ᐊᐅᔭᒃᑯᑦ ᐅᓪᓗᕐᒥ ᑕᖕᒫᕐᕕᒃ ᐱᓕᕆᐊᖑᓚᐅᖅᑐᒥ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᒡᓗᓕᒑᕐᔪᖕᒥ ᐱᓕᕆᑦᑎᐊᕐᓂᖃᑦᑎᐊᓚᐅᖅᐳᖅ ᑕᒪᒃᑭᓄᑦ ᓄᑕᖅᑲᓄᑦ ᐊᒻᒪ ᐊᖓᔪᖅᑳᓄᑦᑕᐅᖅ.
ᐅᓪᓗᕐᒥ ᑕᖕᒫᕐᕕᒃ ᑐᕌᖓᓂᖃᓚᐅᖅᐳᖅ ᓱᕈᓯᓄᑦ ᐅᑭᐅᓕᖕᓂ 6−ᓂ 12−ᒧᑦ, ᐊᒻᒪ ᐅᐸᒃᑎᑦᑎᓚᐅᖅᐳᖅ ᖃᓂᒋᔭᖓᓐᓂ 15−ᓄᑦ ᓱᕈᓯᕐᓂ ᐊᑐᓂ ᐅᓪᓘᔪᒥ ᑕᐃᒪᐃᖏᓐᓇᒐᓚᒃᖢᓂ ᐊᐅᔭᐅᑉ ᑕᖅᑭᖏᓐᓄᑦ.
Chael Sammurtok-Amorak, Amber Aggark (student leader) and Ricky Aggark, from left, are having a blast at the summer day camp at Victor Sammurtok School in Chesterfield Inlet on Aug. 16, 2018. photo courtesy Glen Brocklebank
ᑎᓚᐃᓚ ᐄᓴᓗᒃ, 20, ᑲᒪᒋᔭᖃᓚᐅᖅᐳᖅ ᐊᐅᔭᒃᑯᑦ ᑕᖕᒫᕐᕕᖓᓐᓂ ᐃᓕᓐᓂᐊᖅᑎᓂᑦ ᐃᑲᔪᖅᑎᖃᖅᖢᓂ ᔪᐋᓐ ᐳᑐᓕᖕᒥ ᐊᒻᒪ ᐋᒻᐳᕐ ᐊᒡᒐᖕᒧᑦ.
ᐄᓴᓗᒃ ᐅᖃᓚᐅᖅᐳᖅ ᑕᖕᒫᕐᕕᐅᔪᖅ ᐋᖅᑭᒃᓱᖅᑕᐅᓚᐅᖅᐳᖅ ᐊᒻᒪ ᐊᐅᓚᑕᐅᓪᓗᓂ ᐃᒡᓗᓕᒑᕐᔪᖕᒥ ᖃᓄᐃᙱᑦᑎᐊᕐᓂᕐᒧᑦ ᑲᑎᒪᔨᕋᓛᖏᓐᓄᑦ.
ᐅᖃᓚᐅᖅᐳᖅ ᑲᑎᒪᔨᕋᓛᖑᔪᑦ ᑕᑯᓂᖃᓚᐅᖅᐳᑦ ᐅᓪᓗᕐᒥ ᑕᖕᒫᕐᕕᖓᓂ ᐱᕚᓪᓕᕈᑕᐅᓂᖓᓂ ᓱᕈᓯᕐᓄᑦ, ᐅᓪᓗᖓᓐᓂ ᐃᓚᐅᖃᑕᐅᓪᓗᑎᒃ ᖃᔅᓯᒐᓚᖕᓂ ᐱᙳᐊᕐᓂᐅᔪᓂᑦ ᐊᒻᒪ ᖃᓄᐃᓕᐅᕐᓂᐅᔪᓂᑦ ᑕᖕᒫᕐᕕᖕᒥᑦ.
