ᐋᓂ ᐊᓐᓂᕐᒥᐅᖅ ᖁᕕᐊᑉᐳᖅ ᐅᑎᓛᕐᓂᖓᓂ ᓄᓇᕗᒻᒧᑦ, ᐊᒻᒪ ᒫᓐᓇ ᐱᔾᔪᑎᒃᓴᖃᒃᑲᓐᓂᖅᐳᖅ ᐊᐅᓪᓛᖃᑦᑕᕐᓂᕐᒧᑦ ᓄᕙᒡᔪᐊᕐᓇᖅ ᐱᔪᓐᓇᖅᑎᑦᑎᒑᖓᑦ – ᓄᑖᒥᒃ ᐃᖅᑲᓇᐃᔮᖃᓕᖅᐳᖅ.
ᐊᓐᓂᕐᒥᐅᖅ ᒫᓐᓇᓕᓴᐅᔪᒥ ᐃᖅᑲᓇᐃᔮᖅᑖᓚᐅᖅᐳᖅ ᓄᓇᓯ ᑎᒥᖁᑕᐅᔪᒃᑯᓐᓄᑦ ᐊᖓᔪᖅᑳᑉ–ᑐᖏᓕᖓᓂ ᒐᕙᒪᐅᔪᓂ ᐊᒻᒪ ᓄᓇᓕᖕᓂ ᐱᓕᕆᓂᐅᔪᒥ.
ᐋᑐᕚᒥᐅᑕᐅᓪᓗᓂ ᐊᕐᕌᒍᓄᑦ ᖁᓕᓄᑦ, ᓄᓇᒧᐊᖅᓯᒪᙱᓚᖅ ᐊᖏᕐᕋᖓᓂ ᐊᕐᕌᒍᒥ ᓇᑉᐸᓪᓗᐊᐸᓗᖕᒥᓗ ᐱᔾᔪᑎᖃᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ. ᑭᓯᐊᓂ ᓂᕆᐅᒃᐳᖅ ᖃᖓᑕᓲᒃᑯᑦ ᐅᑎᓛᕐᓂᖓᓂ ᐅᑎᒧᓪᓗ ᐃᑲᔪᕐᓂᕐᒧᑦ ᓄᓇᕗᒻᒥ–ᑐᙵᕕᓕᖕᓂ ᓄᓇᓯᒥ ᐱᕈᖅᓴᐃᓂᖓᓂ ᓇᖕᒥᓂᕆᔭᐅᔪᓂᑦ.
"ᐅᓇ ᐱᕕᒃᓴᖃᖅᑎᑕᐅᓂᐅᔪᒥ, ᓴᖅᑭᒻᒪᑦ, ᐅᕙᓐᓄᑦ ᐱᔪᒪᕐᔪᐊᓚᐅᖅᐸᕋ ᐃᓱᒪᓂᖃᕐᓂᐅᔪᒥ ᐅᑭᐅᖅᑕᖅᑐᒧᑦ ᐅᑎᖅᓯᒪᓂᐅᔪᒧᑦ. ᓄᓇᓕᖕᓃᒃᑲᓐᓂᕈᒪᓂᖅ ᐊᖏᔪᒻᒪᕆᐊᓘᓪᓗᓂ ᐱᕐᔪᐊᖑᒋᓚᐅᖅᐸᕋ, ᐊᒻᒪ ᐃᖅᑲᓇᐃᔭᖅᖢᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᒧᑦ ᓇᖕᒥᓂᕆᔭᐅᔪᒥ ᐃᓄᖕᓂ ᐱᕐᔪᐊᖑᓚᐅᖅᐳᖅ," ᐅᖃᓚᐅᖅᐳᖅ ᐃᓱᒪᓕᐊᕆᔭᖓᓄᑦ ᐊᖏᕐᓂᕐᒧᑦ ᐃᖅᑲᓇᐃᔮᒃᓴᒥ.
