ᒪᓕᒐᓕᐅᖅᑎ ᐅᖃᖅᐳᖅ ᓄᓇᓕᐅᔪᖅ ᒪᑭᒪᐃᓐᓇᕋᓱᐊᖅᐳᑦ ᑭᒡᓕᖃᖅᑎᑕᐅᖏᓐᓇᕐᓂᐅᔪᒥ
ᐱᓇᓱᐊᕈᓯᕐᓂ ᒪᕐᕉᒃᑲᓐᓂᕐᓂ ᐃᓅᓯᕆᔭᐅᔪᖅ ᐅᑎᕐᓂᖓᓂ ᑕᐃᒪᐃᑉᐸᓚᐅᕐᓂᖓᓂ ᐊᕐᕕᐊᓂᑦ. ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖅ ᓘᒃᑖᖅ ᒪᐃᑯᓪ ᐹᑐᓴᓐ ᑎᓕᐅᕆᓚᐅᖅᐳᖅ ᓄᓇᓕᖕᓂ ᐊᓂᑦᑕᐃᓕᒪᔭᕆᐊᖃᒃᑲᓐᓂᕐᓂᖏᓐᓂ ᑎᓯᐱᕆ 2–ᒥ ᑭᒡᓕᖃᖅᑎᑕᐅᓂᐅᔪᑦ ᖃᓱᑎᑕᐅᕚᓪᓕᖅᑎᓪᓗᒋᑦ ᐊᒥᐊᒃᑯᖓᓂ ᓄᓇᕗᒻᒥ.
ᑎᓯᐱᕆ 2–ᒥ, ᐊᕐᕕᐊᑦ ᐱᖃᓚᐅᖅᐳᑦ 65–ᖑᔪᓂ ᓄᓇᕗᒻᒥ 80–ᖑᔪᓂ ᓄᕙᒡᔪᐊᕐᓇᖅ-19–ᖃᖅᑐᓂ ᖃᓄᐃᓐᓂᐅᔪᓄᑦ. ᑲᑎᓪᓗᒍ 113 ᐃᓄᐃᑦ ᐅᓂᒃᑳᕆᔭᐅᓯᒪᕗᑦ ᖃᓄᐃᑦᑐᓐᓃᕐᓂᖏᓐᓂ ᓄᓇᕗᓕᒫᒥ.
"ᐃᓄᑑᓪᓗᑕ ᓇᖏᖅᑑᔮᖅᐳᒍᑦ ᐊᕐᕕᐊᓂ ᐅᖃᐅᓯᐅᓂᐅᔪᒥ ᐊᓂᑦᑕᐃᓕᒪᔭᕆᐊᖃᕐᓂᐅᔪᒥ. ᐊᒃᓱᕈᕐᓇᖅᖢᓂ ᑭᒃᑯᓕᒫᓄᑦ: ᐃᓄᑐᖃᑦ, ᓱᕈᓯᑦ, ᐃᓚᒌᑦ, ᐊᒻᒪ ᓇᖕᒥᓂᕆᔭᐅᔪᓄᑦ," ᐅᖃᓚᐅᖅᐳᖅ ᐊᕐᕕᐊᑦ ᐅᐊᖕᓇᒥ-ᑎᑭᕋᕐᔪᐊᕐᒧᑦ ᒪᓕᒐᓕᐅᖅᑎ ᔮᓐ ᒪᐃᓐ.
"ᐊᒃᓱᕈᕐᓇᕐᔪᐊᖅᐳᖅ ᐊᓂᒎᑎᓇᓱᐊᖅᖢᒍ ᑭᓯᐊᓂ ᐃᓱᒪᕗᖓ ᑭᒃᑯᓕᒫᑦ ᖃᐅᔨᒪᓂᖏᓐᓂ ᐅᓇ ᓇᓚᐅᓯᒪᑦᑎᐊᖅᑐᓄᑦ ᐱᔾᔪᑕᐅᓂᖓᓂ."
