ᐃᑦᑐᐊᓗᒃ ᐅᑭᐅᖅ ᓂᕈᐊᑦᑎᐊᓚᐅᙱᓚᖅ ᐅᓪᓗᕐᒥ ᕿᓄᖓᓪᓗᓂ ᖃᐅᔨᓴᖅᑐᓕᕆᓂᕐᒧᑦ-ᐊᓕᐊᓇᐃᒋᔭᓕᖕᓂ ᐃᓕᓐᓂᐊᖅᑎᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ (VSS) ᐃᓱᒪᓚᐅᕐᓂᖏᓐᓂ ᐃᒡᓗᓕᒑᕐᔪᖕᒥ ᐱᓇᓱᐊᕈᓯᐅᓚᐅᖅᑐᒥ.
Donald Mullins researches his science project on Inuit bow drills and if there is a way to further improve the speed of using them to make a qajaq at Victor Sammurtok School in Chesterfield Inlet on Feb. 8, 2018.
ᐊᒥᓱᑦ ᐃᓕᓐᓂᐊᕐᕕᐅᔪᑦ ᑭᕙᓪᓕᕐᒥ ᒪᑐᓯᒪᓚᐅᖅᐳᑦ ᕕᕈᐊᕆ 5-7-ᒧᑦ ᓂᒡᓚᓱᖕᓂᕐᔪᐊᕌᓗᖏᒥ ᖄᖏᐅᑎᔪᒥ -60 C-ᒥ ᐊᕕᒃᑐᖅᓯᒪᓂᐅᔪᒥ ᕿᕿᒪᕐᒧᐊᖅᑎᑦᑎᑎᓪᓗᒍ.
ᐃᓕᓐᓂᐊᖅᑏᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐊᓯᐅᔨᓚᐅᖅᐳᑦ ᐱᓇᓱᐊᕈᓯᑲᓴᖕᒥ ᐃᓕᓐᓂᐊᕐᕕᐊᕈᓯᕐᒦᓐᓂᖏᓐᓄᑦ ᐃᒡᓗᓕᒑᕐᔪᖕᒥ, ᑭᖑᕙᕆᐊᖅᑎᑕᐅᓪᓗᑎᒃ ᐸᕐᓇᐃᓂᕐᒧᑦ ᐱᓕᕆᐊᒃᓴᒥᓄᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᖕᓄᑦ ᐊᒻᒪᓗ ᐱᔪᓐᓇᕋᔭᕐᓂᖏᓐᓂ ᑭᕙᓪᓕᕐᓂᒥ ᐊᕕᒃᑐᖅᓯᒪᓂᐅᔪᓂ ᖃᐅᔨᓴᖅᑐᓕᕆᓂᕐᒧᑦ ᑕᒃᓴᐅᑎᑕᐅᓂᐅᔪᓂ ᑲᖏᖅᖠᓂᕐᒥ ᒫᔾᔨ 2-5-ᒥ.
ᐃᓕᓴᐃᔨ ᒋᓕᓐ ᐳᕌᑯᐹᖕᒃ ᐱᒋᐊᖅᑎᑦᑎᕗᖅ ᐃᓕᓐᓂᐊᖅᑎᖏᓐᓂᑦ ᐱᓕᕆᓂᐅᔪᒥ ᖃᓄᖅ ᐱᓕᕆᐊᒃᓴᐅᔪᑦ ᓇᐃᓴᐅᓯᖅᑕᐅᕙᖕᓂᖏᓐᓂ ᑕᑯᒃᓴᐅᑎᑕᐅᓂᐅᔪᒥ, ᐃᓚᖃᖅᑐᒥ ᖃᐅᔨᓴᖅᑕᐅᓂᐊᕐᓂᐅᔪᓂ ᑭᓱᓄᑦ ᐊᒻᒪ ᓇᐃᓴᐅᓯᖅᑕᐅᓂᖓᓂ ᓇᑭᙶᕐᓂᖏᓐᓂ, ᐊᒻᒪᓗᑦᑕᐅᖅᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ ᑐᕌᒐᒃᓴᖏᓐᓂ ᑎᑭᐅᒪᑎᑕᐅᔭᕆᐊᓕᖕᓂᑦ ᖃᐅᔨᓴᖅᑐᓕᕆᓂᕐᒧᑦ ᑲᑎᙵᓂᐅᔪᒥ ᐊᕐᕌᒎᔪᒥ.
