ᒪᕐᕉᖕᓂᒃ ᐊᕐᕕᓂᓖᑦ ᐃᓕᓐᓂᐊᖅᑐᑦ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᒡᔪᐊᕐᒥᐅᑕᑦ ᐊᕐᕕᐊᓂ ᐱᓕᕆᖃᑎᒌᒃᖢᑎᒃ ᑕᑯᑎᑦᑎᓚᐅᖅᑐᑦ ᖃᓄᖅ ᐊᔪᙱᑎᒋᖕᒪᖔᕐᒥᒃ 2019-ᒥ ᑲᓇᑕᒥ ᓄᓇᕗᒥ ᐱᒡᒍᓴᐅᔾᔪᐊᖅᑐᓂᒃ ᐃᖃᓗᖕᓂ ᐊᐃᕆᓕ 26-ᒥ 28-ᒧᑦ.
ᐋᓂ ᕿᑎᖅᖠᓗᒃ ᒎᓘᑕᓚᐅᖅᑐᖅ ᓴᓇᔪᓐᓇᕐᓂᕐᒧᑦ ᓇᓗᓇᐃᖅᓯᓂᒃᑯᑦ ᐱᓕᕆᔪᓂᒃ ᐊᒻᒪᓗ ᓇᑕᓕ ᐸᐃᑯ ᒎᓘᑖᓚᐅᖅᑐᖅ ᐱᐅᓴᐃᔪᓐᓇᕐᓂᕐᒧᑦ, ᒪᐃᒐᓐ ᑕᓯᐅᕐᓕ (ᐃᓄᐃᑦ ᓵᖓᓂᒃ ᐅᖃᓪᓚᒍᓐᓇᕐᓂᕐᒧᑦ), ᒪᓗᕆ ᐅᖃᑦᓯᐊᖅ (ᓄᔭᓕᕆᔨᐅᓂᕐᒧᑦ), ᐊᒻᒪᓗ ᐱᓕᕆᖃᑎᒌᒃᑑᒃ ᓵᓯᑎ ᓴᐃᓐᑦ ᔮᓐ ᐊᒻᒪᓗ ᑭᑎ ᓱᓗᒃ (ᐅᐊᔪᓕᐅᖅᑏᒃ) ᑐᒡᓕᕆᔭᐅᓚᐅᖅᑐᑦ ᐱᓕᕆᐊᒥᒍᑦ, ᐊᒻᒪᓗ ᐊᐱ-ᕉᔅ ᑲᑦᓱᐊᖅ ᐱᖓᔪᒋᔭᐅᓚᐅᖅᖢᓂ ᐃᓕᖅᑯᓯᑐᖃᑎᒍᑦ ᒥᖅᓱᕐᓂᒃᑯᑦ.
ᒍᐊᑦ ᐱᓕᐊᑦ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᒡᔪᐊᕐᒥᐅᑕᖅ, ᐃᓕᓐᓂᐊᖅᑎᑦᑎᓚᐅᖅᑐᖅ ᐅᐊᔪᓕᐅᖅᑐᓂᒃ ᐊᒻᒪᓗ ᐃᖃᓗᖕᓄᙵᐅᖃᑎᖃᓚᐅᖅᑐᖅ ᐃᓕᓐᓂᐊᖅᑐᓂᒃ, ᐅᖃᓚᐅᖅᑐᖅ ᑕᐃᒪᐃᓕᐅᖃᑦᑕᖅᓯᒪᔪᓂᒡᒎᖅ ᐊᐅᓪᓛᑦᑎᐊᕐᓂᖅᐹᖑᓚᐅᖅᑐᖅ ᐊᒥᓱᓂᒃ ᐅᑭᐅᓂᒃ ᐅᐸᒍᑎᖃᑦᑕᖅᓯᒪᓕᖅᑎᓪᓗᒍ.
ᐅᖃᖅᖢᓂ ᑕᒪᑐᒥᙵᒎᖅ ᐸᕐᓇᐃᓚᐅᖅᑐᑦ ᐅᖃᓚᐅᖅᑐᑦ ᑕᒪᓐᓇ ᐱᒡᒍᓴᐅᔾᔪᐊᖃᑦᑕᕐᓂᖅ ᐊᒥᓲᓂᖅᐹᓄᑦ ᐅᐸᒃᑕᐅᓚᐅᕐᒪᑦ ᑕᒡᕙᓂ ᐅᑭᐅᒥ ᐃᖃᓗᖕᓂ.