ᒪᐃᓐ ᐊᖏᕐᕋᖓᓃᓯᒪᕗᖅ ᐃᓚᖏᓐᓂ ᑕᐃᒪᙵᓂ ᐅᑎᓚᐅᖅᑎᓪᓗᒍ ᒫᓐᓇᓕᓴᐅᓛᖑᔪᒥ ᐃᒃᓯᕚᕐᓂᐅᔪᒥ ᒪᓕᐅᒐᓕᐅᖅᑎᒃᑯᓐᓂ ᐱᒋᐊᕐᓂᖓᓂ ᑕᖅᑭᐅᓚᐅᖅᑐᒥ.
ᐅᖃᓚᐅᖅᐳᖅ ᐱᓕᕆᑲᑕᒃᓯᒪᓂᖓᓂ ᐅᖃᐱᓗᖕᓂᐅᔪᓂ ᐃᓄᖕᓂ ᐊᒃᑐᖅᑕᐅᓯᒪᓛᖑᔪᓄᑦ ᐊᓂᑦᑕᐃᓕᒪᓂᐅᔪᒥ, ᐱᓗᐊᖅᑐᒥ ᐃᓄᖕᓄᑦ ᐱᖃᕐᓂᕋᖅᑕᐅᓯᒪᔪᓄᑦ ᐊᒻᒪᓗ ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᖏᓐᓂ ᐃᓚᖏᓐᓂ ᐸᖕᒥᐅᖅᑐᓂ ᐃᒡᓗᒋᔭᐅᔪᓂ.
"ᐃᓚᒌᓄᑦ ᐊᒃᓱᕈᕐᓇᖅᑐᒻᒪᕆᐊᓘᕗᖅ. ᐊᔪᕐᓇᙱᑦᑐᑯᓘᓯᒪᙱᓚᖅ ᐊᒥᓱᓄᑦ."
ᒪᐃᓐ ᐅᖃᓚᐅᖅᐳᖅ ᓄᓇᓕᐅᔪᖅ ᐱᓕᕆᑦᑎᐊᕋᓱᐊᖅᓯᒪᕗᑦ ᐱᓕᕆᓂᖏᓐᓂ ᖃᓄᐃᓐᓂᐅᔪᓄᑦ ᖄᖏᖅᓯᒪᓕᖅᑐᓄᑦ ᖃᔅᓯᐊᕐᔪᖕᓄᑦ ᐱᓇᓱᐊᕈᓯᐅᔪᓄᑦ.
"ᓯᕗᓪᓕᕐᒥ, ᐱᖃᕐᓂᕋᖅᑕᐅᓂᐅᔪᓄᑦ ᐅᖃᐅᓯᐅᕙᓪᓕᐊᑎᓪᓗᒋᑦ, ᖁᒃᓴᓪᓚᒡᔪᐊᕐᓇᓚᐅᖅᐳᖅ ᓄᓇᓕᐅᔪᒥ. ᑕᐃᒪᙵᓂ ᐃᓄᐃᑦ ᖁᒃᓴᓪᓚᒃᓯᒪᔪᓐᓃᖅᐳᑦ ᐊᒻᒪ ᓅᖦᖢᑎᒃ ᑭᐅᓂᕐᒧᑦ ᐃᓱᒪᓂᐅᔪᒥ," ᐅᖃᓚᐅᖅᐳᖅ.
"ᐆᒻᒪᑎᒧᑦ ᐊᒃᑐᐃᕐᓇᕐᔪᐊᖅᐳᖅ ᐃᓚᖓᒍᑦ ᕿᒡᓕᐅᔪᓄᑦ ᑕᑯᓂᕐᒥ ᓄᓇᓕᐅᔪᒥ ᑲᑎᖃᑎᒌᖕᓂᖏᓐᓂ."