ᐅᖃᓚᐅᖅᐳᖅ ᐅᔭᐅᕆᕙᖕᓂᖓᓂ ᐃᓕᓐᓂᐊᖅᑎᓂᑦ ᑕᐅᑐᒃᑕᑐᐊᖃᑲᐃᓐᓇᕐᓂᕐᒧᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᒃᓴᖓᓄᑦ ᐅᖃᐅᓯᖃᕐᓂᐅᔪᒥ ᐱᓕᕆᔪᒪᓂᖃᕐᕕᒋᓪᓚᕆᒃᑕᒥᓄᑦ.
"ᐋᖅᑭᒃᓱᖅᐸᙱᓚᕗᑦ ᓂᕈᐊᖅᓯᓗᑎᑦ-ᖃᐅᔨᓴᖅᑐᓕᕆᓂᕐᒧᑦ-ᑕᑯᒃᓴᐅᑎᑕᐅᓂᖓᓄᑦ ᐱᓕᕆᐊᒃᓴᖓᓄᑦ, ᑭᓯᐊᓂ, ᐃᒪᓐᓇᖔᖅ, ᕿᓂᓲᖑᕗᒍᑦ ᐃᓂᐅᔪᓂ ᐃᓕᓐᓂᐊᖅᑏᑦ ᐃᓚᐅᖃᑕᐅᔪᒪᓇᔭᕐᓂᖏᓐᓂ ᐊᒻᒪ ᐃᓕᑦᑎᒃᑲᓐᓂᕐᓗᑎᒃ," ᐅᖃᓚᐅᖅᐳᖅ ᐳᕌᑯᐹᖕᒃ.
"ᑕᐃᒫᒃ ᐱᓕᕆᑦᑎᐊᕐᓂᖅᓴᐅᔪᓐᓇᕐᒪᑕ ᐃᓕᑦᑎᓯᒪᓂᖏᓐᓂ ᑭᓱᑐᐃᓐᓇᒥᒃ ᐱᒻᒪᕆᐅᒋᔭᒥᓂᑦ ᐱᐅᓂᐅᔪᒥ ᐃᒻᒥᖕᓄᑦ.
"ᐃᓕᓐᓂᐊᕐᕕᐊᕈᓯᕐᒦᓕᖅᑐᒍᑦ, ᐅᓪᓗᓂᒃ ᑎᓴᒪᓂᒃ ᑭᖑᕙᖅᓯᒪᔪᒍᑦ ᑎᑭᐅᒪᓕᕈᒪᓚᐅᖅᑕᓐᓄᑦ ᒫᓐᓇᐅᔪᒥ, ᑕᐃᒫᒃ ᑕᐅᑐᒃᑕᑐᐊᖃᑲᐃᓐᓇᕋᓱᐊᖅᐳᒍᑦ ᓴᖑᑎᑦᑎᓂᕐᒥ ᐃᓱᒪᒋᔭᒥᓂᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᓂᐅᔪᒧᑦ."
ᐃᓕᓐᓂᐊᖅᑎᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐊᕕᒃᑐᖅᓯᒪᓂᐅᔪᒥ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᖓᓂ ᐱᒻᒪᕆᐅᒋᕙᖓᑦ, ᐃᒪᐃᑉᐸᓚᐅᖅᖢᑎᒃ ᐃᓕᓐᓂᐊᖅᑎᒥᒃ ᐊᐅᓪᓚᖅᑎᑕᐅᓂᖓᓂ ᑲᓇᑕᓕᒫᒧᑦ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᖓᓄᑦ ᑭᕙᓪᓕᕐᒥ ᑎᑎᕋᖅᑕᐅᓯᒪᓂᐅᔪᒥ ᒪᓕᖃᑦᑕᐅᑎᔪᓄᑦ ᐊᕐᕌᒍᓄᑦ 13-ᓄᑦ.
ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑕᐅᓂᖓ ᐊᕐᕌᒍᑕᒫᒥ ᐱᓕᕆᓂᐅᕙᒃᐳᖅ ᐃᓄᑭᐸᓗᒃᑐᒥ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐊᑲᐅᙱᓕᐅᕈᑕᐅᓇᓂ ᐱᓕᕆᑦᑎᐊᕈᓐᓇᕐᓂᖏᓐᓄᑦ ᐃᓕᓐᓂᐊᖅᑎᖏᓐᓄᑦ.
