Skip to content

ᐊᖑᑎᑦ ᐃᓕᓐᓂᐊᓚᐅᖅᑐᑦ ᓯᑕᒪᓂᒃ ᐅᑉᓗᓂᒃ ᓄᓇᒥ

ᐃᓅᓯᒃᑯᑦ ᓴᙱᒃᑎᑉᐸᓪᓕᐊᔪᓐᓇᖁᑉᓗᒋᑦ, ᒪᒥᓴᖅᐸᓪᓕᐊᓕᕈᓐᓇᖁᑉᓗᒋᑦ ᐅᕝᕙᓘᓐᓃᑦ ᒪᒥᓴᕐᓂᕐᒥᓂᒃ ᑲᔪᓯᑎᑦᑎᔪᓐᓇᖁᑉᓗᒋᑦ ᐊᒻᒪᓗ ᓯᕗᒻᒧᐊᒃᐸᓪᓕᐊᔪᓐᓇᖁᑉᓗᒋᑦ ᑕᐃᑉᓱᒪᓂ ᐊᒃᓱᕈᕐᓇᖅᑐᒃᑰᓚᐅᖅᓯᒪᒐᓗᐊᕐᓗᑎᒃ ᑕᒪᒃᑯᐊ ᑕᒡᕙ ᑐᕌᒐᕆᔭᐅᓚᐅᖅᑐᑦ ᓄᓇᒥ ᒪᒥᓴᖅᑎᑦᑎᓂᒃᑯᑦ ᕿᑭᖅᑖᓘᑉ ᐅᐊᖕᓇᖓᓂ.

Noel Kaludjak of Rankin Inlet shows his skills with the knife while helping to skin and prepare a seal caught during the Qikiqtani Inuit Association Sakku Men's Healing program on the land near Clyde River from Feb. 20 to Feb. 24, 2019. Photo courtesy Sakku program
Noel Kaludjak of Rankin Inlet shows his skills with the knife while helping to skin and prepare a seal caught during the Qikiqtani Inuit Association Sakku Men's Healing program on the land near Clyde River from Feb. 20 to Feb. 24, 2019. Photo courtesy Sakku program

ᓄᐃᓪ ᖃᓗᔾᔭᖅ ᑲᖏᖅᖠᓂᕐᒥᐅᑕᖅ - ᓴᖅᑭᑎᑦᑎᖃᑕᐅᓯᒪᓂᑰᔪᖅ ᐊᖑᑎᑦ ᒪᑭᒋᐊᕐᓂᖏᓐᓂᒃ ᐊᖑᑎᓄᑦ ᒪᒥᓴᕈᑕᐅᕙᒃᑐᖅ ᐱᒋᐊᖅᑳᓚᐅᖅᓯᒪᔪᖅ ᓴᓪᓕᓂ ᖁᓕᑦ ᐅᑭᐅᑦ ᖄᖏᖅᓯᒪᓕᖅᑐᓂᒃ - ᐱᓕᕆᖃᑎᖃᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᐊᒻᒪᓗ ᐃᓕᓴᕐᓯᕕᒃ ᑲᑎᒪᔨᖏᓐᓂᒃ ᓴᖅᑭᑎᑕᐅᔪᓐᓇᖁᑉᓗᒍ ᒪᒥᓴᕐᓂᐅᔪᖅ ᑲᖏᖅᑐᒑᐱᖕᒥ ᑖᒻᓇ ᑕᖅᑭᖅ ᐱᒋᐊᓕᓵᓚᐅᖅᑎᓪᓗᒍ.
"ᐅᑉᓛᑕᒫᒃᑯᑦ ᑲᑎᖃᑦᑕᓚᐅᖅᑐᒍᑦ ᑕᒪᕐᒥᒃ ᐃᓚᐅᖃᑕᐅᔪᑦ ᖃᐅᔨᒋᐊᖅᖢᒋᑦ ᖃᓄᐃᙱᒃᑲᓗᐊᕐᒪᖔᑕ ᐊᒻᒪᓗ, ᐅᓐᓄᒃᑯᑦ, ᑕᒪᕐᒥᒃ ᐃᓚᐅᖃᑕᐅᕙᒃᖢᑎᒃ ᒪᒥᓴᕐᓂᕐᒧᑦ," ᑕᐃᒪᓐᓇ ᐅᖃᖅᖢᓂ ᖃᓗᔾᔭᖅ. "ᐅᑉᓛᒃᑯᑦ ᑲᑎᖅᑳᖅᖢᑕ, ᑕᒪᕐᒥᒃ ᐊᖑᑎᑦ ᓇᑦᓯᖅᓯᐅᕆᐊᓕᖃᑦᑕᓚᐅᖅᑐᑦ.
