ᑲᖏᖅᖠᓂᖅ ᐱᖓᔪᐊᒍᑦ ᓵᓚᒃᓴᕋᓱᖕᓂᐊᖅᑐᑦ Hᐊᑭᓕᕐᒥᒃᐸᑕ Hᐊᑭᑎᑦᑎᑎᓪᓗᒋᑦ ᑳᒻ ᐃᐊᒃᑯᑦ ᑎᒥᖕᓲᓕᕆᔨᒃᑯᑦ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᐊᖑᑎᑦ Hᐊᑭᕐᓂᐊᖅᑎᓪᓗᒋᑦ ᐊᕐᕕᐊᓂ ᔭᓄᐊᕆ 24-ᒥ 27-ᒧᑦ.
NNSL file photo
ᑐᒡᓕᕆᔭᐅᔪᖅ Hᐊᑭᕕᒡᔪᐊᕐᓂᐅᖃᑦᑕᖅᑐᒃᑯᑦ ᑭᕙᓪᓕᕐᒥ, ᔮᓐ ᓕᓐᑎᐅ ᐃᖅᑲᐅᒪᑉᓗᒍ Hᐊᑭᕕᒡᔪᐊᕐᓂᐅᔪᖅ ᖁᓕᓂᒃ Hᐊᑭᖃᑎᒌᒃᐸᒃᑐᓄᑦ ᐅᐸᒃᑕᐅᓂᐊᖅᑐᖅ ᑕᒡᕙᓂ ᐅᑭᐅᒥ, ᐊᕐᕕᓂᓕᐅᔪᑦ A-ᒥ ᐊᒻᒪᓗ ᓯᑕᒪᑦ B-ᒥ ᐊᕕᒃᑐᖅᓯᒪᔪᒃᑯᑦ.
A-ᒥ ᐱᙳᐊᖅᑏᑦ ᐱᙳᐊᖃᑎᖃᕐᓂᐊᖅᑐᑦ ᒪᕐᕈᐃᕐᓗᑎᒃ ᐊᑐᓂ ᐱᙳᐊᖅᑎᓂᒃ ᐱᒋᐊᕈᑎᒃᑯᑦ ᖁᕝᕙᕆᐊᕐᓂᒃᑯᑦ ᐱᙳᐊᖃᑎᖃᕆᐊᖅᑳᕐᓇᑎᒃ, ᐱᒋᐊᒃᑲᓐᓂᕐᒥᓗᑎᒃ ᑐᒡᓕᕆᔭᐅᔪᑦ ᐱᙳᐊᖃᑎᖃᕐᓗᑎᒃ ᐱᖓᔪᒋᔭᐅᔭᔪᓂᒃ A-ᒥ ᐊᒻᒪᓗ B-ᒥ. ᓵᓚᒃᓴᖅᑐᑦ ᐱᙳᐊᖃᑎᖃᓕᕐᒥᓗᑎᒃ ᓯᕗᓪᓕᖅᐸᐅᑎᔪᓂᒃ ᒪᕐᕉᖕᓂᒃ A-ᒥ ᐱᐊᓂᒃᐸᓪᓕᐊᓂᕐᒧᑦ ᑐᕌᕐᓗᑎᒃ.
B-ᒥ ᐱᙳᐊᖅᑏᑦ ᐱᒡᒍᓴᐅᔾᔪᐊᕐᓂᐊᖅᑐᑦ ᐲᖅᑕᐅᕙᓪᓕᐊᓂᒃᑯᑦ (ᒪᕐᕈᐃᖅᑕᕐᓗᑎᒃ ᓵᓚᐅᔪᑦ ᐲᖅᑕᐅᓗᑎᒃ) ᓵᓚᒃᓴᖅᑐᖃᕐᓗᓂ ᑕᒪᐃᓐᓄᑦ.
ᐊᕐᕕᓂᓖᑦ ᐱᙳᐊᖃᑎᒌᒃᑏᑦ ᐱᒡᒍᓴᐅᔾᔪᐊᖅᑐᑦ A-ᒥ ᐱᙳᐊᕐᓂᐊᖅᑐᑦ ᒪᕐᕉᓕᖓᔪᓂᒃ, A-ᒥ ᐅᑯᐊᖑᓂᐊᖅᑐᑦ ᑲᖏᖅᖠᓂᖅ A, ᑭᕙᓪᓕᕐᒥᐅᑦ ᐊᒻᒪᓗ ᑎᑭᕋᕐᔪᐊᖅ, ᐊᒻᒪᓗ B-ᒥ ᐊᕐᕕᐊᕐᒥᐅᑦ Arctic Connection, ᖃᕆᑕᒃᑯᑦ ᐊᒻᒪᓗ ᖃᒪᓂ'ᑐᐊᕐᒥᐅᑕᑦ.
B-ᒥ ᓵᓚᒃᓴᕋᓱᖕᓂᐊᖅᑐᑦ ᐊᕐᕕᐊᑦ, ᐊᕐᕕᐊᑦ Legend-ᑯᑦ, ᐊᕐᕕᐊᑦ Kings, ᐊᒻᒪᓗ ᑲᖏᖅᖠᓂᖅ B.
