ᑎᓴᒪᖓᓐᓂ ᐊᕐᕌᒍᑕᒫᒥ ᖁᕕᐊᓱᒍᑕᐅᔪᒥ ᑕᓯᕐᒥ ᐱᓕᕇᓐᓇᓚᐅᖅᐳᑦ ᖃᓄᐃᓐᓂᐅᔫᑉ ᐱᕈᖅᐸᓪᓕᐊᔪᒥ ᐊᓕᐊᓇᐃᒋᔭᐅᓂᖓᓂ ᓄᓇᓕᖕᒥᐅᑕᓄᑦ ᐊᒻᒪ ᐃᓄᖕᓂ ᑭᕙᓪᓕᕐᒥᐅᑕᓂ ᐊᕕᒃᓯᒪᓂᐅᔪᒥ ᖃᒪᓂᑦᑐᐊᕐᒥ ᑕᒪᑐᒪᓂ ᑕᖅᑭᐅᓚᐅᖅᑐᒥ.
ᖃᓄᐃᓐᓂᐅᔪᖅ ᐊᐅᓚᓚᐅᖅᐳᖅ ᐋᒍᔅᑎ 24-26−ᒧᑦ ᐊᒻᒪ ᓴᖅᑭᔮᖅᑎᑦᑎᓚᐅᖅᐳᖅ ᑭᒧᑐᐃᓐᓇᑦᑎᐊᓂ ᐃᑭᒪᓂᐅᔪᓂ ᐆᓇᖅᑐᒥ−ᐊᓂᕐᓂᒃᓴᒥ ᐳᕕᒑᓗᖕᒥ ᐃᒪᒃᑯᑦ−ᐱᓱᒍᑕᐅᔪᓐᓇᖅᑐᓂ ᐊᖅᓴᓂᑦ, ᐱᖅᑯᓯᑐᖃᖅᑎᒍᑦ ᐱᙳᐊᕐᓂᐅᔪᓂ ᐊᒻᒪ ᖃᓄᐃᓕᐅᕐᓂᐅᔪᓂᑦ, ᒥᑭᑦᑐᒥ ᐃᒫᖅᑎᑦᑎᕝᕕᐅᔪᒥ ᖃᑦᑕᕐᒥ, ᖃᔅᓯᒐᓚᖕᓂ ᖁᙱᐊᖅᑕᐅᔪᓂᑦ ᐃᙱᖅᑎᓂᑦ, ᐅᓄᖅᑐᓂ ᓱᕈᓯᕐᓄᑦ ᖃᓄᐃᓕᐅᕐᓂᐅᔪᓄᑦ, ᓄᓇᓕᖕᓂ ᓂᕆᕕᒡᔪᐊᖅᑎᑦᑎᓂᐅᔪᓂ, ᒧᒥᖅᑐᓂᑦ ᐊᒻᒪ fireworks-ᓂ ᓴᖅᑭᔮᖅᑎᑦᑎᓂᐅᔪᒥ.
Sydney Kataluk, left, and Sirah Avaala are having a blast inside a hot-air balloon during Festival by the Lake in Baker Lake from Aug. 24-26, 2018. photo courtesy Karen Yip
ᑭᐊᕆᓐ ᔨᑉ, ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓᓂ (ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᐅᑉ) ᓄᓇᓕᖕᓂ ᖃᐅᔨᒪᖃᑎᒌᖕᓂᕐᒧᑦ ᐊᐅᓚᑦᑎᔨ ᒥᐊᑐᐹᖕᒃ ᐊᕕᒃᓯᒪᓂᐅᔪᒥ ᖃᒪᓂᑦᑐᐊᕐᒥ, ᑐᓂᓯᓂᐊᖅᐳᖅ ᐱᓕᕆᓂᐅᔪᒥ ᐊᕐᕌᒍᓄᑦ ᑎᓴᒪᓄᑦ ᖃᓄᐃᓐᓂᐅᔪᒥ ᐊᐅᓚᑦᑎᓂᖃᖅᐸᓚᐅᕐᓂᖓᓂ.