2017-ᒥ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ ᐱᓕᕆᐊᖑᔪᒥ ᐃᒡᓗᓕᒑᕐᔪᖕᒥ, ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᑦ ᓯᕗᓪᓕᖅᐸᐅᖃᑎᖃᓚᐅᖅᐳᑦ ᐊᓯᖏᓐᓂ, ᐊᒻᒪ ᐱᓪᓗᑎᒃ ᐱᖓᔪᖓᓐᓂ, ᑕᓪᓕᒪᖓᓐᓂ ᐊᒻᒪ 6-ᒋᔭᖓᓂ ᑕᒪᐃᑎᒍᑦ.
ᐃᒻᒪᖄ, ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᑦ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ ᐱᒻᒪᕆᐅᒋᕐᔪᐊᖅᐸᖓᑦ, ᐳᕌᑯᐹᖕᒃ ᓂᕆᐅᖕᓂᖃᑦᑎᐊᖅᐳᑦ ᖃᔅᓯᒐᓚᖕᓂ ᐃᓕᓴᐃᔨᐅᖃᑕᐅᔪᓂ ᓄᖅᑲᖓᓂᕆᓇᔭᖅᑕᒥᓂᑦ ᐱᓕᕆᖃᑕᐅᓂᐊᕐᓂᖏᓐᓂ ᐃᓕᓴᐃᔨᒻᒪᕆᐅᓂᕐᒧᑦ ᐱᕙᓪᓕᐊᑎᑕᐅᓂᖏᓐᓂ ᐱᓇᓱᐊᕈᓯᕐᒥ ᕕᕈᐊᕆ 12-16-ᒧᑦ ᐱᓕᕆᖃᑎᖃᕐᓂᕐᒧᑦ ᐱᓕᕆᐊᒃᓴᐅᔪᓄᑦ, ᐃᒻᒪᖄᓘᓐᓃᑦ, ᖃᐅᔨᓴᐃᓂᐅᔪᒥ ᐱᔭᕇᖅᓯᓗᑎᒃ ᐊᒻᒪᓗ ᐆᒃᑐᕋᐃᓂᖏᓐᓂ ᐱᓕᕆᐊᓂᒃᑕᐅᓗᑎᒃ ᐊᙳᑎᓇᓱᐊᕐᓂᕐᒧᑦ ᐅᐸᒍᓐᓇᓚᐅᙱᑕᒥᓄᑦ ᐅᓪᓗᓄᑦ.
ᐳᕌᑯᐹᖕᒃ ᐅᖃᓚᐅᖅᐳᖅ ᐃᓕᖅᑯᓯᐅᔪᒥ ᓂᕆᐅᓂᖃᕐᔪᐊᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ ᐱᕙᓪᓕᐊᑎᑕᐅᓯᒪᕗᖅ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ 16-ᓄᐸᓗᖕᓄᑦ.
ᐅᖃᓚᐅᖅᐳᖅ ᐃᒡᓗᓕᒑᕐᔪᖕᒥ ᐃᓕᓐᓂᐊᖅᑎᐅᔪᑦ ᖃᐅᔨᒪᕗᑦ ᐱᓕᕆᑦᑎᐊᕈᑎᒃ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ, ᐱᓕᕆᑦᑎᐊᕈᓐᓇᕋᔭᕐᓂᖏᓐᓂ ᐊᕕᒃᑐᖅᓯᒪᓂᐅᔪᒥ ᐊᒻᒪᓗ ᐅᖓᕙᕆᐊᕐᓗᑎᒃ ᑲᓇᑕᓕᒫᒧᑦ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒧᑦ.
