Skip to content

ᐱᒡᒍᓴᐅᔾᔪᐊᕐᓂᖅ ᓯᓚᑐᐃᓐᓇᐅᑉ ᒥᒃᓵᓄᑦ

ᐃᓕᓐᓂᐊᖅᑐᑦ ᖃᐅᔨᓴᐃᔪᓐᓇᓚᐅᖅᑐᑦ ᓯᓚᑐᐃᓐᓇᕐᒥᒃ Actua-ᑯᑦ ᖃᐅᔨᓴᐃᓂᖃᖅᑎᓪᓗᒋᑦ, ᑕᒪᓐᓇ ᐃᓕᓐᓂᐊᕈᑎ ᓄᑖᓂᒃ ᓴᖅᑭᑉᐸᓪᓕᐊᔪᓂᒃ, ᑎᑎᕋᐅᔭᕈᓐᓇᕐᓂᕐᒧᑦ ᐊᑐᖅᑕᐅᕙᓪᓕᐊᔪᓂᒃ ᐊᒻᒪᓗ ᓈᓴᐅᓯᕆᓂᕐᒥᒃ (STEM) ᐱᒡᒍᓴᐅᔾᔪᐊᕐᓂᖃᖅᖢᑎᒃ ᑑᒑᓕᒃ ᐃᓕᓐᓂᐊᕐᕕᒡᔪᐊᕐᒥ ᓇᐅᔮᓂ, ᓄᕕᐱᕆ 16-ᒥ.

Student Adriane Tegumiar works on her Mars Rover during the Acura STEM Challenge at Tuugaalik High School in Naujaat on Nov. 16, 2018. Photo courtesy Julia MacPherson
Student Adriane Tegumiar works on her Mars Rover during the Acura STEM Challenge at Tuugaalik High School in Naujaat on Nov. 16, 2018. Photo courtesy Julia MacPherson

ᑕᒪᓐᓇ ᐱᓕᕆᐊᖑᔪᖅ ᑲᒪᒋᔭᐅᓚᐅᖅᑐᖅ ᐃᓕᓐᓂᐊᖅᑎᑦᑎᔨᒧᑦ ᒍᕆᒃ ᑐᕋᓐᑦᒧᑦ ᐊᒻᒪᓗ ᐃᓕᓐᓂᐊᕐᕕᖕᒥ ᐃᓱᒪᑕᕐᒧᑦ ᐊᐳᕆ ᐳᓪᑦᒧᑦ, ᑕᒡᕙᓂ ᐅᑭᐅᒥ STEM-ᒥᒃ ᐃᓕᓐᓂᐊᕈᑎᖃᖅᑎᓪᓗᒋᑦ ᓯᓚᑐᐃᓐᓇᕐᒥᒃ ᖃᐅᔨᓴᐃᓂᕐᒧᑦ.
ᐃᓕᓐᓂᐊᕐᓂᓖᑦ 7-ᒥ ᐊᒻᒪᓗ 8-ᒥ ᓴᓇᓇᓱᓚᐅᖅᑐᑦ ᓴᕕᒐᐅᔭᒃᑯᑦ ᐃᓄᙳᐊᕐᒥ Canadarm-ᒥ, ᑕᐃᑉᑯᐊ ᐃᓕᓐᓂᐊᕐᓂᓖᑦ 9-ᒥ 12-ᒧᑦ ᐃᖏᕐᕋᔾᔪᑎᙳᐊᕐᒥ Mars rover-ᒥ ᓴᓇᓇᓱᒃᑎᓪᓗᒋᑦ.
ᓇᐅᔮᓂ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑎᑦᑎᓯᒪᔪᑦ Actua STEM-ᑯᑦ ᐱᒡᒍᓴᐅᔾᔪᐊᕈᑎᒥᒃ ᐊᒻᒪᓗ ᑭᕙᓪᓕᕐᒥ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐃᓕᓐᓂᐊᕈᑎᒥᒃ SET-ᖑᓂᕋᖅᑕᐅᔪᒥ (ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ, ᑎᑎᕋᐅᔭᕈᓐᓇᕐᓂᕐᒧᑦ ᐊᑐᖅᑕᐅᕙᓪᓕᐊᔪᓂᒃ ᐊᒻᒪᓗ ᓄᑖᑦ ᓴᖅᑭᑉᐸᓪᓕᐊᔪᑦ ᐱᔾᔪᑎᒋᑉᓗᒋᑦ) ᐱᒡᒍᓴᐅᔾᔪᐊᕈᑎ ᐊᕐᕌᒍᑕᒫᒃᑯᑦ.
