ᐊᐅᔭᐅᓚᐅᖅᑐᖅ ᐊᓯᕙᖅᓯᒪᐃᓐᓇᓚᐅᕐᒪᑦ ᓴᓐᓂᕈᑎᒥ, ᐸᖕᓂᖅᑑᑉ ᓯᓚᑖᓂ, ᑖᒃᑯᐊ ᐊᐅᓪᓚᖅᓯᒪᖃᑕᐅᓪᓗᑎᒃ ᐃᓅᓯᕗᒃᑯᓐᓂ, (Our Way of Life) ᐊᔪᖏᓴᖅᑐᓂ ᐊᔾᔨᓕᐅᕆᔨᓂ ᐱᒋᐊᖓᕐᕕᐊᓂ ᕌᓯᓕᓐ ᐋᑯᓗᒃᔪᑉ ᐃᓕᑕᕆᔭᐅᔪᑎᖓᓄᑦ ᐊᐅᓚᔪᓕᐊᕆᔪᔭᖓᓄᑦ ᐊᒻᒪᓗ ᓴᓇᐅᒐᕆᓂᐊᖅᖢᓂᐅᒃ ᐃᒻᒪᖄ ᐃᓅᓯᕐᒥᓂ ᐊᔾᔨᓕᐅᖅᑎᐅᓗᓂ.
“ᐊᐅᔭᑕᒫᑦ ᐃᓅᓯᕗᒃᑯᑦ ᐃᓕᓴᕐᕕᖓᑦ ᐊᓯᕙᖅᓯᒪᓪᓗᑎᒃ ᐱᖅᑯᓯᑐᖃᕐᓂᒃ ᐊᔪᖏᓴᖅᑕᐅᖃᑦᑕᕐᒪᑕ ᐊᐅᔭᖅ ᐊᔾᔨᓕᐅᕆᔩᑦ ᑕᖕᒪᖅᓯᒪᒋᐊᖅᑐᓚᐅᕐᒪᑕ ᑖᕙᓂ. ᐊᕐᕌᓂ ᐅᖓᑖᓂᐅᓚᖅᑐᖅ ᓄᓇᒥ ᐃᓕᓴᓚᐅᕋᑦᑕ ᐊᔾᔨᓕᐅᕆᓂᕐᒥᒃ ᒫᓐᓇᓕ ᐊᐅᓚᔫᓕᐅᕐᓂᕐᒥᒃ,” ᐅᓂᒃᑳᓚᐅᖅᑐᖅ ᐊᑯᓗᒃᔪᒃ.
ᓴᓐᓂᕈᑎᒥ, ᒪᒃᑯᒃᑐᐃᑦ ᐅᓂᒃᑳᓕᐅᖅᑎᑕᐅᓪᓗᑎᒃ ᐊᔾᔨᓕᐅᕈᒪᔭᒥᓂᒃ ᓇᖕᒥᓂᕐᓗ ᑖᒃᑯᐊ ᑎᑎᕋᖅᑕᑎᒃ ᐋᕿᒃᓱᖅᖢᓂᔪᒃ ᓇᐃᑦᑐᒥᒃ ᐊᐅᓚᔫᓕᐅᖅᑎᑕᐅᓚᐅᕐᒪᑕ.
ᐃᒫᖓᐃ, ᐋᑯᓗᒃᔪᒃ ᐊᒻᒪᓗ ᕇᑕ ᒃᓕᐅ ᒪᐃᒃ-ᒨᕕ (ᐃᖕᖏᖅᑎ ᕇᑦ) ᓇᐃᑦᑐᒥᒃ ᐊᐅᓚᔫᓕᐅᓚᐅᕐᒪᑕ ᑲᑐᔾᔨᓪᓗᑎᒃ 2009-ᒥ ᐊᐅᔭᐅᑎᓪᓗᒍ ᑕᐃᓪᓗᓂᔪᒃ I'm All That, ᐅᓂᒃᑲᐅᓯᖃᖅᖢᑎᒃ ᓯᖕᓇᓲᖑᓂᖏᓐᓂᒃ ᐃᓚᓐᓈᕇᑦ ᐊᑯᓗᒃᔪᒃ ᐊᔾᔨᓕᐅᕆᔨᐅᓂᕐᒥᒃ ᐱᒃᑯᒥᒍᓱᓕᕐᓂᕐᒪᑦ ᑕᐃᓱᒪᓂ.
