Skip to content

ᐱᓕᕆᕝᕕᒡᔪᐊᖑᖃᑕᐅᔪᒥᒃ ᓴᖅᑭᔮᖅᑎᑦᑎᒃᑲᓐᓂᕈᒪᓂᖅ

ᐱᖓᓱᑦ ᑲᑎᒪᔨᒋᔭᐅᔪᑦ ᐊᕐᕕᐊᑦ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ ᐃᖃᓗᖕᓄᙵᐅᓚᐅᖅᑐᑦ ᐃᓚᐅᖃᑕᐅᔭᖅᑐᖅᖢᑎᒃ ᐊᕙᓗᓯᓂᖅ ᓯᕗᓂᒃᓴᖅ ᑕᕐᕆᔭᐅᓯᐅᖅᑏᑦ ᑲᑎᒪᕐᔪᐊᕐᓂᖏᓐᓄᑦ ᒫᑦᓯ 12-ᒥ 13-ᒧᑦ.

Arviat Film Society members Elena Akammak, left, and Jamie Okatsiak are happy the weather held steady just long enough for them to depart for the Nunavut film conference on March 12-13 in Iqaluit. Photo courtesy Eric Anoee
Arviat Film Society members Elena Akammak, left, and Jamie Okatsiak are happy the weather held steady just long enough for them to depart for the Nunavut film conference on March 12-13 in Iqaluit.
Photo courtesy Eric Anoee

ᑭᒡᒐᖅᑐᐃᔪᑦ ᐊᕐᕕᐊᓂ ᑕᕐᕆᔭᐅᓯᐅᖅᑏᑦ ᑲᑐᔾᔨᖃᑎᒌᒃᑯᖏᓐᓂᒃ ᐃᐅᕆᒃ ᐊᓄᐄ ᐊᒻᒪᓗ ᒪᒃᑯᒃᑐᑦ ᐃᓕᓇ ᐊᖃᒪᒃ ᐊᒻᒪᓗ ᔭᐃᒥ ᐅᖃᑦᓯᐊᖅ.
"ᐃᓕᓇ ᐊᓕᐊᓇᐃᒋᔭᐅᑦᑎᐊᓚᐅᖅᑐᖅ, ᐊᒻᒪᓗ ᐊᒥᓱᑦ ᐃᓄᐃᑦ ᐅᖃᖃᑦᑕᓚᐅᖅᑐᑦ ᐱᔫᒥᒍᓱᑦᑎᐊᓚᐅᕐᒪᑕ ᐊᒻᒪᓗ ᖁᕕᐊᒋᔭᖃᖅᖢᑎᒃ ᐱᓕᕆᒃᑲᓐᓂᕈᒪᑉᓗᑎᒃ ᑕᕐᕆᔭᐅᓯᐅᖅᑎᐅᓂᒃᑯᑦ."
ᑲᑎᒪᕐᔪᐊᕐᓂᖅ ᑮᓇᐅᔭᓕᖅᑐᖅᑕᐅᓯᒪᓚᐅᖅᑐᖅ ᓄᓇᕗᒥ ᑕᕐᕆᔭᐅᓯᐅᖅᑏᑦ ᐱᕙᓪᓕᐊᑎᑦᑎᔨᒃᑯᖏᓐᓄᑦ, Telefilm Canada-ᑯᓐᓄᑦ ᐊᒻᒪᓗ ᑲᓇᑕᒥ ᑐᒐᒃᓴᓕᕆᔨᒃᑯᑦ ᑮᓇᐅᔭᖁᑎᖏᑦᑎᒍᑦ.
ᐊᓄᐄ ᐅᖃᖅᓗᓂ ᐊᕐᕕᐊᓂᒎᖅ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᑦᑕ ᑲᑎᒪᔨᖏᑦ ᖃᐃᖃᑕᐅᖁᔭᐅᓚᐅᖅᓯᒪᔪᑦ ᑲᑎᒪᕐᔪᐊᖅᑐᓄᑦ ᐸᕐᓇᐃᔨᒃᑯᓐᓄᑦ ᓄᓇᕗᒥ ᑕᕐᕆᔭᐅᓯᐅᖅᑎᒃᑯᑦ ᐱᕙᓪᓕᐊᔪᓕᕆᔨᒃᑯᖏᓐᓄᑦ.