ᐊᓐᓂᕐᒥᐅᖅ, ᐸᖕᓂᖅᑑᕐᒥᐅᑕᓪᓚᕆᐅᓪᓗᓂ, ᓇᒃᓴᖅᐳᖅ ᓱᖏᐅᑎᓯᒪᓂᐅᔪᒥ ᐃᓚᖏᓐᓂ ᓄᓇᓯ ᐱᓕᕆᖃᑎᒋᔭᖏᓐᓂ – ᓲᕐᓗ ᐃᓄᖕᓂ ᑲᑐᔾᔨᖃᑎᒌᖑᔪᓂ ᐊᒻᒪᓗ ᐃᓄᖕᓄᑦ ᐱᕙᓪᓕᐊᑎᑕᐅᓂᐅᔪᓄᑦ ᑎᒥᖁᑕᐅᔪᓂ – ᐊᒻᒪ ᐃᓚᖏᓐᓂ ᓄᓇᓯᒃᑯᑦ ᐱᓕᕆᔾᔪᔾᔭᐅᕙᒃᑐᓂ; ᓲᕐᓗ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪᓗ ᒐᕙᒪᑐᖃᒃᑯᓐᓂ.
ᐊᖏᒡᓕᒋᐊᖅᓯᓂᐅᔪᒥ ᐊᒻᒪ ᐱᐅᓯᒋᐊᖅᑎᑦᑎᓂᕐᒥ ᐊᐅᓚᑕᐅᓂᖓᓂ ᓛᒐᒥ ᐊᖏᕐᕋᕆᔭᐅᔪᓂᑦ – ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᐅᓲᓂ ᐊᐅᓪᓛᖅᑐᓄᑦ ᐃᓄᖕᓄᑦ – ᐊᓯᐊᖑᓪᓗᓂ ᓯᕗᓪᓕᐅᔾᔭᐅᖁᔭᐅᒋᕗᖅ.
"ᖁᕕᐊᕐᔪᐊᖅᐳᖓ ᐱᓕᕆᐊᖑᓂᐊᖅᑐᓂ ᓯᕗᓂᐊᓂ," ᐅᖃᓚᐅᖅᐳᖅ.
ᓴᖅᑭᑎᑕᐅᓚᐅᖅᓯᒪᓪᓗᓂ 1976–ᒥ, ᓄᓇᕗᒻᒥ–ᑐᙵᕕᓕᖕᒥ ᓄᓇᓯ ᑎᒥᖁᑕᐅᔪᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᖃᕆᕗᑦ ᓇᑉᐸᖅᑎᕆᓂᕐᒥ, ᓂᐅᕕᕐᕕᒃᓴᓄᑦ ᐃᒡᓗᓂ ᓄᓇᒥᒡᓗ ᓂᐅᕕᐊᒃᓴᖃᖅᐸᒃᑐᓄᑦ, ᓂᐅᕕᕐᕕᓂᑦ, ᐃᓕᒃᑯᐊᒥ ᐅᖅᓱᐊᓗᖕᒥ ᑐᖅᑯᐃᓂᐅᔪᒥ, ᐊᐅᓚᑕᐅᓂᐅᔪᒥ ᓇᓗᓇᖅᑐᓂ ᐊᐅᓚᑕᐅᓂᖓᓂ ᐊᒻᒪ ᑐᓂᓯᓂᐅᔪᒥ.
ᐊᓐᓂᕐᒥᐅᖅ ᒫᓐᓇᓕᓴᐅᔪᒥ ᑎᒍᒥᐊᓚᐅᖅᐳᖅ ᑕᐃᒎᓯᐅᔪᒥ ᐊᑐᐊᒐᓄᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓄᑦ ᐱᓕᕆᓂᐅᔪᒥ ᐅᖃᐅᔾᔨᔨᐅᓂᕐᒥ ᑳᓚᐃᓐ ᐸᓇᑦᒧᑦ, ᒥᓂᔅᑕᐅᔪᖅ ᑯᐃᓐᒧᑦ–ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᒥ. ᑕᐃᑲᓃᓐᓂᖓᓂ, ᐊᓐᓂᕐᒥᐅᖅ ᐱᓕᕆᓂᖃᖃᑕᐅᓚᐅᖅᐳᖅ ᑎᑎᖅᑲᖁᑕᐅᔪᓂ ᓲᕐᓗ ᐃᓄᐃᑦ–ᑯᐃᓐᒧᑦ ᐱᓕᕆᖃᑎᖃᕐᓂᐅᔪᒥ ᑲᑎᒪᔨᕋᓛᖑᔪᓄᑦ ᐊᒻᒪ ᐃᓄᐊᖅᑕᐅᔪᓄᑦ ᐊᒻᒪ ᐊᓯᐅᖅᑲᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ. ᐊᕐᕌᒍᑲᓴᖕᓂ ᒪᕐᕉᖕᓂ, ᐊᐅᓪᓛᖃᑎᖃᖅᐸᓚᐅᖅᐳᖅ ᒥᓂᔅᑕᒥ ᐊᒻᒪ ᐸᕐᓇᐃᕙᒃᖢᓂ ᑐᑭᓯᒋᐊᕈᑎᓂᑦ.
