Skip to content

ᐱᖃᓐᓇᑐᖃᖏᑦ ᐃᑲᔪᖅᑐᑦ

ᐊᓄᕆᕐᔪᐊᖅ Irma ᓯᐊᕈ ᐊᒻᒪ ᓕᓄᑦ ᕗᐊᑉᔅᑯᑦ ᐱᖁᑎᖏᓐᓂᒃ ᓱᕋᒃᑎᕆᓚᐅᖅᐳᖅ ᐊᓄᕆᕐᔪᐊᓚᐅᖅᖢᓂ ᑕᐅᓇᓂ  Providenciales, Turks ᐊᒻᒪ Caicos Islands ᑕᖅᑭᐅᓚᐅᖅᑐᒥ.

ᑭᓯᐊᓂ ᐱᐅᖏᓐᓂᖅᓴᐅᓇᔭᓚᐅᖅᐳᖅ.

ᓯᐊᕈ ᕗᐊᑉᔅ ᑎᒃᑯᐊᖅᑐᖅᑐᖅ ᓱᕋᒃᓯᒪᔪᒥᒃ ᐅᐃᖓᓗ, ᓕᓄᑦ ᖃᐅᔨᓴᖅᑎᓪᓗᒋᑦ ᓱᕋᒃᑎᒃᓯᒪᔪᓂᒃ ᐊᖏᕐᕋᖏᓐᓂ ᐊᓄᕆᕐᔪᐊᓚᐅᖅᑎᓪᓗᒍ Irma−ᒥᒃ ᑕᖅᑭᐅᓚᐅᖅᑐᒥ. photo courtesy of Cheryl Forbes

“ᓯᓂᒡᕕᑉᑎᓐᓂ ᐃᒡᓗᑕᒦᖏᓐᓇᓚᐅᕈᑉᑕ ᑐᖁᒐᔭᓚᐅᖅᐳᒍᑦ ᓵᑦᑐᓂᒃ ᐅᔭᕋᖕᓂᒃ ᑲᑕᒡᕕᐅᓚᐅᕐᒪᑦ ᐃᒡᓕᒃᐳᖅ, ᑕᐃᒪᓐᓇ ᐃᖢᐃᓪᓕᐅᕈᑎᖃᓚᐅᖅᐳᒍᑦ,” ᐅᖃᓚᐅᖅᐳᖅ ᓯᐊᕈ.

ᓯᐊᕈ ᐅᑭᐅᓕᒃ 69ᓂᒃ, ᐅᑭᐅᓄᑦ 21-ᓄᑦ ᑲᖏᖅᖠᓂᕐᒥᐅᑕᐅᓚᐅᖅᐳᖅ ᐃᓕᓐᓂᐊᖅᑎᑎᔨᐅᑉᓗᓂᓗ ᐊᒻᒪ ᐃᓕᓐᓂᐊᓕᓵᖅᑐᓄᑦ ᐊᖓᔪᖄᕆᔭᐅᑉᓗᓂ, ᐊᒻᒪ ᐅᑭᐅᓄᑦ 7-ᓄᑦ ᓇᐅᔮᓂᒥᐅᑕᐅᓚᐅᖅᖢᓂ, ᓕᓄᑦ ᐱᓕᕆᓚᐅᖅᖢᓂ ᐅᑭᐅᓄᑦ 17-ᓄᑦ ᓂᐅᕕᕐᕕᖕᒥ ᑲᖏᖅᖠᓂᕐᒥ ᐊᒻᒪ ᐊᑕᐅᓯᕐᒥᒃ ᐅᑭᐅᒥ ᕼᐊᒻᓚᒃᑯᓐᓄᑦ ᑲᑎᒪᔨᐅᖃᑕᐅᑉᓗᓂ.

ᑖᒃᑯᐊ ᐅᐃᒌᒃ ᐊᐅᓪᓚᓚᐅᖅᓯᒪᕗᑦ ᑲᖏᖅᖠᓂᕐᒥᑦ 2005-ᒥᑦ ᑕᐅᓄᖓ ᓄᓇᖃᕆᐊᖅᑐᖅᖢᑎᒃ  Providenciales.

ᓯᐊᕈ ᐅᖃᓚᐅᖅᐳᖅ ᐊᓄᕆᕐᔪᐊᖅ  Irma ᐱᕐᔪᐊᓛᖑᓚᐅᖅᐳᖅ ᐊᓄᕆᓂᖓ ᑕᐃᒪᖓᓗᒃᑖᖅ.

