ᓄᓇᕗᒻᒥ ᓄᑕᐅᙱᑦᑐᓂ ᐊᒻᒪ ᐸᖕᒥᐅᓗᐊᖅᑐᓂ ᐃᓄᓕᒫᓄᑦ ᐃᒡᓗᖁᑕᐅᔪᓂ, ᐅᖁᕐᒃ ᐃᓱᒫᓗᒍᑕᐅᖏᓐᓇᐅᔭᖅᐳᖅ. ᐃᓚᒌᓄᑦ ᐱᔨᑦᑎᕋᖅᑎᒃᑯᓐᓂ ᐅᖃᖅᐳᖅ ᓯᕗᓪᓕᖅᐸᐅᓪᓗᓂ ᐊᒡᕕᐊᕈᑕᐅᕙᒃᑐᒥ ᐊᖏᕐᕋᕆᔭᐅᔪᓂ ᐋᖅᑭᐅᒪᑦᑎᐊᕈᓐᓇᕐᓂᖓᓄᑦ.
ᑲᒪᕗᒍᑦ, ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᒫᓐᓇᐅᔪᒥ ᕿᒥᕐᕈᓇᓕᖅᐳᑦ ᐃᒡᓗᓄᑦ ᐋᖅᑭᐅᒪᑎᑦᑎᔨᐅᔪᒧᑦ ᐱᓕᕆᐊᖑᔪᒥ ᐱᑕᖃᑐᐃᓐᓇᕆᐊᖃᖅᑐᒥ ᐃᓚᒋᐊᖅᓯᓂᕐᒧᑦ ᐅᖁᕐᒥ ᑲᒪᒋᔭᖃᕐᓂᕐᒧᑦ ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ. ᖃᓄᐃᒻᒪᑦ ᐊᑯᓂᐊᓘᓐᓃᖅᐸ?
ᐃᒡᓗᖃᖅᑎᑦᑎᓂᕐᒧᑦ ᖃᓄᐃᓕᖓᓂᐅᔪᖅ ᓄᓇᕗᒻᒥ ᑐᐊᕕᕐᓇᖅᑐᒦᖏᓐᓇᐅᔭᖅᐳᖅ, ᐅᖁᕐᒥ ᐸᒡᕕᓵᕆᓪᓗᓂ ᐱᑕᖃᙱᓗᐊᕐᓂᖓᓂ ᑐᓂᓯᓂᐅᔪᒥ ᐊᒻᒪ ᐸᖕᒥᐅᕐᓂᐅᔪᒥ. ᐊᒻᒪᓗ ᓈᒻᒪᒃᑐᓂ ᑮᓇᐅᔭᖅᑕᖃᙱᓚᖅ ᐋᖅᑭᒃᓯᓂᕐᒧᑦ ᓇᓕᐊᑐᐃᓐᓇᓂᒃ ᐅᑯᓂᖓ ᐊᑲᐅᙱᓕᐅᕈᑕᐅᔪᓄᑦ.
ᑕᐃᒪᐃᒐᔪᒃᑐᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᓵᙵᓂᖃᓲᖑᕗᖅ ᐃᓗᐊᙱᑦᑐᒥ ᖃᓄᐃᓕᖓᓂᐅᔪᒥ: ᐋᖅᑭᒃᓯᓂᐊᖅᐸᑦ ᐅᕝᕙᓘᓐᓃᑦ ᐃᓇᖏᖅᓯᓗᑎᒃ? ᐃᓛᓐᓂᒃᑯᑦ ᐊᑭᖓ ᓇᓕᒧᑲᓴᑦᑎᐊᓲᖑᕗᖅ ᓇᓕᐊᒃᑯᑐᐃᓐᓇᖅ ᐊᑐᕐᓗᓂ.