ᐃᓚᐅᖃᑕᐅᓚᐅᖅᐳᖅ ᔭᓄᐊᕆ 2019–ᒥ ᒪᒥᐊᓐᓂᐅᔪᒥ ᐸᓇᑦ ᐱᓕᕆᓚᐅᖅᑕᖓᓂ ᐊᕐᕕᐊᓂ ᒐᕙᒪᑐᖃᒃᑯᓐᓄᑦ ᑕᐃᔅᓱᒪᓂᐅᓚᐅᖅᑐᒥ ᐊᑐᐊᒐᖓᓂ ᐃᓱᒪᖅᓱᙱᖦᖢᑎᒃ ᓅᑎᑕᐅᓂᐅᓚᐅᖅᑐᒥ ᐃᓄᖕᓂ.
"(ᐊᑐᕐᓂᕆᓚᐅᖅᑕᕋ) ᓇᓗᓇᐃᖅᓯᓂᕐᒥ (ᒪᒥᐊᓐᓂᐅᔪᖅ) ᐱᓕᕆᐊᖑᓂᖓᓂ ᐃᒃᐱᒍᓱᑦᑎᐊᕐᓂᖃᑦᑎᐊᖅᑐᒥ ᐱᓕᕆᓂᐅᔪᒥ – ᓲᖃᐃᒻᒪ ᐊᒃᑐᖅᑕᐅᓴᕋᐃᖦᖢᓂ ᐅᖃᐅᓯᐅᓂᐅᓚᐅᕐᒪᑦ ᓄᓇᓕᖕᓄᑦ," ᐊᓐᓂᕐᒥᐅᖅ ᐃᖅᑲᐅᒪᓚᐅᖅᐳᖅ.
ᒐᕙᒪᑐᖃᒃᑯᓐᓂ ᐃᓂᒋᔭᖓ ᓇᓗᓇᖅᓯᒐᒥ ᐱᔾᔪᑎᖃᖅᑐᒥ ᐅᒃᑐᐱᕆ 2019–ᒥ ᓂᕈᐊᕐᓂᐅᔪᒥ, ᐊᓐᓂᕐᒥᐅᖅ ᐱᓕᕆᓕᓚᐅᖅᐳᖅ ᓯᕗᓕᐅᖅᑎᐅᓂᕐᒥ ᐱᓕᕆᓂᐅᔪᒥ ᐊᑐᐊᒐᕐᒥ ᐊᒻᒪ ᐋᔩᖃᑎᒌᖕᓂᐅᔪᒥ ᐱᓕᕆᕝᕕᖓᓂ ᑲᓇᑕᒥ ᑲᑐᔾᔨᖃᑎᒌᖑᔪᓄᑦ ᑐᙵᓵᕆᕝᕕᖕᓂ.
ᐃᓕᓐᓂᐊᖅᓯᒪᓂᕐᒧᑦ ᐊᑐᕐᓂᑯᖏᑦ
ᐊᓐᓂᕐᒥᐅᖅ ᐃᓕᓐᓂᐊᓚᐅᖅᓯᒪᕗᖅ ᓯᓚᑦᑐᖅᓴᕐᕕᒡᔪᐊᒥ ᒍᐃᓪᕝᒥ, ᐊᓕᐊᓇᐃᒋᔭᖃᖅᖢᓂ ᐊᕙᑎᓕᕆᓂᕐᒧᑦ ᐃᓕᓐᓂᐊᕐᓂᐅᔪᓂ ᐊᒻᒪ ᐊᕐᓇᓄᑦ ᖃᐅᔨᓴᐃᓂᐅᔪᓂ.
