ᐊᒥᓱᑦ ᐃᓄᐃᑦ ᐊᕐᕕᐊᒥᐅᑦ ᖁᕕᐊᒋᔭᖃᑦᓯᐊᖅᐳᑦ ᑕᑯᓐᓇᖅᑕᐅᕙᒃᑐᓂᒃ ᐱᓐᖑᐊᖅᑎᓂᒃ, ᐊᔪᖏᓐᓂᖏᓐᓂᒃ ᑕᐃᒪᓐᓇᐃᓕᐅᖃᑦᑕᕐᓂᖏᓐᓂᒡᓗ ᑖᒃᑯᐊ ᐃᒡᓗᓕᖕᒥᐅᑦ ᑕᑯᓐᓇᒐᒃᓴᐅᑉᓗᑎᒃ ᐱᓐᖑᐊᖅᑎᑦ ᑎᑭᓯᒪᓚᐅᖅᑎᓪᓗᒋᑦ ᓄᓇᓕᖕᒧᑦ ᑕᖅᑭᐅᓚᐅᖅᑐᒥ.
ᔮᓐ ᐊᕐᓇᓗᒡᔪᐊᖅ ᐃᓕᓐᓂᐊᕐᕕᒡᔪᐊᖓᓂ ᐃᓕᓐᓂᐊᖅᑎᑎᔨ ᒍᐊᑦ ᐱᓛᑦ ᐃᑲᔪᓚᐅᖅᐳᖅ ᐊᐅᓚᑦᓯᖃᑕᐅᑉᓗᓂ ᐃᑲᔪᖃᑕᐅᑉᓗᓂᓗ ᑖᒃᑯᓂᖓ ᐳᓚᕋᖅᓯᒪᓚᐅᖅᑐᓂᒃ.
ᐱᓐᖑᐊᖅᑎᑦ ᑎᑭᓚᐅᖅᐳᖅ ᐊᕐᕕᐊᓄᑦ ᐊᒃᑐᐱᕆ 2-ᒥ ᐅᑉᓗᓄᓪᓗ ᑕᓪᓕᒪᓄᑦ ᑕᐃᑲᓃᑦᖢᓂ ᓄᓇᓕᖕᒥ ᑕᑯᔭᖅᑐᓚᐅᐱᓪᓚᓚᐅᕆᑉᓗᑎᒡᓗ ᑲᖏᖅᖠᓂᕐᒧᑦ ᐊᐅᓪᓚᖅᐸᓪᓕᐊᑉᓗᑎᒃ ᐃᒡᓗᓕᖕᒧᑦ.
ᐱᓛᑦ ᐅᖃᓚᐅᖅᐳᖅ ᑖᒃᑯᐊ Artcirq ᖃᓄᑐᐃᓐᓇᖅ ᖃᓄᐃᓕᐅᕈᑎᖃᓚᐅᖅᐳᑦ ᐃᓕᓐᓂᐊᖅᑎᑕᐅᓚᐅᖅᖢᑎᒡᓗ ᑭᖑᓪᓕᖅᐹᖅᓯᐅᓕᖅᖢᑎᒃ.
ᐅᖃᓚᐅᖅᖢᓂᓗ ᐅᐱᓐᓇᑦᓯᐊᓚᐅᕐᒪᑦ ᑕᑯᑉᓗᒋᑦ 30 ᐃᓕᓐᓂᐊᖅᑎᑦ ᐃᓕᓐᓂᐊᓚᐅᕐᒪᑕ ᑖᒃᑯᓇᖓᑦ ᑕᑯᓐᓇᒐᒃᓴᓂᒃ ᐱᓐᖑᐊᖅᑎᓂᑦ ᕿᓚᒥᒻᒪᕆᐊᓗᒃ.