ᔨᑉ ᐅᖃᓚᐅᖅᐳᖅ ᖁᕕᐊᓱᒍᑕᐅᔪᒥ ᑕᓯᕐᒥ ᐱᐅᔪᒻᒪᕆᐅᓪᓗᓂ ᖁᕕᐊᓱᒍᑕᐅᓂᐅᕗᖅ ᐊᒻᒪ ᐱᐅᑦᑎᐊᖅᖢᓂ ᖃᓄᐃᓐᓂᐅᔪᒥ ᓄᓇᓕᖕᓄᑦ ᑐᓂᓯᓂᖃᖅᑐᒥ ᐱᕕᒃᓴᖃᕐᓂᐅᔪᓂ ᐊᒻᒪ ᐱᕚᓪᓕᕈᑎᓂᑦ.
ᐅᖃᓚᐅᖅᐳᖅ ᖁᕕᐊᓱᒍᑕᐅᔪᖅ ᐱᒋᐊᕐᓂᕆᓚᐅᖅᑕᖓᓂ ᐱᒋᐊᓚᐅᖅᐳᖅ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᐅᑉ ᐃᓚᒌᓄᑦ ᐊᓕᐊᓇᐃᒍᓱᖕᓂᐅᔪᒥ ᐅᓪᓘᓂᖓᓂ ᑕᑯᓯᒪᔪᒥ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᐅᑉ ᐊᒻᒪ ᕼᐋᒻᓚᒃᑯᓐᓂ ᖃᒪᓂᑦᑐᐊᕐᒥ ᑲᑎᖃᑎᒌᒃᖢᑎᒃ ᑐᓂᓯᓂᕐᒧᑦ ᐱᕈᖅᐸᓪᓕᐊᓯᒪᔪᒥ ᐊᕕᒃᓯᒪᓂᐅᔪᒧᑦ ᖃᓄᐃᓐᓂᐅᔪᒥ ᐱᓕᕆᖃᑎᒌᒃᑐᒥ ᐊᑭᓖᖃᑕᐅᓲᓄᑦ ᓲᕐᓗ ᑳᓪᒻ ᐱᐊᕐ, ᐅᑭᐅᖅᑕᖅᑐᒥ ᐅᖅᓱᐊᓗᓕᕆᔨᐅᔪᓄᑦ, ᐊᒻᒪ ᐊᓯᖏᓐᓂ ᓄᓇᓕᖕᓂ−ᑐᙵᕕᓕᖕᓂ ᐱᓕᕆᖃᑎᒋᔭᐅᔪᓄᑦ.
“ᐅᑯᐊ ᐃᓄᐃᑦ ᐊᖏᕐᔪᐊᖅᑐᒥ, ᐃᑲᔪᕐᓂᕐᔪᐊᖑᓯᒪᕗᑦ ᐊᑭᓖᖃᑕᐅᓂᐅᔪᒥ ᐱᓕᕆᓂᐅᔪᓄᑦ,” ᐅᖃᓚᐅᖅᐳᖅ ᔨᑉ.
“ᐃᓱᒪᓂᐅᔪᖅ ᖁᕕᐊᓱᒍᑕᐅᓂᐅᔪᒥ ᖁᕝᕙᖅᓴᐃᓂᕐᒧᑦ ᖃᓄᐃᙱᑦᑎᐊᕐᓂᐅᔪᒥ, ᐊᓕᐊᓇᐃᒍᓱᖕᓂᕐᒥ, ᖁᙱᐊᖅᑎᑦᑎᓂᕐᒧᑦ ᐊᒻᒪ ᑲᔪᖏᖅᓴᐃᓂᐅᔪᒥ ᐃᓗᐊᓂ ᓄᓇᓕᖕᑦᑎᓐᓂ.
