ᐊᑯᓂᐅᓕᖅᑐᖅ, ᒪᓕᒃᓯᒪᒐᑦᑎᒍ ᓴᓇᔭᐅᕙᓪᓕᐊᓂᖓ ᑭᓐᖓᓂ ᕿᓐᓄᐊᔪᐊᑉ ᐱᖅᑯᓯᕐᓂᒃ ᑕᑯᒃᓴᐅᑎᑦᑎᕕᒃᓴᖅ, ᑕᖅᑭᐅᓚᐅᖅᑐᒥ ᑮᓇᐅᔭᓂᒃ ᑲᑎᑦᓱᐃᔪᑕᐅᓚᐅᕐᒪᑦ ᐊᑭᑦᑐᖅᓴᐅᑎᓪᓗᑎᒃ ᓂᐅᕕᖅᑕᐅᑎᑦᑎᑎᓪᓗᒋᑦ ᑐᕌᓐᑐᒥ ᐊᑭᖓᑕ ᐃᓚᖓᓂ $3-ᒥᓕᐊᓐᑖᓚᒧᑦ ᑎᑭᓪᓗᒍ ᓯᕗᓪᓕᖅᐸᒥ ᓄᓇᓕᖕᒥᐅᑦ ᐊᑭᓖᒋᐊᖃᕐᒪᑕ ᑖᓐᓇ ᐃᒡᓗ ᐱᐊᓂᒃᑕᐅᔪᓐᓇᕐᓂᐊᕐᒪᑦ.
ᑕᐃᓐᓇ ᐃᓅᔪᓐᓃᖅᑐᖅ ᑎᒻ ᐱᑦᓯᐅᓛᖅ, ᓴᓇᔭᖏᑦ ᐊᒃᓱᐊᓗᒃ ᐱᒃᑯᒥᒋᔭᐅᓚᐅᖅᑐᑦ ᑕᐃᓱᒪᓂ ᐃᓅᑎᓪᓗᒍ ᓱᓕ ᑭᓯᐊᓂᓕ ᐊᕐᕌᓂ ᑎᓯᐱᕆᒥ ᐃᓅᔪᓐᓃᓚᐅᕐᒪᑦ, ᐃᓚᖓᓂᒃ ᐊᑭᓖᓯᒪᓕᖅᑐᖅ ᑭᖑᕚᒥᓄᑦ ᑐᓂᓯᓪᓗᓂ ᐃᓅᔪᓐᓃᕋᓗᐊᖅᖢᓂ, ᑕᓪᓕᒪᑦ ᓴᓇᐅᒐᖏᑦ ᓂᐅᕕᖅᑕᐅᓚᐅᕐᒪᑕ ᕕᕼᐃᑯᓐᓂ ᓴᓇᐅᒐᓂᒃ ᐊᑭᑦᑐᕋᐅᑎᔪᓄᑦ ᓂᐅᕕᖅᑕᐅᑎᑦᑎᓪᓗᒋᑦ.
ᐊᔾᔨᒌᖏᑦᑐᓂᒃ ᓴᓇᖅᑯᑎᓂᒃ ᐊᑐᖅᖢᓂ ᓴᓇᕙᔪᖕᒪᑦ, ᑎᑎᕋᐅᑎᑐᐃᓐᓇᓄᑦ ᑎᑎᖅᑐᕋᖅᑕᕕᓂᖏᑦ ᐊᕐᕌᒍᑕᒫᑦ ᓂᐅᕕᐊᒃᓴᐅᖃᑦᑕᖅᐸᔪᖕᒪᑕ ᑭᓐᖓᒥᐅᑦ ᓴᓇᖑᐊᖅᑎᖏᓐᓄᑦ ᑲᑎᖅᓱᖅᑕᐅᓯᒪᔪᓂ ᐃᓚᓕᐅᑎᔭᐅᓪᓗᑎᒃ, ᐱᑦᓯᐅᓛᖅ ᐃᑲᔪᖅᓴᓚᐅᕐᒪᑦ ᑖᓱᒥᖓ ᐃᓄᐃᑦ ᐱᖅᑯᓯᖏᓐᓂᒃ ᑕᑯᒃᓴᐅᑎᑦᑎᕕᒃᓴᒥᒃ ᑭᓐᖓᓂ - ᐱᓗᐊᖑᐊᖅᑐᒥᒃ ᐊᑭᓖᔪᑎᒃᓴᓂᒃ ᑲᑎᖅᓱᐃᔪᓂ ᐃᓚᐅᓚᐅᒪᑦ - ᓴᓇᓚᐅᑕᖓ ᑭᖑᓪᓕᖅᐸᒥ 4’x8’-ᒥᒃ ᐊᒃᑎᒋᓂᖃᖅᑐᖅ ᑎᑎᖅᑐᕋᒐᖅ ᑐᒃᑐᖑᐊᖅ ᓯᑯᒥ ᐊᔪᓕᖅᓯᒪᖑᐊᖅᑐᖅ. ᐊᔾᔨᖑᐊᑐᐃᓐᓇᖓ ᑕᑯᓪᓗᒍ ᐅᐊᑲᓪᓚᐅᔪᒥᓇᖅᑐᖅ ᐊᖏᔪᐊᓘᑎᓪᓗᒍᓕ ᐱᐅᓗᐊᓚᐅᖅᑐᖅ. ᐊᓯᖏᓐᓂᒃ ᒥᑭᓐᓂᖅᓴᓂᒃ ᓴᓇᐅᒐᖏᓐᓂᒃ ᑕᑯᔭᖅᑐᖃᑦᑕᖅᓯᒪᒐᒪ, ᐊᖏᔪᐊᓘᑎᓪᓗᒍ ᐱᒃᑯᒥᓇᖅᑐᒃᓴᐅᓚᐅᖅᐳᖅ ᑎᑎᖅᑐᕋᒐᖓ.