ᐃᑲᔪᕋᓱᐊᕐᓂᕐᒧᑦ ᖁᕝᕙᖅᑎᑦᑎᓇᓱᐊᕐᓂᕐᒥ, ᓄᓇᖃᖅᑎᐅᔪᑦ ᑲᑎᖃᑎᒌᒃᓯᒪᕗᑦ ᐃᙱᕆᐊᖅᑐᖅᖢᑎᒃ ᐹᖏᓐᓂᑦ. ᒪᐃᓐ ᐅᖃᓚᐅᖅᐳᖅ ᖃᔅᓯᒐᓚᖕᓂ "ᐃᓄᑭᑦᑐᓂ-ᓯᓚᒥ ᐊᖁᑲᑕᒃᓯᒪᕗᑦ ᑲᑎᙵᓪᓗᑎᒃ", ᐃᓄᐃᑦ ᓄᓇᓕᖕᓂ ᐊᖁᑲᑕᒃᖢᑎᒃ, ᓄᓇᓯᐅᑎᒥᓃᖏᓐᓇᖅᖢᑎᒃ, ᖁᕕᐊᓱᒍᑎᖃᕐᓂᕐᒧᑦ ᐃᓄᖕᓂ ᖃᓄᐃᑦᑐᓐᓃᖅᑐᓄᑦ ᓄᕙᒡᔪᐊᕐᓇᖅ-19–ᒥ.
"ᐊᔪᕐᓇᖅᓯᒪᕗᖅ ᑲᑎᖃᑎᒌᒋᐊᖃᙱᑎᓪᓗᑕ ᐊᒻᒪᓗ ᑕᑯᖃᑦᑕᐅᑎᓗᑕ."
ᒪᐃᓐ ᐃᓚᒋᐊᖅᓯᓚᐅᖅᐳᖅ ᓄᓇᓕᖕᓂ ᐅᖃᓪᓚᒡᕕᒃ ᐃᓚᐅᖃᑕᐅᓯᒪᕗᑦ ᐊᖏᔪᒥ ᖁᕝᕙᕆᐊᖅᑎᑦᑎᓂᕐᒧᑦ ᐃᓱᒫᓗᖕᓂᐅᔪᒥ. ᐃᓄᐃᑦ ᐅᖃᓗᒐᔪᒃᐳᑦ ᐊᑐᐃᓐᓇᖃᖅᑎᑦᑎᓂᕐᒥ ᐱᐅᔪᒥ ᐃᓱᒪᒋᔭᖃᕐᓂᕐᒧᑦ ᐃᒻᒥᖕᓄᑦ. ᐊᒻᒪᓗ ᑐᒃᓯᐊᕐᕕᓂ ᑐᒃᓯᐊᕐᓂᒃᑯᑦ ᐊᑐᐃᓐᓇᐅᑎᑕᐅᓯᒪᕗᑦ ᐅᖃᓪᓚᒡᕕᒃᑯᑦ.
"ᑲᑎᑉᐸᓪᓕᐊᓂᐅᑦᑎᐊᖅᓯᒪᕗᖅ ᓄᓇᓕᐅᔪᒧᑦ. ᐊᒃᓱᕈᖅᖢᑎᒃ ᐱᓕᕆᓂᖃᖅᓯᒪᕗᑦ ᐃᓕᔭᐅᔪᓂ ᐅᖃᓪᓚᒃᑎᐅᔪᓂ. ᐱᓪᓗᐊᑦᑎᐊᖅᐳᑦ ᐃᓚᖏᓐᓂ ᐱᓕᕆᑦᑎᐊᕐᓂᐅᔪᓄᑦ."
