ᐱᕙᓪᓕᐊᑎᑦᑎᓂᖅ ᓇᖕᒥᓂᖃᕐᓂᕐᒥᒃ

9-ᒋᓕᖅᑕᖓᓂᒃ ᐅᑭᐅᑕᒫᒃᑯᑦ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᖃᑦᑕᓕᖅᑎᓪᓗᒋᑦ ᐊᒥᓲᓂᖅᐹᑦ ᐃᓚᐅᖃᑕᐅᓂᖃᓚᐅᖅᑐᑦ ᐱᓇᓱᐊᕈᓯᐅᓵᖅᑐᒥ ᑲᖏᖅᖠᓂᕐᒥ.
ᖃᓄᐃᓕᐅᖅᑎᑦᑎᕈᓘᔭᓚᐅᖅᑐᑦ ᓯᑎᐱᕆ 24-ᒥ 26-ᒧᑦ ᐊᒻᒪᓗ ᐊᒥᓲᓚᐅᖅᖢᑎᒃ ᐅᖃᓪᓚᒋᐊᖅᑐᖅᓯᒪᔪᑦ, ᒥᖅᓱᖅᑏᓪᓗ ᓴᓇᙳᐊᖅᑏᑦ ᓴᓇᓯᒪᔭᕐᒥᓂᒃ ᓂᐅᕕᐊᒃᓴᖃᓚᐅᖅᖢᑎᒃ, ᐊᓐᓄᕌᓕᐊᖑᓯᒪᔪᓪᓗ ᐊᑐᖅᑕᐅᑉᓗᑎᒃ ᑕᑯᒃᓴᐅᑎᑕᐅᓚᐅᖅᖢᑎᒃ, ᓇᖕᒥᓂᓖᓪᓗ ᖃᓄᐃᓕᐅᖅᑎᑕᐅᕈᓘᔭᓚᐅᖅᖢᑎᒃ, ᓄᓇᓕᖕᒥᓗ ᐃᒻᖏᖅᑏᑦ ᑎᑕᒃᑏᑦ ᑕᑯᒃᓴᐅᑎᑕᐅᓚᐅᖅᖢᑎᒃ, ᓂᕆᕕᒡᔪᐊᖅᑎᑕᐅᑉᓗᑎᒡᓗ, ᐃᓕᑕᕆᔭᐅᔾᔪᑎᓂᒃ ᑐᓂᐅᖅᑲᐃᑉᓗᑎᒃ ᐊᒻᒪᓗ ᒧᒥᖅᖢᑎᒃ ᐅᒃᑯᐊᖅᐸᓪᓕᐊᓕᖅᑎᓪᓗᒍ.
ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐃᓅᓯᓕᕆᓂᕐᒧᑦ ᑲᒪᔨᖓ ᓵᒻ ᑐᑕᓐᓄᐊᖅ ᑭᒡᒐᖅᑐᐃᖃᑦᑕᖅᓯᒪᔪᖅ ᑎᒥᖁᑎᒋᔭᐅᔪᓂᒃ ᑕᐃᒪᐃᓕᐅᖅᑎᓪᓗᒋᑦ ᐅᑭᐅᓂ ᖄᖏᖅᓯᒪᔪᓂᒃ.
ᑐᑕᓐᓄᐊᖅ ᐅᖃᓚᐅᖅᑐᖅ ᓇᖕᒥᓂᓖᒡᒎᖅ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᑎᓪᓗᒋᑦ ᐅᔾᔨᕐᓇᖅᓯᒃᑲᓐᓂᓚᐅᖅᑐᖅ ᓇᖕᒥᓂᖅᑖᖑᔪᓐᓇᖅᑐᓂᒃ ᓴᓇᕝᕕᒃᑖᖑᔪᓐᓇᖅᑐᓂᒡᓗ ᑭᕙᓪᓕᕐᒥ.

ᐅᖃᖅᖢᓂᓗ ᑕᐃᒪᐃᓕᐅᖅᑎᓪᓗᒋᑦ ᐃᑲᔪᕈᓐᓇᖅᑐᑦ ᑮᓇᐅᔭᓕᐅᕐᕕᐅᔪᓐᓇᖅᑐᑦ ᐃᓚᐅᖃᑕᐅᑎᑕᐅᓚᐅᕐᓂᖏᓐᓄᑦ.