“ᐅᓐᓃᑦ ᑕᒪᑐᒪᓂ ᐅᓂᒃᑳᓕᐊᒃᑲ ᑕᑯᒃᓴᐅᑎᑦᑐᒪᓪᓗᒋᑦ ᐊᐅᓚᔫᓕᐅᕈᓯᕐᓂᒃ ᐃᓕᓴᓚᐅᖅᑐᖓ. ᖁᕕᐊᒋᒐᒃᑯ ᐅᓂᒃᑳᓕᐅᕐᓂᖅ, ᖃᓄᐃᑦᑐᑐᐃᓐᓇᓂᒃ ᐅᓂᒃᑳᓂᒃ ᐅᖃᓕᒫᓂᒃ, ᓈᓚᒃᖢᓂ, ᐊᔾᔨᓕᐅᖅᑕᐅᓯᒪᔪᓂᒃᓗ,” ᐅᖃᕆᓪᓗᓂ ᐋᑯᓗᒃᔪᒃ ᐃᓅᓯᕐᒥᓂ ᓴᓇᐅᒐᕆᓂᐊᓕᖅᑕᒥᓂᒃ.
ᖃᔮᖅ ᐃᐊᓪᔅᕗᐊᑦ ᓯᑏᓯ ᐊᒡᓗᒃᓗ ᒪᒃᑖᓄᓪ ᑖᒃᑯᐊ ᐋᕿᒃᓱᐃᓚᐅᕐᒪᑕ ᓴᓇᐅᒐᖅᑎᓄᑦ ᐊᓯᕙᖅᓯᒪᕕᐅᓪᓗᓂ ᑕᖕᒫᖅᓯᒪᕕᖕᒥ ᐃᓕᓴᖅᑕᐅᓂᐊᖅᑐᓂᒃ, ᐊᒻᒪᓗ ᐃᐊᓪᔅᕗᐊᑦ ᐅᖃᓚᐅᖅᖢᓂ ᖁᕕᐊᓱᖕᓂᕋᖅᖢᓂ ᑕᑯᓪᓗᓂ ᐋᑯᓗᒃᔪᒃᒥᒃ ᐊᐅᓚᔫᓕᐅᖅᑎᐅᓂᕐᒥᒃ ᐊᔾᔨᓕᐅᕆᔨᐅᓂᕐᒥᒃᓗ ᐱᒃᑯᒥᒍᓱᓕᖅᑐᖅ ᐊᔪᖏᑦᑎᐊᕐᒪᑦ.
“ᑕᐃᓱᒪᓂ ᕌᓯᓕᓐ ᓯᕗᓪᓕᖅᐹᒥ ᐊᔾᔨᓕᐅᖅᑎᐅᓂᕐᒥᒃ ᐆᒃᑐᕋᑲᑕᓕᖅᖢᓂ, ᐊᐅᓚᔫᓂᒃ ᐅᓂᒃᑳᓕᐅᕐᓂᕐᒥᒃ ᑕᕐᕆᔭᐅᑎᓕᐅᕐᓗᓂ, ᑎᓇᖏᑦᑎᐊᖅᖢᓂ ᓴᓇᓴᐅᑎᒋᓚᐅᖅᓯᒪᖕᒪᑦ, ᖃᐅᔨᓴᕈᓐᓇᖅᖢᓂ ᐊᔾᔨᓕᐅᕈᒥᓇᖅᑐᓂᒃ ᐱᔭᕆᑐᔪᓂᒃ ᐊᖑᒻᒪᑏᓐᓇᓚᐅᕐᒪᑦ ᑕᐃᒪᓐᓇ ᑕᒪᓐᓇ ᓴᓇᐅᒐᕆᓗᓂᐅᒃ ᐊᔪᖏᓐᓂᐊᖅᑕᖓ ᐊᓯᒥᓄᑦ ᑕᑯᔭᐅᔪᓐᓇᖅᑐᓂᒃ ᐋᕿᒃᓱᐃᔪᓐᓇᖅᓯᖕᒪᑦ,” ᐅᖃᕆᓪᓗᓂ.
