ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑐᓴᖅᑎᑦᑎᔪᑦ ᒪᕐᕉᖕᓂᒃ ᓄᑖᓂᒃ Facebook-ᑯᑦ ᑐᑭᓯᒋᐊᕐᕕᒃᑕᖃᓕᕋᒥᒃ - ᐊᑕᐅᓯᖅ ᐊᐳᖅᑎᓐᓈᖅᑐᒥ ᐅᔭᕋᖕᓂᐊᖅᑐᓕᕆᓂᕐᒧᑦ ᖃᒪᓂ’ᑐᐊᑉ ᖃᓂᒋᔭᖓᓂᒃ ᐊᒻᒪᓗ ᐱᖃᑎᖓ ᓄᑖᖑᔪᒧᑦ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᒃᑖᖓᓄᑦ ᑲᖏᖅᖠᓂᐅᑉ ᖃᓂᒋᔭᖓᓂᒃ.
ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑕᐅᑐᒃᑐᑦ ᓄᑖᒥᒃ Facebook-ᑯᑦ ᑐᑭᓯᒋᐊᕐᕕᖏᓐᓂᒃ, ᑕᒪᕐᒥᒃ ᖃᑉᓗᓈᑎᑑᖓᔪᑦ ᐃᓄᒃᑎᑐᓪᓗ, ᑕᑯᑎᑦᑎᔪᓐᓇᖃᑦᑕᕐᓂᐊᕐᒪᑕ ᖃᓄᐃᓕᐅᓕᕐᒪᖔᑕ ᐅᔭᕋᖕᓂᐊᕐᕖᒃ ᑭᕙᓪᓕᕐᒥ.
ᑐᑭᓯᒋᐊᕐᕕᐅᔫᒃ ᑐᕌᖓᔫᒃ ᐊᒡᓂᒍ ᐃᒍᒃᑯᑦ ᓄᓇᕗᒥ ᓴᓇᕝᕕᖏᓐᓄᑦ, ᑭᕙᓪᓕᕐᒥ ᓄᓇᓕᖕᓄᑦ ᐊᒻᒪᓗ ᓄᓇᕗᒥ ᐱᓕᕆᖃᑎᒋᔭᐅᕙᒃᑐᓄᑦ ᐱᖁᑎᑖᕐᕕᐅᕙᒃᑐᓄᓪᓗ.
ᑐᑭᓯᒋᐊᕐᕕᒃᓴᐅᔫᒃ ᑕᑯᒋᐊᖅᑕᐅᔪᓐᓇᖃᑦᑕᖅᑐᑦ Facebook-ᑯᑦ ᐅᕙᓂ AEMMeliadine ᑕᓯᕐᔪᐊᕐᒧᑦ ᐊᒻᒪᓗ ᐅᕙᓂ AEMMeadowbankComplex.ᐊᐳᖅᑎᓐᓈᖅᑐᒧᑦ.
ᐊᒡᓂᒍ ᐃᒍᒃᑯᑦ ᐊᖓᔪᖅᑳᖓ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᒻᒪᓗ ᐃᓄᓕᕆᓂᕐᒧᑦ ᑎᐅᓪ ᑲᕕᓐ ᐅᖃᓚᐅᖅᑐᖅ ᐊᒡᓂᒍ ᐃᒍᒃᑯᒡᒎᖅ ᒪᕐᕉᓕᖓᔪᓄᑦ ᑐᑭᓯᒋᐊᕐᕕᒃᑖᖅᓯᒪᓕᖅᑐᑦ ᐱᕈᖅᐸᓪᓕᐊᓗᐊᕐᓂᖓ ᐱᔾᔪᑎᒋᑉᓗᒍ, ᑕᓯᕐᔪᐊᖅ ᐱᕙᓪᓕᐊᒃᑲᓐᓂᕐᓂᐊᖅᑎᓪᓗᒍ ᓴᓇᔨᖏᓪᓗ 2,000-ᖏᓐᓃᑦᑐᒫᓕᖅᑎᓪᓗᒋᑦ ᓄᓇᕗᒥ.
ᑲᕕᓐ ᐅᖃᖅᖢᓂ ᒪᕐᕉᖑᔪᒎᖅ ᐊᖏᔫᒃ ᐱᓕᕆᕝᕖᒃ ᖃᓂᒌᙱᒻᒪᑎᒃ, ᐊᐳᖅᑎᓐᓈᖅᑐᖅ ᓄᓇᒦᖦᖢᓂ ᖃᒪᓂ’ᑐᐊᑉ ᖃᓂᒋᔭᖓᓂᒃ ᐊᒻᒪᓗ ᑕᓯᕐᔪᐊᖅ ᖃᖏᖅᖠᓂᐅᑉ ᖃᓂᒋᔭᖓᓃᖦᖢᓂ.
