ᓄᑖᒥ ᓚᐃᓴᓐᓯᖃᓕᖅᑐᒥ ᖃᖓᑕᓲᖅᑎ ᔫᓯᐱ ᐋᑯᓗᒃᔪᒃ ᐅᖃᐅᓯᐅᓯᒪᕗᖅ ᐅᐱᒋᔭᐅᓂᖓᓂ ᐸᖕᓂᖅᑑᒥ
ᓄᓇᓕᐅᔪᖅ ᐸᖕᓂᖅᑑᒥ ᖁᕕᐊᑦᑐᓐᓇᓛᓕᖅᐳᑦ ᑕᑯᓂᖏᓐᓂ ᐊᑕᐅᓯᕐᒥ ᓇᖕᒥᓂᕆᔭᖓᓐᓂ ᖃᖓᑕᔪᖅ ᑕᐃᑯᖓ ᑕᐃᑲᙵᓪᓗ ᕿᓚᒻᒥᐅᔪᒥ ᓯᕗᓂᒃᓴᒥ.
ᔫᓯᐱ ᐋᑯᓗᒃᔪᒃ ᐱᓕᒻᒪᒃᓴᖅᓯᒪᕗᖅ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᒪᕐᕉᖕᓄᑦ ᖃᖓᑕᓲᖅᑎᙳᕐᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐱᔭᕆᑐᔪᓄᑦ ᐃᓕᓐᓂᐊᕐᕕᖓᓂ Tyganyga, ᐋᓐᑎᐊᕆᐅᒥ. ᖄᖏᖅᓯᕋᑖᓚᐅᖅᐳᖅ ᑎᑭᐅᑎᔪᓐᓇᕐᔪᐊᕐᓂᐅᔪᒥ ᐃᓕᓐᓂᐊᕐᓂᕆᔭᒥᓂᑦ, ᐱᓚᐅᖅᑎᓪᓗᒍ ᓇᖕᒥᓂᕐᒥᓂ ᖃᖓᑕᓲᖅᑎᐅᓂᕐᒧᑦ ᓚᐃᓴᓐᓯᖓᓂ, ᓯᕗᓪᓕᖅᐹᖑᓪᓗᓂ ᐃᓅᓪᓗᓂ ᕼᐋᒻᓚᐅᔪᒥ ᑕᐃᒪᐃᓐᓂᕐᒧᑦ.
ᑎᑭᐅᑎᓂᕐᒧᑦ ᑕᐃᑯᖓ ᐊᒃᓱᕈᕐᓇᖅᑐᒃᑰᖅᓯᒪᕗᖅ, ᑭᓯᐊᓂ, ᐊᖏᕐᕋᖓᓂ ᐅᖓᓯᒃᖢᓂ, ᐋᑯᓗᒃᔪᒃ ᖄᖏᐅᑎᔪᓐᓇᓚᐅᖅᐳᖅ ᐅᑯᓂᖓ ᓯᕗᓪᓕᐅᔪᓂ ᐊᑲᐅᙱᓕᐅᕈᑕᐅᔪᓂ ᐃᓕᓐᓂᐊᕐᓂᕆᔭᖓᓂ ᐃᑲᔪᖅᑕᐅᓪᓗᓂ ᐃᓕᓐᓂᐊᖃᑎᒥᓂᑦ ᐊᒻᒪ ᐃᓕᓴᐃᔨᖏᓐᓂ.
"ᓯᕗᓪᓕᕐᒥ ᐊᔪᕐᓇᕐᔪᐊᓚᐅᖅᐳᖅ ᐊᓯᐊᓂ ᓄᓇᖃᕋᒪ ᐃᓚᓐᓃᙱᖦᖢᖓ, ᐊᒻᒪᓗ ᐃᑲᔪᖅᓯᖅᑕᐅᓂᖃᕆᐊᖃᕐᔪᐊᓚᐅᖅᐳᖓ ᐊᓯᖏᓐᓂ ᐃᓄᖕᓂ ᐅᐸᒃᓯᒪᔭᓐᓂ," ᐅᖃᓚᐅᖅᐳᖅ ᐋᑯᓗᒃᔪᒃ.
ᐃᓚᖓᓐᓂ ᐅᐱᒍᓱᖕᓇᖅᐳᖅ ᐋᑯᓗᒃᔪᒃ ᐃᓚᖏᓐᓂ ᓂᕈᐊᖅᓯᓂᖓᓂ ᖃᖓᑕᓲᖅᑎᙳᕋᓱᐊᕐᓂᖓᓂ.