“ᐊᓕᐊᓇᐃᒍᓱᕐᔪᐊᕐᓂᖃᖅᐳᖓ ᐱᐅᔪᓂᑦ ᐃᖅᑲᐅᒪᔭᖃᕐᓂᓕᐅᖃᑕᐅᓪᓗᖓ ᓱᕈᓯᕐᓄᑦ – ᐊᒻᒪ ᐃᓐᓇᕐᓄᑦᑕᐅᖅ – ᐊᒻᒪ ᖁᕕᐊᓇᖅᐳᖅ ᓱᕈᓯᕐᓂ ᖁᖓᔮᖅᑐᓂ, ᐃᒡᓚᖅᑐᓂ ᐊᒻᒪ ᐊᓕᐊᓇᐃᒋᔭᖃᕐᓂᕐᒥ ᓱᕈᓯᐅᑐᐃᓐᓇᕐᓂᖏᓐᓂ ᕿᓚᒻᒥᐅᔪᒥ.
“ᖁᕕᐊᓱᒍᑕᐅᔪᖅ ᖃᓄᐃᓕᐅᕐᓂᙳᖅᓯᒪᕗᖅ ᓄᓇᓕᓕᒫᑦ ᖁᕕᐊᒍᑎᒋᓲᖓᓐᓂ ᑎᑭᓛᕐᓂᖓᓂ ᐊᕐᕌᒍᑕᒫᒥ.”
ᔨᑉ ᐅᖃᓚᐅᖅᐳᖅ ᖁᕕᐊᓱᒍᑕᐅᔪᒥ ᑕᓯᕐᒥ ᑐᓂᓯᓲᖑᒋᕗᖅ ᐱᕕᒃᓴᖃᕐᓂᐅᔪᒥ ᐊᓐᓄᕌᓄᑦ ᖁᙱᐊᖅᑕᐅᑎᑦᑎᓂᐅᔪᓂ ᑕᑯᒃᓴᐅᑎᑦᑎᔪᒥ ᓄᓇᓕᖕᓂ ᐱᒋᐊᕈᑕᐅᓯᒪᔪᓂᑦ ᓲᕐᓗ ᓴᐸᖓᓕᖕᓂ−ᐊᒪᐅᑎᓂᑦ ᐊᒻᒪ ᖁᓕᑦᑕᐅᔭᓕᐅᕐᓂᕐᒥ ᐱᓕᕆᐊᖑᔪᓂᑦ.
ᐅᖃᓚᐅᖅᐳᖅ ᖁᕕᐊᓱᒍᑕᐅᓂᐅᔪᖅ ᐃᑲᔪᓲᖑᒋᕗᖅ ᑕᑯᒃᓴᐅᑎᑦᑎᓂᐅᔪᒥ ᓄᓇᓕᖕᓂ ᓴᓇᔭᐅᓂᑯᓂ ᐊᒻᒪ ᐊᔪᙱᓐᓂᐅᔪᓂᑦ, ᐱᓕᕆᓂᖃᑦᑎᐊᖏᓐᓇᐅᔭᖅᖢᓂ ᓄᓇᓕᐅᔪᒥ.
“ᓲᕐᓗ, ᐃᓄᖕᓂ ᐃᙱᕈᓐᓇᑦᑎᐊᖅᑐᓂ ᑭᓯᐊᓂ ᐱᕕᒃᓴᖃᓗᐊᕈᓐᓇᙱᑦᑐᓂ ᑕᑉᐸᐅᙵᕆᐊᒃᓴᖅ ᐊᒻᒪ ᑕᑯᑎᑦᑎᓗᑎᒃ ᓄᓇᓕᖕᓂ ᖃᓄᐃᓕᐅᕈᓐᓇᕐᓂᖏᓐᓂ.
“ᑕᑯᒃᓴᐅᑎᑦᑎᓯᒪᒋᕗᒍᑦ ᓄᑖᖑᔪᓂ ᓇᖕᒥᓂᕆᔭᐅᔪᓂ ᓲᕐᓗ ᕕᐅᓇᐅᑉ ᓄᔭᓕᕆᕝᕕᖓᓂ.
“ᕕᐅᓇ (ᐊᖓᑕᔪᐊᖅ) ᓇᔭᓕᕆᓂᕐᒧᑦ ᐃᓕᓐᓂᐊᕆᐊᓚᐅᖅᐳᖅ ᐋᑐᕚᒥ ᐊᒻᒪ ᐅᑎᓚᐅᖅᖢᓂ ᖃᒪᓂᑦᑐᐊᕐᒧᑦ ᓇᖕᒥᓂᖃᕆᐊᖅᑐᖅᖢᓂ.