“ᑭᖑᓪᓕᖅᐹᖅᓯᐅᕐᓂᐊᓕᖅᑎᓪᓗᒋᑦ, ᐃᓕᓐᓂᐊᖅᑎᑦ ᑕᒪᕐᒥᒃ ᐃᓚᐅᓕᓚᐅᖅᐳᑦ ᐃᓕᓐᓂᐊᖃᑕᐅᓂᕐᒧᑦ ᐊᒻᒪ ᐊᔪᖏᓴᖅᖢᑎᒃ ᐊᐅᓚᒍᓯᖕᓂᒃ ᐅᔭᐅᑦᑕᖅᖢᑎᒡᓗ ᑕᐃᒪᓐᓇ ᐃᖕᒥᓂᒃ,” ᐅᖃᓚᐅᖅᐳᖅ ᐱᓛᑦ. “ᐃᓕᓐᓂᐊᖅᑎᑦ ᑕᐃᒪᓐᓇ ᐊᕝᕙᓗᐊᖏᓐᓂᒃ ᖃᓄᐃᓕᐅᕈᑕᐅᓂᐊᖅᑐᓂᒃ Artcirq ᑕᑯᒃᓴᐅᑎᑦᓯᓚᐅᖅᐳᑦ ᐊᒃᑐᐱᕆ 5−ᒥ.”
“ᐊᕝᕙᒃᑲᓐᓂᖏᑦ ᐅᑯᐊᖑᓚᐅᖅᖢᑎᒃ ᑕᑯᒃᓴᐅᑎᑦᓯᑉᓗᑎᒃ ᒋᐅᒻ ᓴᓚᑎᓐ, ᕼᐃᐅᕆᐊᑦ ᐹᑐᕆᒃ ᓕᓄᑦ ᐊᒻᒪ ᑎᐅᕆ ᐅᔭᕈᐊᒃ ᐊᔪᕐᓇᕐᓂᖅᓴᓂᒃ ᐅᔭᐅᑦᑕᕈᑎᖃᓚᐅᖅᐳᑦ, ᐃᒡᓗᑭᑖᖅᖢᑎᒡᓗ ᐊᒻᒪ ᐃᒡᓚᕐᓇᖅᑐᓕᕆᑉᓗᑎᒃ.”
ᐱᓛᑦ ᐅᖃᓚᐅᖅᐳᖅ ᓕᓄᑦ ᑕᑯᕋᓐᓂᕆᔭᐅᓚᐅᖅᐳᖅ ᐊᒥᓱᓄᑦ, ᐱᓗᐊᖅᑐᒥᒃ ᖃᓄᑐᐃᓐᓇᖅ ᐊᐅᓚᒍᓐᓇᕐᓂᖓᓄᑦ ᐃᒃᓯᕙᐅᑕᒥᒃ ᐊᑐᖅᖢᓂ ᐃᒥᐅᑎᓂᒡᓗ.
“ᑕᒪᓐᓇ ᐱᒻᒪᕆᐅᓚᐅᖅᐳᖅ ᐹᑐᕆᒃᒧᑦ ᖃᐅᔨᒪᑦᓯᐊᖅᖢᓂ ᖃᓄᐃᓕᐅᕆᐊᖃᕐᓂᕐᒧᑦ,” ᐅᖃᓚᐅᖅᐳᖅ. “ᑕᐅᑐᒃᖢᒍ ᓇᖓᕐᓇᑦᓯᐊᖅᖢᓂ.”
ᑖᒃᑯᐊ ᐱᓐᖑᐊᖅᑎᑦ Artcirq ᐊᑐᓚᐅᖅᐳᑦ ᑖᒃᑯᓂᖓ ᐊᑐᖅᑕᐅᕙᒃᑐᓂᒃ ᓄᑕᖃᓄᑦ ᑕᑯᓐᓇᒐᒃᓴᓕᕆᔨᐅᕙᒃᑐᑦ Missoula Children's Theatre. ᐊᔾᔨᐅᖏᑦᑐᖅ ᐃᓕᓐᓂᐊᖅᑎᓄᑦ ᐱᔾᔪᑎᖃᖅᖢᓂ ᐊᐅᓚᓂᖅ ᐃᓱᒪᖏᑦᖢᑎᒃ ᐅᖃᓪᓚᖕᓂᕐᒥᒃ ᐊᒻᒪ ᐅᖃᓕᒫᖅᑐᖃᖏᑦᖢᓂᓗ.
