ᓄᓇᕐᔪᐊᖅ ᖁᙱᐊᖅᑎᓪᓗᒍ ᓅᑦᕋ-ᑕᐃᒻ ᐱᐊᕆᔅᒥ ᐃᑭᓚᐅᖅᐳᖅ.
ᐃᒃᓯᕋᕐᔪᐊᕐᒥᐅᑕᐃᑦ ᐊᒻᒪ ᐊᓯᖏᓐᓂ ᐅᒃᐱᖅᑐᐃᑦ ᐸᕐᓇᒃᐸᓪᓕᐊᑎᓪᓗᒋᑦ ᒪᑭᕝᕕᐊᓄᑦ, ᐅᖃᐅᓯᕆᔭᐅᕗᖅ ᐅᒃᐱᖅᑐᓄᑦ ᐱᓇᓱᐊᕈᓯᕐᒥ ᑲᒪᓇᖅᑐᓕᓂᐅᔪᒥ ᐃᒡᓗᕐᔪᐊᖅ ᓄᖑᓪᓚᕆᓚᐅᙱᓐᓂᖓᓂ.
ᑕᕝᕙᓂ ᑎᑎᕋᕐᓂᐅᔪᒥ, ᓱᔪᐃᓂᐅᓚᐅᖅᑐᖅ ᑭᒡᓕᖃᓚᐅᖅᐳᖅ ᓄᖅᑲᖅᓯᕋᐅᔭᕐᒧᑦ ᖃᐅᔨᒪᔭᐅᕐᔪᐊᖅᑐᒧᑦ, ᐃᒡᓘᑉ ᖁᓕᖓᓂ ᐊᒻᒪ ᐃᓚᖓᓐᓂ ᐃᓂᐅᔪᓂ ᐊᑖᓂ. ᐃᒡᓗᕐᔪᐊᑉ ᓵᖓ ᐊᒻᒪ ᐊᖏᓛᖓ ᑕᖅᓯᖅᓱᖅᓯᒪᔪᖅ ᐃᒐᓛᖓ ᓴᐳᔾᔭᐅᔫᔮᖅᑐᑦ.
ᖁᔭᓐᓇᒦᒃ ᓄᓇᓕᖅᐸᐅᔭᐅᑉ 400-ᖑᔪᓂ ᖃᑦᑎᕆᔨᐅᔪᓄᑦ, ᐃᓚᖃᖅᑐᒥ ᑕᐃᒃᑯᓄᖓ ᐋᖅᑭᒃᓱᓚᐅᖅᑐᓂ ᐃᓄᖕᓂ ᑐᑭᓕᐊᕐᓂᐅᔪᒥ ᐱᓕᕆᐊᖑᓪᓗᓂ ᐱᐊᕆᔅᒥ ᖃᑦᑎᕆᔨᒃᑯᑦ ᑐᒃᓯᐊᕐᕕᖕᒥᐅᑕᐅᔪᒥ ᓴᐳᔾᔨᓇᓱᕐᓂᖏᓐᓄᑦ ᐅᑎᖅᑎᒐᒃᓴᐅᙱᑦᑐᓂ ᐱᖁᑎᑐᖃᕐᓂᑦ, ᐃᓚᖃᖅᑐᒥ ᐅᒃᐱᕆᔭᐅᔪᒥ ᑲᐱᓐᓇᖅᑐᓕᖕᒥ ᓇᓴᕆᓚᐅᖅᑕᖓᓂ ᔩᓱᓯᐅᑉ ᓂᐊᖁᖓᓄᐊᖅᑕᐅᓚᐅᖅᓯᒪᔪᒥ ᓴᓐᓂᖓᔪᒧᑦ ᑭᑭᐊᒃᑐᖅᑕᐅᑎᓪᓗᒍ.