“ᑐᓂᓯᓚᐅᖅᐳᖅ ᐱᔨᑦᑎᕋᕐᓂᖓᓂ ᖁᕕᐊᓱᒍᑕᐅᓂᐅᔪᒧᑦ ᐊᑭᑦᑐᕋᐅᑎᓂᐅᔪᒧᑦ ᑕᒪᑐᒪᓂ ᐊᕐᕌᒎᔪᒥ ᐊᒻᒪ ᑐᓂᓯᓪᓗᓂ ᐱᕕᒃᓴᖃᕐᓂᐅᔪᒥ ᖁᕝᕙᖅᓴᐃᓂᖓᓄᑦ ᓇᖕᒥᓂᕆᔭᖓᓐᓂ, ᐊᒃᓱᕈᖅᖢᓂ ᐱᕈᖅᑎᓐᓇᓱᐊᖅᑕᖓᓂ.”
ᔨᑉ ᐅᖃᓚᐅᖅᐳᖅ ᐱᖓᓱᓂ ᐊᓯᖏᓐᓂ ᐃᓂᐅᔪᓂᑦ ᖁᕕᐊᓱᒍᑕᐅᓂᐅᔪᖅ ᖁᕝᕙᖅᓴᐃᑦᑎᐊᕐᓂᖃᓲᒥ ᒪᒃᑯᒃᑐᓅᖅᐳᑦ, ᐃᓱᒪᑐᓂᕐᒥ ᐊᒻᒪ ᐊᑭᓕᖅᑕᐅᓇᑎᒃ ᐃᑲᔪᕐᓂᐅᔪᒥ.
ᐅᖃᓚᐅᖅᐳᖅ ᐊᒃᓱᕈᑦᑎᐊᖅᑐᓂ ᐱᓕᕆᓪᓗᑎᒃ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᓂᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᒪᒃᑯᒃᑑᒐᔪᒃᖢᑎᒃ ᖁᑦᑎᖕᓂᓕᖕᓂ 8−ᓂ 11−ᒧᑦ.
“ᓴᖅᑭᑐᐃᓐᓇᓲᖑᙱᓚᑦ ᑲᑎᒪᓂᕐᓄᑦ ᑕᒪᒃᑭᑦᑎᐊᓄᑦ; ᑲᑎᒪᕝᕕᒃᓴᓕᐅᖅᑎᑦᑎᓲᖑᕗᑦ ᐅᕙᓐᓂᑦ ᑲᑎᖃᑎᒌᒍᒪᖕᒪᑕ ᐅᖃᐅᓯᖃᕐᓂᕐᒧᑦ ᐃᖏᕐᕋᓂᑦᑎᓐᓂ, ᐊᒻᒪ ᑕᒪᓐᓇ ᖁᔭᓕᓐᓇᑦᑎᐊᖅᑐᖅ.
“ᖁᕕᐊᑦᑎᐊᓲᖑᔪᖓ ᖁᕝᕙᖅᓴᐃᓂᕐᒧᑦ ᐊᒻᒪ ᑲᔪᖏᖅᓴᐃᓂᕐᒧᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᕐᓂᕐᒥᑦ ᐊᒻᒪ ᐱᐅᓂᐅᔪᓂ ᐃᓗᐊᓂ ᓄᓇᓕᖕᑦᑎᓐᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᐃᓂᖅ ᐊᑐᖅᑕᐅᒐᔪᙱᓐᓂᖅᓴᐅᓕᕐᒪᑦ ᑕᐃᔅᓱᒪᓂᐅᓚᐅᖅᑐᑎᑐᑦ.
“ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᕗᑦ ᑲᑎᙵᓂᑦᑎᐊᕙᒻᒪᕆᐅᕗᑦ ᐆᒻᒪᕆᒃᑐᓂ ᓱᕈᓯᕐᓂᑦ ᐱᔾᔪᑎᒃᓴᖃᕈᒪᔪᓄᑦ, ᖃᓄᐃᓕᐅᕋᒃᓴᒥᑦ, ᐊᒻᒪ ᐱᕕᒃᓴᖃᕐᓂᐅᔪᒥ ᐃᑲᔪᖅᑐᐃᓂᕐᒧᑦ ᓄᓇᓕᐅᑉ ᐃᓗᐊᓂ.
“ᐃᓚᖏᑦ ᐃᓱᒪᓲᖑᕗᑦ ᐃᓱᒪᓂᑐᐃᓐᓇᐅᓂᖓᓂ, ᑭᓯᐊᓂ ᐅᒃᐱᕈᓱᑦᑎᐊᖅᐳᖓ ᖃᔅᓯᒐᓚᐃᑦ ᐅᑯᓇᓂ ᓱᕈᓯᕐᓂᑦ ᓯᕗᓕᐅᖅᑎᒋᓛᖅᑕᕗᑦ ᖃᐅᑉᐸᐅᓛᖅᑐᒥ.”
ᑕᒪᑐᒪᓂ ᐊᕐᕌᒍᒥ ᖁᕕᐊᓱᒍᑕᐅᓂᐅᔪᖅ ᑎᑭᑎᑦᑎᓚᐅᖅᐳᖅ ᑕᑉᐸᐅᖓᒐᓚᒃ 1,500−ᓂ ᐃᓄᖕᓂ ᐅᓪᓗᓄᑦ−ᐱᖓᓱᓄᑦ ᐱᓕᕆᓂᐅᔪᒥ, ᐱᕈᖅᐸᓪᓕᐊᑐᐃᓐᓇᖅᑐᒥ ᐅᓄᕐᓂᐅᔪᓂ ᐳᓚᕋᖅᑐᓄᑦ ᖃᒪᓂᑦᑐᐊᕐᒧᑦ ᐊᕕᒃᓯᒪᓂᐅᔪᒥ.
ᔨᑉ ᐅᖃᓚᐅᖅᐳᖅ 2018−ᒥ ᖁᕕᐊᓱᒍᑕᐅᔪᒥ ᑕᓯᕐᒥ ᐱᕚᓪᓕᕈᑎᖃᓚᐅᕆᕗᖅ ᑎᓴᒪᓂ ᓄᓇᓕᖕᓂ ᑮᓇᐅᔭᓕᐅᕋᓱᐊᙱᑦᑐᓂᑦ ᐊᒻᒪ ᑲᑐᔾᔨᖃᑎᒌᖑᔪᓂᑦ ᐊᑉᓗᖅᑕ ᑲᑐᔾᔨᖃᑎᒌᖑᔪᓄᑦ, ᐆᓇᖅᑐᒥ ᐅᓪᓗᕈᒻᒥᑕᕐᓂᐅᔪᒥ ᐱᓕᕆᐊᖑᔪᒥ, ᖃᒪᓂᑦᑐᐊᕐᒥ ᒪᒃᑯᒃᑐᓄᑦ ᐱᙳᐊᖅᑎᒐᓚᖕᓄᑦ ᑲᑐᔾᔨᖃᑎᒌᖑᔪᓂᑦ ᐊᒻᒪ ᖃᒪᓂᑦᑐᐊᕐᒥ ᒥᑭᓐᓂᖅᓴᓄᑦ ᕼᐋᑭᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ.
ᐅᖃᓚᐅᖅᐳᖅ ᑐᓂᔭᐅᓂᐊᖅᐳᑦ ᑮᓇᐅᔭᓕᐊᖑᔪᓄᑦ ᐱᕈᖅᑎᑕᐅᔪᓂ ᖃᔅᓯᒐᓚᖕᓂ ᖁᕕᐊᓱᒍᑕᐅᓂᐅᔪᓂ ᖃᓄᐃᓕᐅᕐᓂᐅᔪᓄᑦ.
