ᐱᖓᓱᑦ ᐱᓕᕆᔩᑦ ᕕᓂᐲᒃᒥᐅᑕᑦ Tuxedo ᓂᕐᔪᑎᓄᑦ ᐋᓐᓂᐊᕐᕕᖕᒥ ᑲᖏᖅᖠᓂᓕᐊᓚᐅᖅᑐᑦ ᓂᕐᔪᑎᓂᒃ ᐃᖢᐊᖅᓴᐃᔭᖅᑐᖅᖢᑎᒃ ᓯᑎᐱᕆ 18-ᒥ 22-ᒧᑦ ᐊᕐᕌᒍᑕᒫᒃᑯᑦ ᑎᑭᑉᐸᒃᑲᒥᒃ.
ᐃᖢᐊᖅᓴᐃᔩᑦ ᐅᑯᐊᖑᓚᐅᖅᑐᑦ ᐃᖢᐊᖅᓴᐃᔨ ᔪᓇᔅ ᕙᑦᓴᓐ ᐊᒻᒪᓗ ᐃᓕᑕᕆᔭᐅᔾᔪᑎᓕᒃ ᓂᕐᔪᑎᓄᑦ ᖃᐅᔨᒪᔨᒋᔭᐅᔫᒃ ᔨᓐ ᑕᑭᓐ ᐊᒻᒪᓗ ᐃᐅᕆᓐ ᑖᒃ.
ᓂᕐᔪᑎᓂᒃ ᐱᓕᕆᐊᖃᕐᓂᐊᖅᑎᓪᓗᒋᑦ ᐃᓂᒋᔭᐅᔪᖅ ᐸᕐᓇᒃᑕᐅᓚᐅᖅᑐᖅ ᐲᔾ ᐴᕐᑦᒧᑦ ᐊᒻᒪᓗ ᔮᓐ Hᐃᒃᔅᒧᑦ ᓇᓄᖅ ᑐᔪᕐᒥᕕᖕᒥᐅᑖᒃ.
ᓂᕐᔪᑎᓂᒃ ᐃᖢᐊᖅᓴᐃᔨᑦ ᖃᐅᔨᒪᔨᒋᔭᐅᔪᑦ Tuxedo ᓂᕐᔪᑎᓄᑦ ᐋᓐᓂᐊᕐᕕᖕᒥᙶᖅᑐᑦ ᑲᖏᖅᖠᓂᓕᐊᖃᑦᑕᖅᓯᒪᓕᖅᑐᑦ 18-ᓂᒃ ᐅᑭᐅᓂᒃ.
"ᐊᓕᐊᓇᐃᑦᑎᐊᖅᑐᖅ ᐱᔨᑦᓯᕋᖅᖢᓂ ᐃᓄᖕᓂᒃ ᓂᕐᔪᑎᓂᒡᓗ ᓄᓇᓕᖕᒥ ᑕᐃᒪᐃᑦᑐᒥᒃ ᐃᑲᔪᕆᐊᖅᑕᐅᔭᕆᐊᖃᓪᓚᑦᑖᖅᑐᓂᒃ," ᑕᐃᒪᓐᓇ ᐅᖃᖅᖢᓂ ᕙᑦᓴᓐ.
ᓂᕐᔪᑎᓂᒃ ᐋᓐᓂᐊᖅᑐᓕᕆᔨᒃᑯᑦ ᑲᒪᓚᐅᖅᑐᑦ ᐃᒻᒪᖄ 85-ᓂᒃ ᓂᕐᔪᑎᓂᒃ ᐳᓚᕋᖅᑎᓪᓗᒋᑦ, ᐃᒻᒪᖄ ᓇᑉᐸᕆᔭᖏᑦ ᐃᕐᓂᔪᓐᓇᐃᓪᓕᑎᑕᐅᑉᓗᑎᒃ ᓯᖓᐃᓕᖅᓱᐃᔪᓐᓇᐃᓪᓕᑎᑕᐅᑉᓗᑎᒡᓘᓐᓃᑦ ᐱᓚᒃᑕᐅᑉᓗᑎᒃ ᐊᒻᒪᓗ ᓇᑉᐸᖏᑦ ᖃᓄᐃᙱᒃᑲᓗᐊᕐᒪᖔᑕ ᖃᐅᔨᓴᖅᑕᐅᑐᐃᓐᓇᖅᖢᑎᒃ ᑲᐱᔭᐅᔭᕆᐊᓖᓪᓗ ᑲᐱᔭᐅᕙᒃᖢᑎᒃ.