"ᐅᐱᒍᓱᒃᐳᒍᑦ ᓱᓕᓂᐅᔪᒥ ᐊᑕᐅᓯᓪᓗᐊᒥ ᐃᓕᓐᓂᐊᖅᑎᒥᒃ ᐃᓚᐅᖃᑕᐅᓂᖓᓂ ᑲᓇᑕᓕᒫᒥ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᒪᓕᒃᐸᓪᓕᐊᔪᓄᑦ ᐊᕐᕌᒍᓄᑦ l3-ᓄᑦ ᐊᒻᒪᓗ, ᐊᕐᕌᒎᓚᐅᖅᑐᒥ, ᓇᒃᓯᐅᔾᔨᓚᐅᖅᐳᒍᑦ ᒪᕐᕉᖕᓂ ᐱᖓᓱᓄᑦ ᐃᓕᓐᓂᐊᖅᑎᓂᑦ ᐊᕕᒃᑐᖅᓯᒪᓂᑦᑎᓐᓂ ᐱᔪᓐᓇᖅᑎᑕᐅᓂᖏᓐᓂ ᑲᓇᑕᓕᒫᒧᑦ ᑕᑯᒃᓴᐅᑎᑦᑎᓂᐅᔪᒧᑦ.
"ᐃᓕᓐᓂᐊᖅᑎᕗᑦ ᓵᓚᖃᕋᓱᐊᓲᖑᕗᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐱᒋᐊᓕᓵᖅᑐᓂᑦ ᖁᑦᑎᖕᓂᓕᖕᓄᑦ 12-ᒧᑦ, ᑕᐃᒫᒃ ᑕᒪᕐᒥᒃ ᐃᓕᓐᓂᐊᖅᑎᑦ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐱᓕᕆᐊᒃᓴᓕᐅᓲᖑᕗᑦ ᐊᕐᕌᒍᑕᒫᒥ.
"ᑕᐃᔅᓱᒪᓂᐅᓚᐅᖅᑐᒥ ᐃᓱᒪᑎᑦᑎᕗᖅ, ᑕᐃᒫᒃ ᕿᒥᕐᕈᓯᒪᕗᖓ ᐊᑐᖅᑕᐅᕌᓂᓚᐅᖅᑐᓂᑦ ᐃᓕᓐᓂᐊᕐᕕᑦᑎᓐᓂ, ᐃᒪᓐᓇ ᑐᕌᒐᑦᑎᓐᓂ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ.
"ᐃᓕᓐᓂᐊᖅᑎᕗᑦ ᐱᓐᓇᕆᕙᖓ ᓱᓕᓂᐅᔪᒥ ᓵᓚᖃᕋᓱᐊᖃᑕᐅᔪᓐᓇᕐᓂᖏᓐᓂ ᓇᓕᒧᒌᑦᑎᐊᕐᓂᐅᔪᒥ ᓇᖏᕐᓂᖏᓐᓂ ᐊᕕᒃᑐᖅᓯᒪᔪᓕᒫᒥ, ᐊᒻᒪᓗ ᑕᑯᒃᓴᐅᓂᖓ ᑖᔅᓱᒧᖓ, ᐅᕙᓐᓄᑦ, ᐊᒃᓱᕈᕐᓂᖃᕐᓂᖏᓐᓂ ᐱᓕᕆᐊᒃᓴᒥᓄᑦ ᐊᕐᕌᒍᑕᒫᒥ."
ᐳᕌᑯᐹᖕᒃ ᐅᖃᓚᐅᖅᐳᖅ ᐊᒥᓱᑦ "ᐱᒧᒪᓂᖃᑦᑎᐊᖅᑐᓂ" ᐃᓕᓐᓂᐊᖅᑏᑦ ᕿᓄᓪᓕᓲᖑᕗᑦ ᐊᔾᔨᐅᙱᑦᑐᒥ ᐃᓱᒪᓕᐅᕆᔪᓐᓇᙱᒃᑯᑎᒃ ᐃᕐᙲᓐᓇᑲᐅᑎᒋ ᐱᓕᕆᐊᒃᓴᖃᕈᒪᖕᒪᑕ ᖃᐅᔨᒪᓂᐊᖅᑕᒥᓂᑦ ᓵᓚᖃᕋᓱᐊᕈᓐᓇᕐᓂᐊᖅᑐᒧᑦ.
ᐅᖃᓚᐅᖅᐳᖅ ᑲᔪᖏᖅᓱᖅᑕᐅᔭᕆᐊᖃᒐᔪᒃᐳᑦ ᒥᒃᖠᒋᐊᖅᑎᑦᑎᓂᕐᒧᑦ ᑕᐅᑐᒃᑕᑐᐊᖃᑲᐃᓐᓇᖅᑕᒥᓂᑦ, ᓂᕈᐊᕐᓗᑎᒃ ᐊᑕᐅᓯᐅᓂᐅᔪᒥ ᐃᓱᒪᓂᕆᔭᖓᓂ ᐅᖃᐅᓯᕆᔪᒪᔭᒥᓂᑦ, ᐊᒻᒪ ᕿᒥᕐᕈᑦᑎᐊᖅᑐᒻᒪᕆᐅᓗᒍ.
