ᐱᙳᐊᖅ ᑲᑐᔾᔨᖃᑎᒌᖑᔪᑦ ᕿᓂᖅᐳᑦ ᐱᓕᕆᖃᑎᖃᕐᓂᕐᒥ ᓄᓇᕗᒻᒥ-ᑐᙵᕕᓕᖕᒥ ᐃᓄᖕᓂ ᓴᓇᐅᒐᓕᕆᔨᐅᔪᓂᑦ ᐃᑲᔪᕐᓂᕐᒧᑦ ᓴᓇᖃᑎᖃᕐᓂᖏᓐᓂ ᖃᕋᓴᐅᔭᑎᒍᑦ ᐱᓕᕆᕝᕕᐅᔪᓂ ᖁᕝᕙᖅᓴᐃᓂᕐᒧᑦ ᐃᓄᐃᑦ ᓴᓇᐅᒐᖏᓐᓂ ᑲᑐᔾᔨᖃᑎᒌᒡᓗᑎᒃ Nordicity–ᒥ ᐃᓚᒋᔭᐅᓗᓂ 'ᐃᓄᐃᑦ ᓴᓇᐅᒐᖏᓐᓂ ᑐᓐᓂᖅᓴᖅᑕᐅᓂᖓᓂ ᐊᒻᒪᓗ ᓂᐅᕕᐊᒃᓴᐅᔭᖅᑐᕐᓂᖓᓂ' ᐱᒋᐊᕈᑕᐅᔪᒥ.
"ᕿᓂᖅᐳᒍᑦ ᓴᖅᑭᑎᑦᑎᓂᕐᒥ ᐱᓕᕆᓗᑎᒃ ᑲᑎᙵᓂᐅᔪᒥ 15–ᐸᓗᖕᓂ ᓴᓇᐅᒐᓕᕆᔨᐅᔪᓂᑦ ᐃᓚᐅᖃᑕᐊᓂᐊᖅᑐᓂ ᓴᓇᖃᑎᖃᕐᓂᖏᓐᓂ ᐅᑯᓂᖓ ᐱᓕᕆᕝᕕᐅᔪᓂ ᐊᒻᒪᓗ ᑕᐃᑲᓂᓗᒃᑖᖅ ᐃᓅᓯᕆᓂᐊᖅᑕᖓᓂ ᐱᓕᕆᐊᒃᓴᐅᔪᒥ," ᐅᖃᓚᐅᖅᐳᖅ ᒪᕇᐊ ᑰᑦᔅ, ᐱᙳᐊᒃᑯᑦ ᑐᑭᒧᐊᒃᑎᑦᑎᔨᖓ ᐱᕙᓪᓕᐊᑎᑦᑎᓂᕐᒧᑦ ᐊᒻᒪ ᐊᓯᐊᒎᖅᑐᓄᑦ ᐱᓕᕆᐊᒃᓴᐅᔪᓄᑦ.
ᐊᑐᓂ ᐃᓚᐅᖃᑕᐅᔪᒥ ᓴᓇᐅᒐᓕᕆᔨ ᐱᓂᐊᖅᐳᖅ ᑲᑎᒪᔨᐅᔾᔪᓯᐊᕐᒥ $200–ᒥ ᐊᑐᓂ ᐃᓕᓐᓂᐊᖅᑎᑦᑎᓂᐅᔪᒥ ᐊᒻᒪᓗ ᐃᓕᓴᕆᔭᐅᓂᐊᖅᐳᖅ ᓴᓇᖃᑎᖃᕐᓂᐅᖃᑕᐅᔪᓂ ᐊᒻᒪᓗ ᑕᑯᒃᓴᐅᑎᑕᐅᓗᑎᒃ ᐱᙳᐊᖅ ᐃᑭᐊᖅᑭᕕᖓᓐᓂ.
"ᑐᕌᒐᒃᓴᖓ ᓴᖅᑭᑎᑦᑎᓂᕐᒧᑦ ᖃᕋᓴᐅᔭᑎᒍᑦ ᐆᒃᑑᑎᐅᓂᐊᖅᑐᒥ ᐃᑲᔪᖅᓱᐃᓂᐊᖅᑐᒥ ᓴᓇᐅᒐᓕᕆᔨᐅᔪᓂᑦ ᐊᔾᔨᒌᙱᑦᑑᑕᐅᔪᓂ ᐱᓕᕆᓂᐅᔪᓂ. ᐱᒻᒪᕆᐅᕗᖅ ᖃᓂᑦᑐᒥ ᐱᓕᕆᖃᑎᒌᓲᖑᒐᑦᑕ ᐊᒻᒪᓗ ᑲᑐᔾᔨᖃᑎᒌᒃᖢᑕ ᓴᓇᐅᒐᓕᕆᔨᐅᔪᓂᑦ ᓴᓇᖃᑎᖃᕐᓂᖏᓐᓂ ᑭᓱᓂ ᐅᑯᐊ ᐱᓕᕆᕝᕕᐅᔪᑦ ᑕᐅᑦᑐᖃᕐᓂᐊᕐᓂᖓᓐᓂ."