"ᐊᒥᓱᑦ ᐅᑭᐅᑦ ᐱᐊᓂᒃᓯᒪᓕᕋᓗᐊᖅᑎᓪᓗᒋᑦ, ᐱᓕᕆᖃᑎᒋᔭᐅᔪᓐᓇᖅᑐᑦ ᓇᓗᓇᐃᖅᑕᐅᕙᓪᓕᐊᔪᑦ, ᓇᓗᓇᐃᖅᑕᐅᓯᒪᓪᓚᑦᑖᖅᑐᒃᑯᑦ ᓇᓗᓇᐃᖅᑕᐅᓯᒪᓪᓚᑦᑖᙱᑦᑐᒃᑯᓪᓘᓐᓃᑦ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᑎᓪᓗᒋᑦ," ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ.
"ᐃᓱᒪᓇᖃᑦᑕᖅᑑᒐᓗᐊᖅ ᑕᐃᑉᑯᐊᑦᑕᐃᓐᓇᖅ ᐃᓄᐃᑦ ᑎᑭᖃᑦᑕᕐᓂᖏᓐᓄᑦ ᑭᓯᐊᓂ ᓄᑖᒥᒃ ᐱᑕᖃᐃᓐᓇᓲᖅ ᐊᒻᒪᓗ ᓄᑖᓂᒃ ᐱᓕᕆᖃᑎᖃᕐᓇᖅᓯᓲᖅ ᑎᑭᓯᒪᑎᓪᓗᒋᑦ.
"ᑕᐃᒪᐃᓕᐅᖅᑎᓪᓗᒋᑦ ᓴᖅᑭᔮᕐᓂᖅᓴᐅᓕᖃᑦᑕᕐᒥᔪᑦ ᒥᖅᓱᖅᑏᑦ ᓴᓇᙳᐊᖅᑏᓪᓗ ᓄᓇᕐᔪᐊᕐᒥ ᐊᒻᒪᓗ, ᑕᐃᒪᑐᖅ ᓂᐅᕕᕐᕕᐅᑦᑎᐊᖃᑦᑕᕐᓕᕐᓂᐊᖅᐳᑦ ᑭᕙᓪᓕᕐᒥ ᒥᖅᓱᖅᑏᑦ ᓴᓇᙳᐊᖅᑏᓪᓗ."
ᑐᑕᓐᓄᐊᖅ ᑕᐅᑐᕐᕉᖅᑐᖅ ᖃᐅᒪᔪᒥᒃ ᓯᕗᓂᒃᓴᒥ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᖃᑦᑕᕐᓂᐊᖅᑎᓪᓗᒋᑦ. ᐅᖃᖅᖢᓂᓗ ᑕᒪᓐᓇᒎᖅ ᓯᕗᓂᒃᓴᒥ ᑕᐅᑐᒃᑕᖓ ᓴᖅᑮᓐᓇᖃᑦᑕᕐᓂᐊᕐᓂᖓᓄᑦ.
"ᑲᖏᖅᖠᓂᖅ ᐱᕈᖅᐸᓪᓕᐊᖏᓐᓇᕐᒪᑦ, ᐊᓯᖏᑦᑎᑐᑦ ᓄᓇᓕᒃᑎᑐᑦ ᑭᕙᓪᓕᕐᒥ, ᐱᒋᐊᓕᓵᖅᖢᑕᓗ ᐱᔪᓐᓇᖅᑕᑉᑎᓐᓂᒃ ᑎᒍᓯᕙᓪᓕᐊᓂᕐᒧᑦ ᓇᓗᓇᙱᖦᖢᓂ ᑕᐃᒫᓗᐃᑦ ᓱᓕ ᐱᔪᓐᓇᖅᑕᖅᐳᑦ, ᑕᐃᒪᐃᒻᒪᑦ ᐅᑭᐅᓂᒃ ᖃᐃᔪᓂᒃ ᑕᐃᒪᐃᓕᐅᖏᓐᓇᖃᑦᑕᕐᓂᐊᖅᑐᒍᑦ ᐱᕚᓪᓕᕈᑕᐅᓂᐊᖅᑐᓂᒃ."
ᑕᐃᕕᑎ ᕗᕆᑦᓚᓐ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᖃᑦᑕᖅᑎᓪᓗᒋᑦ ᑲᑎᒪᔨᓂᒃ ᑲᑎᒪᔨᐅᖃᑕᐅᔪᖅ, ᐅᖃᓚᐅᖅᑐᖅ ᐊᒥᓲᓂᖅᐹᒡᒎᖅ ᐃᓚᐅᖃᑕᐅᖅᑲᐅᔪᑦ ᑕᐃᒪᙵᓂ ᑕᐃᒪᐃᓕᐅᖃᑦᑕᓕᖅᑎᓪᓗᒋᑦ ᐅᑉᓗᒥᒧᑦ.