"ᓇᑦᑎᓚᐅᖅᑐᒍᑦ ᓂᕆᔭᒃᓴᓂᒃ ᐊᒻᒪᓗ, ᑏᑐᖅᑎᓪᓗᑕ ᐅᑉᓗᕈᒥᑕᖅᑎᓪᓗᑕᓗ, ᐃᓐᓇᑐᖃᐃᑦ ᐅᖃᓪᓚᖃᑦᑕᓚᐅᖅᑐᑦ ᒪᒃᑯᒃᑐᓄᑦ ᓄᑲᑉᐱᐊᓄᑦ ᓄᓇᐅᑉ ᒥᒃᓵᓄᑦ ᐊᒻᒪᓗ ᑕᐃᑉᓱᒪᓂᑐᖃᐅᑉ ᒥᒃᓵᓄᑦ.
"ᐅᖃᐅᓯᖃᖃᑦᑕᖅᖢᑎᒃ ᖃᓄᖅ ᐃᓄᐃᑦ ᐃᓅᕙᓚᐅᕐᒪᖔᑕ ᓄᓇᒥ ᓄᓇᓕᖕᒧᑦ ᓅᑕᐅᖅᑳᖅᑎᓐᓇᒋᑦ, ᐃᓕᑦᑎᓐᓇᖅᑐᒻᒪᕆᐊᓘᓚᐅᖅᑐᖅ ᓄᑲᑉᐱᐊᓄᑦ ᒪᒥᓴᖅᐸᓪᓕᐊᑉᓗᑎᒡᓗ ᐃᓐᓇᐅᓂᖅᓴᑦ ᐊᖑᑎᑦ ᐃᓚᐅᖃᑕᐅᔪᑦ."
ᐃᓕᓐᓂᐊᕈᑎ ᓴᖅᑭᑎᑕᐅᓚᐅᖅᓯᒪᔪᖅ ᐊᒻᒪᓗ ᐋᖅᑭᒃᓱᖅᑕᐅᑉᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᒪᒃᑯᒃᑐᓕᕆᔨᒃᑯᖏᓐᓄᑦ (ᐃᒪᓐᓈᖅᑐᖅᑎᒋᑉᓗᒍ ᐱᐊᑭ ᕿᓚᕝᕙᖅ), ᐊᒻᒪᓗ ᑮᓇᐅᔭᓕᖅᑕᐅᓯᒪᑉᓗᓂ ᓄᓇᕗᒥ ᒐᕙᒪᒃᑯᑦ ᐃᓕᖅᑯᓯᑐᖃᓕᕆᔨᒃᑯᖏᓐᓄᑦ ᐊᒻᒪᓗ ᐃᑦᓴᕐᓂᑕᓕᕆᔨᒃᑯᖏᓐᓄᑦ.
ᕿᑭᖅᑖᓘᑉ ᓂᒋᐊᓂ ᓄᓇᒦᓐᓂᐅᔪᖅ ᒪᓕᓚᐅᖅᑐᖅ ᐃᓕᓐᓂᐊᕈᑕᐅᓚᐅᖅᑐᒥ ᐃᖃᓗᖕᓂ ᕿᑭᖅᑖᓘᑉ ᓂᒋᐊᓂ ᓄᓇᓕᖕᓄᑦ ᐃᓕᓐᓂᐊᕈᑕᐅᓚᐅᖅᑐᒥ 2018-ᒥ, ᓴᖅᑭᑎᑕᐅᔪᓐᓇᖅᓯᓯᒪᓚᐅᖅᑐᖅ ᐱᓕᕆᖃᑎᒌᒃᖢᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᒻᒪᓗ ᐊᖑᑎᑦ ᐃᑲᔪᖃᑎᒌᑦ.
ᓯᕗᓂᒃᓴᒥ ᑮᓇᐅᔭᓂᒃ ᐊᖏᖅᑕᐅᔪᖃᕈᓐᓇᖅᐸᑦ, ᐃᓕᓐᓂᐊᖅᑎᑕᐅᔪᓐᓇᕈᒫᖅᑐᑦ ᖁᑦᑎᒃᑐᒥᐅᑦ ᓲᕐᓗ ᖃᐅᓱᐃᑦᑐᕐᒥᐅᑦ, ᐊᐅᓱᐃᑦᑐᕐᒥᐅᓪᓗ.
ᖃᓗᔾᔭᖅ ᐅᖃᖅᖢᓂ ᕿᑭᖅᑖᓘᑉᒎᖅ ᐅᐊᖕᓇᖓᓂ ᐃᓕᓐᓂᐊᕐᓂᐅᓚᐅᖅᑐᖅ ᐃᓕᓐᓂᐊᕈᑕᐅᓚᐅᖅᑐᖅ ᓯᑕᒪᓂᒃ ᐅᑉᓗᓂᒃ ᓄᓇᒥ ᕕᕗᐊᕆ 20-ᒥ 24-ᒧᑦ, ᓄᓇᓕᕋᓛᕐᒦᓚᐅᖅᖢᑎᒃ 64 ᑭᓛᒥᑕᓂᒃ ᐅᖓᓯᖕᓂᓕᖕᒥ ᑲᖏᖅᑐᒑᐱᐅᑉ ᐅᐊᖕᓇᖓᓄᑦ.
