᕆᑕᐅᔭᑎᒍᓪᓘᓐᓃᑦ iqaluitchamber@gmail.com ᐊᒻᒪᓗ ᑕᐃᒪ ᑕᑯᒃᓴᐅᕕᖃᕐᒥᔪᑦ ᕖᔅᐳᒃᑯᑎᒍᑦ.