ᑕᓪᓕᒪᑦ ᓕᐅ ᐅᓴᒃ ᐃᓕᓐᓂᐊᕐᕕᐊᓛᖓᓂ ᐃᓕᓐᓂᐊᖅᑎᑦ ᐱᑦᓯᐊᖅᑕᐅᔪᒻᒪᕆᐅᓚᐅᖅᐳᑦ ᖃᑉᑎᕆᔨᑦ ᐊᖓᔪᖄᖓᓐᓄᑦ ᒫᒃ ᕙᐃᐊᑦ, ᑲᑉᑎᓐ ᑲᐃᔪ ᓘ ᐊᒻᒪ ᔪᐊᔾ ᐊᒃᓴᒡᔪᐊᒃ, ᐊᒻᒪ ᓗᑕᓇᑦ ᑭᓕ ᖃᕐᕖᒃᑐᑦ ᒪᒃᑯᒃᑑᑉᓗᓂ ᐱᓕᕆᔪᖅ ᖃᑉᑎᕆᔨᓄᑦ ᐊᖓᔪᖄᖑᓂᕐᒧᑦ ᑲᖏᖅᖠᓂᕐᒥ ᐊᑭᓕᖅᑐᒐᐅᖏᑦᖢᑎᒃ ᖃᑉᑎᕆᔨᓄᑦ ᐊᒃᑐᐱᕆ 25-ᖑᓚᐅᖅᑐᒥ.
ᐃᓕᓐᓂᐊᖅᑎᑦ − ᒦᓚ ᓕᓐᑎᐅ (ᐃᓕᓐᓂᐊᓕᓵᖅᑐᖅ), ᔨᐊᓇ ᕼᐅᕌᓐᑕᔅ (ᒍᕇᑦ 1), ᓚᑯᐃᓴ ᒪᑭᒐᒃ (ᒍᕇᑦ 2) ᐊᓚᓇ ᒪᐃ ᐃᓄᒃᓱᒃ (ᒍᕇᑦ 3) ᐊᒻᒪ ᓃᑦ ᐊᓇᕈᐊᒃ (ᒍᕇᑦ 4G − ᓵᓚᒃᓴᓚᐅᕐᒪᑕ ᑎᑎᕋᐅᔭᖅᖢᑎᒃ ᓂᕈᐊᖅᑕᐅᑉᓗᑎᒃ ᐊᒥᓲᓂᖃᖅᑐᓂᑦ 200 ᖃᑉᑎᕆᔨᒃᑯᑦ ᐃᑯᐊᓪᓚᒃᑕᐃᓕᓂᕐᒧᑦ ᐱᓇᓱᐊᕈᓯᖃᖅᑎᓪᓗᒋᑦ ᓵᓚᒃᓴᐅᑎᖃᑦᑕᐅᑎᑎᑕᐅᑉᓗᑎᒃ.
ᐃᓕᓐᓂᐊᖅᑎᑦ ᐊᒡᔭᖅᑕᐅᓚᐅᖅᐳᑦ ᐃᓕᓐᓂᐊᕐᕕᖕᒧᑦ, ᐊᐃᔭᐅᑉᓗᑎᒡᓗ ᐊᖏᕐᕋᐅᔾᔭᐅᑉᓗᑎᒃ ᖃᑉᑎᕆᔨᒃᑯᑦ ᓄᓇᒃᑰᕈᑎᖓᓐᓄᑦ ᐅᑉᓗᖃᑦᓯᐊᓚᐅᖅᐳᑦ ᐊᔾᔨᐅᖏᑦᑐᒥᒃ, ᐊᒻᒪ ᓯᓚᒥ ᓂᕆᑎᑕᐅᓚᐅᖅᖢᑎᒃ ᓰᔅᐳᒍᓂᒃ ᖃᑉᑎᕆᕕᖕᒥ.
ᓇᓗᓇᐃᒃᑯᑕᖅᑖᖅᑎᑕᐅᑉᓗᑎᒡᓗ ᐊᕙᓗᓯᒪᔪᒥᒃ ᐊᒻᒪ $25−ᕌᖅᑐᓂᒃ ᓂᐅᕕᕈᑎᒃᓴᖅ ᓂᐅᕕᕐᕕᖕᒥᑦ.
ᕙᐃᐊᑦ ᐅᖃᓚᐅᖅᐳᖅ ᐃᑯᐊᓪᓚᒃᑕᐃᓕᓐᓇᐅᑎᓪᓗᒍ ᐱᓇᓱᐊᕈᓯᒥᓂ (ᐊᒃᑐᐱᕆ 9-14-ᒧᑦ), ᖃᑉᑎᕆᔨᑦ ᐱᓕᕆᔨᖏᑦ ᐃᓕᓐᓂᐊᕐᕕᖕᓂ ᐅᖃᓪᓚᒋᐊᖅᑎᑕᐅᓯᒪᓚᐅᖅᐳᑦ ᓕᐅ ᐅᓴᒃ ᐃᓕᓐᓂᐊᕐᕕᐊᓛᖓᓂ, ᐃᓕᓐᓂᐊᓕᓵᖅᑐᑯᓗᖕᓄᑦ ᒍᕇᑦ 4-ᒧᑦ, ᐃᑯᐊᓛᖅᑎᒥᒃ ᐅᔾᔨᖅᑐᑦᓯᐊᕆᐊᖃᕐᓂᕐᒧᑦ ᐃᑯᐊᓪᓚᒃᑕᐃᓕᑎᑦᓯᒋᐊᖃᕐᓂᕐᒧᓪᓗ.
