ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ (AEM) ᐃᓴᕐᔪᐊᓚᐅᖅᐳᖅ ᐃᖅᑲᓇᐃᔭᖅᑎᐅᔪᓐᓇᕋᔭᖅᑐᓄᑦ ᐱᓇᓱᐊᕈᓯᐅᓚᐅᖅᑐᒥ.
ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ ᐃᓚᐅᖃᑕᐅᓚᐅᖅᐳᑦ ᓯᕗᓪᓕᖅᐹᒥ ᐱᓪᓚᕆᐅᔮᖅᑐᒥ ᐃᖅᑲᓇᐃᔮᓄᑦ ᑕᑯᒃᓴᐅᑎᑦᑎᓂᐅᔪᒥᑦ ᐱᕈᐊᕆ 6 ᐊᒻᒪ 7-ᒥ, ᐃᓄᖕᓄᑦ ᓄᓇᕐᔪᐊᓕᒫᒥ ᓇᕿᑦᑎᑐᐃᓐᓇᕈᓐᓇᕐᓗᑎᒃ ᑲᓱᕐᕕᒃᓴᒧᑦ ᐊᒻᒪ ᐃᓕᑦᑎᓗᑎᒃ ᐃᖅᑲᓇᐃᔮᒃᓴᓄᑦ ᐱᕕᒃᓴᖃᕐᓂᐅᔪᓐᓇᖅᑐᓄᑦ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᕐᒧᐊᖑᔪᓄᑦ ᑲᒻᐸᓂᐅᔪᒥ.
ᓇᑖᓴ ᓇᒡᔪᒐᓕᒃ ᖃᒪᓂᑦᑐᐊᕐᒥᐅᑕᖅ ᑭᒡᒐᖅᑐᐃᕗᖅ ᐱᖓᓱᓂ ᐃᖅᑲᓇᐅᔮᖑᔪᓄᑦ ᐱᕕᒃᓴᖃᕐᓂᐅᔪᓂᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ, ᐱᒋᐊᓚᐅᖅᑎᓪᓗᒍ ᐅᓯᑲᑦᑕᐅᑎᒧᑦ-ᓄᓇᓯᐅᒻᒥ ᐊᖁᑎᐅᓪᓗᓂ ᓅᓚᐅᙱᑎᓪᓗᒍ ᐃᓂᐅᔪᒧᑦ ᐃᓇᖏᖅᓰᔨᐅᓪᓗᓂ ᓈᓚᐅᑎᓕᕆᔨᐅᓪᓗᓂ, ᐊᒻᒪᓗ ᓴᖅᑭᑎᕆᕙᓪᓕᐊᓂᕐᒧᑦ ᐊᐅᓚᑦᑎᔨᙳᕐᓂᐊᓕᕆᕗᖅ RH-120 ᐳᓪᓚᓕᒃ ᐅᔭᕋᖕᓂᐊᕐᓂᕐᒧᑦ ᐸᒃᑲᐅᑎᒧᑦ.
ᕙᐃᔅᐳᒃᑯᑦ ᐃᓚᐅᖁᔨᓂᐅᔪᑦ ᑎᑎᕋᐅᓯᐅᓚᐅᖅᐳᑦ ᐊᒡᓂᑯ ᐄᒍᓪᑯᑦ ᕙᐃᔅᐳᒃᑯᑦ ᐊᒻᒪ ᓕᖕᒃᑎᓐ ᒪᒃᐱᖅᑐᒐᐃᑦ ᐊᒻᒪᓗ ᑎᑎᕋᐅᓯᐅᓪᓗᑎᒃ ᑐᕕᑐᒥ, ᐃᓚᐅᖃᑕᐅᖁᔨᓂᐅᔪᑦ ᑎᑎᕋᖅᑕᐅᓚᐅᕆᓪᓗᑎᒃ ᖃᒪᓂᑦᑐᐊᒥ ᓄᓇᓕᖕᓂ ᖃᓄᐃᓐᓂᐅᔪᓂᑦ, ᑲᖏᖅᖠᓂᕐᒥ ᑐᓴᒐᒃᓴᓂᑦ ᐊᒻᒪ ᕼᐋᒻᓚᒃᑯᑦ ᑲᖏᖅᖠᓂᕐᒥ ᕙᐃᔅᐳᒃ ᒪᒃᐱᖅᑐᒐᖓᓐᓂ ᑕᑯᔭᐅᑎᑦᑎᓇᓱᐊᖅᖢᑎᒃ ᑕᑯᒃᓴᐅᑎᑦᑎᓂᐅᔪᒧᑦ.