“ᐅᕙᓐᓄᑦ, ᐱᐅᓂᕐᔪᐊᖑᖃᑕᐅᔪᖅ ᓴᖅᑭᑦᑐᒥ ᐊᕐᕌᒍᓄᑦ ᑎᓴᒪᓄᑦ ᖁᕕᐊᓱᒍᑕᐅᓂᐅᔪᒥ ᑲᔪᖏᖅᓴᐃᓂᐅᒐᔪᒃᑐᓂ ᐅᓂᒃᑳᖑᔪᓂ ᑐᓴᖅᐸᒃᑕᕐᓂ ᐊᒥᓱᓂ ᐃᓚᐅᖃᑕᐅᔪᓄᑦ, ᓲᕐᓗ ᐊᕐᕌᒍᒥ ᒪᕐᕉᖕᓂ ᐊᖑᑎᓂᑦ ᑯᑭᑦᑕᐹᙳᐊᕐᓂᐅᔪᓂ ᐃᓱᐊᓂ ᖁᙱᐊᕐᕕᖓᓐᓂ ᑕᒪᒃᑭᑦᑎᐊᕐᒥ ᖁᙱᐊᖅᑕᐅᓂᐅᔪᒥ ᐱᓕᕆᐊᖑᔪᒥ Midnight News ᑲᖏᖅᖠᓂᕐᒥᐅᑕᓂᑦ.
“ᖁᕕᐊᓱᒍᑕᐅᓂᐅᔪᖅ ᐃᑲᔪᓲᖑᕗᖅ ᐱᔪᒪᔭᐅᓂᔪᓂ ᐱᕈᖅᓴᐃᓂᕐᒥ, ᑲᔪᖏᖅᓴᐃᓂᕐᒥ ᐱᑕᖃᕈᓐᓇᕐᓂᐅᔪᓂ ᐊᒻᒪ ᓴᖅᑭᑎᑦᑎᓂᕐᒥ ᖁᕕᐊᓱᖕᓂᐅᔪᓂ ᐃᖅᑲᐅᒪᓂᐅᔪᓂᑦ.”
“ᐊᓕᐊᓇᐃᒋᔭᐅᕐᔪᐊᖅᓯᒪᕗᖅ ᐊᕐᕌᒍᓂ ᑎᓴᒪᓂ ᐊᐅᓚᓂᖓᓂ, ᐊᒻᒪᓗ ᓯᕗᒻᒧᑦ ᐃᖏᕐᕋᐃᓐᓇᕐᓂᐊᖅᑐᒃᓴᐅᕗᖅ ᐱᔪᓐᓇᑦᑎᐊᖅᑐᓂ ᐃᓄᖕᓂ ᐃᓇᖏᖅᓯᓗᑎᒃ 2019−ᒧᑦ ᐱᓕᕆᓂᐅᓂᐊᖅᑐᒧᑦ.”
ᔨᑉ ᐅᖃᓚᐅᖅᐳᖅ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᑎᓴᒪᓄᑦ ᖁᕕᐊᓱᒍᑕᐅᔪᒥ ᑕᓯᕐᒥ ᑐᓂᓯᓯᒪᕗᖅ ᖃᒪᓂᑦᑐᐊᕐᒥ ᑭᒡᓕᐅᔪᒥ ᖁᙱᐊᖅᑕᐅᓂᐅᔪᒥ ᓄᓇᓖᑦ ᐊᑐᕋᔭᓚᐅᙱᑦᑕᒃᓴᕆᔭᖓᓐᓂ ᐊᓯᐊᒍᑦ.
ᐅᖃᓚᐅᖅᐳᖅ ᖁᕕᐊᓱᒍᑕᐅᓂᐅᔪᖅ ᑕᑯᒃᓴᐅᑎᑦᑎᓯᒪᕗᑦ ᐊᓕᐊᓇᐃᒋᔭᐅᑦᑎᐊᖅᑐᒥ ᐃᐅᓪᕕᔅᒥ ᐃᔾᔪᐊᖅᓯᓲᒥ, ᓄᓇᕐᔪᐊᒥ ᓇᓗᓇᐃᖅᓯᒪᔪᓄᑦ ᐃᒡᓗᑭᓵᖅᑎᓂᑦ, ᐃᖃᐃᓕᓴᖅᑏᑦ, ᔭᐃᒃ ᓴᓂᐅᕐ, Trade-Offs, Midnight News, ᐊᒻᒪ ᐱᐅᒻᒪᕆᒃᑐᓂ ᑲᓚᐅᓐᓂ ᓄᓇᕕᖕᒥ ᑯᓘᐱᓐ ᓚᓅᐃᓐ ᐊᒻᒪ ᒥᔅᑕ ᓅᓄ.