ᐅᖃᓚᐅᖅᐳᖅ ᖁᕕᐊᓱᑦᓯᐊᓚᐅᕋᒥ ᐊᒥᓱᓄᑦ ᑎᑎᕋᐅᔭᕐᓂᖅ ᐃᓚᐅᓂᖃᕐᕕᐅᓚᐅᕐᒪᑦ 200 ᐅᖓᑖᓄᑦ ᐃᓚᐅᑉᓗᑎᒃ.
“ᑕᒪᕐᒥᒃ ᐊᔾᔨᒌᖏᑦᑐᓂᒃ ᑎᑎᕋᐅᔭᓚᐅᖅᐳᑦ ᐃᓕᓚᐅᖅᑕᒥᖕᓂᒃ ᐅᖃᓪᓚᒋᐊᖅᓯᒪᑎᓪᓗᑕ ᐃᑯᐊᓛᖅᑐᒥᒃ ᐅᔾᔨᖅᑐᑦᓯᐊᕆᐊᖃᕐᓂᕐᒧᑦ,” ᐅᖃᓚᐅᖅᐳᖅ ᕙᐃᐊᑦ.
“ᓂᕈᐊᓚᐅᖅᐳᒍᑦ ᐊᑕᐅᓯᕐᒥᒃ ᐊᑐᓂ ᒍᕇᑦᓂᑦ. ᐊᒥᓲᓂᖅᓴᐃᑦ ᖃᐅᔨᒪᓚᐅᖏᑉᐳᑦ ᓵᓚᒃᓴᕐᓂᕐᒧᑦ ᐊᖏᕐᕋᖓᓐᓄᖓᐅᒐᑉᑕ ᖃᑉᑎᕆᔨᒃᑯᑦ ᓄᓇᒃᑰᕈᑎᖓᒍᑦ ᐃᓕᓐᓂᐊᕐᕕᖕᒧᖓᐅᑎᑉᓗᒋᑦ ᐅᑉᓛᒃᑯᑦ ᐱᖓᑦᓯᕐᒥ, ᐊᒃᑐᐱᕆ 25, ᑕᐃᒪᓐᓇ ᓂᕆᐅᓚᐅᖏᑉᐳᑦ.”
ᕙᐃᐊᑦ ᖁᕕᐊᓇᑦᓯᐊᖅᑑᔮᓚᐅᖅᐳᑦ ᐃᓕᓐᓂᐊᖅᑎᑦ ᓵᓚᒃᓴᓚᐅᖅᑐᑦ ᖃᓄᐃᓕᐅᕈᑕᐅᓚᐅᕐᓂᕐᒥᖕᓄᑦ.”
ᕙᐃᐊᑦ ᐅᖃᓚᐅᖅᖢᓂᓗ ᖁᕕᐊᓇᖅᑑᔮᓚᐅᕐᓂᖓᓄᑦ ᑕᓪᓕᒪᓄᑦ ᐃᓕᓐᓂᐊᖅᑎᓄᑦ.
ᐅᖃᓚᐅᖅᖢᓂᓗ ᖁᕕᐊᓱᓚᐅᕐᒪᑕ ᖃᑉᑎᕆᕕᖕᒥ, ᖁᕕᐊᓱᒃᖢᑎᒡᓗ ᖃᑉᑎᕆᔨᒃᑯᑦ ᓄᓇᒃᑰᕈᑎᒃᑰᖅᑎᑕᐅᑉᓗᑎᒃ.
“ᑐᓱᒋᔭᐅᓚᐅᖅᑐᒃᓴᐅᕗᑦ ᐊᓯᖏᓐᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᖕᒥ ᐅᑉᓗᖃᓚᐅᖅᑎᓪᓗᒋᑦ, ᐱᓗᐊᖅᑐᒥᒃ ᖃᑉᑎᕆᔨᑦ ᓄᓇᒃᑰᕈᑎᖓᒎᖅᑎᑕᐅᑎᓪᓗᒋᑦ ᐊᒡᔭᖅᑕᐅᑉᓗᑎᒃ,” ᐅᖃᓚᐅᖅᐳᖅ ᕙᐃᐊᑦ ᐃᒡᒐᕈᓱᒃᖢᓂ.
“ᓵᓚᒃᓴᐅᑎᖏᓐᓂᒃ ᑐᓂᔭᐅᑉᓗᑎᒃ ᖁᕕᐊᓱᓚᐅᖅᐳᑦ ᑕᐅᑐᒃᑕᐅᑉᓗᑎᒃ ᐊᓯᒥᖕᓄᑦ ᑕᐃᑲᓂ ᖃᑉᑎᕆᕕᖕᒥ.
“ᐅᑉᓗᖃᑦᓯᐊᓚᐅᖅᐳᒍᑦ.”