ᕙᑦᓴᓐ ᐅᖃᖅᖢᓂ ᓂᕐᔪᑎᓄᒡᒎᖅ ᐃᖢᐊᖅᓴᐃᔨᓂᒃ ᑲᒪᒋᔭᐅᔭᖅᑐᖅᓯᒪᑎᓪᓗᒋᑦ ᓂᕐᔪᑏᑦ ᖃᓄᐃᙱᓐᓂᖅᓴᐅᓂᐊᓕᕐᒥᔪᑦ ᑲᖏᖅᖠᓂᕐᒥ ᑎᑭᑕᐅᖏᓐᓇᖃᑦᑕᖅᑎᓪᓗᒋᓪᓗ 18-ᖑᓕᖅᑐᓂᒃ ᐅᑭᐅᓂᒃ.
ᐱᐅᓯᕚᓪᓕᕈᑎᒃᓴᒡᒎᖅ ᑕᐃᒪᐅᔪᑦ ᓱᓕ ᐃᕐᓂᔪᓐᓇᐃᓪᓕᑎᑦᑎᖃᑦᑕᕐᓂᒃᑯᑦ ᓯᖓᐃᓕᖅᑎᑦᑎᔪᓐᓇᐃᓕᑎᑦᑎᖃᑦᑕᕐᓂᒃᑯᓪᓗ ᑲᖏᖅᖠᓂᕐᒥ, ᑎᑭᑉᐸᒃᑐᑦ ᑕᐃᒪᓐᓇ ᐊᒥᓲᑎᒋᔪᓂᒃ ᑲᒪᖃᑦᑕᖅᑎᓪᓗᒋᑦ ᐊᕐᕌᒍᑕᒫᒃᑯᑦ.
Darrell Greer/NNSL photo
"ᑕᐃᒪᐅᔪᒃᓴᐅᔪᑦ ᓱᓕ ᐊᓯᖏᑦ ᕿᒻᒦᑦ - ᕿᒻᒥᖃᖅᑎᐅᔪᓪᓗ - ᐱᓕᕆᖃᑎᒋᓯᒪᙱᑕᖅᐳᑦ ᑲᒪᒋᓯᒪᙱᑕᖅᐳᓪᓗ ᑕᐃᒪᐃᑎᓪᓗᒍ ᕿᒻᒦᑦ ᐊᒥᓱᙳᖅᐸᓪᓕᐊᑐᐃᓐᓇᖅᑐᒃᓴᐅᔪᑦ ᓄᓇᓕᖕᒥ," ᑕᐃᒪᓐᓇ ᐅᖃᖅᖢᓂ ᕙᑦᓴᓐ.
ᓯᖓᐃᓕᕈᓐᓇᐃᓪᓕᑎᑕᐅᑎᓪᓗᒋᑦ ᐃᕐᓂᔪᓐᓇᐃᓪᓕᑎᑕᐅᑎᓪᓗᒋᓪᓗ ᓂᕐᔪᑎᑦ ᑎᒥᒥᒍᑦ ᐋᖅᑭᐅᒪᒍᑕᐅᓂᖅᓴᐅᓲᑦ, ᑕᐃᒪᓐᓇ ᐅᖃᖅᖢᓂ.