ᐅᖃᓚᐅᖅᖢᓂᓗ ᐃᒻᒪᖄ 100 ᑖᒃᑯᓇᖓᑦ 120-ᓂᑦ ᐃᒡᓗᕐᔪᐊᑦ ᓄᓇᖓᓂ ᓱᕋᒃᑎᖅᑕᐅᓚᐅᖅᐳᑦ, ᑭᓯᐊᓂ ᐅᐃᖓᓗ ᓕᓄᑦ ᓱᕋᒃᑎᖅᑕᐅᓛᖑᖃᑕᐅᑉᓗᓂ ᐃᒡᓗᖓᑦ ᑕᒪᕐᒥᓗᒃᑖᑲᓴᒃ ᖁᓛᖓᑦ ᐃᒡᓗᖓᓐᓂ ᑎᒃᑕᐅᓚᐅᖅᖢᓂ.

“ᐃᖢᐊᕐᓂᖅᓴᐅᓚᐅᖅᐳᖅ, ᐸᓂᒃᑐᑐᐊᖑᓚᐅᖅᐳᖅ ᒥᖅᓱᕐᕕᒐ ᑕᐃᑲᓃᒍᓐᓇᓚᐅᖅᖢᑕᓗ, ᑭᓯᐊᓂ ᐊᑯᓂᐅᑎᒋᔪᖅ 6 ᐃᑲᕋᐃᑦ ᑕᐃᑲᓃᒋᐊᖃᓚᐅᖅᐳᒍᑦ,” ᐅᖃᓚᐅᖅᐳᖅ ᓯᐊᕈ.

“ᐊᓄᕆᖅᐸᓗᒃ ᓲᕐᓗ ᓄᓇᒃᑰᕈᑎᕐᔪᐊᖅ ᐊᖅᑯᓵᖅᑐᖅ ᑕᐃᒪᓐᓇ ᓂᐱᖃᓚᐅᖅᐳᖅ ᐃᓗᐊᓂ ᐃᒡᓗᕐᔪᐊᑉᑕ, ᑐᓴᕐᓴᐅᑉᓗᑎᒡᓗ ᑎᒃᑕᐅᔪᑦ ᑐᖃᑦᑕᖅᑐᑦ ᐃᒡᓗᑉᑕ ᓴᓂᕋᖏᓐᓄᑦ, ᑕᓚᕕᓴᐃᓪᓗ ᑲᑕᒃᐸᓗᒃᑐᑦ ᐊᒻᒪ ᓱᓇᑐᐃᓐᓇᐃᑦ ᓯᖁᑉᑎᖅᐸᓗᒃᑐᑦ.

ᓯᐊᕈ ᐊᒻᒪ ᓕᓄᑦ ᓯᓂᓕᓚᐅᖅᐳᒃ ᐊᓄᕆᑐᒍᓐᓃᖅᐸᓪᓕᐊᓕᕐᒪᑦ, ᑭᓯᐊᓂ ᑐᐹᖅᑕᐅᓚᐅᖅᖢᑎᒃ ᓴᓂᓕᒥᐅᑕᖓᑦ ᑲᓱᒃᑐᓕᕐᒪᑦ ᐃᒐᓛᖓᒍᑦ ᖃᓄᐃᖏᒃᑲᓗᐊᕐᒪᖔᑕ ᖃᐅᔨᓴᖅᖢᓂ.

ᐊᓂᒐᒥᒃ, ᐱᑕᖃᓚᐅᖅᐳᖅ 6 ᐃᓐᓯᓯᓂᒃ ᐃᑉᔪᑎᒋᔪᒥᒃ ᓇᑎᖓᓂ ᓵᒃᑐᓂᒃ ᐅᔭᕋᖕᓂᒃ ᐊᒻᒪ ᐃᑭᐊᒥᑕᕐᓂᒃ.

“ᑲᑉᐱᐊᓇᑦᓯᐊᓚᐅᖅᐳᖅ,” ᐅᖃᓚᐅᖅᐳᖅ ᓯᐊᕈ.

“ᐊᓄᕆᑐᒍᓐᓃᕋᓗᐊᖅᑎᓪᓗᒍ, ᐃᒡᓗᕐᔪᐊᑉᑕ ᖁᓛ ᓱᓕ ᑐᓴᖅᓴᐅᓚᐅᖅᐳᖅ ᐊᐅᓚᔪᖅ, ᖃᐅᔨᒪᓚᐅᖏᑉᐳᒍᓪᓗ ᑲᑕᖕᓂᐊᕐᒪᖔᑦ.”