“ᖃᑉᓯᓪᓚᑦᑖᖑᓚᐅᕐᒪᖔᑕ ᐅᖃᐅᑎᔭᐅᓚᐅᙱᑦᑐᖓ; ᐅᖃᐅᑎᔭᐅᑐᐃᓐᓇᓚᐅᖅᑐᖓ ᐊᒥᓲᓂᖅᐹᖑᓚᐅᕐᓂᖏᓐᓄᑦ 14-ᓂᒃ ᐅᑭᐅᓂᒃ ᑕᐃᒪᐃᓕᐅᖃᑦᑕᓕᖅᑎᓪᓗᒋᑦ, ᑕᐃᒪᐃᒻᒪᑦ ᑕᒪᓐᓇ ᐱᒻᒪᕆᐅᑎᓚᐅᖅᑕᕋ,” ᑕᐃᒪᓐᓇ ᐅᖃᖅᖢᓂ ᐱᓕᐊᑦ.
“ᑕᐃᒪᓐᓇ ᐱᒡᒍᓴᐅᔾᔪᐊᖅᑎᓪᓗᒋᑦ ᖁᓕᖏᖅᑕᖅᖢᖓ ᐅᐸᒍᑎᓯᒪᓕᖅᑐᖓ, ᑕᐃᒪᐃᒻᒪᑦ ᑕᑯᖃᑦᑕᖅᓯᒪᔪᖓ ᐊᒥᓲᓂᖅᓴᓂᒃ ᖃᑉᓰᓐᓇᐅᓂᖅᓴᓂᒡᓗ ᐅᑭᐅᓂᒃ ᖄᖏᖅᓯᒪᔪᓂᒃ.”
ᐱᓕᐊᑦ ᐅᖃᖅᖢᓂ ᓂᐸᐃᓐᓂᖅᓴᐅᓚᐅᖅᑐᒡᒎᖅ ᐱᐅᓴᕐᓂᕐᒧᑦ ᐱᓕᕆᔪᑦ, ᐊᓯᖏᑦ ᓂᐱᓕᒻᒪᕆᐊᓘᓚᐅᖅᑐᑦ.
ᐅᖃᖅᖢᓂ ᓄᑖᕉᖅ ᐊᑐᖅᑕᐅᕙᓕᖅᑐᖅ, ᐃᓚᖏᑦ ᐱᓕᕆᑉᓗᑎᒃ ᓴᓇᑦᑕᐃᓕᐊᕈᓯᕐᒥ ᐊᒻᒪᓗ ᐃᓚᖏᑦ ᓴᓇᑦᑕᐃᓕᒥ ᐊᑕᐅᓯᕐᒥ ᐅᑉᓗᕐᒥ ᐱᐊᓂᒃᑕᐅᓇᓱᙱᖦᖢᑎᒃ, ᐃᑲᔫᑕᐅᓚᐅᖅᑐᕉᖅ ᐱᒡᒍᓴᐅᔾᔪᐊᖅᑐᓄᑦ.
“ᑕᒪᓐᓇ ᐊᓯᔾᔩᓯᒪᑦᑎᐊᖅᑐᖅ ᑕᒡᕙᓂ ᐅᑭᐅᒥ ᐊᒻᒪᓗ, ᐱᒡᒍᓴᐅᔾᔪᐊᖅᑐᑦ ᐱᒋᐊᓚᐅᖅᑎᓪᓗᒋᑦ ᓴᓇᑦᑕᐃᓕᐊᕈᓯᕐᒥ ᐅᑉᓗᒃᑯᑦ ᐊᒻᒪᓗ ᐱᐊᓂᒃᖢᑎᕐᒃ ᓴᓇᑦᑕᐃᓕᒥ ᐅᑉᓛᒃᑯᑦ, ᐱᒡᒍᓴᐅᔾᔪᐊᖅᑐᑦ ᐅᓐᓄᒃᑯᑦ ᓴᓚᐅᓱᒍᓐᓇᓚᐅᖅᑐᑦ, ᐃᓱᒪᒃᓴᖅᓯᐅᕈᑎᖃᖅᓗᑎᒃ ᐅᑉᓗᕆᖅᑲᐅᔭᖓᓂᒃ ᖃᓄᐃᓕᐅᓚᐅᕐᒪᖔᑕ, ᐊᒻᒪᓗ ᐃᓱᒪᒃᓴᖅᓯᐅᕈᓐᓇᖅᓯᒪᑉᓗᑎᒃ ᖃᓄᖅ ᐱᐊᓂᒃᓯᓂᐊᕐᒪᖔᕐᒥᒃ.