ᐊᓄᐄ ᐅᖃᖅᖢᓂ ᐅᖃᖃᑦᑕᖅᑐᖃᓚᐅᖅᑐᕉᖅ ᐃᑲᔪᖅᑐᖅᑕᐅᔭᕆᐊᖃᕐᓂᖏᓐᓄᑦ ᓄᓇᓕᖕᓂ ᑕᓚᕕᓴᓕᕆᔨᒃᑯᑦ, ᑕᒪᓐᓇ ᐃᒃᐱᖕᓇᓪᓚᕆᓚᐅᖅᑐᕉᖅ ᐊᕐᕕᐊᑦ ᐃᓱᒪᒋᑉᓗᒍ, ᐊᕐᕕᐊᓂ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᑦ ᐃᖕᒥᒃᑯᑦ ᐱᓕᕆᓇᓱᖃᑦᑕᕐᒪᑕ ᓴᖅᑭᑎᑦᑎᓇᓱᒃᖢᑎᒃ ᓄᓇᒥᓂ ᑕᓚᕕᓴᒃᑯᑦ ᑕᑯᔭᒃᓴᐅᖃᑦᑕᕐᓂᐊᖅᑐᓂᒃ.
ᐅᖃᖅᖢᓂ ᐊᕐᕕᐊᓂᒎᖅ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᑦ ᓄᓇᒥᓂ ᑕᕐᕆᔭᒐᒃᓴᓂᒃ ᐋᖅᑭᒃᓱᐃᓚᐅᖅᑐᑦ ᓯᓚᑖᓂᙶᖅᑐᓄᑦ ᐃᑲᔪᖅᑐᖅᑕᐅᓯᒪᙱᖦᖢᑎᒃ, ᑮᓇᐅᔭᖃᑦᑎᐊᕐᓇᑎᒃ ᑮᓇᐅᔭᖅᑖᖅᑎᑕᐅᓯᒪᓗᐊᕐᓇᑎᒡᓗ.
"ᑲᑎᒪᕐᔪᐊᕐᓂᐅᔪᖅ ᐊᑑᑎᖃᑦᑎᐊᖅᓯᒪᔪᖅ ᐊᒻᒪᓗ ᑕᐃᒪᓐᓇ ᑲᑎᒪᔭᕆᐊᖃᖅᓯᒪᓕᖅᑲᒻᒥᙱᑦᑐᑦ - ᐊᕐᕕᐊᑦ ᑕᕐᕆᔭᐅᓯᐅᖅᑎᖏᑦᑕ ᑲᑐᔾᔨᖃᑎᒌᒃᑯᖏᓐᓄᑐᐃᓐᓇᐅᙱᑦᑐᖅ ᑭᓯᐊᓂᓕ ᐅᕙᑉᑎᓐᓄᑦ ᐃᖕᒥᒃᑯᑦ ᐱᓕᕆᓇᓱᒃᑐᓄᑦ ᓯᕗᓂᒃᓴᒥ ᑕᕐᕆᔭᐅᓯᐅᖅᑎᐅᔪᒪᔪᓄᑦ, ᑕᐃᒪᐃᒻᒪᑦ ᐃᓕᑦᑎᕚᓪᓕᕐᓇᖃᑦᑕᕐᒪᑦ ᐊᒻᒪᓗ ᐃᖕᒥᓂᒃ ᐅᒃᐱᕈᓱᓕᕐᓇᖃᑦᑕᕐᒪᑦ ᐱᓕᕆᔪᓐᓇᕐᓂᑉᑎᓐᓄᑦ ᐅᖃᖃᑎᖃᖃᑦᑕᖅᖢᓂ ᓄᓇᕗᒥᐅᑕᐅᖃᑎᑉᑎᓐᓂᒃ ᐊᒻᒪᓗ ᐃᓚᐅᖃᑕᐅᔪᓂᒃ ᐊᑯᑭᑦᑐᕐᒥᐅᑕᓂᒃ.
ᑮᓇᐅᔾᔭᒃᓴᖅᑎᐅᙱᑦᑐᑦ ᓄᓇᕗᒥ ᑕᕐᕆᔭᐅᓯᐅᖅᑎᒃᑯᑦ ᐱᕙᓪᓕᐊᑎᑦᑎᓂᕐᒧᑦ ᑲᑐᔾᔨᖃᑎᒌᒃᑯᖏᑦ ᑕᕐᕆᔭᐅᓯᐊᓂᒃ ᐱᒋᐊᖅᑎᑦᑎᔨᐅᔪᑦ ᐊᒻᒪᓗ ᑮᓇᐅᔭᖅᑖᖅᑎᑦᑎᔨᐅᔪᑦ ᓄᓇᕗᒥᐅᓄᑦ ᐱᒋᐊᖅᑎᑦᑎᔨᐅᔪᓄᑦ ᖁᕝᕙᖅᑎᕆᔨᐅᔪᓄᑦ ᐱᕙᓪᓕᐊᑎᑦᑎᓂᕐᒧᑦ ᑕᕐᕆᔭᒐᒃᓴᓂᒃ, ᑕᓚᕕᓴᓕᕆᓂᕐᒥᒃ ᐊᒻᒪᓗ ᖃᕆᑕᐅᔭᒃᑯᑦ ᐱᓕᕆᔨᓄᑦ ᓄᓇᕗᒥ.