“ᑕᒪᑐᒪᓂ ᐊᕐᕌᒎᔪᒥ ᑕᑯᒃᓴᐅᑎᑦᑎᓯᒪᕗᒍᑦ ᐊᒥᓱᐊᓗᖕᓂ ᐃᓄᖕᓂ ᑭᕙᓪᓕᕐᒥ ᐊᕕᒃᓯᒪᓂᐅᔪᒥ ᓲᕐᓗ ᐋᓚᓐ ᕗᐊᓯ ᑎᑭᕋᕐᔪᐊᕐᒥᐅᑕᖅ, ᓂᔾᔮᑎᑦᑎᔨ ᓛᔅ ᐊᕐᕕᐊᕐᒥᐅᑕᖅ ᐊᒻᒪ ᖃᒪᓂᑦᑐᐊᕐᒥ ᑎᑕᒃᑏᑦ.
“ᐅᐸᒃᑎᑦᑎᓇᓱᐊᕐᓂᐅᔪᒧᑦ Winnipeg's Prairie Exotics−ᑯᑦ ᓇᒃᓴᓚᐅᖅᐳᑦ snakes ᐊᒻᒪ ᐋᓯᕙᖏᓐᓂ, ᐊᒻᒪᓗ ᐊᒥᓱᐊᓗᐃᑦ ᓱᕈᓰᑦ ᑲᒪᕐᔪᐊᓚᐅᖅᐳᑦ ᑖᒃᑯᓂᖓ.
“ᐃᒪᒃᑯᑦ−ᐱᓱᒍᑕᐅᔪᓂ ᐊᖅᓴᖃᓚᐅᕆᕗᒍᑦ, ᓄᓇᕗᒻᒥ ᓯᕗᓪᓕᖅᐸᐅᔪᒥ zip-line ᐊᒻᒪᓗ, ᓲᖃᐃᒻᒪ, ᐆᓇᖅᑐᒥ−ᐊᓂᕐᓂᒃᓴᒥ ᐳᕕᒑᓗᖕᒥ.
“ᐊᒻᒪᓗ,ᐊᕐᕌᒍᒐᓴᓂ, ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑐᓂ ᐊᓐᓄᕌᖅᓯᒪᓪᓗᑎᒃ ᐃᓄᙳᐊᖑᕙᒃᑐᓂ ᑕᓚᕖᓴᒃᑯᑦ ᑕᑯᒃᓴᐅᓂᐅᓲᖑᔪᓂ ᓲᕐᓗ Frozen ᐊᒻᒪ Paw Patrol−ᒥ, ᐊᒻᒪ ᓱᕈᓰᑦ ᑐᑮᕈᑎᖃᑦᑕᖅᓯᒪᕗᑦ ᑖᒃᑯᓄᖓ.”
ᔨᑉ ᐅᖃᓚᐅᖅᐳᖅ ᖁᕝᕙᕆᐊᖅᑎᑦᑎᓯᒪᕗᖅ ᓄᓇᓕᖕᓂ ᐃᒃᐱᒋᓂᕆᔭᖏᓐᓂ ᐅᐸᒃᑕᐅᓂᐅᕙᒃᖢᓂ ᖃᓄᐃᓐᓂᐅᔪᒥ ᐃᓄᐃᑦ ᐸᕐᓇᒃᐸᒃᑐᓂ ᐃᓚᐅᖃᑕᐅᓂᕐᒧᑦ.