ᐊᖏᕐᕋᒃᓴᓕᐅᕐᓂᕐᒥ ᐊᑭᑐᔫᓪᓗᓂ ᐱᓕᕆᓂᐅᕗᖅ ᓄᓇᕗᒻᒥ. ᐊᒻᒪᓗ ᐊᑭᑭᓐᓂᖅᓴᐅᕗᖅ ᐊᒻᒪ ᐊᔪᕐᓇᙱᓛᖑᓪᓗᓂ ᐃᖃᓗᖕᓂ, ᐅᖃᓗᐊᕌᓗᙱᖦᖢᓂ. ᑐᐊᕕᕐᓇᖅᑑᔪᖅ ᐱᐅᔪᓐᓃᖅᑎᑕᐅᒃᑲᓐᓂᖅᐳᖅ ᓱᓕᓂᐅᔪᒥ ᐊᑭᑐᔫᑎᓄᑦ ᐊᖏᒡᓕᒋᐊᖅᑎᑦᑎᒃᑲᓐᓂᕈᓐᓇᙱᓚᑦ ᓄᑕᐅᔪᓐᓃᖅᐸᓪᓕᐊᓂᐅᔪᓄᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐱᑕᖃᙱᓗᐊᕐᓂᖓᓂ ᐱᕙᓪᓕᐊᑎᓯᒪᔪᓂ ᓄᓇᓂᑦ. ᐱᕈᖅᐸᓪᓕᐊᖏᓐᓇᐅᔭᖅᑐᒥ ᐃᓄᒋᐊᖕᓂᐅᔪᓂ ᐃᓕᓰᓐᓇᖅᐳᖅ ᐊᒃᓱᕈᕐᓂᐅᔪᒥ ᐱᑕᖄᓂᒃᑐᓄᑦ ᐃᑲᔪᕈᑎᒃᓴᓄᑦ.
ᐊᔪᕐᓇᕐᓂᖅᓴᐅᕗᖅ ᓱᓕ ᓄᓇᓕᖕᓄᑦ, ᑭᓯᐊᓂ ᓄᓇᕗᒻᒥ ᒐᕙᒪᒃᑯᑦ ᐊᖏᐸᓗᒃᑐᒥ ᐊᑐᓗᐊᙱᓐᓂᖅᓴᐅᔪᒥ ᐊᑭᓂᑦ ᐊᖏᒡᓕᒋᐊᖅᑐᒧᑦ ᑭᒡᓕᐅᔪᒥ ᓴᖅᑭᑎᑦᑎᓂᐅᔪᒧᑦ ᓴᓇᓪᓗᑎᒃ ᑲᑎᙵᔪᓂᒃ ᐃᒡᓗᒋᔭᐅᔪᓄᑦ ᐅᓇᐅᙱᖔᖅᑐᒥ ᐊᑕᐅᓯᑐᐊᖑᔪᓄᑦ ᐃᒡᓗᒋᔭᐅᓇᔭᖅᑐᓄᑦ. ᐊᑭᖓ ᐅᓯᑲᑦᑕᕐᓂᕐᒥ ᓇᑉᐸᖅᑎᕆᓂᕐᒧᑦ ᓱᓇᒃᑯᑖᖑᔪᓂ ᐊᑭᑐᔫᑎᓄᑦ ᐅᖓᑖᓄᑦ ᐊᖏᐸᓗᒃᖢᓂ ᐊᑭᖓᓄᑦ ᐊᐅᓚᑦᑎᔨᐅᕗᖅ.
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᖓᔪᖅᑳᖓ ᑎᐊᕆ ᐊᐅᓪᓚ ᐅᖃᓚᐅᖅᐳᖅ 2017-ᒥ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᖅ $240 ᒥᓕᐊᓐᓂ ᓴᓇᔪᓐᓇᖅᐳᑦ 48-ᓂ ᐃᒡᓗᒃᓴᐅᔪᓂ ᐊᕐᕌᒍᑕᒫᒥ, ᑕᐃᒫᒃ $500,000 ᐊᑐᓂ ᓄᑖᖑᔪᒥ ᐃᒡᓗᒃᓴᐅᔪᒧᑦ. ᑕᒪᑐᒪᓂ ᐊᕐᕌᒍᒥ, ᓇᑉᐸᖅᑎᕆᓂᐅᔪᒧᑦ ᐊᑭᖓ ᐃᖃᓗᐃᑦ ᓯᓚᑖᓂ ᓇᓚᐅᑦᑖᕆᔭᐅᓯᒪᕗᖅ ᖃᓂᓐᓂᖅᓴᐅᔪᒧᑦ $700,000-ᓄᑦ. ᖃᔅᓯᐊᕐᔪᖕᓂ ᐊᕐᕌᒍᓂ ᖄᖏᖅᓯᒪᓕᖅᑐᓂ, ᓇᑉᐸᖅᑎᕆᓂᕐᒧᑦ ᐊᑭᖓ ᐊᑦᑎᖕᓂᖅᓴᐅᑎᓪᓗᒍ, ᑐᓴᓚᐅᖅᐳᒍᑦ ᓄᑕᐅᙱᑦᑐᓂ ᐃᒡᓗᖁᑕᐅᔪᓂ ᓵᙵᔪᓂᑦ $250,000 ᐅᖓᑖᓄᑦ ᐋᖅᑭᒃᓱᐃᓂᕐᒧᑦ ᐊᑭᐅᔪᓂᑦ. ᐃᓱᒪᒋᓇᒍ ᐆᒥᖓ ᐊᑭᑐᔪᒻᒪᕆᐅᔪᒥ ᐊᑭᖓᓐᓂ, ᐋᖅᑭᐅᒪᑎᑦᑎᓂᖅ ᐱᑕᖄᓂᒃᑐᓂ ᐃᒡᓗᖁᑕᐅᔪᓄᑦ ᐱᐅᓂᖅᐹᖑᕗᖅ ᓂᕈᐊᒐᒃᓴᐅᔪᓄᑦ.