ᐅᖃᖅᖢᓂᓗ ᑕᒪᓐᓇᒎᖅ ᐱᒻᒪᕆᐊᓗᒃ ᑭᕙᓪᓕᕐᒥᐅᓄᑦ ᑮᓇᐅᔾᔭᒃᓴᕈᑕᐅᔪᓐᓇᖅᑐᓄᑦ, ᓇᖕᒥᓂᖁᑎᒋᔭᐅᔪᑦ ᐱᓕᕆᖃᑎᒌᖕᓂᖅᓴᐅᓕᖅᑎᓪᓗᒋᑦ ᓴᖅᑭᔮᖅᑎᑕᐅᔪᓂᒃ.
"ᐊᒻᒪᓗ, ᑕᑯᑉᓗᓂ ᖃᓄᖅ ᑕᒪᓐᓇ ᓴᖅᑭᔮᖅᑎᑦᑎᓂᖅ ᖃᓄᖅ ᐱᕚᓪᓕᖅᑎᑦᑎᓯᒪᖕᒪᖔᑦ ᑲᖏᖅᖠᓂᕐᒥ, ᑕᑯᔪᓐᓇᖅᑐᓯ ᓯᓂᒃᑕᕐᕖᑦ ᐃᓂᖃᕈᓐᓃᖅᓯᒪᖕᒪᑕ ᑕᒡᕙᓂ ᐱᓇᓱᐊᕈᓯᕐᒥ, ᐊᒻᒪᓗ ᓲᖃᐃᒻᒪ ᑕᒪᕐᒥᒃ ᓂᕆᕝᕖᑦ ᐱᕚᓪᓕᖅᓯᒪᑉᓗᑎᒃ, ᓂᐅᕕᕐᕖᓪᓗ ᐊᒻᒪᓗ ᐱᕚᓪᓕᖅᑎᑦᑎᓯᒪᖕᒥᔪᖅ ᒥᖅᓱᖅᑎᐅᔪᓂᒃ ᓴᓇᙳᐊᖅᑎᓂᒡᓗ." ᑕᐃᒪᓐᓇ ᐅᖃᖅᖢᓂ ᕗᕆᑦᓚᓐ.
"ᒥᖅᓱᖅᑏᑦ ᐊᒻᒪᓗ ᒥᖅᓱᒐᖏᑦ ᐃᖕᒥᒃᑯᑦ ᐱᓕᕆᐊᖑᖃᑦᑕᖅᓯᒪᔪᑦ, ᑕᒡᕘᓇᓗ ᓴᖅᑭᔮᖅᑎᑦᑎᓂᐅᔪᒃᑯᑦ ᐃᑲᔫᑕᐅᕙᒃᑐᖅ ᐃᖕᒥᓂᒃ ᑮᓇᐅᔭᓕᐅᕐᓂᒃᑯᑦ, ᑕᒪᓐᓇ ᐊᒃᑯᐊᓂᖃᖅᖢᓂ ᓇᖕᒥᓂᖃᕐᓂᒃᑯᑦ, ᐊᒻᒪᓗ ᓴᖅᑭᔮᕐᓂᖅᓴᐅᓕᖅᐸᒃᖢᑎᒃ ᑕᑯᔭᐅᓯᒪᓂᖅᓴᐅᓕᖅᖢᑎᒡᓘᓐᓃᑦ ᒥᖅᓱᖅᑏᑦ ᓴᓇᙳᐊᖅᑏᑦ ᓄᓇᑉᑎᓐᓂᒃ ᐊᒻᒪᓗ ᑭᕙᓪᓕᕐᒥᐅᑕᑦ ᑎᑭᑉᐸᒃᑐᑦ ᐃᓚᐅᖃᑕᐅᓂᐊᕐᓂᕐᒧᑦ ᓴᖅᑭᔮᖅᑎᑦᑎᔪᓂᒃ.
ᕗᕆᑦᓚᓐ ᐅᖃᖅᖢᓂ ᑲᖏᖅᖠᓂᕉᖅ ᐱᕈᖅᐸᓪᓕᐊᖏᓐᓇᕐᒪᑦ, ᐱᕈᖅᐸᓪᓕᐊᑉᓗᓂᓗ ᐅᔭᕋᖕᓂᐊᕐᓂᖅ ᐅᔭᕋᒃᓯᐅᕐᓂᕐᓗ ᑭᕙᓪᓕᕐᒥ, ᑕᐃᒪᐃᒻᒪᑦ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᖃᑦᑕᕐᓂᖏᑦ ᐱᕈᖅᐸᓪᓕᐊᑐᐃᓐᓇᕐᓂᐊᖅᑐᖅ.