"ᐱᔭᕇᖁᕙᕋ ᐱᓕᕆᐊᖑᓂᐅᔪᒥ, ᐃᑲᔪᖅᓰᓐᓇᖅᓯᒪᕙᕗᑦ ᐃᓕᓐᓂᐊᕐᓂᓕᒫᖓᓂ, ᐊᔪᕐᓇᙱᑐᑯᓘᖏᓐᓇᐅᔭᖃᑦᑕᙱᒃᑲᓗᐊᖅᑎᓪᓗᒍ, ᐊᔭᐅᕇᓐᓇᖃᑦᑕᖅᐸᕗᑦ," ᐅᖃᓚᐅᖅᐳᖅ ᕉᔅ ᐋᑯᓗᒃᔪᒃ, ᐊᓈᓇᖓ, ᐃᓚᒋᐊᖅᓯᓪᓗᓂ ᑕᑯᒃᑲᓐᓂᕈᒪᓇᔭᖅᐳᖅ ᐅᓄᕐᓂᖅᓴᓂ ᐃᓄᖕᓂ ᖃᖓᑕᕙᒃᑐᓂ. "ᐊᖏᕐᕋᕆᕙᕗᑦ, ᓄᓇᕗᑦ ᓄᓇᒋᕙᑦᑎᒍᑦ. ᐃᓄᖕᓂ ᖃᖓᑕᓲᖅᑎᖃᕆᐊᖃᖅᐳᒍᑦ."
20-ᓂ-ᐅᑭᐅᓕᒃ ᖃᖓᑕᓲᖅᑎ ᓯᕗᓪᓕᕐᒥ ᖃᐅᔨᒪᓚᐅᙱᓚᖅ ᓯᕗᓪᓕᖅᐹᖑᓇᔭᕐᓂᖓᓂ ᓄᓇᓕᖓᓐᓂ ᖃᖓᑕᓲᖅᑎᙳᕆᐊᖅᑐᕐᓂᐊᖅᑐᒥ ᑭᓯᐊᓂ ᑕᐃᒪᙵᓂ ᖃᖓᑕᓂᕐᒧᑦ ᐃᓕᓐᓂᐊᕆᐊᖅᓯᒪᓕᖅᑎᓪᓗᒍ ᐅᓄᕐᓂᖅᓴᓂ ᐃᓄᖕᓂ ᖃᖓᑕᖁᔨᕗᖅ.
"ᑕᐃᒪᙵᓂ ᐅᕙᓃᓕᕋᒪ ᑎᓴᒪᐃᓐᓇᓂ ᐊᓯᖏᓐᓂ ᐃᓄᖕᓂ ᐅᑯᓇᓂ 30–ᓂ 40–ᓂᓪᓘᓐᓃ ᐃᓄᖕᓂ ᐅᕙᓂ ᐱᓕᕆᓂᐅᔪᒥ, ᐊᒻᒪᓗ ᐅᓄᕐᓂᖅᓴᓂ ᐃᓄᖕᓂ ᑕᐃᒪᐃᑦᑐᒥ ᐃᖅᑲᓇᐃᔮᖃᖁᓇᔭᖅᐸᒃᑲ, ᖃᖓᑕᓲᓕᕆᓂᕐᒥ ᐱᓕᕆᓂᕐᔪᐊᖑᔪᒥ," ᐋᑯᓗᒃᔪᒃ ᐅᖃᓚᐅᖅᐳᖅ.
ᐃᓚᒋᐊᖅᓯᓚᐅᖅᐳᖅ ᐃᓕᓐᓂᐊᕐᕖᑦ ᓲᕐᓗ ᓄᓇᖃᖅᑳᖅᓯᒪᔪᓄᑦ ᐱᔭᕆᑐᔪᓄᑦ ᐃᓕᓐᓂᐊᕐᕕᖓᓂ ᑐᓂᓯᓲᖑᕗᑦ ᐱᕐᔪᐊᖑᔪᓂ ᐱᕕᒃᓴᖃᕐᓂᐅᔪᓂ ᓄᓇᓕᐅᔪᓄᑦ ᐱᕕᒃᓴᖃᙱᓐᓂᖅᓴᐅᑐᐃᓐᓇᕆᐊᓕᖕᓄᑦ ᖁᕝᕙᕆᐊᖅᐸᓪᓕᐊᓂᕐᒧᑦ ᓄᓇᕐᔪᐊᒥ.