ᐱᓛᑦ ᐅᖃᓚᐅᖅᐳᖅ ᑖᒃᑯᐊ ᐱᓐᖑᐊᖅᑎᑦ Artcirq ᐱᓕᕆᖃᑎᖃᓚᐅᖅᐳᖅ ᐃᓕᓐᓂᐊᖅᑎᓂᒃ ᐸᕐᓇᒃᑎᑕᐅᑉᓗᑎᒃ ᐱᓐᖑᐊᕐᓂᕐᒧᑦ ᑕᑯᒃᓴᐅᔪᒃᓴᓂᒃ ᑕᑯᓐᓇᖅᑕᐅᓪᓗᐊᕐᓂᐊᖅᑐᒥᒃ.
ᐃᓕᓐᓂᐊᖅᑎᑕᐅᓚᐅᖅᐳᑦ ᑲᑎᑦᖢᒋᑦ ᐊᕙᑎᑦ ᐃᓕᓐᓂᐊᖅᑎᑦ.
“ᐃᒻᒪᖃ 40−ᐅᓚᐅᖅᐳᑦ ᐃᓕᓐᓂᐊᕆᐊᖃᑕᐅᔪᑦ ᓯᕗᓪᓕᖅᐹᒥ,” ᐅᖃᓚᐅᖅᐳᖅ ᐱᓛᑦ, “ᑕᐃᒪᓐᓇ ᒋᐅᒻ ᐅᖃᓚᐅᖅᐳᖅ ᑕᒪᐃᓐᓄᑦ ᐃᓚᐅᒍᒪᓪᓗᐊᓚᐅᖅᑐᓄᑦ ᐅᑎᖁᑉᓗᒋᑦ ᖃᐅᒃᐸᑦ, ᑭᓯᐊᓂ, ᐅᖃᓚᐅᖅᐳᖅ ᐃᓚᐅᒍᒪᖏᑦᑐᑦ ᑕᑯᓐᓇᒐᒃᓴᐅᓂᐊᖅᑐᓄᑦ ᐅᑎᕆᐊᖃᖏᓐᓂᖏᓐᓄᑦ.
“ᐊᒥᓱᑦ ᐃᓚᐅᒍᒪᓚᐅᖏᑉᐳᑦ ᐊᒥᓱᓄᑦ ᑕᐅᑐᒃᑕᐅᓗᑎᒃ ᐅᑎᕈᒪᓚᐅᖏᑦᖢᑎᒡᓗ ᕿᒪᒃᓯᑉᓗᑎᒡᓗ, ᑭᓯᐊᓂ ᐊᒥᓲᓚᐅᖅᐳᑦ ᐃᓚᐅᒍᒪᔪᑦ.
ᐱᓛᑦ ᐅᖃᓚᐅᖅᐳᖅ ᐃᓚᖏᑦ ᓄᑕᖃᑦ ᓂᕆᐅᒋᓚᐅᖏᑕᖏᑦ ᐃᓚᓕᐅᑎᓚᐅᖅᐳᑦ. ᐅᖃᓚᐅᖅᖢᓂᓗ ᑕᒪᒃᑯᐊ ᐃᖃᐃᓕᓴᖅᑐᑦ ᓄᑕᖃᑦ ᐃᓚᐅᓚᐅᖅᐳᑦ ᓂᕆᐅᒋᔭᐅᓚᐅᖏᒃᑲᓗᐊᖅᖢᑎᒃ.
“ᐃᓕᓐᓂᐊᕐᕕᖕᒥ ᐊᖓᔪᖄᕗᑦ, ᕈᒥᐅ ᕗᔪᐊᓂ, ᐅᖃᓚᐅᖅᐳᖅ ᑲᒪᓇᓚᐅᕐᓂᖓᓄᑦ ᑕᑯᑉᓗᒋᑦ ᓄᑕᖃᑦ ᓇᓪᓕᐊᖏᑦ ᐃᓚᐅᓚᐅᕐᓂᖏᓐᓄᑦ ᐃᓚᓕᐅᑎᒍᒪᓂᐊᕋᓱᒋᔭᐅᓚᐅᖏᑦᑐᑦ,” ᐅᖃᓚᐅᖅᐳᖅ,
“ᑕᒪᓐᓇ ᑲᒪᓇᓚᐅᖅᐳᖅ ᐅᖃᐅᕆᔭᐅᑎᓪᓗᒍ ᐃᓛᓐᓂᒃᑯᑦ ᐃᓱᒪᖃᑦᑕᕋᒪ ᖃᓄᐃᓕᐅᕈᑎᒋᔭᐅᔪᑦ ᖃᓄᐃᑦᑑᓂᖏᓐᓄᑦ ᐱᓪᓗᐊᕕᖏᑦᑐᑦ ᐱᓪᓚᕆᒃᑑᔮᖅᑐᑦ ᐊᒻᒪᓗ ᐃᖃᐃᓕᓴᐅᑎᑦ ᐱᓐᖑᐊᕈᑎᒋᔭᐅᖃᑦᑕᕐᒪᖔᑕ ᑲᑐᔾᔭᐅᑉᓗᑎᒃ?”