"ᑕᐃᒫᒃ ᐱᒋᐊᓲᖑᕗᒍᑦ ᐃᓱᒪᓂᐅᔪᒥ – ᑲᔪᖏᖅᓱᕐᓗᒋᑦ ᐃᓱᒪᒃᓴᖅᓯᐅᕆᓂᕐᒥ ᖃᓄᐃᓕᐅᕈᒪᕙᖕᓂᖏᓐᓂ, ᑭᓱᓂᒃ ᐱᔪᒪᓂᖏᓐᓂ, ᐊᒻᒪ ᐃᓕᑦᑎᒍᑎᒋᒃᑲᓐᓂᕈᒪᓇᔭᖅᑕᒥᓂᑦ – ᐊᒻᒪᓗ ᐊᓱᐃᓛᒃ ᐃᓕᓇᓱᐊᕐᓗᑎᒍᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᓂᐅᔪᒧᑦ.
"ᐱᓕᕆᑦᑎᐊᕈᓐᓇᕐᓂᑦᑎᓐᓂ ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᑐᓂᓯᓲᖑᕗᖅ ᐊᔭᐅᕆᓂᕐᒥ ᐃᓕᓐᓂᐊᕐᕕᖕᒥ ᐃᓕᖅᑯᓯᖓᓐᓂ ᐃᓕᓐᓂᐊᖅᑎᓂᑦ ᖁᕕᐊᑦᑐᖃᕐᒪᑦ ᐃᓕᑦᑎᕙᓪᓕᐊᔭᒥᓂᑦ, ᐊᒻᒪᓗ ᐃᓕᓴᐃᔨᐅᓪᓗᓂ ᐃᓕᓐᓂᐊᖅᑎᒥ ᖁᕕᐊᑦᑐᖃᖅᑎᓪᓗᒍ ᐃᓕᑦᑎᓂᕐᒥᑦ ᐊᒻᒪᓗ ᐊᐱᖅᓱᒃᑲᓐᓂᖅᐸᒃᖢᑎᒃ, ᑕᒪᓐᓇ, ᐅᕙᓐᓄᑦ ᖁᕕᐊᓇᖅᓯᕙᓪᓕᐊᓲᖑᕗᖅ.
"ᖃᐅᔨᓴᖅᑐᓕᕆᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐊᔪᕐᓇᕈᓐᓇᖅᐳᖅ ᐊᐅᓚᑦᑎᓂᕐᒧᑦ ᐃᓕᓐᓂᐊᖅᑏᑦ ᐱᓕᕆᖕᒪᑕ ᐃᒻᒥᒃᑰᖅᖢᑎᒃ ᐱᓕᕆᐊᒃᓴᒥᓂᑦ.
"ᐊᔪᕐᓇᙱᓐᓂᖅᓴᒻᒪᕆᒃ ᐸᕐᓇᐃᓂᕐᒧᑦ ᐊᒻᒪᓗ ᑭᓱᑐᐃᓐᓇᒥᒃ ᓴᓇᓗᓂ ᑭᒃᑯᓕᒫᑦ ᑕᐃᒪᐃᑎᓪᓗᒋᑦ, ᑭᓯᐊᓂ ᐱᓕᕆᐊᒃᓴᒧᑦ-ᑐᙵᕕᓕᖕᓂ ᐃᓕᑦᑎᓂᐅᔪᒥ ᑕᑯᕙᒃᖢᓂ ᐃᓚᖏᓐᓂ ᓱᕈᓯᕐᓂᑦ ᐊᔪᙱᓐᓂᖅᓴᐅᓂᖏᓐᓂ ᐃᓂᐅᔪᓂᑦ ᐱᔾᔪᑎᖃᖅᑐᓄᑦ ᖃᐅᔨᓴᖅᑐᓕᕆᓂᕐᒧᑦ ᐃᓕᓐᓂᐊᕈᑎᓕᐅᖑᔪᓄᓪᓗ, ᐃᓗᐊᕐᓂᖅᓴᐅᒻᒪᕆᒃᐳᖅ."