ᐱᑦᓯᐅᓛᖅ ᐊᓱᐃᓛᒃ ᒫᓐᓇ ᑕᖃᐃᖅᓯᕈᓐᓇᖅᓯᕗᖅ ᖃᐅᔨᒪᓗᓂ ᕿᓚᓈᕆᔭᖓ ᐱᖅᑯᓯᕐᓂᒃ ᑕᑯᒃᓴᐅᑎᑦᑎᕕᒃᓴᖅ ᓴᖅᑭᑉᐸᓪᓕᐊᓕᕐᒪᑦ, ᑲᑎᓱᒋᑦ $100,000-ᓂᒃ ᑲᑎᖅᓱᐃᔪᑦ ᑐᓂᔭᐅᓚᐅᕐᒪᑕ ᐅᓐᓄᐊᕐᒥ ᐊᑕᐅᓯᕐᒥ, ᐃᓚᐅᑎᓪᓗᒍ $18,000 ᐊᓯᖏᓐᓂᒃ ᑎᑎᖅᑐᕋᖏᓐᓂᒃ ᓂᐅᕕᖅᑕᐅᑎᑦᑎᔪᑦ.
ᐱᖅᑯᓯᕐᓂᒃ ᑕᑯᒃᓴᐅᑎᑦᑎᔪᑦ ᓴᓇᐅᒐᐃᑦ, ᑕᒪᐃᑕ ᐱᓗᐊᖑᐊᖅᑐᒥᒃ ᓄᓇᕗᒥᐅᓂᑦ, ᐊᑐᕐᓂᖃᖅᑐᒻᒪᕆᐅᖕᒪᑕ ᓄᓇᓕᖕᓂ ᑮᓇᐅᔭᒃᓴᐅᑕᐅᓪᓗᑎᒃ. ᓄᓇᒥᑕᔭᓂᒃ ᐲᔭᐃᔪᓂᑦ ᑮᓇᐅᔭᒃᓴᐅᑕᐅᓂᖏᓐᓂᑦ ᒐᕙᒪᑎᒃᑯᓐᓂᓗ ᐃᖅᑲᓇᐃᔮᓂᑦ ᐊᖑᒻᒪᑎᖏᒃᑲᓗᐊᖅᖢᑎᒃ ᑭᓯᐊᓂᓕ ᐊᒥᓱᓄᑦ ᓄᓇᓕᖕᓂ ᓴᓇᖑᐊᖅᑎᓄᑦ ᑕᐃᒪᖓᓂᑦ ᐃᓅᔪᑎᒋᔭᐅᓪᓗᑎᒃ ᑮᓇᐅᔭᒃᓴᐅᑕᐅᖏᓐᓇᐅᔭᕐᒪᑕ ᐱᖅᑯᓯᑦᑎᓐᓂᒃ ᓴᓇᖑᐊᒐᕗᑦ.
ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖓᓂᒥᐅᑦ ᑕᑯᑎᑦᑎᓯᒪᓕᕐᒪᑕ ᖃᓄᑎᒋ ᐃᓄᖕᓄᑦ ᐱᖅᑯᓰᑦ ᐊᑐᕐᓂᖃᕐᓂᖏᓐᓂᒃ ᓄᓇᓕᖕᒥᐅᓄᑦ, ᐃᓕᓯᓪᓗᑎᒃ $5-ᒥᓕᐊᓐᑖᓚᓂᒃ ᐊᑭᓖᔪᑕᐅᓂᐊᖅᑐᓂᒃ ᓄᓇᕗᒥ ᐱᖅᑯᓯᕐᓂᒃ ᑕᑯᒃᓴᐅᑎᑦᑎᕕᒃᓴᒥᒃ ᐃᒡᓗᓕᐅᕈᑕᐅᓂᐊᖅᑐᒥᒃ. ᓄᓇᕗᑦ ᒐᕙᒪᖓ ᒫᓐᓇ $1-ᒥᓕᐊᓐᑖᓚᓂᒃ ᐊᕐᕌᒍᑕᒫᑦ ᐊᑭᓖᖃᑦᑕᕐᒪᑕ 140,000-ᓄᑦ ᓴᓇᐅᒐᓄᑦ ᓯᕐᓗᐊᒦᑎᑕᐅᔪᑦ ᓄᓇᓯᐊᒥᐅᑦ ᐱᖅᑯᓯᕐᓂᒃ ᑕᑯᒃᓴᐅᑎᑦᑎᕕᐊᓂ ᖃᓪᓗᓈᓂᓗ ᐸᐸᑕᐅᔪᓂ. ᑕᒪᑐᒪᓂ ᐱᕝᕕᒃᓴᖃᓕᕋᑦᑕ ᓄᓇᑦᑎᓐᓂ ᓴᓇᐅᒐᑦᑎᓐᓂᒃ ᑕᑯᒃᓴᐅᑎᑦᑎᕕᒃᓴᖃᕈᓐᓇᖅᓯᖕᒪᑕ.
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ ᑕᖅᑭᐅᓚᐅᖅᑐᒥ ᓇᓕᒧᑕᖓᓂᒃ QIA-ᑯᑦ ᑐᓂᓯᓂᐊᕐᓂᕋᓚᐅᕐᒪᑕ, ᐃᒪᐃᓕᓪᓗᑎᒃ $5-ᒥᓕᐊᓐᑖᓚᒥᒃᑕᐅᖅ ᐃᓚᓕᐅᑎᔭᐅᓂᐊᖅᑐᒥᒃ $70-ᒥᓕᐊᓐᑖᓚᓄᑦ ᑎᑭᓪᓗᒍ $90-ᒥᓕᐊᓂᒃ ᐊᑭᖃᕐᓂᐊᖅᑐᒧᑦ ᓴᓇᔭᐅᔪᑎᖓᓄᑦ.
ᑭᕙᓪᓕᕐᒥᐅᑦ ᕿᑎᕐᒥᐅᓪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓇᖕᒥᓂᖃᖅᑐᑦ ᓄᓇᕗᒥ ᐃᓕᓯᖃᑕᐅᒍᓐᓇᕐᒥᒃᐸᑕ, ᒐᕙᒪᑎᒃᑯᓐᓄᑦ ᑐᓄᖓᔭᐅᔪᓐᓇᐃᓪᓕᓂᐊᖅᑐᑦ ᑕᐃᒫᑎᒋ ᐊᒃᑎᒋᔪᓂᒃ ᑮᓇᐅᔭᓂᒃ ᑲᑎᖅᓱᐃᓯᒪᔪᑦ ᐱᖅᑯᓯᕐᓄᑦ ᑕᑯᒃᓴᐅᑎᑦᑎᕕᒃᓴᒥᒃ ᓴᓇᔪᑎᒃᓴᓂᒃ, ᐅᖃᐅᓯᐅᓚᐅᖅᓯᒪᖕᒪᑦ ᑖᓐᓇ ᓯᕗᓪᓕᖅᐹᒥ 2001-ᒥ ᑕᐃᓱᒪᓂ ᐃᓄᐃᑦ ᐱᖅᑯᓯᓕᕆᔨᖏᓐᓄᑦ ᐊᖓᔪᖅᑳᕆᔭᐅᓚᐅᖅᓯᒪᔪᒧᑦ ᓴᓇᔭᐅᓂᐊᕐᓂᕋᖅᑕᐅᓪᓗᓂ 2013-ᒥ. ᑭᓯᐊᓂᓕ ᑕᐃᒪᖓᓂᑦ ᑮᓇᐅᔭᑭᒃᓴᐃᓐᓇᒧᑦ ᒐᕙᒪᑎᒃᑯᑦ ᑕᒪᑐᒥᖓ ᑲᔪᓯᑎᑦᑎᒍᓐᓇᐃᓪᓕᓯᒪᖕᒪᑕ.