“ᐃᓕᓴᖅᑐᑦ ᓇᖕᒥᓂᖅ ᐆᒃᑐᕋᑲᑕᒃᖢᑎᒃ ᐊᒻᒪᓗ ᐃᑲᔪᖅᖢᑎᒃ ᐊᓯᒥᓂᒃ - ᐅᖃᐅᓯᕐᓂ ᐱᖅᑯᓯᕐᓂᓗ, ᐅᕝᕙᓗᑭᐊᖅ ᐃᑲᔪᖅᖢᑎᒃ ᐃᓅᖃᑎᒥᓂᒃ ᑐᑭᓯᓇᓱᐊᖅᑐᑦ ᑕᐃᓱᒪᓂᑐᖃᖅ ᖃᓄᖅ ᐱᕙᓚᐅᖅᓯᒪᓂᖏᓐᓂᒃ ᐅᓂᒃᑳᓕᐊᕆᓪᓗᒋᑦ - ᑕᒪᓐᓇ ᑕᕝᕙ ᕌᓯᓕᓐ ᑲᒪᒋᓂᐊᖅᑕᖓ ᓴᓇᖅᑯᓯᕐᒥᓂ ᓄᓇᕗᒥ ᐱᕈᖅᓴᓇᓱᐊᕐᓗᓂᐅᒃ.
ᑭᓯᐊᓂᓕ, ᑐᖓᓕᖓᓂ ᐃᓕᓴᕐᕕᖕᒥ ᐱᐊᓂᓚᐅᖅᖢᓂ, ᐊᔾᔨᓕᐅᕆᔨ ᑖᓐᓇ ᓯᕗᓂᖓᓂ ᐃᓕᓴᐃᔨᐅᓂᕐᒥᒃ ᐃᓕᓴᕈᒪᔪᖕᒪᑦ. ᐊᑎᓕᐅᖅᑐᕕᓂᖅ ᓄᓇᕗᒥ ᐃᓕᓴᐃᔨᓄᑦ ᐃᓕᓴᕐᕕᒃᒥ. ᓯᕗᓪᓕᖅᐹᒥ ᑐᓐᖓᕕᖓᓂᒃ ᐃᓕᓴᓚᐅᖅᖢᓂ ᖃᐅᔨᓕᖅᑐᕕᓂᖅ ᑕᒪᑐᒥᖓ ᓈᒻᒪᒃᓴᖏᓐᓂᕐᒥᓂᒃ.
ᐅᑭᐅᑦ ᒪᕐᕉᒃ ᓈᓯᒪᓕᖅᑎᓪᓗᒋᑦ, ᐊᓱᐃᓛᒃ ᐃᓕᓴᕆᐊᓕᖅᑐᕕᓂᖅ ᑐᕌᓐᑐᒥ ᐊᐅᓚᔫᓕᐅᖅᑏᑦ ᐃᓕᓴᕐᕕᐊᓂ, ᐱᒃᑯᒥᒋᔭᒥᓂᒃ ᐃᓕᓴᕆᐊᖅᑐᖅᖢᓂ. ᐅᑭᐅᓕᒫᒥ ᐃᓕᓴᓚᐅᖅᖢᓂ ᐊᒻᒪᓗ ᐅᑎᖅᓯᒪᓕᖅᖢᓂ ᐅᑭᐅᓕᒫᒥᒃ ᐸᖕᓂᖅᑑᒧᑦ, ᐃᖅᑲᓇᐃᔭᖅᑖᖅᑐᕕᓂᖅ ᑕᖅᑯᒃᑯᓐᓂ ᓴᓇᐅᒐᖅᑎᓂ, ᐃᖃᓗᖕᓂ.
ᑕᒪᑐᒪᓂ ᑕᖅᑯᒃᑯᓐᓃᓕᖅᖢᓂ, ᐋᑯᓗᒃᔪᒃ ᐱᒃᑯᒥᒍᓱᓕᕐᓂᕐᒪᑦ ᐊᐅᓚᔫᓕᐅᕈᒪᓪᓗᓂ The Owl and the Lemming-ᒥᒃ, ᐃᓄᒃᑎᑐᑦ ᐅᓂᒃᑳᖅᑐᐊᒥᒃ.