ᐃᑲᕐᕋᒐᓴᓂ, ᐱᕐᔪᐊᖑᔪᑦ ᐅᐃᕖᓂᑦ ᑲᑐᔾᔨᖃᑎᒌᖑᔪᑦ ᐊᖏᖅᓯᒪᓂᖃᓚᖅᐳᑦ ᕼᐊᓐᓇᓚᖏᓐᓂ ᒥᓕᐊᓐᓂ ᑮᓇᐅᔭᓂᒃ ᓴᓇᔭᐅᒃᑲᓐᓂᕐᓂᖓᓄᑦ ᐃᒡᓗᕐᔪᐊᒥ, ᐊᒻᒪ ᐅᓄᕐᓂᖅᓴᐅᔪᓂ $1 ᐱᓕᐊᓐᓂ ᐊᖏᕈᑕᐅᓯᒪᕗᑦ ᐅᓪᓗᒥᒧᑦ. ᑮᓇᐅᔭᓂᒃ ᐱᕈᖅᓴᐃᓂᖅ ᐱᒋᐊᓕᑐᐃᓐᓇᖅᐳᖅ.
ᐃᑭᓐᓂᐅᔪᖅ ᐃᖅᑲᐃᑎᑦᑎᔪᒃᓴᐅᓚᐅᖅᐳᖅ ᐃᓚᖏᓐᓂ ᐅᖃᓕᒫᖅᑎᓂᑦ 2005-ᒥ ᐃᑭᑦᑐᒥᑦ ᓱᔪᐃᑦᑎᐊᓚᐅᖅᑐᒥ ᐃᖃᓗᖕᓂ ᓴᐃᓐᑦ ᔫᑦ ᑐᒃᓯᐊᕐᕕᖓᓂ, ᐃᒻᒥᓂᒃ ᐅᐸᒃᑕᐅᓂᐅᕙᓚᐅᖅᑐᒥ ᐊᒥᓱᓄᑦ ᐳᓚᕋᖅᑐᓄᑦ ᐊᖓᔪᖅᑳᖃᕐᕕᖕᒧᑦ. ᐊᕐᕌᒍᓂ 12-ᓂ ᑮᓇᐅᔭᓂᒃ ᐱᕈᖅᓴᐃᓂᐅᔪᓂ ᐊᑭᓖᓂᕐᒧᑦ $11 ᒥᓕᐊᓐᑐᖅᑐᓂ ᓴᓇᔭᐅᒃᑲᓐᓂᕐᓂᖓᓄᑦ.
ᐱᓕᐊᓂᐊᑕᖃᓚᐅᙱᓚᖅ ᑕᑯᒃᓴᐅᔪᓂ: ᑕᒪᕐᒥᒐᓚᒃ ᑮᓇᐅᔭᑦ ᐱᔭᐅᓚᐅᖅᐳᑦ ᒥᑭᑦᑐᓂ ᑐᓂᓯᓂᐅᔪᓄᑦ, ᐃᒻᒪᖄ ᐃᓕᖕᓂᙶᖅᑐᒥᑦᑕᐅᖅ.
ᑮᓇᐅᔭᖃᕐᕖᑦ ᒪᑐᐃᓚᐅᙱᓐᓂᕐᓂ ᐃᑲᔪᕐᓂᕐᒧᑦ ᓴᓇᔭᐅᒃᑲᓐᓂᕐᓂᖓᓄᑦ ᓅᑦᕋ-ᑕᐃᒻ-ᒥ – ᓇᖕᒥᓂᕆᔭᐅᓪᓗᓂ ᕗᕌᓐᔅᒥ ᒐᕙᒪᖓᓐᓂ, ᖃᐅᔨᒪᒋᑦ – ᐃᓱᒪᒋᒍᒃ ᑭᐅᓗᖕᓂᐅᓚᐅᖅᑐᖅ ᑐᓂᔭᐅᔪᒥ ᐊᒥᓱᓂ ᓄᓇᖃᖅᑳᖅᓯᒪᔪᓄᑦ ᑲᓇᑕᒥᐅᑕᓂᑦ ᑮᓇᐅᔭᑎᑦ ᐊᓯᐊᒍᑦ ᐊᑐᖅᑕᐅᑦᑎᐊᒃᑲᓐᓂᕈᓐᓇᖅᐳᑦ.