ᑕᐃᒪᙵᓂ ᐱᓕᕆᓚᐅᖅᐳᖅ ᓄᓇᕐᔪᐊᒥ ᐅᑭᐅᖅᑕᖅᑐᖓᓂ ᖃᐅᔨᓴᐃᓂᐅᔪᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒡᔪᐊᖓᓂ ᐊᒻᒪᓗ ᓇᓚᐅᑦᑖᕆᕗᖅ ᐃᓚᐅᖃᑕᐅᓂᐊᕐᓂᖓᓂ ᓇᖕᒥᓂᖃᖅᑐᓄᑦ ᐱᕙᓪᓕᐊᑎᑦᑎᓂᐅᔪᒥ ᐃᓕᓐᓂᐊᕐᓂᐅᔪᓂ ᓴᙱᒃᑎᒋᐊᖅᓯᓂᕐᒧᑦ ᖃᐅᔨᒪᓂᖓᓂ ᐊᒻᒪ ᐱᔪᓐᓇᕐᓂᖓᓐᓂ ᓄᑖᖑᔪᒥ ᐃᖅᑲᓇᐃᔮᕆᓕᖅᑕᖓᓂ.
ᐃᓱᓕᑦᑎᓂᑰᕗᖅ ᐊᕐᕌᒍᓄᑦ–ᒪᕐᕉᖕᓄᑦ ᓄᓇᕗᒻᒥ ᓯᕗᓂᒃᓴᒃᑯᑦ ᓯᓚᑦᑐᖅᓴᕐᕕᖕᒥ ᐸᕐᓇᒃᐸᓪᓕᐊᓂᕐᒧᑦ ᐱᓕᕆᐊᖑᔪᒥ. ᑭᖑᓂᐊᒍᑦ, ᑎᑎᕋᖅᑕᐅᓯᒪᖃᓯᐅᑎᓪᓗᓂ ᑲᓇᑕᒥ ᓄᓇᕐᔪᐊᒥ ᒪᒃᑯᒃᑐᓄᑦ ᐃᓐᑎᐊᓕᐊᓚᐅᖅᐳᖅ ᑕᖅᑭᓄᑦ ᐱᖓᓱᓄᑦ. ᑕᐃᓐᓇ ᐊᑐᕐᓂᑯᖓ ᐱᓕᕆᓚᐅᕋᓗᐊᖅᑎᓪᓗᒍ ᐊᕐᕌᒍᑦ ᖁᓕᑦ ᐅᖓᑖᓂ, ᕿᒪᐃᓯᒪᕗᖅ ᐃᖅᑲᐅᒪᐃᓐᓇᐅᔭᕐᓂᐊᖅᑕᖓᓂ ᓇᓗᓇᐃᒃᑯᑕᐅᔪᒥ.
"ᓄᓇᓕᖕᓂᕐᒥᐅᑕᐅᓪᓗᓂ 1,500–ᐸᓗᖕᓂ ᐃᓄᖃᖅᑐᓂ ᐊᒻᒪᓗ ᓄᓇᖃᓯᑳᓪᓚᒃᖢᑎᑦ ᐃᓂᐅᔪᒥ ᐃᓄᒋᐊᕐᔪᐊᖅᑐᒥ ᐊᒻᒪᓗ ᐊᔾᔨᒋᙱᑦᑎᐊᖅᑕᖓᓂ ᓱᖏᐅᑎᓯᒪᔭᕐᓂᑦ, ᐃᔨᓐᓂᑦ ᒪᑐᐃᖅᓯᑦᑎᐊᓚᐅᖅᐳᖅ ᐃᓱᒪᓂᕐᒧᑦ ᑭᓱᑦ ᓯᓚᑖᓃᓐᓂᖓᓂ ᐃᓗᐊᕆᓯᒪᔭᓐᓂ," ᐅᖃᓚᐅᖅᐳᖅ.