ᐃᕐᓂᔪᓐᓇᐃᓪᓕᑎᑦᑎᑉᓗᓂ ᕿᒻᒥᕐᒥᒃ ᐃᒡᓕᐊᒃᑯᑦ ᐋᓐᓂᐊᖅᑖᕈᓐᓇᐃᓪᓕᓂᖅᓴᐅᓲᑦ, ᐊᒻᒪᓗ ᐅᓗᕆᐊᓇᖅᑐᒦᙱᓐᓂᖅᓴᐅᓕᖅᐸᒃᖢᑎᒃ ᐃᕕᐊᖏᒃᑯᑦ ᐋᖅᑭᒍᓐᓇᐃᓪᓕᓇᔭᖅᑐᒥᒃ ᐋᓐᓂᐊᖅᑖᕋᔭᕐᓂᕐᒧᑦ, ᑕᐃᒪᓐᓇ ᐅᖃᖅᖢᓂ.
ᐊᖑᓴᓪᓗᕐᓂᒡᓕ ᕿᒻᒥᕐᓂᒃ, ᓯᖓᐃᓕᖅᑎᑦᑎᔪᓐᓇᐃᓪᓕᑎᑕᐅᔭᕌᖓᑕ ᐃᑲᔫᑕᐅᖃᑦᑕᖅᑐᖅ ᐃᒡᔪᒃᑯᑦ ᐋᖅᑭᒍᓐᓇᐃᓪᓕᔪᒥᒃ ᐋᓐᓂᐊᖅᑖᕋᔭᕐᓂᕐᒧᑦ, ᕿᓕᖅᓯᓇᒃᑯᓪᓗ ᐋᓐᓂᐊᖅᑖᕋᔪᙱᓐᓂᖅᓴᐅᓕᓲᑦ ᐊᒻᒪᓗ ᐃᑎᒃᑯᑦ ᐃᖢᐊᖏᓕᐅᕈᑎᖃᙱᓐᓂᖅᓴᐅᓕᓲᑦ. ᓈᒻᒪᒋᔭᐅᙱᑦᑐᓂᒡᓗ ᐊᖑᓴᓪᓘᑉᓗᓂ ᐋᓐᓂᐊᕆᔭᐅᕙᒃᑐᓂᒃ ᐱᑕᖃᙱᓐᓂᖅᓴᐅᓕᖅᐸᒃᖢᓂ.
ᐱᖦᖤᖏᓴᖅᑐᓂᒃ ᖃᐅᔨᔪᖃᖃᑦᑕᖅᓯᒪᖕᒪᑦ ᓂᕐᔪᑎᓂᒃ ᑲᖏᖅᖠᓂᕐᒥ ᐅᑭᐅᓂᒃ ᖄᖏᖅᓯᒪᔪᓂᒃ, ᑕᐃᒪᐃᒻᒪᑦ ᐱᒻᒪᕆᐊᓗᒃ ᓂᕐᔪᑏᑦ ᑲᐳᖅᑕᐅᓯᒪᖃᑦᑕᕆᐊᖃᕐᓂᖏᓐᓄᑦ ᑭᕙᓪᓕᕐᒥ.
ᕙᑦᓴᓐ ᐅᖃᖅᖢᓂ ᓯᕗᓪᓕᖅᐹᒃᑯᒡᒎᖅ ᓂᕐᔪᑎᒋᔭᐅᔪᖅ ᐃᓚᒌᖕᓄᑦ ᐋᓐᓂᐊᓕᕐᓂᖓᓄᑦ ᐃᓱᒪᒃᑯᑦ ᐱᔾᔪᑎᖃᕋᔭᖅᑐᒃᓴᐅᔪᖅ - ᖀᖅᓱᖃᑦᑕᕐᓗᓂ, ᓱᓪᓗᐊᙱᑦᑑᔭᕐᓗᓂ ᐊᒻᒪᓗ ᐱᒋᐊᒥᐊᖃᑦᑕᕐᓗᓂ - ᐊᒻᒪᓗ ᐊᓯᖏᑦ ᑕᐃᒪᐅᔪᑦ ᐃᓕᖅᑯᓯᖏᑦᑎᒍᑦ ᐊᓯᔾᔨᕈᑕᐅᓲᑦ.