ᐊᓄᕆᑐᕐᔪᐊᖅᑐᖅ ᐅᕐᕈᑎᑦᓯᓚᐅᖅᐳᖅ 500-ᓂᒃ ᓇᐸᔪᕐᓂᒃ ᓴᕕᒐᔭᐅᔭᓂᒃ ᑕᐃᑲᓂ ᕿᑭᖅᑕᒥ, ᓯᐊᕈ ᐅᖃᓚᐅᖅᐳᖅ. ᑕᖅᑭᓗᒃᑖᑉ ᐅᖓᑖᓄᑦ ᖃᐅᒻᒪᖁᑎᖃᓚᐅᖏᑉᐳᑦ.

ᓯᐊᕈ ᐊᒻᒪ ᓕᓄᑦ ᐱᖃᓐᓇᕆᔭᒥᖕᓃᓚᐅᖅᐳᑦ ᓯᓂᒃᑕᕐᖢᑎᒃ ᒪᕐᕉᖕᓄᑦ ᐅᓐᓄᖕᓄᑦ, ᐊᒻᒪ ᐊᑕᐅᓯᕐᒥᒃ ᐃᒡᓗᑕᖃᖅᑐᒥᒃ ᐃᒡᓗᒧᐊᖅᑎᑕᐅᑉᓗᑎᒃ ᐱᖃᓐᓇᕆᔭᖓᓄᑦ ᐊᖏᕐᕋᖅ ᐊᖏᕐᕋᖃᖅᑐᖅ ᐊᐃᕋᓚᓐᒦᓐᓂᖓᓂ.

ᑖᒃᑯᐊ ᓯᓂᒃᑕᓚᐅᖅᐳᑦ ᑕᐃᑲᓂ ᐃᒡᓗᖓᓂ ᐅᓐᓄᖕᓄᑦ ᑕᓪᓕᒪᓄᑦ, ᑭᓯᐊᓂ, ᖃᐅᒻᒪᖁᑎᖃᖏᑦᖢᑎᒃ ᐊᒥᓱᓄᑦ ᑮᔭᐅᖃᑦᑕᓚᐅᖅᐳᑦ ᕿᒃᑐᕆᐊᓄᑦ ᓯᓂᒃᑎᑕᐅᑦᓯᐊᕈᓐᓇᖏᑦᖢᑎᒃ ᐆᓇᕐᓂᖃᖅᖢᓂᓗ ᓄᓇᖓᑦ 90ᓂᑦ 100-ᓄᑦ ᐅᓐᓄᑕᒫᑦ.

ᑭᓯᐊᓂ, ᖃᓄᐃᓚᐅᖏᑉᐳᑦ ᓯᐊᕈ ᐊᒻᒪ ᓕᓄᑦ, ᐊᒻᒪ ᑲᖏᖅᖠᓂᕐᒥᐅᑕᓂᑦ ᐃᑲᔪᖅᑕᐅᓚᐅᕐᒪᑕ.

ᓯᐊᕈ ᐅᖃᓚᐅᖅᐳᖅ ᖁᐊᖅᓵᓚᐅᖅᐳᖅ ᓵᓕ ᑯᓱᒐᒃ ᐊᒻᒪ ᑭᓕ−ᑲᓛᒃ−ᓕᓐᑎᐅ ᑮᓇᐅᔭᓂᒃ ᐱᕈᖅᓴᐃᓚᐅᕐᓂᕐᒪᑕ ᐅᐃᒌᓄᑦ ᑲᖏᖅᖠᓂᕐᒥᐅᑕᐃᑦ, ᐊᒻᒪ ᐱᐊ ᐱᐊᓯ ᑮᓇᐅᔭᓂᒃ ᐱᕈᖅᓴᐃᓚᐅᕆᑉᓗᓂ ᐃᑲᔪᖅᑕᐅᒍᑎᒃᓴᖏᓐᓄᑦ.

ᐃᑲᔪᖅᑕᐅᒋᐊᖃᓪᓚᕆᖕᓂᖏᓐᓂ ᐃᑲᔪᖅᑕᐅᓚᐅᖅᐳᑦ.