“ᑖᓐᓇ ᐅᓂᒃᑳᖅᑐᐊᖅ ᐱᓪᓗᒍ, ᓇᖕᒥᓂᖅ ᐋᕿᒃᓱᖅᖢᒍ. ᐅᓂᒃᑳᓕᐊᕋ ᑕᕐᕆᔭᐅᑎᓕᐊᒃᓴᖅ ᐊᖏᖅᑕᐅᓚᐅᖅᑐᖅ ᓇᐃᑦᑐᓂᒃ ᐊᐅᓚᔫᓕᐅᖅᑎᓄᑦ ᐊᑭᓕᖅᑕᐅᔪᓐᓇᕐᓂᕋᖅᖢᓂ ᓴᓇᒍᒃᑯ,” ᐅᖃᕆᓪᓗᓂ, ᐃᓱᒪᒋᓪᓗᓂᐅᒃ ᐃᓅᔭᓕᐊᖑᓯᒪᔪᓂᒃ ᐊᐅᓚᔫᓕᐅᕈᒪᓪᓗᓂ ᑖᒃᑯᐊ ᐃᓅᔭᐃᑦ ᐊᔾᔨᓕᐅᕐᓗᓂᒋᑦ.
ᐊᓱᐃᓚᒃ 6-ᒥᓂᓯᒥᒃ ᑕᑭᓂᖃᖅᑐᒥᒃ ᐊᐅᓚᔫᓕᐅᖅᑐᕕᓂᖅ ᑕᖅᑭᓂᒃ 7-ᓂᒃ ᓴᓇᓪᓗᓂᐅᒃ.
2016-ᒥ, The Owl and the Lemming ᐊᐅᓚᔫᓕᐊᖓ ᐊᑭᓯᔪᕕᓂᖅ ᐊᒡᒐᒧᑦ ᐊᐅᓚᔫᓕᐅᖅᑏᑦ ᐊᒥᐊᓕᒃᑲᓂ ᓄᓇᖃᖅᑳᖅᑐᑦ ᑕᑯᒃᓴᐅᑎᑦᑎᕕᐊᓂ - ᐊᑕᐅᓯᕐᒥᒃ ᐊᐅᓚᔫᓕᐅᖅᑏᑦ ᑕᑯᒃᓴᐅᑎᑦᑎᕕᐊᓃᖢᓂ ᑕᑯᓐᓂᕐᒪᑦ ᐱᒃᑯᒥᒋᔭᒥᓂᒃ.
Inhabit Media-ᑯᑦ ᑖᓱᒥᖓ ᐊᐅᓚᔫᓕᐊᖓᓂᒃ ᐅᖃᓕᒫᒐᖑᖅᑎᑦᑎᔪᕕᓃᑦ, ᑖᓐᓇᑦᑕᐅᖅ ᐅᓂᒃᑳᓕᐊᖓ ᐱᒃᑯᒥᒋᔭᐅᓗᐊᓕᓚᐅᕐᒪᑦ ᓄᑕᖅᑲᓄᑦ ᑕᕐᕆᔭᐅᑎᐅᖅᑕᐅᓪᓗᓂ ᐊᒻᒪᓗ ᐅᖃᓕᒫᒐᖃᖅᖢᓂ, ᓱᓕ ᐊᓯᖏᓐᓄᑦ ᐊᐅᓚᔫᓕᐅᖅᑏᑦ ᑕᑯᒃᓴᐅᑎᑦᑎᕕᖏᓐᓂ ᑕᑯᒃᓴᐅᑎᑕᐅᑲᑕᖕᓂᐊᓕᖅᑐᖅ.
ᐋᑯᓗᒃᔪᒃ ᒫᓐᓇ ᑕᖅᑯᒃᑯᓐᓂ ᑐᕌᓐᑐ ᐊᓐᑎᐅᕆᐅᒥ ᐃᖅᑲᓇᐃᔮᖃᓕᖅᑐᖅ ᐊᔾᔨᒌᖏᑦᑐᓂᒃ ᐅᓂᒃᑳᓂᒃ ᐊᐅᓚᔫᓕᐅᕐᓂᐊᕐᒪᑦ ᑕᐃᓪᓗᓂᒋᑦ ᐅᑲᓕᖅ ᐊᒻᒪᓗ ᑲᓚ.