ᐱᓛᑦ ᐅᖃᓚᐅᖅᖢᓂᓗ ᐊᒥᓱᑦ ᑕᑯᓐᓇᕆᐊᖅᓯᒪᔪᑦ ᐃᓄᐃᑦ ᑭᖑᓪᓕᖅᐹᒥ ᐊᔪᖏᑦᓯᐊᓚᐅᖅᐳᑦ.
ᐅᖃᓚᐅᖅᖢᓂᓗ ᐊᐃᑦᑖᖑᓚᐅᖅᐳᑦ ᓂᖓᓪᓗᖓᓐᓇᓚᐅᖅᐳᕐᓗ ᕿᐱᓗᒋᐊᒃᓴᖅ ᐃᓄᖕᓂᒃ ᑕᑯᖃᑕᐅᒍᒪᔪᓂᒃ, ᑭᓯᐊᓂ ᐱᓐᖑᐊᕐᕕᖓᑦ ᑕᑖᑦᓯᐊᓚᐅᕐᒪᑦ.
“ᐃᒃᓯᕙᐅᑕᐃᑦ ᑕᒪᕐᒥᒃ ᐊᑐᖅᑕᐅᓕᓚᐅᕐᒪᑦ ᐊᒻᒪ ᐊᒥᓱᒻᒪᕆᐅᑉᓗᑎᒃ ᖁᓛᖓᓂ,” ᐅᖃᓚᐅᖅᐳᖅ.
ᑕᑯᔭᖅᑐᖅᓯᒪᔪᑦ ᖁᕕᐊᒋᔭᖃᑦᓯᐊᓚᐅᖅᐳᑦ ᑕᑯᓐᓇᕆᐊᖅᓯᒪᔪᑦ, ᐸᒃᑕᒃᑐᖃᑦᑕᖅᖢᑎᒡᓗ ᖃᓄᐃᓕᐅᖅᖢᑎᒡᓗ ᑲᔪᓯᑦᓯᐊᓚᐅᖅᐳᓪᓗ.”
“ᒋᐅᒻ ᖁᕕᐊᒋᔭᖃᖅᖢᓂ ᓄᑕᖃᓄᑦ ᑕᑯᓐᓇᒐᒃᓴᓂᒃ ᖃᐅᔨᒪᑉᓗᑎᒡᓗ ᑕᐃᒪᓐᓇ ᓄᑕᖃᑦ ᐃᓚᓕᐅᑎᓚᐅᖅᖢᑎᒡᓗ, ᐃᒃᐱᒍᓱᒍᑕᐅᔪᓪᓗ ᐊᑐᖅᑕᐅᓚᐅᖅᖢᓂ ᑕᐃᒪᓐᓇ ᖃᓄᐃᓕᐅᕈᑎᖃᓕᕌᖓᑕ.”
ᑖᒃᑯᐊ Artcirq ᑭᕙᓪᓕᕐᒧᐊᓚᐅᕐᓂᖓᑦ ᑮᓇᐅᔭᑎᒍᑦ ᐃᑲᔪᖅᑕᐅᓚᐅᖅᐳᖅ ᑲᓇᑕᒥ ᑲᑎᒪᔨᓄᑦ ᑎᑎᕋᐅᔭᕐᓂᕐᒧᑦ ᖃᓄᐃᓕᐅᕐᓂᕐᒧᓪᓗ ᐱᓐᖑᐊᖅᑎᑎᔨᓄᑦ ᐊᒻᒪ ᕘᔅᐃᑯᓐᓄᑦ.