ᐅᖃᖅᖢᓂ ᒫᓐᓇᒧᒡᒎᖅ, ᐊᒡᓂᒍ ᐃᒍᒃᑯᑦ ᐊᑐᖃᑦᑕᖅᓯᒪᔪᑦ ᐊᒡᓂᒍ ᐃᒍᒃᑯᑦ Facebook-ᓕᕆᔾᔪᑎᖓᓂᒃ ᑲᒪᓂᐊᖅᑎᓪᓗᒋᑦ ᐃᓚᖏᓐᓂᒃ ᐃᖢᐊᙱᓕᐅᕈᑕᐅᖃᑦᑕᖅᓯᒪᔪᓂᒃ ᓄᓇᕗᒥ ᓄᓇᓖᑦ ᖃᐅᔨᒪᖁᑉᓗᒋᑦ ᑭᒃᑰᖕᒪᖔᕐᒥᒃ.
“ᐃᒃᐱᒍᓱᒃᓯᒪᒐᑉᑕ ᒫᓐᓇᐅᔪᖅ, ᒪᕐᕉᓕᖅᑎᓪᓗᒋᑦ ᐱᓕᕆᕝᕕᐅᔫᒃ, ᐃᖕᒥᒃᑯᑦ ᑐᓴᐅᒪᖃᑦᑕᐅᑎᓕᕆᔾᔪᑎᖃᕆᐊᖃᓕᕐᒪᑎᒃ,” ᑕᐃᒪᓐᓇ ᐅᖃᖅᖢᓂ ᑲᕕᓐ.
“ᐱᕕᒃᓴᖃᖅᑎᑦᑎᔪᖅ, ᓲᕐᓗ, ᐊᐳᖅᑎᓐᓈᖅᑐᒥ ᐱᓕᕆᕝᕕᒃ ᐅᖃᖃᑎᖃᕈᓐᓇᖃᑦᑕᖁᑉᓗᒍ ᖃᒪᓂ’ᑐᐊᕐᒥᐅᓂᒃ, ᖃᓂᑦᑑᓂᖓᓄᑦ ᑕᐃᑯᙵ, ᐊᓯᖏᓐᓄᓪᓗ ᓄᓇᓕᖕᓄᑦ, ᑭᓯᐊᓂ ᐱᓗᐊᖅᑐᒥ ᖃᒪᓂ’ᑐᐊᕐᒧᑦ.
“ᑕᓯᕐᔪᐊᕐᒧᓪᓕ, ᑕᐃᒪᐅᔪᑦ ᐊᕐᕕᐊᑦ, ᐃᒡᓗᓕᒑᕐᔪᒃ ᐊᒻᒪᓗ ᑲᖏᖅᖠᓂᖅ ᐅᖃᖃᑎᒋᔭᐅᓲᑦ, ᐅᖃᐅᓯᖃᖅᐸᒃᖢᑕ ᐱᓕᕆᔨᑉᑎᓐᓂᒃ, ᓴᖅᑭᑎᑦᑎᕙᒃᖢᑕᓗ ᑐᓴᒐᒃᓴᓂᒃ ᖃᓄᐃᓕᐅᕐᒪᖔᑕ ᓄᓇᓕᖕᓂ ᐱᓕᕆᖃᑎᒋᔭᑉᑎᓐᓂᒃ.
“ᐅᕝᕙᓘᓐᓃᑦ, ᐱᔾᔪᑎᒋᑉᓗᒋᑦ ᐊᐅᔭᒃᑯᑦ ᑐᒃᑐᑦ ᓅᑉᐸᓪᓕᐊᖃᑦᑕᕐᓂᖏᓐᓄᑦ, ᐅᖃᖃᑎᒋᖃᑦᑕᕆᐊᖃᕋᑉᑎᒍᑦ ᒫᓐᓇᑲᐅᑎᒋ ᐅᖃᖃᑎᒌᓐᓇᖃᑦᑕᕐᓗᒋᓪᓗ ᐃᓄᐃᑦ ᖃᓄᐃᓕᐅᓕᕐᒪᖔᑉᑕ ᐊᑉᖁᑎᓂᒃ ᒪᑐᓯᖃᑦᑕᖅᑎᓪᓗᑕ ᖃᓄᐃᓕᐅᓕᕐᒪᖔᑉᑕᓗ ᐊᑉᖁᑎᑦ ᒥᒃᓵᓄᑦ ᐅᔭᕋᖕᓂᐊᕐᕕᖕᓄᑦ ᑐᒃᑐᑦ ᓅᑉᐸᓪᓕᐊᑎᓪᓗᒋᑦ.”
ᐅᖃᖅᖢᓂᓗ ᓴᓇᕝᕕᒃᓴᓂᒡᒎᖅ ᒪᑐᐃᖓᔪᖃᐃᓐᓇᓲᖅ ᐊᐳᖅᑎᓐᓈᖅᑐᒥ ᑕᓯᕐᔪᐊᕐᒥᓗ ᐃᓄᖕᓄᑦ ᑭᕙᓪᓕᕐᒥ ᐊᒻᒪᓗ, ᑕᐃᒪᐃᒻᒪᑦ ᐱᕕᒃᓴᖃᒃᑲᓐᓂᖅᑐᖅ ᓴᓇᔭᒃᓴᓂᒃ ᐃᓄᐃᑦ ᐊᒥᒐᑐᐃᓐᓇᖅᑐᑦ.