“ᓂᕕᐊᖅᓵᑯᓘᒃ ᐅᐊᔪᓕᐅᖅᑏᒃ (ᓴᐃᓐᑦ ᔮᓐ ᐊᒻᒪᓗ ᓱᓗᒃ) ᐃᓱᒪᒃᓴᖅᓯᐅᓕᓚᐅᖅᑑᒃ ᐸᕐᓇᐅᑎᒋᓂᐊᖅᑕᒥᓂᒃ ᐅᐊᔪᓕᐊᕆᔭᒥᓂᒃ ᐊᒻᒪᓗ, ᐅᑎᕋᒥᒃ ᓴᓇᑦᑕᐃᓕᒥ, ᖃᐅᔨᒪᑦᑎᐊᓚᐅᖅᑑᒃ ᖃᓄᖅ ᐋᖅᑭᒃᓱᐃᓂᐊᕐᓂᕐᒥᓂᒃ.
“ᕿᓚᒻᒥᐅᓂᖅᓴᒃᑯᑦ ᐱᓕᕆᑎᑦᑎᓚᐅᖅᑎᓪᓗᒋᑦ, ᐊᑯᓂᐅᓂᖅᓴᐅᔭᕌᖓᑦ ᐃᓅᖃᑎᒌᒍᓐᓇᕐᓂᖅ ᐱᕚᓪᓕᕈᑕᐅᖃᑦᑕᖅᓯᒪᒐᐊᖅᑎᓪᓗᒍ ᐃᖃᓗᖕᓂ, ᑕᒪᓐᓇ ᐊᑐᖅᑕᐅᓕᖅᑐᖅ ᐱᐅᓂᖅᓴᐅᔫᔭᓚᐅᖅᑐᖅ ᑕᒪᐃᓐᓄᑦ ᐱᒡᒍᓴᐅᔾᔪᐊᖅᑐᓄᑦ.”
ᐋᓂ ᕿᑎᖅᖠᓗᒃ ᐅᖃᓚᐅᖅᑐᖅ ᖁᕕᐊᒋᑦᑎᐊᓚᐅᕐᓂᕋᖅᖢᓂᐅᒃ.
ᐅᖃᓚᐅᖅᑐᖅ ᐱᒋᐊᓕᓵᖅᖢᓂᒎᖅ ᓵᓚᒃᓴᖃᑕᐅᔾᔮᙱᓐᓇᓱᒋᑦᑎᐊᓚᐅᖅᑐᖅ, ᑭᓯᐊᓂ ᒎᓘᑖᓚᐅᖅᑐᖅ.
“ᓴᕆᒪᓱᑦᑎᐊᖅᑐᖓ ᒎᓘᑖᓚᐅᕋᒪ ᓵᓚᒃᓴᖅᖢᖓ,” ᑕᐃᒪᓐᓇ ᐅᖃᖅᓗᓂ ᕿᑎᖅᖠᓗᒃ.
“ᖁᕕᐊᓱᑦᑎᐊᖅᑐᖓ ᐊᕐᕕᐊᕐᒥᐅᑕᐅᖃᑎᒃᑲ ᖃᓂᒋᓂᖅᓴᐅᓕᕋᑉᑭᑦ ᐊᒻᒪᓗ ᐃᓕᑕᖅᓯᑲᑕᓚᐅᖅᖢᖓ ᐃᖃᓗᖕᓂ, ᐊᒻᒪᓗ ᐊᓕᐊᓇᐃᒍᓱᑦᑎᐊᖅᑐᖓ ᓄᑖᓂᒃ ᐃᓚᓐᓈᖅᑖᓚᐅᕋᒪ.
“ᓯᕗᓪᓕᖅᐹᑦᑎᐊᕐᒥ ᐱᒡᒍᓴᐅᔾᔪᐊᖅᑐᓂᒃ ᑲᓇᑕᒥ ᓄᓇᕗᒥᓗ ᐃᓚᐅᖃᑕᐅᒋᐅᖅᑐᖓ ᑲᔪᓯᓂᖃᑦᑎᐊᖅᑐᐊᓘᓚᐅᖅᑐᖅ ᐅᕙᒻᓄᑦ, ᑕᐃᒪᐃᒻᒪᑦ ᐃᓱᒪᓕᖅᑐᖓ ᐊᕐᕌᒍ ᐱᓇᓱᒃᑲᓐᓂᕐᓂᐊᕐᓂᒻᓄᑦ.”