ᑲᒻᐸᓂᒧᑦ ᐅᖃᖅᑎᐅᔪᖅ ᐅᖃᓚᐅᖅᐳᖅ ᕙᐃᔅᐳᒃᑯᑦ ᐅᐸᖁᔨᓂᐅᔪᑦ ᑕᑯᒃᓴᐅᑎᑕᐅᓂᖃᓚᐅᖅᐳᑦ 200 ᐅᖓᑖᓄᑦ ᐊᒻᒪᓗ ᑎᑭᐅᑎᓪᓗᓂ ᐅᓄᕐᓂᖅᓴᐅᔪᓄᑦ 29,000-ᓂ ᐃᓄᖕᓄᑦ, ᐅᓄᕐᓂᖅᓴᐅᔪᓂ 425-ᖑᔪᑦ ᓇᕿᑦᑎᓪᓗᑎᒃ ᐊᑎᓕᐅᖃᑕᐅᓂᕐᒧᑦ ᑲᓱᕐᕕᖓᓄᑦ ᐃᖅᑲᓇᐃᔮᓄᑦ ᑕᑯᒃᓴᐅᑎᑕᐅᓂᐅᔪᒧᑦ.
ᓕᖕᒃᑎᓐ ᐅᐸᖁᔨᓂᐅᔪᖅ ᑎᑭᐅᑎᓚᐅᖅᐳᖅ 28,000 ᐅᖓᑖᓄᑦ ᐃᓄᖕᓄᑦ ᐅᓄᕐᓂᖅᓴᐅᔪᓂ 480-ᓂ ᓇᕿᑦᑎᓪᓗᑎᒃ ᐊᑎᓕᐅᖃᑕᐅᓂᕐᒧᑦ ᑲᓱᕐᕕᖓᓄᑦ.
ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ ᐃᖅᑲᓇᐃᔭᖅᑎᓯᐅᖅᑎ ᓈᑕᓕ ᐱᓛᓐᔭᐃ ᐅᖃᓚᐅᖅᐳᖅ ᑕᑯᒃᓴᐅᑎᑦᑎᓂᐅᔪᖅ ᐱᒋᐊᕈᑎᑦᑎᐊᕚᓘᓚᐅᖅᐳᖅ ᐱᓕᕆᐊᖑᓪᓗᓂ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᕐᔪᐊᖑᔪᓄᑦ ᐃᖅᑲᓇᐃᔭᖅᑎᖁᑎᓕᕆᔨᖏᓐᓄᑦ ᑲᑎᒪᔨᐅᔪᓄᑦ (MiHR).
ᐅᖃᓚᐅᖅᐳᖅ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ ᓯᕗᓪᓕᖅᐹᒥ ᐃᓚᐅᖃᑕᐅᓂᐅᔪᑦ ᐱᓪᓚᕆᐅᔮᖅᑐᒥ ᑕᑯᒃᓴᐅᑎᑦᑎᓂᐅᔪᒥ ᐱᓕᕆᑦᑎᐊᕐᔪᐊᓚᐅᖅᐳᖅ.
"ᐃᖅᑲᓇᐃᔮᑎᑖᕋᓱᐊᕐᓂᖅᐊᔪᕐᓇᖅᓯᕙᓪᓕᐊᑐᐃᓐᓇᖅᐳᖅ, ᐊᒻᒪᓗ ᐱᓕᕆᓪᓗᓂ ᐱᓪᓚᕆᐅᔮᖅᑐᒥ ᐃᖅᑲᓇᐃᔮᓄᑦ ᑕᑯᒃᓴᐊᑎᑦᑎᓂᐅᔪᒥᑦ ᐊᔪᕐᓇᙱᓐᓂᖅᓴᒻᒪᕆᐅᓚᐅᖅᐳᖅ ᑭᒃᑯᓕᒫᓄᑦ ᑎᑭᐅᑎᔪᓐᓇᓚᐅᕋᑦᑕ ᐊᖏᕐᕋᖏᓐᓂᑦ ᐊᒻᒪᓗ ᐊᑐᐃᓐᓇᐅᔪᓐᓇᖅᖢᑕ ᑭᐅᓂᕐᒧᑦ ᐊᐱᖅᑯᑕᐅᔪᓄᑦ," ᐅᖃᓚᐅᖅᐳᖅ ᐱᓛᓐᔭᐃ.
"ᐊᑐᐃᓐᓇᐅᓚᐅᖅᐳᒍᑦ 10 ᐅᓪᓛᒃ 7 ᐅᓐᓄᙳᕋᓱᐊᕐᓂᖓᓄᑦ ᐊᒻᒪᓗ ᒪᕐᕉᖕᓂ ᐃᖅᑲᓇᐃᔭᖅᑎᓯᐅᖅᑎᓂᑦ ᐊᑐᐃᓐᓇᐅᔪᖃᓚᐅᖅᐳᖅ ᑭᐅᓂᕐᒧᑦ ᑭᓇᑐᐃᓐᓇᐅᑉ ᐊᐱᖅᑯᑎᖏᓐᓄᑦ.