ᐳᓪᑦ ᐅᖃᖅᖢᓂ ᐃᓕᓐᓂᐊᖅᑐᒡᒎᖅ ᓴᓇᔪᑦ ᐃᖏᕐᕋᔾᔪᑎᙳᐊᕐᒥ ᐊᑐᕆᐊᖃᓚᐅᖅᑐᑦ ᒪᕐᕉᖕᓂᒃ ᐃᓚᒃᓴᖏᓐᓂᒃ ᑕᓕᖏᓐᓂᒃ ᐊᐅᓚᑎᑦᑎᓂᐊᕐᓗᑎᒃ ᓴᓇᔭᒥᓂᒃ ᐊᑕᐅᓯᕐᒥᒃ ᒦᑕᒧᑦ
ᐅᖃᖅᖢᓂ ᑕᓕᖓᒎᖅ ᑕᑭᓂᖅᓴᐅᑎᓪᓗᒍ ᐊᑑᑎᖃᕐᓂᖅᓴᐅᓚᐅᖅᑐᖅ, ᑕᑭᓂᖅᐹᒥ ᑕᓕᖃᖅᑐᖅ ᐱᐊᓂᒃᓯᑉᓗᓂ ᐱᓕᕆᐊᒥᒃ ᑕᑭᓂᖃᖅᑐᒃᑯᑦ 68 ᓯᓐᑕᒦᑕᓂᒃ.
"ᐃᓕᓐᓂᐊᖅᑐᑦ ᐃᒥᕈᑎᓂᒃ ᓱᑉᓗᓕᖕᓂᒃ ᐊᑐᕈᓐᓇᓚᐅᖅᑐᑦ, ᕿᔪᖕᓂᒡᓗ ᓇᐃᑦᑐᓂᒃ, ᐊᒻᒪᓗ ᓂᐱᐅᑎᓂᒃ ᑕᓕᓕᖅᑐᐃᓂᐊᕐᓗᑎᒃ," ᑕᐃᒪᓐᓇ ᐅᖃᖅᖢᓂ ᐳᓪᑦ.
"ᓴᓇᔭᕆᐊᖃᖅᖢᑎᒃ ᐃᒥᕈᑎᐅᔮᖅᑐᒥᒃ, ᑲᑎᑎᓪᓗᒋᑦ ᐃᒥᕈᑎᙳᐊᖅ ᐊᒻᒪᓗ ᑕᓕᖓ ᐊᒻᒪᓗ ᓅᓪᓗᒍ ᐊᑕᐅᓯᕐᒥᒃ ᒦᑕᒥᒃ.
ᐅᖃᖅᖢᓂ ᐃᓕᓐᓂᐊᕐᓂᓖᒡᒎᖅ 8-ᒥᒃ ᐊᔪᙱᓐᓂᖅᐹᖑᓚᐅᖅᑐᑦ ᒪᕐᕉᖑᑎᓪᓗᒋᑦ ᐃᓕᓐᓂᐊᕐᓂᓖᑦ.
ᐳᓪᑦ ᐅᖃᖅᖢᓂ ᐃᖏᕐᕋᔾᔪᑎᙳᐊᒃᑯᑦ, ᐃᓕᓐᓂᐊᖅᑐᑦ ᑐᓂᔭᐅᓚᐅᖅᑐᑦ ᕿᔪᖕᓂᒃ ᑕᑭᔪᓂᒃ ᐊᒻᒪᓗ ᓴᓇᔪᓐᓇᖅᖢᑎᒃ ᕿᑐᑦᑐᕋᐅᔭᓂᒃ ᑐᙵᕕᖃᖅᖢᓂ ᐊᒻᒪᓗ ᐊᒃᓴᓗᐊᖃᖅᖢᒍ.
ᐊᐅᓚᑕᐅᔪᓐᓇᖃᑦᑕᓚᐅᖅᑐᕉᖅ ᑲᓈᖓ ᓄᕕᖅᓵᒃᓴᒧᑦ ᐃᓕᓯᓯᒪᕝᕕᒋᑉᓗᒍ ᐊᒻᒪᓗ ᐊᑐᖅᖢᑎᒃ ᐊᕕᙵᕐᓄᑦ ᑮᔭᖃᑦᑕᓂᒃ ᓴᑉᑯᓐᓂᐊᕐᓗᒍ.