ᑭᖑᓪᓕᕆᓂᐊᖅᑕᖏᑦ ᒐᕙᒪᑏᑦ ᐋᕿᒋᐊᖅᓯᓗᑎᒃ ᓯᕗᓪᓕᐅᑎᑕᐅᖁᔭᒥᓂᒃ ᓂᕈᐊᖅᓯᒍᓐᓇᕐᓂᐊᓕᕐᒪᑕ ᓄᓇᕗᒥ ᓴᓇᔭᐅᓂᐊᖅᑐᓂᒃ ᒫᓐᓇᑦᑎᐊᖑᓂᐊᖅᑐᖅ ᐱᖑᐊᕈᓯᕐᓄᑦ ᑕᕐᕆᔭᕐᕕᖕᒥᒃ ᐃᓕᖅᑯᓯᑦᑎᓐᓂᒃ ᑕᑯᒃᓴᐅᑎᑦᑎᕕᒃᓴᒥᒃ ᓴᖅᑭᑦᑎᔪᓐᓇᖅᓯᖕᒪᑕ. ᐱᖅᑯᓯᑦᑎᑐᑦ ᖁᕕᐊᓲᑎᖃᖃᑦᑕᕐᓗᑕ ᐃᓕᖅᑯᓯᑦᑎᓐᓂᒃ ᐱᐅᖅᓱᐊᕆᔪᑎᒋᔪᓐᓇᕋᑦᑎᒍ, ᑕᑯᒃᓴᐅᑎᑦᑎᕕᖃᕐᓗᑕ ᐅᖃᐅᓯᑦᑎᓐᓄᓪᓗ ᐃᓕᖅᑯᓯᑦᑎᓐᓄᓪᓗ ᓂᖅᑐᕈᑕᐅᔪᑦ ᑕᒪᑐᒪᓂ ᐱᒻᒪᕆᐅᓕᕐᒪᑕ ᓴᐳᑎᓇᓱᐊᕆᐊᖃᓕᕋᑦᑎᒍ ᓄᓇᕗᒥ.
ᓄᓇᕗᒥ ᐃᒡᓗᓕᐅᖅᑕᐅᒋᐊᓖᑦ ᓄᓇᓕᖕᓂ ᐊᒃᓱᑲᓪᓚᐅᒐᓗᐊᖅᑎᓪᓗᒋ ᑕᒪᐃᑕ, ᑮᓇᐅᔭᑭᒃᓴᒧᑦ ᐊᖑᒻᒪᑎᔪᓐᓇᖏᓐᓇᑦᑎᒍ ᒫᓐᓇ ᐃᒡᓗᖁᑎᑦᑎᓐᓂᒃ ᐊᒥᒐᖅᖠᓗᐊᖅᖢᑕ ᓄᓇᓕᓕᕆᔪᑎᒃᓴᓂᒃ, ᒪᑯᓂᖓ ᐊᖅᑯᑎᓂᒃ, ᓱᓇᒃᑯᑖᓂᒃᓗ ᓄᓇᓕᖕᓂ ᐱᑕᖃᕆᐊᓕᖕᓂᒃ ᐃᖏᕐᕋᔪᑏᑦ ᐋᕿᐅᒪᑎᑕᐅᖏᓐᓇᕆᐊᖃᕐᒪᑕ ᑎᑭᐅᒪᔪᑦ ᓄᓇᓕᑦᑎᓐᓄᑦ. ᑭᓯᐊᓂᓕ ᑕᒪᒃᑯᐊᖑᒐᓗᐊᖅᑎᓪᓗᒋᑦ ᐃᖅᑲᐅᒪᐃᓐᓇᐅᔭᕆᐊᖃᕋᑦᑕ ᖃᖓᑐᐃᓐᓇᖅ ᐱᖅᑯᓯᑦᑎᓐᓂᒃ ᑕᑯᒃᓴᐅᑎᑦᑎᕕᒃᓴᒥᒃ ᐃᒡᓗᒥᒃ ᓯᕗᓂᕆᓂᐊᖅᑕᑦᑎᓐᓂ ᐱᑕᖃᕆᐊᖃᕈᒫᕐᒪᑦ ᓄᓇᓕᖕᒥᐅᓄᑦ ᐸᖅᑭᔭᐅᔪᓐᓇᖅᑐᒥᒃ.
ᐃᓄᐃᑦ ᑎᒥᖁᑎᖏᑦ ᒫᓐᓇ ᐱᒋᐊᓪᓚᒃᑎᑦᑎᔪᓐᓇᖅᓯᖕᒪᑕ ᐃᒡᓗᓕᐅᕈᒪᔪᓂᒃ. ᑕᒪᑐᒪᓂ ᒐᕙᒪᑎᕗᑦᑕᐅᖅ ᐃᒡᓗᓕᐅᕆᐊᖃᕐᒪᑕ ᐱᖅᑯᓯᑦᑎᓐᓂᒃ ᖁᕕᐊᓱᑎᖃᕐᓗᑎᒃ ᑕᑯᒃᓴᐅᑎᑦᑎᕕᐅᓂᐊᖅᑐᓂᒃ ᐃᓅᓯᖅᐳᑦ ᐊᓯᐅᓚᐅᖏᓐᓂᖏᓐᓂ.