ᐃᓱᒪᒋᒍᒃ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᑕ ᐊᖏᙲᓐᓇᕐᓂᐅᔪᒥ ᒪᒥᐊᓐᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐅᐊᖕᓇᓕᒫᒥ ᐊᒻᒪ ᓂᒋᕐᒥ ᐊᒥᐊᓕᑲᒥ ᑎᒍᓯᓂᐅᔪᓂ ᓯᐊᓛᕆᔭᐅᓪᓗᑎᒃ ᐊᒻᒪ ᐊᒥᓱᒻᒪᕆᐊᓗᖕᓂ ᑐᖁᕋᐃᓂᐅᔪᓂ ᒪᓕᒐᓄᑦ ᓱᕋᐃᓂᕋᐃᓪᓗᑎᒃ ᑐᒃᓯᐊᕐᕕᖕᒧᑦ ᑕᐃᒪᙵᓂ ᐃᒃᓯᕋᕐᔪᐊᕌᐱᒃ ᓂᑯᓚᔅ V ᑐᕌᖓᑎᖦᖢᓂᐅᒃ ᒎᑎᒧᑦ ᓵᓚᖃᕐᓂᐅᔪᒥ 'ᓄᑖᖑᔪᒥ ᓄᓇᕐᔪᐊᒥ' ᐊᒻᒪ ᐋᕗᕆᑲᒥ ᓯᒡᔭᖅᐸᓯᖓᓐᓂ. ᐅᕘᓇ ᐱᔪᓐᓇᐅᑕᐅᔪᒥ ᖃᔅᓯᒐᓚᖕᓂ ᐃᒃᓯᕋᕐᔪᐊᖑᔪᓄᑦ ᑎᓕᐅᕆᓂᐅᔪᓄᑦ ᑲᑎᙵᐅᖅᑐᓄᑦ ᑕᐃᔭᐅᔪᒥ ᐅᒃᐱᕆᔭᐅᓂᐅᔪᓄᑦ ᓇᓂᔭᐅᓂᖏᓐᓂ – ᓱᓕ ᒫᓐᓇ ᐊᑐᕐᓂᖃᖅᑐᒥ,– ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᓯᐅᔨᓚᐅᖅᐳᑦ ᓄᓇᖏᓐᓂ ᐊᒻᒪ ᐃᓅᓯᖏᓐᓂ.
ᐊᒃᑐᐃᓂᐅᔪᑦ ᓱᓕ ᒫᓐᓇᒧᑦ ᐃᒃᐱᒋᔭᐅᓲᖑᕗᑦ ᑕᐃᒃᑯᓄᖓ ᐊᑐᕐᓂᖃᓚᐅᖅᑐᓂ ᐱᓂᕐᓗᕐᔪᐊᕐᓂᐅᓚᐅᖅᑐᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᓂᕐᓄᑦ. ᒫᓐᓇᒧᑦ ᑎᑭᖦᖢᒍ, ᐃᒃᓯᕋᕐᔪᐊᕌᐱᖕᒥ ᒪᒥᐊᓯᒪᔪᖃᙱᓚᖅ ᐃᒃᓯᕋᕐᔪᐊᑦ ᐃᓚᐅᖃᑕᐅᓚᐅᕐᓂᖏᓐᓂ ᐆᒥᖓ ᐋᔾᔨᒌᓕᖅᑎᑦᑎᓇᓱᐊᕐᓂᐅᔪᒥ ᐱᓕᕆᐊᖑᔪᒥ.
ᐱᓂᕐᓗᒡᔪᐊᕐᓂᐅᔪᖅ ᐆᒪᙵᑦ ᐊᒻᒪ ᐊᓯᖏᓐᓂ ᐊᔾᔨᒌᓕᖅᑎᑦᑎᓇᓱᐊᕐᓂᐅᔪᓂ ᐊᒃᓱᕈᕐᓂᐅᔪᓂ ᐃᒃᐱᒋᔭᐅᖏᓐᓇᖅᐳᖅ ᐅᓪᓗᒥ ᐊᒥᓱᓄᑦ ᐃᓄᖕᓄᑦ, ᐱᓗᐊᖅᑐᒥ ᐊᖏᕐᕋᖃᑦᑎᐊᙱᓐᓂᐅᔪᒧᑦ, ᓂᕿᒃᓴᖃᑦᑎᐊᙱᓐᓂᐅᔪᒧᑦ, ᐊᒻᒪ ᐊᓯᐅᔨᓂᕐᒥ ᑭᓇᐅᓂᖓᓂ.