ᐅᖃᓚᐅᖅᐳᖅ ᓄᓇᓕᓕᒫᓄᑦ ᖁᕕᐊᓱᒍᑕᐅᓂᐅᕗᖅ ᐊᑐᐃᓐᓇᖃᖅᑎᑦᑎᓪᓚᕆᒃᑐᒥ ᓱᕈᓯᕐᓄᑦ ᖃᓄᑐᐃᓐᓇᖅ ᐅᑭᐅᓕᖕᓄᑦ
“ᐊᔭᐅᕆᓇᓱᐊᓲᖑᕗᒍᑦ ᐃᓄᖕᓂ ᐃᓚᐅᖃᑕᐅᓂᖏᓐᓄᑦ, ᐊᓯᐊᓂ ᐱᓕᕆᓇᓱᐊᕐᓂᒃᑯᑦ, ᐃᑲᔫᑎᖃᕈᓘᔭᖅᖢᑕ ᐊᒻᒪ ᐃᓱᒪᕈᓘᔭᖅᐸᒃᖢᑕ ᐊᒥᓱᓂ ᖃᓄᐃᓕᐅᕐᓂᐅᔪᓂ ᐋᖅᑭᒃᓱᖅᑕᑦᑎᓐᓂ.
“ᖃᐅᔨᒪᐃᓐᓇᐅᔭᖅᓯᒪᕗᖓ ᐃᓄᖕᓂ ᐃᑲᔪᕈᑎᖃᕈᓘᔭᓲᖑᓂᖏᓐᓂ, ᐃᓱᒪᑐᓪᓗᑎᒃ ᐊᒻᒪ ᓴᓇᕈᓘᔭᖅᐸᒃᖢᑎᒃ ᐃᓅᓪᓗᑎᒃ, ᑕᐃᒫᒃ ᐱᐅᒻᒪᕆᒃᐳᖅ ᑕᑯᒃᓴᐅᑎᑦᑎᓂᕐᒥ ᑖᒃᑯᓂᖓ ᐊᔪᙱᓐᓂᐅᔪᓂ ᑭᒃᑯᓕᒫᓂ ᑕᑯᔭᐅᓂᐊᕐᒪᑕ ᖃᓄᖅ ᐃᓄᐃᑦ ᓄᓇᓕᑦᑎᓐᓂ ᐱᔪᓐᓇᕐᓂᖏᓐᓄᑦ ᐊᒻᒪ ᖃᓄᖅ ᑲᔪᖏᖅᓴᐃᓲᖑᓂᖏᓐᓂ ᑕᐃᒪᐃᓕᐅᖃᑕᐅᓂᕐᒧᑦ.
“ᑐᒃᓯᕋᕐᕕᐅᓯᒪᕗᒍᑦ ᐊᒥᓱᓂ ᑎᑕᒃᑎᓂᑦ ᐊᒻᒪ ᖁᙱᐊᖅᑕᐅᕙᒃᑐᓂᑦ ᐃᓚᐅᖃᑕᐅᓂᕐᒧᑦ ᖁᕕᐊᓱᒍᑕᐅᓂᐅᔪᒥᑦ ᐅᕝᕙᓘᓐᓃᑦ ᐊᑐᐃᓐᓇᖃᖅᑎᑕᐅᓗᑎᒃ ᐱᕕᒃᓴᖃᕐᓂᐅᔪᒥ ᐅᑎᒃᑲᓐᓂᕐᓂᕐᒧᑦ – ᐅᐃᓂᐸᐃᒡᒥ, ᓄᓇᕕᖕᒥ ᐊᒻᒪ ᓄᓇᓕᖕᓂ ᐊᕕᒃᓯᒪᓂᐅᔪᓕᒫᒥ – ᑕᒪᓐᓇ ᑕᑯᒃᓴᐅᑎᑦᑎᕗᖅ ᖁᕕᐊᓱᒍᑕᐅᓂᐅᔪᖅ ᐊᖏᒡᓕᕙᓪᓕᐊᓂᖓᓂ, ᖃᐅᔨᒪᔭᐅᕙᓪᓕᐊᓕᕐᓂᖓᓂ ᐊᒻᒪ ᐊᓕᐊᓇᐃᒋᔭᐅᓪᓗᓂ.”