"ᖃᔅᓯᓪᓚᕆᐅᓂᖏᓐᓂ ᖃᐅᔨᒪᙱᑦᑐᖓ, ᑭᓯᐊᓂ ᐅᖃᓗᒡᕕᐅᓚᐅᖅᐳᒍᑦ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥᑦ."
ᐱᓛᓐᔭᐃ ᐱᓕᕆᓕᒪᓂᖃᕐᔪᐊᖅᐳᖅ ᐃᖅᑲᓇᐃᔮᓄᑦ ᑕᑯᒃᓴᐅᑎᑦᑎᓂᐅᓪᓚᕆᒃᑐᓂᑦ.
ᐅᖃᓚᐅᖅᐳᖅ ᐱᐅᓂᕐᔪᐊᖓ ᐱᓪᓚᕆᐅᔮᖅᑐᒥ ᐃᖅᑲᓇᐃᔮᓄᑦ ᑕᑯᒃᓴᐊᑎᑦᑎᓂᐅᔪᒥᑦ ᓇᒧᑐᐃᓐᓇᖅ ᐊᐅᓪᓚᑲᑕᒋᐊᖃᔮᙱᑦᑐᑦ.
"ᑎᑎᕋᕐᕕᑦᑎᓐᓃᖏᓐᓇᕈᓐᓇᖅᐳᒍᑦ ᐊᒻᒪᓗ ᐊᑐᐃᓐᓇᐅᓂᖅᓴᐅᓗᑕ ᑭᒃᑯᓕᒫᓄᑦ, ᐊᒻᒪᓗ ᐊᑐᐃᓐᓇᐅᓂᖓᓂ ᐱᓪᓚᕆᐅᔮᖅᑐᒥ ᐃᖅᑲᓇᐃᔮᓄᑦ ᑕᑯᒃᓴᐊᑎᑦᑎᓂᐅᔪᒥᑦ ᑕᑯᔪᒥᓇᓗᐊᖅᐳᖅ.
"ᑕᑯᒃᓴᐅᑎᑦᑎᓂᓪᓚᕆᐅᔪᖃᕈᑦᑕ ᑲᖏᖅᖠᓂᕐᒥ, ᑲᖏᖅᖠᓂᕐᒥ ᐃᓄᑐᐃᓐᓇᕐᓄᑦ ᐅᐸᒍᓐᓇᕋᔭᖅᐳᑦ ᐊᒻᒪᓗ ᐅᕙᑦᑎᓐᓂ ᑲᑎᒪᖃᑎᖃᕐᓗᑎᒃ, ᑭᓯᐊᓂ ᐆᒧᖓ ᐃᓄᐃᑦ ᐅᖃᖃᑎᖃᓚᐅᖅᐳᑦ ᓇᑭᑐᐃᓐᓇᑦᑎᐊᖅ ᓄᓇᕐᔪᐊᒥ ᐊᑲᐅᓂᖃᖅᖢᑎᒃ ᐊᖏᕐᕋᒥᓃᖦᖢᑎᒃ ᐅᖃᓘᑎᕋᓛᒥᓂᓪᓗ, ᑕᐃᒫᒃ ᐊᑐᐃᓐᓇᐅᓂᖃᑦᑎᐊᖅᖢᓂ ᐊᑲᐅᓈᕐᓂᑦᑎᐊᕚᓘᕗᖅ.
"ᐃᓛᒃ, ᐊᐱᖅᑯᑕᐅᔪᓂ ᑭᐅᓇᓱᐊᖅᖢᓂ ᐅᖃᓪᓚᖕᓂᕐᒧᑦ ᑎᑎᕋᕐᕕᐅᔪᓐᓇᖅᑐᒥ ᐃᒡᓗᕈᓯᐅᔪᒥ, ᑕᐃᒪᓐᓇᑎᑐᑦ ᐅᐸᒃᓯᒪᓪᓗᓂ ᐅᖃᓪᓚᖕᓂᑎᑑᙱᓚᖅ, ᑭᓯᐊᓂ ᐱᔪᓐᓇᓚᐅᖅᐳᒍᑦ ᐅᖃᐅᓯᒃᓴᑦᑎᐊᕙᓂᑦ ᑕᖅᑳᖓᑦ ᐅᕘᓇ ᐱᓪᓚᕆᐅᔮᖅᑐᒥ ᐃᖅᑲᓇᐃᔮᓄᑦ ᑕᑯᒃᓴᐊᑎᑦᑎᓂᐅᔪᒥᑦ."