ᐅᖃᖅᖢᓂ ᓂᕐᔪᑎᖃᖅᑐᕉᖅ ᖃᐅᔨᙱᑦᑐᓐᓇᖅᑐᖅ ᐆᒪᔪᖁᑎᖓ ᐋᓐᓂᐊᓕᕋᓗᐊᖅᐸᑦ ᑭᓯᐊᓂ ᐱᒋᐊᒥᐊᖃᑦᑕᓕᖅᐸᑦ.
"ᐃᒪᓐᓇᐃᑦᑐᓐᓇᖅᑐᖅ ᑎᕐᓕᐊᖅᓯᖃᑦᑕᕐᓗᓂ, ᑭᓯᐊᓂ ᐃᓛᓐᓂᒃᑯᑦ ᕿᒻᒥᓕᒃ ᖃᐅᔨᒪᓇᔭᖅᑐᖅ ᕿᒻᒥᖓ ᐊᒃᑐᖅᑕᐅᓯᒪᖕᒪᖔᑦ ᐆᒪᔪᕐᒧᑦ ᓲᕐᓗ ᑎᕆᒐᓂᐊᕐᒧᑦ.
"ᑕᐃᒪᐃᑦᑐᖃᖅᐸᑦ, ᕿᒻᒦᑦ ᑲᐱᔭᐅᑎᑦᑕᕆᐊᖃᕋᔭᖅᑕᐃᑦ ᐋᓐᓂᐊᓕᖁᓇᒍ. ᐱᖦᖤᖏᓴᙱᑦᑐᓐᓇᖅᑐᑦ ᕿᒻᒦᑦ ᑲᐱᔭᐅᓯᒪᖃᑦᑕᕈᑎᒃ," ᑕᐃᒪᓐᓇ ᐅᖃᖅᖢᓂ.
ᖃᐅᔨᓴᐃᓂᖃᖅᑎᓪᓗᒋᑦ ᓂᕐᔪᑎᓂᒃ, ᓂᕐᔪᑎᓂᒃ ᖃᐅᔨᒪᔨᐅᔪᖅ ᖃᐅᔨᓇᓱᖃᑦᑕᖅᑐᖅ ᐆᒪᔪᑦ ᑎᒥᒃᑯᑦ ᖃᓄᐃᙱᒃᑲᓗᐊᕐᒪᖔᑕ, ᑭᒍᑎᖏᑦ ᓴᓗᒪᖕᒪᖔᑕ, ᐋᓐᓂᐊᙱᑦᑑᔭᕐᒪᖓᑦ, ᒥᖅᑯᖓ ᐱᐅᔫᖕᒪᖔᑦ ᐊᒻᒪᓗ ᐅᕕᓂᖓ ᓈᒻᒪᖕᒪᖔᑦ, ᓯᐅᑎᖏᓪᓗ ᐊᒻᒪᓗ ᐃᔨᖏᑦ ᐋᓐᓂᐊᕐᓂᖃᙱᒃᑲᓗᐊᕐᒪᖔᑕ.
ᕙᑦᓴᓐ ᐅᖃᖅᖢᓂ ᐋᓐᓂᐊᓕᕈᑕᐅᔪᓐᓇᖅᑐᒡᒎᖅ ᕿᒻᒥᕐᓄᑦ ᑲᖏᖅᖠᓂᕐᒥ ᐱᙱᑎᑦᑐᓐᓇᖅᑐᑦ ᑲᐱᔭᐅᖃᑦᑕᕐᓗᑎᒃ ᐃᓚᖏᓪᓕ ᐋᓐᓂᐊᓕᕈᑕᐅᓲᑦ, ᓲᕐᓗ ᖁᐱᕐᕈᖅᑖᕐᓇᖅᑐᑦ, ᐱᙱᑎᑦᑐᓐᓇᕐᒥᔪᑦ ᖁᐱᕐᕈᖅᑖᖅᑕᐃᓕᒪᓂᕐᒧᑦ ᐃᑲᔫᑎᓂᒃ ᐱᑎᑕᐅᕙᒡᓗᑎᒃ.