“ᑲᖏᖅᖠᓂᕐᒥᑦ ᐊᐅᓪᓚᖅᓯᒪᑎᒋᓕᖅᐳᒍᑦ ᐅᑭᐅᓄᑦ 13-ᑲᓴᖕᓄᑦ, ᖁᐊᖅᓵᓚᐅᖅᐳᒍᓪᓗ ᐃᓄᐃᑦ ᓱᓕ ᐃᖅᑲᐅᒪᓐᓂᕐᒪᑕ ᐅᕙᑉᑎᓐᓂᒃ ᑕᐃᒪᓐᓇᓗ ᐃᑲᔪᕈᒪᓚᐅᖅᖢᑎᒃ. ᐊᒃᓱᕈᖅᓯᒪᓕᖅᐳᖓ, ᑐᓂᓯᒋᐊᖃᕐᓂᖅᓴᐅᓇᓱᒋᖃᑦᑕᕋᒪ, ᐱᑎᑕᐅᖏᖔᕐᓗᖓ, ᑭᓯᐊᓂ ᖁᔭᓐᓇᒦᑦᓯᐊᖅᐸᒃᑲ ᐊᒃᓱᒻᒪᕆᐊᓗᒃ ᑕᐃᒪᓐᓇ ᐃᑲᔪᖅᓯᒪᓂᖏᓐᓄᑦ,” ᐅᖃᓚᐅᖅᐳᖅ.

“ᓕᓄᓪᓗ ᖁᔭᓐᓇᒦᑦᓯᐊᖅᐳᒍᒃ ᐃᑲᔪᖅᑕᐅᑦᓯᐊᓚᐅᕋᑉᑕ.”

ᓱᓕ ᐅᑕᕿᕗᑦ ᓇᓪᓕᐅᒃᑯᒫᓕᕆᔨᒃᑯᓐᓂᑦ ᖃᓄᐃᓕᐅᖅᑕᐅᓂᐊᕐᒪᖔᕐᒥᒃ.

ᓯᐊᕈ ᐅᖃᓚᐅᖅᐳᖅ ᑕᒪᒃᑯᐊ ᑮᓇᐅᔭᐃᑦ ᐱᕈᖅᓴᖅᑕᐅᓯᒪᔪᑦ ᐅᑭᐅᖅᑕᖅᑐᒥᑦ ᐱᖃᓐᓇᕆᔭᖏᓐᓂᑦ ᐊᑐᖅᑕᐅᑦᓯᐊᕐᓂᐊᖅᐳᑦ.

ᐅᖃᓚᐅᖅᖢᓂᓗ ᐱᕐᓗᐊᕿᒍᑕᐅᓚᐅᖅᑐᖅ ᐃᖢᐊᖅᑐᒥᒃ ᐱᒍᑕᐅᕙᖕᒪᑦ ᐃᓄᖕᓄᑦ, ᐊᒻᒪ ᑲᖏᖅᖠᓂᕐᒥᐅᑦ ᐱᐅᑉᓗᑎᒃ.

“ᓯᕗᓪᓕᖅᐹᑦᓯᐊᒥ ᑕᐃᒪᓐᓇ ᑐᓂᔭᐅᓯᒪᓕᖅᐳᖓ ᐃᑲᔪᖅᑕᐅᓯᒪᓕᖅᐳᖓᓗ ᑕᐃᒪᓐᓇ ᐱᑎᑕᐅᑐᐃᓐᓇᕈᒪᖏᒃᑲᓗᐊᖅᐳᖓ, ᑭᓯᐊᓂ ᐊᒃᓱᕈᖅᖢᓂ ᕿᐱᓗᒋᐊᖃᕐᓇᖏᒻᒪᑦ,” ᐅᖃᓚᐅᖅᐳᖅ.

“ᐊᓈᓇᒐ ᑐᖁᓚᐅᕐᒪᑦ ᐱᓇᓱᐊᕈᓯᐅᓚᐅᖅᑐᒥ ᐊᓄᕆᕐᔪᐊᓚᐅᖏᓐᓂᐊᓂ, ᑕᐃᒪᓐᓇᐃᓚᐅᕈᓗᐊᖅᑎᓪᓗᒍ ᐊᓄᕆᕐᔪᐊᖅ ᕿᒃᓵᕈᓐᓇᖅᓯᓚᐅᖏᑉᐳᖓ ᓱᓕ. ᑭᓯᐊᓂ ᖃᐅᔨᒪᕗ ᓕᓄᑦᓗ ᖁᔭᓐᓇᒦᑦᓯᐊᕋᒻᓄᑦ ᑕᐃᒪᓐᓇ ᐃᑲᔪᖅᑕᐅᓯᒪᑉᓗᑕ ᖁᔭᓐᓇᒦᖅᐸᕗᓪᓗ ᑕᒪᕐᒥᒃ ᐃᓄᐃᑦ.”