ᐃᓱᒪᒋᓇᒍ ᐃᓱᒪᒋᔭᐅᓂᐅᔪᒥ ᖃᓪᓗᓈᑦ ᓄᓇᖓᓐᓂ ᖁᙱᐊᖅᑎᐅᔪᓄᑦ ᓄᓇᕗᒻᒥᐅᑦ ᓅᑐᐃᓐᓇᓪᓗᐊᕐᓂᖏᓐᓂ ᖃᓪᓗᓈᑦ ᓄᓇᖓᓐᓄᑦ – ᓲᕐᓗ ᑕᒪᓐᓇ ᐋᖅᑭᒍᑕᐅᓇᔭᕐᓂᖓᓂ – ᓄᓇᕗᒻᒥᐅᑦ ᑕᐃᒪᐃᑦᑐᒥᒃ ᐊᖏᔪᐊᓗᖕᒥ ᐱᓕᕆᓂᖃᕋᔭᙱᓚᑦ. ᑕᐅᑐᒃᑕᑐᐊᖃᑲᐃᓐᓇᕐᓂᖓ ᓱᓕ ᐊᖏᕐᕋᕆᔭᐅᔪᓂ ᐊᑦᑕᓇᙱᓐᓂᕐᒧᑦ ᐊᒻᒪ ᐃᓗᐊᕐᓗᑎᒃ ᐊᔪᕐᓇᙱᓐᓂᓕᒫᖓᓂ. ᐃᓄᓕᒫᓄᑦ ᐃᒡᓗᖃᖅᑎᑕᐅᓂᐅᔪᓅᖓᔪᓄᑦ, ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᓐᓂ ᐊᑦᑎᖕᓂᖅᓴᐅᕐᔪᐊᖅᐳᖅ ᓂᕆᐅᒋᔭᐅᓪᓗᐊᕐᓂᖏᓐᓂ. ᐋᖅᑭᒃᓯᓂᖅ ᐅᖁᕐᒧᑦ ᐊᑲᐅᙱᓕᐅᕈᑕᐅᔪᒥ ᐱᐅᓯᒋᐊᖅᑎᑦᑎᓇᔭᖅᐳᖅ ᖃᓄᐃᓐᓂᐅᔪᒥᑦ.
ᑭᓯᐊᓂ ᑭᖑᓪᓕᖅᐹᖑᔪᒥ ᓄᓇᕗᒻᒥᐅᑦ ᐱᔭᕆᐊᖃᕐᓂᖏᓐᓂ ᐃᓄᖕᓂ ᑎᑭᑦᑐᓂ ᓄᓇᕘᑉ ᓯᓚᑖᓂ ᐋᖅᑭᒃᓯᓂᕐᒧᑦ ᐊᑲᐅᙱᓕᐅᕈᑕᐅᔪᓂᑦ ᐋᖅᑭᒃᑕᐅᔪᓐᓇᖅᑐᓂ ᐱᓕᒻᒪᒃᓴᖅᓯᒪᔪᓄᑦ ᓄᓇᕗᒻᒥᐅᓄᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑐᓂᓯᓲᖑᕗᑦ ᐱᓕᒻᒪᒃᓴᕐᓂᐅᔪᒥ ᓇᖕᒥᓂᖅ ᐃᓄᖁᑎᖏᓐᓄᑦ ᐅᖁᕐᒥ ᐋᖅᑭᒃᓱᐃᓂᐅᔪᒧᑦ, ᑭᓯᐊᓂ ᓯᓚᑖᓂᙶᖅᑐᓂ ᑳᓐᑐᕌᒃᑎᐅᔪᓂ ᓱᓕ ᐱᔭᐅᔭᕆᐊᖃᖅᐳᑦ ᐅᖁᒪᐃᓂᖅᓴᓄᑦ ᑭᕕᒃᓯᓂᐅᔪᓄᑦ.