ᖄᒃᑲᓐᓂᐊᒍᑦ ᐃᑲᔪᖅᓱᐃᓂᐅᔪᒥ ᓄᓇᓕᖕᓄᑦ ᐊᑐᐃᓐᓇᐅᑎᑕᐅᔪᓄᑦ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪ ᐊᒡᓂᑯ ᐄᒍᓪᒧᑦ, ᐊᒻᒪᓗᑦᑕᐅᖅ $500,000–ᑐᖅᑐᓂ ᓂᕿᓂᑦ ᑐᓐᓂᖅᓴᖅᑕᐅᔪᓂ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᑲᓇᑕᒥ, ᐃᑲᔪᖅᓯᒪᕗᑦ ᓇᓗᓇᐃᖅᓯᓂᖏᓐᓂ ᐃᓄᐃᑦ ᑳᓕᔾᔮᙱᓐᓂᖏᓐᓂ, ᒪᐃᓐ ᐅᖃᓚᐅᖅᐳᖅ. ᐊᖏᔪᒥ ᑐᓐᓂᖅᑯᓯᐊᖑᔪᒥ ᑐᒃᑐᒥ ᖃᒪᓂᑦᑐᐊᕐᒥ ᐊᐅᓪᓚᖅᑎᑕᐅᓯᒪᒋᕗᖅ ᐊᕐᕕᐊᕐᒥᑦ ᐊᑐᐃᓐᓇᖃᕐᓂᐊᕐᒪᑕ ᓂᕿᓪᓚᑦᑖᓄᑦ.
"ᓂᕿᓂ ᐴᖅᑲᖅᓯᒪᔪᓂ ᑐᓐᓂᖅᓴᐃᓂᐅᔪᒥ ᕼᐋᒻᓚᒃᑯᑎᒍᑦ ᖁᔭᒋᔭᐅᑦᑎᐊᓚᐅᖅᐳᖅ ᐊᒻᒪ ᐲᖅᓯᓚᐅᖅᐳᖅ ᐊᒃᓱᕈᕐᔪᐊᕐᓂᐅᔪᒥ ᐃᓄᖕᓂ ᓄᓇᓕᖕᓂ ᐊᑲᐅᙱᓕᐅᕈᑎᖃᖅᑐᓄᑦ ᓂᕿᒃᓴᖃᑦᑎᐊᕐᓂᐅᔪᒥ," ᐅᖃᓚᐅᖅᐳᖅ ᒪᐃᓐ.
ᓇᖕᒥᓂᖃᖅᑎᐅᔪᑦ ᐱᐅᙱᑦᑐᒥ ᐊᒃᑐᖅᑕᐅᓯᒪᒋᕗᑦ ᒪᑐᔭᐅᕋᕐᓂᐅᔪᒥ. ᐊᑕᐅᓯᐅᔪᒥ ᑖᒃᓰᑦ, ᑳᓐᑐᕌᒃᑎᐅᔪᑦ ᐊᒻᒪ ᑐᔪᕐᒥᕕᐅᔪᑦ ᑕᑯᓯᒪᕗᑦ ᑕᒪᕐᒥᒐᓚᖕᒥ ᑮᓇᐅᔾᔭᒃᓴᓕᐊᖏᓐᓂ ᐊᓯᐅᓂᖏᓐᓂ. ᐊᓯᐊᒎᖅᑐᒥ, ᐱᓪᓚᕆᐅᔪᓄᑦ ᐱᔨᑦᑎᕋᕐᓂᐅᔪᑦ ᓲᕐᓗ ᓂᕿᓂᒃ ᓂᐅᕕᕐᕕᐅᔪᓂ ᐊᐅᓚᓂᖃᖅᓯᒪᕗᑦ ᐊᖏᒡᓕᒋᐊᖅᑐᒥ ᐊᒃᓱᕈᕐᓂᐅᔪᒥ.
"ᓂᐅᕕᕐᕕᒐᓚᐃᑦ ᓄᓇᓕᖕᓂ ᐃᑲᔪᕆᐊᓪᓚᒃᓯᒪᕗᑦ," ᐅᖃᓚᐅᖅᐳᖅ, ᑎᒃᑯᐊᕆᓪᓗᓂ ᖄᒃᑲᓐᓂᐊᒍᑦ ᐱᓕᕆᓂᐅᔪᓂ ᐃᓕᓯᒪᓕᖅᑐᓂ ᐃᓄᖕᓂ ᐊᑦᑕᓇᔾᔭᐃᖅᓯᓯᒪᓇᓱᐊᕐᓂᕐᒧᑦ.