"ᑲᑎᒪᔨᕋᓛᖑᔪᓂ ᐃᓚᒋᔭᐅᔪᑦ ᐃᓱᒪᓚᐅᖅᐳᑦ ᐱᐅᓂᖅᓴᐅᓇᔭᕐᓂᖓᓂ ᓱᕈᓯᕐᓄᑦ ᐃᓯᖅᓯᒪᑐᐃᓇᙱᓪᓗᑎᒃ ᐃᒡᓗᒥ ᖃᓄᐃᓕᐅᙱᑦᑎᐊᑲᓴᒡᓗᑎᒃ ᐊᐅᔭᓕᒫᒥ, ᑭᓯᐊᓂ, ᐃᒻᒪᖄ, ᐱᙳᐊᕐᓗᑎᒃ ᑕᓚᕖᓴᒧᑦ ᐱᙳᐊᕈᑕᐅᔪᓂ ᐅᓪᓗᓕᒫᕐᒥ,” ᐅᖃᓚᐅᖅᐳᖅ ᐄᓴᓗᒃ.
"ᑭᐳᒥ ᐱᙳᐊᕈᑎᐅᔪᑦ ᐊᓕᐊᓇᐃᒋᔭᐅᓛᖑᓚᐅᖅᐳᑦ ᖃᓄᐃᓕᐅᕐᓂᓕᒫᑦᑎᓐᓂ.
"ᓱᕈᓰᑦ ᐊᓕᐊᓇᐃᒋᓚᐅᕆᕙᖓᑦ ᐃᔨᕐᓗᓂ ᐊᒻᒪ ᐸᑦᑕᒃᑐᕐᓗᓂ (ᑕᕐᕆᔭᒐᐅᔪᒥ, The Conjuring), ᐊᒻᒪ ᐅᕙᑦᑎᓐᓄᑦ ᐊᐱᕆᕙᒃᖢᑎᒃ ᑖᔅᓱᒥᖓ ᐱᙳᐊᕈᓐᓇᕐᒪᖔᑕ ᖃᐅᑕᒫᑲᓴᑦᑎᐊᒥ."
ᐄᓴᓗᒃ ᐅᖃᓚᐅᖅᐳᖅ ᐊᖓᔪᖅᑳᑦ ᖁᕕᐊᓚᐅᖅᐳᑦ ᐅᓪᓗᕐᒥ ᑕᖕᒫᕐᕕᖃᕐᓂᖏᓐᓂ ᖃᐅᑕᒫᑦᑎᐊᖅ.
ᐅᖃᓚᐅᖅᐳᖅ ᐊᖓᔪᖅᑳᑦ ᐊᓕᐊᓇᐃᒋᔭᖃᓚᐅᖅᐳᑦ ᑕᒪᒃᑭᓂ ᐸᐃᕆᔭᐅᓂᐅᔪᒥ ᐃᓚᖓᓐᓂ ᑕᖕᒫᕐᕕᐅᔪᒥ, ᐊᒻᒪᓗᑦᑕᐅᖅ ᓱᓕᓂᐅᔪᒥ ᓱᕈᓰᑦ ᐱᓕᕆᐊᖃᖅᑎᑕᐅᓂᖏᓐᓂ ᐊᑑᑎᖃᑦᑎᐊᖅᑐᓂ ᐊᒻᒪ ᐊᓕᐊᓇᐃᑦᑐᓂ ᖃᓄᐃᓕᐅᕐᓂᐅᔪᓂᑦ.
"ᓱᕈᓰᑦ ᐊᓕᐊᓇᐃᒋᑦᑎᐊᓚᐅᖅᐸᖓ ᐊᐅᔭᒃᑯᑦ ᐅᓪᓗᕐᒥ ᑕᖕᒫᕐᕕᓕᐊᕆᐊᒃᓴᖅ ᖃᐅᑕᒫᑦᑎᐊᒥ.
"ᓄᒫᓱᕐᔪᐊᓚᐅᖅᐳᑦ ᐃᓱᓕᓐᓂᖓᓂ ᕿᑎᖅᑰᓚᐅᖅᑐᒥ.