ᐱᔾᔪᑎᒃᓴᖃᓗᐊᙱᓚᖅ ᐆᒧᖓ ᓱᓕᓂᐅᔪᒧᑦ.
ᑕᑯᒋᐊᕈᕕᑦ ᓯᓚᑦᑐᖅᓴᕐᕕᖕᓄᑦ ᓄᓇᕗᑦ ᓯᓚᑖᓂ, ᓇᓂᓯᓂᐊᖅᐳᑎᑦ ᑕᒪᐃᑎᒎᖅᑐᓂ ᐱᓕᕆᐊᖑᔪᓂ ᐊᔾᔨᐸᓗᐊᓂ ᑕᐃᒃᑯᓄᖓ ᐊᑐᐃᓐᓇᐅᑎᑕᐅᔪᓄᑦ ᐅᕙᓂ. ᑭᓯᐊᓂ ᓇᓂᓯᓂᐊᕆᕗᑎᑦ ᐅᖓᕙᕆᐊᖅᓯᒪᔪᓄᑦ ᐸᐃᑉᐹᖃᖅᑎᑕᐅᓂᐅᔪᓂ ᑕᐃᒃᑯᓄᖓ ᕿᓂᖅᑐᓄᑦ ᐃᓚᓕᐅᔾᔨᓂᕐᒧᑦ ᐱᓕᕆᓂᒻᒪᕆᐅᔪᒧᑦ.
ᐅᖁᕐᒧᑦ ᖃᓄᐃᓐᓂᐅᔪᖅ ᐃᕆᐊᓛᖅᐳᖅ ᑕᐃᒪᐃᑦᑐᒧᑦ ᐱᓕᕆᓂᒻᒪᕆᐅᔪᒧᑦ ᐱᓕᒻᒪᒃᓴᕐᓂᐅᔪᒥ ᐅᕙᓂ ᓄᓇᕗᒻᒥ.
ᓯᓚᑦᑐᖅᓴᕐᕕᒃ ᕿᒥᕐᕈᓇᒃᑎᓪᓗᒍ ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ, ᐊᔭᐅᕆᕗᒍᑦ ᐃᓱᒪᒋᔭᖃᕐᓂᕐᒥ ᑕᐃᒪᐃᑦᑐᒥ ᐱᓕᕆᐊᖑᓂᐅᔪᒥ. ᐱᔪᒪᓂᐅᔪᒥ ᐃᓱᓕᑦᑎᓂᑯᓂ ᖁᑦᑏᓐᓇᐅᔭᕐᓂᐊᖅᐳᖅ, ᐊᒥᓱᓂ ᐃᒡᓗᕐᔪᐊᓂ ᐅᖁᓕᖕᓂ ᐃᓕᓐᓂᐊᖅᑎᓄᑦ ᐱᓕᒻᒪᒃᓴᕈᑎᒋᔪᓐᓇᖅᑕᒥᓂᑦ ᓄᑖᖑᔪᓂ ᐱᕙᓪᓕᐊᑎᑕᐅᓂᖓᓄᑦ ᐊᔪᙱᓐᓂᖓᓐᓂᑦ.
ᐅᓇ ᐊᑲᐅᙱᓕᐅᕈᑕᐅᔪᖅ ᐋᖅᑭᒍᓐᓇᖅᑕᑦᑎᓐᓂ. ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪ ᐃᓅᓯᖏᓐᓂ ᓄᓇᕗᒻᒥᐅᓂ ᐱᔭᕆᐊᖃᓪᓚᕆᒃᐸᖓᑦ.