ᐱᓛᓐᔭᐃ ᐅᖃᓚᐅᖅᐳᖅ ᐊᐱᖅᑯᑕᐅᓛᖑᖃᑦᑕᓚᐅᖅᑐᖅ ᑕᑯᒃᓴᐅᑎᑦᑎᓂᐅᔪᒥ ᐅᓇᐅᓚᐅᖅᐳᖅ: ᖃᓄᐃᑦᑑᔪᓂ ᐃᖅᑲᓇᐃᔮᒃᓴᖅᑕᖃᖅᐸ ᒫᓐᓇᐅᔪᒥ ᐊᑐᐃᓐᓇᐅᔪᒥᒃ?
ᐅᖃᓚᐅᖅᐳᖅ ᐃᓄᐃᑦ ᑲᑎᖃᑎᖃᖅᑐᓂ ᑖᒃᑯᓄᖓ ᐅᕘᓇ ᐃᖅᑲᓇᐃᔮᓄᑦ ᑕᑯᒃᓴᐅᑎᑦᑎᓂᐅᔪᒥ ᕿᓂᖅᐳᑦ ᐃᖅᑲᓇᐃᔮᒃᓴᒥᑦ, ᑕᐃᒫᒃᖃᐅᔨᔪᒪᕗᑦ ᖃᓄᐃᑦᑐᓂ ᐊᑐᐃᓐᓇᐅᔪᓂ ᐃᓂᒃᓴᖅᑕᖃᕐᓂᖓᓂ, ᖃᓄᖅ ᐱᓇᓱᐊᕋᓱᒍᓐᓇᕐᓂᖏᓐᓂ ᐊᒻᒪᓗ, ᒫᓐᓇᐅᔪᒥ ᐱᕕᒃᓴᖅᑕᖃᙱᑉᐸᑦ, ᑭᓲᕙᑦ ᐱᕕᒃᓴᖃᕐᓂᐅᔪᑦ ᓯᕗᓂᒃᓴᒧᑦ?
"ᑕᒪᕐᒥᒐᓚᐃᑦ ᐃᓄᐃᑦ ᐅᖃᖃᑎᒋᓚᐅᖅᑕᒃᑲ ᐱᓪᓚᕆᐅᔮᖅᑐᒥ ᑕᑯᒃᓴᐊᑎᑦᑎᓂᐅᔪᒥᑦ ᐱᔭᕇᖅᐸᓪᓕᐊᓚᐅᖅᐳᑦ ᖁᑦᑎᖕᓂᖅᐹᒥ ᐃᓕᓴᕆᔭᐅᔾᔪᑎᐅᔪᓂᑦ ᐅᕙᓘᓐᓃᑦ ᖃᔅᓯᒐᓚᖕᓂ ᐱᓕᕆᓕᒪᓂᖃᓚᐅᖅᐳᑦ, ᑕᐃᒫᒃ ᐅᖃᕋᔭᖅᐳᖓ 20s-ᖏᓐᓃᒐᓚᓚᐅᖅᐳᑦ 30-ᖏᓐᓂᓪᓘᓐᓃᑦ.
"ᑐᓴᖅᑎᑦᑎᔪᒪᕗᒍᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖕᒥ ᐱᓪᓚᕆᐅᔮᖅᑐᒥ ᑕᑯᒃᓴᐊᑎᑦᑎᓂᐅᔪᒥᑦ ᐱᕕᒃᓴᖃᕐᔪᐊᖅᐳᑦ ᐊᒻᒪ ᐅᔭᕋᖕᓂᐊᕐᓂᖅ ᐱᓕᕆᕕᑦᑎᐊᕚᓘᕗᖅ ᐃᖅᑲᓇᐃᔭᕐᕕᒋᓗᒍ.
"ᐅᓄᖅᓯᕙᓪᓕᐊᑐᐃᓐᓇᖅᑐᓂ ᐱᕙᓪᓕᐊᑎᑕᐅᔭᕆᐊᖃᖅᑐᖃᖅᐳᖅ ᖃᕋᓴᐅᔭᑎᒍᑦ, ᐊᒻᒪᓗ ᑕᒪᓐᓴ ᐱᕕᒃᓴᑦᑎᐊᕚᓘᕗᖅ ᐃᓴᖕᓂᕐᒧᑦ ᐃᓄᖕᓄᑦ ᐅᖓᓯᒃᑐᒥᐅᑕᐅᔪᓄᑦ, ᑕᐃᒫᒃ ᑕᒪᓐᓴ ᐱᒋᐊᕈᑎᑦᑎᐊᕙᐅᕗᖅ ᐊᒻᒪᓗ ᐱᓕᕆᒃᑲᓐᓂᕐᓂᐊᖅᐳᒍᑦ ᐱᑕᖃᒃᑲᓐᓂᕐᓂᐊᕈᓂ."