“ᑖᓐᓇ ᐊᐅᓚᑦᑎᔨᐅᔪᖅ ᐊᐅᓚᔫᓕᐅᕕᖕᒥᓂᒃ, ᐃᖅᑲᓇᐃᔮᕆᓪᓗᓂᐅᒃ ᐊᐅᓚᔫᓕᐅᕐᕕᖕᒥ ᑐᕌᓐᑐᒥ, ᐅᔾᔨᖅᓱᖅᑐᖅ ᐃᓄᒃᑎᑐᑦ ᓴᓇᔭᖏᑦ ᐅᖃᐅᓯᖏᑎᑐᑦ ᐋᕿᒃᓱᑦᑎᐊᖅᓯᒪᖁᓪᓗᓂᒋᑦ,” ᐅᓂᒃᑳᓚᐅᖅᑐᖅ ᓂᐃᓪ ᑯᕆᔅᑕᕗ, ᐊᐅᓚᑦᑎᔨᒋᔭᐅᔪᖅ ᑕᑎᒋᓪᓗᓂᐅᒃᓗ ᑕᖅᑯᒃᑯᓐᓂ ᐊᒻᒪᓗ Inhabit Media-ᑯᓐᓂ.
ᐅᖃᕆᓪᓗᓂ ᐋᑯᓗᒃᔪᒃ ᐃᒻᒥᒃᑰᖅᖢᓂ ᐊᒃᓱᕉᑎᖃᕐᒪᑦ ᐃᓄᒃᑎᑑᖅᑐᓂᒃ ᑕᕐᕆᔭᐅᑎᓂᒃ ᐱᐅᓂᖅᐹᒥᒃ ᐋᕿᒃᓱᖅᓯᒪᖁᔨᓪᓗᓂ ᑎᓕᕖᓴᒃᑰᖅᑐᒃᓴᓂᒃ ᑕᕐᕆᔭᐅᑎᒃᓴᓂᒃ.
“ᓇᖕᒥᓂᖅ ᐊᒃᓱᕉᑎᖃᖅᑐᖅ ᑕᒪᒃᑯᓂᖓ,” ᐅᖃᕆᓪᓗᓂ. “ᐃᒻᒥᒃᑰᖅᖢᓂ ᐱᓕᕆᐊᒥᓂᒃ ᑲᒪᔪᓐᓇᖅᑐᖅ ᓇᒥᑐᐃᓐᓇᖅ ᐊᖏᕐᕋᕆᖏᑕᕋᓗᐊᒥᓂ … ᑕᓐᓇ ᐃᓄᒃ ᐊᔪᖏᑦᑐᖅ.”
ᑭᓯᐊᓂᓕ ᖃᑕᖑᑎᒥᓂᒃ ᐅᖓᓕᖃᑦᑕᕐᒪᑦ ᐊᒃᓱᕉᑎᒋᓪᓗᓂᒋᑦ ᓴᓇᔭᓂ ᐱᑦᑎᐊᕋᓱᐊᖃᑦᑕᖅᑕᖏᑦ.
“ᑭᓱᑐᐃᓐᓇᒥᒃ ᓴᓇᓕᕌᖓᒪ ᐃᓄᒃᑎᑑᖓᑎᓪᓗᒋᑦ ᓴᓇᖃᑦᑕᕋᒃᑭᑦ ᑕᑯᒃᓴᐅᑎᑕᐅᖁᔭᒃᑲ ᐃᓄᒃᑎᑑᖅᑎᓪᓗᒋᑦ, ᐱᑕᖃᖁᔨᒐᒪ ᐃᓄᒃᑎᑑᖓᔪᓂᒃ ᑕᑯᓐᓇᒐᕐᓴᓂᒃ. ᓄᑲᑯᓗᒐ, ᐱᖓᓱᓂᒃ ᐊᕐᕌᒍᖃᓕᖅᑐᖅ. ᑕᐃᒪᖓᓂᑦ ᖃᓪᓗᓈᑎᑑᖅᑐᓂᒃ ᑎᓕᕖᓴᒃᑯᑦ ᑕᕐᕆᔭᐃᓐᓇᐅᔭᕐᒪᑦ ᐃᓄᒃᑎᑑᖅᑐᑦ ᐅᖃᓪᓚᒃᑐᓂᒃ ᓴᓇᐅᑎᔪᒪᒐᒃᑯ. ᐊᒃᓱᕈᕆᐊᓪᓚᖃᑦᑕᖅᑐᖓ ᐃᓄᒃᑎᑑᖓᔪᓂᒃ ᓴᓇᔪᒪᓪᓗᖓ ᑕᐅᑐᒍᓐᓇᕐᓂᐊᕐᒪᑦ ᐅᖃᐅᓯᕐᒥᑎᑐᑦ ᑕᕐᕆᔭᐅᑎᓂᒃ,” ᐅᖃᕆᓪᓗᓂ ᐋᑯᓗᒃᔪᒃ.