"ᓄᕕᖅᓵᒃᓴᖅ ᐲᔭᖅᐸᓪᓕᐊᓕᖅᑎᓪᓗᒍ, ᐃᖏᕐᕋᔾᔪᑎᙳᐊᖅ ᓯᕗᒻᒧᐊᒃᐸᓪᓕᐊᓕᓲᖅ," ᑕᐃᒪᓐᓇ ᐅᖃᖅᖢᓂ. "ᐅᖓᓯᖕᓂᖅᐹᒃᑯᑦ ᐃᖏᕐᕋᔪᖃᓚᐅᖅᑐᖅ ᑕᐃᒪᐃᑦᑐᓕᐊᖑᓯᒪᔪᒃᑯᑦ 88 ᓯᓐᑕᒦᑕ.
"ᐃᓚᖏᑦ ᓄᑕᖅᑲᑦ ᐃᖏᕐᕋᔾᔪᑎᙳᐊᓕᐊᕆᔭᖏᑦ ᐋᖅᑭᐅᒪᑦᑎᐊᖃᑦᑕᓚᐅᙱᒻᒪᑕ, ᐊᒻᒪᓗ ᐅᔾᔨᕐᓇᖅᓯᑲᐅᑎᒋᑉᓗᓂ ᐊᒃᓴᓗᐊᕆᔭᐅᔪᑦ ᒥᑭᓐᓂᖅᓴᐅᔭᕌᖓᑕ ᐊᒧᓯᑦᑎᐊᕐᓂᖅᓴᐅᖃᑦᑕᓚᐅᖅᑐᑦ ᐊᒻᒪᓗ ᐊᐅᓪᓛᑦᑎᐊᖅᑎᑦᑎᓂᖅᓴᐅᕙᒃᖢᑎᒃ, ᐱᓗᐊᖅᑐᒥ ᓴᓂᓕᕇᒃᑎᑦᑎᑎᓪᓗᒋᑦ ᐊᒃᓴᓗᐊᓂᒃ ᓂᐱᑎᖅᖢᒋᓪᓗ.
ᐳᓪᑦ ᐅᖃᓚᐅᖅᑐᖅ ᑕᒪᕐᒥᒎᖅ ᐃᓕᓐᓂᐊᕈᑕᐅᔫᒃ STEM-ᑯᑦ ᐱᒡᒍᓴᐅᔾᔪᐊᕈᑏᑦ ᐊᒻᒪᓗ SET-ᑯᑦ ᐱᒡᒍᓴᐅᔾᔪᐊᕈᑎᐅᔪᖅ ᖁᕕᐊᒋᔭᐅᑦᑎᐊᓲᑦ ᐃᓕᓐᓂᐊᖅᑐᓄᑦ.
ᐅᖃᖅᖢᓂ ᑕᒪᕐᒥᒎᖅ ᐃᓕᓐᓂᐊᖅᑐᑦ ᖁᕕᐊᒋᔭᖃᑦᑎᐊᓚᐅᖅᑐᑦ ᐅᑭᐅᖑᔪᖅ ᐱᓕᕆᐊᖑᔪᓂᒃ ᐊᒻᒪᓗ ᐱᓕᕆᐊᖃᖅᖢᑎᒃ Canadarm-ᒥᒃ ᐊᒻᒪᓗ Mars rover-ᒥᒃ.
"ᑕᒪᓐᓇ ᐱᓕᕆᓗᓂ ᐃᓕᑦᑎᓐᓇᖅᑐᖅ ᐊᒻᒪᓗ ᐃᓱᒪᒃᓴᖅᓯᐅᕐᓇᕆᐊᖃᖅᑐᖅ, ᑕᐃᒪᐃᒻᒪᑦ ᐃᓕᓐᓂᐊᖅᑐᑦ ᐱᓕᕆᔪᒪᑦᑎᐊᖅᑑᔭᓚᐅᖅᑐᑦ ᐱᒡᒍᓴᐅᔾᔪᐊᕐᓂᒃᑯᑦ.
"ᐃᓕᓐᓂᐊᖅᑐᖁᑎᕗᑦ ᐃᖕᒥᓂᒃ ᐱᓕᕆᔪᒪᒃᑲᐅᖕᒪᑕ ᐃᖕᒥᓂᒡᓗ ᐃᓱᒪᒃᓴᖅᓯᐅᕈᑎᖃᕈᓐᓇᖅᑎᓪᓗᒋᑦ ᐱᓕᕆᔪᒪᑦᑎᐊᖅᐸᒃᖢᑎᒃ."