ᐅᖃᖅᖢᓂ ᐃᓕᓐᓂᐊᕐᓂᖃᓚᐅᖅᑐᒡᒎᖅ 15 ᐊᖑᑎᑦ ᐅᑯᓇᙵᖅ ᓄᓇᓖᑦ ᓴᓂᕋᔭᖕᒥ, ᐃᒡᓗᓕᖕᒥ, ᒥᑦᑎᒪᑕᓕᖕᒥ ᐊᒻᒪᓗ ᑲᖏᖅᑐᒑᐱᖕᒥ.
ᖃᓗᔾᔭᖅ ᐅᖃᖅᖢᓂ ᔭᓱᐊ ᐊᑲᕙᒃ ᑲᖏᖅᑐᒑᐱᖕᒥᐅᑕᕉᖅ ᐃᓕᓴᕐᓯᕕᒃ ᑲᑎᒪᔨᓂᙶᖅᑐᖅ ᐱᓕᕆᑦᑎᐊᖅᑐᒻᒪᕆᐊᓘᓚᐅᖅᑐᖅ ᑲᒪᔨᐅᖃᑕᐅᑉᓗᓂ ᐃᓕᓐᓂᐊᖅᑐᓂᒃ.
ᐅᖃᖅᖢᓂ ᖁᕕᐊᒋᑦᑎᐊᓚᐅᖅᑕᖓᒎᖅ ᑕᒪᓐᓇ ᐃᓕᓐᓂᐊᕈᑕᐅᑎᓪᓗᒍ ᐊᒻᒪᓗ ᐱᐅᔪᒃᑯᑦ ᐊᒃᑐᖅᑕᐅᓂᖃᓚᐅᖅᖢᑎᒃ ᐃᓚᐅᖃᑕᐅᔪᑦ.
"ᐃᓕᓐᓂᐊᕐᓂᒃᑯᑦ ᐃᓚᐅᖃᑕᐅᓂᖃᖅᑎᓪᓗᑕ ᑕᒪᑉᑕ ᐱᕚᓪᓕᕐᓂᖃᑦᑎᐊᓚᐅᖅᑐᒍᑦ," ᑕᐃᒪᓐᓇ ᐅᖃᖅᖢᓂ. "ᐃᓐᓇᑐᖃᐃᑦ, ᐅᖃᓪᓚᖃᑦᑕᓚᐅᖅᑎᓪᓗᒋᑦ ᐃᑲᔪᖅᑐᐃᖃᑦᑕᓚᐅᖅᑎᓪᓗᒋᓪᓗ, ᐃᑲᔫᑕᐅᓪᓚᕆᓚᐅᖅᑐᖅ ᓄᓇᒧᑦ ᐊᒃᑐᐊᓂᖅᓴᐅᔫᔭᓕᓚᐅᕋᑉᑕ ᓇᑭᙶᖅᓯᒪᓂᑉᑎᓐᓄᓪᓗ.
"ᑕᒪᓐᓇ ᐃᑲᔫᑕᐅᓚᐅᕐᒥᔪᖅ ᐅᑉᓗᒥᐅᓕᖅᑐᖅ ᖃᓄᐃᑦᑐᒃᑰᕐᓂᕆᕙᒃᑕᑉᑎᓐᓄᑦ.
"ᓇᓗᓇᙱᑦᑐᖅ ᑕᒪᕐᒥᒃ ᐃᓚᐅᖃᑕᐅᓚᐅᖅᑐᑦ ᐱᐅᔪᒥᒃ ᐊᖏᕐᕋᔾᔨᔪᓐᓇᓚᐅᕐᒪᑕ ᐃᓕᓐᓂᐊᖅᑳᖅᖢᑎᒃ, ᐃᓕᓐᓂᐊᕌᓂᒃᑲᒥᒃ ᖃᐅᔨᒪᓂᖅᓴᐅᓕᓚᐅᖅᑐᑦ ᒪᒥᓴᖅᐸᓪᓕᐊᓕᖅᖢᑎᒡᓗ ᐅᕝᕙᓘᓐᓃᑦ ᒪᒥᓴᕐᓂᕆᔭᒥᓂᒃ ᑲᔪᓯᑎᑦᑎᒃᑲᓐᓂᕈᓐᓇᑦᑎᐊᓕᓚᐅᖅᑐᑦ."