ᐊᑐᓂ ᐃᓚᐅᖃᑕᐅᔪᒥ ᓴᓇᐅᒐᓕᕆᔨ ᐱᓂᖅᐊᐳᖅ ᐊᑭᖃᙱᑦᑐᒥ ᓴᓇᐅᒐᓕᕆᓂᕐᒧᑦ ᑲᑎᖃᑎᒌᖕᓂᐅᔪᒥ ᑲᑎᙵᔪᓂ ᐃᓚᖃᕐᓂᐊᖅᑐᒥ:
- ᖃᕋᓴᐅᔭᑎᒍᑦ ᐊᑐᐃᓐᓇᖃᕐᓂᕐᒥ ᐱᓕᕆᔾᔪᑕᐅᔪᒥ
- ᖃᕋᓴᐅᔭᑎᒍᑦ ᐱᔨᑦᑎᕋᕐᓂᐅᔪᖅ ᑎᓴᒪᓂ ᑕᖅᑭᓂ ᐊᑭᓕᖅᑕᐅᓯᒪᕙᒌᖅᑐᒥ ᖃᕋᓴᐅᔭᒃᑰᕈᑎᒥᒃ ᐊᑐᓂ ᐱᓕᕆᐊᒃᓴᒧᑦ ᐱᓕᕆᓂᐅᔪᒧᑦ
- ᖃᕋᓴᐅᔭᒥᒃ ᐊᑑᑎᓕᖕᓂ ᐊᕿᑦᑐᒥᑦ ᐱᓕᕆᔾᔪᑎᖏᓐᓂ Zoom–ᖃᕐᓗᓂ, ᑎᑎᖅᑲᓕᐅᕈᒻᒥ ᐊᕿᑦᑐᒥ ᐱᓕᕆᔾᔪᑎᖏᓐᓂ ᐊᒻᒪ ᖃᕋᓴᐅᔭᒃᑰᕈᑎᒥᒃ ᕿᒥᕐᕈᐊᕈᓐᓇᐅᑎᒥᒃ ᐃᓕᓯᒪᕙᒌᖅᑐᓂ
- ᖄᒃᑲᓐᓂᐊᒍᑦ ᓱᓇᒃᑯᑖᓂ ᓲᕐᓗ worksheets, ᐱᓕᕆᓂᕐᒧᑦ ᑎᑎᕋᕐᕕᒃᓴᑦ, ᑎᑎᕋᐅᑎᓂᒃ ᐊᒻᒪ ᐲᔭᐃᔾᔪᑎᓂᑦ
ᐃᓕᓐᓂᐊᕈᑎᓂᑦ ᖃᓄᖅ ᖃᕋᓴᐅᔭᒃᑰᕈᓐᓇᕐᓂᕐᒧᑦ ᐊᒻᒪᓗ ᖃᓄᖅ ᐃᓚᐅᖃᑕᐅᔪᓐᓇᕐᓂᖏᓐᓂ ᖃᕋᓴᐅᔭᑎᒍᑦ ᐃᓕᓐᓂᐊᕐᓂᐅᔪᓂ
ᐱᙳᐊᑉ ᑐᕌᒐᒃᓴᖓ ᐃᑲᔪᕐᓂᕐᒧᑦ ᐊᖏᒡᓕᒋᐊᖅᑎᑦᑎᓂᕐᒥ ᓇᓂᓯᔪᓐᓇᕐᓂᐅᔪᒥ ᐊᒻᒪ ᑐᓐᓂᖅᓴᐃᓂᖓᓂ ᐃᓄᐃᑦ ᓴᓇᐅᒐᓕᕆᔨᐅᔪᓂᑦ.