"ᐅᕙᓃᓐᓇᔭᙱᓚᖓ ᒫᓐᓇᐅᔪᒥ ᐃᓅᓚᐅᙱᒃᑯᒪ ᐊᒻᒪᓗ ᐅᑯᐊ ᑲᑐᔾᔨᖃᑎᒌᖕᓂᖃᓚᐅᙱᕐᐸᑦ."
ᓄᕙᒡᔪᐊᕐᓇᖅ-19 ᐊᒃᑐᐃᓂᖃᕋᓗᐊᖅᑎᓪᓗᒍ ᐱᓕᕆᓂᖓᓂ ᑭᓯᐊᓂ ᓴᐱᓕᕈᑎᒋᔾᔮᙱᑕᖓ.
"ᐱᓕᕆᓂᒃᓴᒃᑲᓐᓂᐅᒐᓗᐊᖅᐳᖅ ᒫᓐᓇᐅᔪᒥ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᒧᑦ, (ᑭᓯᐊᓂ) ᐱᓕᕆᕗᖓ ᖃᖓᑕᓂᕐᒧᑦ ᖃᕋᓴᐅᔭᒃᑰᖅᑐᒥ ᐃᓕᓐᓂᐊᕐᓂᖃᖅᐳᖓ ᐊᒻᒪᓗ ᐃᓕᓐᓂᐊᕐᕕᐊᕈᓯᒃᑲ ᐱᔭᕇᖅᐸᓪᓕᐊᕙᒃᑲ."
ᐋᑯᓗᒃᔪᒃ ᐃᓕᓐᓂᐊᒃᑲᓐᓂᕈᒪᕗᖅ ᐊᕐᕌᒍᐸᓗᖕᓂ ᒪᕐᕈᒃᑲᓐᓂᕐᓂ, ᐃᓄᖃᖅᐸᒃᑐᓄᑦ ᖃᖓᑕᓲᖅᑎᐅᓂᕐᒧᑦ, ᑭᖑᓂᐊᒍᑦ ᑐᕌᖓᓂᖃᕈᒪᕗᖅ ᐃᑲᔪᕐᓂᖓᓂ ᓄᓇᓕᖓᓐᓂ ᐃᓕᑦᑎᓯᒪᔭᖓᑎᒍᑦ.
"ᑕᐃᒪᑐᖅ 2022–ᐸᓗᖕᒥ ᐸᖕᓂᖅᑑᒦᓛᖅᐳᖓ," ᐅᖃᓚᐅᖅᐳᖅ.
ᓯᑎᐱᕆ 22–ᒥ, ᐋᑯᓗᒃᔪᒃ ᐃᓕᓴᕆᔭᐅᓚᐅᖅᐳᖅ ᓄᓇᕗᒻᒥ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓂ ᑎᑭᐅᑎᔪᓐᓇᖅᓯᒪᔭᖏᓐᓄᑦ ᐸᖕᓂᖅᑑᒥ ᒪᓕᒐᓕᐅᖅᑎᐅᔪᒥ ᒫᒡᒍᓕᑦ ᓇᑲᓱᖕᒧᑦ, ᐃᓚᒋᔭᐅᔪᓄᑦ ᐅᖃᐅᓯᒃᓴᓕᐅᓚᐅᖅᑐᒥ ᒪᓕᒐᓕᐅᖅᑎᐅᖃᑎᒋᔭᖏᓐᓄᑦ.
"ᐃᓕᓴᖅᓯᔪᒪᕗᖓ ᑖᔅᓱᒥᖓ ᐊᒻᒪᓗ ᐅᐱᒋᓗᒍ. ᒪᒃᑯᒃᑑᓪᓗᓂ ᐃᓅᕗᖅ ᐸᖕᓂᖅᑑᕐᒥᐅᑕᐅᓪᓗᓂ. ᖁᕕᐊᓱᒍᑎᒋᓚᐅᕐᓚᕗᑦ," ᐅᖃᓚᐅᖅᐳᖅ. "ᖃᐅᔨᒪᕗᖓ ᐃᓄᐃᑦ ᐸᖕᓂᖅᑑᒥ ᐅᐱᐅᖅᑲᕐᔪᐊᖅᐳᑦ."