ᑐᓂᓯᓯᒪᕗᑦ ᐊᒡᔭᖅᑐᖅᑕᐅᓂᐅᔪᒥ ᐱᔨᑦᑎᕋᕐᓂᐅᔪᒥᑦᑕᐅᖅ ᐊᒻᒪᓗ ᐊᓯᐊᒎᖅᑐᒥ ᐃᓄᑐᖃᕐᓄᑦ ᐃᑲᕐᕋᐅᔪᓂ ᐱᔪᓐᓇᖅᑎᑦᑎᓂᕐᒧᑦ ᐊᒃᑐᖅᑕᐅᓴᕋᐃᑦᑐᓂ ᐃᓄᖕᓂ ᓂᐅᕕᕆᐊᕐᓂᕐᒧᑦ ᐅᓗᕆᐊᓇᙱᓐᓂᖅᓴᐅᓂᖓᓂ. ᒪᐃᓐ ᐅᖃᓚᐅᖅᐳᖅ ᐃᖅᑲᓇᐃᔭᖅᑎᐅᔪᑦ ᓂᕿᓄᑦ ᓂᐅᕕᕐᕕᐅᔪᓂ ᐊᒃᓱᕈᕐᓂᖅᐹᖑᓯᒪᕗᑦ ᐱᔭᒃᓴᐅᔪᓄᑦ ᓄᓇᓕᖕᓂ ᐃᖏᕐᕋᐃᓐᓇᖅᑎᑕᐅᓂᖓᓂ .
"ᐃᖅᑲᓇᐃᔭᖅᑎᐅᔪᑦ ᐊᖏᒡᓕᒋᐊᖅᑐᒥ ᐅᓗᕆᐊᓇᖅᑐᒦᑉᐳᑦ ᓴᖅᑭᔮᕐᕕᐅᓂᕐᒧᑦ. ᐊᒃᓱᕈᕐᓇᖅᑑᕗᖅ ᐅᑯᓄᖓ ᐃᓄᖕᓄᑦ. ᐱᒻᒪᕆᕐᔪᐊᖑᕗᑦ."
ᓯᕗᒻᒧᐊᕆᓂᕐᒧᑦ, ᒪᐃᓐ ᐅᖃᓚᐅᖅᐳᖅ ᓂᕆᐅᖕᓂᖃᖅᐳᖅ ᓄᓇᓕᐅᔪᑦ ᑲᑎᖃᑎᒌᖕᓂᐊᕐᓂᖏᓐᓂ ᐊᒻᒪᓗ ᐱᓕᕆᓗᑎᒃ ᖃᓄᐃᓐᓂᐅᔪᓄᑦ ᐅᓄᕐᓂᖏᓐᓂ ᐱᖃᕈᓐᓃᕐᓂᖓᓂ. ᑭᓯᐊᓂ, ᐅᖃᓚᐅᖅᐳᖅ ᖃᓄᐃᑦᑐᓐᓃᕐᓂᐅᔪᖅ ᒪᓕᖕᓂᐊᖅᐳᖅ ᐃᓄᖕᓂ ᒪᓕᑦᑎᐊᕐᓂᖏᓐᓂ ᒪᓕᒋᐊᖃᕐᓂᐅᔪᓄᑦ ᐊᒻᒪᓗ ᓱᕋᐃᙱᓪᓗᑎᒃ ᒪᓕᒐᐅᔪᓂᑦ.
"ᐃᓄᖕᓂ ᓱᕋᐃᔪᖃᑲᑕᒃᐸᑦ ᐅᕝᕙᓘᓐᓃᑦ ᓴᖑᑎᑦᑎᓂᕐᒥ ᒪᓕᒐᐅᔪᓂ ᐅᓄᖅᓯᒋᐊᒃᑲᓐᓂᕐᓂᖃᕈᓐᓇᖅᐳᖅ ᖃᓄᐃᓐᓂᐅᔪᓂ ᐅᕙᓂ."