ᐊᓄᐄ ᐅᖃᖅᖢᓂ ᑮᓇᐅᔾᔭᒃᓴᖅᑎᐅᓇᓂᒎᖅ ᒥᑭᔪᓪᓗᓂ ᑲᑐᔾᔨᖃᑎᒌᖑᑉᓗᓂ ᐊᐅᓪᓛᖅᑎᑕᐅᑉᓗᓂ ᐊᑭᓕᖅᑐᖅᑕᐅᙱᑦᑐᓄᑦ ᐱᓕᕆᔪᒪᔪᓄᑦ, ᐊᕐᕕᐊᓂ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᑦ ᐱᓕᕆᖃᑎᒃᓴᒥᓂᒃ ᕿᓃᓐᓇᓲᑦ ᐊᒻᒪᓗ ᐊᓯᖏᓐᓂᒃ ᐃᑲᔫᑎᓂᒃ ᑐᑭᓯᒋᐊᕈᑎᒃᓴᓂᒃ ᑲᑎᑦᑎᔪᒪᓂᕐᒧᑦ.
ᐅᖃᖅᖢᓂ ᐊᕐᕕᐊᓂᒎᖅ ᑕᕐᕆᔭᐅᓯᐅᖅᑎᒃᑯᑦ ᑲᑐᔾᔨᖃᑎᒌᒃᑯᖏᑦ ᑐᙵᓱᒃᑎᑦᑎᑦᑎᐊᕐᓂᐊᖅᑐᑦ ᑎᒥᖁᑎᒋᔭᐅᔪᓂᒃ ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓂᒃ ᐱᓕᕆᖃᑎᖃᕈᒪᔪᓂᒃ ᐃᖕᒥᓂᒃ ᐃᑲᔪᕈᒪᔪᓂᒃ ᑲᑎᒪᔨᐅᖃᑕᐅᔪᓂᒃ ᐅᔾᔨᕈᓱᓕᕈᓐᓇᖁᑉᓗᒋᑦ ᓯᕗᓂᒃᓴᒥᓂᒃ ᑐᕌᒐᕆᔪᒪᔭᖏᓐᓄᑦ.
"ᑖᑉᑯᐊ ᑎᒥᖁᑎᒋᔭᐅᔪᑦ, ᖃᑯᒍ, ᐱᒋᐊᖅᑎᑦᑎᔪᒪᔪᑦ ᐊᐅᓚᑦᑎᔨᐅᓕᕐᓗᑎᒃ ᓄᓇᕗᒥ ᑕᓚᕕᓴᓕᕆᓂᕐᒥᒃ, ᑭᓯᐊᓂ ᑕᐃᒪᐅᔪᑦ ᓇᖕᒥᓂᖃᖅᑎᐅᔪᑦ ᐃᖕᒥᓂᒃ ᐃᑲᔪᖅᑐᐃᓯᒪᙱᑦᑐᑦ ᑕᒡᕘᓇ.
"ᓄᓇᕗᒥ ᐊᒥᓲᖕᒪᑕ ᐃᖢᐊᖏᓕᐅᕈᑕᐅᔪᑦ ᑲᒪᒋᔭᐅᔭᕆᐊᓖᑦ ᐊᒥᓱᓪᓗ ᑮᓇᐅᔭᓕᖅᑐᖅᑕᐅᔭᕆᐊᓖᑦ, ᑭᓯᐊᓂ, ᑕᐃᒪᓐᓇ ᐅᖃᖅᑎᓪᓗᖓ, ᐃᑲᔪᖅᑐᖅᑕᐅᔭᕆᐊᖃᖅᑐᒍᑦ ᐅᒃᐱᕈᓱᒃᑐᓄᑦ ᓄᓇᕗᒥ ᐊᐅᓚᑦᑎᔪᓐᓇᖅᑐᓂᒃ ᑕᓚᕕᓴᓕᕆᓂᒃᑯᑦ ᐊᐅᓚᑦᑎᔾᔪᑎᓂᒃ.
"ᑕᐃᑉᑯᐊ ᐅᒃᐱᕈᓱᒃᑐᑦ ᐱᓕᕆᐊᒃᓴᒥᒃ ᐅᖃᖃᑎᖃᕈᓐᓇᖅᑐᑦ ᒪᓕᒐᓕᐅᖅᑎᒥᓂᒃ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᐃᑲᔪᖅᑐᖅᑕᐅᔪᓐᓇᖁᑉᓗᒋᑦ ᐱᑕᖃᕆᐊᖃᓕᕐᓂᕐᒧᑦ ᓄᓇᕗᒥ ᑕᓚᕕᓴᓕᕆᔨᒃᑯᓐᓂᒃ."