"ᖃᐅᔨᒪᐸᓗᒃᐳᖓ ᐃᓕᓐᓂᐊᕐᕕᖕᒧᑦ ᐅᑎᕐᓂᐊᓕᕐᓂᖏᓐᓂ ᐃᓚᒋᔭᐅᓚᐅᖅᐳᖅ ᐱᔾᔪᑕᐅᔪᒥ, ᑭᓯᐊᓂ ᐱᓛᖑᔪᒥ, ᐊᓕᐊᓇᐃᒍᓱᖕᓂᖃᓚᐅᕐᓂᖏᓐᓂ ᑕᖕᒫᕐᕕᖕᒥ ᐊᒻᒪ ᑭᖑᓂᖃᕆᔭᐅᓂᐊᕐᓂᖏᓐᓂ ᐱᙳᐊᕐᓂᐅᔪᑦ ᐊᒻᒪ ᖃᓄᐃᓕᐅᕈᓘᔭᕐᓂᐅᔪᓂᑦ.
"ᑕᖕᒫᕐᕕᒃ ᐊᐅᓚᓂᖃᓚᐅᖅᐳᖅ ᑕᖅᑭᐸᓗᖕᓄᑦ ᒪᕐᕉᖕᓄᑦ ᐊᒻᒪ ᓱᖏᐅᑎᓚᐅᖅᐳᑦ ᐅᐸᖃᑦᑕᕐᓂᖏᓐᓂ ᖃᐅᑕᒫᒥ."
ᐄᓴᓗᒃ ᐅᖃᓚᐅᖅᐳᖅ ᑖᓐᓇ ᐅᓪᓗᕐᒥ ᑕᖕᒫᕐᕕᐅᔪᖅ ᐊᐅᓚᑕᐅᖁᓇᔭᖅᑕᖓ ᐊᐅᔭᑕᒫᒥ ᐃᒡᓗᓕᒑᕐᔪᖕᒥ.
ᐅᖃᓚᐅᖅᐳᖅ, ᐃᓱᒪᒋᔭᒥᒍᑦ, ᓱᕈᓰᑦ ᐱᕚᓪᓕᕈᑎᖃᓚᐅᕐᓂᖏᓐᓂ ᑕᖕᒫᕐᕕᓕᐊᕐᓂᕐᒧᑦ ᐊᒻᒪ ᐊᖓᔪᖅᑳᖏᓐᓂ ᕿᑲᕐᓂᖃᓚᐅᑲᒃᑎᑦᑎᓪᓗᓂᑦᑕᐅᖅ, ᖃᐅᔨᒪᓪᓗᑎᒡᓗ ᓱᕈᓰᑦ ᐸᖅᑭᔭᐅᑦᑎᐊᕐᓂᖏᓐᓂ.
"ᓴᖅᑭᑎᑦᑎᓚᐅᖅᐳᖅ ᖃᔅᓯᒐᓚᖕᓂ ᐃᖅᑲᓇᐃᔮᒃᓴᐅᔪᓂ, ᐊᒃᓱᑦᑕᐅᖅ ᑕᖅᑭᓄᑦ ᒪᕐᕉᖕᓄᑦ, ᐊᒻᒪ ᑭᒃᑯᓕᒫᑦ ᐃᓚᐅᖃᑕᐅᔪᓂ ᐊᓕᐊᓇᐃᒋᑦᑎᐊᓚᐅᖅᐸᖓ.
"ᓱᕈᓰᑦ, ᓲᖃᐃᒻᒪ, ᓱᖏᐅᑎᓯᒪᓚᐅᕐᒪᑕ ᐃᓕᓐᓂᐊᕐᕕᖕᒥ ᐊᒻᒪ ᑕᒪᓐᓇ ᐃᑲᔪᕈᑕᐅᓚᐅᕆᕗᖅ ᐃᓗᐊᖅᑎᑦᑎᓂᖓᓐᓄᑦ ᐅᐸᒃᓯᒪᔭᖓᓐᓂ ᖃᓂᒋᔭᖓᓂᓪᓗ.