"ᐱᓕᕆᔪᒪᕗᒍᑦ ᑲᑐᔾᔨᖃᑎᒌᒡᓗᑕ ᓴᓇᐅᒐᓕᕆᔨᐅᔪᓂᑦ ᑭᐅᓂᕐᒧᑦ ᐃᓚᖏᓐᓂ ᐊᑲᐅᙱᓕᐅᕈᑕᐅᔪᓂ ᐊᒻᒪᓗ ᐊᒃᓱᕈᕈᑕᐅᕙᒃᑐᓂ ᐃᓄᐃᑦ ᓴᓇᐅᒐᖏᓐᓂ ᓯᓚᑎᖃᑎᒌᖑᔪᓄᑦ ᐅᕘᓇ ᐱᕙᓪᓕᐊᑎᑦᑎᓂᐅᔪᒥ ᖃᕋᓴᐅᔭᑎᒍᑦ ᐱᓕᕆᕝᕕᐅᔪᒥ. ᕿᓂᖅᐳᒍᑦ ᕿᒥᕐᕈᓂᕐᒧᑦ ᖃᓄᖅ ᓴᖅᑭᑎᑦᑎᔪᓐᓇᕐᓂᑦᑎᓐᓂ ᐊᒻᒪ ᐊᑐᕐᓂᕐᒧᑦ ᖃᕋᓴᐅᔭᑎᒍᑦ ᐱᓕᕆᕝᕕᐅᔪᒥ ᐃᑲᔪᖅᓱᐃᑦᑎᐊᒃᑲᓐᓂᕈᓐᓇᕐᓂᕐᒧᑦ ᐃᓄᐃᑦ ᓴᓇᐅᒐᖏᓐᓂ," ᑰᑦᔅ ᐅᖃᓚᐅᖅᐳᖅ.
ᐱᙳᐊᖅ ᑲᑐᔾᔨᖃᑎᒌᖑᔪᑦ ᐸᖕᓂᖅᑑᒥ-ᑐᙵᕕᓕᖕᒥ ᑮᓇᐅᔾᔭᒃᓴᒐᓱᐊᙱᓐᓂᐅᔪᒧᑦ ᑲᑐᔾᔨᖃᑎᒌᖑᕗᖅ ᐱᒋᐊᓚᐅᖅᑐᒥ 2012–ᒥ ᐃᓚᓕᐅᔾᔨᔪᒥ STEAM (ᖃᐅᔨᓴᕐᓂᕐᒥ, ᓄᑖᙳᖅᐸᓪᓕᐅᓂᐅᔪᓂ, ᓴᓇᔭᐅᓯᒪᓂᐊᖅᑐᓂᒃ ᐋᖅᑭᒃᓱᐃᓂᕐᒧᑦ ᑎᑎᕋᐅᔭᖅᑎᓂ, ᓴᓇᐅᒐᓕᕆᓂᕐᒥ ᐊᒻᒪ ᓇᐃᓴᐅᓯᕆᓂᕐᒥ) ᑕᐅᑐᒃᑕᑐᐊᖃᑲᐃᓐᓇᖅᑐᒥ ᑐᓂᓯᓂᕐᒥ ᐊᑐᓕᒪᓂᕐᒥ ᐃᓕᓐᓂᐊᕐᓂᐅᔪᓂ ᐊᒻᒪᓗ ᐱᕙᓪᓕᐊᑎᑦᑎᓂᐅᔪᒥ ᓄᓇᓕᐸᐅᔭᒥᐅᙱᑦᑐᖅ ᐊᒻᒪ ᐅᖓᓯᒃᑐᓂ ᓄᓇᓕᐅᔪᓄᑦ ᑲᓇᑕᒥ.
ᓄᓇᕗᒻᒥ-ᑐᙵᕕᓕᖕᓂ ᐃᓄᐃᑦ ᓴᓇᐅᒐᓕᕆᔨᐅᔪᑦ ᐃᓚᐅᖃᑕᐅᔪᒪᔪᓄᑦ ᐆᒥᖓ ᖃᐅᔨᒋᐊᕈᓐᓇᖅᐳᑦ ᐱᙳᐊᕐᒧᑦ ᐅᕗᖓ courtney@ pinnguaq.com ᐅᕝᕙᓘᓐᓃᑦ ᐅᖃᓗᒡᓗᑎᒃ 1-705-879-5761–ᒧᑦ. ᐱᔪᒪᔪᑦ ᓴᓇᐅᒐᓕᕆᔨᐅᔪᑦ ᐊᐱᕆᔭᐅᕗᑦ ᑐᓂᓯᓂᖏᓐᓂ ᐊᑎᖓᓐᓂ, ᓄᓇᓕᖓᓐᓂ ᐊᒻᒪ ᓇᐃᑦᑐᒥ ᐅᓂᒃᑳᕆᓂᐅᔪᒥ ᓴᓇᐅᒐᓕᕆᓂᕐᒧᑦ ᐊᑐᖅᐸᒃᑕᖓᓂ ᐊᒻᒪᓗ ᑭᓱᒧᑦ ᐱᓕᕆᐊᕆᓂᕆᔭᖏᓐᓂ.