ᓅᑦᕋ-ᑕᐃᒻ ᐃᑭᓐᓂᐅᔪᖅ ᐅᕙᑦᑎᓐᓂ ᐃᖅᑲᐃᑎᑦᑎᕗᖅ ᑲᑎᙵᓂᐅᔪᒥ ᐃᒡᓗᕐᔪᐊᓄᑦ ᐊᒻᒪ ᐃᓅᖃᑎᒌᖕᓂᐅᔪᒥ. ᐅᕙᓂ ᐊᖏᕐᕋᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᖓᔪᖅᑳᖓ ᑎᐊᕆ ᐊᐅᓪᓚ ᐅᖃᖅᓯᒪᕗᖅ ᓄᓇᕗᑦ ᐱᔭᕆᐊᖃᕋᔭᕐᓂᖏᓐᓂ $1.2 ᐱᓕᐊᓐᓂ ᐊᖏᕐᕋᒃᓴᓂ ᓴᓇᓂᕐᒧᑦ ᐃᓗᓪᓕᖅᓯᓂᕐᒧᑦ ᐱᔭᕆᐊᖃᕐᓂᐅᔪᓂ ᓵᙵᔭᐅᔪᓄᑦ ᓄᓇᕗᓕᒫᒥ. ᑖᓐᓇ ᑮᓇᐅᔭᖅ ᖃᓂᑦᑐᒥ ᑎᑭᔾᔮᙱᓚᖅ. ᐃᓚᒋᐊᖅᓯᓂᕐᒧᑦ ᐋᓐᓂᖅᓯᓂᐅᔪᒧᑦ, ᐃᑭᑦᑐᓕᒫᑦ ᓄᓇᕗᒻᒥ ᐃᓱᒪᒋᔭᐅᓗᐊᖃᑦᑕᙱᓚᑦ ᓄᓇᓕᐅᑉ ᓯᓚᑖᓂ, ᐊᒻᒪ ᐃᓚᒋᐊᖅᓯᒃᑲᓐᓂᑐᐃᓐᓇᖅᐳᖅ ᑎᑎᕋᖅᓯᒪᓂᐅᔪᓄᑦ ᑕᐃᒃᑯᓄᖓ ᐱᔭᕆᐊᖃᖅᑐᓄᑦ.
ᐱᓕᐊᓐᓂ ᑮᓇᐅᔭᖃᕐᓂᕈᕕᑦ ᑐᓂᔭᒃᓴᒥ, ᑕᐃᒪᐃᒃᑲᔭᕆᕗᑎᑦ ᐅᐃᕖᓄᑦ ᐱᓕᐊᓂᐊᖑᔪᑎᑐᑦ ᐊᒻᒪ ᑮᓇᐅᔭᑦ ᐊᖏᕐᕋᒧᑦ ᖃᓂᑎᓪᓗᒍ.
ᓅᑦᕋ-ᑕᐃᒻ ᐃᒡᓗᕐᔪᐊᑐᐃᓐᓇᐅᕗᖅ ᐊᒻᒪ ᐃᑲᔪᖅᓱᐃᓂᖃᖅᐳᖅ ᑕᐃᒪᐃᑦᑐᓄᑦ ᖃᓄᐃᑦᑑᓂᖏᓐᓂ ᐃᓄᖕᓂ. ᓄᖅᑲᓚᐅᑲᒋᑦ ᐊᒻᒪ ᐃᓕᖕᓂ ᐊᐱᕆᓗᑎᑦ: ᑭᓇ ᐃᑲᔪᖅᓱᐃᓂᐊᖅᐸ ᓴᓂᓕᔅᓯᓐᓂ ᐱᔭᕆᐊᖃᖅᑐᓄᑦ?