ᐱᕈᖅᓴᓚᐅᖅᐳᖅ ᐸᖕᓂᖅᑑᒥ ᓯᕗᓪᓕᖅᐸᐅᔪᓂ ᐊᕐᕌᒍᓄᑦ 20–ᓄᑦ ᐃᓅᓯᖓᓐᓂ ᐊᒻᒪ ᐃᖅᑲᐅᒪᓂᖃᑦᑎᐊᖅᐳᖅ ᓄᓇᒦᑉᐸᓚᐅᕐᓂᖓᓂ ᐃᓚᒌᓪᓗ. ᓯᑯᒥ ᐃᖃᓪᓕᐊᒐᔪᓚᐅᖅᐳᖅ ᐊᒻᒪ ᖁᕕᐊᓇᑦᑎᐊᖅᑐᓂ ᑕᖕᒫᖅᓯᒪᖃᑦᑕᓚᐅᖅᐳᖅ.
ᐃᖅᑲᐅᒪᕗᖅ ᓯᑯᒦᖃᑎᖃᕐᓂᖓᓂ ᐊᑖᑕᖓᓂ, ᕿᓄᐃᓵᖅᖢᓂ ᐅᑕᖅᑭᓪᓗᓂ ᐊᒡᓗᒥ ᑕᐃᒫᒃ ᐊᓐᓂᕐᒥᐅᖅ, ᐅᑭᐅᖃᐸᓗᒃᖢᓂ 12–ᓂ, ᓯᕗᓪᓕᖅᐹᖓᓂ ᓇᑦᑎᕈᓐᓇᕋᔭᓚᐅᕐᒪᑦ.
ᐱᓇᔪᐃᓐᓇᓚᐅᖅᐳᖅ.
"ᐅᐱᐅᖅᑲᕐᔪᐊᓚᐅᖅᐳᖅ ᑕᐃᔅᓱᒪᓂᐅᓚᐅᖅᑐᒥ," ᐃᖅᑲᐅᒪᕗᖅ ᐊᑖᑕᖓᑕ ᖃᓄᐃᓐᓂᕆᔭᖓᓂ.
ᐊᕐᕌᒍᒐᓴᐅᓕᖅᑐᓂ, ᐊᓐᓂᕐᒥᐅᖅ ᑎᑭᐅᑎᓕᖅᐳᖅ ᐊᔾᔨᒋᙱᑦᑎᐊᖅᑕᖓᓂ ᐱᓕᕆᓂᐅᔪᒥ, ᑕᐃᒪᓐᓇᑎᑐᑦ ᐊᒥᓱᓂ ᐊᓯᖏᓐᓂ ᐅᐱᒋᕐᔪᐊᖅᑕᖏᓐᓂ.
"ᐃᓄᐃᑦ ᐱᓕᕆᑦᑎᐊᖅᑐᒻᒪᕆᐊᓘᕗᑦ ᐊᒥᓱᐊᓗᖕᓂ ᐱᓕᕆᓂᐅᔪᓂ ᐊᒻᒪᓗ ᐱᐅᕗᖅ ᑕᑯᓂᕐᒥ ᑕᒪᒃᑭᓂ ᑎᑭᐅᑎᔭᐅᔪᓐᓇᕐᓂᐅᔪᓂ, ᐱᓗᐊᖅᑐᓂ ᐃᓄᖕᓄᑦ ᐊᕐᓇᓄᑦ," ᐅᖃᓚᐅᖅᐳᖅ. "ᐃᓗᐊᓂ ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ, ᑕᑯᓯᒪᕗᖓ ᐃᓄᖕᓂ ᐊᕐᓇᓂ ᓯᕗᓕᐅᖅᑎᐅᔪᓄᑦ ᐃᓂᐅᔪᓄᑦ, ᓴᓇᐅᒐᓕᕆᓂᐅᒃᐸᑦ ᐅᕝᕙᓘᓐᓃᑦ ᑲᑎᒪᔨᕐᔪᐊᖑᔪᓄᑦ. ᑕᑕᒥᑦᑎᐊᖅᐳᖓ ᑕᐃᒃᑯᓇᙵᑦ ᐊᒻᒪ ᒪᓕᒐᓱᐊᖅᐸᒃᑲ ᑐᕌᕐᓂᕆᔭᖏᓐᓂ."