ᑕᒪᑐᒥᙵ ᐸᕐᓇᐃᔨ ᒋᓕᓴᓐ ᐅᒃᐸHᐅᐊᖅ ᐅᖃᖅᖢᓂ ᑕᒪᑐᒥᙵᒎᖅ ᓄᑖᒥᒃ ᐊᑐᖅᑕᐅᓂᐊᖅᑐᒥᒃ ᐱᒋᐊᖅᑎᑦᑎᒋᐊᒃᓴᖅ ᖁᕕᐊᓱᒃᑐᖅ ᐊᓕᐊᓇᐃᒋᔭᐅᓂᐊᖅᑐᕉᖅ ᐱᙳᐊᖅᑎᓄᑦ ᑕᐅᑐᒋᐊᖅᑐᖅᓯᒪᔪᓄᓪᓗ ᖃᐅᔨᒪᒐᒥᐅᒃ.
ᐅᖃᖅᖢᓂ B-ᒥᒎᖅ ᐱᙳᐊᖅᑎᓪᓗᒋᑦ ᐱᐊᓂᒃᓴᕙᓪᓕᐊᔪᑦ ᐊᔾᔨᐅᙱᓐᓂᖅᓴᐅᔪᑦ ᐊᑐᖅᑕᐅᖃᑦᑕᖅᓯᒪᔪᒥᒃ ᐃᒪᓐᓇᐃᒻᒪᑦ, ᒪᕐᕉᓕᖅᐸᑕ ᐱᙳᐊᖃᑎᒌᒃᑏᒃ, ᐱᖃᑎᖓ ᓵᓚᒃᓴᕐᓂᖅᓴᐅᔪᖅ ᓵᓚᒃᓴᖅᑎᑕᐅᓯᒪᓂᐊᕐᒪᑦ ᓈᓴᐅᑏᑦ ᑕᐃᒪᐅᒐᓗᐊᖅᑎᓪᓗᒋᑦ ᑕᐃᑯᙵ ᑎᑭᓪᓗᒍ.
"ᐱᕈᖅᐸᓪᓕᐊᓯᒪᒐᑉᑕ ᐅᑭᐅᓂᒃ ᖄᖏᖅᓯᒪᔪᓂᒃ JLM ᐱᒋᐊᓚᐅᖅᑎᓪᓗᒍ ᐅᑉᓗᒥᒧᑦ - ᒫᓐᓇᐅᔪᖅ ᑕᐃᒎᓯᕆᓕᖅᑕᖓ ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ ᐃᕐᒧᓯᖅᑖᖅᑎᑦᑎᓂᕆᕙᒃᑕᖏᑦ - ᐱᒋᐊᓚᐅᖅᓯᒪᔪᑦ ᖁᓕᑦ ᐅᑭᐅᑦ ᐅᖓᑖᓂ," ᑕᐃᒪᓐᓇ ᐅᖃᖅᖢᓂ ᐅᑉᐸHᐅᐊᖅ.
"ᖃᐅᔨᒪᔪᖓ ᑲᖏᖅᖠᓂᕐᒥᐅᑦ A ᐱᙳᐊᖅᑎᖏᑦ ᓵᓚᒃᓴᕈᒪᓂᐊᖅᑐᑦ ᓯᐊᕐᕆᔮᓕᑐᐊᕈᑎᒃ.
"ᑕᒪᕐᒥᒃ ᐱᙳᐊᖃᑎᒌᖕᓂᐊᖅᑐᑦ ᐊᑎᖏᑦ ᖃᐃᑕᐅᓯᒪᓕᖅᑐᑦ ᐊᑯᓂᐅᓕᖅᑐᖅ ᐊᒻᒪᓗ ᑕᑯᔭᐅᔪᓐᓇᖅᑐᑦ Facebook-ᑯᑦ.
"ᑕᒪᕐᒥᒃ ᐃᑎᖅᑎᑦᑎᒋᐊᕐᓂᐅᓂᐊᖅᑐᑦ, ᐱᕕᒃᓴᕆᔭᐅᔪᑦ, ᓄᖅᑲᖓᓐᓂᐅᓂᐊᖅᑐᑦ ᐊᒻᒪᓗ ᕿᑎᖕᓂᖏᑦ ᐱᔾᔪᑎᒃᓴᖃᑦᑎᐊᕐᓂᐊᖅᑐᑦ Hᐊᑭᒋᐊᓕᖅᐸᑕ ᐱᒋᐊᖅᑎᑦᑎᓂᒃᑯᑦ ᑕᒡᕘᓇ."
ᐅᒃᐸHᐅᐊᖅ ᐅᖃᖅᖢᓂ ᐊᕐᕕᐊᕐᒥᐅᑦ ᐸᕐᓇᒃᓯᒪᑦᑎᐊᕐᓂᖏᓐᓄᑦ ᑕᒡᕙᓂ ᐅᑭᐅᒥ ᐊᒻᒪᓗ ᓄᓇᖅᑲᑎᒌᑦ ᓂᕆᐅᑦᑎᐊᖅᑐᑦ ᑎᑭᑕᐅᓂᐊᕐᓂᕐᒥᓄᑦ.